Nais na regalo

NAIS NA REGALO

kung nag-iisip ka ng regalo sa akin

isang aklat lang ang ibigay mo sa Pasko

ang Voice from the Underworld ni Maningning Miclat

ang On Writing ng horror writer Stephen King

pati Bagong Diksiyonaryong Filipino

ang aklat ng mga kaibigang makata

ang libro nina Glen Sales, Jason Chancoco,

Joel Costa Malabanan, Danilo Diaz

at iba pang makatang may sariling libro

suportahan ang aklat ng kapwa makata

aklat ng kasaysayan ng Kamalaysayan

aklat ng sanaysay ng awtor na batikan

daghang salamat, sapat na sa akin iyan

wala nang ibang regalo kundi aklat lang

iyan ang sa akin na'y puspos kasiyahan

- gregoriovbituinjr.

12.10.2022

Ang piyon sa ahedres

ANG PIYON SA AHEDRES

piyon daw ang pinakamahina

ngunit pinakamaraming sadya

mahina man, mahalagang pawa

sa labanan, talagang kasangga

matindi ang tungkulin ng piyon

sa hanay, ang depensahan niyon

ang King, Queen, Bishop, Horse, at Rook doon

yaong kanyang natatanging misyon

kung makakarating pa sa dulo

kahit maraming balakid ito

maaaring tumaas ang ranggo

maging Queen, Bishop, Horse, o Rook ito

tulad din sa buhay ang ahedres

sa hirap man laging nagtitiis

uunlad din, di ka na tatangis

bulsa mo'y di lalaging manipis

- gregoriovbituinjr.

12.09.2022

Libag

LIBAG

alahas mo man ay libag

dahil obrerong kaysipag

kung magtrabaho'y matatag

maghapon man o magdamag

naglilipak na ang kamay

sa bawat trabahong taglay

sa sahod mang ibinigay

ay sadyang di mapalagay

sa pawis ay natuyuan

at pag-uwi ng tahanan

nanlalagkit na katawan

ay kanyang paliliguan

upang libag ay maalis

at katawan ay luminis

ang libag pag kinilatis

ay nahubad na't umimpis

- gregoriovbituinjr.

12.08.2022

Repleksyon

REPLEKSYON

alam mong di siya  nakalutang sa hangin

tubig lang sa sahig ay nagtila salamin

repleksyon lang iyon, pag iyong susuriin

aba'y walang multo, tiyak mong sasabihin

pagmasdan mo, nakatingkayad lang ang tao

nakatungtong sa sahig matapos ang bagyo

marahil isa iyong matinding delubyo

na sa isang probinsya o lungsod lumumpo

- gregoriovbituinjr.

12.08.2022

* litrato mula sa google

Walis at pansuro

WALIS AT PANSURO

dapat may walis ka at pansuro

sa inyong tahanan nakatago

pag may agiw, dumi o siphayo

ay walisin mo ng buong pagsuyo

mga naglipanang karumihan

sa isip o sa kapaligiran

ilagay sa pansuro o dustpan

nang kalooban din ay gumaan

kapag may nabasag na salamin

o may gabok na dala ng hangin

kalat sa sahig ay wawalisin

dumi'y sa pansuro titipunin

sa tahanan nga'y tungkulin ko na

at gawain din sa opisina

maging pagwawalis sa kalsada

dahil may walis at pansuro ka

sa layak ay di masasalabid

mga paa mo'y di mapapatid

pagkat anong linis ng paligid

kapayapaan sa puso'y hatid

- gregoriovbituinjr.

12.08.2022

Binabasa ko ang maikling kwentong "Mga Tinig sa Dilim" ni Rosario De Guzman-Lingat sa kanyang aklat na "Si Juan: Beterano at iba pang kwento", pahina 85-99, nang mapuna ko ang isang salita, na sa tingin ko'y lumang Tagalog sa dustpan. 

