Pagbabago'y di makikita sa balota

PAGBABAGO'Y DI MAKIKITA SA BALOTA
ni Gregorio V. Bituin Jr.
8 pantig bawat taludtod

nangangako ang balota
ng pagbabago sa masa
ngunit ilang eleksyon na
pagbabago'y di makita

namamayagpag ang trapo
sila raw ang pagbabago
dati pa ring apelyido
sila uli'y kandidato

mahirap pa rin ang dukha
dukha pati manggagawa
di nagbabago ang bansa
balota'y anong adhika

pagbabago? ows, talaga?
pag-asa ba ang balota?
trapo ba'y mawawala na?
pagbabago'y kanino ba?

ilang eleksyo'y nagdaan
ang pagbabago'y nasaan
pulos trapo ang halalan
wala nang pagpipilian

nais naming pagbabago
ay sistema, di lang tao
baguhin mismong gobyerno
pati ang lipunang ito

kilanlin ang karapatan
ng lahat ng mamamayan
edukasyon, kalusugan
dapat lahat, libre iyan

sa lipunang makatao
serbisyo, hindi negosyo
nagsisilbi ang gobyerno
sa Pilipino, di sa dayo

Kapara niya'y salot

KAPARA NIYA'Y SALOT
ni Gregorio V. Bituin Jr.
9 pantig bawat taludtod

yumaman sa pangungurakot
pulitikong kunwa'y bantulot
nang magkapera'y nagmaramot
buhay niya'y nakalulungkot

isa siya ngayong kilabot
kahit kanino'y nanghuhuthot
aba, bakit binabaluktot
prinsipyong dati'y abot-abot

kapara niya'y isang salot
sa kanya'y tila walang gamot
pag nahuli'y ano ang sagot
siya kaya'y makalulusot

Matinong gobyerno't maayos na pananaw

MATINONG GOBYERNO'T MAAYOS NA PANANAW
ni Gregorio V. Bituin Jr.
13 pantig bawat taludtod

matinong gobyerno't maayos na pananaw
ang adhika nitong bayan sa gabi't araw

di tingin sa babae'y manikang magaslaw
na animo'y laruang parang mananayaw

di tingin sa manggagawa'y makinang tungaw
na sahurang alipin ng mga halimaw

di tingin sa magsasaka'y isang kalabaw
kayod ng kayod, tila tinimping balaraw

di tingin sa dukha'y isa nang magnanakaw
na pataygutom, mga bituka'y naglisaw

sa matinong gobyerno'y sino ang aayaw
gayong pangarap ng bayan sa gabi't araw

paano mangyayari kung sa diwa'y litaw
ang kaisipang kinalawang, naninilaw

kaya dapat baguhin ang sistemang hilaw
upang bukas natin ay di maging mapanglaw

Puro salita, walang nagawa

PURO SALITA, WALANG NAGAWA
ni Gregorio V. Bituin Jr.
13 pantig bawat taludtod

sadya bang puro salita, walang nagawa
para sa ating manggagawa't maralita
ang kasalukuyang rehimeng pulos dada
di naman pala kakampi ng manggagawa

wala daw magawa sa kontraktwalisasyon
nakabubuti raw ito sa ating nasyon
anong klaseng pangulong ganito ang tugon
lohikang kapitalista ang nilalamon

manggagawa, dangal mo'y niyuyurakan na
iyang pangulo mo'y isip-kapitalista
sa isang tabi'y mananahimik na lang ba
ipakita mo ang lakas ng iyong pwersa

sanay tayong kumayod sa pagtatrabaho
sanayin nating kumayod ng pagbabago
obrero'y kaysipag pakainin ang mundo
magsipag din tayong ang sistema'y mabago

halina't baguhin itong sistemang bulok
na sa kaibuturan nati'y umuuk-ok
iparanas sa kapitalismo ang dagok
at uring manggagawa'y ilagay sa tuktok

1 Mayo 2013

Nakita kitang muli sa rali

NAKITA KITANG MULI SA RALI

ni Gregorio V. Bituin Jr.

