Lubog sa Putik

LUBOG SA PUTIK

ni Gregorio V. Bituin Jr.

15 pantig bawat taludtod

ilang bahay pa ba ang dapat mabaon sa putik

upang matanto nating dapat kumilos ang masa?

ilang buhay pa ba ang maibabaon sa putik

kung wala tayong magawa sa nagbabagong klima?

lubog sa putik ang mga bayan dahil sa unos

na biglaang dumatal at sa buhay ay tumapos

ilang taon pa ba bago mapaghilom ang mundo

mula sa sakit nitong sa t'wina'y nararanasan?

ilang tao pa ba ang kailangan natin dito

upang mawatasang kapitalismo ang dahilan?

na sa bawat pagbuga ng usok sa himpapawid

butas ang ozone layer na sa mundo'y nagpainit

paano nga ba natin hahanapin sa putikan

ang mga inilubog ng mga bagyong dumatal?

paano ba natin hahalukayin sa isipan

ang matatamis na araw na kapiling ang mahal?

Rosing, Milenyo, Ondoy, Pepeng, Pedring, Quiel, Sendong 

ilang pangalan itong sa atin nga'y dumaluyong

kailan magiging seryoso ang pamahalaan

upang paghandaan ang mga unos pang darating?

kailan magiging totoong seryoso ang bayan

upang harapin ang hamon ng daratal pang lagim?

ikaw, 'igan, wala ka bang paki't pahilik-hilik?

paano kung bahay mo na ang lumubog sa putik?

Sugatang Makata

SUGATANG MAKATA

ni Gregorio V. Bituin Jr.

10 pantig bawat taludtod

ako'y isang sugatang makata

bakit, sinta, ako'y pinaluha

gayong bintang mo'y di ko ginawa

poot mo ba'y kailan huhupa

hindi ako isang salawahan

hindi kita pinaglalaruan

hindi kita kayang pagtaksilan

ikaw lang ang buhay ko't kagampan

ako'y naging makatang sugatan

na biktima ng mga tsismisan

gayong wala akong kasalanan

sinta ko, ako'y paniwalaan

mga tula kong alay sa iyo

na sinabi mong iniipon mo

sasayangin mo bang lahat ito

dahil sa bintang na di totoo

ang poot mo'y pakong nakabaon

pati tula ko'y nasa linggatong

bigyan mo pa ng pagkakataon

na ibigin kitang muli ngayon

patuloy pa kitang mamahalin

mawala ka man sa aking piling

kung pag-ibig ko'y balewalain

makabubuting buhay ko'y kitlin

Ang Inidoro at ang Trapo

ANG INIDORO AT ANG TRAPO

ni Gregorio V. Bituin Jr.

15 pantig bawat taludtod

ang inidoro'y tagasalo ng tae ng iba

trapo nama'y tagasalo ng maraming problema

dulot ng inidoro'y pawang ginhawa sa masa

dulot ng nanalong trapo'y pawang hirap at dusa

buti pa ang inidoro't di marunong mangako

ngunit nariyan lang upang ikaw ay di mamaho

puntahan ito agad kapag tiyan mo'y kumulo

ngunit trapo'y iba, mga pinangako'y napako

bawat sama ng loob, ibuhos sa inidoro

sa sakit ng tiyan, inidoro ang sasaklolo

pag may reklamo itong bayan, subukan ang trapo

tunay ba silang sa taumbayan sumasaklolo

mabuti pa ang inidoro't ikaw'y giginhawa

habang trapo'y yumayaman ay lalagi kang dukha

inidoro'y walang angal kung kailangang lubha

trapo'y aangal kapag tubo sa proyekto'y wala

ang inidoro'y tapat na lingkod ng taumbayan

ang trapo sa taumbayan ay walang katapatan

mabuti pa yatang inidoro ang ipanlaban

bakasakaling trapo'y ilampaso sa halalan

Ang Trono ng Sama ng Loob

ANG TRONO NG SAMA NG LOOB

ni Gregorio V. Bituin Jr.

13 pantig bawat taludtod

upuan, haring trono, lagakan ng dumi

pahingahan ng katawan ang piping saksi

sa ilang minutong ikaw'y di mapakali

nariyan ito't sa iyo'y handang magsilbi

araw-gabi'y saksi sa buo mong kahubdan

sa iyong nakabuyangyang na kaselanan

sa sama ng loob ay isang kumpisalan

lagakan ng iyong nagawang kasalanan

kung tiyan mo'y tila hinagupit ng punyal

puntahan mo ito't agad kang mangumpisal

bago mo iwan ang nakangangang pedestal

linising maigi nang iba'y di magduwal

anupa't ito'y isang mahalagang trono

ginhawa ang dulot anuman ang lahi mo

upuan ng hari at karaniwang tao

kawawang tiyak yaong bayang wala nito

ang sama ng loob mo'y sa kanya ilagak

gawin mo lamang ang nararapat at tumpak

mahirap nang ikaw'y tuluyang mapahamak

sapupo ang tiyang gagapang ka sa lusak

Magdugo Man ang Utak

MAGDUGO MAN ANG UTAK

ni Gregorio V. Bituin Jr.

11 pantig bawat taludtod

ito lang ang ikinabubuhay ko

ang magsulat ng magsulat ng todo

kahit walang natatanggap na sweldo

patuloy ako sa pagkathang ito

ngunit paduguan ito ng utak

habang tumatahak sa lubak-lubak

hanggang imahe'y sa isip tumarak

hanggang ang diwa'y tuluyang magnaknak

ngunit kailangan ko itong gawin

upang limanglibong tula'y marating

bawat kataga nawa'y iyong damhin

at sasaiyo ang diwa kong angkin

ang makatang tulala't walang kibo

tutula pa rin utak ma'y magdugo

kahit pa sa gitna ng pagkalango

ikukwento ang tamis at siphayo

Sulong, mga kapwa sosyalista!

