Habang tinititigan ang bumubukol na ulap

habang tinititigan ang bumubukol na ulap
natatanaw ko sa haraya ang luksang pangarap
buhay ng dukha'y patuloy na aandap-andap
sa kabila ng tiyaga, sipag at pagsisikap
tila di na sila ihehele sa alapaap

nakikita ko sa haraya'y isang pangitain
habang sa maraming bansa, laksa'y inaalipin
may namamalimos pa sa pagdaan ng limousine
laksang babae'y di asawa yaong umaangkin
kailan ba babangon ang mga bayani natin

sinagasaan ng salagubang ang mga uod
doon sa puwet ng tigre'y may mga humihimod
sa haraya'y nakikita ko ang ulilang puntod
at nag-aalay ng bulaklak ang isang pilantod
binigkas ang alay na tulang may sampung taludtod

- gregbituinjr.

Mutyang rosas

kanyang winisik-wisikan
yaong rosas ng kariktan
habang inaalagaan
ang sinasambang hayagan

tila adang minumutya
ang rosas na anong putla
kailan kaya huhupa
ang dumaluhong na baha

ang rosas sana'y pumula
tulad ng dugo ng sinta
at masilayan na niya
ang sinisintang dalaga

inibig ang mutyang rosas
tulad ng kakaning bigas
kapara animo'y pantas
tulad ng isang ilahas

rosas na tadtad ng tinik
na sa puso'y tumitirik
at sa diwa'y natititik:
"mutyang rosas itong hibik!"

- gregbituinjr.

Sentimyento

sentimyento'y paano tatakas sa kahirapan
pulos pagtakas, imbes na suriin ang lipunan
kaya nagsisipag magtrabaho sa pagawaan
nag-iipon upang anak ay mapag-aral lamang

makakaalpas nga ba sa hirap ng kanya-kanya
imbes kolektibo nating lutasin ang problema
sa sipag ba't tiyaga'y makakaalpas sa dusa
o dapat nating baguhin ang bulok na sistema

kayod-kalabaw ang di nagkakaisang obrero
magsipag at tiyaga lang daw ay uunlad tayo
kahit nagpapaalipin man sa kapitalismo
at makakaipon ka rin para sa pamilya mo

iyan ang palasak na kaisipang umukilkil
di makitang pribadong pag-aari'y sumisikil
dukha'y nananatiling dukha, masa'y kinikitil
pati karapatang pantao nila'y sinusupil

di pagtakas sa kahirapan ang ating solusyon
kundi suriin bakit may dusang laganap ngayon
pribadong pag-aari'y sanhi ng dusa't linggatong
dapat sistema'y palitan, dukha'y magrebolusyon

- gregbituinjr.

Pagninilay bago mag-Undas

magu-Undas na naman, muling aalalahanin
mga mahal na nangamatay na di lilimutin
magtitirik tayo ng kandila doon sa puntod
at baka sa kabilang buhay, sila'y mangalugod
maaraw man o maulan, tiyak tayo'y dadalaw
sa buong taon bibisita kahit isang araw
parang reyunyon din ng pamilyang nasa malayo
doon sa harap ng puntod ay magkatagpo-tagpo
gugunitain ang mahal sa buhay na namatay
pagkat siya'y karugtong niring puso, diwa't buhay

- gregbituinjr.

Paghahanap ng katuturan (munting talambuhay)

kung para lang sa pera kaya ka nagtatrabaho
sa pagtatrabaho umiikot ang iyong mundo
ano ka na? ano nang katuturan ng buhay mo?
kung laging trabaho, kumain, matulog, trabaho

iyan lang ba ang esensya ng buhay, ang kumain
matulog, magtrabaho, at magtrabaho, kumain
paikot-ikot, matulog, magtrabaho, kumain
hanggang tumanda, magtrabaho, matulog, kumain

dalawampung anyos pa lang ako'y nagtrabaho na
at nagpatakbo ng makina doon sa pabrika
naging manggagawang regular bilang makinista
tatlong taong singkad, nag-resign, lumipat sa iba

napunta sa opisina, kasama'y matatanda
pawang papel ang hawak, sa trabaho'y natulala
kayraming tiwali, pera-pera, budhi'y napatda
madali lang ang pera kung konsensya'y madadaya

doon na lang ba ako hanggang tumanda sa buhay
sa puntong iyon, talagang di ako napalagay
hanggang may mga nakilalang may prinsipyong taglay
at nakita ko ang tamang daan kaya umugnay

umalis ng walang paalam sa tanggapang iyon
naging aktibistang niyakap ang magandang layon
ako'y kaisa na sa pagbabago't rebolusyon
masayang may katuturan na ang buhay ko ngayon

- gregbituinjr.

Doon tayo sa buhay na may katuturan

kung gusto ko'y pera, matagal na akong yumaman
baka sa kamay ko'y maraming babaeng nagdaan
baka maraming napatayong gusali't tahanan
baka lagi ako sa bar, laging nasa inuman

ngunit di ako tumutok sa pagkita ng pera
kundi maglingkod sa uri't bayan, mag-organisa
kung aalpas sa hirap, dapat di ako mag-isa
kundi aalpas sa dusang kasama ko ang masa

mag-isip lang ng pansarili'y walang kabuluhan
buhay na walang kwenta ang pulos lang kasiyahan
kaya mabuti pang maglingkod sa uri't sa bayan
sa pakikibaka, ang buhay mo'y may katuturan

nabuhay ka lang ba upang kumain at magsaya?
nabuhay ka lang ba upang magtrabaho't kumita?
kung sa kabila ng hirap, kasama mo ang masa
aba'y kaysarap ng tagumpay sa pakikibaka

halina't lipunan ay suriin at pag-aralan
upang bulok na sistema'y mapalitang tuluyan
halina't tayo'y maglingkod para sa uri't bayan
manggagawa'y ihanda sa sosyalistang lipunan

- gregbituinjr.

Pagtakbo sana bilang pangulo ng unyon

noong matanggap sa pabrika ako'y binatilyo
nag-operador ng makina sa departamento
tatlong taon doon bilang regular na obrero
nagtatrabaho nang maging batas ang Herrera Law

balak ko rin noong tumakbong pangulo ng unyon
tiyo ko sa ibang kumpanya'y natunugan iyon
bago ko mapasa ang kandidatura ko roon
aba, tiyo ko'y pinainom ako't pinalamon

pinigilan akong maghanda sa kandidatura
dahil siya'y manager sa kapatid na kumpanya
magtrabaho lang ako't huwag daw mag-unyunista
at baka makasira ako sa ugnayan nila

trabaho ko'y sa Alabang, ang tiyo'y nasa Taytay
sayang na pagkakataon ang aking naninilay
alauna ng hapon nagising sa kanyang bahay
di ko na nahabol ang kandidatura kong tunay

bise presidente ko sana ang siyang nanalo
nagkaroon ng halalan, siya'y naging pangulo
ilang buwan pa, at nag-resign ako sa trabaho
upang bumalik sa paaralan, nagkolehiyo

tatlong taong machine operator, aking gunita
tatlong taon ding naging regular na manggagawa
paano kung nanalo't anong aking magagawa
bilang pangulo ng unyong may prinsipyo't adhika

- gregbituinjr.

