Sobre

nag-abot ng munting sobre

ang pulubing nanghihingi

nabigay ko'y pamasahe

at lakad akong umuwi

- gbj/09.16.2022

Kislap ng diwa

kumikislap ang diwa

nitong abang makata

ideyang di mawala

heto na't ginagawa

sa kislap ng panulat

ang masa'y minumulat

habang sa puso'y bakat

ang nabahaw na sugat

- gbj/09.16.2022

Di pipi

tahimik ako ngunit di pipi

na basta sinasalya sa tabi

may karapatan ding masasabi

na hindi papayag magpaapi

- gbj/09.16.2022

Pusang uhaw

PUSANG UHAW

sige lang, pusa, dapat matighaw

ang iyong nararamdamang uhaw

tubig baha man o galing kanal

kung sa uhaw ay di makatagal

buti naman at naiinom mo

ang bigay ng kalikasang ito

tubig mang mula ulan o bagyo

ay makakatighaw ngang totoo

habang ako nama'y nanonood

na pagmasdan ka'y kinalulugod

galing man ang tubig sa alulod

ay nakainom kang di hilahod

di ka tulad naming mamamayan

na boteng tubig, bibilhin naman

mahal man ang presyo'y babayaran

mawala lamang ang kauhawan

- gregoriovbituinjr.

09.13.2022

* nakunan ng bidyo ang pusang ito sa isang bangketang nadaanan ng makatang gala

* tingnan ang bidyo sa https://www.facebook.com/100076390892462/videos/758842921844382

Umaga umuga, umiga ang sapa

UMAGA UMUGA, UMIGA ANG SAPA

UMAGA nang lindol naramdaman

tila ba iyon na'y katapusan

UMUGA ang buong kalupaan

hanap agad ay makakanlungan

UMIGA ang sapa't lalamunan

ang mga hayop ay atungalan

gunita sa isang lalawigan

na gagawin ay di ko malaman

lalo na't tila pinagsakluban

na noon ng lupa't kalangitan

ah, mag-ingat tayo, kababayan

ang ganito'y ating paghandaan

- gregoriovbituinjr.

09.13.2022

Tula sa kapayapaan

Di ako nakadalo sa miting ng PAHRA (Philippine Alliance of Human Rights Advocates) ng 2pm. May kasabay, nakadalo ako sa miting ng grupong PAGGAWA (Pagkakaisa ng Uring Manggagawa) sa Diokno Hall sa CHR (Commission on Human Rights). Trade Union Action Day for Peace ng WFTU (World Federation of Trade Unions). Sa talakayan ay nakagawa ako ng tula, at nang ako'y tinawag ay binigkas ko ang sumusunod na tula:

TULA SA KAPAYAPAAN

Alay sa Trade Union Action Day for Peace

kapayapaan, imperyalistang gera'y itigil

ang buhay ng tao'y di dapat basta kinikitil

digmaan ng mga bansa'y sinong makapipigil

baka nuclear misayl, gamitin ng bansang sutil

kaya nararapat lamang ang ating panawagan

na baguhin ang bulok na sistema ng lipunan

sa pangarap na mundo, hangad ay kapayapaan

may kaginhawahan ang lahat, di lang ang iilan

O, uring manggagawa, dapat tayong magtulungan

tayo'y magkapitbisig, imperyalismo'y labanan

ang mapagsamantalang kapitalismo'y wakasan

ang sosyalismo'y tahakin, baguhin ang lipunan

- gregoriovbituinjr.

09.06.2022

Salin ng tulang Fragments of Olympian Gossip ni Nikola Tesla

Mumunting Tipak ng mala-Olimpyang Tsismis

Tula ni Nikola Tesla

Malayang salin ni Gregorio V. Bituin Jr.

16 pantig bawat taludtod

Habang nakikinig ako / sa kosmikong telepono

Nagagap ko’y sinalita / mula sa hanging Olimpya.

Isang bagong dating yaong / lumitaw sa kaligiran;

Kayrami kong mga hula, / akibat ang mga tunog.

"Nariyan si Archimedes / na tangan ang kanyang pingga

Abala pa ring lutasin / ang dati pang suliranin.

