Tularan si Eurytus, hindi si Aristodemus

TULARAN SI EURYTUS, HINDI SI ARISTODEMUS

dalawang Spartan ang pinauwi

ni Haring Leonidas ng Sparta

parehong sakit sa mata ang sanhi

na baka makasamâ sa opensa

tatlong daang mandirigmang Spartan

yaong paroroon sa Thermopylae

dalawa'y kabilang sa tatlong daan

subalit pinauwi silang tunay

umalis silang dalawa subalit

bumalik sa digmaan si Eurytus

napaslang sa digma, nagpakasakit

ngunit umuwi si Aristodemus

tinawag na duwag, di kinausap

ng kapwa Spartan, nakakahiya

sa kasaysayan, di naburang ganap

ang sinapit, dangal niya'y nawala

kaya bilang aktibistang Spartan

magandang halimbawa si Eurytus

maysakit man tayo'y ating tularan

hanggang mamatay, nakibakang lubos

- gregoriovbituinjr.

09.05.2025

* litrato mula sa google

Ang nasusulat sa bato

ANG NASUSULAT SA BATO

"Nothing is written in stone."?

ikako naman, mayroon

lapida ba'y anong layon?

di ba't batong marmol iyon?

isa iyong parikalâ

o irony, ang salitâ

na winika ng matandâ

sa bato nasulat pa ngâ

di pa naukit ang gayon

marahil noong panahon

nina Zeus at Poseidon

wala pang sibilisasyon

anong kahulugan nire?

sa masa'y anong mensahe?

wala nga bang permanente?

o sa sitwasyon depende?

- gregoriovbituinjr.

09.05.2025

* larawan mula sa google

DPWH Contractor, gahaman daw?

DPWH CONTRACTOR, GAHAMAN DAW?

nagpatama na naman si Kimpoy

salita'y walang paligoy-ligoy

pag pamilyang gahaman sa pera

ano raw ang tawag sa kanila?

DPWH Contractor po

aba'y kaygalang ng bata, may 'po'

batid sa Barangay Mambubulgar

ang kalokohan kaya nang-asar

ibig sabihin, na kahit bata

na danas din marahil ang baha

na pondo sa proyektong flood control

ay bayan talaga ang binudol

kawawang bayan kong walang alam

kung di nagbaha'y di malalaman

dapat lang imbestigahan ito

maysala'y parusahang totoo

- gregoriovbituinjr.

09.05.2025

* komiks mula sa pahayagang Bulgar, Setyembre 2, 2025, p.4

Pribatisasyon ng NAIA, Tutulan

PRIBATISASYON NG NAIA, TUTULAN

sa NAIA, kayraming bagong fees

nagsimula sa surot at ipis

isinapribado nang kaybilis

naririyan ang parking fees,

terminal fees, airport fees.

take-off fees, landing fees.

lighting fees, utility fees.

rental fees, service fees.

at marami pang iba't ibang fees

pasahero'y magtitiis

sa mga nagtaasang fees

ay, nakapaghihinagpis

kaya maitatanong mo

at mapapaisip dito

bakit ginawang negosyo

ang pampublikong serbisyo

panawagan sa kapitalista

aba'y dapat n'yo lang itigil na

ang pribatisasyon ng NAIA

na sa masa'y kaysakit sa bulsa

ang panawagan natin sa masa

magkapitbisig at magkaisa

tutulan, pribatisasyon ng NAIA

baguhin ang bulok na sistema

- gregoriovbituinjr.

09.04.2025

* salamat sa kumuha ng litrato

Kukukup kop, kukukop

KUKUKUP KOP, KUKUKOP

sino kayang kukupkop

sa tulad nilang dahop

yaon bang mananakop

na ang ugali'y hayop

kukukup kop, kukukop

sakaling masalikop

ng mga manunupsop

tayo ba'y pasasakop

kukukup kop, kukukop

sabaw ay hinihigop

ng makatang masinop

sa mangga'y nagtatalop

kukukup kop, kukukop

kung ako ba'y matutop

ng tusong mananakop

ito ba'y naaangkop

- gregoriovbituinjr.

