Pinagbubutihan ko ang paggawa ng Taliba

pinagbubutihan ko ang paggawa ng Taliba

ng Maralita't ito ang tanging naglalathala

ng aking kathang sanaysay, tula't iba pang akda

tanging dyaryong sinusulatan ko bilang makata

may Aklatang Obrerong naglalathala rin naman

ng mga tula ko sa aklat, aba'y kainaman

subalit bihira nang nagagawa pa ang ganyan

di tulad nitong Talibang talagang pahayagan

kinsenas at katapusan, dapat nalathala na

itong Taliba ng Maralita upang mabasa

ng madla ang mga nilalaman nito tuwina

balita, paninindigan, komiks, isyu't problema

Taliba ng Maralita'y dyaryo ng masa, ninyo

kaya suportahan natin ang pahayagang ito

ito lang ang tangi kong pinagsusulatang dyaryo

kung dito na ako mamamatay, payag na ako

- gregbituinjr.

* Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML), isang pambansang organisasyon ng mga maralita sa kalunsuran.

Inadobong lamang loob ng bangus

inadobo kong muli ang lamang loob ng bangus
dati'y pulutan lang, ngayon ay ulam ko nang lubos
inadobong bituka, apdo't atay, aba'y ayos
di isinama ang hasang, ang tiyan ko'y nag-utos

lamangloob ng bangus ay pampulutan lang noon
ngunit dahil sa kwarantina'y pang-ulam na ngayon
kadalasan nga, bituka'y kanilang tinatapon
inisip lang ng lasenggerong pulutanin iyon

kaya iba talaga ang panahong kwarantina
lalo na't COVID-19 sa mundo'y nananalasa
di na normal ang buhay, kaya mapapaisip ka
lalo sa pagkain, nang di magutom ang pamilya

sa kanila'y katawan ng bangus, iba ang akin
dagdag ang bituka ng bangus na aadobohin
ayaw man nila, sa akin ay nakabubusog din
salamat sa tanggero, ito'y natutunan ko rin

- gregbituinjr.

Maraming tanong na namumutiktik sa isipan

ako'y nagmamakata sa panahong kwarantina
nakatingalang kinakatha'y mga alaala
paano ang dalitang patuloy na nagdurusa?
hinahanap ng tulad nila'y di pa rin makita

o ayaw talagang tingnan, nais na lang hayaan
sino nga ba ang dukhang sakbibi ng kahirapan
na wala namang kwenta sa tulad nilang mayaman
tingin kasi nila dukha'y pataygutom at mangmang

nakikita ko ang mga iyon at tinutula
sino nga ba iyang dukhang laging kinakawawa?
bakit nga ba may mayaman, bakit may maralita?
mayayaman ba'y bida't dukha'y laging lumuluha?

maraming tanong na namumutiktik sa isipan
bakit ba may mga iskwater sa sariling bayan?
kaya bilang makata'y pag-aralan ang lipunan
kongkretong pagsusuri sa kongkretong kalagayan

maraming tanong na dapat kong hanapan ng sagot
habang nasa lockdown at nananalasa ang salot
mabuting kumatha sa panahong nakababagot
na pinag-aralang mabuti't di lang pulos hugot

- gregbituinjr.

Magtanim ka na lang ng kamote

may kasabihang "magtanim ka na lang ng kamote"
simpleng kawikaan ngunit kayraming sinasabi
lalo't nasa kwarantina, ito pala'y may silbi
upang may matatalbos ka rin, di pa naman huli

magtanim ka na lang ng kamote'y tukso sa tamad
biro sa mga batugang tila walang pag-unlad
tukso sa taong ang isip ay laging lumilipad
biro sa sinumang wala raw namang abilidad

ngunit ngayong may lockdown, malaki ang pakinabang
sa pagtatanim ng kamote pag wala kang ulam
ilaga mo ang talbos o ihalo sa sinigang
iluto ang bunga't tiyak gutom mo'y mapaparam

halina't magtanim ng kamote, kumilos tayo
para sa kinabukasan, di lang dahil sa tukso
ito nga'y isang kasabihang nagkakatotoo
nang may makain at di magutom ang pamilya mo

- gregbituinjr.

Sa Taliba ng Maralita na ako mamamatay

isang makata't manunulat akong naturingan

na dapat ay maraming dyaryong pinagsusulatan

subalit nagsusulat lang sa isang pahayagan

sa Taliba ng Maralita ng aming samahan

pasalamat ako sa Taliba ng Maralita

pagkat ako'y nakakapaglingkod sa mga dukha

Taliba ng Maralitang tanging naglalathala

sa ngayon ng mga sanaysay ko't nalikhang tula

dalawampung pahinang pahayagang dukha ito

kaya ang paggawa nito'y pinagbubutihan ko

pagkat tanging ito lang ang sinusulatang dyaryo

kada buwan ay dalawang beses ang labas nito

kung sina Lopez Jaena nga'y may La Solidaridad

sa kasaysayan pa'y may pahayagang La Libertad

ako'y sa Taliba ng Maralita naglalahad 

isyu't problema ng bayan ang dito'y nilalantad

sa lalamaning artikulo'y laging nagninilay

sinong susulat, sinong may akdang maibibigay

anong wastong linya't artikulong dapat ilagay

ito na ang pagsusulatan ko hanggang mamatay

salamat sa publikasyong ito ng mga dukha

at sa pagkakataong akda'y dito malathala

taos-pagpupugay sa Taliba ng Maralita

at sa mga mambabasa nitong di nagsasawa

- gregbituinjr.

* Ang Taliba ng Maralita ang opisyal na publikasyon ng pambansang organisasyong Kongreso ng Pagkakaisa ng Maralitang Lungsod (KPML).

Tunay ngang matematika'y pandaigdigang wika

tunay ngang matematika'y pandaigdigang wika

ekwasyon ay unawa na sa maraming salita

sa wikang Ingles, Intsik, Hapon, Arabo, Kastila

maging ikaw ay taga-New York o taga-Maynila 

ang Pythagorean theorem ay pare-pareho

at geometriya ni Euclid saanman sa mundo

sa anumang wika'y tiyak maisusulat ito

unawa ang plus, minus, multiply, ibang simbolo

ang ekwasyon ni Einstein hinggil ss relatibidad

ang Fermat's last theorem, matagal man, lutas agad

ang algoritmo, logaritmo't ibang abilidad

trigonometriya't calculus nga'y wikang nilantad

matematika'y gamitin natin sa makatwiran

at pangkomunikasyon sa iba't ibang larangan

gamitin din ito upang mabago ang lipunan

nang mawala ang pagsasamantala't kaapihan

- gregbituinjr.

Kung kamatayan ko ang mitsa ng kanyang pagbagsak

nagsusulat ako ng tulang sa masa'y may silbi
na sa kaapu-apuhan ay mapagmamalaki
na nakibaka rin sa kalagayang anong tindi
na tuso't gahaman sa tula ko inaatake

diktador man siya o bwitre, tatamaang lintik
pag nagpasya ang pluma ko'y di na patumpik-tumpik
pakikinggan sinumang api sa kanilang hibik
kuhila'y bibirahin sa gawang kahindik-hindik

kung kamatayan ko ang mitsa ng kanyang pagbagsak
dahil sa nilikhang tula laban sa mapangyurak
kung dahil sa kinatha ko, ako'y mapapahamak
tatanggapin ko, basta sa trono siya'y lumagpak

pagkat aking bawat tula'y para sa taumbayan
at para sa pagbabago ng bulok na lipunan
na samutsaring paksa'y aking pinaninindigan
na ito'y katha ng pagtatanggol sa sambayanan

- gregbituinjr.

Kaytagal nang di nasasayaran ang bahay-alak

kaytagal nang di nasasayaran ang bahay-alak
pagkat walang tinatagay at walang nakaimbak
ang tagay na lang ay katas ng dahong pinasulak
o kaya'y luya, sa salabat nga'y napapalatak

sa tingin ko'y di na malasing ang mga bulati
dahil walang alak, katawan ko nama'y umigi
di na ako lasenggero sa aking guniguni
tumino ang tanggero kahit walang sinasabi

o, kwarantina, kailan ka kaya matatapos?
si Valentina ka bang di ko maisip na lubos?
nais ko'y alak o kaya'y serbesa kahit kapos
nagbabakasakaling suliranin na'y matapos

kasangga ko'y alak sa samutsaring suliranin
minsan, serbesa ang kaibigan kung papalarin
ngunit ngayong lockdown, salabat muna ang inumin
saka na ang alak, upang mata'y di papungayin

- gregbituinjr.

Nakikita ko ang hirap sa iyong mga mata

nakikita ko ang hirap sa iyong mga mata
tila kaytagal mo nang niyakap ang pagdurusa
subalit anumang hirap ay di mo alintana
para sa pamilya, lahat ay iyong kinakaya
nagdaralita man, patuloy kang nakikibaka

hangga't may buhay, may pag-asa, ang paniwala mo
tama ka, pinag-iisipan mo kung anong wasto
kita ko, kayrami mo nang isinasakripisyo
hirap ka na subalit buo pa rin ang loob mo
nang pamilya'y itaguyod, di nagpapasaklolo

mabuhay ka, mabuhay ang tulad mo kahit hirap
sa kabila ng kalagayan mong aandap-andap
nagsisikap upang maabot ang iyong pangarap
may pinaglalaanang bukas kaya nagsisikap
sana, makita ko sa mata mong saya'y nalasap

- gregbituinjr.

