Sa Muling Pagdatal sa Maynila

SA MULING PAGDATAL SA MAYNILA
ni Gregorio V. Bituin Jr.
12 pantig bawat taludtod

mula sa Bangkok, Thailand ako'y nagbalik

sa Maynila na puno ng pananabik

kahit ang bansa'y dinelubyo ng lintik

ng mga bagyong lagim ang inihasik

ramdam ang malamig na simoy ng hangin

tila may bagyo na namang paparating

kaya dapat maghanda tayong taimtim

bago mangyari ang panibagong lagim

nagpasya akong huwag nang magpahinga

at tumulong agad sa mga kasama

kung anong mga dapat naming gawin pa

nang matulungan ang mga nasalanta

- inakda pagkababa sa NAIA, Cebu Pacific Flight 5J 932

NAIA Terminal 1, October 7, 2009

Tayo'y Iisang Daigdig

TAYO'Y IISANG DAIGDIG
ni Gregorio V. Bituin Jr.
10 pantig bawat taludtod

Tayo'y nasa iisang daigdig
Na dapat punuan ng pag-ibig
Sa pag-asa tayo ay sumandig
Puso't diwa ang ating kaniig

Bakit ba tao'y nagpapatayan
Imbes na problema'y pag-usapan
Bakit nais lagi'y mag-initan
Imbes na sila'y naggagalangan

Anuman ang ating lahi't kulay
Tayo'y magkakapatid na tunay
Sa anumang problema'y kadamay
Bawat isa'y dapat maging gabay

Ating kapwa'y dapat irespeto
Lalo ang karapatang pantao
Iisang daigdig lamang tayo
Magmahalan na ang buong mundo

Paglisan sa Bangkok

PAGLISAN SA BANGKOK
ni Gregorio V. Bituin Jr.
8 pantig bawat taludtod

sa Bangkok ako'y lilisan
at babalik ng Maynila
tutulong sa bayanihan
ng tinamaan ng baha

kayrami ng apektado
ng nagdaan noong unos
na kumawawa sa tao
at tahanan ay inubos

naglandas ang mga luha
ng iba't ibang larawan
ng mga kawawang madla
na nawalan ng tahanan

kaya sa aking pagbalik
ako'y tutulong na agad
kahit lumusong sa putik
at paa'y muling mababad

magawa man ay kaunti
meron pa rin itong silbi
pagkat di tayo hihindi
sa apektadong kayrami

lilisan ako sa Bangkok
dala'y panibagong hamon
upang ako na'y tumutok
sa isyung climate change ngayon

nawa sa pagbabalik ko
ito ay mapag-usapan
dapat unawain ito
ng mga gobyerno't bayan

di dapat muling mangyari
ang naganap na delubyo
nang di tayo mapakali
pagkat tayo'y preparado

Niyebe sa Perlas ng Silangan

NIYEBE SA PERLAS NG SILANGAN
ni Gregorio V. Bituin Jr.
13 pantig bawat taludtod

paano kaya kung umulan ng niyebe
marahil magtatampisaw rito'y marami
ngunit tiyak tayo'y magugulantang dine
ang tanong natin: paano ito nangyari

kung magkaniyebe sa perlas ng silangan
tayo ba'y uunlad na tulad sa kanluran
bansang may niyebe'y maunlad kadalasan
tulad ng sa Amerika't Europang bayan

ngunit niyebe'y di taal sa ating bansa
sari-sari na ang iisipin ng madla
may magsasabing magbago ang masasama
kaya ang bansang ito'y agad isinumpa

ngunit bakit ba magkakaniyebe rito
gayong tayo'y isang bansang nasa tropiko
kayganda ng panahon at di nagyeyelo
at ang ating bansa'y nasa gitna ng mundo

yaong bansang nasa dulo ang kaylalamig
sagad sa yelong sadyang nakapanginginig
magsasalita ka'y umaaso ang bibig
nanunuot ang ginaw sa laman at bisig

pag nagkaniyebe rito'y krisis ang klima
lagay ng panahon ay pabago-bago na
mababagong tiyak ang lakad sa pabrika
pati na sa mga kumpanya't opisina

mababagong tiyak ang ating pamumuhay
sa bagong klima'y baka di pa makasabay
marami'y hirap kung paano aagapay
kahit maaring malagpasan itong tunay

kung sakaling may niyebe sa ating bayan
aba'y agad alamin kung anong dahilan
ito'y talakayin at agad pag-usapan
bago pa ito magdulot ng kamatayan