10 pantig bawat taludtod

nakita kitang muli sa rali

ikaw na kaygandang binibini

na kasama-sama ko pa noon

katuwang sa isang gintong layon

kaytamis pa rin ng iyong ngiti

na nagmarka sa puso kong sawi

aktibista kang muling nagbalik

dama ko bawat iyong hagikhik

sa pandinig ko'y tila musika

ang tinig mo'y nakahahalina

nawa'y magbalik ka nang tuluyan

di ba't sabi mo'y walang iwanan

kasama, narito pa rin ako

handang umalalay hanggang dulo

kamatayan man ang makaharap

asahan mo ang aking paglingap

Wakasan ang dinastiyang pulitikal!

WAKASAN ANG DINASTIYANG PULITIKAL!
ni Gregorio V. Bituin Jr.
10 pantig bawat taludtod

isang trapo ang kanilang ama
pumalit dito'y kanyang asawa

nang matapos ang panunungkulan
anak ang papalit sa magulang

isang pamilya ang namumuno
sila-sila yaong nakaupo

sa isang bayan sila ang hari
bayang animo'y kanilang ari

laging sila ang nasa pedestal
silang dinastiyang pulitikal

di na ba nagsasawa ang masa
sa mga trapong magkapamilya

masa lang ba'y hanggang sa pagboto
gayong di naglilingkod ang trapo

trapo't dinastiyang pulitikal
ay bakit ating pinatatagal

kailangan ng tunay na lingkod
na tao'y unang tinataguyod

dinastiya ng trapo'y wakasan!
mga trapo'y dapat nang palitan!

Ang Pobreng Alak

ANG POBRENG ALAK
ni Gregorio V. Bituin Jr.
14 pantig bawat taludtod

iyang pobreng alak ang lagi nang sinisisi
pag may hindi magandang nagawa at nangyari
pag lasenggo'y nanyansing, nagalit ang babae
ikakatwiran ng lasenggo, ang alak kasi

sa maraming insidente, sinisisi'y alak
sa mga aksidente, alak ang nanunulak
kaya marami yaong gumagapang sa lusak
dahil sa pobreng alak, maraming napahamak

ang alak ay nariyan lang, walang ginagawâ
ngunit espiritu niya'y babago ng diwâ
may kasabihan nga, anumang sobra'y masamâ
pag lumaklak ng alak, ilagay mo sa tamâ

ang alak ay inilalagay lamang sa tiyan
pag sa ulo inilagay ay kapahamakan

Doon po sa aming maralitang bayan

DOON PO SA AMING MARALITANG BAYAN
ni Gregorio V. Bituin Jr.
12 pantig bawat taludtod

i

doon po sa aming maralitang bayan
mga pulitiko ay nagdadagsaan
mahirap ay muling pinangangakuan
pagagandahin daw ang kinabukasan

ngunit bakit kaya silang pulitiko
nakaupo na ng kung ilang termino
ngunit wala pa rin yaong pagbabago
na ipinangako nang sila'y manalo

at nangangampanya muli sila ngayon
ang muling manalo ang kanilang layon
serbisyo kunwari ang kanilang tuon
gayong nang umupo'y tadtad ng korapsyon

ii

doon po sa aming bayang naghihirap
di matupad-tupad ang aming pangarap
mga pulitiko'y di mo makausap
problema ng masa'y di maharap-harap

kahit alam nilang masa'y nagdurusa
ginagawa'y panay pamumulitika
mga dukha'y walang pagkain sa mesa
walang katiyakan ang trabaho nila

iyang mga trapo'y sadyang mapagpanggap
pag muling nanalo'y di mo mahagilap
serbisyo sa bayan ay aandap-andap
kaya ang ginhawa'y di man lang malasap

iii

doon po sa amin, may halalan muli
ang masa'y di dapat magbakasakali
mga kandidato'y dapat lang masuri
kung sino ang tapat at kapuri-puri

ilan sa kanila'y kilalang balimbing
iba't iba yaong partidong kasiping
naroon kung saan may kumakalansing
at pera ng bayan ang kinukutingting

ating bayan dapat tuluyang mabago
ang mga kurakot, huwag nang iboto
ang mga balimbing, tanggalin sa pwesto
nais nami'y tapat, totoong serbisyo