SULONG, MGA KAPWA SOSYALISTA!
ni Gregorio V. Bituin Jr.
10 pantig bawat taludtod

sumulong tayo, mga kapatid
at itong sosyalismo'y ihatid
sa mga isipang nakapinid
at sa mga pusong tila manhid

kailangang dinggin nitong bayan
ang malakas nating panawagan:
ipagtanggol bawat karapatan!
itayo, sosyalistang lipunan!

sa lahat ng kapatid, kasama
mabuting loob ng sosyalista
at pagmamahal natin sa masa
at sa uri'y ating ipadama

magmartsa tayong bandila'y hawak
habang sukbit ang baril at tabak
nais nating tuluyang mawasak
ang kapitalismong mapangyurak

sulong, mga kapwa sosyalista
para sa karapatan, hustisya!
bakahin ang bulok na sistema
at lahat ng mapagsamantala!

magkaisa, uring manggagawa!
kayong mula sa maraming bansa
tanganan ang prinsipyong dakila
sulong sa sosyalismong adhika!

Ang Laptop ay Tulad Din ng Armalayt

ANG LAPTOP AY TULAD DIN NG ARMALAYT

ni Greg Bituin Jr.

11 pantig bawat taludtod

ang laptop ay tulad din ng armalayt

palaging gamit ng may dala nito

kaulayaw lagi sa gabi't araw

na di dapat mapawalay sa kanya

sa mandirigmang Moro o sundalo

armalite ay para nilang asawa

di inihihiwalay sa katawan

at laging dala saanman magpunta

ganyan din sa mga propagandista

ang laptop ay para nilang asawa

di dapat nawawalay sa katawan

at laging dala saanman magpunta

upang isulat ang dapat isulat

tulad ng mensahe nila sa media

tulad nitong polyetong mapagmulat

na ang babasa'y maoorganisa

armalayt dapat laging may magasin

para sa opensiba nya't depensa

gawa ng propagandista'y magasin

araw-gabi'y katha nang katha siya

di nga dapat sa kanila'y mawalay

ang gamit nilang laging kaulayaw

ang laptop ay tulad din ng armalayt

kasa-kasama hanggang sa pumanaw

kaya dapat nyo silang maunawa

armalayt ay gamit ng mandirigma

at laptop naman sa propagandista

araw-gabi'y lagi nilang kasama

tanggalin mo ang laptop at armalayt

isang araw man o isang oras lang

ramdam mong sila'y di na mapakali

ramdam nila'y wala na silang silbi

laptop at armalayt ay mahalaga

huwag tanggalin sa propagandista

huwag ding alisin sa mandirigma

kung ayaw mong tawagin kang kuhila

ang laptop ay tulad din ng armalayt

parang asawa kung ituring nila

di iniiwan kahit magkagyera

mawawalay lang pag patay na sila

Tugon kay makatang Pia

TUGON KAY MAKATANG PIA
15 pantig bawat taludtod

di ka lang makata kundi dakilang mangingibig
sa mga salita mo'y dama ko ang pahiwatig
mga likha mong tula'y puso ang nakaririnig
nakabibingwit ng puso ng sinumang makisig
kahit mga tigasin ay kaya nitong malupig

- gregbituinjr.

Nagkalat ang Basura sa Rali

NAGKALAT ANG BASURA SA RALI

ni Gregorio V. Bituin Jr.

13 pantig bawat taludtod

madalas ang rali'y nagmimistulang pyesta

dahil sa nangaglipanang mga basura

na iniwan doon ng mga raliyista:

polyeto, bote, basong plastik, at iba pa

tapon dito't doon, kaylaking basurahan

ang tingin nila sa malapad na lansangan

tapon kung saan-saan, walang pakialam

di baleng marumi't may maglilinis naman

di ba't nais nilang mabago ang sistema

nangangarap na bumuti ang ekonomya

igalang ang karapatan ng bawat isa

ngunit bakit ba sila'y walang disiplina

munting basura'y tapon doon, tapon dito

kaya tingin ng iba sa rali'y magulo

at ang tingin sa raliyista'y walang modo

kilusang masa'y paano irerespeto

di ba kasama dapat itong disiplina

sa tangan-tangan nilang ideyolohiya

di maitapong tama ang simpleng basura

bagong sistema pa itong pangarap nila

disiplina'y simulan natin sa sarili

upang kahit gobyerno'y hindi maging bingi

ipakitang kahit pa tayo'y nasa rali

disiplinado tayo't nakakaintindi

kaydaling sabihan ng lider ang kasama

na itapong diretso ang basura nila

sa basurahan o kaya'y ibulsa muna

ipakitang raliyista'y may disiplina

itapon ang basura huwag sa lansangan

kundi doon lamang sa mga basurahan

kung disiplinado lang tayo'y tiyak namang

ang bagong sistema'y kayang pamahalaan

Ang patola

ANG PATOLA
ni Gregorio V. Bituin Jr.
13 pantig bawat taludtod

halina't tayo'y magsikain ng patola
sapagkat gulay itong sadyang masustansya
may Bitamina A, pampalusog ng mata
may Beta-Karotina't C na Bitamina
lulusog ang balat at kalamnan ng masa

aba'y masarap ang patola pag niluto
pakiramdam mo'y gumanda ang iyong puso

may tinolang manok sa patola't sotanghon
meron ding ginisang patola sa bagoong
maari din itong may kasamang talong
samahan mo na rin ng talbos ng kangkong
upang lumakas ka't magkaroon ng kalsyum

halina't patola'y isama sa pagkain
pampalakas at sa sakit ay pampagaling

Pagyakap sa puno

PAGYAKAP SA PUNO
ni Gregorio V. Bituin Jr.
15 pantig bawat taludtod

nais kong yakapin ang isa nang matandang puno
sa panahong masama itong aking pakiramdam
bakasakaling manumbalik ang sigla ng dugo
at ang sakit na nadarama'y tuluyang maparam

Tayo ang Siyamnapu't Siyam na Bahagdan (We are the 99%)

TAYO ANG SIYAMNAPU'T SIYAM NA BAHAGDAN

(WE ARE THE 99%)

ni Gregorio V. Bituin Jr.