Ang Mundo sa Kalan

ANG MUNDO SA KALAN
ni Gregorio V. Bituin Jr.
12 pantig bawat taludtod

Ang ating mundo'y tila ba nasa kalan
Pagkat ito'y nag-iinit ng tuluyan
May global warming na dito sa silangan
At pati na sa buong sandaigdigan

Anong dapat nating gawin sa problema
Lalo't apektado'y ang lahat-lahat na
Kalikasan, kapaligiran, ang masa
At pati na ekonomya't pulitika

Nag-iinit ang mundo dahil nabutas
Ang atmospera sa dami na raw ng gas
Ang mga tao'y saan kaya lilikas
Pag nagpatuloy itong masamang landas

Sino bang naglagay ng mundo sa kalan
Yaon bang mahihirap o mayayaman
Sinong dapat sisihin ng mamamayan
Kung ang kalikasa'y masirang tuluyan

Ang mga pabrika ng kapitalista
Ay panay na usok ang ibinubuga
Coal power plant ang pinaaandar nila
Panay luho lang ang mga elitista

Tila ang burgesya'y walang pakialam
Ayaw hanguin ang mundong nasa kalan
Mga elitista'y walang pakiramdam
Kahit masira man itong kalikasan

Katwiran nila'y di agad apektado
Yaong tulad nilang mayayaman dito
Pabayaan daw ang karaniwang tao
Na mamatay sa pag-iinit ng mundo

Kung magsalita'y parang walang daigdig
Silang tahanan kaya ayaw palupig
Ngunit tayong karaniwan ay titindig
Hanggang silang elitista na'y manginig

Karaniwang masa'y dapat nang magsama
Mag-aklas na tayo laban sa burgesya
Palitan natin ang bulok na sistema
Maghanda nang gibain ang dibdib nila

Ang bawat laban ay ating paghandaan
Dapat nang magwagi sa mga gahaman
Mundo'y di dapat manatili sa kalan
Kaya ito'y ating hanguing tuluyan

Mamamayan, Hindi Tubo

MAMAMAYAN, HINDI TUBO
ni Gregorio V. Bituin Jr.
11 pantig bawat taludtod

dapat unahin ng mamumuhunan
yaong kapakanan ng buong bayan
ngunit ako yata'y nangangarap lang
na uunahin nila ang mamamayan

pagkat tubo ang siyang pangunahing
nagpapagalaw sa mga salarin
ang lahat ay kanilang uutangin
para lang sa kanilang tutubuin

ang dapat, mamamayan, hindi tubo
pakikinggan ba ito ng maluho
basta kahit mabahiran ng dugo
ang mahalaga sa kanila'y tubo

kaya huwag natin silang asahang
uunahin nila ang mamamayan
pagkat di nila mapagtutubuan
itong mamamayang nahihirapan

Paano Ba Mahalin Ang Tulad Mo?

PAANO BA MAHALIN ANG TULAD MO?
ni Gregorio V. Bituin Jr.
11 pantig bawat taludtod

Paano ba mahalin ang tulad mo
Ikaw na nakaukit sa puso ko
Pagmamahal na alay ko'y damhin mo
At pag-ibig ko'y itong matatanto!