Salamat sa Makakalikasang Kilusan

SALAMAT SA MAKAKALIKASANG KILUSAN
ni Gregorio V. Bituin Jr.
17 pantig bawat taludtod

salita lang ang salamat, ngunit mahalagang salita
na dapat mamutawi sa labi o maisulat kaya
taos-pusong dapat ihandog sa kapwa tao't kilusan
upang matiyak lamang gumanda ang mundo at lipunan
makakalikasan silang inspirado, iminulat ang madla
kayrami rin nilang nagsakripisyo, kayraming nagluksa
salamat ay salita lamang, ngunit napakahalaga
pagkat bukas at buhay ng uri't bayan ang naalala
kilusan sa kalikasan, bayanihang di maikubli
sadyang katangi-tangi kayo't hindi dapat isangtabi
salamat ng marami sa kilusang makakalikasan
sa inyo ang pagpupugay ko't bayani kayo ng bayan

Walang "Chosen Few"

WALANG "CHOSEN FEW"
ni Gregorio V. Bituin Jr.
13 pantig bawat taludtod

i
masasagip lang ay ilan, sabi ng hula
ligtas lang ang nananampalataya
para bang gumawa ng tao si Bathala
para sa kanya ay sumamba't maniwala

laruan ka lang ba ng kanilang Bathala
upang sa kanya ikaw'y maniwala
upang maligtas ka sa impyernong bunganga
na panakot nila sa bayan at sa madla

tagatala ng mabuti't masama
ganito ba ang papel ng Bathala
gayong ang sabi, ikaw ay nilikha
tanggap niya, mabuti o masama

ii
ang tawag na impyerno'y inimbento
upang ang kapwa'y ating irespeto
isang Bathala'y nilikha ng tao
upang matugunan ang tanong nito

sa kwento'y likha ng Bathala'y tao
habang Bathala'y likha rin ng tao
tulad ng Araw sa patag na mundo
namali ang husga kay Galileo

minamahal ni Bathala ang tao
di man maniwala sa kanya ito
Bathala'y makatarungang totoo
ligtas ka sa inimbentong impyerno

bakit ba meron pang mga "chosen few"
at itsapuwera ang iba pang tao
mapamili ba ang Bathalang ito
iba'y matino, iba'y sa impyerno?

di makatarungan itong "chosen few"
ganito'y makasariling konsepto
anang bayaning Emilio Jacinto:
"Ang lahat, iisa ang pagkatao."

walang "chosen few", lahat mahal kayo
ng Bathalang lumikha nitong mundo
ng Bathalang nilikha nitong tao
wala rin ang panakot na impyerno

Elehiya kay Samantha Jane

PAHIMAKAS SA ISANG ANGHEL
(elehiya kay Samantha Jane)
ni Gregorio V. Bituin Jr.

minsan ka lang naming nakasama
sa pangangampanya ngayong halalan
isa ka sa itinuring na anghel
na nangampanya para ipanalo
ang ating kandidato
bata ka pa
parang anak ka na namin
o parang kapatid naming bunso
may kinabukasan pa sanang
naghihintay sa iyo
ngunit wala ka na
kay-aga mong nawala
sa mura mong gulang
na labimpito
di namin lubos-maisip
bakit kay-aga mong nawala
di ka lang anghel ng kandidato
anghel ka rin sa marami
sa aming bagong kakilala mo
sa mga kaklase't kaibigan mo
na ayon sa kanila
ikaw ay napakabait
kinukuha nga ba ng maaga
ang tulad mong mababait
o ito'y sadyang aksidenteng
idinulot ng tadhana
o sadyang walang ingat
ang  tricycle driver ng sinasakyan mo
marami kayong nakasakay dito
at nakasabit ka sa likod nito
dahil marahil sa kawalang ingat
o marahil ay kawalan
ng pag-aalala sa kanyang pasahero
ikaw ay tumilapon
humampas ang ulo sa semento
na naging dahilan upang
maaga kang mawala
sa ibabaw ng mundo

ang maganda mong kinabukasan
ang mga mithiin mo sa buhay
ang iyong mga pinapangarap
ay di na magkakaroon ng katuparan

minsan ka lang naming nakasama
sa pangangampanya
ngunit ikaw ay anghel
na umukit  na sa aming puso’t diwa

ramdam namin ang sakit
at pait ng maaga mong pagkawala
dahil minsan ka naming nakasama

paalam, aming kaibigan
paalam, Sam

paalam

* Si Samantha Jane Sanorias, 17, ay isang kabataang namatay sa aksidente matapos ang pangangampanya para sa isang kandidato, nang humarurot ang tricycle kung saan siya nakasabit sa likod ay nakabitaw siya sa biglang pagliko ng tricycle at humampas ang kanyang ulo sa semento, na sanhi ng kanyang kamatayan; Abril 7, 2013 nangyari ang aksidente, nadala sa ospital, at namatay kinabukasan; libing niya ay Abril 17, 2013