Ang naglipanang upos

wala ka bang pakialam sa nagkalat na upos?

maglakad kang nakatungo't makikita mong lubos

na ang kapaligiran natin ay kalunos-lunos

tambak ang basura't mga upos nga'y di maubos

upos na'y pangatlo sa basura sa karagatan

kaya di lang pulos plastik ang dito'y naglutangan

may gwantes pa't facemask, dagat na'y naging basurahan

balewala ba sa iyo ang ganyang kalagayan?

mapapakiusapan mo naman ang nagyoyosi

sa isang lalagyan lang ang upos nila'y itabi

kung may batas sanang upos ay maipagbibili

o gagawing ekobrik o magyo-yosibrik kami

di ko mapapakialaman ang kanilang bisyo

kung sa kanila'y nakakatulong itong totoo

sa akin lang, upos ay huwag itapon doon, dito

may tamang lagayan upang di maglipana ito

kung isdang may upos sa tiyan ay ating makain?

o upos sa sisiw ay ipakain ng inahin?

iyang isda't manok ba sa anak ipakakain?

naisip bang upos sa tiyan nila'y pumunta rin?

halina't gawin natin anumang makabubuti

gawin anumang wasto lalo sa upos ng yosi

protektahan ang kalikasan, ito ang mensahe

para sa daigdig, bayan, pamilya, at sarili

- gregbituinjr.

Ang pangarap kong gitara

minsan, sa tindahan ng gitara'y napapadaan
at ang anyubog nito'y akin ngang pinagmamasdan
mula sa kwerdas, leeg, tatangnan, buong katawan
hinahagod ng tingin hanggang ako'y matunawan

di ko pa nabibili ang pangarap kong gitara
dahil ba walang salapi o hilig na'y nag-iba
pag napapadaan sa bilihan, napapatanga
pinagninilayang gitara'y tinitipa ko na

nag-aral akong maggitara noong kabataan
tinitipa-tipa ang awiting nagugustuhan
ngunit sa kalaunan, iba ang napagbalingan
matematika, pagtula, araling panlipunan

hanggang sa ngayon nga'y wala pa rin akong gitara
gayong marami akong tulang naisaaklat na
na maaari kong gawing awit kung may gitara
subalit kahit pagtipa sa gitara'y limot na

di pa huli ang lahat, di pa huli ang pag-awit
kung may gitara'y pagsisikapang ito'y magamit
lalapatan ng tono ang ilang tula ko't dalit
kung kakayanin ay aawitin ko hanggang langit

- gregbituinjr.

Paggawa ng yosibrik

isa ako sa baliw na ginagawa'y yosibrik
na upos ng iba'y pinupulot ko't sinisiksik
sa boteng plastik at gawing matigas na ekobrik
baliw na kung baliw, minsan nga utak ko'y tiwarik

tapat mo, linis mo, nakasaad sa karatula
basura mo, itapon mo, isa pang paalala
bawal manigarilyo, limang daang piso'y multa
kung di kayang maglinis, huwag magdumi, sabi pa

mula sa ekobrik, yosibrik na'y isang proyekto
at nasa antas pa lang ng pag-eeksperimento
mangongolekta muna ng upos ng ibang tao
pagkat ako naman ay di na naninigarilyo

kadiri, upos ng iba, iipunin, ang sabi
baka raw ako magkasakit, tulad daw ng tibi
subalit naglipana na itong upos ng yosi
ito'y tipunin, nang mawala sa laot o kalye

paggawa ng yosibrik ay ambag sa kalinisan
upang sa laot, ang upos ay di na maglutangan
di makain ng isda't balyena sa karagatan
tayo ba'y kakain ng isdang may upos sa tiyan?

masaya nang makatulong gaano man kaliit
sa kapaligiran, sa daigdig, sa munting paslit
halina't iugit ang bagong mundong walang sakit
tayo nang magyosibrik, huwag ka sanang magalit

- gregbituinjr.
05.24.2020

Kung nasa lockdown, sinong gagawa ng mga dyaryo?

kung nasa lockdown, sinong gagawa ng mga dyaryo?

kung may mamamahayag nga'y wala namang obrero

sinong maglilimbag, sa makina'y magpapatakbo?

kung di makapasok ang mga trabahador nito

sino pang bibili sa tindahan ng pahayagan?

kung ang tao'y di basta makalabas ng tahanan

mabuti't may radyo't telebisyong maaasahan

para sa mga huling balitang dapat malaman

kung labas mo'y lingguhan sa pagbili ng pagkain

dahil iyon ang iniskedyul sa barangay natin

sa arawang dyaryo'y tiyak isa lang ang bibilhin

at di pang-isang linggo, na di gaya ng magasin

lugi na ang paborito mong tabloyd, ano, pare?

pagkat di dyaryo, pagkain na lang ang binibili

kung may radyo't telebisyon, dyaryo pa'y anong silbi

ganito nga pag lockdown, anong iyong masasabi?

- gregbituinjr.

Anong dapat gawin sa panahon ng mga epal?

anong dapat gawin sa panahon ng mga epal?

silang laging pumapapel, umeepal ang kupal

upang pangalan nila'y umingay, upang mahalal

sa sunod na eleksyon gayong ito pa'y matagal

ganyan nga talaga kung umepal ang pulitiko

dahil sa layon nilang muli o baka maboto

kahit di pa kampanyahan, kanya-kanyang estilo

nangungunyapit kahit sa patalastas ang trapo

artista'y nais magpulitiko't dinggin ng masa

pulitiko'y nais mag-artista, ang saya-saya

nananalo ba dahil lang nagsayaw, nagpakwela

ngunit magbubutas lang ng bangko pag nahalal na?

sa panahon ng mga epal, huwag lang tumanghod

suriing mabuti sinong talagang maglilingkod

sa bayan, kapakanan ng masa'y itataguyod

di ang trapong itutulak tayo sa pagkalunod

- gregbituinjr.

Saliksikin mo't basahin din ang buong Kartilya

saliksikin mo't basahin din ang buong Kartilya
namnamin bawat pangungusap habang binabasa
matatanto mong nilalaman nito'y anong ganda
kagandahang loob, laban sa pagsasamantala

inakda ito ng bayaning Emilio Jacinto
habang nasa patnubay ni Gat Andres Bonifacio
"sa may nasang makisanib sa Katipunang ito"
na siyang naging gabay ng bawat Katipunero

kahit nagsisimula ka pa lamang maging tibak
pag batid mo ito'y di ka basta mapapahamak
magulang mo man sa bagong asal mo'y magagalak
pagkat Kartilya'y pagtutuwid sa maraming lubak

Kartilya ng Katipunan ay isabuhay natin
makipagkapwa't kagandahang loob ay taglayin
ibahagi rin natin sa iba't palaganapin
at gabay din upang sistemang bulok ay baguhin

- gregbituinjr.

Taliba ng Maralita'y naritong naglilingkod

patuloy ang aming tungkulin sa mga dalita

kahit nasa kwarantina'y nagsusulat ng akda

kahit doon sa internet ay inilalathala

ang bunying pahayagang Taliba ng Maralita

sa notbuk paplanuhin ang pahina't nilalaman

sa ikalawang pahina'y batas at karapatan

at naroroon sa ikatlo'y editoryal naman

sa ikadalawampung pahina'y laging panulaan

mayroon ding mga pahayag ng organisasyon

na hinggil sa samutsaring paksang napapanahon

may sanaysay, minsan may sosyalistang akda roon

at may Balita Maralita at komiks na seksyon

usapan nina Mara at Lita'y iyong basahin

na diyalogo'y hinggil sa panlipunang usapin

ang pampublikong pabahay nga'y tinatalakay din

pati isyu, problema, demolisyon, at bayarin

ang Taliba ng Maralita'y ating itaguyod

basahin bawat artikulo, namnamin ang buod

may akda mang magagalit ka't di mo ikalugod

Taliba ng Maralita'y narito't naglilingkod

- gregbituinjr.

Ating isabuhay ang Kartilya ng Katipunan

ating isabuhay ang Kartilya ng Katipunan

bilang aktibista't Katipunero'y panuntunan

isapuso, isadiwa, ibaon sa kalamnan

makipagkapwa, na gabay ay prinsipyong palaban

durugin ang bulok na sistema't uring burgesya

kabakahin ang mapang-api't mapagsamantala

karahasang di man tanaw ng nagbabagang mata

ay uusigin para sa panlipunang hustisya

pag-aralan ang buhay ng ating mga bayani

sino ang kolektibo nila, kasangga, kakampi

ano ang prinsipyong tangan, asal nila't sinabi

bakit nararapat natin silang ipagmalaki

ang Kartilya ng Katipunan ang kanilang gabay

sa pakikipagkapwa't pakikibaka'y patnubay

oo, Kartilya ng Katipunan ay isabuhay

at ibaon sa kaibuturan hanggang mamatay

- gregbituinjr.

Inadobong bituka ng bangus

ngayong lockdown, bituka ng bangus na'y niluluto

tulad ng pinulutan noon naming mga lango

piprituhin o aadobohin bago ihango

inulam ko ngayon upang sa gutom ay panagpo

hahatiin sa lima ang katawan nitong bangus

lima kami sa pamilyang dito'y makakaraos

tigigisang hiwa habang bituka'y aking lubos

ayaw nila nito kaya ako na lang ang uubos

may kasama namang atay at apdo ang bituka

ng bangus, piprituhin at sasarapan ng timpla

palutungin, lagyan ng toyo't sukang pampalasa

kung wala kang patawad, hasang ay isama mo pa

animo'y namulutan kahit wala namang alak

iulam sa kanin at mabubusog ka sa galak

nagamit ang natutunan sa inuman sa lambak

aba'y kung may tagay lang, tiyak kang mapapaindak

- gregbituinjr.

Wala akong anumang meron

wala akong anumang meron kundi alaala

ng maraming karanasang kaakibat ng dusa

paminsan-minsan ay mayroon din namang masaya

na ikaiiyak mo o kaya'y ikatatawa

na binalewala lang ng mga malditang iyon

alaalang inugit ng makisig na kahapon

nag-iba na kasi ang inadhika ko't nilayon

ito nga, pulos paghihigpit na lang ng sinturon

pagkat naging tibak ang dating nag-aastang playboy

di nagpayaman, kasangga'y dukha, astang palaboy

iba ang binhing inihasik, iba rin ang suloy

naging Katipunero't rebolusyon ang panaghoy

walang meron ako kundi gunitang akin lamang

yakap ko'y prinsipyo't misyong baguhin ang lipunan

na pribadong pag-aaring ugat ng kahirapan

ay tuluyang mapawi, pati burgesyang gahaman

- gregbituinjr.