Sa iyo ang puso ko'y kumakabog
Nawa'y tanggapin itong niluluhog
Na sa harap mo'y aking hinahandog
Sa halik ay nais kitang mapupog

Katarungang Pangkalikasan

KATARUNGANG PANGKALIKASAN
(Climate Justice)
ni Gregorio V. Bituin Jr.
12 pantig bawat taludtod

umiiyak ang maraming kaluluwa
na gumagala pa sa sangkalupaan
bakit ganito raw ang ating sistema
at winawasak pa itong kalikasan

di ko alam kung anong dapat isagot
sa ninunong kaytindi ng mga tanong
ah, bakit nga ba ganito ang inabot
sagot ko'y sa sarili lang binubulong

ang delubyo ba'y isang paghihiganti
pagputok ng bulkan ba'y tanda ng galit
kalikasan kung mapoot ba'y kaytindi
kaya may global warming, mundo'y nag-init

pagkaalam ko'y ang mayamang hilaga
yaong nagdulot ng ganitong sistema
kaya maraming bansa ang naging dukha
pagkat taga-hilaga ang nag-okupa

nang dahil sa tubo'y walang pakialam
kung anong mangyayari sa ating mundo
nagmina, nagkalbo, itatayo pa'y dam
tanging alam nila'y tubo, tubo, tubo

sumigaw ang kalikasan ng hustisya
pagbayarin lahat ng may kagagawan
hustisya para sa apektadong masa
dapat makakalikasang katarungan

Tres Singkwenta (350ppm)

TRES SINGKWENTA (350ppm)(350 parts per million)
ni Gregorio V. Bituin Jr.
14 pantig bawat taludtod

tatlong daan limampung bahagi bawat angaw
ang umano'y antas na ligtas ang mundong saklaw
na ng karbong nanunuot sa lupang ibabaw
ngunit di lamang ito numerong paimbabaw

pagkat ang tres singkwentang bahagi kada milyon
ang siyang antas ayon sa mga aghamanon
na siyang ating dapat na pagtuunan ngayon
nang masagip ang atmospera sa mga karbon

pag yaong karbon sa antas na ito'y lumampas
ating atmospera'y tuluyan nang mabubutas
krisis na ang klima, baka tayo na'y maagnas
at wala nang kahapong sa mundo'y mababakas

palilipasin ba natin ang pagkakataon
na tayo'y maaaring may magawa pa ngayon
kaysa tumunganga't pabayaan lang mabaon
sa limot at karbon ang masasayang kahapon

habang pinag-aaralan natin ang lipunan
aralin din ang kalagayan ng kalikasan
na unti-unti nang winawasak ng puhunan
mismong mundo ang kanilang pinagtutubuan

tandaan: tres singkwentang bahagi kada milyon
o kaya'y ang numerong mas mababa pa roon
tulad ng bago mag-Industrial Revolution
ang tanong: maibabalik pa ba ang kahapon

Hampas ng Langit

HAMPAS NG LANGIT
ni Gregorio V. Bituin Jr.
10 pantig bawat taludtod

sadyang kaytindi kung humagupit
ang ating puso'y tila pinunit
ramdam na tunay ngang nagagalit
at sa tao'y biglang nagmalupit

marami nang buhay ang sinungkit
dahil sa unos na humaginit
marami ring namatay na paslit
at marami na ring mga bakwit

parang mawawalan ka ng bait
pag ganito ang iyong sinapit
sadyang kaytitindi ng pasakit
at maririnig ay pawang impit

kaya ang tanong natin ay bakit
tayo'y hinahampas na ng langit
dahil ba gawain nati'y pangit
kaya siya ngayo'y naghihigpit

II

marami nang hindi mapakali
dahil sa ganitong pangyayari
kalikasan ay sadyang kaytindi
tila sa tao'y naghihiganti

ang buhay nati'y biglang nagbago
nang dumaan ang dalawang bagyo
sadyang kayrami nang apektado
nawa'y makaraos pa rin tayo

anumang problema ang magdaan
ay dapat lang nating paghandaan
lalo na itong pamahalaan
nang mga sakuna'y mabawasan

kaya dapat na tayong mag-usap
upang magtulungan at magsikap
hampas ng langit ay mahaharap
kung may paghahanda tayong ganap