Nagbigti sa kulungan

NAGBIGTI SA KULUNGANni Gregorio V. Bituin Jr.
7 pantig bawat taludtod

nagbigti ang kawatan
sa loob ng kulungan
budhi'y di nalinisan
sarili'y tinuluyan

Hapong-hapo sa kawalan

HAPONG-HAPO SA KAWALAN
ni Gregorio V. BituinJr.
11 pantig bawat taludtod

hapong-hapo na ako sa kawalan
tila may lason ang buong katawan
sa dibdib kaybigat ng nakadagan
apektado pati puso't isipan
nararamdaman ko ba'y kamatayan?

tila panahon ngayon ng ligalig
tila namatay ang bawat pag-ibig
tila ang puso'y tumigil ang pintig
ang bawat kalamnan ko'y nanginginig
prinsipyo't diwa'y tila nilulupig

tila namatay ang buo kong isip
tila mga dugo ko'y sinisipsip
mulat ngunit tila nananaginip
ang napagtanto'y pilit nililirip
ang diwa'y tila sansiglong naidlip

makabangon pa kaya sa kawalan
kung buhay dito'y walang katarungan
nawarat na yaring diwa't kalamnan
ang ngayon ko'y puno ng kapanglawan
bukas ko ba'y patungo sa libingan?

Dalawang dipang langit

DALAWANG DIPANG LANGIT
ni Gregorio V. Bituin Jr.
13 pantig bawat taludtod

dalawang dipa lang ang layo mo sa akin
hanggang titig lang ako't di kita maangkin
paano kita hahandugan ng pagtingin
gayong ako'y bilanggo sa di gawang krimen

ngunit sapat na ang titigan kita, sinta
habang sa panaginip, ikaw ang diyosa
sadyang langit na sa akin ang matanaw ka
paano pa kaya kung makaniig kita

isa kang dilag na labi'y kaysarap hagkan
kapatid ng kapwa bilanggo sa bitayan
mata mo'y nangungusap sa kaibuturan
ng loob kong binahiran ng kasalanan

dalawang dipang langit ng aking haraya
itinitibok ka niring puso, diwata
sa mundo'y iisa lang ang aking adhika
ang makasama kita sakaling lumaya

Kailangan ang diwang malaya

KAILANGAN ANG DIWANG MALAYA
ni Gregorio V. Bituin Jr.
10  pantig bawat taludtod

kailangan ang diwang malaya
kasama ang mga manggagawa
mga magsasaka't mangingisda
pagkat ito ang nais ng madla

diwang malaya'y isang hustisya
di napiit ang isip sa dusa
kalayaang mag-isip, magkwenta
magkwento ng naisin ang masa

diwang malaya'y pinaglalaban
inaadhika ng sambayanan
edukasyon o rebolusyon man
ipaglaban ang nasa ng bayan

kailangan ang diwang malaya
upang palaguin ang haraya
sa bawat kathain ng makata
nasa diwa'y paglaya ng madla

Dalit sa Tunggalian ng Uri

DALIT SA TUNGGALIAN NG URI
ni Gregorio V. Bituin Jr.
8 pantig bawat taludtod

i
yumayaman ang mayaman
dukha'y lalong dumudukha
ganito ba ang lipunan
may uring nakakawawa

ii
manggagawa, masipag man
lagi ring nagdaralita
patunay na kasipagan
di agad makaginhawa

iii
babae'y kalakal lamang
sa mga kapitalista
babae'y dapat lumaban
at baguhin ang sistema

iv
edukasyon dapat libre
upang di na mahirapan
itong mga estudyante
kapag oras ng bayaran

v
magsasaka'y dapat bigyan
ng kanilang masasaka
karit nila'y aasahan
sa pagkain bawat mesa

vi
asenderong mangangamkam
ay sakim sa lupa't tubô
labis silang mapang-uyam
dapat lang silang maglahô

vii
obrero'y dapat mag-aklas
laban sa kapitalismo
lipunan ay gawing patas
itindig ang sosyalismo

Mahirap umurong sa laban

MAHIRAP UMURONG SA LABAN

ni Gregorio V. Bituin Jr.