Kung tinuruan ka

kung tinuruan kang lumangoy, dapat mong manilay
na makakalangoy ka't makalulutang ding tunay
upang di malunod at makasagip din ng buhay 
ito'y kaygandang kaalamang dapat mong mataglay

kung tinuruan kang bumaril, dapat mong isipin
na payapang komunidad ay ganap mong tungkulin
di upang walang awa kang papatay ng salarin
kundi igalang ang proseso't pigilan ang krimen

kung tinuruan kang bumili, pumili ng wasto
may kalidad ang produkto, katamtaman ang presyo
kayang magbilang ng sukli hanggang huling sentimo
di bibilhin ang di kailangan, kahit pa uso

kung tinuruan kang tumula, iyong isadiwa
na di ito pulos panaginip at pagtunganga
na di ito pawang bituin, bulaklak, diwata
kundi ito'y paglagot din sa gintong tanikala

kung tinuro'y karapatan, dapat kang manindigan
ipabatid din sa kapwa nang ito'y ipaglaban
tiyaking umiiral ang makataong lipunan
at bayang walang pagsasamantala't kaapihan

inhustisya't karahasan ay dapat lang masugpo
lagi ka ring makikipagkapwa't magpakatino
kung natuto ka man sa mga guro mong nagturo
ito'y ibahagi mo sa kapwa't huwag itago

- gregbituinjr.
05.21.2020

Pagkilos tungo sa lipunang pangako

mula sa hirap, kapatid na dukha'y mahahango

kung kikilos upang bulok na sistema'y maglaho

kung baligtarin ang tatsulok ng tuso't hunyango

at makikibaka para sa lipunang pangako

noon nga'y sinabing lupang pangako ang Mindanaw

malawak na lupaing sa kaunlaran ay uhaw

ngayon, lipunang pangako'y sosyalismo, malinaw

na may pagkapantay-pantay sa ilalim ng araw

kalagayang pantay, walang mayaman o mahirap

sama-sama nating buuin ang bunying pangarap

karapatan ay bukambibig, tao'y may paglingap

pakikipagkapwa ng bawat isa'y nalalasap

ating ipaglaban ang marangal na adhikain

na asam na lipunang pangako'y itayo natin

lipunang walang pagsasamantala't aapihin

lipunang di lang sa isip kundi ating gagawin

- gregbituinjr.

Tulang handog sa KPML

O, Kongreso ng Pagkakaisa

ng Maralitang Lungsod, tayo na

baguhin ang bulok na sistema

itayo ang gobyerno ng masa

marangal ang ating adhikain

para sa bayan at kapwa natin

halina't isapuso't diwa rin

ang ating bisyon, misyon, hangarin

maghigpit man kami ng sinturon

sama-samang magrerebolusyon

bulok na sistema'y ibabaon

na natin sa hukay ng kahapon

pagkaisahin ang maralita

at pagbuklurin ang kapwa dukha

kasama ng uring manggagawa

itayo ang lipunang dakila

- gregbituinjr.

05.20.2020

* Unang nalathala sa Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Mayo 16-31, 2020, pahina 20.

Kung ako'y magsusulat ng nobela

paano ba susulatin ang asam na nobela

na sa buhay na ito'y magiging obra maestra

nobelang marahil ay pag-uusapan ng masa

na baka maging klasiko rin sa literatura

maganda nang paghahanda ang magasing Liwayway

na kayraming nobelang inilathala ngang tunay

ngunit sa maikling kwento muna'y magpakahusay

maikli muna bago mahaba ang isalaysay

dapat paghandaan ding mabuti't pakasuriin

ang umpisa, gitna't pagtatapos ng inakda ring

mga maikling kwentong nabasa't nais sulatin

pag sanay ka na'y saka mo na ito pahabain

sa dagli pa lang nahihirapan na sa pagkatha

gayong mas maiksi pa sa maikling kwentong akda

si Harper Lee nga'y isang nobela lang ang nalikha

"To kill a mockingbird" na kinagiliwan ng madla

isang nobela man lang ay magawa ng tulad ko

si Amado V. Hernandez ngang makatang totoo

ay may tula't dalawang nobelang isinalibro

sa nobela kong gagawin, sila'y inspirasyon ko

- gregbituinjr.

Ang tambayan kong palikuran

ngayon nga'y naging tambayan muli ang palikuran

upang doon isiwalat bawat nararamdaman

doon ibinubuhos ang mga kaligaligan

niring diwang kung anu-ano'y napagninilayan

may tigisang kasilyas sa dalawang pintong iyon

at sa isang silid tatambay, aba'y ayos doon

habang diwa'y nasa alapaap naglilimayon

na pamuli ngang naglakbay sa pusod ng kahapon

magigiting ang bayaning sa bayan nga'y nagtanggol

at lumaban hanggang mamatay na di nagpasukol

dinidiligan bawat tanim nang binhi'y sumibol

nang maging halaman o gulay o puno ng santol

ang bawat kinakatha sa diwa'y nakasasabik

pluma'y kayraming sinasabi kahit walang imik

aalis sa palikuran nang masaya't tahimik

na kwento, sentimyento't hibik na'y naisatitik

- gregbituinjr.

Sinong tatapos sa aklat?

"A writer only begins a book. A reader finishes it." - Samuel Johnson

sinisimulan lamang daw ng isang manunulat

yaong pagkatha ng kanyang binabalak na aklat

at mambabasa na raw ang tatapos nitong sukat

ang sinabi'y matalinghagang dapat ding masipat

marahil, sinimulan lang ng may-akda ang katha

ngunit pagtatapos ng akda'y problema pa yata

kung serye sa magasin ang nobelang nililikha

kung basahin ito'y mambabasa ba'y nagtatakda?

kung simula pa lang ng nobela'y nakakabagot

baka akdang ito'y sa kangkungan na pinupulot

kung ayaw ng mambabasa ang akdang nilulumot

naglathala'y malulugi't sa ulo na'y kakamot

may nobelang sinaaklat na serye sa magasin

"Banaag at Sikat" ay nobelang halimbawa rin

inabangan ng mambabasa't kaysarap basahin

matapos lang ang isang taon ay sinaaklat din

marahil nga'y tunay ang sinabi ni Samuel Johnson

na sa mangangathang kagaya ko'y malaking hamon

isulat lang ba'y gusto o mambabasa'y kaayon?

susulatin ko ba'y aklat na panlahat ang layon?

- gregbituinjr.

Nagsakit-sakitan

may kilalang nagsakit-sakitan pagkat di alam

ang gagawin sa buhay, problema pa'y di maparam

walang plano sa buhay, walang pakialam

di alam ang gagawin, sa sarili'y nasusuklam

nanghihiram ng tapang sa kunwari niyang sakit

mahina ang loob, pinayuhan kong magpainit

sa araw pagkat Bitamina D yaong guguhit

sa bawat hinaymay ng kalamnan, gamot na sulit

di agad nagkakasakit ang may Bitamina D

ngunit malala'y magsakit-sakitan ang sarili

walang magawa, tingin sa sarili'y walang silbi

nag-iisip ng dahilan upang di nasisisi

wala raw ginagawa, walang kita, walang sahod

sa telebisyon na lang kasi laging nakatanghod

buhay na lang ba'y ganito, na tulad ng alulod

o baguhin ang pananaw sa buhay, huwag tuod

maghanap ng gagawin, magkaroon ng layunin

buhay ay gawing makabuluhan, may adhikain

tumulong sa kapwa, misyong marangal ay yakapin

di ka na magsasakit-sakitan, susulong ka rin

- gregbituinjr.

Libro imbes na yosi ang bisyo

mas mabuti pang pabilhin mo na ako ng libro

ngunit di mo ako mapabili ng sigarilyo

pagkat pagbabasa na ang kinagisnan kong bisyo

wala kasi akong mahita sa yosi o damo

napayosi rin ako noong aking kabataan

dahil naman sa pakikisama o barkadahan

subalit bisyong iyon ay agad kong napigilan

nang mapasama sa kilusang makakalikasan

sayang lang ang pera sa usok, sabi sa sarili

wala ngang pambili ng kanin, usok pa'y bibili?

mas mabuti pa ang ensaymada't busog ka dine

at pagbabasa'y naging bisyo kong kawili-wili

bagamat biniling libro'y di agad nababasa

binili iyon na pamagat at paksa'y kayganda

minsan isa o dalawang kabanata lang muna

mabuti na ang ganito't nakakapagbasa pa

- gregbituinjr.

Ang patpat ng ekobrik

Ang Patpat ng Ekobrik (ecobrick stick)

mahalaga ang paggamit ng patpat ng ekobrik

upang mga ginupit mong plastik ay maisiksik

sa boteng plastik din na paglilibingan ng plastik

patpat na kawayan lang ang gamitin mong paniksik

aangat lang ang mga plastik sa loob ng bote

kung wala kang pantulak sa plastik na anong dami

di lang ginupit na plastik ang isiksik sa bote

kundi malambot ding plastik na ikakabig dine

malambot na sando bag ang magtutulak pababa

sa tulong ng patpat na kawayang gamit mong kusa

di pwedeng metal kundi kawayan nang di masira

ang boteng plastik, na ekobrik mo ring ginagawa

ang malambot na plastik ang kukubkob sa ginupit

hanggang sa pinakababa't patitigasing pilit

na pag pinisil mo'y parang batong di mo mabinit

ekobrik na sa tigas parang brick na magagamit

- gregbituinjr. 