13 pantig bawat taludtod

tayo ang siyamnapu't siyam na bahagdan

sa ilalim ng kapitalistang lipunan

ngunit wala sa atin ang kapangyarihan

kundi naroon sa elitistang iilan

bakit nasa kanila, mas marami tayo

gayong iilang iya'y iisang porsyento

pagkat wala sa atin ang aring pribado

di natin pag-aari ang mga produkto

hawak ng iilan ang kanilang puhunan

ang lahat ng nalikha'y pinagtutubuan

pag-aari nila halos ang buong bayan

hawak pati militar at pamahalaan

ang iisang porsyento'y nagbubuhay-hari

pulitiko, burgesya, negosyante't pari

pribilehiyo ang pribadong pag-aari

habang ang dukha'y niyuyurakan ng puri

panahon nang magkaisa't sila'y labanan

iwaksi natin ang natamong kaapihan

ipaglaban yaong hustisya't karapatan

baligtarin natin ang ating kalagayan

kung magkakaisa'y kaya nating manalo

pagkat sa lipunang ito, mayorya tayo

pawiin natin ang pag-aaring pribado

pati mga uri'y pawiin nating todo

tayo ang siyamnapu't siyam na bahagdan

dapat mapasaatin ang kapangyarihan

mga nilikha'y di na dapat pagtubuan

pairalin ang pagkapantay sa lipunan

magrebolusyon na para sa bayang sawi

halina't pawiin natin ang mga uri

gawing panlipunan lahat ng pag-aari
nang bawat tao'y pantay at kinakandili

Sa mga nalibing na manggagawa sa Manila Film Center

SA MGA NALIBING NA MANGGAGAWA SA MANILA FILM CENTERni Gregorio V. Bituin Jr.
13 pantig bawat taludtod

"Alas, today the Center is more famous for the tragedy that happened during its construction than for making Manila the Cannes of Asia. Tragedy struck on November 17, 1981 shortly before 3:00 a.m. (Imelda believed in 24-hour labour) when the scaffolding for part of the second basement collapsed, burying or trapping an unknown number of the graveyard shift workers in the quick drying cement. This much we know for certain." - from http://designkultur.wordpress.com/2010/01/08/cultural-center-of-the-philippines-the-manila-film-center-tragedy/

sabi nila'y bigla na lang kayong nawala
habang Manila Film Center ay ginagawa
istruktura'y bumagsak, gumuho ang lupa
ang tinig nyo'y kasamang nalibing ng luha

di na kayo inabala pang maiahon
kung may nabuhay pa, lupa na'y itinabon
inaapura kasi ang gusaling iyon
at sila'y dukha, karapatan na'y nalamon

tuwing gabi'y dinig daw ang mga palahaw
"hustisya! hustisya!" yaong kanilang sigaw
tila ba hiyawan ng mga nakabitaw
na manggagawang ang pangarap na'y nagunaw

di raw sila binalita ng mga dyaryo
pilit itinago ang pangyayaring ito
ngunit sa bulungan, mahihiwatigan mo
nariyan silang nangamatay na obrero

wala bang nakaligtas o di iniligtas?
binayaran lang ba ang buhay na nautas?
makatarungan ba para lang sa palabas
na mga pelikulang kayraming nagwakas?

Pumapangit ang mga sugapa

PUMAPANGIT ANG MGA SUGAPA
ni Gregorio V. Bituin Jr.
13 pantig bawat taludtod

bawal na gamot ang kanilang tinitira
pamaya-maya'y hihitit ng mariwana
umiindayog ang kanilang kaluluwa
habang nakatitig sa idolong diyosa
pag di nakuntento'y magtuturok pa sila
inaaya pa pati ibang kakilala
gagawin ang lahat para lang lumigaya

sa kapitbahayan nila, droga'y talamak
ang mga sugapa'y hinihila sa lusak
tinuyo na ng droga ang kanilang utak
lagi nilang hanap ang tirador na tulak
sa bibig, iba't ibang droga'y pinapasak
tableta't kapsula'y kanilang pinipisak
matikman lamang ang panandaliang galak

ligayang hinehele sila tungong langit
ng mga pangarap nilang animo'y paslit
pag walang tama, sa sarili'y nagagalit
gagawa ng paraan, sa ina'y kukupit
sugapa silang sa droga nga'y sakdal-kapit
ang dating maganda nilang mukha'y pumangit
silang sugapa'y ganyan nga ang sinasapit

Ang Adaptasyon at ang Mitigasyon

ANG ADAPTASYON AT ANG MITIGASYON

ni Gregorio V. Bituin Jr.