Sa pagkatha ng tula

aba'y kaya pa bang gumawa ng isa pang tula
upang ipahayag ang nasasaloob kong nasa
anong nakakulapol sa puso't inaadhika
upang madama namang ang makata'y pinagpala

bakit ganito't sa daigdig ay paikot-ikot
nahahihilo na sa naglipanang mapag-imbot
bakit sa pamahalaan ay kayraming kurakot
pag nabisto sa kasalanan ay nakalulusot

ginagawan ko ng tula ang samutsaring ulat
kung anong makita'y nagsusuri, nagmumulat
kung anong mali, nagmumura at nanggugulat
ang anumang poot ay sa tula sumasambulat

bawat tula'y parang pintong ang makata'y kakatok
nang basahin ng madla ang sa tula'y tinatampok
hiyaw ng makata'y palitan ang sistemang bulok
subukang uring manggagawa'y ilagay sa tuktok

- gregbituinjr.

Ulat sa kolehiyalang ginahasa

doon sa malayong lalawigan ng Iloilo

labing-apat anyos na binatilyo'y arestado

na ginahasa'y labingsiyam anyos na dalaga

sinaksak daw ang kolehiyala't iginapos pa

ang paalam sa ama'y bibili lang sa tindahan

dalaga'y di umuwi ilang oras ang nagdaan

hanggang makitang patay na't nakatali sa kahoy

ang hikbi ng ama, "anak ko'y kanilang binaboy!"

hustisya para kay 'Rona' ang sigaw ng kaanak

ikulong yaong maysalang gumahasa't sumaksak

pahayag nga ng ama, "grabe 'yung ginawa nila!"

dugtong pa, " kung pwede lang sana, patayin din sila"

mula sa pahayagang Bulgar ang nasabing ulat

talagang nakagagalit yaong isiniwalat

nawa hustisya'y makamtan ng dalagang pinaslang

makulong ang salaring puri't buhay ang inutang

- gregbituinjr.

* ibinatay ang tula mula sa headline ng pahayagang Bulgar, Oktubre 28, 2019, na may pamagat na "Kolehiyala Ni-Rape, Pinatay; 14-anyos, arestado"

Huwag asahan ang ibang uri

may kongresista kayang magsasabing tatlong buwan
imbes dalawang taon ang probi sa pagawaan?
may senador kayang obrero yaong kakampihan
o senado na'y nakain ng sistemang gahaman?

pangitain o pag-asa bang ito'y mangyayari?
umaasa sa ibang uri? aba'y anong silbi?
wala ba tayong gagawin kundi manggalaiti?
na gawa lang nila'y para sa kanilang sarili?

manggagawa ang magpapalaya sa manggagawa
sa kapitalismo, obrero'y di basta lalaya
dapat nilang ibagsak ang sistemang mapanira
pagtatag ng sosyalismo'y dapat nilang ihanda

manggagawa, huwag mong asahan ang ibang uri
lalo't uring ang asam ay pribadong pag-aari
sa kongkretong kalagayan dapat kayong magsuri
at magkaisa upang ibagsak ang naghahari

- gregbituinjr.

Magsuri at lumaban

paano ba gumagapang sa lusak ang magulang
paanong pag-aaral ng anak ay ginagapang
paano bang dinudurog ang mga salanggapang
paano ba sa pag-ibig ang puso'y nadadarang

mga obrero'y biktima ng kontraktwalisasyon
ang taumbayan ay biktima ng globalisasyon
ang magsasaka'y biktima ng rice tarrification
sa mga problema't isyu, masa'y ibinabaon

kongkretong pagsusuri sa kongkretong kalagayan
na sa samutsaring isyu't problema'y panuntunan
kaya kailangan ang pagbubuo ng samahan
upang makatulong sa pagbabago ng lipunan

tayong aktibistang Spartan, anong dapat gawin
dapat tayong magkaisa sa iisang layunin
uring manggagawa'y patuloy na organisahin
at itayo ang lipunang nararapat sa atin

- gregbituinjr.

Halina't tayo'y magbutaw

upang makapagbutaw ka, bawasan mo ang bisyo
kung kaya'y limang boteng gin, isa lang inumin mo
bawasan ng kalahati ang kahang sigarilyo
upang ibigay sa organisasyon ang butaw mo

alalahanin mong palagi ang organisasyon
ito'y buhay-pakikibakang may magandang layon
at prinsipyadong samahang sa isyu'y tumutugon
na sa bulok na sistema'y tiyak na magbabaon

sa bawat buwan sa samahan, sampung pisong butaw
o limampung pisong alak nang mawala ang ginaw
o pitumpung pisong kaha ng yosi bawat araw
ah, sampung pisong butaw ang mas kaya mong ibitaw

kaya, tara, kasama, alagaan ang samahan
magbutaw nang organisasyon ay mabuhay naman
upang magpatuloy ang serbisyo sa taumbayan
hanggang lipunang bulok ay tuluyang mapalitan

- gregbituinjr.

Sa biyahe

minsan sa pagbibiyahe, ako'y napapaidlip
lalo na't matrapik, nakaupo, nakakainip
kung di makatulog, nagsusulat ng tula sa dyip
itinatala agad nang di mawala sa isip

pag lulan ng bus at trapik ay nasa tatlong oras
naglalaro sa selpon, sudoku, kwadro de alas
nagbabasa rin, bakasakaling may bagong tuklas
o kaya naman ay nanonood pag may palabas

kaytagal din, ilang oras, ang biyahe sa barko
patungong lugar upang sa kumperensya'y dumalo
habang tinititigan ang alon, nakaliliyo
walang lupang natatanaw, tubig ang paligid ko

sumakay ng eroplano't tinungo'y dayong lupa
bawat upuan ay may telebisyon, nangangapa
hanggang Les Miserables ang napindot ko't bumulaga
napanood ko roo'y di napanood sa bansa

sa paglalakbay, may mga lugar na pinakete
kayraming mararanasan sa iyong pagbiyahe
maitatala'y samutsaring danas, kwento't siste
tila ba gagaan ang sa damdamin mo'y bagahe

- gregbituinjr.

Ako'y manhik manaog sa loob ng kabahayan

ako'y manhik manaog sa loob ng kabahayan
nag-iisip, nagninilay, anong kinabukasan
ang dadatnan, dapat kumilos lalo't kailangan
at makibaka para sa hustisyang panlipunan

tumigil ako sumandali't sa banig nahiga
matamang tinitigan ang kisameng parang bula
lahat ng ipinaglaban ba'y mababalewala
kung tagumpay ng masa'y aangkinin ng kuhila

mga trapo't naghaharing uri'y kuhilang bastos
na pinananatiling hirap ang buhay ng kapos
sa lakas-paggawang kaybaba, sinong magtutuos
kung sa karukhaan, balat ng dukha'y nalalapnos

buti na lamang, di ako ganap na nakatulog
muli, sa loob ng bahay, ako'y manhik manaog
palakad-lakad, sana ang bata'y maging malusog
at huwag sanang dumating ang kung sinong may usog

- gregbituinjr.