09.03.2025

* larawan mula sa app na Word Connect

Kung ako'y tumumba

KUNG AKO'Y TUMUMBA

kung ako'y tumumba

sa tama ng bala

ang hiling ko sana

ako'y mabuhay pa

sana'y maabot ko

pa'y edad na gusto:

ang pitumpu't pito

o walumpu't walo

kayrami pang tula

kwento at pabula

ang nais makatha

para sa dalita

kayrami pang dagli

at kwentong maikli

ang akda kong mithi

kahit puso'y sawi

- gregoriovbituinjr.

09.03.2025

* litratong kuha ng makatang gala sa EDSA cor. Quezon Avenue, QC

Minsan, dagat ang pagsusulat ng sanaysay

MINSAN, DAGAT ANG PAGSUSULAT NG SANAYSAY

minsan, dagat ang pagsusulat ng sanaysay

lalo't sa sariling karanasan binatay

malalim at mapanglaw pag iyong nanilay

basta't pag iyong binasa'y di mauumay

ang sanaysay nga ba'y madali lang sulatin?

oo, kung sa sarili mong danas nanggaling

kung anong nababatid mo'y iyong akdain

anong nasa isip mo'y isalaysay lang din

tulad ng awit ng ibon sa himpapawid

tulad din ng pag-awit ng mga kuliglig

isulat mo lamang ang iyong nababatid

sa tanghaling tapat man o gabing malamig

malupit ay tanggalan ng sungay at buntot

pati trapong sa flood control ay nangurakot

pati oligarkiyang pawang mapag-imbot

na sa pakikipagkapwa man ay maramot

ay, sangkatutak ang paksang maisusulat

kahit isulat mo'y samutsaring alamat

kathain mo rin anumang maisusumbat

sa mga trapong sa bayan ay nagkakalat

- gregoriovbituinjr.

09.03.2025

* litrato mula sa app na Word Connect

Sabaw at talbos ng kamote

SABAW AT TALBOS NG KAMOTE

sabaw at talbos ng kamote

ang hapunan ko ngayong gabi

sa puso raw ito'y mabuti

sa kanser ay panlaban pati

nakakatulong sa digestion

at naglalaman din ng iron

na mabuti raw sa produksyon

ng red blood cells ang mga iyon

kaysarap din ng sabaw nito

lalagukin ang isang baso

napapalusog pati buto

ramdam kong ito'y epektibo

nakagagaan sa paggalaw

bukod sa masarap na sabaw

talbos pa nito'y isasawsaw

sa bagoong, di ka aayaw

di ako nagkanin, ito lang

at nakabubusog din naman

pampalakas na ng katawan

pampalusog pa ng isipan

- gregoriovbituinjr.

09.02.2025

Umamin daw ang aso?

UMAMIN DAW ANG ASO?

ang aso ay magaling na bantay

tatahol pag may iba sa bahay

ang aso'y mahusay ring alalay

pag tumahol, di ka mapalagay

bakit ba umaming siya'y aso

ng isang batikang pulitiko

sakaling mangagat naman ito

baka magkarabis kang totoo

kaya sa aso'y laging mag-ingat

at iwasan ang kanilang kagat

aso mang umamin at nanumbat

baka galis pa'y kanyang ikalat

ingat sa aso, ingat sa rabis

baka kagat nito'y di matiis

garapata pa'y dapat matiris

pag tumahol, agad kang umalis

- gregoriovbituinjr.

09.02.2025

* ulat mula sa pahayagang Bulgar, Setyembre 2, 2025, p.1 at p.5

Ang Setyembre Dos sa kasaysayan

ANG SETYEMBRE DOS SA KASAYSAYAN

ang Setyembre Dos sa kasaysayan:

pormal na ang pagsuko ng Japan

at ang Ikalawang Daigdigang

Digmaa'y tuluyang nawakasan

namatay ang bayani ng Byetnam

at unang pangulong si Ho Chi Minh

nakaligtas sa nasunog na jet

ang naging presidente ng U.S.

may isang daang O.F.W. 

ang napauwi galing Kuwait

na tumakas sa kanilang amo

na kondisyon sa trabaho'y pangit

kayrami nang namatay sa dengue

anang ulat ng Department of Health

ulat na ito'y sadyang kaytindi

sa namatayan ay anong kaysakit

limang daan ang sa Iloilo

tatlong daang katao sa Bicol

at pitumpu naman mula sa Cebu

ay, nakamamatay iyang lamok

nadagdag pa sa mga balita

C.D. bidyo't Jose Pidal acoount

at may pahabol pang kasabihan:

huwag bukas kung kaya na ngayon

- gregoriovbituinjr.