13 pantig bawat taludtod

sa climate change ba tayo lang ay magtitiis

paano kung kasama nati'y magkagalis

o magkasakit dahil balat ay manipis

di ba't dapat kamtin natin ang climate justice

marami nang bagyo ang dumatal sa bansa

nakita natin kung paano natulala

yaong nasalanta dahil di lang nabasa

ang mga gamit nila kundi nangawala

paano ba aangkop sa mga nangyari

tulad ng pagbaha't iba pang insidente

adaptasyon at mitigasyon daw ang sabi

nang tayo raw naman sa huli'y di magsisi

adaptasyon ay pag-angkop sa kaganapan

dapat nang umangkop kung anong naririyan

kung sa konting ulan baha na ang lansangan

aba'y ang lansangang ito'y dapat taasan

pagbawas ang kahulugan ng mitigasyon

dapat nating mabawasan ang konsentrasyon

ng greenhouse gases sa bawat lugar at nasyon

gawin na ito hindi bukas kundi ngayon

sinong dapat sisihin sa nangyaring ito

sabi ng marami, kagagawan ng tao

sabi ng iba, sistemang kapitalismo

ang ugat ng dusa ng mundo nating ito

ayusin ang daigdig, magbawas ng usok

pag-iinit di dapat umabot sa rurok

lipunan ay baguhin, pati nasa tuktok

kilos na bago mundo'y tuluyang malugmok

bawat bansa'y dapat makinig sa babala

ng climate change kaya dapat kumilos sila

adaptasyon at mitigasyon ay gawin na

bilang panimula sa hustisya sa klima

Aklat-Diyalektiko'y Kailangan

AKLAT-DIYALEKTIKO'Y KAILANGAN
ni Gregorio V. Bituin Jr.
13 pantig bawat taludtod

laganap ang mga relihiyosong libro
at kaunti lang ang aklat-diyalektiko
una'y nangangakong langit ang paraiso
huli'y paglikha ng paraiso sa mundo

Kada Linggo'y Sampung Akda

KADA LINGGO'Y SAMPUNG AKDA

ni Gregorio V. Bituin Jr.

13 pantig bawat taludtod

minsan, may nagtanong, kaysipag ko raw naman

ngunit bakit ako raw ay di yumayaman

kayraming sinusulat, mayamang mayaman

sa akda ngunit sakbibi ng karukhaan

wala akong ikatwiran kundi magsabi

na sa pagsulat ay di mag-aatubili

kakathain anuman ang nasa kukote

gutom man aakdang pilit ng guni't muni

sa loob ng pitong araw sa bawat linggo

itinakda ko nang may sampung artikulo

mga tula, sanaysay at maikling kwento

sa isang buwan, apatnapung akda ito

wala mang kita, nais kong may nagagawa

wala mang alawans, may bagong nalilikha

wala mang sweldo, tuloy pa rin sa pagkatha

trabaho ng trabaho kahit walang-wala

kayraming maisusulat, maiuulat

hinggil sa maralitang sadyang nagsasalat

hinggil sa negosyanteng nagpapakabundat

hinggil sa digmang may namamatay ng dilat

magmasid sa paligid at kayraming bagay

sa agham, lipunan, anong ating palagay

ano, bakit, paano'y susulating husay

pati mga tsismis, susuriin ding tunay

kahit naghihirap, butas man ang kalupi

di ito sagabal upang di manatili

sa pagkatha wala mang bayad na salapi

isasatitik anuman ang nalilimi

sampung obra bawat linggo ang itinakda

sa gitna ng gutom, katha pa rin ng katha

makata man akong nabubuhay sa digma

ng gutom, ng hirap, buhay pa rin ang diwa

Puso Ko'y Muling Aalon

PUSO KO'Y MULING AALON

ni Gregorio V. Bituin Jr.

14 pantig bawat taludtod

lagi kang dumadalaw sa aking panaginip

parang katabi lang kita, laging nasa isip

hintay ko ang pagbalik mong walang pagkainip

pagkat diwata kitang sa puso'y halukipkip

malayo ka man, ikaw pa rin ang iniibig

iwi kitang rosas na lagi kong dinidilig

na nasa balintataw ko sa gabing kaylamig

at mga halakhak mo tuwina'y naririnig

kung isa kang karagatan, lalanguyin kita

at yayakapin ko ang alon mo sa tuwina

kung isa kang alapaap, liliparin kita

upang tuluyang magkaniig tayong dalawa

sa bawat paglalakbay, alaala mo'y baon

ng puso't diwa kong ang adhika'y rebolusyon

sa bawat pakikibaka, ikaw'y inspirasyon

makita lang kitang muli, puso ko'y aalon

Kwento ng isang bata

KWENTO NG ISANG BATA
ni Gregorio V. Bituin Jr.
13 pantig bawat taludtod

nabasa ko lang kung saan ang kwentong ito
na lumigalig hanggang ngayon sa isip ko
may isang babae raw noong nagahasa
nabuntis, nagsilang ng malusog na bata
habang lumalaki ang bata'y nagninilay
ngunit laging pinapalo ng kanyang inay
siya raw yaong dahilan ng kamalasan
ng kanyang inang lugmok sa karalitaan
"paano ko po kayo mapapaligaya
sa kaarawan ninyo," ang tanong sa ina
"nais kong mamatay ka nang bata ka," tugon
ng inang abala sa ginagawa noon
at nang dumating ang kaarawan ng ina
nais ng batang ang kanyang ina'y sumaya
hinanap siya ng ina kung saan-saan
hanggang sa silid doon siya natagpuan
sakal ng lubid habang may naiwang liham
na sa ina ang sulat ay nakagulantang
"nais kong sumaya ang inyong kaarawan
mahal na mahal po kita, inay, paalam"

nabasa ko lang kung saan ang kwentong ito
na lumigalig hanggang ngayon sa isip ko
na dahil sa nangyari sa ina'y sumikip
ang munti niyang daigdig, at halukipkip
ang sama ng loob sa nagdaang panahon
dahil sa nangyari sa kanyang krimen noon
nadamay ang batang walang kamuwang-muwang
sa pinagdaanan ng inang nalabuan
huli na ang pagsisisi para sa nanay
aralin itong dapat nating mapagnilay

Pilipino akong di alipin ninumang dayo

Pilipino akong di alipin ninumang dayo
Ito'y isa kong panatang tangan ko hanggang dulo
Ang isang kalaban pa'y salot na kapitalismo
Mistulang sistemang bulok ang kinakalaban ko
Oorganisahin ang pinagsasamantalahan
Nagsasakripisyo upang palayain ang bayan
Tibayan ang hanay at tatagan ang kalooban
Ang uring manggagawa ang babago ng lipunan
Lulupigin lahat ng uring mapagsamantala
Babaguhin ang sistema, tunay ang demokrasya
At itatayo ang isang lipunang sosyalista
Na sadyang magbibigay-ginhawa sa bawat isa

- gregbituinjr.