Karaniwan kasi nating alam sa dustpan ay pandakot, subalit may iba pa pala. Ang pandakot kasi ay hindi lang dustpan kundi maaaring pala na pandakot ng buhangin. Mukhang eksakto ang pansurò para sa dustpan upang hindi maipagkamali sa pala.

Basahin natin ang dalawang talata na binabanggit ang pansurò sa pahina 86 ng nasabing aklat:

(1) May dala nang walis at pansurò ang babae nang magbalik. Maingat na tinipon ang durog na salamin, winalis sa pansurò. "Kumusta nga pala ang pinsan ninyo, Itay? Dumalaw kayo kangina, di ba?"

(2) Nailagay na ng babae ang lahat ng salaming basag sa pansurò. May kunot ng pag-aalala sa kanyang noo nang humarap sa kausap. "Bakit hindi pa ipasok sa pagamutan ng mga baliw? Higit siyang matutulungan doon."

Sining

SINING

nakapinta sa upuang bato

ay tigreng may mukhang anong amo

katabi nito'y lawin at loro

kulay ng paligid pa'y seryoso

may mensahe pang payo sa masa:

itatatag nating sama-sama

ang luntiang lungsod na kayganda

kahit na tayo'y magkakaiba

tila nasa daigdig ng aliw

kasama ang pusong gumigiliw

sa pagsasama'y huwag bibitiw

upang pag-ibig ay di magmaliw

tingni't gumagalaw yaong sining

habang yaring diwa'y nahihimbing

ang tigreng iyon pag sumingasing

ay tandang dapat ka nang gumising

- gregoriovbituinjr.

12.08.2022

Dapithapon

DAPITHAPON

talagang sumasapit ang dapithapon ng buhay

tulad ng sinaad sa mitolohiyang Griyego

mga talinghagang pag nilirip, sadyang kahusay

umaga'y apat, tanghali'y dalawa, gabi'y tatlo

mabuti't nadaanan mo ang umaga't tanghali

di gaya ng ibang tinokhang lang ng basta-basta

naabot man natin ang dapithapon kung sakali

tayo ba'y may ambag sa mundo't nagawa talaga?

kayraming bayaning namatay noong kabataan

di man lang nabuhay ng edad higit apatnapu

ngunit buong buhay na'y inambag para sa bayan

tayo ba'y may nagawa't aabot pa ng walumpu?

bukangliwayway, tanghaling tapat, at dapithapon

madaling araw, tirik ang araw, at takipsilim

ngayon ay masigla pa't patuloy sa mga hamon

hanggang sa pumikit na upang yakapin ang dilim

- gregoriovbituinjr.

12.07.2022

Butas

BUTAS

may butas sa bangketa

ang kanilang nakita

nilagyan ng basura

ah, ginawa'y tama ba?

basta butas ay lagyan?

at gawing basurahan?

kawawang kalikasan?

budhi nila'y nasaan?

may butas, parang kanal

basura ang pantapal?

ang ganito bang asal

ay anong tawag, hangal?

basta ba butas, pasak?

di ka ba naiiyak?

kalikasa'y nanganak

ng laksa-laksang layak!

- gregoriovbituinjr.

12.07.2022

Ang tingin

ANG TINGIN

ano raw alam ko sa pagiging

lider ng masa kung ako't naging

makatang wala sa toreng garing

butas ang bulsa't wala ni kusing

laging tagabitbit ng bandila

at plakard sa pagkilos ng dukha

na yaong tungkulin pa't adhika'y

mamigay ng polyeto sa madla

pag ako kasi'y kanilang tingnan

parang kolokoy na walang alam

mga suot ay pinaglumaan

at sikmura'y laging kumakalam

laging nagpapainit sa rali

nasa gitna't di man lang tumabi

na parang laging di mapakali

di naman sigang di mo makanti

nabubuhay sa sistemang pangit

na tila di makita ang langit

basahin mo ang plakard na bitbit

galit na ngunit di pa magalit

- gregoriovbituinjr.