09.02.2025

* mga datos mula sa pahayagang Pang-Masa, p.4

Sa muling pagninilay

SA MULING PAGNINILAY

mabuti nang tumumba't mamatay

kaysa wala nang silbi sa buhay

sa isip ko'y gumugulong tunay

itong gulong na plat niring buhay

narito't naglilingkod ng sadya

sa uring manggagawa at dukha

sa kabila ng hibik at luha

nang aking asawa ay mawala

paano babayaran ang utang

na milyon-milyon ay di ko alam

sakit sa ulong di napaparam

ang sarili ko na'y inuuyam

pagpapatiwakal ba ang sagot?

kung katiwasa'y di maabot?

paano lulusutan ang gusot?

ang kalutasan sana'y masambot

- gregoriovbituinjr.

09.02.2025

Lipunang malaya't matinô

LIPUNANG MALAYA'T MATINÔ

pangarap ko'y malaya't matinong lipunan

umiiral ay patas at makatarungan

na walang api't pinagsasamantalahan

ng dinastiya, oligarkiya't gahaman

pangarap ko'y lipunang matino't malayà

kung saan walang trapo't burgesyang kuhilà

sa anumang pakikibaka'y laging handâ

kumikilos kasama ng obrero't dukhâ

pangarap ko'y lipunang malaya't matinô

na lahat ng lahi't bansa'y nagkakasundô

umiiral ay di pagkaganid sa gintô

kundi pakikipagkapwa sa buong mundô

lipunang matino't malaya ang pangarap

na makamit na bawat isa'y lumilingap

sa kanyang kapwa, kaya tayo na'y magsikap

na abutin ang kaytayog mang alapaap

- gregoriovbituinjr.

09.02.2025

Nais ko'y ukit na maso sa lapida

NAIS KO'Y UKIT NA MASO SA LAPIDA

sakaling mamatay / ang makatang kapos

ayoko ng daop / na palad o kurus

kundi yaong masong / gamit ng busabos

nang sistemang bulok / ay buwaging lubos

hindi natin batid / kailan babagsak

ang katawang lupa / sa putik o lusak

sakaling ibaon / saanpamang lambak

sa lapida'y nais / na ito'y itatak:

"narito'y makatâ / ng obrero't dukhâ

tagapagtaguyod / ng sariling wikà

tibak na Ispartan / sa puso at diwà

sistema'y palitan / ang inaadhikà

panay ang pagtulâ / kahit makulimlim

sa masa'y nagsilbi / ng tapat at lalim

sa dumaan dito't / sumilong sa lilim

nagpapasalamat / siya ng taimtim"

- gregoriovbituinjr.

09.01.2025

* larawan ay dinisenyo ng makatang galâ

Sina Alyssa Valdez at Alex Eala

SINA ALYSSA VALDEZ AT ALEX EALA

sina Alyssa Valdez at Alex Eala

dalawang batikan, atletang Pilipina

tennis si Alex at volleyball si Alyssa

sila'y tunay na kahanga-hangang atleta

minsan, sa bidyo lang sila napapanood

reel, pesbuk, YouTube, doon ako nakatanghod

sila'y tatalon, hahampas, mapapaluhod

pawang matatatag, matitibay ang tuhod

sa isports, kaylaki ng ambag nilang tunay

ipinakita nila ang talino't husay

masasabi ko'y Mabuhay sila! MABUHAY!

ang paabot ko'y taospusong pagpupugay!

ngalan nila sa kasaysayan na'y naukit

mga atletang nasa pagitan man ng net

ay makikitang may ngiti, di nagsusungit

mababait, ngunit sa arena'y kaylupit

- gregoriovbituinjr.