Pag-ibig ay ano?

PAG-IBIG AY ANO?
ni Gregorio V. Bituin Jr.
15 pantig bawat taludtod

Pag-ibig ay ano ba sa bawat puso't isipan
Isa itong pandamang tagos sa kaibuturan
Ako'y sumisinta't larawan ng kasigasigan

Maitutulad ba sa pulang rosas ang pag-ibig
O sa tsokolateng sadyang kaylinamnam sa bibig
Na bawat pagsuyo'y tila musikang naririnig

Tunay na tumatalab ang pagsintang anong sidhi
Anaki'y kakamtin muna anumang minimithi
Ligayang dama'y ginhawang kumukurot sa budhi

Bawat pag-irog tila tigib ng mga pangako
At aabutin ang langit para sa sinusuyo
Nawa'y kamtin ng puso ang nasa't di masiphayo

Sino ang duwag?

SINO ANG DUWAG?
ni Gregorio V. Bituin Jr.
14 pantig bawat taludtod

Minsan ay may nagtanong? / Ang duwag daw ba'y sino?
Simple lamang ang tugon / ng matalinong lolo:
Duwag ang mga taong / imbes gamiti'y ulo
Sa mga suliranin / lalo't yaon na'y gulo
Hindi na mag-iisip / o tutulong sa iyo
Ang gamit niya'y binti / utak niya'y narito
Tanging gawa'y lumayo't / kumaripas ng takbo.

Kaya si lolo'y ito / ang kabilin-bilinan:
Problema'y dumarating / hindi mo nalalaman
Kaya dapat magmatyag / suriin ang anuman
Pag problema'y dumatal / agad mong pag-isipan
Agad itong harapin / ng iyong buong tapang
Nariyan ang solusyon / pag sinuring mataman
Paglayo'y hindi sagot, / lalo ang karuwagan.

Sa sinabi ni lolo, / kayrami nang natuwa
Suriin mo ang taas, / likod, gitna, at baba
Tagiliran at sulok, / ang diretso't kabila
Solusyon ay nariyan / gaano man kapakla
Malalasahan mo ring / tumamis pati luha
Pag nag-isip ay meron / ka palang magagawa
Tila bawat problema'y / may tugong nakatakda.

Hustisya'y Pangmayaman?

HUSTISYA'Y PANGMAYAMAN?

ni Gregorio V. Bituin Jr.
18 pantig bawat taludtod

napakaraming katanungan ang umuukilkil sa isipan
kapag may naaagrabyado sa sistema ng katarungan

bakit si Erap na guilty sa plunder ay nakalaya agad
ngunit yaong political prisoners sa piitan pa'y babad

bakit si Gloria'y pwede agad magpagamot sa ibang bansa
ngunit namamatay na di magamot ang mga maralita

bakit sinabi ni Noynoy na ang taumbayan ang kanyang Boss
ngunit kampi kay Lucio Tan, di sa manggagawang inuubos

bakit sa kaso ng taga-FASAP na nanalo na sa Korte
ay nabaligtad pa kahit ito'y "final and executory"

sa simpleng liham lang ng abogadong Estelito Mendoza
ay biglang umikot ang tumbong ng Korte't dagliang nagpasya

bakit kaybilis ng hustisya sa mga tulad ni Lucio Tan
ngunit kaybagal pag mahirap ang naghanap ng katarungan

bakit si Jalosjos na guilty sa rape ay agad nakalaya
ngunit si Echegaray ay agad nabitay sa Muntinlupa

bakit nauso ang salot na iskemang kontraktwalisasyon
na pumatay sa karapatan ng mga obrerong mag-unyon

bakit pati ang mga vendors na nagtitinda ng marangal
ay hinuhuli't sinusunog ang kanilang mga kalakal

ngunit ang pribadong sektor na sa masa'y kaytaas maningil
pinayagan kahit buhay nati'y unti-unting kinikitil

bakit ang nahuhuling mag-jumper ay agad ipinipiit
ngunit malaya ang sumisingil ng kuryenteng di ginamit

bakit bahay ng maralita'y winawasak at tinitiris
kaya nambabato ang mga maralitang dinedemolis

a, sadyang napakarami pang bakit ang ating masasabi
lalo't sa sistema ng hustisya sa bansa'y di mapakali

di ang mayayaman lang ang dapat makadama ng hustisya
kundi dapat lahat, may hustisya dapat lalo na ang masa

"at ang hustisya ay para lang sa mayaman", ayon sa awit
na Tatsulok na ang mensahe'y sadya ngang nakapagngangalit

masasagot ang mga tanong kung ating pakasusuriin
bakit ganito ang sistema't kalagayan ng bayan natin

mula doon ay magkaisa tayo tungo sa pagbabago
ng sistema't itayo na ang isang lipunang makatao

huwag nating payagang magisnan pa ng ating mga anak
ang sistemang tila balaraw sa ating likod nakatarak

tayo nang magsama-sama't palitan na ang sistemang bulok
at ang uring manggagawa't aping masa'y iluklok sa tuktok

Kung Namumuno'y Kuhila

KUNG NAMUMUNO'Y KUHILA

ni Greg Bituin Jr.