Anya: ang bagay at lakas / ay nariyang nababago

At mali ang mga batas / na tinging di nababago"

"Sa ibaba, sa Daigdig, / gumagawa silang buong tindi

Dumating ang mga ulat / nang malawaka’t mabilis.

Pinakahuli’y nag-ulat / ng isang kosmikong baril.

At ang mapukol ka na nga’y / kayhirap nang kasiyahan.

Kaya anong ingat namin / sa kayraming nakataya,

Peste ang mga pulubi — / na hindi pagkakamali.”

“Anong sama, Sir Isaac, / katanyagan mo’y sinayang 

At ang dakila mong agham / ay kanilang binaligtad

Ngayon ang mahabang buhok / na lokong Einstein ang ngalan,

Mga turo mong magaling / ay sinisi nang taimtim.

Anya: ang bagay at lakas / ay nariyang nababago

At mali ang mga batas / na tinging di nababago"

"Napakabobo ko pala, / O, minamahal kong anak,

Sa paggagap sa iskemang / pinipihit ko ng husay.

Ang aking mga alagad / ay may matinding kaisipan

Ako nama’y masaya nang / manatili sa likuran,

Marahil ako’y nabigo, / datapwat kaya’y ginawa,

Iba’y maaaring gawin / ng aking mga maestro.

Halika, Kelvin, at ako’y / tapos na sa aking tasa.

Kaibigan mong si Tesla’y / kailan kaya darating."

"Ay, sagot naman ni Kelvin, / lagi naman siyang huli,

Walang silbi ang anumang / gawin mong pagsasalangsang.”

Katahimikan — ragasa’y / basa’t kaylambot na paa

Kaya ako’y kumatok at —/ may kaguluhan sa daan.

Isinalin ng Setyembre 2, 2022 sa Maynila, Pilipinas.

* Si Nikola Tesla (10 Hulyo 1856 – 7 Enero 1943) ay isang imbentor, inhinyerong mekanikal at elektrikal. Malimit siyang tinatanaw bilang isa sa pinakamahahalagang mga tapag-ambag sa pagsilang ng pangkomersiyong kuryente at higit na kilala dahil sa kanyang "mapanghimagsik" na mga pagpapaunlad sa larangan ng elektromagnetismo noong huling bahagi ng ika-19 daang taon at maagang bahagi ng ika-20 daang taon. Siya ang imbentor ng AC (alternating current) sa kuryente.

* Ang tulang ito’y isinulat ni Nikola Tesla noong 1920s para sa kanyang kaibigang si George Sylvester Viereck.

* Ang orihinal na tula sa wikang Ingles ay nasa kawing na:

from the link: https://www.facebook.com/photo/?fbid=481602080640621&set=a.179863247481174

Fragments of Olympian Gossip

Poem by Nikola Tesla

While listening on my cosmic phone

I caught words from the Olympus blown.

A newcomer was shown around;

That much I could guess, aided by sound.

“There’s Archimedes with his lever

Still busy on problems as ever.

Says: matter and force are transmutable

And wrong the laws you thought immutable.”

“Below, on Earth, they work at full blast

And news are coming in thick and fast.

The latest tells of a cosmic gun.

To be pelted is very poor fun.

We are wary with so much at stake,

Those beggars are a pest—no mistake.”

“Too bad, Sir Isaac, they dimmed your renown

And turned your great science upside down.

Now a long haired crank, Einstein by name,

Puts on your high teaching all the blame.

Says: matter and force are transmutable

And wrong the laws you thought immutable.”

“I am much too ignorant, my son,

For grasping schemes so finely spun.

My followers are of stronger mind

And I am content to stay behind,

Perhaps I failed, but I did my best,

These masters of mine may do the rest.

Come, Kelvin, I have finished my cup.

When is your friend Tesla coming up.”

“Oh, quoth Kelvin, he is always late,

It would be useless to remonstrate.”

Then silence—shuffle of soft slippered feet—

I knock and—the bedlam of the street.

(Poem written by Nikola Tesla in the 1920s to his friend George Sylvester Viereck.)