Unos ng Dusa

UNOS NG DUSA
ni Gregorio V. Bituin Jr.
11 pantig bawat taludtod

Sadyang kaytindi ng nagdaang unos
Pagkat iwing puso'y nanggigipuspos
Sa mga kalagayang kalunos-lunos
Tila di na ito matapos-tapos

Inanod na kahit mumunting gamit
Habang ang unos ay nagmamalupit
Mga humihikbi'y walang masambit
Kundi matigil ang ngitngit ng langit

Pagkat tunay ngang pawang pagdurusa
Ang naranasang ng kayraming masa
Nais nilang hirap ay matapos na
Nang bagong simula'y harapin nila

Sala sa Init, Sala sa Lamig

SALA SA INIT, SALA SA LAMIG
ni Gregorio V. Bituin Jr.
10 pantig bawat taludtod

sala sa init, sala sa lamig
tag-araw ngunit nangangaligkig
sa ginaw ang butong nanginginig
para bang yelo ang dinadaig

sala sa lamig, sala sa init
ang panahon ay nakakabwisit
ang buhay natin ay nasa bingit
tayo'y tiyak nang magkakasakit

dahil nagbabago ang panahon
kaya marami'y nagkakasipon
nagbabaga ang araw kahapon
at biglang taglamig naman ngayon

dapat nating pag-aralan ito
bakit nangyayari ang ganito
bakit panahon ay nagbabago
at marami tayong apektado

sala sa lamig, sala sa init
buhay na'y nagkakasabit-sabit
imbes maalwan, pulos pasakit
parang sistema'y wala nang bait

sala sa init, sala sa lamig
dahil daw ito sa global warming
tayo ngayon ay dapat makinig
nang sa klima'y di tayo mapraning

dapat natin itong intindihin
nang malaman din ang dapat gawin
pagkat kayhirap itong tiisin
lalo na ng mga anak natin

at kung di tayo kikilos ngayon
kawawa ang bagong henerasyon
alamin kung ano't sinong rason
at pagbayarin ang mga iyon

Bawat Patak ng Tubig

BAWAT PATAK NG TUBIG
ni Gregorio V. Bituin Jr.
10 pantig bawat taludtod

Bawat patak ng tubig ay buhay
Pantighaw ito ng ating uhaw
Gamit sa pagluluto ng ulam
Upang gutom natin ay maibsan

Mahalaga ang patak ng tubig
Araw-gabi tayo dito'y sabik
Sa paliligo at sa tag-init
Ay nais ng tubig na kaylamig

Ang tubig ay serbisyo sa tao
Bawat isa'y kailangan ito
Ngunit pag ito'y naging negosyo
Ay wala na ang karapatan mo

Dahil ang tubig na'y binabayaran
Bibilhin mo na ang karapatan
Sa tugon sa iyong kauhawan
Ang libreng tubig na lang ay ulan

Kaarawan ng Makata sa Bangkok

KAARAWAN NG MAKATA SA BANGKOK
ni Gregorio V. Bituin Jr.
11 pantig bawat taludtod

dito sa Bangkok, sa lamig ng gabi
ako'y mag-isang nagmumuni-muni

habang isang serbesa yaong tangan
nagdiriwang ng aking kaarawan

iniisip pamilya sa malayo
iniisip magandang sinusuyo

malamig ang gabi dito sa Bangkok
tangan ang serbesa'y panay ang lagok

habang daigdig pinagninilayan
climate change dito'y pinag-uusapan

mag-isa man ako ritong tumagay
sana pinuntahan dito'y tagumpay

Karapatan at Kalikasan

KARAPATAN AT KALIKASAN
ni Gregorio V. Bituin Jr.
12 pantig bawat taludtod

tayong tao raw ang tagapangalaga
nitong kalikasang bigay ni Bathala
ngunit ngayon tayo'y tagapangasiwa
nasa diwa'y tubo sa pamamahala