12.07.2022

Wi-fi

WI-FI

madalas, nag-iipon akong tunay

upang may pambayad lamang sa wi-fi

di bale nang magtipid sa pagkain

mabayaran lang, di man makakain

sanlibong piso kada isang buwan

kalahating buwan ay limandaan

saan kukunin lagi'y nasa isip

upang magka-wi-fi at di mainip

ah, pangangailangan na nga ito

gayong dati'y wala pa ang ganito

ito'y kasiyahang kapara'y langit

sa tulad kong kumakathang malimit

pag walang wi-fi, di na makagawa

upang inakda'y maabot ng madla

iyan na'y buhay ng mga tulad ko

na pag nawala iyan, patay ako

- gregoriovbituinjr.

12.06.2022

Talumpati

TALUMPATI

madalas tayong makinig sa talumpati

ng ating magigiting na lider ng masa

binabanggit bakit dukha'y namimighati

bakit may nang-aapi't nagsasamantala

ipinaliliwanag pati isyu't mithi

bakit babaguhin ang bulok na sistema

salamat sa kanilang ibinabahagi

upang masa'y magkaisa't maorganisa

- gregoriovbituinjr.

12.06.2022

Pasakit

PASAKIT

huwag ka sanang maging sakitin

baka tulad ko'y di na pansinin

tila iba na sa iyo'y tingin

makiramdam kang parang sa akin

namayat? bakit pa kumikilos?

bagamat nagkasakit ngang lubos

tila buhay ko'y kalunos-lunos

lalo na't nadarama'y hikahos

ngunit pagkilos pa ri'y matindi

laban sa kuhila't mang-aapi

animo'y parang walang nangyari

parang di nagkasakit ang pobre

patuloy ang pagmamalasakit

sa kapwa dalita't maliliit

balewala anumang pasakit

basta't masagot ang mga bakit

kaya lagi ka ring mag-iingat

nang sakit ay di dapuang sukat

pagalingin ang anumang sugat

huwag lang balantukan ang pilat

- gregoriovbituinjr.

12.05.2022

50-50

50-50

hati tayo sa sangdaang piso

kaya tara, fifty-fifty tayo

pamasahe pauwi sa Tondo

pagod na't pahinga muna ako

fifty-fifty ay isang daan na

na pag usaping buhay na'y iba

ibig sabihin, patawirin ka

kailangan na ng ambulansya

magbakasakaling sa ospital

ay magamot ang sakit at pantal

naistrok kaya pautal-utal

sana yaring buhay pa'y magtagal

minsan, buhay ay nag-fifty-fifty 

sa di naiwasang pangyayari

may sa motor ay naaksidente

may sa di sinadyang insidente

kaya, ingat, lagi nang mag-ingat

at sa disgrasya'y huwag malingat

kayhirap na ako'y buhat-buhat

fifty-fifty'y di ko madalumat

- gregoriovbituinjr.

12.04.2022

Top fan badge

TOP FAN BADGE

wow! may top fan badge pala sa sikat na babasahin

tagahanga ka ng Liwayway ang ibig sabihin

dahil sa ugnayan ninyong lagi'y kikilalanin

patunay na tagapagtaguyod ka ng magasin

taospuso pong nagpapasasalamat sa Liwayway

lalo't sagisag na iyan ng paghanga't patunay

sa mga akdang nalathala'y laging nakatunghay

nobela, komiks, libangan, kwento, tula't sanaysay

ang bawat akda'y tagos sa puso't diwang totoo

inilalarawan pa ang lipunang Pilipino

at prinsipyo ng hustisya't karapatang pantao

nagpupugay akong taasnoo't taaskamao

O, Liwayway, kung malathala sa iyong pahina

ang aking kwento o ang isa ko man lang na tula

ay tatanawin kong utang na loob sa kabila

na ako'y isang maralita, kapos, walang-wala

dahil natupad na rin ang malaon nang pangarap

kaya sa pagkatha'y patuloy akong magsisikap

kahit ito man lamang ay ikatuwa nang ganap

magasing aking inspirasyon sa ginhawa't hirap

- gregoriovbituinjr.