Gawing ekobrik ang mga pulitikong plastik

di pwedeng gawing pataba sa lupa dahil toksik
iyang mga pulitikong dapat lang i-ekobrik
lalo ang mga tusong trapong gahaman at lintik
silang sanhi kaya buhay ng masa'y putik-putik
mga basurang trapong kapara'y single-use plactic

di sapat na ang mga pulitiko'y ibasura
pagkat baka makahawa pag sila'y naglipana
dapat i-ekobrik ang tulad nilang palamara
pagkat sila ang sanhi ng kahirapan ng masa
lalo't dignidad ng dukha'y kanilang dinudusta

tanong ko lang, may matitino pa bang pulitiko
lalo na't layunin nila'y pag-aaring pribado
na sanhi'y pagsasamantala ng tao sa tao
at ninenegosyo pati pampublikong serbisyo
i-ekobrik ang trapo upang sistema'y magbago

- gregbituinjr.

Subukan nating iligtas si Inang Kalikasan

subukan nating iligtas si Inang Kalikasan
mula sa paninira ng mapang-aping lipunan
na unti-unting nagwawasak sa kapaligiran
upang likasyaman ay kanilang mapagtubuan

sira ang kalikasan hangga't may kapitalismo
lupa, hangin, dagat, halos lahat ninenegosyo
nais kasing pagtubuan ang likasyamang ito
nang sila'y makapagpasarap sa buhay sa mundo

kawawang kalikasan, pagkat mapagsamantala
ang mga nananahan sa sinapupunan niya
basta pagkakaperahan, kahit may madisgrasya
walang pakialam, kalikasan ma'y masira na

aba'y di dapat tumunganga ang may pakiramdam
lalo't isang maayos na kalikasan ang asam
kaya sa mga nangyayari'y dapat makialam
bago pa ang tahanang mundo'y tuluyang maparam

- gregbituinjr.

Hinahagilap lagi kita sa aking gunita

hinahagilap lagi kita sa aking gunita
di ko malaman kung ako pa ba'y may mapapala
habang iniinit ko ang malamig na kutsinta
o ito'y gawin ko na lang sa bukid ay pataba

iniluluha mo ba'y batong sinlaki ng graba
habang sa isip mo ako'y iyong inaalala
tara, maglibot muna tayo doon sa Luneta
mamasyal kita kahit bulsa'y butas, walang pera

nakikita ko ang lawin doon sa papawirin
ako naman ay tila pipit sa sulok ng hardin
namimilipit na gawa ng asong palamunin
pati na guyam ay nagbabantang ako'y lamunin

tatawirin ko ang pitong ilog na anong lalim
lalakbayin ang pitong bundok na maraming talim
upang hugasan ang salang nagdulot ng panindim
at upang makita ang rosas na nais masimsim

- gregbituinjr.

Build, Build, Build, o PagkaBULID sa dilim?

BUILD, BUILD, BUILD daw itong programa ng pamahalaan
bakit nangyari'y BULID, BULID, BULID sa karimlan
bakit kayrami nang pinaslang sa sawi kong bayan
bakit walang proseso o paglilitis lang naman

BUILD, BUILD, BUILD ngunit nangyayari'y BULID, BULID, BULID
kayrami na nilang sa karimlan ay ibinulid
habang tatawa-tawa lang ang mayayamang ganid
habang tumatangis ang mahihirap na kapatid

Kill, Kill, Kill muna, tapos ay BUILD, BUILD, BUILD ang programa
basta pinapaslang ang mahihirap na puntirya
nahan ang wastong proseso, due process sa biktima?
nahan ang tamang paglilitis, nahan ang hustisya?

ang buhay ng dukha'y paano ba nila mabi-BUILD
kung pulos tulay at kalsada ang laging bini-BUILD
dapat wakasan ang sa dilim biglang pagkaBULID
dapat PANLIPUNANG HUSTISYA'y kanilang MABATID!

- gregbituinjr.

Unawain ang mensahe sa karatula

dalawang bagay: naglagay doon ng paalala
dahil doon palaging nagtatapon ng basura...
o nang-aasar, pagkat kung saan may karatula
aba'y doon pa nilalagay ang basura nila!

mapapaisip ka minsan sa ganitong ugali
ang naglalagay ba ng basura'y tanga o hindi?
kung nasaan ang karatula'y nagtatapon lagi
o hindi raw sila marunong magbasa, kunyari

mga dayo ba sila sa bansa't di maunawa?
ang simpleng paalala't mga payak na salita
anong disiplina mayroon sila't utak biya?
at nagtapon sa harap ng karatulang ginawa

katawa-tawang pangyayari o nakakainis
di malaman kung magagalit ka o bubungisngis
mensahe sa karatula'y igalang nang luminis
ang lugar na iyon, nang basura'y agad mapalis

- gregbituinjr.

Kung langgam ang manggagawa, sino naman ang anay?

Magkaparehong itsura, magkaiba ng kulay
Ang isa'y kaysipag, ang isa'y mapanirang tunay
Kung langgam ang manggagawa, sino naman ang anay?
Ang kapitalista o ang eskirol ang kaaway?

Sa welga, may mga eskirol at may unyonista
Ang pamamalakad ba sa pabrika'y may hustisya?
Lulupigin daw ng eskirol ang mga nagwelga
Aklasang may itinayong piketlayn sa pabrika

Nagwelga ang manggagawa para sa katarungan
At karapatang pantao doon sa pagawaan
Nakikibaka upang welga'y mapagtagumpayan
Gutom man ang abutin sa welga'y tuloy ang laban

Anay na mapanira ba'y sadyang sa uri'y taksil?
Nanonood lang habang karapata'y kinikitil!
Anay na mapangwasak ay paano mapipigil?
Yamang anay na ito sa kapwa nila'y sumiil

- gregbituinjr.

Kinakain na lang sa tuwina'y buntong hininga

kinakain na lang sa tuwina'y buntong hininga
habang isyung salot ay patuloy na binabaka
mukhang bilasang isda na itong aking itsura
kumikilos pa rin kahit gutom ang nadarama
nag-oorganisa pa rin kahit butas ang bulsa

makakaraos din balang araw pag nagtagumpay
kaya magpatuloy lang, tindihan ang pagsisikhay
pag-aralan ang lipunan at magsunog ng kilay
magsuri ng kongkretong kalagayan at magnilay
sa pagkilos, tiyakin din ang kalusugang taglay

alagaan ang katawan kahit na kumikilos
huwag magpabaya kahit tayo'y binubusabos
maghanda't huwag hayaang lagi tayong hikahos
may oras ng paglaban, may oras ng pagtutuos
magtagumpay hanggang bulok na sistema'y magtapos

- gregbituinjr.