Magkalintog man dahil sa page-ekobrik

nagkakalintog o nagkakapaltos din talaga

sa daliri sa paggupit ng plastik na basura

ayos lang iyon, sa kalikasan ay ambag mo na

paunti-unti man, nakadarama ka ng saya

ito ngang lintog ko'y halos di ko na naramdaman

daliri'y nakasakbat sa gunting, nakita na lang

na may lintog, marahil ay tanda ng kasipagan

o di kasipagan kaya madaling malintugan

gayunman, lintog na ito'y simbolo ng ekobrik

mga ginupit na plastik na ating isiniksik

sa boteng plastik, patitigasin mong talagang brick

nang makabawas sa kalat, walang patumpik-tumpik

magkalintog man at magkalipak, ito'y paggawa

ng makababawas sa basura mong nalilikha

basta makatulong, lintog na ito'y balewala

habang naggugupit, nagninilay, at kumakatha

- gregbituinjr.

Ang maging tibak

"Beside being a poet, to be an activist is my calling. ~ GBJ"

isa lang ako sa tinawag upang maging tibak

magsisilbi sa bayan, pamumuhay ay payak

danasin man ang hirap, wala ritong pisong pilak

nagpasya akong ganap, buhay ko'y dito tiniyak

pagyakap sa aktibismo'y pagtanggap sa layunin

sumama ako dahil marangal ang adhikain

lipunang makatao'y itayo ang simulain

upang sosyalismo't panlipunang hustisya'y kamtin

magtatatlong dekada nang ito ang aking misyon

uring manggagawa'y kasamang nagrerebolusyon

kasama rin pati magsasaka sa nilalayon

at nakikibaka para sa makataong nasyon

internasyunalismo ang prinsipyo't diwang yakap

na anuman ang lahi'y dapat tubusin sa hirap

pagkakapantay sa lipunan ang aming pangarap

rason kung bakit kami'y naging aktibistang ganap

kahit sa mga tula ko'y nakikibakang tunay

nagrerebolusyong yakap ang simpleng pamumuhay

sosyalismo sana'y makamit habang nabubuhay

ito na ang aking buhay hanggang ako'y mamatay

- gregbituinjr.

Halina't maglaro ng sudoku

matapos magbasa't magsulat, o magtanim kaya

matapos mag-ekobrik, magdilig man, o maglupa

maglalaro na ng sudoku sa selpon kong luma

animo'y matematika itong kahanga-hanga

tunay nga bang sudoku'y inimbento ng Igorot

dahil balangkas nito'y parang sa sundot-kulangot

pagkain sa kawayan at baong tamis ang dulot

siyam na hilerang tila sudoku pag sinundot

mula SUnDOt-KUlangot ay tinawag na sudoku

habang nasa kwarantina'y nilalaro-laro ko

di pa magastos na di tulad ng sudokung libro

na kailangan pang bilhin upang maglaro nito

may app ng sudoku, i-download mo sa iyong selpon

at laruin matapos ang gawain sa maghapon

magandang pangrelaks, pumokus, bilisan ang aksyon

huwag lang hayaang sarili mo'y dito magumon

- gregbituinjr.

Ekobrik ang libingan ng mga plastik

sa lahat ng mga plastik, libingan n'yo'y ekobrik
panawagang sa boteng plastik na kayo isiksik
ito ang maaaring gawin sa lahat ng plastik
lalo't naglipana na sila, anong iyong hibik?

mamangka ka sa dagat, ang plastik nga'y naglutangan
malapit sa amin ang Manila Bay, iyong tingnan
hinampas ng alon ang plastik sa dalampasigan
akala ito'y pagkain ng isdang nagbundatan

may dapat tayong gawin upang ilibing ang plastik
huwag sa laot pagkat mata ng isda'y titirik
mayroon din daw microplastics na kahindik-hindik
na di na malaman kung saan-saan nakasiksik

ilibing ang mga plastik ng pinagkainan mo
kung nais mo'y isama ang mga plastik na trapo
i-ekobrik lalo't mga plastik ang mga ito
nang di na lumutang sa dagat at makaperwisyo

- gregbituinjr.

Nakarami na rin ako ng nagawang ekobrik

nakarami na rin ako ng nagawang ekobrik
sa boteng plastik ay pinagsikapan kong isiksik
ekobrik ay libingan na ng laksa-laksang plastik
ekobrik ay libangan ko na ring nakasasabik

kayraming naipong plastik habang may kwarantina
pinatitigas na parang bato, pindutin mo pa
pag binato ng plastik ni misis, masakit pala
parang haloblak ang ginawang ekobrik, ano ba?

isang tulong na rin ito sa ating kalikasan
upang basura'y mabawasan sa kapaligiran
isang ekstrang gawain man ito'y pinagsikapan
upang makatulong din sa kapwa't sa sambayanan

ang naipong plastik sa malaking bag na'y naubos
ang basura'y di napunta sa laot, nakamenos
pakiramdam mo'y masaya't nakatulong kang lubos
ginawa sa panahong kwarantina kahit kapos

- gregbituinjr.

Dalawang payak na tanaga

I

lagi kang magsisikap
nang kamtin ang pangarap
dinanas man ang hirap
at buhay mo'y masaklap

sige lang, magsikap ka
magsipag sa tuwina
gumawa hangga'y kaya
at ika'y malakas pa

II

manggagawa, obrero
uri, organisado
lipuna'y aralin mo
kapitalismo'y ano

kaharap man ang sigwa
kaya mo, manggagawa
ang obrero'y dakila
sa lupang pinagpala

- gregbituinjr.

Ayoko nang umabot ng otsenta sa pagtanda

ayoko nang umabot ng otsenta sa pagtanda
na inabot ko lang iyon dahil nakatunganga
na di ka man lang nakatulong sa bayan o madla
mabuti nang mamatay sa laban kaysa tumanda

mahalaga laging may nagagawa ka sa bayan
sa iyong kapwa tao, maging sa kapaligiran
may nagagawa ka ba para sa kapayapaan?
ipinaglaban mo ba ang pantaong karapatan?

mabuti nang makipaglaban at baka magwagi
mabuting maglingkod sa bayan kaysa naghahari
kung bulok ang sistema'y bakit pinananatili
ayokong tumanda kung tahimik na lang palagi

ayokong kain, tulog, trabaho, paikot-ikot
kain, tulog, trabaho, kain, tulog, nababansot
ang utak, ayokong tumandang turumpong kangkarot
kung ganito lamang, otsenta'y ayokong maabot

- gregbituinjr.

Kinsenas na naman

Kinsenas na naman, sahod ng mga manggagawa
Ibigay sana'y tamang presyo ng lakas-paggawa
Natataguyod sana ang magandang halimbawa
Subalit switik nga ang kapitalistang kuhila
Espesyal na araw na aba pa rin ang paggawa

Nagtatrabaho upang ang pamilya'y may makain
Ang kalusugan ng pamilya'y dapat atupagin
Sa bawat araw, kitang sahod ay dapat ipunin
Na pati edukasyon ng anak ay iisipin
Ang pag-iimpok para bukas ay mahalagahin

Nananatiling ganyan, paikot-ikot ang buhay
Ang kinsenas at katapusan ay dapat manilay
Manggagawa kang sa pamilya'y kayraming inalay
Anak mo sana'y magsikap at mag-aral ngang tunay
Na ganyan pa rin ang iyong buhay hanggang mamatay

- gregbituinjr.

Ingat, baka matibo

ingat, baka matibo, ang sabi ng aking pinsan
nang minsang kami'y naglalakad doon sa tubuhan
may tibo raw na anong liliit sa sa dahon niyan
na dapat ko raw iwasan upang di masugatan

dahil doon, maraming salamat sa kanyang payo
kaya sa masukal, nag-iingat ng taos-puso
di lang sa ahas mag-ingat kundi pati sa tibo
pagkatakot sa madadawag ay agad naglaho

kaya kahit mapunta ako sa ibang probinsya
mag-ingat sa madadawag ay ginagawa ko na
mahirap maisahan, kahit tibo lang ay isa
aaringking ka sa sakit, buong araw na dusa

may lason man o wala, pag sa balat mo'y tumusok
kung kagat man ng langgam iyon ay di ko pa arok
magandang pagsasanay nang makaiwas sa tusok
maging maingat saan mang mapasuot na sulok

- gregbituinjr.

Paninilip

naninilip siya sa butas nang aking mahuli

ngunit di siya umaamin, walang sinasabi

upang malaman ang totoo'y sisilip din dini

upang magkasala rin ako't dalawa na kami

paano kung ako'y pagbintangan ding namboboso

o kaya'y nagmamanman siya't may ibang sikreto

depende marahil sa lugar o katayuan n'yo

kung matatakasan agad ang sitwasyong ganito

bakit nga ba may masasaya kapag naninilip

dahil ba pulos libog ang nadama't naiisip

o baka tumatayo na kapag nananaginip

kaya dapat ilabas ang kung anong halukipkip

sana'y walang mangyaring masama sa binosohan

sana'y hanggang silip na lang ang kanyang maranasan

huwag na sanang sumobra't lumampas sa hangganan

at panatilihin na lamang ang kapayapaan

- gregbituinjr.

Nagagalit sa sarili

nagagalit sa sarili pag ako'y pumapalpak

di ko sinisisi ang asawa ko't mga anak

o kahit kaibigan, kakilala, kamag-anak

sarili lang ang sisisihin pagkat ako'y tunggak

bakit iba'y sisisihin sa pagkakamali ko

sila nga ba ang talagang nagkamali o ako

mahirap bang sa sarili'y tanggapin ang mali mo

tatanggapin ko ang mali upang makapagwasto

ilang beses na rin ba akong gumapang sa lusak

ilang beses na sa pagkilos muntik mapahamak

ilang beses nang nakatikim ng suntok at tadyak

ilang beses na rin ba akong gumanti't nanapak

kapalpakan ko ba'y maisisisi ko sa iba

o sarili'y pakasuriin at mag-analisa

magwasto upang makapaglingkod pa rin sa masa

sarili'y ayusin kung narito ang diperensya

nangyari'y pagnilayan, magwasto kung kailangan

magpakatao ka pa rin sa harap ng sinuman

makipagkapwa, di man makatao ang lipunan

gawain at tungkulin mo'y pagsikapang galingan

- gregbituinjr.