12.03.2022

Pagtindig sa hamon

PAGTINDIG SA HAMON

di ko sukat akalain, ako'y itanghal doon

ginawarang Ambassador Against Disinformation

at tinanggap ang gawad na tunay ngang inspirasyon

upang ituloy ang laban para sa bayan ngayon

mula sa Human Rights Online ang award na natanggap

igalang ang human rights saanman yaong pangarap

respetuhin ang karapatan sa bayang malingap

na kahit dukha'y may dignidad, di aandap-andap

sa HR Online nagpapasalamat kaming taos

simula pa lang ito ng patuloy na pagkilos

upang karapatang pantao'y ipaglabang lubos

at pagyurak sa human rights ay ganap na matapos

mag-Ambassador ay malaking responsibilidad

panghahawakan ito sa abot ng abilidad

nang patuloy na ipagtanggol ang kapwa't matupad

ang pangarap na mundong may paggalang sa dignidad

sa harap ng baku-bakong landas na tatahakin

paglaban sa halibyong o fake news na'y adhikain

mga disimpormasyon nga'y talagang babakahin

at ang katotohanan ay ipagtatanggol natin

- gregoriovbituinjr.

12.03.2022

* ang award ay natanggap sa ginanap na 12th Human Rights Pinduteros Awards, 12.02.2022

Kataga

KATAGA

pag may salitang biglang sumagi sa isip

o may mga katagang agad nalilirip

natitigilan sa anumang halukipkip

na gawaing animo'y walang kahulilip

minsan nga'y titigil sa pagmomotorsiklo

o kung sa dyip titigil sa pagmamaneho

upang isulat lamang sa isang kwaderno

ang sa diwa'y bumulagang sigwa't delubyo

ah, mahirap nang mabangga kung di titigil

lalo't dumaloy sa isip ay di mapigil

animo ang mga kataga'y nanggigigil

kaya sa diwa'y talagang umuukilkil

mahalaga'y maisulat bago mawala

ang mga dalisdis, kuliglig, sipa't dagta

ng nanalasang katagang di pa humupa

na tila bagyong nagsisayawan sa diwa

- gregoriovbituinjr.

12.01.2022

Luto ni nanay

LUTO NI NANAY

naroong bubulong-bulong

niluto muli ni nanay

ay pawang isdang galunggong

O, ina, wala bang gulay

mula pa nang pagkabata

ay iyan na'y paborito

ulam na ang pritong isda

wala nang ibang ginusto

ngayon, dama'y di matiis

sapagkat siya'y para nang

merong hasang at kaliskis

gayong isda'y inutang lang

ngunit mabuti na iyan

kaysa magutom at wala

bukas, sana'y gulay naman

na talagang pampasigla

maraming salamat, ina

sa kaysasarap mong luto

O, mahal kitang talaga

nang may buo pong pagsuyo

- gregoriovbituinjr.

12.01.2022

Ang paalala

ANG PAALALA

huwag mong basta iiwan

gamit mo kung saan-saan

lola'y kabilin-bilinan

laban sa asal-kawatan

naiwan mo lang sandali

upang luha mo'y mapawi

sa nadamang pagkasawi

at hapdi ng pusong iwi

subalit wala na, wala

ang iyong dala't namutla

nawala na rin ang sigla

hapdi'y nanatiling sadya

napakahalaga niyon

pagkat puso mo'y naroon

subalit wala na iyon

pa'no na makakaahon

salamat sa paalala't

kayraming naaalala

palala nang palala na

ang uod ay nariyan pa

- gregoriovbituinjr.