Ang alak: noon, ngayon at bukas

noon, pulos pag-iinom ng alak ang prodigal son
ngayon, pag-iinom pa rin ng alak ang kasiyahan
iyang pag-inom ng alak ay isa nang kasaysayan
mula noon, ngayon, marahil hanggang kinabukasan

iyang alak ay instrumento upang makalimot ka
sa mga nararanasan mong samutsaring problema
mayroon nito pag may piging bilang pakikisama
subalit dinudulot nitong saya'y pansamantala

ano nga bang mayroon sa alak upang masiyahan
ito ba'y sagisag na ng lubusang kaligayahan
di ba't sa mga piging lang ito dapat magsulputan
at di batayan upang lumigaya ka sa lipunan

sige, tumagay pa, sa kabila ng mga halakhak
upang makalimot habang gumagapang ka sa lusak
sana'y kwentuhan at tawanan lang ang dulot ng alak
at walang gulong mangyayari nang walang mapahamak

- gregbituinjr.

DOLE, magsilbi sa manggagawa, di sa kapitalista!

panawagan ng manggagawa sa DOLE'y kaybangis
sapagkat manggagawa'y sagad na sa pagtitiis
mga karapatan nila'y lagi nang tinitikis
turing sa kanila'y makina't sila'y tinitiris

mensahe ng obrero sa DOLE sa rali nila:
"aba'y DOLE, ikaw ang sa manggagawa'y ahensya
obrero'y pagsilbihan mo, di ang kapitalista
kaming mga obrero'y iyong bigyang importansya"

sa tawag ng kapitalista, kaybilis ng DOLE
bibigyang importansya ang anumang insidente
pag sa kapitalista, DOLE'y kaybilis magsilbi
marahil, dahil kapitalista'y may pera kasi

aba'y DOLE, di ba't kawanihan ka ng paggawa
kaya magsilbi ka naman sa mga manggagawa
huwag mong hayaang ang obrero'y kinakawawa
dapat kang buwagin kung sa iyo'y walang mapala

- gregbituinjr.
* Nilikha ng makata sa rali ng PAGGAWA (Pagkakaisa ng Uring Manggagawa) sa harapan ng DOLE sa Intramuros, Maynila, Oktubre 22, 2019. Ang mga litrato'y kuha ng may-akda

Naglalakad man ng malayo upang makakilos

naglalakad man ng malayo upang makakilos
ay inoorganisa pa rin ang binubusabos
upang manindigan sa isyu, prinsipyo'y matalos
at ihanda ang api sa mahabang pagtutuos

sa isyung pangkalusugan, tumigil nang magyosi
tuwing umaga'y kontento na sa pakape-kape
alagaan ang katawan na handa pang magsilbi
tiyakin ang seguridad at huwag magpagabi

bilin nila, sa sabi-sabi'y huwag maniwala
baka masadlak sa kumunoy ng mga akala
magsuri ng sitwasyon, bakit may tamang hinala
baka guniguni'y umani ng bangungot, luha

kilo-kilometro man ang lakarin, di susuko
pakaway-kaway man ang dilag, tukso'y nanduduro
malupit man ang kaaway, di papayag maglaho
kikilos pa rin kung may naapi saan mang dako

- gregbituinjr.

Pagpapakatao'y di uso sa kapitalismo

sintigas ng panga ng tigre ang kanilang mukha
na tingin lagi sa manggagawa't dukha'y kaybaba
na walang dignidad ang pagkatao, hampaslupa
na laging mabibiling mura ang lakas-paggawa

kinikita lang ang mahalaga sa mga ito
may laksa-laksang tubo at pag-aaring pribado
mawasak man ang kalikasan, may gintong matamo
animo'y mga bato ang puso sa kapwa tao

turing sa manggagawa'y di tao kundi makina
kontraktwal o regular ay gastos lang sa kumpanya
ganyan mag-isip ang negosyante't kapitalista
tanging tutubuin ang sa kanila'y mahalaga

tao pa rin ba ang ganyang mga uri ng tao
di mahalaga ang pagkatao kundi negosyo
ganyan umiiral ang lipunang kapitalismo
pera ang umiikot, nagsasalita sa iyo

pagpapakatao'y di uso sa sistemang bulok
naghahari ay pera lang hanggang doon sa tuktok
kinikilala'y ginto't salapi ng utak-bugok
kaya sa lipunang kapitalismo, masa'y lugmok

- gregbituinjr.

Mga Pintig ng Diwa

MGA PINTIG NG DIWA

lumalabis ba ako

sa aking pagmamahal

sa mundo at sa iyo

ako’y tila ba hangal

ako ba’y nagkukulang

sa tamis ng pag-ibig

puno’t mga halaman

ay kulang ba sa dilig

pumipintig ang puso

sa buong katauhan

tumitibok ang mundo

pati na kalikasan

kayraming lumilipad

ibon sa papawirin

kayraming mga tamad

katuga sa paningin

itapon ang basura

sa wastong basurahan

mahalin ang kasama

sa pamilya’t tahanan

halina’t makialam

suriin ang paligid

pag itinayo ang dam

buhay nati’t tagilid

huwag tayong mahihiya

kung tayo’y nagprotesta

pagkat ginawa’y tama:

ipagtanggol ang masa

ibulong mo sa akin

kung anong nasa isip

akin iyang diringgin

kahit sa panaginip

- gregbituinjr.

* unang nalathala sa munting pahayagang Diwang Lunti, isyu ng Oktubre 2019, pahina 20

Sige pa, pumatay kayong mga halimaw kayo

sige pa, pumatay kayong mga halimaw kayo
sige pa, mga inosenteng bata'y paslangin n'yo
sige pa, mamaril kayong masangsang na berdugo
sige pa, sundin ang atas ng baliw n'yong pangulo

nangangamoy dugo ang mga berdugong maysala
na krimen sa lipunan ay sadyang kasumpa-sumpa
sige pa, sa inyo, mga nanay ay tuwang-tuwa
ngunit ang totoo, sila'y galit at lumuluha

sige, ipakita n'yo ang krimeng karumal-dumal
kayong nasa kapangyarihan ang dapat isakdal
sige, ipakita ny'ong buhay nila'y pinipigtal
kayong mga nasa poder ang totoong kriminal

sige pa, dugo pa ng inosente'y palutangin
sige, mga walang sala'y walang prosesong kitlin
sige pa, ang karapatang pantao pa'y paslangin
balang araw, mananagot kayo sa bayan natin

- gregbituinjr.
* kinatha sa ikalawang araw ng palihan hinggil sa karapatang pantao, Oktubre 19, 2019

Masangsang ang amoy ng mga berdugo

marami na silang pinaslang na batang inosente
collateral damage lang kung ituring ang nangyari
bata ba'y nagdodroga, nagbebenta, bumibili?
bakit mga bata'y nadadamay sa insidente

peke ang gerang itong walang alam na solusyon
kundi pumatay ng walang proseso, nilalamon
na sila ng sistemang sila rin ay nagugumon
gawang di sibilisado't wala na sa panahon

bakit ba kung sumentensya sila'y napakabilis
para lang silang lumalapa ng asong may galis
kung may sala ay daanin sa wastong paglilitis
huwag bariling animo'y tumitiris ng ipis

amoy ng mga berdugo'y ito'y sadyang masangsang
nakakasuka ang pamahalaang mapanlinlang
wala silang karapatang basta na lang pumaslang
tandaang karapatang pantao'y dapat igalang

- gregbituinjr.
* kinatha sa ikalawang araw ng palihan hinggil sa karapatang pantao, Oktubre 19, 2019 