09.01.2025

* litrato mula sa ABS-CBN News fb page 

Bansa ng 7,641 kapuluan

BANSA NG 7,641 KAPULUAN

mula pitong libo, isang daan at pitong isla

ang kapuluan sa ating bansa'y nadagdagan pa

pitong libo, animnaraan, apatnapu't isa

ayon sa bagong datos na nakalap ng NAMRIA

si Charlene Gonzales ay agad naalala natin

noong sa Miss Universe pageant siya ay tanungin

Ilan ang isla sa Pilipinas, na sinagot din

ng tanong, "High tide or low tide?" ang sagot ba'y kaygaling?

dagdag na limang daan, tatlumpu't apat na pulô

kapag taog ba o high tide ay agad naglalahò?

buti't mga bagong isla'y natukoy, naiturò

ng NAMRIA, bilang ng mga pulô na'y nabuô

limang daan tatlumpu't apat na pulo'y nasaan?

sa satellite images doon natin malalaman

nais kong marating ang mga bagong islang iyan

upang sa sanaysay, kwento't tula'y mailarawan

- gregoriovbituinjr.

09.01.2025

* ulat at litrato mula sa kawing na: https://www.facebook.com/share/1FrewfMduj/ 

* NAMRIA - National Mapping and Resource Information Authority, sentrong ahensya sa Pilipinas hinggil sa pagmamapa ng mga lupa sa bansa

Kung may humanitarian mission sa Palestine

KUNG MAY HUMANITARIAN MISSION SA PALESTINE

kung may humanitarian mission sa Palestine

nais kong maging boluntaryo sa gawain

pagkat ito'y tunay na dakilang tungkulin

ng bawat isang nagpapakatao man din

isang gawain tungo sa kapayapaan

sa rehiyong niluray ng mga digmaan

isang adhikain tungo sa kalayaan

ng mga Palestinong dapat lang tulungan

tulad ng dalitang inagawan ng lupa

pati pinagsasamantalahang manggagawa

karapatan nila'y ipaglalabang sadya

tulad din ng Palestinong tigib ng luha

ay, kayrami na nilang namatay sa gutom

kaya kung doon may humanitarian mission

ang magboluntaryo ako'y isa kong layon

itutula ko rin ang lagay nila roon

- gregoriovbituinjr.

09.01.2025

* ulat at litrato mula sa fb page ng Middle East Monitor sa kawing  na:

https://www.facebook.com/share/p/1EkgMNpVWB/ 

Gawain tuwina

GAWAIN TUWINA

ang pagsusulat at pagbabasa

ang madalas kong gawin tuwina

pagbabasa'y bisyo ko talaga

gabi, hapon, tanghali, umaga

binabasa'y samutsaring aklat

sa bawat pahinang nabubuklat

dito'y kayrami kong nauungkat

kayraming paksang nabubulatlat

tuwina'y dito ko binubuhos

ang panahon bagamat hikahos

pag maghapong trabaho'y natapos

libro nama'y babasahing lubos

kakatha ng tula bawat araw

kahit kagubatan ko'y mapanglaw

pag may lumitaw sa balintataw

ang pluma kong tangan na'y hahataw

magsusulat ng kwento't sanaysay

dama man ay saya, dusa, lumbay

mga tagong paksa'y binubuhay

upang sa masa'y maisalaysay

- gregoriovbituinjr.