Tanong ni esmi

ano na namang iniisip mo, tanong sa akin

ang laman ng isip ko'y kayhilig niyang tanungin

nagagambala tuloy ang pagninilay sa hangin

lumilipad na naman ang isip sa papawirin

ano bang nasa isip ko habang nakatunganga?

kayhirap bang sagutin, o nasa isip ko'y wala?

iniiba ko ang usapan, may panibagong paksa

ano bang lulutuin ko, anong ulam mamaya?

kahit di naman iyon ang talagang nasa isip

baka kakatha o may diwata sa panaginip

baka sa gilid ng balintataw ay may nahagip

baka prinsesa'y nasa panganib, dapat masagip

tanong sa akin, ano na namang iniisip mo?

o bakit sa ganyang klaseng tanong, ako'y kabado?

dapat bang laging may handang sagot na inimbento?

tortyurer ko ba siya nang ako'y nakalaboso?

ano bang lulutuin, anong ating uulamin?

handang tugon, eh, paano kung tapos nang kumain?

at pipikit na, ewan ko, paano sasagutin

pagkat di ko alam anong bigla kong sasabihin

marahil, nasa isip ko'y mababasa sa akda

biyograpiya raw ng makata'y nasa kinatha

ngunit may nasa isip na di dapat tinutula

anong nasa isip ko, tula, tulala, o wala?

- gregbituinjr.

Dahil walang pagemaker, ginamit ko'y microsoft word

sa paggawa nga ng dyaryo, pagemaker ang gamit ko

ngunit sa mga computer shop ay wala na ito

kaya microsoft word na'y gamit ko sa pagdisenyo

ng pahayagan, ng magasin, maging ng polyeto

isulat muna sa papel ang iyong inaakda

para handa na pag sa kompyuter ka na nagtipa

pag may wifi, pwedeng sa facebook sa selpon gumawa

pag nasa kompyuter na, saka kopyahin ang katha

nakaplano na sa isip ang buong pahayagan

isulat sa notbuk bawat pahina't nilalaman

ige-grayscale mo sa internet ang mga larawan

ilagak sa facebook group o i-email lahat iyan

saanmang computer shop, microsoft word ay laganap

sulatin mo'y i-download sa facebook o email na app

o i-copy paste muna sa notepad ang iyong na-tayp

mula notepad sa microsoft word, ilipat mong ganap

i-column sa isa, dalawa, batay sa disenyo

parang pagemaker pero microsoft word ang gamit mo

batay sa plano, ilagay mo ang teksto't litrato

pag natapos na'y tiyaking mai-p.d.f. ito

i-u.s.b. ang p.d.f. file, pag may pondo'y dalhin

sa palimbagan upang maging dyaryo o magasin

bahala silang maglimbag hanggang ito'y tiklupin

pag gawa na'y ipamahagi o ibenta mo rin

- gregbituinjr.

Kung walang kompyuter, magdisenyo sa selpon

kailangang sadya ng matinding pagtitiyaga

kung selpon lang ang iyong gamit sa bawat pagkatha

buti't may app na pwede kang magdisenyo't lumikha

ngunit app ay araling mabuti nang maunawa

kung walang laptop at walang bukas na computer shop

malaking tulong sa gawain ang na-download na app

microsoft word, gmail, notepad, mada-download mong ganap

photo editor, wordpress, sa internet nga'y laganap

lalo't kwarantina, wala kang anumang magamit

kundi selpon lang, oo, selpon lang na anong rikit

saan ka man pumunta ay madali mong mabitbit

dapat lang magtiyaga kung gusto'y nais makamit

huwag kang maaburido, matutong magtiyaga

teknolohiya'y maraming hinahain sa madla

aralin ang app, paisa-isa't may magagawa

huwag mainip, selpon man, maraming malilikha

- gregbituinjr.

Buhay na bibitin-bitin

buhay na bibitin-bitin
ay laging pakaisipin
di dapat sising alipin
kundi tayo'y kawawa rin

magsikap lagi't magsikap
pagkat daig ng maagap
ang masipag, kung mangarap
tayo'y dapat may paglingap

isang kahit, isang tuka
ang buhay ng maralita
nawa'y huwag matulala
pag kahirapa'y lumala

wala mang kasiguruhan
ang buhay ng mamamayan
suriin mo ang lipunan
pati na pamahalaan

bakit ba may asindero
bakit may kapitalismo
nasaan ang pagbabago
bakit may uring obrero

kanilang pinanatili
ang pribadong pag-aari
kaya mayama'y nagwagi
at mga dukha'y pighati

kaya dapat maghimagsik
kung ayaw mata'y tumirik
rebolusyon na ang hibik
laban sa mga suwitik

pangarap nating sumaya
tila may bagong pag-asa
itatayong sama-sama
ang lipunan nitong masa

- gregbituinjr.

Kwento ng pagkamulat

nagisnan ko ang liwanag sa aking mga mata

mula sa pagkahimbing ay dumatal ang umaga

tila sikat ng araw ay panibagong pag-asa

habang kinakaharap ang laksang pakikibaka

namulat akong di magkapantay ang kalagayan

ng samutsaring tao sa kinagisnang lipunan

tanong ko: bakit may mahirap, bakit may mayaman

sistema'y inaral upang di magulumihanan

di ko mawari bakit ganito sa bayan natin

dapat ang lipunang ito'y suriin at baguhin

mayaman ang mapagsamantala't mapang-alipin

gayong dukhang inaapi'y mga kapwa tao rin

"Iisa ang pagkatao ng lahat," ang sabi nga

ni Gat Emilio Jacinto na bayaning dakila

dahil dito'y hinanap ang diwang mapagpalaya

hanggang aking makasama ang uring manggagawa

nagsuri't aking natutunan ang kanilang layon

sila pala'y may dakilang papel upang bumangon

ang mga api't pinagsasamantalahang nasyon

prinsipyo ng uring manggagawa, ito ang tugon

dahil sa kanila'y namulat ako't naririto

prinsipyo't misyon ng uring obrero'y niyakap ko

at aming itatayo ang lipunang makatao

salamat sa nagmulat sa akin, mabuhay kayo!

- gregbituinjr.

Kwento ng pagkabulag

nawala na ang liwanag sa aking mga mata

di na mapagmasdan ang mga tanawing kayganda

di na rin masilayan ang magagandang sagala

ang mga nasa isip ay di na rin maipinta

pakiramdam ko, tila ba daigdig na'y nagunaw

pati pakikipagkapwa tao'y di na matanaw

na panlipunang hustisya'y may tarak na balaraw

totoo pa'y kayraming batang sa tokhang pumanaw

di ko lubos maisip bakit dapat pang mabulag

gayong mata'y iningatan lalo't nababagabag

kayraming krimeng naganap at batas na nilabag

pati na karapatang pantao'y pupusag-pusag

buti't bulag na di kita ang karima-rimarim

na pulos krimen, pagpaslang, korupsyon, paninimdim

sakaling makakita muli't di sanay sa dilim

nawa'y may hustisya pa rin sa kabila ng lagim

- gregbituinjr.

Bihirang magkape

bihira pa rin akong magkape, tulad ng dati
nagtitipid ng panggastos kaya di nagkakape
maliban kung may mag-alok sa pulong at nagsabi
ngunit di na magkakape kung ako pa'y bibili

lalo ngayong kwarantina, si misis ay mahilig
magkape kaya napapakape rin ang makisig
dapat nang magtipid ngayong panahon ng ligalig
kaya nagkakasya na lang sa mainit na tubig

kung sanay kang magkape, umaga, tanghali, hapon
gabi, di na ito basta-basta magawa ngayon
walang sahod, walang pambili, at walang limayon
buhay-lockdown na ito, tipid-tipid pag naglaon

masarap namang magkape lalo't kapeng barako
nagpapaaraw sa umaga't nageehersisyo
subalit sa panahong ang sitwasyon ay ganito
may dahilang maging kuripot, nasa lockdowan tayo

- gregbituinjr.

Patuloy ang page-ekobrik kahit umuulan

patuloy ang page-ekobrik kahit umuulan

kaylakas ng tikatik, aba'y nagraragasaan

animo'y may demolisyon, yero'y nag-aangasan

habang nage-ekobrik ay patuloy sa paggampan

matagal maggupit, daliri rin ay nangangalay

dapat din, loob ng plastik ay malinisang tunay

punasan ng basahan o banlawan at isampay

walang latak ng pagkain ang plastik na ginutay

mga ginupit ay ipapasok sa boteng plastik

dapat malinis upang walang mikrobyong sumiksik

dapat di rin basa, patpat na kahoy ang paniksik

gagawing sintigas ng bato ang bawat ekobrik

habang kwarantina, sa page-ekobrik tumutok

doon ililibing ang plastik na di nabubulok

mai-ekobrik din kaya ang mga trapong bugok

dahil mga plastik din itong nakasusulasok

- gregbituinjr.

Ngitngit ng kalikasan

kanina'y tirik ang araw, subalit nagbabadya

ang pagbuhos ng malakas na ulan, biglang-bigla

sa yerong bubong tila bato'y nagbagsakang lubha

sa nangingitim na ulap ay biglang kumawala

ibinuhos na ng kalikasan ang kanyang ngitngit

lalo't usok ng coal-fired power plants ay abot-langit

nang mapuno ng plastik ang dagat, nakakagalit

kalikasan ay nagwala't sa lupa gumigitgit

tuwang-tuwa naman ang magsasaka't nadiligan

ang mga tanim niyang nilinang sa kabukiran

habang animo'y basurahan ang mga lansangan

nagbaha pagkat sa kanal, plastik na'y nagbarahan

biktima ng ngitngit ng kalikasan ay tayo rin

batas ng kapaligiran ay alamin at sundin

huwag mo nang dumihan kung di mo kayang linisin

kalikasan ay buhay kaya alagaan natin

- gregbituinjr.

