Sa huling araw ng Hunyo

SA HULING ARAW NG HUNYO

katapusan na ng buwan ng Hunyo

aba'y kalahating taon na tayo

kulang pa ba ang sweldo ng obrero

ngayon ba'y kontraktwal pa rin ang uso

at mareregular pa kaya sila

kung dupang pa rin ang kapitalista

kongreso'y tadtad pa ba ng buwaya

trapo'y nang-uuto pa ba ng masa

uso pa rin ang kontraktwalisasyon

kapitalista'y sa ganyan nagumon

sa maralita'y panay ang ebiksyon

at nagpapatuloy ang demolisyon

mga bundat pa rin ang nasa tuktok

habang dalita'y lagi pa ring lugmok

sa kahirapang abot na sa rurok

ah, palitan na ang sistemang bulok

dapat walang pribadong ari't yaman

na dahilan ng laksang kahirapan

dapat walang mahirap o mayaman

dapat pantay ang lahat sa lipunan

dapat magkaisa ang manggagawa

bilang uri, kasama na ang dukha

dapat na sila'y magkaisang diwa

upang bagong mundo'y buuing sadya

- gregoriovbituinjr.

06.30.2023

Sa ika-10 anibersaryo ng aking tatô

SA IKA-10 ANIBERSARYO NG AKING TATÔ

"Always Somewhere" ang tanging nakasulat

na tatô sa kaliwa kong balikat

sandekada nang naukit sa balat

kasama sa pagkatha't pagmumulat

nagunita ko kung kailan iyon

Hunyo Bente Nuwebe'y petsa niyon

na kapara ang sukat ng balisong

ang tatô ko'y sampung taon na ngayon

mula sa pamagat ng isang kanta

na ang liriko'y kahali-halina

"I'll be back to love you again" ang isa

at "Always somewhere, miss you where I've been" pa

sa isang kasama ipinatatô

dinisenyo kong may ukit na puso

marahil tanda ng aking pagsuyo

"I'll be back" upang pagsinta'y mabuo

"Always somewhere", maraming napuntahan

may Climate Walk na mahabang lakaran

mula sa Luneta hanggang Tacloban

at Paris, Thailand, Tsina, Burma, Japan

naging laman din ng maraming rali

sa lansangan, bangketa, tabi-tabi

sa maraming isyu'y di mapakali

pagkat tibak na Spartan, ang sabi

bagamat malabo na kung tingnan mo

ay di ko buburahin ang tatô ko

kaakibat na nito'y pagkatao

dahil manlalakbay akong totoo

- gregoriovbituinjr.

06.29.2023

20% discount ng magasin

20% DISCOUNT NG MAGASIN

buti't may twenty percent discount sa Enrich magazine

pag may Mercury Drug SukiCard ka'y tatamasahin

aba'y kinse pesos talaga'y malaking tipid din

sa pasaheng minimum, may tatlong piso ka pa rin

seventy five pesos, glossy, makapal, may diskwento

tiyak na sixty pesos na lang ang babayaran mo

colored pa ang bawat pahina at mga litrato

may dagdag kaalaman ka pa sa mga health issue

buti't magasing ito'y nakita sa Mercury Drug

na naka-displey, sa iskaparate nakalatag

magasing pangkalusugan upang tayo'y tumatag

sa anumang nadaramang sakit ay mapanatag

ang Enrich magazine ay malaking tulong talaga

nang mga usaping pangkalusugan ay mabasa

na pangangalaga sa sarili ay mahalaga

salamat, dagdag kaalaman ay naging pag-asa

- gregoriovbituinjr.

06.29.2023

* mga litrato ay isyu ng May 2023 at June 2023 ng buwanang Enrich magazine

Huwag mong iwan sa initan ang magnifying lens

HUWAG MONG IWAN SA INITAN ANG MAGNIFYING LENS

huwag mong iwan sa initan ang magnifying glass

o magnifying lens kung ayaw mong masunugan ka

iyan ang payo ng matatanda't isip ay bukas

upang bahay at buhay ay maingatan tuwina

na pag natamaan ng araw ang ubod o gitna

ng magnifying lens at namuro sa isang bagay

tiyak na sisiklab iyon nang walang patumangga

na maaaring ikasunog ng buo mong bahay

ilang beses na bang ang sinding kandila'y naiwan

may namatay nang sa apoy, ang bahay ay natupok

kayraming nagkasunog dahil sa kapabayaan

sa balitang sunog, dapat ganito'y inaarok

upang di ito maulit o mangyari sa atin

kaya dapat makiramdam ka lagi sa paligid

dapat pamilya'y protektahan, ingatan, isipin

maging maagap, upang sa sunog ay di mabulid

- gregoriovbituinjr.