"yaong mga puno'y sibaking tuluyan
gawin nating troso upang pagtubuan
at nang mga ito'y maging kasangkapan
at malaking ambag pa sa kaunlaran"

at ang dugtong pa ng kapitalista:
"itapon sa dagat ang mga basura
na pawang nalikha sa ating pabrika
at nang makatipid sa tuwi-tuwina"

"pati mga usok, itaboy sa hangin
itapon ang dumi sa may papawirin
mga dagdag karbon pa'y ating sunugin
ito nama'y para sa pag-unlad natin"

sadyang kawawa na itong kalikasan
winawasak para lamang pagtubuan
di na iniisip ang kinabukasan
kundi tubo, tubo, tubo lamang

karaniwang tao'y laging nagtatapon
ng mga basura dito, diyan, doon
kung saan-saan lang, tila sila maton
di na iniisip ang mahihimaton

karapatan natin ang pangalagaan
itong kalikasan at kapaligiran
at di karapatang gawing basurahan
itong mundong ating pinaninirahan

Rm. 378, KT Hotel, Bangkok, Thailand

Labanan Natin ang Nukleyar

LABANAN NATIN ANG NUKLEYAR
ni Gregorio V. Bituin Jr.
14 pantig bawat taludtod

Basura ng nukleyar ay saan ibabaon
Saang lugar sa mundo ligtas itong ikahon
Kung ito'y mabaon man at lupa ang lumamon
Paano natitiyak na tayo'y ligtas doon

May maayos ba tayong matatanggap na tugon
O wala pa, ang buhok man natin ay malugon
Kahit mailagak pa ito ng ilang taon
Baka sa kaunting pag-uga ito ay bumangon

October 14 Memorial Hall, Bangkok, Thailand
Oktubre 1, 2009

Utang kay Inang Kalikasan

UTANG KAY INANG KALIKASANni Gregorio V. Bituin Jr.
9 pantig bawat taludtod

sadyang kayrami na ng utang
natin kay inang kalikasan
kinalbo na ang kabundukan
at puno'y di pa pinalitan

di maalalang pagtaniman
ang kanilang pinagputulan
nais lang nilang pagtubuan
ang mga punong naririyan

kaya pag may nangyaring sigwa
at buong bayan ang binaha
na lumunod sa mga dukha
sisisihin pa'y maralita

gayong sila'y kaawa-awa
wala na ngang sariling lupa
sa kabuhaya'y walang wala
tinataboy pang parang daga

ang nais ng mamumuhunan
ay kung paano pagtubuan
ang ating mga likasyaman
at wala silang pakialam

sa ating Inang Kalikasan
kaya sino ba ang may utang
sa pagwasak sa kalikasan
ang mahirap o ang mayaman

tayo rin ang makasasagot
sa tanong na itong sumulpot
sino ba ang dapat managot
sa nangyaring delubyong salot

yaon bang mga mapag-imbot
sa yamang nais makurakot
o dukhang sa puso'y may kirot
pagkat buhay ay isang dakot

Kapitalismo'y Laban sa Kalikasan

KAPITALISMO'Y LABAN SA KALIKASANni Gregorio V. Bituin Jr.
13 pantig bawat taludtod

Ang kapitalismo'y laban sa kalikasan
Ito ang sistemang sumira ng sagaran
Sa ating mundo, pagkatao, karangalan
At sa buhay ng karaniwang mamamayan

Nang dahil sa tubo, unti-unting sinira
Ng kapital ang kalikasang lumuluha
Ang nagpapasasa dito't kumakawawa
Ay mga kumpanya at tao sa hilaga

Nang dahil sa tubo, kung saan-saan sila
Nagtatapon ng kanilang mga basura
Ginagawang tambakan ang kalapit nila
Walang pakialam kung makakasira na