09.01.2025

* larawan mula sa google

Pagngiti pala'y isa ring sandata

PAGNGITI PALA'Y ISA RING SANDATA

minsan, ngiti na lang ang naiiwan kong sandata

upang kaharapin ang buhay at mga problema

lalo't yaring puso'y lumuluha at nagdurusa

sa pagkawala ng sinta, narito't nag-iisa

ngiti'y pakikipagkapwa, tandang nagpapatuloy

sa buhay bagamat sa daan kayraming kumunoy

nakikipagpatintero sa lansangang makahoy

at madawag, nagkalat ang mga dahong naluoy

ngiti'y kalasag at armas ng tulad kong makatâ

sandata rin ito ng tulad naming mandirigmâ

na naritong nakatindig, daanan man ng sigwâ

na kasangga sa pagbaka ay milyon-milyong dukhâ

oo, ako'y karaniwang taong sandata'y ngiti

sa kabila ng trapo't dinastiyang naghahari

at nagngingitngit sa sistemang pulos palamuti

maunlad daw ngunit kahirapa'y nananatili

- gregoriovbituinjr.

08.31.2025

Makitid man ang daan

MAKITID MAN ANG DAAN

kapara ng tunnel na madilim

ay may liwanag ding matatanaw

sa dulo kahit ka naninimdim

at ang kagubatan mo'y mapanglaw

gaya rin ng makitid na daan

upang di mahagip ng sasakyan

na nilakbay mo kanina lamang

ay luluwag din sa kalaunan

tulad ng pagharap sa problema

di ka tatakbong parang atleta

puno't dulo'y suriin talaga

nang malutas sa abot ng kaya

ang lansangan man ay anong kitid

pagkat inaayos ang paligid

maglakad ka lang doon sa gilid

baka may malaman pang di batid

hinay-hinay lang nang di hingalin

ikaw naman ay makararating

sa pupuntahan mo't adhikain

ika nga, magtatagumpay ka rin

- gregoriovbituinjr.

08.31.2025

* mapapanood ang bidyo sa kawing na: https://web.facebook.com/reel/636131269553670

'Ghost' projects at 'Hungry Ghosts' sa 'Ghost' month

'GHOST' PROJECTS AT 'HUNGRY GHOSTS' SA 'GHOST' MONTH

kayraming 'ghost' projects ang lumitaw sa ghost month

tulad ba'y 'ghost' flood control ng katiwalian?

kawawa ang bayan sa proyektong nagmulto

diyan ba napunta ang buwis ng bayan ko?

mukhang gutom na gutom ang mga 'hungry ghost'

kaya panay ang kanilang pangungurakot

sakmal ng kahayukan nila't kagutuman

ay nagpapakabundat sa kaban ng bayan!

may proyekto sa papel ngunit wala pala

sa totoong buhay, kinuha lang ang pera

ng bayan, ibinulsa ng mga tiwali

nilimas nila, mamamayan ang nagapi

ngayong Agosto, anong gusto mo, kapatid?

may flood control project ngunit baha ang hatid

mga tiwali'y nakapanggagalaiti

imbes na bayan, inisip nila'y sarili

serbisyo para sa bayan, naging negosyo

utak ng tusong negosyante't pulitiko

sa gobyerno'y sinong kanilang kasapakat?

managot sa bayan ang mga nangulimbat!

- gregoriovbituinjr.

08.30.2025

* litrato mula sa pahayagang Bulgar at Pilipino Star Ngayon, at sa ABS-CBN FB page

SMARTER na pagpaplano

SMARTER NA PAGPAPLANO

Specific - tiyak ang plano, detalyado

Measurable - nasukat kung kayang matupad

Attainable - kayang abutin ang adhika

Realistic - makatotohanan sa gawa

Time-bound - kayang gawin sa panahong tinakda

Evaluate - pagtatasa ng mga nagawa

Reward - natamong tagumpay ang gantimpala

Siguraduhing plano'y tapat sa layunin

Magkaisa ang pamunua't myembro natin

Aktibidad ay sama-sama nating gawin

Reklamo'y sinusuri't agad lulutasin

Tutok sa detalye't pinag-usapang sadya

Ebalwasyon sa kalagaya'y ginagawa

Respeto't makipagkapwa'y di nawawala

- gregoriovbituinjr.