Ngiti

NGITI

tila ba iwing puso'y nasa alapaap

pagkat taal ang alindog ng nakita ko

diwatang aking yapos sa laksang pangarap

isang ngiti lang niya'y namutla na ako

di ko na nasuri ang kanyang mga ngipin

kundi ang hugis ng mapula niyang labi

tinangay ako sa di mawaring isipin

pagkat kahali-halina ng kanyang ngiti

tingni't anong ganda ng kanyang kabuuan

pagkatao niya'y bituing nagniningning

ako nga'y natulala sa kanyang kariktan

animo'y isang artista sa puting tabing

saan ako patungo, O, aking diwata

kundi sa iyo lamang, ang makita kita

anumang karamdaman ko'y agad huhupa

sa isang ngiti mo lang, ako'y gagaling na

- gregoriovbituinjr.

08.29.2022

Sa basurahan

SA BASURAHAN

may basurahan palang tapunan

ngunit nagtatapon ka sa daan

bakit? wala ka bang pakialam?

dahil ba di mo iyan tahanan?

sa tahanan ba'y maayos naman?

di mo ginagawang basurahan?

kalat dito, doon, at kung saan

para bang wala kang pakiramdam

pag walang basurahan, ibulsa

huwag magtapon ng basta-basta

sa basurahan lang magtapon ka

na dapat tayo'y may disiplina

tulungan natin ang kalikasan

pagandahin ang kapaligiran

basura'y doon sa basurahan

di sa pasilyo, daan, saan lang

- gregoriovbituinjr.

08.25.2022

Tasa

TASA

painitin na ang sikmura

maglagay ng tubig sa tasa

isunod ay kape o tsaa

nang diwa'y magising tuwina

kaninang hapong makulimlim

ay sinusulat ang panimdim

hanggang napit ang takipsilim

at hatinggabing anong dilim

magkape o magtsaa naman

upang sumigla ang katawan

gisingin ang diwang palaban

pagkat antok na ang kalaban

akda kasi'y dapat matapos

hinggil sa buhay ng hikahos

at sistemang mapambusabos

baka panahon na ay kapos

magtsaa kung wala nang kape

pag inaantok ay diskarte

kita'y magtsaa lamang dine

baka sa akda'y makabuti

- gregoriovbituinjr.

08.24.2022

Bukambibig

BUKAMBIBIG

bukambibig lagi nila'y paano ba yumaman

maging katulad sila ng bilyonaryong iilan

ganito'y naging takbo ng isip ng karamihan

upang pamilya nila'y iahon sa kahirapan

ang inaasam nila'y pansarili't pampamilya 

sa pangarap na tila ba di kasama ang kapwa

ano nga ba namang pakialam nila sa iba

gayong ang iba'y walang pakialam sa kanila

bukambibig ko nama'y ginhawa ng sambayanan

kolektibong pakikibaka, walang maiiwan

kung mababago ang sistemang para sa iilan

ay ating matatayo ang makataong lipunan

di pansarili kundi panlahatan ang pangarap

ng tulad kong tibak upang makaahon sa hirap

ang sambayanan, masa'y makatao't mapaglingap

at ang bawat isa'y nakikipagkapwa ng ganap

- gregoriovbituinjr.

08.23.2022m

Paglaban

PAGLABAN

Tulang TAGAIKU

(TAnaGA at haIKU)

i

sila'y nakikilaban

para sa kalayaan

ng tanang mamamayan

mula sa kaapihan

tanong ni pare

bakit sila inapi

ng tuso't imbi

ii

yaong lakas-paggawa'y

di binayarang tama;

ang bundat na kuhila'y

sa tubo nagpasasa

doon hinango

ng hayok na hunyango

ang laksang tubo

iii

kayraming mahihirap

na mayroong pangarap

anong gagawing ganap

nang dusa'y di malasap

mundo'y baguhin

tanikala'y lagutin

nang laya'y kamtin

- gregoriovbituinjr.