06.27.2023

Brian Jansen Vallejo, 13, Pinoy sipnayanon

BRIAN JANSEN VALLEJO, 13, PINOY SIPNAYANON

sa batang gulang pa lamang na labingtatlo

ay sumikat na si Brian Jansen Vallejo

di lang siya magaling sa mga numero

kundi maraming award pa'y tinanggap nito

sa Sarrat National High School ay estudyante

ng Grade 7, sa numero'y nahilig, sabi

sa mga kumpetisyon talagang sumali

unang gintong medalya nga'y kanyang nadale

sa Thailand International Math Olympiad

pati na roon sa Big Bei Math Olympiad;

Philippine International Math Olympiad

at HongKong International Math Olympiad

taasnoong pagpupugay sa sipnayanon

o mathematician sa kanyang nilalayon

dangal ng paaralan, tunay na may misyon

bukod kay Brian, may pito pang mathletes doon:

Arianne Rasalan, Allen Iver Barroga,

Natalie Balisacan, Zyrene Angelica

Dulluog, Mar Leon Malvar, Maria Cassandra

Duque, Jushiem Barroga ang ngalan nila

sa mga sipnayanon, mabuhay! mabuhay!

paabot nami'y taospusong pagpupugay!

ang sipnayan ay pag-igihan ninyong tunay

at magpatuloy kayo't kamtin ang tagumpay!

- gregoriovbituinjr.

06.27.2023

* sipnayan - mathematics

* sipnayanon - mathematician

* ulat at detalye mula sa https://www.pep.ph/lifestyle/extraordinary/173962/brian-jansen-vallejo-math-wizard-ilocos-norte-a4888-20230617

Nagdidilim ang langit

NAGDIDILIM ANG LANGIT

nagdidilim ang langit

may parating na bagyo

sakali mang magngalit

dulot nito'y delubyo

ang bubong kung may butas

ay agad nang tapalan

pag umulan tatagas

sa loob ng tahanan

kung babaha, itaas

ang mga kagamitan

magpayong kung lalabas

o magbota rin naman

kung hangin na'y lumakas

at bumuhos ang ulan

sana po kayo'y ligtas

bumaha man sa daan

- gregoriovbituinjr.

06.22.2023

Isang kaso ng OSAEC

ISANG KASO NG OSAEC

isa pang kaso ng OSAEC ang napabalita

o Online Sexual Abuse and Exploitation of Children

sa sex video chat, ina'y ginamit ang mga bata

buti't ang nanay, ayon sa ulat, ay nahuli rin

upang magkapera lang, pinagsasamantalahan

ang mga anak, na katwiran, di naman nahipo

ang katawan ng anak kundi pinanood lamang

ganito ba'y tamang katwiran, nakasisiphayo

kayraming ikakaso sa nanay na siyang utak:

Anti-Online Abuse and Exploitation of Children Act,

ang Anti-Child Abuse Law, ang Cybercrime Prevention Act,

pati na Expanded Anti-Trafficking in Persons Act

dapat batid ng mamamayan ano ang OSAEC

ganitong krimen sa batas natin na'y natititik

parang halik ni Hudas ang sa anak binabalik

habang sa pera ng kostumer ay sabik na sabik

- gregoriovbituinjr.

06.22.2023

* mga ulat mula sa pahayagang Pang-Masa, Hunyo 22, 2023, p. 1-2, at Pilipino Star Ngayon, Hunyo 22, 2023, p. 1 at p. 8

Utitab

UTITAB

sa krosword, luha sa itim ng mata ang utitab

habang sa isang diksyunaryo, uhog ang utitab

may luha sa puti ng mata at itim sa mata

habang ang isa'y salitang gamit sa medisina

magkaiba ng kahulugan, alin ba ang tama

pareho mang likido, iba ang uhog sa luha

gayunpaman, mga ito'y dagdag na kaalaman

sa akda'y magagamit, di man magsingkahulugan

pag nirambol ang UTITAB, makukuha'y BATUTI

di kaya rito galing ang ngalang Huseng BATUTE

makatang may luha sa itim ng mata ang tula

o kaya makatang ito'y uhugin noong bata

ngunit makapagpapatunay ng ganito'y sino

kung utitab ba'y Batute, ay, naisip lang ito

- gregoriovbituinjr.

06.21.2023

* krosword mula sa pahayagang Pilipino Star Ngayon, Hunyo 21, 2023, p.10

* mula sa UP Diksiyonaryong Filipino, p. 1312

Hina, Hinala, Hinalay

HINA, HINALA, HINALAY

aba'y grabe ang balitang iyon
dalagang labingsiyam na taon
yaong "hinihinalang hinalay
itinali sa puno, pinatay"

sinamantala ang kahinaan
ng mutyang marahil walang muwang
na mangyayari iyon sa kanya
gayong pupuntahan ay pagsamba

bakit kaya ang dalagang iyon
ay pinaslang ng pagayon-gayon
sinumang gumawa'y walang budhi
sa mundo'y di dapat manatili

dapat ang salarin na'y madakip
ang kanyang mundo na'y sumisikip
tiyak, nagmamahal sa biktima
ngayo'y humihiyaw ng hustisya!