Bakit nga ba marami raw pasaway sa Maynila

bakit nga ba marami raw pasaway sa Maynila
habang lockdown, laging iyon ang nababalita
dahil ba pasaway talaga ang taga-Maynila
o malapit kasi roon ang tagapagbalita

palibot ng Maynila ang mayorya ng masmidya
nasa Lungsod Quezon, Pasay, Makati, at saan pa
sa Malabon at Navotas ay swerteng makapunta
sila'y nasa sentro ng pulitika't ekonomya

nasa Maynila ang Malakanyang, ang nasa rurok
ng gobyerno, at pasaway din ba ang nasa tuktok
laki akong Maynila, sa distrito ng Sampaloc
kaya minsan naaamoy ang nakasusulasok

nasa Maynila rin ang matatandang kolehiyo
ang U.S.T., pinagdiwang na'y pang-apat na siglo
ang Letran ngayong apatnadaang taon na nito
pati ang La Salle, Mapua, San Beda, Ateneo

ang Kongreso'y nasa Q.C., Senado'y nasa Pasay
sakop ng Metro Manila, sila rin ba'y pasaway
ang totoo, nasa Maynila ang masmidyang hanay
kaya balita pag nilatag ay pambansang tunay

nasa Maynila ang balita, napapag-usapan
ng mga komentarista sa radyo't pahayagan
magrali sa Mendyola't pambansa na ang latagan
ganyan ang Maynila, na pasaway lang ay iilan

- gregbituinjr.
05.10.2020

Gisingin mo ako sa tagal nang pagkakahimbing

gisingin mo ako sa tagal nang pagkakahimbing

na diyosa ng kagandahan ang aking kapiling

na kasama ko'y prinsesa mula sa toreng garing

na baka pantasyang ito'y tunay pag di nagising

sasabihing ako'y binangungot ng kagandahan

na isa palang diwata ang aking nakatipan

habang ako'y dalitang kapiling ng kagipitan

na ginhawa ng bayan ko ang tanging kasagutan

mutya'y naglalayag sa diwa ng abang makata

na tila bilanggong nakagapos sa tanikala

na sa pagkakahimbing ay tila di makawala

na tanging saksi sa kanya'y ang lobong maninila

dapat na akong magising, mayroon pang labanan

tulad kong mandirigma'y dapat handa sa digmaan

kasama'y hukbong mapagpalaya sa sagupaan

tunggaliang dapat na naming mapagtagumpayan

- gregbituinjr.

Ayokong maging pabigat

Ayokong maging pabigat

Ayokong maging pabigat, ito ang aking hiyaw
Yayao akong di pabigat sa mundong ibabaw
Oo, nagsusuri akong may ibang natatanaw
Kumilos man akong may batong pasan bawat araw

O, kung wala kang pag-ibig sa kapwa kung sakali
Nakibaka ka kaya upang obrero'y magwagi?
Ginhawang asam ng uring manggagawa ang binhi
Maghandang buwagin ang sistemang mapang-aglahi

Aktibista akong may adhikaing sinimulan
Ginagampanan kong lubos ang tungkuling pinasan
Iniisip ang kapakanan ng masa't samahan
Ng uring manggagawa, ng dukha, di ng iilan

Gising ang diwa sa samutsaring isyu't problema
Pagkamulat ko'y mula sa uring obrero't masa
At nangangarap baguhin ang bulok na sistema
Bisig ko't kamaong kuyom ay tanda ng pagbaka

Ibig kong mag-ambag sa ginhawa ng kapwa tao
Gaya ng pangarap ng dakilang Katipunero
Ayokong maging pabigat, buhay ko ang ambag ko
Tatahakin ang landas ng lipunang makatao

- gregbituinjr.
05.10.2020

Happy Mother's Day! - a Tagalog poem

Happy Mother's Day, pagpupugay sa lahat ng nanay!
Anak po'y naritong nagpapasalamat ng tunay!
Pagkat kayo'y inang mahal! Mabuhay po! Mabuhay!

Pangarap po namin ay naabot dahil sa inyo
Yamang pagmamahal ninyo sa anak ay solido
Mahal po namin kayo! Kami sa inyo'y saludo!

O, inay, na nag-alaga mula sinapupunan
Tigib ang pag-aaruga sa anak nang isilang
Heto kaming tumatag para sa kinabukasan

Espesyal pong araw na ito. Happy Mother's Day po!
Ramdam itong pagpapahalagang mula sa puso
Sa inyo, pagmamahal namin ay di maglalaho!

Dahil sa inyo, matatag at may dignidad kami
At pinag-aral, pinangaralan hanggang paglaki
Yamang kayong aming magulang ang aming bayani

- Greg Jr. and Liberty
05.10.2020

Ilang tanaga sa karapatan

karapatang pantao'y
dapat nirerespeto
oo, tibak man tayo'y
nais ng pagbabago

bagong sistema'y nais
dukha'y di na magtiis
sa hirap, dusa't hapis
na dapat nang mapalis

dapat mong ipaglaban
ang bawat karapatan
huwag mong kalimutan
ang iyong kaapihan

saan nga ba papunta
ang balikong sistema
na ang dulot sa masa
ay pawang pagdurusa

dapat lang maghimagsik
bago mata'y tumirik
tatanggalin ang tinik
sa buhay na tiwarik

bawat danas ay alab
upang mitsa'y magsiklab
himagsik ay lagablab
nang sistema'y matungkab

kaya mabuting gawin
yakapin ang layunin
gawin ang simulain
tuparin ang tungkulin

kilos na, kaibigan
baguhin ang lipunan
ipagtanggol ang bayan
mula sa kaapihan

- gregbituinjr.

* tanaga - uri ng katutubong tulang may pitong pantig bawat taludtod

Huwag palahin ang lupa ng mga pinagpala

huwag palahin ang lupa ng mga pinagpala

baka barilin ka ng tanod ng tusong kuhila

pribadong pag-aari daw nila'y kayraming lupa

na nais mo mang linangin, may sangkaterbang hidwa

lupa ng mga pinagpala'y huwag mong palahin

tinawag silang asindero di dahil sa asin

ang titulo'y inimbento upang lupa'y maangkin

magsasakang naglinang ng lupa'y paaalisin

lupang nilinang ng magsasaka'y biglang naglaho

kahit naririyan lang, inagaw para sa tubo

at nang dahil sa kapitalismo't burgesyang luho

itinaboy ang magsasaka doon sa malayo

kung lupang inagaw ng iba'y papalahin mo man

magsasaka't manggagawa'y dapat kasama riyan

sila ang sepulturero ng

sistemang gahaman

ang lupang pinagpala'y gagawin nilang libingan

- gregbituinjr.

Balintunang kaunlaran

may nabasa akong kung anu-anong lumaganap

pag-unlad daw ngunit di ko maunawaang ganap

narating daw ng tao ang buwan, ng mahihirap

habang sa araw, dumating ang tuso't mapagpanggap

nalikha na rin ng tao ang bomba atomika

na sadyang yumanig sa Nagazaki't Hiroshima

bomba'y naglipana rin sa ilang sikat na kasa

pati sa sinehan at kabaret, kayraming bomba

saksihan kung paano nagbibigayan ang langgam

habang kape mo'y binabantuan ng maligamgam

ang panliligaw ba'y aabutin ng siyam-siyam

kung magandang dalagang bukid ang iyong inasam

iiwasan ba o lulunasan ang COVID-19?

habang wala pang makitang lunas, iwasan natin

aralin din ang lipunan at sistema'y suriin

at ang bagong hinaharap ay paghandaan na rin

- gregbituinjr.

Pasaring

tahimik lang ako kahit laging pinariringgan
ng kung anu-ano, tila ako'y sinisiraan
kaya maaga akong nagluluto ng agahan
sa gabi'y nasa kusina't lahat na'y huhugasan

bingi-bingihan na lang, puso'y ginagawang bato
kaysa manapak, masisira lang ang sarili mo
pabayaan na lang ang mga ugaling ganito
kahit nanggigigil gulpihin, tawanan lang ito

ayoko nang makasama ang ganyang magngangawa
sobra na kung sabihin kong mamatay siya nawa
ngatngatin ko na lang ng hinlalato ang kuhila
pakyu, pinapakyu ko na lang ang kanyang bunganga

panahon nang sa ganitong tao'y mapahiwalay
pag nakakasama siya'y di ako mapalagay
gayunpaman, tungkuling tangan ko'y di mapipilay
ipakitang ako pa rin ang pinakamahusay

- gregbituinjr.

Patuloy sa page-ekobrik

nagpapatuloy pa rin ako sa page-ekobrik

anuman ang tawag basta't ginugupit ang plastik

ginagawa habang lockdown kaysa mata'y tumirik

nagbibigay ng siglang tila sa akin nagbalik

habang kwarantina pa'y marami ring nagagawa

maging malikhain lang at maraming malilikha

nag-iisip, naggugupit, ang diwa'y kumakatha

maya-maya, sa katabing kwaderno'y itatala

mga nagupit na'y ipapasok sa boteng plastik

bawat nagupit ay isisiksik nang isisiksik

hanggang tumigas na animo'y batong itinirik

na magiging upuan o mesa ng katalik

ituring mong ito'y ehersisyo sa iyong lungga

pag nangalay ang kamay, saka ka lang tumunganga

sa puting ulap at bughaw na langit tumingala

baka musa ng panitik ay dumalaw sa diwa

- gregbituinjr.

Alaala ng isang gipit

pag may sampung piso sa bulsa

bibilhin ko ba'y ensaymada?

o isang kanin sa kantina?

ito kaya'y mapapagkasya?

dalawang dekada'y nagdaan

na ganito ang karanasan

lalo't pitaka'y walang laman

natutuliro ang isipan

isang pultaym na walang-wala

kumilos para sa adhika

pagkat ang masa'y lumuluha

kailanga'y bagong simula

ganito ang yakap kong buhay

na buong pusong inaalay

ngunit dapat pa ring magsikhay

para sa marangal na pakay

- gregbituinjr.