08.27.2025

* litrato mula sa google

Merong dalawang pulis manyakis

MERONG DALAWANG PULIS MANYAKIS

merong dalawang pulis manyakis

na ginalaw ay babaeng pulis

tila libog nila'y di natiis

sinalbahe pa'y babaeng pulis

kung mayroon mang pulis patola

ay may pulis manyakis pa pala

na sa kabaro nagsamantala

at sa babaeng kasamahan pa

Safe Spaces Act ba'y ikakaso?

o ang kaso'y administratibo?

ililipat lang sila ng pwesto?

babaeng pulis nga'y agrabyado!

siya'y pinainom daw ng alak

at hinipuan ng mga manyak

aba'y bakit kapwa nila parak

ay kanila mismong pinahamak

magkakayunit pa sila, sabi

ngunit siya pa ang sinalbahe

kaytinding epekto ng nangyari

sa puso't isipan ng babae

buti't sa taas siya'y nagsumbong

subalit nais nating itanong:

mga manyak kaya'y ikakanlong

ng nasa taas o ikukulong?

nangyari'y sadyang nakagagalit

hustisya kaya'y kanyang makamit?

at mapakulong ang malulupit?

o buhay pa'y malagay sa bingit?

- gregoriovbituinjr.

08.29.2025

* ulat mula sa pahayagang Bulgar, Agosto 28, 2025, Pang-Masa at Remate, Agosto 29, 2025

Matanda na si Bata, may mahika pa rin

MATANDA NA SI BATA, MAY MAHIKA PA RIN

matanda na si Bata, may mahika pa rin

kilalang "Magician", di pa kinakalawang

pitumpu't isang anyos, talagang kaygaling

wala pa ring kupas ang matandang "Magician"

patuloy na gumagabay at inspirasyon

si Bata sa mga baguhang bilyarista

kaya nananalo sa mga kumpetisyon

saanmang bansa sila maglaro't magpunta

pagpupugay sa iyo, Efren "Bata" Reyes

tunay kang kinararangal ng ating bansâ

sa bawat sargo mo o tirang anong nipis

ang mga Pinoy at banyaga'y namamanghâ

Maligayang Kaarawan, aming pagbati

sa iyo, Efren "Bata" Reyes, pagpupugay!

paghanga namin sa iyo'y nananatili

bayani kang tunay! mabuhay ka! Mabuhay!

- gregoriovbituinjr.

08.29.2025

* ulat mula sa pahayagang Abante, Agosto 28, 2025, p.8

P30 na aklat, P30 pantraysikel

P30 NA AKLAT, P30 PANTRAYSIKEL

minsan, minumura ko ang ulan

dahil biglang napapa-tricycle

imbes na ako'y maglakad na lang

ng limang kanto, magta-tricycle

aklat ng salin ko'y trenta pesos

sa traysikel ay trenta pesos din

kapag ulan na'y biglang bumuhos

benta'y di maibiling pagkain

ipapamasahe lang ang benta

bakit ba flood control kinurakot

baha tuloy ang masa't kalsada

habang sa libro, kita'y karampot

kailan ba palaging aaraw

nang makatipid sa pamasahe

kailan di na magtutungayaw

upang natipid ay maitabi

- gregoriovbituinjr.

08.28.2025

Ang mag-aral muli

ANG MAG-ARAL MULI

di pa ako matanda, pwede pang makapag-aral

at makatapos ng kursong nanaising makuha

tulad ng inhinyero, cooking, o agham pisikal

o kaya'y magturo ng aritmetika't aldyebra

nais kong may natapos, may diplomang isasabit

sa dingding ng tahanan, magkatrabaho nang sadyâ

habang patuloy na nagmumulat sa maliliit,

babae, bata, pesante, vendor, obrero, dukhâ

kayhirap makapasok kahit sa N.G.O.'t P.O.

pag walang pinakitang diploma, walang natapos

lalo't kaytagal na aktibistang pultaym tulad ko

na higit tatlong dekadang naglulupa't kumilos

sinong tatanggap sa aking walang wala talaga

na namayapang misis ang sumusuporta noon

dapat pa akong mabuhay ngayong wala na siya

kaya nais kong magtapos pag may pagkakataon

- gregoriovbituinjr.