- gregoriovbituinjr.
06.21.2023

* ulat at larawan mula sa pahayagang Pilipino Star Ngayon, Hunyo 20, 2023

Di Reyna kundi Diwata

DI REYNA KUNDI DIWATA

di ako mahilig sa reyna ng kanluran

bagamat may reyna tayo sa santakrusan

mas Diwata kung patungkol sa paraluman

na nasa ating katutubong panitikan

sa pagkatha man ng sanaysay, kwento't tula

iniiwasan kong bida yaong kuhila

walang hari, walang pari, walang banyaga

kundi bayani'y katutubo at diwata

tayo nama'y walang kaharian o reyno

na pinamumunua'y karaniwang tao

lipunang makatao'y nais ko sa kwento

at walang uring mapagsamantala rito

katha'y di isang bida kundi taumbayan

ang sambayanang kolektibong lumalaban

binabaka ang mapang-api sa lipunan

naghahandang talunin ang mga gahaman

kaya heto, tumutula na namang muli

para sa isang Diwatang kasamang lagi

sinasaka ang bukirin ng tuwa't hapdi

upang itanim sa lupa'y mabuting binhi

- gregoriovbituinjr.

06.20.2023

Bayad muna bago selfie

BAYAD MUNA BAGO SELFIE

minsan, sumakay ng traysikel puntang Mandaluyong

upang daluhan ang isang tinakdang pagpupulong

may paskil doong unawa kahit ng di marunong

sa traysikel na pag nabasa'y di na magtatanong

imbes na "Bayad Muna Bago Baba" ang mensahe

ay tumataginting na "Bayad Muna Bago Selfie"

baka sa kase-selfie mo'y makalimutan kasi

ang bayad, panay selfie't natutuwa sa sarili

ibig sabihin, presence of mind, dapat laging listo

magbayad ka, di ka sakay ng sarili mong awto

nakasalalay sa bayad ang iyong pagkatao

kung sino ka, ikaw ba'y makatao't prinsipyado

napakapayak ng mensahe doon sa traysikel

subalit tumatagos sa puso't diwa ang paskil

barya'y ihanda bago sa pagse-selfie manggigil

bayaran ang pagsakay, huwag hintaying masingil

- gregoriovbituinjr.

06.20.2023

Walang ititira

WALANG ITITIRA

"Walang ititira" sa pagkain

"No Left Over Policy" ang bilin

huwag magtira kahit balat man?

ng saging o buto man ng pakwan?

ang ibig lang sabihin, ubusin

bawat kinuha mong kakainin

ah, dapat pa ba iyang ilinaw

gayong maliwanag pa sa araw

kunin mo lang ang kayang kainin

o pag lumabis, ibigay lang din

sa kasamang sapat lang kumuha

pag binigyan mo, siya'y sosobra

na pipilitin mong ipakain

ang hindi niya gustong kainin

para lamang hindi ka magmulta

sobra mo'y ipapasa sa iba

aba'y matuto kang makuntento

ang kunin mo'y sapat lang sa iyo

huwag kang parang kapitalista

na sa kapwa'y di man lang magtira

- gregoriovbituinjr.

06.19.2023

Itapon ng wasto ang kalat natin

ITAPON NG WASTO ANG KALAT NATIN

nararamdaman natin ang paghibik

ng kalikasang nabikig, natinik

kalat natin sa kanya'y nagsumiksik

na tayo rin naman yaong naghasik

kalat natin ay kanya nang nilulon

habang tayo'y masayang maglimayon

paanong dapat nating gawin ngayon

kundi kalat ay sa wasto itapon

nakakababa ba ng pagkatao

ang mga kalat doon, kalat dito?

gayong may pinag-aralang totoo

subalit plastik at walang prinsipyo?

basura't plastik ay huwag sunugin

iyan ay ganap nang batas sa atin

nabubulok at hindi'y pagbuklurin

ang nabubulok sa lupa ilibing

pag-aralan ang sistemang ganito:

ang di nabubulok ay iresiklo

o kaya'y ibalik nating totoo

ang bote't plastik sa gumawa nito

- gregoriovbituinjr.