Kotang tula sa lockdown

ngayong may lockdown ay tinutukan ko ang pagkatha

at plinano kong bawat araw ay may tatlong tula

karaniwan sa umaga pa lang, kota nang sadya

may hapon pa't gabi, pag sinipag, may bagong akda

ngunit kung sanaysay, gawa ko'y isa bawat araw

minsan ay wala, basta't tatlong tula'y umaapaw

dalawa, apat, lima, anim, pitong tula'y mapalitaw

na mula puso't diwa ng makata'y kaulayaw

patuloy ang pagkatha ng makatang aktibista

na karamihan ng tula'y paglilingkod sa masa

sa tula idinadaan ang sentimyento't puna

pati na adhikaing pagbabago ng sistema

may mga tula hinggil sa mumunting bagay

bata, bato, buto, buko, butil, ang naninilay

danas, dusa, hirap, lalo na't di ka mapalagay

ah, kayraming paksa't tula ang makata ng lumbay

kota kong tatlong tula bawat araw na'y gawain

minsan, lampas na sa kota, basta't ako'y sipagin

at ngayon, ito'y tila isang ganap na tungkulin

na matapos man ang kwarantina'y gagawin pa rin

- gregbituinjr.

Kwento ng isang latang sardinas

noong ako'y binata pa'y tipid lagi sa gastos

anumang nasa pitaka'y tinitipid kong lubos

sa ulam nga'y nakaplano kung anong matutustos

isang latang sardinas nga'y di agad inuubos

maliit, pulang lata ng sardinas ang bibilhin

malasa't maanghang itong akin pang hahatiin

pang-almusal, pananghalian, panghapunan na rin

nakakabusog din, basta't marami ka lang kanin

sa turo-turo, tatlong kanin, kalahating ulam

sa kolehiyo pa'y nasanay nang iyan ang alam

tila ba sa tulad kong dukha'y iyan ang mainam

basta't busog ka't bayad, wala silang pakialam

natutunan ko iyon sa aking paggala-gala

nang umorder ng kalahating sardinas ang mama

at isang platong kanin sa turo-turo ng dukha

tila ba pulubing namamalimos ng kalinga

ako'y isang tibak na laging walang pamasahe

mabuti pa ang pulubing may sariling diskarte

isang latang sardinas lang, may ulam hanggang gabi

nakaraos muli ang isang araw, aking sabi 

- gregbituinjr.

Asahan mo

ASAHAN MO

asahan mo, irog

ang aking pagluhog

puso'y dinudulog

pagsinta'y kaytayog

asahan mo, sinta

nasa puso kita

laging narito ka

buhay ko't lahat na

asahan mo, giliw

sa harana'y saliw

pagsinta't aliw-iw

na di magmamaliw

asahan mo, hirang

saka'y nililinang

upang huwag lamang

poste'y binibilang

alam mo, mutya

ng buhay kong dukha

pagsinta'y panata

at tunay na sumpa

asahan mo, liyag

puso kong binihag

mo'y naging panatag

salamat sa habag

asahan mo, mahal

pagsinta mang bawal

o pagsinta'y banal

kita'y magtatagal

- gregbituinjr.

Mga dalit sa karapatan

MGA DALIT SA KARAPATAN

* Ang dalit ay katutubong pagtula na may walong pantig bawat taludtod

karapatang magpahayag

ay di dapat nilalabag

pag ito na'y tinitibag

masa'y dapat nang pumalag

karapatang magsalita

ay di dapat masawata

pag ito'y binalewala

dapat mag-alsa ng madla

karapatang magtrabaho

sana'y sapat yaong sweldo

sa lakas-paggawa'y sakto

at di lugi ang obrero

karapatan sa pabahay

sapat, disente, matibay

doon ka magpahingalay

at buuin yaring buhay

pati na ang kalusugan

ay atin ding karapatan

kung may sakit malunasan

kung gamot, bigyan o bilhan

kung walang libre, bili ka

kung mahal ang medisina

magtanong sa generika

bakasakaling may mura

karapatan sa pagkain

dalawang rason, alamin

kung may digma't sasakupin

o kalamidad sa atin

kung isa sa dal'wa'y wala

maghanapbuhay ang madla

ibenta'y lakas-paggawa

nawa'y iyong naunawa

karapatang maeduka

karapatang magprotesta

pati pag-oorganisa

at magtipon sa kalsada

marami pang karapatan

ang di ko nabanggit diyan

ngunit kung ito'y yurakan

ipagtanggol, ipaglaban

- gregbituinjr.

* Unang nalathala sa Taliba ng Maralita, ang opisyal na publikasyon ng Kongreso ng Pagkakaisa ng Maralitang Lunsod (KPML), isyu ng Mayo 1-15, 2020, pahina 20.

Sa musa ng panitik

kaysarap titigan ng ngiti't maamo mong mukha
maganda mong mata't ngiti'y di makatkat sa diwa
inspirasyon na kita sa lahat kong ginagawa
diwata kitang sa panaginip ko'y di mawala
ikaw ang hinehele niring puso, O, diwata
musa ka ng panitik, paraluman ng pagkatha

- gregbituinjr.

Pananaw sa pagsasara ng ABS-CBN

tuwang-tuwa sila't natupad ang gusto ng poon

isang kapitalistang masmidya'y dinurog ngayon

tila ba tinupad nila'y isang malaking misyon

na kritiko ng poon ay tuluyang maibaon

na kung sakaling magising ay di na makabangon

higit labing-isang libong obrero'y apektado

sa panahong may COVID pa'y nawalan ng trabaho

baka di rin magtatagal ang pangyayaring ito

makikiusap ang kampong senador ng pangulo

pagbibigyan, lalakas ito pag kumandidato

baka nililigaw na tayo sa kanilang drama

pasalamat at lockdown, walang tao sa kalsada

kayraming unipormado, animo'y martial law na

subalit di mapipigil kung magpahayag ang masa

lalo't ayaw din nila ang lupit ng diktadura

babagsak din ang animal, babagsak ang animal

pagkat di habambuhay ang paghahari ng kupal

busalan man ang masmidya't masa'y di makaangal

mag-aalsa rin ang masa, di ka makakatagal

ibabagsak din ang pusakal sa tronong pedestal

- gregbituinjr.

Ulam na brocolli'y pampatibay at pampalusog

malalaking brocolli yaong dinala sa bahay

kahapon, ginayat, niluto, inulam na gulay

kaysarap ng pagkaluto, sadyang mapapadighay

at umaliwalas din ang mukhang di mapalagay

paggising sa umaga'y ito pa rin ang inulam

tila gamot na agad gumaan ang pakiramdam

nagpainit sa araw, naligo ng maligamgam

at anumang pagkabalisa'y agad na naparam

umaga'y anong rikit, dama'y di na naninimdim

mabuti pang mamitas ng mga sariwang tanim

pag tirik na ang araw ay doon ka na sa lilim

habang paruparo sa bulaklak ay sumisimsim

ulam na brocolli'y pampatibay at pampalusog

pag ganito ang ulam mo'y tiyak kang mabubusog

at sa hapon ay madaramang kaysarap matulog

na tila abot na ang pangarap mong anong tayog

- gregbituinjr.

Sumugod ang tandang sa tarangkahan ng pag-ibig

sumugod ang tandang sa tarangkahan ng pag-ibig

sinundan ang inaheng nais niyang makaniig

sa pagkurukok, tila puso'y kaylakas ng pintig

tanda ng ligayang animo'y may haing pinipig

anong rikit ng paglitaw ng araw sa silangan

nakakapanginig ang simoy ng hanging amihan

kayputi naman ng alapaap sa kalangitan

na tila sa buong araw ay may kapayapaan

habang yaong tandang ay patuloy lang sa pagpupog

at ang inahen, maya-maya lang ay mangingitlog

paano nanligaw ang tandang, pagsinta'y niluhog?

nag-alay din ba ng palay at matamis na niyog?

Balagtas: "O, pagsintang labis ng kapangyarihan"

napakalayong tinig na narinig pa ng tandang

kaya sumisintang puso'y namugad nang tuluyan

kasama ang sintang bubuo ng kinabukasan

- gregbituinjr.

Itinatanim ko'y binhi

itinatanim ko'y binhi upang maging halaman

sa bawat araw ay palalaguin, didiligan

tulad ng gulay nang may mapitas pag kailangan

at nang may makain din ang pamilya't mamamayan

itinatanim ko'y binhi upang masa'y mamulat

na pakikipagkapwa'y pag-uugaling marapat

na kung tayo'y magpapakatao, ito na'y sapat

upang lipunang makatao'y asamin ng lahat

halina't magtanim, magandang binhi ang ihasik

binhing walang pagsasamantala ng tuso't switik

binhi upang baguhin ang sistema't maghimagsik

laban sa puno, sanga't bunga ng burgesyang lintik

itanim natin ang binhi't diwang mapagpalaya

sa kalsada't piket man, kasama'y obrero't dukha

palaguin ang pagkakaisa ng manggagawa

at lipulin din ang damo ng burgesyang kuhila

- gregbituinjr.

Pluma ko'y bakliin mo man

nais kong maramdaman nilang kahit sa sulatin

na di ako nag-lie low, pagkilos ko'y tuloy pa rin

nasa kwarantina man, ginagawa ang tungkulin

komentaryo't tuligsang tula ang palipas hangin

patuloy na nakikiramdam at di humihimbing

sa problema't isyu ng masa'y nanatiling gising

diwa ng dalita'y katha, wala sa toreng garing

sa manggagawa't maralita laging nakakiling

di natutulog kahit sa karimlan itong pluma

upang magpaliwanag, tumuligsa o pumuna

lumalaban sa pang-aapi't pagsasamantala

sa akda nilalarawan ang sakripisyo't dusa

pluma ko'y bakliin mo man, patuloy sa pagsulat

pintig ng puso't daloy ng diwa'y di maaawat

magpapatuloy pa rin sa gawaing pagmumulat

wala man sa kalsada'y tangan pa rin ang panulat

- gregbituinjr.