11.30.2022

Imbestigahan ang sabwatan

IMBESTIGAHAN ANG SABWATAN

doon sa tanggapan ng Kagawaran ng Paggawa

ay nagsikilos ang mga babaeng manggagawa

imbestigahan ang sabwatan ng mga kuhila

kaya nagsara ang pabrikang pinasukang sadya

huwad na pagsasara'y isyu nila't panawagan

upang ang may kagagawan niyon ay matalupan

upang sila nama'y bayaran o ibalik naman

upang hibik nilang hustisya'y kanilang makamtan

hibik ng manggagawa sana'y dinggin mo, O, DOLE 

maging patas sa desisyon, at talagang magsilbi

sa mga maliliit, sa manggagawang inapi

at di sa mga kuhila't dupang na negosyante

taasnoong pagpupugay sa mga nagsikilos

na babaeng obrerong ayaw sa pambubusabos

ng sistemang sa kabulukan ay talagang puspos

tuloy ang laban! nawa'y magtagumpay kayong lubos!

- gregoriovbituinjr.

11.28.2022

* litratong kuha ng makatang gala sa pagkilos sa 

harap ng DOLE sa Intramuros, Maynila, 11.21.2022

Kalusugan at Kalikasan

KALUSUGAN AT KALIKASAN

i.

sa isang kaha ng sigarilyo

ay nakasulat: Kanser sa suso

sanhi raw ng pagyoyosi ito

tingni, mayroon pang "quit smoking"

sa pabalat na payo sa atin

ng mismong nagma-manufacturing?

ang gumagawa nga ba ng yosi

sa kalusugan nati'y may paki?

kung meron, di sila mabibili

kaya sa pabalat ay di akma

ang inilagay nilang salita

pagkat di na bibilhin ang gawa

ii.

ang pagyoyosi'y sariling pasya

kahit na makaltasan ang bulsa

kaya ba hayaan na lang sila?

huwag ka lang dumikit sa usok

ng yosi at dapat mong maarok

may epekto ang secondhand smoke

paki ko'y hinggil sa kalikasan

upos ba'y saan pagtatapunan

na sa dagat ay naglulutangan

kung nararapat, gawing yosibrik

na tulad ng sistemang ekobrik

iligtas ang mundo yaring hibik

- gregoriovbituinjr.

11.27.2022

Disenyo

DISENYO

nang gumapang sa lusak

ang mga hinahamak

may dugong nagsipatak

at ang nana'y nagnaknak

sa gubat na mapanglaw

tila ba may gumalaw

mula sa balintataw

ang nakita'y halimaw

subalit malikmata

ang lahat kong nakita

isip ay nagambala

yaring puso'y nangamba

kailan matatapos?

yaong pambubusabos?

pag masa ba'y kumilos?

nang bayan ay matubos?

sistema'y may disenyo

tulad ng arkitekto

kapara'y inhinyero

nasa ko'y pagbabago

ang disenyo'y baguhin

ang kwadrado'y bilugin

ang masa'y pakilusin

ang sistema'y kalusin

- gregoriovbituinjr.

11.27.2022

Sahod Itaas, Presyo Ibaba!

SAHOD ITAAS, PRESYO IBABA!

kaytagal na ng panawagan

ng manggagawa't mamamayan

sa kapitalistang lipunan

ngunit sila ba'y pinakinggan?

Sahod Itaas! Presyo Ibaba!

ngunit may napala ba tayo

sa animo'y binging gobyerno

minsan lang tumaas ang sweldo

nang pinaglaban ng obrero

Sahod Itaas! Presyo Ibaba!

presyo ng bigas ba'y bumaba

o pagtaas ay mas higit nga

gasolina nga ba'y bumaba

o sirit ng presyo'y palala

Sahod Itaas! Presyo Ibaba!

ang matupad ito'y kailan?

dinggin kaya ang kahilingan?

ngunit tayo'y magpatuloy lang

may nagagawa ang paglaban!

- gregoriovbituinjr.