12 pantig bawat taludtod

mahirap umurong sa laban, mahirap

kaysakit ituring na isa kang duwag

maigi'y lumaban, gumapang sa lusak

di baleng duguan, ang nguso'y mabasag

kahit kamatayan yaong makaharap

basta't lumaban ka, lumabang matatag

nariyan ang dangal, puri'y di natinag

laging taas-noo sinumang kaharap

Banta ng Seksi

BANTA NG SEKSI
ni Gregorio V. Bituin Jr.

binantaan ako ng isang babae
mag-ingat daw ako
naisip ko'y ano siya sinuswerte
kanya ba ang mundo
nagbanta'y kayganda, katawan ay seksi
dalaga pa kaya
kaysarap siilin ng halik ang seksi
kahit amoy-lupa
nais yata niyang tulad ko'y mapikot
ito'ng kanyang nais
tulaan ko siya ng katakut-takot
lambingin ng pares
di bale nang ako'y pikuting tuluyan
ng aking diwata
ang tulaan siya'y di dapat tanggihan
ako'y tula't diwa

Bisyo ko ang pagtula

BISYO KO ANG PAGTULA

ni Gregorio V. Bituin Jr.

10 pantig bawat taludtod

sabi nila, wala akong bisyo

di raw ako naninigarilyo

o lalagok ng alak sa baso

at di rin sumusundot ng bato

sa buhay, ano raw ginagawa

wala nang bisyo'y nakatunganga

bakit ba laging natutulala

gayong walang bisyo ang makata

ano ba ang bisyo? ang tanong ko

bisyo'y ang laging ginagawa mo

na maligaya kang gawin ito

sa pang-araw-araw na buhay mo

kung gayon, ang bisyo ko'y pagtula

sapagkat masaya ang pagkatha

iba't ibang diwa'y nalilikha

masayang maglubid ng salita

kung kasiyahan ang pagbibisyo

masaya ang naninigarilyo

pati na iyang mga lasenggo

lalo ang gumagamit ng bato

bisyong pangwasak niyang katawan

bisyong panandaling kasiyahan

na sa problema'y di kasagutan

kundi pansamantalang pag-alwan

ng sitwasyong minsan di malirip

kundi suliraning halukipkip

mabuti pa ang bisyong gahanip

pagtulang pampalusog ng isip

Di dapat magmalupit sa kapwa

DI DAPAT MAGMALUPIT SA KAPWA
ni Gregorio V. Bituin Jr.
10  pantig bawat taludtod

di dapat magmalupit sa kapwa
di dapat ang dukha'y minamata
di dapat ang mga walang pera
ay dinudusta ng elitista

maging may pera'y di karapatan
upang ang dukha'y pagmalupitan
yaong nanghamak sa kaninuman
dapat magbayad ng kasalanan

di bale nang tayo ang magdusa
kaysa pagmalupitan ang masa
mabuting kaasalan sa kapwa
ang dapat upang mundo'y sumaya

Kulaylay

KULAYLAY
ni Gregorio V. Bituin Jr.

itim
sakdal lagim
mutyang dilim
nangingitim

bughaw
bulalakaw
nauuhaw
sa tag-araw

pula
masagana
ang dalaga
sa pagsinta

puti
yaong hari
ay di pari
pag nag-ari

berde
limang lente
ang dinale
sa babae

lila
manggagawa
kumalinga
sa matanda

dilaw
natatanaw
ngiping ayaw
naninilaw

asul
pitong bulol
tumututol
sa ataul

Ang BOTO natin ay hindi Buy One, Take One

ANG BOTO NATIN AY HINDI BUY ONE, TAKE ONE
ni Gregorio V. Bituin Jr.
15 pantig bawat taludtod

ang daglat daw ng salitang BOTO ay Buy One, Take One
madalas, kapalit ng boto'y isang kilong bigas
aba'y ang bawat boto'y para sa kinabukasan
ngunit may mga nais manalong kapara'y hudas

ngunit maraming pulitikong kayhilig mangako
sa mga dukha't kadalasan namang napapako
kapalit ng kilong bigas, boto ang nilalako
dukha nama'y kakagat, gutom lamang ay maglaho

kaya nahahalal ang mga pulitikong tunggak
kaya kinabukasan ng masa'y napapahamak
kaya polisiya't programa sa bayan ay palpak
sa kanila'y kawawa ang bukas ng ating anak

dapat na daglat ng BOTO ay Business Off, Truth Only
pagkat bawat boto'y di dapat ipinagbibili
tunay na halal dapat ang maglingkod, hahalili
hindi ang trapong iniisip lang ay ang sarili