08.23.2022

* TANAGA - tulang Pinoy, may pitong pantig bawat taludtod

* HAIKU - tulang Hapon, may pantigang 5-7-5

Pag-ibig ay pag-aaklas

PAG-IBIG AY PAG-AAKLAS

pag-ibig ay pag-aaklas

sa mga lumang palabas

ng burgesya't talipandas

na sa masa'y nang-aahas

pag-ibig ay pag-aaklas

sa korupsyong di malutas

sa kabang bayan nagwaldas

sa inosente'y umutas

pag-ibig ay pag-aaklas

sa mga pilak ni Hudas

sa gawa ng mararahas

sa bulong ng balasubas

pag-ibig ay pag-aaklas

sa mga trapo't madugas

salita'y giliw ng ungas

na pangako'y laging gasgas

pag-ibig sana'y parehas

tungo sa magandang bukas

asam ay lipunang patas

na magpakatao'y bakas

pag-ibig sana nga'y basbas

sa dalawang pusong wagas

sa pagsusuot ng medyas

sa pagtitiklop ng manggas

- gregoriovbituinjr.

08.23.2022

Magretiro sa edad 80

MAGRETIRO SA EDAD 80

ang retirement age ngayon ay sisenta'y singko

na naaayon sa batas at kompulsaryo

ngunit may nagpapanukala sa Kongreso

gawing otsenta ang retirement ng obrero

tiyak matutuwa sa panukala niya

ang mga matatandang nais pang kumita

madaramang nakakatulong sa pamilya

senior citizen na sila'y malalakas pa

ganado ako sa ganitong panukala

upang magkatrabaho kahit matatanda

kaya kikita pa rin kahit maralita

"tanggalin ang age limit!" ang sigaw ng dukha

kumaing wasto nang katawan ay lumusog

bitamina'y kainin matapos mabusog

upang buto't kalamna'y tumibay, di lamog

maglakad lagi't magpapawis, na di bugbog

senior citizen man ay manggagawa pa rin

nais magretirong maaga'y pwede man din

gawin mang otsenta ang edad ng retayrment

mungkahing ang trabaho nila'y paalwanin

- gregoriovbituinjr.

08.15.2022

* Ulat mula sa Abante Tonite, 08.05.2022, p.3

Nakalalasong butete

NAKALALASONG BUTETE

nakabibigla ang isang ulat

na mula sa malayong probisya

nalason sa butete, minalas

anim na anak at mag-asawa

iniluto ang isdang butete

o buriring, siyang inalmusal

makalipas ang ilang sandali

isinugod sila sa ospital

nahilo kasi't nawalang malay

pagkat sila na pala'y nalason

di mo masabing ganyan ang buhay

kung bumagsak ka't di makabangon

may nakalalasong bahagi raw

ang isdang butete o buriring

na dapat tanggalin habang hilaw

lutuing mabuti saka kainin

maiging ganito'y nabalita

upang ito'y mabatid ng bayan

upang sa pagkain nito'y handa

nang pamilya't kapwa'y maingatan

- gregoriovbituinjr.

08.15.2022

* Ulat mula sa Abante Tonite, 08.05.22, p. 2

Ang libro

ANG LIBRO

thirty five pesos lang ang libro

sa BookSale ko nabili ito

bakasakali lang matuto

sa taong binabanggit dito

pamagat ng libro'y "Boy Genius"

hinggil sa nagpanalo kay Bush

anong prinsipyong tumatagos?

taktikang ginamit nang lubos?

sino si Karl Rove, busisiin

baka may matutunan man din

ito ba'y magagamit natin

upang tayo'y magpanalo rin

kabibili lang nitong aklat

di pa ito nabasang sukat

'yaan ito muna'y mabuklat

pag nabasa na'y iuulat

- gregoriovbituinjr.