06.19.2023

Happy Father's Day

HAPPY FATHER'S DAY

isang araw bago kaarawan ni Dr. Rizal

ay Father's Day, kaya mga ama'y ating itanghal

pagkat sila'y nagtrabaho, nagsikap at nagpagal

nang tayo'y mapalaki, mapakain, mapag-aral

paano ba ilalarawan sa mga kataga

ang hirap at sakripisyo ng amang manggagawa

upang tayo'y lumaking marangal at maihanda

sa pagtahak sa landas ng luha, tuwa't paglaya

ating pagpugayan ngayong Araw ng mga Ama, 

sina Tatay, Daddy, Ama, Itay, o kaya'y Papa,

haligi ng tahanan silang katuwang ni Ina

pagkat wala tayo sa daigdig kung wala sila

ating bati: Maligayang araw ng mga Tatay!

at sa lahat ng ama, mabuhay kayo! Mabuhay!

- gregoriovbituinjr.

06.18.2023

Entrance, Pasukan, Pagserekan

ENTRANCE, PASUKAN, PAGSEREKAN

nakikita ng madla ang naroong paabiso

saan ang Entrance, Pasukan o Pagserekan dito

na nasa wikang Ingles, Tagalog, at Ilokano

habang aking binabaybay ang palengke sa Baguio

mahalagang maunawa ang ganitong salita

at ipinatatalastas ang trilingwal na wika

bagamat ang pagserekan nang hinanap kong sadya

sa U.P. Diksiyonaryong Filipino pa'y wala

Entrance, Pasukan, Pagserekan, daling unawain

mumunting salitang mabuting nababatid natin

dayo o katutubo, nagkakaintindihan din

pagkakaisa't unawaan ang hatid sa atin

di maliligaw, salitang Ilokano'y nawatas

kung may pagserekan, ano ang exit o palabas

buti nang may dagdag-kaalaman tayong napitas

na magagamit sa patutunguhan nating landas

- gregoriovbituinjr.

06.17.2023

Talinum pala ang spinach

TALINUM PALA ANG SPINACH

minsang maparaan ako sa palengke sa Baguio

ang tindang spinach ay kinunan ko ng litrato

aba'y talinum pala ito kung tawagin dito

salitang magandang ipalaganap na totoo

lokal na salitang sa pag-akda'y nais gamitin

na nasa U.P. Diksiyonaryong Filipino rin

gulay o dahon itong kaysarap sadyang ulamin

na mailalaga o kaya'y isapaw sa kanin

spinach na pampalakas ni Papay Da Selorman

masarap at pampaganda rin ng pangangatawan

marahil kaya talinum pampatalino naman

na pag inulam ay pampalusog niring isipan

tawag din ay water leaf, aba'y parang naiinom

pampatighaw ng uhaw at pampawi rin ng gutom

gayunpaman ay itutula ko na ang talinum

magtanim nito't baka sa sugat ay pampahilom

- gregoriovbituinjr.

06.17.2023

* litratong kuha ng makatang gala sa Baguio

* talinum - matatagpuan din sa U.P. Diksiyonaryong Filipino, p. 1215

Telebisyon

TELEBISYON

marahil wala kasing telebisyon

kaya nagagawa ang nilalayon

sinusulat ang mga napapansin

at anumang napagninilayan din

minsan, nakatunganga sa kisame

paksa'y samutsari, di man balanse 

at nakakapagkonsentra talaga

sa pagsulat ng asam na hustisya

buti't walang telebisyon sa bahay

at naisusulat ang tuwa't lumbay

para bang telebisyon na'y balakid

sa nadadalumat, sa nababatid

bagamat minsan, nais kong manood

ng Voltes V na ikinalulugod

upang mabalikan ang nakaraan

ang panahon ng aming kabataan

telebisyon ba'y pampalipas-oras

lalo't di makapili ng palabas

nagti-T.V. rin naman noong araw

nang lumalaban pa si Manny Pacquiao

- gregoriovbituinjr.

06.15.2023

Bahaw

BAHAW

kaning lamig ay sayang kung di kakainin

kaya bahaw itong aking aalmusalin

kamatis at tuyong hawot ang uulamin

madaling araw natulog kaya puyat din

tanghali nang bumangon dahil nauuhaw

pagkainom saka lang napansin ang bahaw

mamaya na lang ako bibili ng sitaw

o talbos ng kangkong o ng isdang inihaw

kayrami kasing gawain at tinitipa

sa kompyuter na kwento, sanaysay, o tula

at mga ulat sa samahang maralita

na dapat matapos sa panahong tinakda

sa ngayon kailangan ko munang sumubo

upang nararamdamang gutom ay maglaho

bagamat ulam lang ay kamatis at tuyo

ay mabubusog din konti man ang niluto

- gregoriovbituinjr.