Ang mananakop at ang sinakop

ANG MANANAKOP AT ANG SINAKOP
ni Gregorio V. Bituin Jr.
10 pantig bawat taludtod

matangos ang ilong ng mga demonyo
habang pango naman yaong mga santo

Balantukan pa ang sugat

BALANTUKAN PA ANG SUGAT
ni Gregorio V. Bituin Jr.
(alay sa mga pamilya't biktima ng sapilitang pagkawala - involuntary disappearence)

alalahanin sila
di dapat mawala sa kasaysayan
ang mga ngalan nila
bagamat sila'y di pa matagpuan

balantukan pa yaong
mga sugat na di mapaghihilom
ng mga oras, taon
nasa gunita ang mga kahapon

ang hinahanap namin
ay di yaman at kalayawang tunay
ang hinahanap namin
ay ang aming mga mahal sa buhay

nasaan ang hustisya
ang katahimikan ng aming loob
nahan na kaya sila
upang pumayapa ang aming loob

ang mga iwing sugat
ay mananatili pang balantukan
magkaroon mang pilat
di pa payapa ang puso't isipan

nawa'y matagpuan na
ang kaytagal na naming hinahanap
hustisya, ang hustisya
nang di na balantukan ang malasap

* balantukan - sugat na naghilom na ang balat ngunit may sugat pa rin sa loob, kaya naroon pa rin ang sakit

Tinula sa aktibidad ng FIND (Families of Victims of Involuntary Disappearance), Bantayog ng mga Bayani, Marso 27, 2013

Di ko pa oras

DI KO PA ORAS

ni Gregorio V. Bituin Jr.

10 pantig bawat taludtod

tangan mo'y tabak ni Kamatayan

habang nakatanghod ka sa akin

mata mo'y pula sa kapootan

tila nais maghasik ng lagim

ngunit hindi ako nangangamba

tila ba handa ko nang harapin

kung anumang daratnang disgrasya

parang tuod akong mainipin

gayunman, nais ko lang mawala

kung nagawa ang mga hangarin

nasakatuparan ang adhika

nagampanang husay ang tungkulin

hindi ko pa oras, Kamatayan

may dilag pa akong yayakapin

may dilag pa akong aanakan

isang pamilya pa'y bubuuin

darating din ang oras ko, oo

pag limanglibong tula'y nalikha

nalathala'y apatnapung libro

na nabasa ng sangmilyong madla

di pa ako mamamatay, ngayon

dahil sa laksang nasa sa buhay

kaydaming makabuluhang misyon

ang dapat ko pang magawang tunay

Walang Bagong Damit, Sobrang Likhang Damit

WALANG BAGONG DAMIT, SOBRANG LIKHANG DAMIT

ni Gregorio V. Bituin Jr.

13 pantig bawat taludtod

Nay, anang isang dalagang sakdal ng rikit

ibili nyo naman ako ng bagong damit

Wala akong pambili ng damit mo, anak

tugon ng inang sa sahig nakasalampak

Bakit, Nay, wala kang pambili ng damit ko

kaybaba na ba ng tinatanggap mong sweldo

Kasi, anak, ako'y walang trabaho ngayon

at di sapat itong aking mga naipon

Sa sinabi, ang anak ay natitigagal

bakit po, Nay, sa trabaho kayo'y tinanggal

Sobra na raw ang damit na aming nagawa

kaya nagtanggal na ng mga manggagawa

Bakit ganun, Nay, wala kang pambili ng damit

tinanggal ka dahil sobra-sobra na ang damit

Ganyan ang sistemang kapitalismo, anak

ang manggagawa'y pinagagapang sa lusak

Sistemang iya'y pinaunlad ng obrero

sistemang ang puso'y pawang tubo, di tao

Sobrang produkto'y di para pakinabangan

ng sinuman, ito'y para lang pagtubuan

Maglumuhod ka man, at tuhod mo'y magdugo

ito'y para lang sa kapitalistang tubo

Kaya, dapat palitan ang sistemang iyon

para sa bukas ng sunod na henerasyon

Salamat, Inay

SALAMAT, INAY

ni Gregorio V. Bituin Jr.