11.27.2022

Nobyembre

NOBYEMBRE

samutsari yaong kaganapan ngayong Nobyembre

birthday nina Itay, pamangkin, utol kong babae

at ng isa ko pang utol na naroon sa Davao

na kaytagal nang di nakita't ako'y namamanglaw

kaarawan din ng unang Hari ng Balagtasan

ngalan ay Huseng Batute, idolo sa tulaan

kung saan National Poetry Day ay idinaos

sa mismong kaarawan niyang Nobyembre Beynte Dos

sentenaryo ngayong taon ng magasing Liwayway

na ngayong Nobyembre rin pinagpupugayang tunay

sa dakilang magasing ito naman nalathala

ang laksa-laksang nobela, sanaysay, kwento't tula

O, Nobyembre, sa buhay namin ay mahalaga ka

upang magdiwang, gumunita, kumatha't magsaya

- gregoriovbituinjr.

11.26.2022

Sa lansangan

SA LANSANGAN

di ko matanaw ang nasa kabila

naroon kaya ang mga dakila

anumang pasakit ba'y naiinda

pagkat sa harap ng problema'y handa

subalit hindi, kayraming kuhila

ang nasa tuktok, tila pinagpala

nagsasamantala sa manggagawa

kontraktwal na nga, sahod pa'y kaybaba

habang naroroong nakatulala

maaliwalas pa rin yaring mukha

toreng garing man ay wala sa lupa

mistula pa ring di kaawa-awa

patuloy sa pagwawala ang siga

sa bangketa ng mga walang-wala

nagbabakasakaling may mapala

sa iaabot ng takot na madla

- gregoriovbituinjr.

11.26.2022

Stop VAWC, Now!

STOP VAWC, NOW!

O, itigil na ang karahasan

sa mga bata't kababaihan

igalang ang mga karapatan

patungong hustisyang panlipunan

kalahati ng sangkatauhan

ang laksa-laksang kababaihan

galing tayo sa sinapupunan

ng babae, maging sino ka man

mga bata ang kinabukasan

nitong daigdig nating tahanan

kaya sila'y dapat alagaan

at ilayo sa kapahamakan

Stop VAWC! yaring panawagan

na dapat nating maunawaan

patagusin sa puso't isipan

prinsipyong huwag kakaligtaan

- gregoriovbituinjr.

11.25.2022

* VAWC - Violence Against Women and Children

Panlahatan

PANLAHATAN

iwi kong layon ay panlahatan

at di pansariling pakinabang

ganyan hinubog ang katauhan

kung bakit ako'y ganito't ganyan

bakit sarili'y wala sa isip

kung sarili ko'y di halukipkip

kundi pambayan ang nalilirip

na sa puso'y walang kahulilip

kaginhawahan para sa lahat

kapwa tao, kauri, kabalat

di sa ilan, di sa mga bundat

oo, sa ganyan ako namulat

pakikibaka'y sadyang gagawin

nang panlipunang hustisya'y kamtin

iyan ang sa buhay ko'y mithiin

at diyan mo ako kilalanin

- gregoriovbituinjr.

11.24.2022

Bakas

BAKAS

may kurot sa dibdib sa gaya naming maralita

na namumuhay ng marangal ngunit sinusumpa

may kirot sa puso't tinuturing na hampaslupa

kaya dignidad nami'y pinagtatanggol na lubha

kaya maging aktibista'y taospusong niyakap

dahil tulad ninuman, kami rin ay nangangarap

ng maunlad na buhay na di pansariling ganap

kundi pangkalahatan, ang lahat ay nililingap

isinasabuhay ang panuntunang aktibista

simpleng pamumuhay at puspusang pakikibaka

kamtin ang karapatan at panlipunang hustisya

pakikipagkapwa't paglilingkod sa uri't masa

patuloy na pupunahin ang mga kabulukan

kapalpakan at katiwalia'y nilalabanan

di lang pulos dayuhan kundi tusong kababayan

lalo ang lingkod bayang di nagsisilbi sa bayan 

sinusundan namin ay bakas ng mga bayani

na binabaka'y pagsasamantala't pang-aapi

ang tungkulin ko'y para sa bayan, di pansarili

alay ang buhay para sa tao; tayo, di kami

- gregoriovbituinjr.