Sa tubo nabubuhay ang kapitalismo
Na isang sistemang sadyang salot sa mundo
Pinapatay nitong unti-unti ang tao
Ito'y walang pakialam kahit kanino

Sinakop ang mga bansa upang nakawin
Ang likas na yaman ng mga bayan natin
Ginahasa nila ang kalikasang angkin
At mamamayan pa'y kanilang inalipin

Kaya ibagsak natin ang kapitalismo
Na yumurak na sa dangal ng bawat tao
At sumira pa sa daigdig nating ito
Magkaisa na ang mamamayan ng mundo

October 14 Memorial Hall, Bangkok, Thailand
Setyembre 28, 2009

Sa Malamig na Silid ng KT Hotel

SA MALAMIG NA SILID NG KT HOTEL
ni Gregorio V. Bituin Jr.
12 pantig bawat taludtod

Malamig sa silid na kinalalagyan
Tila kasinlamig ng bagyong nagdaan
Habang may pangamba sa aking isipan
Pagkat nasalanta'y mga kababayan

Bagamat sa amin, di naman gaano
Ang pananalasa ng nagdaang bagyo
Hanggang tuhod lamang, at di hanggang ulo
Ngunit mas marami yaong apektado

Dahil sa nangyari'y maraming tulala
Mga bahay nila'y nilamon ng baha
Sadyang sila ngayon ay kaawa-awa
Habang ako nama'y nasa ibang bansa

Ngunit ito nama'y mahalagang gawa
Pagkat patungkol sa climate change ang paksa
Na may kaugnayan sa nangyaring sigwa
Na sa ating bansa'y kaytinding tumama

Sa Pagdatal sa Bangkok

SA PAGDATAL SA BANGKOK
ni Gregorio V. Bituin Jr.
13 pantig bawat taludtod

Ito'ng ikalawa kong pangingibang-bayan
Ilang taon na rin yaong nakararaan
Nang maging technical trainee ako sa Japan
Ako'y nagtagal doon ng anim na buwan.

Ngayon ako'y nasa malayang bansang Thailand
At tatagal dito ng walong araw lamang
Upang climate change ay aming mapag-usapan
Paano ba mga bansa'y magtutulungan.

sinulat sa Bangkok International Airport,
tinapos sa taksing may numerong 0-6401
Setyembre 29, 2009, alauna ng umaga

Pagninilay sa Himpapawid

PAGNINILAY SA HIMPAPAWID
ni Gregorio V. Bituin Jr.
8 pantig bawat taludtod

Habang nasa eroplano
Ay pinagnilayan ko
Itong nanalasang bagyo
Ano bang dahilan nito

Karaniwan na ang ulan
Sa ating magandang bayan
Ngunit hindi karaniwan
Yaong unos na nagdaan

Lumubog ng lampas bubong
Yaong nasa subdibisyon
Mansyon nila ay nilamon
Sila'y di pa makabangon

Kahit na barung-barong man
Ay inanod nang tuluyan
Mahirap din ay nawalan
Ng kanilang matitirhan

Climate change ba'ng humagupit
Kung bakit ito sinapit
Kalikasan ay nagngalit
At sa tao'y nagmalupit

Sana sa pagbalik namin
Kami'y makatulong pa rin
At ang matututuhan din
Ay maibahagi namin

Habang nakasakay sa Cebu Pacific Flight 5J 931
patungong Bangkok, Thailand
Setyembre 28, 2009

Pagninilay sa Pag-alis

PAGNINILAY SA PAG-ALIS
ni Gregorio V. Bituin Jr.
9 pantig bawat taludtod

Bago umalis ng tahanan
At habang nasa paliparan
Aking napagnilay-nilayan
Yaong kaganapang nagdaan

Bagyong Ondoy ay nanalasa
Noon lamang kamakalawa
Kayrami ritong nasalanta
At kababayan ay nagdusa

Bumaha ang Kamaynilaan
Pati mga kanugnog-bayan
Nasira'ng mga kasangkapan
At iba pang ari-arian