08.12.2022

* nabili ko ang nasabing libro sa BookSale, Farmers, Cubao

Anim na oras na trabaho kada araw

Sigaw ng maralita:

ANIM NA ORAS NA TRABAHO KADA ARAW

anim na oras na trabaho ang hiling ng dukha

upang madagdagan ang labor force, ang manggagawa

bukod sa bahay, sinisigaw na rin nilang kusa:

“TRABAHO PARA SA WALANG TRABAHONG MARALITA!”

sigaw na nila: TRABAHO'Y GAWING ANIM NA ORAS!

kung may tatlong obrero sa paggawang otso-oras

sa loob ng isang araw, ah, sa anim na oras

ay magiging apat na ang obrero, di ba, patas?

mungkahi iyan ng dukha upang magkatrabaho

tatlong manggagawa pa'y naging apat na obrero

kawalan ng trabaho'y nasolusyunang totoo

di na mukhang kawawa pag dukha na'y may trabaho

tanggalin din ang age limit, dapat ding ikampanya

upang may edad man, magkatrabaho, kung kaya pa

sa ganito, maralita'y may dignidad nang kanya

at mabubuhay pa nila ang mahal na pamilya

- gregoriovbituinjr.

08.12.2022

* litrato mula sa blog ng KPML

Saan daw ako nagsusulat?

SAAN DAW AKO NAGSUSULAT?

tanong sa akin ng isang kapwa ko manunulat

"kaibigan, sa anong pahayagan ka nag-uulat,

tumutula, nagsasaysay, o kaya'y nagsusulat?"

tila sa kanyang tanong, ako'y bahagyang nagulat

pagkat tulad nila'y may dyaryong pinagsusulatan

nagmamalaking nagsusulat sa ganito't ganyan

kanilang akda'y pinababasa sa sambayanan

sinabui ko rin ang dyaryo kong pinaglilingkuran

ako'y nagsusulat sa Taliba ng Maralita

na opisyal na pahayagan ng samahang dukha

ang K.P.M.L. ay may dyaryong kanilang ginawa

dalawampung pahinang dyaryong kayrami ng akda

mga ulat ng samahan sa dinaluhang pulong

at nag-uulat ng tapat, di fake news o halibyong

ang pangulo ng samahan pa'y may sariling kolum

may balita't tula, isyu'y paano isusulong

salamat sa Taliba ng Maralita, may dyaryo

akong pinagsusulatan, sa kanila'y tugon ko

na sa mga akda ko'y naglalathalang totoo

na pag nawala pa ito'y ikaluluhang todo

- gregoriovbituinjr.

08.11.2022

* K.P.M.L. - Kongreso ng Pagkakaisa ng Maralitang Lungsod (KPML)    

Hugot

HUGOT

pag nais kunin ay huhugutin

ang litaw sa butas na malalim

hugot din pag mula sa damdamin

na sa diwa'y lalambi-lambitin

iniibig kita, aking mahal

ibig kita kaya minamahal

kahit na hirit mo'y pulos mahal

mahal bilhin, presyo'y anong mahal

kayraming hugot sa mga pader

na isinulat naman sa papel

di ko na kailangan ng google

nang makita ka, the search is over

dilim ka ba? noong dumating ka

wala na akong nakitang iba

kung ini-SMALL ka naman nila

aba'y inii-BIG naman kita

kung si pinsan, may asawang Pretty

at may Byutipul naman si Pare

isang katoto'y mayroong Honey

aba, ako nama'y may Liberty

kayraming hugot ng dusa't tuwa

dulot ay kilig o kaya'y luha

may pintig yaong sinasalita

minsan, sapul ang bawat patama

- gregoriovbituinjr.

08.11.2022

* litratong kuha ng makatang gala sa nadaanan niyang sago't gulaman

Walden

WALDEN

aba'y laman siya ngayon ng mga pahayagan

siyang binabaka yaong nakaambang karimlan

siyang lumalaban sa mga kasinungalingan

siyang matapang na ihayag ang katotohanan

tangan kaya ng anak ng diktador ang pambura?

ng kasaysayang nais nilang mabago talaga?

katotohanan kaya'y tangan ba naman ng masa?

ayaw mabaluktot ang naganap na diktadura?

dudurugin ang estratehiya ng mandarambong

at mga halimaw na sa bayan ay gumugunggong

huwag hayaang kumalat ang fake news o halibyong

huwag hayaang bayan ay punuin ng linggatong

sa panahon noon ng ama, ikaw na'y napiit

kumilos para sa karapatan ng maliliit

isinulong ang adhikain at lipunang giit

sa panahon ngayon ng anak, muli kang napiit

ituloy mo ang laban, inspirasyon ka sa amin

habang ipinaglalaban mo'y tinutuloy namin

taas-kamaong pugay sa tangan mong adhikain

pagkat magkasangga nating lalabanan ang dilim

- gregoriovbituinjr.