Halina't tumula't umawit para sa karapatang pantao

manggagawang pangkultura, tayo'y mag-usap-usap
upang gisingin ang pamahalaang mapagpanggap
dahil korporasyon ang lagi nilang sinisinghap
kinakaligtaan ang mamamayang naghihirap

halina't ating isulat ang buhay ng dalita
lalo't biktima ng tokhang at inang lumuluha
bakit karapatang pantao'y binabalewala
bakit walang proseso't binaril ang walang sala

ginawang panonokhang ay sadyang nakagagalit
dahil wala pang sala'y binaril ng malulupit
halina't kwento nila'y ating isulat, iawit
at ipalaganap sa madlang takot pa at gipit

masa'y gisingin mula sa takot at pagkahimbing
kultura ng dahas ay tapusin, gamitin ang sining
itula't awitin ang danas sa kamay ng praning
na pamahalaang wala nang puso ni katiting

- gregbituinjr.
* kinatha sa palihan hinggil sa karapatang pantao, Oktubre 18, 2019 

Gisingin ng sining ang bayang himbing

gumagapang ang sining sa himaymay ng kalamnan
upang sariwain ang mga kwento't karanasan
katas ng pakikibaka'y nasa puso't isipan
na inaadhika ang paglaya ng uri't bayan
mula sa pagsasamantala ng tuso't gahaman

gagamitin ang sining upang bayan ay magising
didilat sila mula sa matinding pagkahimbing
aawitan ng mga tinig na tumataginting
tutulain ang talinghaga ng walang kasiping
babakahin yaong bundat na laging nagpipiging

itong sining ang instrumento ng pakikibaka
adhikain ay ipalalaganap sa tuwina
prinsipyo't layunin ay itataguyod sa masa
tutula, dudula, aawit, mag-oorganisa
ililinaw sa madla ang mga isyu't problema

halina't likhain na ang sining para sa madla
mapagpalayang sining para sa nagdaralita
rebolusyonaryong sining ng uring manggagawa
halina't kathain ang sining na mapagpalaya
upang mabago ang lipunang bulok at kuhila

- gregbituinjr.

Naaalala kita sa sandaling pagkalugmok

naaalala kita sa sandaling pagkalugmok
dahil naninibasib pa rin ang sistemang bulok
at amoy-asupre pa rin ang namumunong bugok
habang hiyaw ng hustisya sa puso'y kumakatok
habang naaalala ka sa kabila ng antok

bugbog man ang aking katawan sa laksang pagkilos
sinusuri ang kalagayan at pambubusabos
ng sistemang kaysaya pag maraming dukha't kapos
sa pagpapasiya'y huwag tayong padalus-dalos
habang nasa diwa'y sistemang bulok ay matapos

halina't ibagsak pa rin ang bulok na sistema
at pag-usapan muli ito pag tayo'y nagkita
halina't kumilos laban sa mapagsamantala
obrero'y organisahin tungong pagkakaisa
hanggang sa magtagumpay tayo, O, aking kasama!

- gregbituinjr.

Tula laban sa proyektong Kaliwa Dam

nagmamarka ang bangis ng mga nagkakanulo

upang katutubo'y itaboy sa lupang ninuno

upang proyektong Kaliwa Dam ay mabigyang-daan

upang magkaroon ng tubig ang Kamaynilaan

kahit na lulubog ang maraming nayon at bayan

proyektong Kaliwa Dam ay paano masusugpo

upang di mawasak ang tahanan ng katutubo

pigilan ang proyektong dahilan ng kasiraan

ng kalikasan, kapaligiran, at kalinangan

lupang ninuno'y kultura, buhay, dangal, tahanan

proyektong Kaliwa Dam dapat tuluyang maglaho

upang mga katutubo'y di siyang mabalaho

ang katutubo'y ating kapatid, may karangalan

kapatid ay di dapat pinagsasamantalahan

ng sinumang ganid at mayayaman sa lipunan

huwag nating hayaang tayo'y dinuduro-duro

ng mga taong mapagpanggap at mapagkanulo

di na dapat matuloy ang proyektong Kaliwa Dam

sa isyung ito'y makibaka tayo't makialam

upang mga sunod na salinlahi'y di magdamdam

- gregbituinjr.

* nilikha ng makata at binasa sa rali sa harap ng Department of Environment and Natural Resources (DENR), Oktubre 16, 2019, kasama ang iba't ibang grupong kabilang sa Stop Kaliwa Dam Network, tulad ng Philippine Movement for Climate Justice (PMCJ), Freedom from Debt Coalition (FDC), Haribon Foundation, Sanlakas, Kongreso ng Pagkakaisa ng Maralitang Lungsod (KPML), mga katutubo mula sa Daraitan, at marami pang iba.

* unang nalathala sa munting pahayagang Diwang Lunti, isyu ng Oktubre 2019, pahina 20
* nalathala sa publikasyong Taliba ng Maralita, ang opisyal na pahayagan ng Kongreso ng Pagkakaisa ng Maralitang Lungsod (KPML), isyu ng Oktubre 16-31, 2019, p. 20

Pagtitig sa kisame

sa kisame kadalasan ay nakatitig man din
nakatingala, nagmumuni, anong kakathain
di tutunganga sa papel pag walang sasabihin
basta may isyu'y di mawawalan ng susulatin

luminga-linga ka, makinig, ang mata'y imulat
ano kayang mga lihim ang iyong mabubuklat
sa iyong mga nasagap na pangyayari't ulat?
may parang tae kayang sa mukha mo'y sasambulat?

maraming dapat isiwalat na isyung pambayan
baho ng pulitiko, korupsyon, katiwalian
sinu-sino ba ang mapagsamantalang iilan?
at sino naman ang nabubuhay sa karukhaan?

dahil ba sa negosyo'y walang pagpapakatao?
dignidad ba ng kapwa'y tinatapatan ng presyo?
nakatitig sa kisame't napapailing ako
mga iyon ba'y isusulat sa papel na ito?

- gregbituinjr.

Kinakatha kita sa panahong di matingkala

kinakatha kita sa panahong di matingkala
nasa puso kita't diwa, O, aking minumutya
ano bang pinagkaisahan natin at adhika
upang magpasyang magsama sa gawaing dakila

kinakatha kita bilang amasonang huwaran
maalindog, matapang, kayumangging kaligatan
sa pusong ito'y kapilas ka't di basta maiwan
sa tuwina'y magkasangga sa anumang larangan

kapwa kita tibak, may lasa pa ba ang pag-ibig?
gaano kaya katamis ang ating pagniniig?
umawit ka, diwatang mutya't ako'y makikinig
nahahalina ako sa anong ganda mong tinig

sadyang kayganda ng adhika mo para sa masa
kaya sinasamahan kita sa pakikibaka
ikaw lamang ang aking natatanging amasona
na dito sa puso't diwa ko'y aking sinisinta

- gregbituinjr.