Lumubog ang mga tahanan
Sa tubig habang nagsampahan
Ang mga tao sa bubungan
Umaasang masaklolohan

Sa isip ko'y sa guniguni
Lang itong maaring mangyari
At ang tangi ko lang nasabi
Ano't sinong dapat masisi

Climate change ba yaong dahilan
Ng anim na oras na ulan
Ito ang paksa ng usapan
Doon sa aming dadaluhan

Kami ma'y walong araw lang
Sa kalapit na bansang Thailand
Ngunit yaong nasa isipan
Ay ating mga kababayan

Ito ang aking nalilimi
Habang papaalis na kami
Na sa kalooba'y nasabi
Ang nangyari'y sadyang kaytindi

Inakda sa Gate 112, NAIA Terminal 3
Setyembre 28, 2009

Tita Odette Alcantara, para sa kalikasan

TITA ODETTE ALCANTARA, PARA SA KALIKASAN
ni Gregorio V. Bituin Jr.
15 pantig bawat taludtod

si Tita Odette Alcantara, makakalikasan
magaling siyang guro para sa kapaligiran
matalino, mapanuri, aktibista, palaban
bawat bitaw ng kanyang salita'y may katuturan

bilin nga niya, ibukod ang mga nabubulok
na basura sa mga basurang di nabubulok
huwag na nating gawing basura'y magtila bundok
uriin, pagbuklurin, huwag ipaglahok-lahok

payo pa niya, maging bahagi ka ng solusyon
upang luminis ang hangin, mawala ang polusyon
Lupa, Araw, Hangin, Ako, Tubig (LAHAT) ng ngayon
ay dapat nating unawa, tiyaking may proteksyon

sa iyo, Tita Odette Alcantara, pagpupugay
ang lahat ng itinuro mo sa amin ay gabay
para sa kalikasan, mga payo mo'y patnubay
sa muli, kami'y saludo, mabuhay ka, mabuhay!

Halina't Sumaklolo

HALINA'T SUMAKLOLO
ni Gregorio V. Bituin Jr.
10 pantig bawat taludtod

malala na ang nangyaring ulan
pagkat marami sa kababayan
yaong lumubog na ang tahanan
kailangan nilang matulungan

halina't tayo nang sumaklolo
sa mga sinalanta ng bagyo
kailangan nila ng tulong mo
tulong ko, magtulung-tulong tayo

halina't atin nang tulungan
yaong nasalantang kababayan
sa abot nitong makakayanan
para sa kanilang kaligtasan

sana'y makasaklolo nang sapat
hangga't hindi pa huli ang lahat

tulatext - Ondoy

ONDOY
tulatext ni greg bituin jr.
6 pantig bawat taludtod

kaylakas ng ulan
baha ang lansangan
tagbagyo na naman
walang mapuntahan
nasa tanggapan lang
o kaytagal namang
tumila ng ulan
di na mapuntahan
ang pinag-usapan

Kaytindi ng Bagyong Ondoy

KAYTINDI NG BAGYONG ONDOY
ni Gregorio V. Bituin Jr.
10 pantig bawat taludtod

lubog ang buong Kamaynilaan
sa rumagasang kaytinding ulan
kawawa ang mga mamamayan
sa bubong ng bahay nagsampahan

mga tao'y wala nang masakyan
pagkat talagang baha sa daan
biglang lubog ng mga tahanan
sa ulang dumating ng biglaan

tingin nila ito'y katapusan
kaya marami ang nagdasalan
nananalangin ng kaligtasan
pati na mga makasalanan

sa ganitong mga kalagayan
marami ang agad nagtulungan
lumabas yaong bayanihan
upang bawat isa'y saklolohan

lubog ang buong Kamaynilaan
dahil sa bagsik ng kalikasan
maraming nawalan ng tahanan
may mga namatay ding iilan

anong nangyari sa kalupaan
bakit nagalit ang kalangitan
dahil ba ating pinabayaan
itong kalikasang naririyan

climate change nga raw ang tawag diyan
global warming din daw ang dahilan
di pa huli upang solusyunan
ang pagkasira ng kalikasan

o, halina, mga kababayan
alagaan na ang kalikasan
nang di naman mawalang tuluyan
ang nag-iisa nating tahanan