06.13.2023

Pagkatha

PAGKATHA

oo, katoto, patuloy akong susulat

ng anumang akdang nakapagsisiwalat

ng mga isyu ng masa upang magmulat

na sana balang araw ay maisaaklat

madalas magnilay, minsan lang magliwaliw

pagkatha'y adhikaing di ako bibitiw

na sa kinagiliwan ko'y di magmamaliw

kapara'y tinipong "Alikabok at Agiw"

tinatangka kong isang araw, isang tula

subalit madalas ay di ito magawa

minsan, pagkagising sa umaga'y tutula

habang ang mga alaga'y pinatutuka

kung tatanungin nila anong aking bisyo

ay malinaw sa kanila anong tugon ko:

tumunganga't nilay, magsulat sa kwaderno

di babae, alak, sugal, o sigarilyo

mamatamisin ko pang ang musa'y dalawin

o mga manggagawa't dukha'y bisitahin

mabatid ang mga isyung sumasalamin

sa lipunang kayraming api't hirap pa rin

- gregoriovbituinjr.

06.12.2023

Sa Araw ng Kalayaan

SA ARAW NG KALAYAAN

ang Araw ng Kalayaan sa atin ay pamana

ng mga ninunong kilala at hindi kilala,

ng mga bayaning dinarakila sa tuwina,

dahil laya ng bayan ay ipinaglaban nila

Araw ng Kalayaan, malaya nga ba ang bayan?

bakit dukha'y laksa-laksa? mayaman ay iilan

sa ngalan ng progreso'y sinira ang kalikasan

nagtayo nga ng tulay, bundok ay kinalbo naman

lumaya nga sa mga mananakop na banyaga

ngunit di sa burgesya't kapitalistang kuhila

di pa rin mabayarang tama ang lakas-paggawa

nayuyurakan pa rin ang karapatan ng dukha

may deklarasyon kaya may Araw ng Kalayaan

nariyan pa rin ang mapagsamantalang iilan

Liberty, Freedom, Independence pa ri'y ipaglaban!

hanggang kamtin ang asam na makataong lipunan!

- gregoriovbituinjr.

06.12.2023

Mag-ingat sa tibani at/o tibari

MAG-INGAT SA TIBANI AT/O TIBARI

kumpara sa halibyong o fake news ay anong tindi

ng panlilinlang na gawain ng mga tibani

at/o tibari na sa panloloko nawiwili

katulad ng matamis magsalitang trapo't imbi

kapara'y langgam kung magsalita sila't mangako

upang boto nati'y makuha ng trapong hunyango

na pag nanalo na sila'y talagang napapako

sa matamis nilang salita masa'y nabubuslo

gagawin daw bente pesos ang isang kilong bigas

pabababain daw ang presyo ng kilong sibuyas

kalaban daw ng korapsyon at magiging parehas

sila daw ang dapat mahalal pagkat sila'y patas

buti pa ang tibalyaw pagkat totoong balita

at di halibyong o fake news na sadyang mapanira

sa Kartilya ng Katipunan mababasang sadya

yaong: "Sa taong may hiya, salita'y panunumpa."

tingnan na lang ang kahulugan nila ng progreso

gawin daw ang Kaliwa Dam nang magkatubig tayo

nagtatayo ng tulay kaya bundok ay kinalbo

lupa'y minina upang tao raw ay umasenso

kaya mag-ingat tayo laban sa mga tibani

at/o tibari, kumbaga layon nila'y mang-onse

upang kumita o mahalal, ganyan ang diskarte

pagkat gawain na nilang tao'y sinasalbahe

- gregoriovbituinjr.

06.11.2023

* nasaliksik mula sa UP Diksiyonaryong Filipino, pahina 1248

Fourth, di last, Monday ng Hulyo ang SONA

FOURTH, DI LAST, MONDAY NG HULYO ANG SONA

di totoong every last Monday of July ang SONA

di iyon tulad ng laging sinasabi ng iba

lalo't maraming namamatay sa maling akala

sa batas, SONA'y every fourth Monday of July pala

kongkretong pagsusuri sa kongkretong kalagayan

ang gabay na aral sa pagsusuri sa lipunan

minsan ay may fifth Monday, di man madalas, ang buwan

lalo't Monday ay may twenty-nine, thirty o thirty-one

kaya ang SONA ay di laging last Monday ng July

minsan kailangan talaga itong matalakay

nagsusuri lamang tayo pagkat di mapalagay

pag may nagsasabing SONA ay last Monday ng July

ngayong taon nga, SONA'y tumapat ng bente-kwatro

gayong last Monday ng July ay petsa trenta'y uno

dito pa lang ay kita na natin anong totoo

every fourth Monday ng July ang SONA ng Pangulo

kaya dapat paghandaan ang malaking pagkilos

upang ipabatid ang isyu ng obrero't kapos

kung paano bang kahirapan nila'y matatapos

mga panawagan nati'y maunawa'y tumagos

- gregoriovbituinjr.