Sa ika-202 kaarawan ni Karl Marx

SA IKA-202 KAARAWAN NI KARL MARX

(Mayo 5, 1818 - Marso 14, 1883)

mabuhay ka, Karl Marx, at ang iyong mga sinulat

na sa uring manggagawa'y sadyang nakapagmulat

di pagkapantay sa lipunan ay iyong inugat

at teorya mo't pagsusuri sa mundo'y kumalat

kasama si Engels ay nagsulat ng manipesto

at inyong sinuri ang sistemang kapitalismo

tinalakay bakit dapat mamuno ang obrero

upang panlipunang hustisya'y makamit ng husto

ugat ng kahirapan ay pribadong pag-aari

sinuma sa isang pangungusap: dapat mapawi!

pagsasamantala'y tiyaking di na manatili

at buong uring manggagawa ang dapat magwagi

salamat, Karl Marx, sa obrang Das Kapital, mabuhay!

sa iba mo pang akdang inaaral naming tunay

sa iyong ambag upang lipunan ay maging pantay

sa kaarawan mo, taas-kamaong pagpupugay

- gregbituinjr.
05.05.2020

Munting sulyap sa talambuhay

tatlong taon ding naging machine operator noon

tangan ko'y makina, manggagawang regular doon

nag-resign, nag-aral, b.s. math ang kinuhang iyon

naging manunulat pangkampus ng apat na taon

di pa editor nang sumumpa't niyakap ang layon

di nagtapos, nag-pultaym, iyan ang aking kahapon

wala na sa isip ang aming pinag-aaralan

kaya nagpasya akong makibaka ng tuluyan

sa campus paper ay mababasa ang pasyang iyan

at umalis sa apat na sulok ng pamantasan

nasa isip lagi'y ang kinabukasan ng bayan

inaral ang sistema, rebolusyon at lipunan

dugo'y mainit noon laban sa pambubusabos

kumampi sa pinagsasamantalahan at kapos

pag pulong, malayo'y nilalakad, walang panustos

at tinitiis ang gutom dahil walang panggastos

aral sa matematika, pati buhay tinuos

at nilulubos ang aldyebra sa buhay kong kapos

ikinasal kaya may asawang naging kaakbay

hinarap ang sinasabing bago ko raw na buhay

habang ang prinsipyo'y tangan pa rin sa bawat lakbay

sa problema't paglutas ng problema na'y nasanay

patuloy lang gawin ang misyon ko't tungkuling taglay

kung sa pakikibaka'y nawalay, ako na'y patay

- gregbituinjr.

05.04.2020

Tigil daw muna ang produksyon

bumalik ang sigla ko bilang dating manggagawa

nang gadgarin itong karot na kusa kong ginawa

alalayan si misis sa proyekto naming handa

ang pinulbos na karot na ibebenta sa madla

sampung malaking karot bawat araw ang kota ko

sinubukan muna, dalawang araw nang ganito

dalawampung karot sa dalawang araw na ito

upang makarami'y kinse na kaya ang gawin ko

kayraming nakabilad, dinadapuan ng langaw

para bang uulan, araw ay lumubog-lumitaw

tama na muna, si misis ang sa akin ay hiyaw

tigil muna ang produksyon, sa akin ay malinaw

sa bawat araw, prinograma ko na ang gagawin

sampung karot tuwing umaga ang kukudkurin

bilang manggagawa, ang target kong kota'y tungkulin

sigla bilang dating obrero'y nagbalik sa akin

konti lang ang nakabilad, tigil na ang produksyon

habang nasa antas kami ng eksperimentasyon

sa pag-aaral ng pulbos na karot nakatuon

tagumpay nito nawa'y kamtin namin pag naglaon

- gregbituinjr.

Ang kinayod kong karot

kalahating batya ang kinayod kong sampung karot

kaysarap pagmasdan habang sa ulo'y kumakamot

dapat maligo matapos magkayod, aking hugot

habang mamaya'y mag-uulam ng talbos at hawot

kahapon ay sampung malaking karot, ngayon uli

sinimulan ko nang matapos makapananghali

di ko man mapuno ang batya, kahit kalahati

kayod ng kayod, gadgad ng gadgad, paunti-unti

sa umaga, maggadgad muna ng karot ang gawa

sa tanghali, magluluto, kakain, titingala

sa langit upang pagnilayan ang anumang paksa

sa hapon, patuloy ang gawa, sa gabi'y pagkatha

matapos maggadgad, linisin lahat ng ginamit

kaldero, pinggan, panggadgad, batya, silya'y iligpit

maayos ang maghapon, magdamag nama'y pusikit

randam ay maaliwalas, kahit na nanlalagkit

- gregbituinjr.

Walang asukal sa kape

kung may asukal pangkape, ilagay nang sumarap

kung walang asukal, di na ako naghahagilap

ayos na ang kape, di man matamis pag nalasap

kaysa bibili ng asukal, panggastos pa'y hanap

masarap din ang walang asukal, lalo't barako

na inumin ng tulad kong barakong may prinsipyo

para sa masa't mga kapatid nating obrero

masarap, malasa, magigising ang katawan mo

halina't uminom ng kapeng barako, kasama

habang nagninilay at kumakatha rin tuwina

ng alay na tula sa manggagawa't magsasaka

habang sinusulat din ang ginawa sa umaga

tumitigas ang itlog sa tubig na pinainit

lumalambot naman ang pinakuluang kamatis

sa barako'y nangingitim ang tubig kahit saglit

tandang sa diyalektika'y may iba't ibang bihis

- gregbituinjr.

Planong pinulbos na karot

maraming karot ang sa frontliners ay ibinigay

na iniuwi naman nila sa kanilang bahay

mga magsasaka'y sa frontliners ito inalay

pagkat sa mga pamiliha'y di pasadong tunay

dahil dito'y wala nang magawa ang magsasaka

kaysa raw mabulok lang ay mapakinabangan pa

ibinigay sa frontliners ang mga di nabenta

gayunman, salamat kahit wala na silang kita

bagong ani ang karot na di niya pinagdamot

may maliliit at may mga malalaking karot

si misis sa kaanak na frontliner nakihakot

upang di agad mabulok, si misis ay may sagot

ipreserba ang karot at gawing pulbos, durugin

kaya agad kong sinimulan ang kanyang mithiin

sampung malalaki'y tinalupan ko't gagadgarin

gamit ang panggadgad, ito'y aking paliliitin

pag maliliit na, sa araw ay agad ibilad

mungkahi kay misis ng amiga niyang mapalad

at talagang sinipagan ko naman ang paggadgad

dikdikin hanggang maging pulbos, ibenta't umunlad

panghalo raw sa niluluto ang karot na pulbos

pampalakas raw upang hininga'y di kinakapos

nais kong makarami kaya agad kong tinapos

pulbos na karot pag nabenta'y mayroong panggastos

- gregbituinjr.

05.03.2020 (World Press Freedom Day)

Tula sa World Press Freedom Day

World Press Freedom Day, araw ng malayang pagpahayag

Oo, araw din ito ng mga mamamahayag

Rinig mo ba kung kalayaang ito'y nilalabag?

Lalo't ginigipit ang mga tinig na matatag.

Damhin mo't suriin ang ating abang kalagayan

Paano lulunasan ang suliranin ng bayan

Ramdam mo ba ang problema't daing ng mamamayan?

E, kung karapatan na natin ang sinagasaan?

Sa aming nayon ay may kalayaang magsalita

Sa inyong lungsod, bakit bingi ang namamahala?

Freedom of the press, na panlaban natin sa kuhila

Rinig ko'y armas din ito ng inaaping dukha

Espesyal na araw na di lang para sa masmidya

E, kung gayon, para rin ito sa obrero't masa

Diktadura'y naibabagsak kahit ang mapera

Oo, ito'y armas laban sa mapagsamantala

May World Press Freedom Day na dapat nating gunitain

Dahil sinikil noon ng diktadura't salarin

Atin ding pagpugayan ang mga bayani natin

Yamang ito'y pinaglaban nila para sa atin.

- gregbituinjr.

05.03.2020

Hindi ako tambay

Hindi ako naging tambay na walang ginagawa

Isang araw laging may isa o higit pang tula

Nagsusulat din ng sanaysay, kwento't ibang akda

Diyata't ito ba'y tambay kahit nakatunganga?

Iniisip ang paksa, nakatunganga sa langit

At mamaya lang, diwa'y kayrami nang naiguhit

Kathang samutsari mula suri't danas na bitbit

Obra maestrang sana'y may gantimpalang makamit

Tambay ay tagay ang madalas na inaatupag

Anak ay pababayaang pang umiyak magdamag

Maghapong nasa inuman, asawa'y binababag

Bakit nais pa niyang tumambay, ayaw magsipag?

Ako'y di naging tambay, sa langit tumunganga man

Yamang inaakda'y pamana sa kinabukasan.

- gregbituinjr.

05.03.2020

(uri ng tula: soneto at akrostika)

Pag nawalan ka na ng prinsipyo

pag nawalan ka na ng prinsipyo, di ka na tao
ang sarili mo'y ikinumpara mo na sa aso
bahag ang buntot at laging nakasuso sa amo
na tulad din ng mapagsamantalang tuso't trapo
nakahimod lagi sa tumbong ng kapitalismo

- gregbituinjr.

Sa bahay muna tayo

Sa panahong nananalasa pa ang COVID-19

Ang kaligtasan ng bawat isa'y isipin natin

Bahay daw muna tayo habang nasa kwarantina

Ang coronavirus sa mundo pa'y sumasalanta

Hatid nito'y sakit, lungkot, kamatayan at dusa

Atin ding pag-ingatang di mahawa ang pamilya

Yamang lunas dito'y di pa matagpuan ng syensya

Manatili sa bahay ang ambag natin sa bayan

Upang di magkasakit ang pamilya't ang sinuman

Ngunit gutom ng masa'y dapat pa ring malunasan

At nang sa kanilang bahay na'y di magsilabasan.

Tahanan ang kanlungan habang may coronavirus

At dito muna tayo habang lockdown ay di tapos

Yaong bawat pamilya nawa'y di pa kinakapos

O, hanggang saan ang problemang ito'y di matalos.

- gregbituinjr.