08.10.2022

Paglalaba sa kanal

PAGLALABA SA KANAL

binidyuhan ko lang nang makita

ang isang matandang naglalaba

sa tubig ng kanal, sa bangketa

dahil tubig ba'y libre talaga?

kita kong malakas ang pag-agos

ng tubig, baka kaya nilubos

ng matanda, paglaba'y rinaos

lalo't sa buhay siya'y hikahos

bakit kanal ang nilabhang lubha?

nitong matandang tingnan mo't dukha?

kawawang buhay ng maralita

baka wala pang bahay si Tanda

ayoko pang tingnan siyang baliw

kundi sa pagbidyo pa'y naaliw 

matandang kapara'y basang sisiw

na marahil iniwan ng giliw

- gregoriovbituinjr.

08.09.2022

* ang bidyo na 15 segundo ang haba ay nasa kawing na: https://fb.watch/eOd7NSrM28/

Upos sa paso

UPOS SA PASO

sa palengke'y nagtungo ni misis

nabili'y isang tumpok na isda

okra, itlog, sangkilong kamatis

nang may makitang ikinabigla

ang paso'y ginawang basurahan!

halamanang nilagyan ng upos

matapos magyosi'y gayon lamang

matapos sa hitit nakaraos

tanong ko lang, upos ba'y pataba?

o di mabulok tulad ng plastik?

gawain itong kahiya-hiya

na upos sa paso pinipitik

basura'y saan wastong ilagak?

ay, di mapalagay yaring isip

tila ba sugat ko'y nag-aantak

kalikasa'y paano masagip?

- gregoriovbituinjr.

07.31.2022

Hatid

HATID

wala ka raw doon noong panahon ng marsyalo

anang matanda't makagintong panahon sa iyo

wala rin tayo noong panahon ni Bonifacio

panahon ni Julius Caesar ay nabasa lang ito

marsyalo, wala ka pa nang karapata'y siniil

maganda raw ang gintong panahon, anang matabil

ay, wala rin tayo nang si Bonifacio'y kinitil

noong Romano sa kapangyariha'y nanggigigil

inihahatid ka sa nais burahing gunita

na sa katotohanan ay wala kang mapapala

payag ka bang kasaysayan ay sinasalaula?

upang krimen nila sa baya'y mapawi't mawala?

dapat lang nating ipaglaban ang dangal ng bayan

ang gunita ng dinahas, iwinala't pinaslang

di dapat halibyong ang umiral sa kasaysayan

katotohanan ay huwag ihatid sa kawalan

- gregoriovbituinjr.

07.29.2022

halibyong - fake news, ayon sa UP Diksiyonaryong Filipino, p.426

Talubata

TALUBATA 

10 pantig bawat taludtod

ang milenyal pala'y talubata

kahulugan sa sariling wika

mga kabataang papatanda

na sa buhay dapat maging handa

mula bentsingko 'gang trenta'y singko

ang sabi'y edad ng mga ito

ng mga unang pagtatrabaho,

ng pagpapamilya't pagpaplano

- gregoriovbituinjr.

07.27.2022

Kepler 186f

KEPLER 186F

may nakitang planetang kapara raw ng daigdig

anang mga astronomo sa kanilang saliksik

natagpuan ang planetang Kepler, mayroong tubig

na marahil may nabubuhay ding ating kawangis

"There is no planet B!" sigaw ng mga aktibista

walang makapapalit sa mundong nilakhan nila

kayâ kung may natagpuang mundong sa atin gaya 

dapat pang suriin kung may nabubuhay talaga

bakit mundo'y sinisira't naghahanap ng bago

pinabilis ang pagbabago ng klima ng mundo

pulos coal plant, pagmimina, bundok ay kinakalbo

kalsada't dagat ay pinagtatapunang totoo

ngayong may panibagong planeta silang nahanap

bubuo ba tayo roon ng lipunang pangarap?

o kaya'y sistemang walang mayaman at mahirap?

o alagaan ang tanging mundo't tahanang ganap?