06.10.2023

Fasten your seatbelt sa tricycle

FASTEN YOUR SETBELT SA TRICYCLE

may istiker sa loob ng traysikel na sinakyan

ang nakasulat: "Fasten Your Seatbelt", talaga naman

tila nasa eroplano o race car nakalulan

gayong wala namang seatbelt nang ito'y aking tingnan

natawa na lang ako o marahil ay natuwa

nang magka-istiker ay dinikit lang doong bigla

kaskasero ba't pinaalalahanan ang madla?

buti nang nag-iingat, wala namang mawawala

dagdag na istiker na lang ang "Bawal Manigarilyo" 

pati himpilam ng mga awit na "Love Radio"

karaniwang panawagan, di lang sa dyip at kanto

may "Fun-alo sa saya" pa sakaling laruin mo

buti't nakarating sa patutunguhan ng ligtas

bagamat walang seatbelt ay walang disgrasya't gasgas

di pala kaskasero, maingat lang at parehas

sa aking kalooban ay may sayang mababakas

- gregoriovbituinjr.

06.10.2023

Libro't tsesbord ang sangkalan sa pagtuturnilyo

LIBRO'T TSESBORD ANG SANGKALAN SA PAGTUTURNILYO

wala nang makitang sangkalan ng patungang tabla

upang pagpantayin ang butas na sadyang nakamarka

para sa bookshelf upang maturnilyuhan talaga

kundi tsesbord at librong isa-isa kong kinuha

maraming salamat sa mga gamit kong nagkalat

na animo'y nagboluntaryong tumulong nga't sukat

diksyunaryo, aklat ng kwento, nobela't alamat

trabaho'y dumali, nag-iisa man akong pangkat

marahil, ginagawa ko'y alam ng mga libro

at ng tsesbord na sa bookshelf sila'y ilalagay ko

upang maging permanenteng tahanan nila ito

kaya tinulungan na ako sa pagtuturnilyo

kayraming karakter na naiisip ang makata

upang maisama sa mga kakathaing akda

salamat sa kanila't pagtulong nila'y dakila

maya-maya lang bookshelf ay mayayari nang sadya

mamayang gabi'y makakatulog silang mahimbing

o habang ako'y himbing, naglalaro sila't gising

bookshelf na tahanan nila'y nanamnaming magaling

pagkat naisalansan sila't di na marurusing

- gregoriovbituinjr.

06.09.2023

* mapapanood ang bidyo sa: https://fb.watch/l2Pctqv_Se/

Pagtuturnilyo ng bookshelf

PAGTUTURNILYO NG BOOKSHELF

bumili ng bookshelf si misis upang may lagayan

ako ng mga aklat na doon isasalansan

upang madaling dalhin ay binaklas sa bilihan

sa bahay, binuo kong muli ang bookshelf na iyan

may padron o pattern sa papel na susundan doon

una munang tinurnilyo ang pinakapundasyon

isusunod ang patungan ng mga libro roon

ay, parang ako'y karpinterong ginagawa iyon

maya-maya lang, buong bookshelf ay matatapos na

basta sundan ang padron sa papel, madali pala

di pa manwal ang screwdriver, pindutin lang siya

at agad magtuturnilyo na siya nang mag-isa

makabagong teknolohiya ngayon ang ginamit

kaya naman aking pulso't kamay ay di sumakit

pagkatapos nito'y iinom ng kapeng mainit

at isalansan ang mga binabasang malimit

- gregoriovbituinjr.

06.09.2023

* mapapanood ang bidyo sa: https://fb.watch/l2yo5BquAz/

Sa sama-samang pagkilos magtatagumpay

SA SAMA-SAMANG PAGKILOS MAGTATAGUMPAY

di ako naghihintay sa sinumang manunubos

na di darating, laksa-laksa ang naghihikahos

na obrero't masang patuloy na binubusabos

katubusan nila'y mula sama-samang pagkilos

sagipin ang uri mula sa pagsasamantala

ng uring kapitalista, elitista, burgesya

mamatay man ako'y may patuloy na mag-aalsa

hangga't may tusong mang-aapi't bulok ang sistema

walang Superman, Batman, Robin, o iisang tao

ang tutubos sa aping uri kundi kolektibo

nilang pagkilos upang pangarap ay ipanalo

maitayo ang asam na lipunang makatao

O, manggagawa't dukha, ngayon ang tamang panahon

upang magkaisang iguhit sa historya ngayon

ang pagbaka't maipagwagi ang lipunang layon

pag watak-watak tayo'y di natin kakamtin iyon

huwag umasa sa manunubos na di darating

na may mahikang lahat tayo'y biglang sasagipin

tanging asahan ay sama-samang pagkilos natin

bilang uri upang makataong sistema'y kamtin

- gregoriovbituinjr.