8 pantig bawat taludtod

nakikilala sa gawa 

ang totohanang dakila

kaya kung namamahala

sa gobyerno at sa madla

ay pawang mga kuhila

mamamayan ay kawawa

Kung Paano Paslangin ang Kapitalista

KUNG PAANO PASLANGIN ANG KAPITALISTA
ni Greg Bituin Jr.

ang pagpaslang sa kapitalista'y di sa pamamagitan ng:
- pagpugto ng kanyang hininga
- pagbasag ng kanyang bungo
- pagputi ng kanyang buhay
dahil masama daw pumatay
sabi ng mga nagbabanal-banalan

tulad ng kung gaano kasama ang
- di pagbabayad ng tamang halaga ng lakas-paggawa ng mga manggagawa
- salot na iskemang kontraktwalisasyon na yumuyurak sa karapatan
- baliw na sistemang demolisyon
- kasakiman sa tubo, tubo at tubo

mapapaslang lamang ng tuluyan
ang mga hayop na kapitalista
kung bubunutin ang pinag-ugatan
ng kanilang pananamantala

di madaling paslangin ang kapitalista
- dahil hawak nila ang estado poder
- dahil kampi nila ang ehekutibo, lehislatibo at hudikatura
- dahil may pribado silang hukbo ng depensa
- ngunit mapapaslang din sila

mapapaslang ang kapitalista kung:
- magkakaisa ang uring manggagawa
- magrerebolusyon ang mamamayan
- mapapawi ang dahilan ng kanilang eksistensya
- mapapawi ang pribadong pagmamay-ari ng mga kagamitan sa produksyon, pagkat ito ang ugat ng kahirapan
- maitatayo ang bagong sistemang siyang papalit sa kapitalismo

Ang Nagwawalanghiya pa ang Pinagpapala

ANG NAGWAWALANGHIYA PA 
ANG PINAGPAPALA
ni Greg Bituin Jr.
13 pantig bawat taludtod

sinipsip nila ang ating lakas-paggawa
na madalas ay di binabayarang tama
ibinabaon tayo sa pagiging dukha
kahirapan pa natin ay pinalalala

pag nalugi naman ang kanilang kumpanya
manggagawa'y sisisihin dahil nagwelga
pinagpapala pa'y mga kapitalista
ng gobyernong kauri nila sa burgesya

pag ang bansa'y nagkaproblema sa panggugol
obrero'y tanggal, buhay ng dukha'y sasahol
pag may krisis, bangko pa ang pinagtatanggol
sa kapitalista'y di sila makatutol

bakit ba yaong mga nagwawalanghiya
ang siyang sa mundong ito'y pinagpapala
kapitalista'y sinambang tila Bathala
habang itsapwera ang manggagawa't dukha

globalisasyon ang lumikha nitong krisis
obrero'y unti-unti nilang tinitiris
karapatan ng masa itong pinapalis
turing ng kapitalismo sa masa'y ipis

habang mga bangkong tuloy sa pagkalugi
tutulungan ng gobyernong mapagkandili
di sa kanyang mamamayan, kundi sa imbi
tila sumumpang bangko'y tutulungan lagi

kapitalismo nga'y walanghiya't kaysakim
sa puso'y dumuduro't nagdulot ng lagim
sa bituka nati'y gumuguhit, matalim
hanggang magsuka tayo ng dugong nangitim

palitan na natin itong sistemang bulok
sa pagbabago lahat tayo'y magsilahok
mga sektor, dukha, babae, tagabundok
uring manggagawa'y ilagay na sa tuktok

Pasindi, sabi ng isang sunog-baga

PASINDI, SABI NG ISANG SUNOG-BAGA
ni Greg Bituin Jr.
12 pantig bawat taludtod

nakakabili ng isang kahang yosi
di makabili ng sariling panindi
naghihiram ng lighter imbes bumili
kapwa'y inaabala't kinukunsumi

trenta pesos ang kaha ng sigarilyo
dalawang piso lang naman ang posporo
pero di makabili ang mga ito
di masustentuhan ang sariling bisyo

ugali nilang araw-araw manghiram
ng panindi't sa iba'y nakikialam
kakilala'y lihim namang nang-uuyam
na sila yata'y wala nang pakiramdam

ang kanilang kapwa'y di na lang iimik
sa pang-aabala nilang mga adik
pag di nasindihan ang yosing katalik
baka mata nila'y agad magsitirik

Kung Paano Ako Dapat Mamatay

KUNG PAANO AKO  DAPAT MAMATAY

ni Gregorio V. Bituin Jr.

11 pantig bawat taludtod

walang sinumang makapagsasabi

kung paano ba tayo mamamatay

kung mamamatay ba akong may silbi

o bubulagta lang ng walang malay

tutumba ba ako sa isang punglo

o tatadtarin ang aking katawan

tutumba ba dahil pinagkanulo

ng sinumang tarantado't gahaman

mamamatay ba akong busog, bundat

o mamamatay na mata ko'y dilat

mamamatay ba ako habang bata

o mamamatay na lang sa pagtanda

kung paghiling ay maaari lamang

kung paano ako dapat mamatay

huwag pahirapan, isang bala lang

itong tatapos sa iwi kong buhay

tandang pinagsilbihan ang obrero

kahit buhay ko sa dalita'y sidhi

ginampanang husay ang aktibismo

nang lumang sistema'y di manatili

Di bigo ang nag-alay ng buhay

DI BIGO ANG NAG-ALAY NG BUHAY
ni Gregorio V. Bituin Jr.
13 pantig bawat taludtod

"They never fail who die in a great cause." ~ Lord Byron

di bigo ang sinumang nag-alay ng buhay
para sa kapakanan ng nakararami
para sa dakilang misyon at adhikain
para sa isang prinsipyadong simulain

pagkat sadyang mabuting ialay ang buhay
na sa sambayanan at kapwa'y nagsisilbi
upang ang lipunan ay tuluyang baguhin
upang sa sistema'y walang inaalipin

Ang Masa'y Putik sa Panahon ng Kapitalismo

ANG MASA’Y PUTIK SA PANAHON NG KAPITALISMO

ni Gregorio V. Bituin Jr.