- gregoriovbituinjr.

07.26.2022

Pagsulong

PAGSULONG

10 pantig bawat taludtod

kumakalat na ang alimuom

at tumitindi ang halibyong

kaharap man natin ay linggatong

maging positibo sa pagsulong

- gregoriovbituinjr.

07.26.2022

talasalitaan: 

alimuom - tsismis, ayon kay national artist poet Rio Alma

halibyong - fake news, ayon sa UP Diksiyonaryong Filipino

linggatong - ligalig, nabanggit sa Florante at Laura ni Balagtas

Ngiti

NGITI

tulang TAGAIKU (TAnaGA at haIKU)

i

nakangiti ang pusong

pinaglagyan ng napkin

habang tila naglaho

ang tulang sasambitin

tuloy ang tagay

kasabay ng pagnilay

sa ngiti't lumbay

ii

pag ikaw'y nasa rurok

niyang sistemang bulok

ah, nakasusulasok

lalo't di mo malunok

nasa tuktok man

ay di malilimutan

ang nakaraan

iii

baso'y iindak-insak

bote'y humahalakhak

sa puso nakaimbak

ang laksang luha't galak

aking nilaro

ang tanikalang gintong

dapat mapugto

- gregoriovbituinjr.

07.21.2022

Robot

ALAM ko kaagad ang sagot nang di nakikita ang karugtong. Para bagang ang google ay nagtanong. Fill in the blanks. Sagot ko: Robot. Nabasa ko na kasi ito noon sa libro ni Isaac Asimov, isa sa tatlong master ng science fiction genre. Tama ang sagot.

Napagawa akong bigla ng munting tula hinggil dito.

ROBOT

iyon ay salitang mula sa Czech

mula panulat ni Karel Capek

"compulsory labor" pala iyon

o sapilitang paggawa, gan'on

nasa aklat din na "Caves of Steel"

ni Isaac Asimov, napaskil

sa utak ko ang mga binasa

lalo't sci-fi, ukol sa siyensya

si Karel Capek unang gumamit

sa kanyang mga kwentong marikit

kwento niya'y sinalin sa atin

akda niyang kaysarap basahin

robot ng Star Wars at Star Trek

mula panulat ni Karel Capek,

pagpupugay ang aking paabot 

sa imbentor ng salitang "robot"

- gregoriovbituinjr.

07.19.2022

Ipipinta ko

IPIPINTA KO

kung tutularan ko si Da Vinci

aking gagawing kawili-wili

ang mga tula kong hinahabi

upang ihandog sa kinakasi

kung tutulara'y si Van Gogh naman

ilalarawan ko ang lipunan

ng laksang dukha't mayamang ilan

patungo sa pagbabagong asam

ako'y ipinanganak ni Inay

nang si Marcel Duchamp ay namatay

pintor siyang kaygaling ng kamay

Oktubre Dos, kami'y nagkasabay

siya'y nawala, ako'y nabuhay

aking ipipinta sa salita

ang asam ng uring manggagawa

aking ipipinta sa kataga

ang kalikasan, gubat at sigwa

ipipinta'y adhika't pangarap

pawis at amoy na nalalanghap

ipipinta sa kapwa mahirap

ang ginhawang dapat nalalasap

- gregoriovbituinjr.

07.19.2022

Upos

UPOS

parang kandila pag sinindihan

upang hititin ng nagninilay

mamaya'y liliit ng tuluyan

ang yosing may kasiyahang bigay

ang natirang ipit ng daliri'y

sa kung saan na lang ipinitik

sa daan, pasilyo, di mawari't

ginawa ng buong pagkasabik

ah, matapos sunugin ang baga't

paliparin ang usok sa hangin

at itaktak ang titis sa lupa

ginhawa'y panandalian man din

ikinalat na upos sa daan

ay salamin ng ating lipunan

- gregoriovbituinjr.

07.18.2022