06.08.2023

Pangarap

PANGARAP

oo, pinangarap ko ring gumanda yaring buhay

ngunit di pansarili kundi panlahatang tunay

uring manggagawa't dukha'y giginhawa ng sabay

dahil bulok na sistema'y nabaon na sa hukay

yaman sa mundo'y aanhin kung mamamatay ka rin

buti nang may pinaglalaban kang prinsipyong angkin

punong-puno man ng sakripisyo'y may adhikain

upang lipunang makatao'y maitayo natin

at pagka gayon, alam mong nasa landas kang wasto

sayang lamang kung mayaman kang lagi sa kasino

sayang ang buhay kung nagdodroga lang o may bisyo

minsan ka lang mabuhay, kaya tumpak na'y gawin mo

aanhin mo ang magandang buhay kung nangmamata

ng dukha, at sa kapwa tao'y nagsasamantala

gusto mong pulos sarap? ay, sige lang, sumige ka

habang kami'y patuloy sa paghanap ng hustisya

ako'y isinilang na di para lang sa sarili

kundi para sa uri't bayan ay makapagsilbi

ako'y aktibistang Spartan na di mapakali

sa pag-iral ng pagsasamantala't pang-aapi

kaya huwag mong hanapin sa akin ang di ako

o ako'y iuugit mo sa nais mong modelo

tanggapin mong aktibista akong taas-kamao

pagkat ako na'y ganyan, ako iyan, iyan ako

- gregoriovbituinjr.

06.08.2023

Mabuhay ang mga migranteng manggagawa!

MABUHAY ANG MGA MIGRANTENG MANGGAGAWA!

tinaguriang bayani dahil nagsakripisyo

pamilya'y iniwanan upang makapagtrabaho

ng kung ilang taon sa malayong bansa dumayo

kahit na ma-homesick ay nagsisikap umasenso

nangibang-bayan na't kulang ang trabaho sa bansa

kayraming nilang nagtrabaho para sa banyaga

sa maraming bayan sa kanluran, timog, hilaga

habang iniwanang tiwangwang ang tigang na lupa

huwag lang sa illegal recruiter ay magpaloko

ibinenta ang kalabaw upang ipambayad mo

sa samutsaring papeles o mga dokumento

dito pa lang, nagsakripisyo na silang totoo

lumipat ng lugar nang makapagtrabaho roon

o kaya'y upang sila'y manirahan na rin doon

magandang bukas ang hinahanap ng mga iyon

kaginhawahan ng pamilya ang kanilang layon

oo, magandang buhay ang malimit sinasabi

na marahil di maranasan sa bansang sarili

kaya ang mga migrante ba'y ating masisisi

kung sa ibang bansa na'y naakit sila't pumirmi

pumirmi nang pansamantala o panghabambuhay

pasiya nila iyang di mapipigilang tunay

O, migrante, kami po'y taospusong nagpupugay!

sana, sakripisyo ninyo'y magbunga ng tagumpay!

- gregoriovbituinjr.

06.07.2023

* litrato mula sa pahayagang Pilipino Star Ngayon, Hulyo 7, 2023, pahina 5

Tarang magkape

TARANG MAGKAPE

kaysarap ng tulog ng nakaraang gabi

kaya paggising ngayong umaga'y nagkape

sa dadaluhang pulong ay magiging busy

upang sa obrero't masa'y makapagsilbi

tarang magkape, kumukulo na ang tubig

SULONG patungo sa gawaing kapitbisig

BANGON at sa anumang problema'y tumindig

KAYA MO 'YAN! sa ating kapwa'y bukambibig

magbahaginan ng kinaharap na isyu

suriin ang lipunan paano tumakbo

at magkaisa sa tinanganang prinsipyo

magsikilos tungong lipunang makatao

pagkunutan ng noo ang ating problema

pag-usapan paano kamtin ang hustisya

at pakikipagkapwa'y bigyan ng halaga

habang mainit ang tubig, magkape muna

- gregoriovbituinjr.

06.07.2023

Ngayong World Environment Day 2023

NGAYONG WORLD ENVIRONMENT DAY 2023

sa harap ng D.E.N.R, walang nagpo-protesta

nang magtungo ako ng ikasampu ng umaga

kaya pala walang imbitasyon akong nakita

dahil kaya administrasyong ito'y naiiba?

di ba katulad ng nakaraang administrasyon

aba'y kabi-kabila ang mga pagkilos noon

sadyang naghanap ako ng masasamahan ngayon

upang maibulalas ang sa diwa'y mga tanong:

bakit ba progreso'y mapanira ng kalikasan?

kaya raw nagmimina ay para sa kaunlaran

kinalbo ang gubat at pinatag ang kabundukan

iyan ba ang development? progreso nga ba iyan?

matindi na ang pananalasa ng microplastic

sa paligid-ligid, na sa laot pa'y nagsumiksik

di sapat ang paggawa ng ekobrik at yosibrik

upang malutas ang suliraning kahindik-hindik

ngayong World Environment Day, ating alalahanin

sa pagkasira ng kalikasan, anong gagawin

meron nang Right to a Healthy Environment ang U.N.