15 pantig bawat taludtod

ang masa'y putik sa panahon ng kapitalismo
ang burgesya'y bulag mamatay man ang mga ito
ang elitista'y bingi pag masa'y nagsusumamo
kapitalista'y pipi't tila walang pagkatao
sa ganito ngang sistema'y lagi na lang ganito

putik ang tingin sa masa ng mga hinayupak
kaya pag dukha'y nakakatuwaang hinahamak
putik ang masa kaya pinagagapang sa lusak
ng dusa't hirap sa daigdig na ito'y palasak
at sa mga sugat ng sakripisyo'y nag-aantak

sa kapitalismo'y kapit sa patalim ang masa
laging inaaglahi, lagi silang itsapuwera
may demolisyon, lakas-paggawa'y binabarat pa
sa sitwasyong bang ito tayo'y magpipikitmata
o makikibaka na't babaguhin ang sistema

ang mga dukha'y parating inaapak-apakan
ng mga mapagsamantalang uri sa lipunan
karangalan ng masa'y kanilang pinuputikan
kaya ang masa't manggagawa'y dapat nang lumaban
upang itayo ang kanilang sariling lipunan

dapat nang wakasan ang sa masa'y pang-aaglahi
putik na ikinulapol sa masa'y mapapawi
kung dudurugin na ang mapagsamantalang uri
ang kapitalistang sistema'y dapat nang mapawi
uring manggagawa't dukha'y panahon nang maghari

Si Lucio ba ang Boss ni P-Noy?

SI LUCIO BA ANG BOSS NI P-NOY?

ni Gregorio V. Bituin Jr.

13 pantig bawat taludtod

(2,600 manggagawa ang apektado ng planong outsourcing sa PAL)

ang sabi noon ni P-Noy, "kayo ang Boss ko!"

ngunit sino nga ba ang Boss niyang totoo?

ang kapitalista ba o ang simpleng tao?

sa kaso ng PAL, obrero ba o si Lucio?

sino ba talaga ang Boss ng pangulo nyo?

nais pa niyang kasuhan ang manggagawa

economic sabotage ang aming balita

anong nangyari, Pangulo na'y walang awa

ang kapitalista na ang dinadakila

at mga manggagawa'y binabalewala

si Lucio ba ang Boss ni P-Noy? tanong ko lang

si Lucio na ba ang sa puso niya'y lamang?

ang sagot dito'y alam ng bayan malamang

kita namang kapitalista'y nanlalamang

kahit karapatan ng obrero'y maharang

di na naisip, Boss niya ang manggagawa

ang Pangulo ba'y wala nang isang salita

mga manggagawa na'y winawalanghiya

pagkat iyang pangulo nyo'y nagpapabaya

di pala niya Boss ang manggagawa't dukha

labanan ang promotor ng pribatisasyon

at nangwawasak ng karapatang mag-unyon

labanan ang salot na kontraktwalisasyon

mga karapatan ang tanging tayo'y meron

kaya tama lang ipaglaban ito ngayon

ang sabi noon ni P-Noy, "kayo ang Boss ko!"

nagsisinungaling na yata siyang todo

aba'y kung sunud-sunuran siya kay Lucio

dapat magpasiya na ang uring obrero

ang pangulo nyo'y patalsikin na sa pwesto!

Nang Mandaluyong si Pedring

NANG MANDALUYONG SI PEDRING

ni Gregorio V. Bituin Jr.

13 pantig bawat taludtod

tulad ni Ondoy, dumaluyong din si Pedring

buong kalangitan ay totoong nagdilim

kayraming napatay, tila isang salarin

dinulot ni Pedring sa bayan nga'y kaylagim

dinaluyong ni Pedring ang mga lansangan

kayraming bahay ang kanyang sinagasaan

kayraming buhay ang nawalan ng tahanan

tila nilamon ng lupa ang buong bayan

nang mandaluyong si Pedring tulad ni Ondoy

apektado ang dukha, pati na palaboy

lubog ang lungsod, kapara'y tila kumunoy

pati mga halaman, ani'y nangaluntoy

bahay at paaralan ang lubog sa baha

higit sandaang buhay yaong nangawala

ang pagdaluyong ni Pedring ay tila sumpa

na sa mga apektado'y nagpatulala

Uso na naman ang noodles at sardinas

USO NA NAMAN ANG NOODLES AT SARDINAS

ni Gregorio V. Bituin Jr.

15 pantig bawat taludtod

ang biglaang pagragasa ni Pedring ay marahas

binaha ang lansangan, blakawt, bahay ay binutas

kayraming gamit ang binaha't di na nailigtas

marami'y sa evacuation center na nagpalipas

ng magdamag upang sariwain ang nakalipas

na maghapong dinalirot ng unos na kayrahas

uso na naman ang sanlaksang noodles at sardinas

handa ng gobyernong di handa sa bagyong kaylakas

sari-saring mga delata't ilang kilong bigas

ganito lagi ang sitwasyong ating mamamalas

habang ang iba naman, tubig-baha'y nililimas

pilit binabalik sa dati ang nasirang landas

isang katotohanan itong sa diwa'y nagbukas

pag may kalamidad, tambak ang noodles at sardinas

Si Ondoy at si Pedring

SI ONDOY AT SI PEDRING
ni Gregorio V. Bituin Jr.
15 pantig bawat taludtod

tila magkapatid na halimaw na rumagasa
at sinagilahan ng pangamba ang ating diwa
isang araw lang nanalasa ang mga kuhila
ang lupit nila sa maraming tahanan gumiba
sa sementadong daan, ngitngit nila'y nagpabaha
iniwan nilang bakas ang mga putikang lupa
punong bumagsak, nasirang bahay, luhaang madla
kahirapan at dusa'y kanila pang pinalala
ang kapangyarihan nila'y sadyang dama ng madla
sa pagdatal ng bagong araw muling nanariwa:
ang pamahalaan nga ba'y handa sa mga sigwa?
sa unos, ang mamamayan ba'y paano naghanda?

(Ondoy - Setyembre 26, 2009; Pedring - Setyembre 27, 2011)

May Tunggalian ng Uri Kahit sa Balita

MAY TUNGGALIAN NG URI KAHIT SA BALITA

ni Gregorio V. Bituin Jr.