Parang tinatakpan ng kung sino ang aking mukha

parang tinatakpan ng kung sino ang aking mukha
tila siya'y nakangiti upang di mahalata
nagbabalik ba ang tortyurer sa aking gunita
dibdib na'y nagsisikip, di makahinga, tulala

ito ba'y palatandaan ng anumang parating
kaya di ko na magawa ang maghanda ng piging
baka dapat paghandaan ang parating na libing
ng kung sinong di ko alam ngunit siya'y magaling

isa ba akong makata, tanong ni Kamatayan
habang maso'y aking hawak, karit ang kanyang tangan
naghahanda ba kami sa matinding sagupaan
sinong magtatagumpay sa parating na labanan

tutunggaliin natin anumang pambubusabos
upang karapatang pantao'y di basta mabastos
dapat nating paghandaan ang parating na unos
at baka makaligtas sa kanilang pang-uulos

- gregbituinjr.

Kami'y aktibista

Kami'y aktibista, naglilingkod sa uri't bayan
Aktibistang marangal, may prinsipyo, lumalaban
Magiting sa harap ng pagsubok, naninindigan
Iniisip lagi'y kagalingan ng sambayanan

Yamang wala kaming mga pag-aaring pribado
At naniniwalang dapat pantay lahat ng tao
Kumikinang na ginto'y walang halaga sa mundo
Tanging mahalaga'y maglingkod, pagpapakatao

Iorganisa natin ang hukbong mapagpalaya
Bulok na sistema'y ibasura ng manggagawa
Igiit nating dapat kalagin ang tanikala
Sosyalismo'y itayo, kapitalismo'y isumpa

Tibak kaming nais palitan ang sistemang bulok
At ilagay na ang dukha't manggagawa sa tuktok

- gregbituinjr.

Ang pagtula ko sa rali'y alay sa uri't bayan

ang pagtula ko sa rali'y alay sa uri't bayan
kung may mag-iimbita, agad kong pauunlakan
kaya aaralin ang isyu't pagtingin ng tanan
mga isyu't tindig ay itutula sa lansangan
ipakikitang naaapi'y kakasa sa laban

kaya bukas akong anyayahan upang tumula
sa iba't ibang pagkilos ng manggagawa't dukha
anumang isyu, tubig, kuryente, sweldong kaybaba
karapatang pantao, tokhang, utang, klima, baha
pagsasamantala sa masa ng trapong kuhila

pagtula na ang isa sa niyakap kong tungkulin
susuriin ang sistemang ating kakabakahin
kakatha, titindig, sa bawat isyung kaharapin
kabulukan ng sistema'y ating tutuligsain
bawat tula'y may tindig, sa lansangan bibigkasin

sa bawat tula, nais kong bigyang-sigla ang masa
upang magmulat, magpakilos sa isyu't problema
upang labanan ang sistemang mapagsamantala
anyayahan nyo ako sa bawat raling ikasa
at asahan nyong di kayo bibiguin, kasama

- gregbituinjr.

Magastos magkasakit kaya bawal magkasakit

Mahal magkasakit, subalit mura magpalibing...
Kaya sa dalawa, ano ba ang wastong piliin?
Yaong pangmayaman, o pangmahirap na gastusin?
Mahal magkasakit kaya dapat kang magpagaling!

Depende, kung ano bang kaya nitong bulsang butas
Ang bumili ng mamahaling bitamina't ubas
Habang dukha'y bibili lang ng mumurahing prutas
At kakain ng tuyo't gulay upang magpalakas.

Mahal magkasakit dahil mahal magpaospital
Gamot sana ang mga kwentuhan, kape't pandesal
Kumain ng hapunan, tanghalian at almusal
Dahan-dahan lang nang di mabulunan at humingal.

Magastos magkasakit kaya bawal magkasakit!
Kaya ito ngayon ang ating sinasambit-sambit
Halina't maayos na kalusugan ay igiit
Upang iwing buhay, di agad mapunta sa bingit.

- gregbituinjr.

Pagguho ng bundok ng mga pangarap

Kayrami nang gumuhong bundok ng mga pangarap
Nang manalasa ang tokhang ng mga mapagpanggap
Walang anumang proseso, di man lang kinausap
Kahit bata'y kanilang binaril nang walang kurap!

Nilapa ng leyon ang mga inosenteng tupa
Ang pagkatao'y niluray ng pangil ng buwaya
Lason nga nila'y sintindi ng kamandag ng kobra
Kapara nila'y aswang na sumila sa biktima!

Maraming mailalarawan sa mga berdugo
Hayop na nananagpang ngunit sila'y tao! Tao!
Nasaan ang pagkatao ng mga taong ito?
Mamamaslang na lang kahit walang sala o kaso!

Gumuhong bundok ang pangarap nitong mga paslit
Ang pagkamatay nila'y di tadhanang iginuhit
Kundi dulot ng bulok na sistemang anong lupit
Nangyari sa mga musmos ay nakapagngangalit!

Tiyak may magagandang pangarap ang mga bata
Ngunit wala na iyon, pangarap nila'y sinira!
Pagkat pinagpuputol na ng mga walang awa,
Ng mga berdugong anyong tao't pawang kuhila!

- gregbituinjr.

Sa iyo, Ka Pedring, taas-kamaong pagpupugay!

Siya'y anong talas mag-isip, di nagpapakahon

Inalam ang samutsaring isyung napapanahon

At sinuri ang lipunang kinasadlakan noon

Nais niyang sa hirap, maralita'y makaahon

Lider-maralitang magiting, Ka Pedring Fadrigon

Matagal nang kasama sa maraming tunggalian

Sa palengke, sa barangay, o sa komunidad man

Inaayos ang gusot, ang mali'y nilalabanan

Inalay ang panahon at buhay sa uri't bayan

Kasamang tunay sa pakikibaka sa lansangan

Sadyang mahusay na ama sa kanyang mga kawan

Si Ka Pedring ay magaling na lider-maralita

Nirerespesto ang diwa niyang mapagpalaya

Kumikilos, nakikibaka, di basta ngangawa

Sa anumang problema'y nagsusuri, naghahanda

Nang maigpawan ang anumang dumatal na sigwa

Sa iyo, Ka Pedring, taas-kamaong pagpupugay!

Para sa amin, ang iyong diwa'y di mamamatay

Sa puso't isip nami'y mananatili kang buhay

Maraming salamat sa panahon mong inialay

Maraming salamat sa mga gabay mo't patnubay

Ang sigaw namin: Mabuhay ka, Ka Pedring! Mabuhay!

- gregbituinjr.

* Si Ka Pedring Fadrigon (May 18, 1945 - October 6, 2019) ang aming pangulo sa Kongreso ng Pagkakaisa ng Maralitang Lungsod (KPML)

* Nalathala sa publikasyong Taliba ng Maralita, ang opisyal na pahayagan ng Kongreso ng Pagkakaisa ng Maralitang Lungsod (KPML), isyu ng Oktubre 1-15, 2019, p. 20

Ang Taliba ng KPML

ANG TALIBA NG KPML

pahayagang Taliba
babasahin ng masa
nilalabanan nila
ang bulok na sistema

isyu't mga balita
hinggil sa maralita
ito'y nilalathala
para sa kapwa dukha

balitang demolisyon
ulat sa relokasyon
dukha'y ibinabangon
upang mag-rebolusyon

kapwa maralita ko
itaguyod ang dyaryo
Taliba'y kakampi nyo
sa samutsaring isyu!

ilathala ang tindig
tayo'y magkapitbisig
mapang-api'y mausig
at sila na'y malupig

dyaryong nanghihikayat
na tayo'y magsiwalat
mahirap ay imulat
laban sa tusong bundat

halina't suportahan
ang ating pahayagan
na adhikaing laman:
baguhin ang lipunan!