* sa pagragasa ng Bagyong Ondoy, Setyembre 26, 2009

Mag-usap Kung May Alitan

MAG-USAP KUNG MAY ALITAN
ni Gregorio V. Bituin Jr.
11 pantig bawat taludtod

dapat lang na huwag nating hayaang
maghalo ang balat sa tinalupan
daanin natin sa mga usapan
ang anumang ating mga alitan

bakit kailangang magkaduguan
kung maari namang magtalakayan
sa pag-uusap magkakaigihan
at hindi diyan sa paggagantihan

kaya halinang mag-usap, kabayan
suriin natin ang pinagsimulan
ng mga bumagabag sa isipan
huwag daanin sa paglalabanan

irespeto ang bawat karapatan
igalang din ang kapwa mamamayan
ang anumang problema'y pag-usapan
nang magkaroon ng kapayapaan

Sa Munting Bahay Kubo

SA MUNTING BAHAY KUBO
ni Gregorio V. Bituin Jr.
10 pantig bawat taludtod

bahay kubo kahit na munti man
masarap itong pagpahingahan
sa tanghaling tapat o gabi man
hihiga sa papag na kawayan
habang ang narito'y dinuduyan
ng malamig na hanging amihan

merong tanim sa paligid nito
na pawang pampalakas ng buto
basta't magsisipag lamang dito
ay tiyak may makakain kayo
sadyang kaaya-aya sa tao
magdamagan mang magmuni rito

bahay kubo ang aming tahanan
hinihigan ng hapong katawan
at ito rin ang aming takbuhan
kung nais ng payapang isipan
bahay kubo'y may katiwasayan
sadyang pugad ng pagmamahalan

nais ko rito sa bahay kubo
pagkat ramdam kong malaya ako
simpleng buhay, nagpapakatao
kahit dukha'y tangan ang prinsipyo
kaya halina sa bahay kubo
at mamuhay ng payapa rito

Di Dapat Mayurakan Ang Dangal

DI DAPAT MAYURAKAN ANG DANGAL
ni Gregorio V. Bituin Jr.
13 pantig bawat taludtod

ang dangal ay kaakibat ng katauhan
na dapat na lagi nating pangalagaan
dahil sa dangal taas-noo kaninuman
pagkat payapa ang ating puso't isipan

hindi ito dapat masaling ng sinuman
dahil pag nangyari ito tayo'y lalaban
saligan ito ng buhay at kamatayan
kaya huwag nating payagang mayurakan

ingatan ang dangal upang tayo'y igalang
ito'y dapat lagi nating pahalagahan
sinumang yuyurak sa ating karangalan
ay dapat lang nating ilagay sa kangkungan

Matuto Tayong Lumaban

MATUTO TAYONG LUMABAN
ni Gregorio V. Bituin Jr.
13 pantig bawat taludtod

tayo'y hindi dapat magpaapi na lamang
sa sinumang taong pawang mga gahaman
dapat matuto ngang sa kanila'y lumaban
pagkat mga tulad nila'y pawang iilan

lahat ng tao sa mundo'y may karapatan
na mabuhay sa mundo ng may kalayaan
di niya karapatang maapi ninuman
at di rin karapatang pagsamantalahan

ngunit karapatan niyang makipaglaban
at huwag mabuhay sa takot kaninuman
kaya nga maraming bayaning nagsulputan
para sa paglaya'y nakikipagpatayan

sa sama-sama'y may lakas tayo, kabayan
ipakita natin ang ating kalakasan
ating babaguhin ang bulok na lipunan
at ating dudurugin ang ating kalaban