Rights of Nature pa'y dapat ding maitaguyod natin

mabuhay ang mga nangangalagang katutubo

sa kagubatan, kabundukan, upang di maglaho

mabuhay yaong nakikibakang di humihinto

upang kapaligira'y alagaa't mapalago

- gregoriovbituinjr.

06.05.2023

Mahal, ako'y pauwi na (Sa eroplano, Bidyo 12)

MAHAL, AKO'Y PAUWI NA

(Sa eroplano, Bidyo 12)

"Pauwi na ako," sabi sa isang awit

na sa puso't diwa'y pananabik ang bitbit

di na iniisip kung saan pa sasabit

basta't tungo'y sa mahal na asawa't paslit

sa eroplano'y sumakay tungong Maynila

nang may kasabikang makakauwi na nga

paglalakbay man ay matagal at mahaba

o maiksi man, may saya sa puso't diwa

"Pauwi na ako, mahal" ang aking sabi

sa tanging diwatang talagang kinakasi

huwag lamang sanang matulad sa mensahe

sa awiting "Napakasakit, Kuya Eddie"

tigib ng kasabikang puso'y inihanda

upang di salubungin ng lumbay at luha

upang tanging pagsinta yaong manariwa

at magniig muli ang aming puso't diwa

- gregoriovbituinjr.

06.05.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lqwyLL_NGb/

Pagdatal sa NAIA 3 (Sa eroplano, Bidyo 11)

PAGDATAL SA NAIA 3

(Sa eroplano, Bidyo 11)

hapon na nang sa paliparan nakarating

habang nasa isip ang diwatang kaylambing

"baka may tsiks ka roon" ang biro't pasaring

sinabi ko'y wala, at wala ring pahaging

matagal pa ang pag-uwi mula NAIA

lalo't nasa lungsod na, maulan, trapik pa

ito ang nasa isip habang pababa na

tanging bitbit ay karanasa't alaala

pinagmasdan ko ang iba pang eroplano

na aming nadaanan pagkalapag nito 

maya-maya lang, tatayo na kami rito

susunduin ng bus pagbaba namin dito

halos isang oras din yaong paglalakbay

na may kakaibang natutunan ding tunay

mataas pa sa ulap, kaibang palagay

ah, pahinga muna pagkauwi ng bahay 

- gregoriovbituinjr.

06.05.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lqwbnfz7jT/

Lalapag na ang eroplano (Sa eroplano, Bidyo 10)

LALAPAG NA ANG EROPLANO

(Sa eroplano, Bidyo 10)

naroon pa ring patuloy na nagninilay

ang nasasadiwa'y samutsaring palagay

hanggang eroplano'y naghanda na ring tunay

sa paglapag mula mahabang paglalakbay

inihanda kong muli ang selpon-kamera

upang mismong pag-landing ay mabidyuhan pa

ano nang pakiramdan? saya ba o kaba?

marahil saya dahil makakauwi na

handa nang magbidyo upang may maikwento

anong nasa isip, ano bang naengkwentro

anong nakita habang nasa eroplano

bukod pa sa ngiti ng istewardes dito

"ako'y uuwi na, mahal ko", anang awit

biyahe'y tanghali kaya di na pumikit

at minasdan ang ulap, panganorin, langit,

dagat at kalupaang animo'y kayliit

- gregoriovbituinjr.

06.04.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lqhPzEsSQU/

Lugar na mapuno at nagtatayugang gusali (Sa eroplano, Bidyo 9)

LUGAR NA MAPUNO AT NAGTATAYUGANG GUSALI

(Sa eroplano, Bidyo 9)

may lugar pa palang pulos puno sa atin

sa animo'y kalunsurang nakita lang din

sa ere nang minamasdan ang panganorin

lupa'y tanaw, ah, pagbaba'y malapit na rin

katabi lang ng nagtatayugang gusali

ang mapunong lugar, buti't napanatili

animo sa lungsod, gubat ang kalahati

na sadyang nagbibigay ng magandang ngiti

dapat lang pangalagaan ang kalikasan

huwag salaulain ang kapaligiran

huwag kalbuhin ang bundok at kagubatan

mga pinutol na puno'y dapat palitan

iyan ang nasa diwa hinggil sa nakita

nang nasa ere, naninilay ang problema

paano kalikasa'y maprotektahan pa

nang di sirain ng tusong kapitalista

- gregoriovbituinjr.

06.04.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lqdBdVe_BP/