- gregbituinjr.
* nalathala sa pahayagang Taliba ng Maralita, publikasyon ng KPML (Kongreso ng Pagkakaisa ng Maralitang Lungsod), isyu ng Oktubre 1-15, 2019, p. 20

Sa pagtawid ng Beatles

Dapat tumawid sa tamang pedestrian
Wastong mensahe ng kanilang larawan
Mabuhay ang Beatles sa pag-aawitan
May henerasyong buo ang kasiyahan
- tulanigregbituinjr.

Halina't ating itaas ang kaliwang kamao!

Halina't ating itaas ang kaliwang kamao!
Habang inaalala ang niyakap na prinsipyo
Habang ninanamnam ang pangarap na sosyalismo
Habang inoorganisa ang maraming obrero
Habang inaawit yaong 'Lipunang Makatao'

Kaliwang kamao'y sabay-sabay nating itaas!
Habang unyon ng manggagawa'y nagsisipag-aklas
Habang nasa diwa'y inosenteng batang inutas
Habang tinotokhang ng walang proseso ang batas
Habang problema ng bansa'y paano nilulutas

Halina't kaliwang kamao'y itaas na natin!
Habang hinahanap ang lamok na dapat purgahin
Habang yema'y iniisip paano babalutin
Habang libag sa singit ay paano hihiludin
Habang butas na medyas ay paano susulsihin

Kuyom ang kamaong itaas natin ang kaliwa!
Habang inoorganisa ang uring manggagawa
Habang magbubukid ay nag-aararo ng lupa
Habang sinusuri paano aalpasan ang sigwa
Habang binabagsak ang sistemang kasumpa-sumpa

- gregbituinjr.

Butas na ang bulsa, butas din ang suot na medyas

Butas na ang bulsa, butas din ang suot na medyas
Di na mawari ang kalagayan sa Pilipinas
Sa lansangan ay kayraming inosenteng inutas
Habang ina'y lumuluha sa mapait na danas

Butas na nga ang medyas, aba'y butas din ang bulsa
Gaano man magsikap, buhay pa ri'y nasa dusa
Sweldo'y kaybaba, lakas-paggawa'y binabarat pa
Habang may natutuwang may tokhang, itinutumba

May mahilig mangulangot, pinapahid sa pader
Habang tulala sa ginagawa ng nasa poder
Kayraming gago, tiwali, gahaman, ala-Hitler
Ganyan na sa bayan ko, karapata'y minamarder

Butas na medyas ba'y pagtitiyagaang tahiin?
O palitan na lang ito't bagong medyas ay bilhin?
Lugmok na bayan ko'y paano ba pababangunin?
Kung malalim ang baha'y paano patatawirin?

- gregbituinjr.

Aanhin pa raw ang damo kung patay na ang adik

Aanhin pa raw ang damo kung patay na ang adik
Nakahandusay sa daan, ang mata'y pinatirik
Ginawang krimen ay hinuhugasan lang sa putik
Mga tinuring na salot ay pinaslang ng lintik
Gutom ba sa damo ang mga adik na pinaslang?
At ang bituka ba ng mga tulad nila'y halang?
Kinunsinti ba sila ng pamilya't hinayaan?
Upang makadama pa rin ng pag-ibig ang hunghang?
Laging bangag araw at gabi, ano bang problema?
Ang tulad ba nila'y tamang patayin na lang basta?
Na karapatang pantao'y binabalewala na?
Ganitong pagtokhang sa masa'y bakit nanalasa?
Oo, tokhang ay maling prosesong dapat pigilin!
Tokhang ay salot tulad ng adik sa bayan natin!

- gregbituinjr.

Awiting Pampamanhid

Oktubre pa lang ngunit pinatutugtog na naman
Ang mga pampamanhid sa kaluluwa ng tanan
Malapit na raw kasi ang araw ng kapaskuhan
Di pa man nag-uundas, tayo raw ay magbigayan
Habang may pagsasamantala pa rin sa lipunan!

Awiting pampamanhid upang mapukaw ang masa
Upang problema'y makalimutang pansamantala
Upang makahiram ng pansamantalang ligaya
Paalalang mag-ipon ng pangregalo sa sinta
Awitin ng komersyalismo upang makabenta

Kahit kapakuhan, may pagsasamantala pa rin
Pampamanhid lamang ang panahong iyon sa atin
Ang pribadong pag-aaring sanhi ng hirap natin
Ay nariyan pa't obrero't dukha'y mahirap pa rin
Sanhi ng hirap na ito'y dapat nating wasakin

Pag kapaskuhan, tigil-putukan ang lupa't tuktok
Matapos ang pasko'y banatan na naman sa bundok
Di pa rin malutas ang sanhi ng dusa't himutok
Hangga't may pribadong pag-aaring sanhi ng lugmok
Ang pribadong pag-aaring sinasamba ng ugok!

Oktubre pa lang, awiting pampamanhid na'y hatid
Magmahalan daw tayo't magturingang magkapatid
Habang patuloy ang tokhang, buhay ay pinapatid
Habang pribadong pag-aari'y sandata ng ganid
Habang kapwa'y pinapaslang, sa lagim binubulid.

- gregbituinjr.

Wala na ang amasonang pinangarap ko noon

tinumbok ko ang hamon ng isang malditang manhid
siya'y kasamang nakilala sa malayong bukid
na salita'y kaya niyang ipaglubid-lubid
isang kasama, dilag na tinuring kong kapatid

tulad ko, isa rin siyang aktibistang Spartan
na sinanay upang depensahan ang uri't bayan
ang amasonang pinangarap kong maging katipan
siya'y manhid, hanggang ako'y mag-asawang tuluyan

nasa malayo na siya't kinalimutan ko na
ano't nais niyang sa akin na'y makipagkita
may asawa na ako, siya'y matandang dalaga
tanging nasabi ko sa kanya, wala na bang iba

noon, siya ang amasonang aking pinangarap
na makasama habambuhay sa dusa at hirap
ngayon, may asawa na ako't kinasal nang ganap
at aking tinanggap ang buhay na aandap-andap

wala na ang amasonang pinangarap ko noon
pagkat bagong amasona ang kasama ko ngayon
magkasamang babaguhin ang lipunang nilamon
ng kapitalistang sistemang dapat nang ibaon

- gregbituinjr.

Pagninilay sa alon

dapat akong magsipag upang umayon ang lahat
bakasakaling malutas ang problemang kaybigat
kumikilapsaw man sa diwa ang tabsing sa dagat
babayuhin pa rin ang pinipig nang walang puknat

dapat din akong mag-ingat sa pagsabay sa alon
bakasakaling makuha ko sa patalon-talon
sa pagharap sa buhay, dapat maging mahinahon
maiksi man ang kumot o maiksi ang pantalon

natutong lumaban sa mabangis na kalunsuran
natutong ipaglaban ang pantaong karapatan
nilalabanan ang mapagsamantala't gahaman
balak ay kalusin ang mapang-api sa lipunan

dapat nang organisahin ang inaaping masa
habang isinasapuso ang panawagan nila:
"Sobra na! Tama na! Ibagsak na ang diktadura!"
"Palitan na ang mapang-api't bulok na sistema!"