15 pantig bawat taludtod

ngayong umaga, nais kong magpasalamat, inay

kalahati man ng buhay ko tayo'y nagkawalay

salamat sa mga payo, pagmamahal, paggabay

tunay ngang sa mga anak, ikaw'y napakahusay

salamat, sa matatag na landas kami inakay

sabi mo, hanapin ko kung saan masaya ako

ako naman ang uukit sa kinabukasan ko

sinanay ako sa gawain at pagiging listo

tinuruang magsuri, panindigan ang prinsipyo

pinatatag ang bawat hibla nitong pagkatao

inay, iba man sa iyo ang landas kong tinahak

alam kong sa turo mo'y di ako mapapahamak

kaya kong manindigan at di gagapang sa lusak

anak akong pinatibay mo, di agad babagsak

sa aming iyong anak, nawa'y lagi kang magalak

Ang asawa'y di alila

ANG ASAWA'Y DI ALILA

ni Gregorio V. Bituin Jr.

11 pantig bawat taludtod

kung nais mo nang makapag-asawa

huwag alila ang iyong hanapin

katuwang sa buhay iyang asawa

di katulong na dapat alipinin

Pulitika muna bago pulitiko

 PULITIKA MUNA BAGO PULITIKO

ni Gregorio V. Bituin Jr.

13 pantig bawat taludtod

bago i-endorso ang isang pulitiko

unahin mo muna ang kanyang pulitika

ang pulitiko bang iya'y mayamang trapo

sa mga dukha'y anong kanyang plataporma

ilang halalan na ang sa bansa'y dinaos

kaybait ng kandidato sa kampanyahan

aaliwin tayo't aawit kahit paos

at sa entablado, sila'y magsasayawan

di artista't manganganta ang nais namin

kundi sa bayan ay totoong maglilingkod

sa problema ng masa'y ano ang pagtingin

mahal ang kuryente't tubig, kaybabang sahod

kalikasang sira, kaytaas ng pasahe

bigas na mahal, buwis, kontraktwalisasyon

di pantay na pagtrato sa mga babae

paano reresolbahin ang demolisyon

bago kami kumbinsihin sa pulitiko

ipaliwanag mo ang kanyang pulitika

programa niya’y ano, gusto lang ba’y boto?

o trapo rin pala siyang tulad ng iba?

nais naming maunawa ang kanyang tindig

sa bawat isyu, prinsipyo niya’y ilahad

makamasa ba't di trapo, totoong kabig?

o gagamitin lang kami ng isang huwad?

Ang Diwa ng Martabat

ANG DIWA NG MARTABAT

ni Gregorio V. Bituin Jr.

10 pantig bawat taludtod

taas-noo, sa kapwa'y matapat

dangal ng pagkatao ang lahat

sakaling mawala ang martabat

iwing pagkatao'y nagkalamat

di bale nang ituring na dukha

basta't may dangal tayong dalita

taas-noo kahit amoy-lupa

huwag lang pagkatao'y mawala

martabat - dangal ng katutubo,

ng kababayang dito lumago

prinsipyo't diwa'y sinasapuso

ilalaban, buhay ma'y maglaho

pag martabat sa atin nawala

tila kita may ketong na lubha

ating pagkatao'y isinumpa

pati buhay na'y kahiya-hiya

martabat ang ating pagkatao

ilalaban natin itong todo

nang makalakad ng taas-noo

sa harap ng sinuman sa mundo

nais nating malinis ang ngalan

ng ating pamilya't buong angkan

sa pagharap sa buong lipunan

martabat ay pahahalagahan

balewala ang yaman at luho

mayaman nga, pagkatao'y dungo

mabuti pa yaong maghingalo

pagkat puri'y di pinagkanulo

* "What is "martabat?" Martabat is a Malay term that one hears often used by the Moro peoples of Mindanao -- the Tausug, Sama, Yakan, Maguindanao, Maranao, Iranun. Among the Moro, it means honor and dignity. For the Tausugs of Sulu, these values define us. No matter if we are poor or powerless, we have been taught from childhood to value our martabat. One’s rank in the community is tied to honor." - Amina Rasul, Opinion, BusinessWorld newspaper, March 14, 2013
http://www.bworldonline.com/content.php?section=Opinion&title=Martabat&id=67286