11.24.2022

Ipagtanggol ang karapatan ng paggawa

IPAGTANGGOL ANG KARAPATAN NG PAGGAWA

nang mabatid ang pagkilos ng uring manggagawa

doon sa tanggapan ng Kagawaran ng Paggawa

agad kaming nakiisa't nakibaka ring sadya

upang karapatan nila'y ipagtanggol ngang lubha

dahil sila ang lumikha ng ating ekonomya

walang pag-unlad sa ating bayan kung wala sila

silang nagpapatakbo ng makina sa pabrika

lumilikha ng produkto, ngayo'y nakikibaka

di munting mangangalakal ang kanilang kalaban

kundi internasyunal na kumpanyang anong yaman

limpak-limpak na ang tubo, sagad sa kabundatan

nais pa ngang mag-ekspansyon sa buong daigdigan

di pa mapagbigyan ang hinihingi ng obrero

ayon sa Konstitusyon, makabubuhay na sweldo

living wage, hindi minimum wage, sadyang makatao

ngunit barat na sweldo'y likas sa kapitalismo

baka tatalunin sila ng kumpanyang karibal

na tulad din nila'y korporasyong multinasyunal

kung di babaratin ang manggagawa, sila'y hangal

ayaw magpakatao ng kapitalistang banal

kaya dapat manggagawa'y patuloy na kumilos

wakasan ang sistemang mapangyurak sa hikahos

walang dangal sa kapitalismong mapambusabos

bulok na sistema'y dapat nang tuluyang matapos

- gregoriovbituinjr.

11.23.2022

* kuha ng makatang gala sa pagkilos ng mga manggagawa sa harap ng DOLE, 11.21.2022

May pag-asa pa

MAY PAG-ASA PA

may pag-asa pa bang mabago ang sistema

kung wala, bakit sa mundo'y naririto pa

mayroong pag-asa kaya nakikibaka

dito na lang kumakapit, tatanggalin pa?

hindi ba't may kasabihan ang matatanda

na hangga't may buhay, may pag-asa, di ba nga?

magsikap lang, pag may tiyaga, may nilaga

sa patuloy na pagkilos, may mapapala

hangga't may nangangarap ng laya ng bayan

mula pangil ng kapitalismo't gahaman

sa patalim man o pag-asa manghawakan

araw ay sumisikat pa rin sa silangan

kaya halina't magpatuloy sa pagkilos

laban sa kaapihan at pambubusabos

laban sa pagsasamantala ng malignos

na bundat na sa tubo'y di pa makaraos

- gregoriovbituinjr.

11.23.2022

Pagtangkilik

PAGTANGKILIK

patuloy lang basahin ang pahayagan ng dukha

na di lang dyaryo kundi produkto ng dugo't luha

binabalita ang nangyayari sa maralita

sinasalaysay ang saysay ng buhay nila't diwa

nakikibaka para sa karapatang pantao

pulos diskarte man, walang permanenteng trabaho

walang sahod, nagtitinda lang sa bangketa't kanto

subalit namumuhay ng marangal, di perwisyo

nakatira sa pinagtagpi-tagping barungbarong

o sa tabing ilog, tabing riles, o sa danger zone

ang iba nama'y sa himlayan ng mga kabaong

o kaya'y nakikiiskwat sa tabing subdibisyon

Taliba ng Maralita'y saksi sa laban nila

simpleng pamumuhay at puspusang pakikibaka

mabuhay kayong dukha, kumilos ng sama-sama

sa pagtangkilik sa Taliba, salamat talaga!

- gregoriovbituinjr.

11.23.2022

* ang Taliba ng Maralita ang opisyal na pahayagan ng pambansang organisasyong Kongreso ng Pagkakaisa ng Maralitang Lungsod (KPML)