- gregbituinjr.

Tuyo man at kamatis ang handa sa kaarawan

tuyo man at kamatis ang handa sa kaarawan
ang mahalaga, araw mo'y pinahahalagahan
sintigas man ng bato ang mukhang walang anuman
sa pisngi'y sintapang man ng apog ang kakapalan
araw iyon ng pagdiriwang, dapat masiyahan

handa man sa kaarawan ay tuyo at kamatis
mahalaga'y kumakain ka ng di pa napanis
di baleng walang litson, kaya pa namang magtiis
pag may dumalaw na lamok, dapat iyong mapalis
pag may lisa sa anit, aba'y dapat mong matiris

sa kaarawan man ang handa'y kamatis at tuyo
ang mahalaga, pagmamahal mo'y di naglalaho
tulad ng lawin ay tumingin sa lahat ng dako
baka matanaw mong kayraming pangakong napako
lalo na sa mahal mong dilag na iyong sinuyo

- gregbituinjr.

Matatanggap mo ba ang tulad kong tibak?

Kaiba ako, tulad ko ba'y matatanggap mo rin?
Aktibista akong may prinsipyadong simulain
Na babaguhin ang sistemang dapat lang kalusin
Na lipunang makatao'y itayo't palawakin

Aba'y ayoko sa sistemang mapagsamantala
Na kayliit ng pagtingin sa manggagawa't masa
Ayoko sa mapang-aping burgesya't elitista
Na di maipagmalaki ang manggagawa nila

Tanong: Kaya mo bang tanggapin ang tulad kong tibak?
Na kumikilos kaharap man ay kanyon at tabak
Na nag-oorganisa pa rin kahit nakayapak
Na masa'y dedepensahan gumapang man sa lusak

Ang tulad kong aktibista'y iyo bang matatanggap
Na makataong lipunan ang hinabing pangarap
Na lalabanan ang mga tiwali't mapagpanggap
Na kaisa ng uring manggagawa't mahihirap

Tanggapin mo ang tulad kong tibak, iba man ako
Na tingin ng marami sa bayan ay nanggugulo
Gayong kami'y naritong may marangal na prinsipyo
Upang pagsasamantala'y mawala na sa mundo

- gregbituinjr.

Sigaw ng mga hayop: "Mga Tao kayo!"

SIGAW NG MGA HAYOP: "MGA TAO KAYO!"

nag-usap ang iba't ibang uring hayop sa pulong
sa pagkasira ng kalikasan, kayraming sumbong:
sabi ng isa: " Di ba dapat progreso'y pasulong?"
tanong pa: "Bakit nangyayari sa mundo'y paurong?"
anila: "Matatalinong tao'y nahan ang dunong?"

kaya kinausap ng mga hayop itong Tao:
"Kayong tao'y mga nilalang na matatalino.
Nasa inyo ang tungkuling alagaan ang mundo.
Bakit n'yo winawasak ang daigdig nating ito?
Ginawang basurahan. Tapon doon, tapon dito!"

"Kinakain ng mga ibon ang inyong kinalat.
Kinakain ng mga isda ang plastik sa dagat.
Namatay yaong balyenang sa basura nabundat.
Sinisira n'yo pati na tahanan naming gubat.
Kung makapagmura kayong 'Hayop!', nagdudumilat!"

"Aba'y nananahimik kaming mga hayop dito.
Pag kayo'y nag-away, sigaw n'yo: 'Mga hayop kayo!'
Pag sinisisi ang kapwa n'yo: 'Mga hayop kayo!'
Di naman kami ang sumisira sa ating mundo!
Dapat sisihin dito'y kayo: 'Mga Tao kayo!"

- gregbituinjr.

Ako'y bahagi ng Generation X, sabi nila

Ako'y bahagi ng Generation X, sabi nila

ako'y bahagi ng Generation X, sabi nila
zodiac sign ay unggoy, horoscope naman ay Libra
isinilang ng Miyerkules, at leap year din pala
kamatayan ni Marcel Duchamp, magaling magpinta
pinaslang din ang mga estudyanteng nagprotesta

kasabay kong isinilang ay marami rin naman
na tulad ko'y nagsikap din sa kanilang larangan
si Angelo Arvisu na kaklase ko sa Letran
si Benjie Paras, artista't sikat sa basketbulan
mayroon ding kasabay mula ibang bansa naman

isa'y si Glen Wesley, coach sa Boston at Carolina
pati ang Czech tennis player na si Jana Novotna
si Mark Crear, Olympic Athlete na mula California
si Jeff Martin na mang-aawit mula sa Canada
at si Victoria Derbyshire ng radyo sa Britanya

nawa tulad nila'y makamit ko rin ang tagumpay
kaya pinagsisikapan ko bawat pagninilay
upang makalikha ng mga tulat't akdang alay
sa sambayanang ninanasa'y pag-asa at buhay
ika nga, ang makata'y isang libo't isang panday

- gregbituinjr.
10.02.2019

Pagtingala sa kisame

lagi na lang akong nakatingala sa kisame
tila binabasa roon ang anumang mensahe
tila pinanood din ang samutsaring insidente
upang makatha ko ang iba't ibang anyo't siste

ang kisame'y binubuo ng may pinturang tabla
may ilaw sa gabi, patay ang ilaw sa umaga
gumagapang na butiki'y tila ba nagtataka
baka umano siya'y aking pinanonood na

minsan, minsan lang naman, sa kisame'y may hiwaga
maraming mangangathang sa kanya'y nakatingala
naghahanap ba sila ng anumang himala
o naghahagilap ng kataka-takang kataga

dapat kathain ang maitutulong sa lipunan
upang mapaginhawa ang buhay ng mamamayan
pagtingala sa kisame'y isang palatandaan
ng palaisip, ng kaisipan, ng kabaliwan

- gregbituinjr.

Tula sa katuga

sasakit din ang tiyan niyang buwitreng katuga
na bisyo'y kumain, lumamon, matulog, gumala
sadya bang tamad ang katuga (kain, tulog, gala)
di man lang tumulong sa nanay na kaawa-awa

marami nang dusa't sakripisyo ang kanyang nanay
upang mapalaki't mapag-aral lang siyang tunay
ngunit anong ginagawa niya, magpahingalay
araw-gabing kain, tulog, gala, lagi nang tambay

masaya na kaya siyang tawaging palamunin
na walang maitulong sa kanyang inang sakitin
sa tulad niya, gobyerno ba'y anong tamang gawin
upang di siya maging katuga't pulubing kanin

kung ikaw ang tinamaan ng pasaring na ito
pasensya dahil nais lang naman kitang matuto
sana'y magising ka na't tulungan mo ang nanay mo
bago pa man mahal mong ina'y mawala sa mundo

- gregbituinjr.