08.28.2025

* NGO - non-government organization 

* PO - people's organization

Soneto sa PANTHER

SONETO SA PANTHER

Participation - lumalahok ang bawat kasapian

Accountability - bawat isa'y may pananagutan

Non-discrimination - walang sinuman ang naiiwan

Transparency - walang tinatago sa masa't samahan

Human dignity - paggalang sa dignidad ng sinuman

Empowerment - pagsakapangyarihan ng mamamayan 

Rule of law - iginagalang ang mga batas ng bayan

Pagpaplano ng samahan upang kamtin ang layunin

Ay ginagawa ng seryoso't pananagutan natin

Nangangarap ng makataong lipunang dapat kamtin

Tagumpay ng samahan ay lagi nating iisipin

Habang hindi pinababayaan ang pamilya natin

Edukasyon ng bawat kasapi ay ating planuhin

Respeto sa batas at sa bawat isa'y ating gawin

- gregoriovbituinjr.

08.27.2025

* ang soneto ay tulang may sukat at tugma, at binubuo ng 14 pantig bawat taludtod

* ang PANTHER ay isa sa mga prinsipyo ng karapatang pantao

BOTO at BOGO

BOTO at BOGO

noon ay Buy One Take One

na ang daglat ay BOTO

kaya naging biruan

nabibili ang Boto

ngunit mayroong bago

ang Buy One Get One ngayon

na daglat nama'y BOGO

eh, ano naman iyon

wala nang atubili

ang nasa patalastas

ang BOTOng nabibili

ay BOGO nang nilabas

magagaling mag-isip

may bagong nalilikha

bayan ba'y sinasagip

sa masasamang gawa

para-paraan lang din

ang mga negosyante

kapitalismo pa rin

upang sila'y mabili

- gregoriovbituinjr.

08.27.2025

Mabuhay ka, Alex Eala!

MABUHAY KA, ALEX EALA!

mabuhay ka, Alex, mabuhay ka!

sa makasaysayan mong panalo 

sa U.S. Grand Slam Open Era

na taga-Denmark yaong tinalo

panalo mo'y sadyang iniukit

ng katatagan mo't kahusayan

sana naman ay iyong makamit

ang kampyonato mong inaasam

sa iyo, Alex, saludo kami

pinakita'y talino mo't husay

sana ang katulad mo'y dumami

na mga tennis player na Pinay

Alex, tunay kang kahanga-hanga

iniidolo na't inspirasyon

suportado ka ng buong bansa

sana'y maging ganap ka nang kampyon

- gregoriovbituinjr.

08.26.2025

* ulat mula sa pahayagang Bulgar, Agosto 26, 2025, p.12

Saksakan ng yabang

SAKSAKAN NG YABANG

akala ko'y anong napagkwentuhan

napanood daw ba'y mga saksakan

akala ko'y may rayot, nagsaksakan

e, iba pala, saksakan ng yabang

ang ibig sabihin, mga palalo

sa pribadong pag-aari'y rahuyo

mamahaling sasakyang presyo'y ginto

akala'y kung sinong di mo mahulo

ngunit katas daw ng pondo ng bayan

ang sinabing mamahaling sasakyan

sino kaya ang politikong iyan?

o personaheng saksakan ng yabang?

buwis ng bayan daw yaong ginamit

ng diyaskeng sa kaban ay nangupit

sino sila, sinong dapat masabit?

ganyang sistema'y bakit nakapuslit?

dapat imbestigahan iyang sukat!

sa Barangay Mambubulgar, salamat

nasa komiks subalit bumabanat

sa mga isyung sa bayan nagkalat

- gregoriovbituinjr.

08.26.2025

* mula sa pahayagang Bulgar, Agosto 25, 2025, p.4

Salabat at pandesal

SALABAT AT PANDESAL

salabat at pandesal

sa umagang kayganda

kaysarap na almusal

at nakabubusog pa

kay-aga kong nagmulat

at nagtungong bakery

nag-init ng salabat

pandesal ay binili

ako lang ang kumain

mag-isang nag-agahan

mamaya'y susulatin

ko'y santula na naman

salamat sa salabat

pampaganda ng tinig

sa pandesal, salamat

pampagana ng tindig

- gregoriovbituinjr.

08.26.2025