13 pantig bawat taludtod

bakit kaya pag pagkilos ng manggagawa

at pakikibaka ng mga maralita

ay bihira o hindi agad mabalita

kahit na ang mga nangyayari'y malala

ngunit pag press release na ng kapitalista

aba'y sadyang ito'y agad nababandera

talagang pinagkakaguluhan ng media

basta't balitang burges, nag-uunahan na

teka, magkano nga ba ang bawat balita

mga nasa media'y sadyang nagkandarapa

sa kapitalista'y di magkandaugaga

habang dehado lagi itong manggagawa

sa balita man, may tunggalian ng uri

basta mahirap, nadedehado ang puri

ngunit basta mayaman, laging pinupuri
ganitong estilo'y di dapat manatili

Sa Kongreso ng ZOTO

SA KONGRESO NG ZOTO

ni greg bituin jr.

11 pantig bawat taludtod

sa Hito covered Court nag-uumapaw

sa dami itong mga maralita

silang pawang sa hustisya nga'y uhaw

magko-Kongreso na ang mga dukha

pag-uusapan ang kinabukasan

ng kanilang bunying organisasyon

tatalakayin pati karapatan

sa paninirahan at demolisyon

mga kasama'y kay-agang dumating

mula sa labimpitong tsapter nila

dadalo sa makabuluhang piging

na simbolo ng pag-asa't hustisya

nirepaso nila ang Konstitusyon

may debate't may pinagkaisahan

tinalakay ang mga resolusyon

pinalakpakan ang sinang-ayunan

bagong pamunuan nila'y binoto

na siyang uukit ng bagong bukas

tiyak na tatatag muli ang ZOTO

dahil matwid ang tatahaking landas

Hibik ng batang lansangan

HIBIK NG BATANG LANSANGAN
ni Gregorio V. Bituin Jr.
8 pantig bawat taludtod

buhay ba'y lagi nang ganyan
sabi ng batang lansangan
araw-araw kagutuman
pamana ba'y kahirapan
ano bang pamamaraan
upang aking maiwasan
ang danas na kasalatan
at akin namang matikman
ang nasang kaligayahan
nais ko namang gumaan
itong aking kalagayan
a, ako'y maninilbihan
at aking pagsisikapang
magkatrabahong tuluyan
kahit maging alipin man
ng kung sinong mayayaman
tatanggapin kaya naman
ang tulad kong dukha lamang
o ako'y paglalaruan
at pagtatawanan lamang
basta aking susubukan
na magkatrabaho naman
di nga ba't may kasabihan
pag aking pinagsikapan
meron ding kapupuntahan
kapag pinangatawanan
pangarap ko'y makakamtan
basta't hindi sapilitan

Papuri ni Oriang kay Macario Sakay

PAPURI NI ORIANG KAY MACARIO SAKAY, 5 Nobiembre 1928

ni Gregorio V. Bituin Jr.

15 pantig bawat taludtod

kilala na niya noon pa itong si Macario

na kaibigang matalik ni Andres Bonifacio

isang barbero't gumampan din noon sa Teatro

at para kay Oriang, si Macario'y mabuting tao

"Itinuring ng ibang masamang tao't tulisan

gayong malaki ang naitulong sa Katipunan

di ko akalaing maging hantungan ay bitayan

gayong si Macario'y isang tunay na makabayan."

maikli man ang nasulat niya sa talambuhay

ay papuri na ito sa pagkatao ni Sakay

na ito'y Katipunerong kalayaan ang pakay

sa pakikibaka'y nagpatuloy, di nanlupaypay

salamat kay Ka Oriang sa kanyang mga sinabi

si Macario Sakay nga'y ating tunay na bayani

- gregbituinjr.

* "Kaya't kapagkarakang malaman ang nilalayon ng katipunan ay bumili agad ng malaking limbagan upang sa madaling panahon ay makayari agad ng maraming Kartilya, periodiko at mga palatuntunan, kaya noong huli'y pinagtulungtulungan nina Emilio Jacinto, Aguedo del Rosario, Alejandro Santiago, Cipriano at Marciano na taga-Pulo, Bulakan, at ang tagapamahagi at tagalakad ay sina Macario Sakay, at iba pang panguluhan. Ang palagay ng ibang siya'y masamang taong naging tulisan ay ewan ng huli, sapagka't nakita ko naman na may malaking ginawang tulong sa Katipunan. Si Macario Sakay ay tunay na makabayan at di ko akalain na ang maging hantungan ay ang bibitayan." ~ Gregoria "Oriang" De Jesus, Lakambini ng Katipunan at maybahay ni Gat Andres Bonifacio

Batu-Bato sa Lupa

BATU-BATO SA LUPA

ni Gregorio V. Bituin Jr.

7 pantig bawat taludtod

batu-bato sa lupa

pilit na tumatama

sa mga hampaslupa

kaya sila'y kawawa

batu-bato sa lupa

dapat nating ihanda

ang kapwa manggagawa

sa sosyalistang diwa

batu-bato sa lupa

bayaran nilang tama

itong lakas-paggawa

ng mga manggagawa

batu-bato sa lupa

obrero ang lumikha

ng ekonomya't bansa

bakit sila'y dalita

batu-bato sa lupa

bakit nagpapasasa

sa yaman nilang likha

yaong di gumagawa

batu-bato sa lupa

problema ba'y huhupa

bakit ba laging dukha

ang mga maralita

batu-bato sa lupa

huwag mangalumbaba

at mag-isip ng wala

baka araw masira

batu-bato sa lupa

ang tamaan kawawa

pag ginawa'y di tama

tatamaan ngang sadya

Tuwirin ang Daan

TUWIRIN ANG DAAN

ni Gregorio V. Bituin Jr.

6 pantig bawat taludtod

bakit ang dalaga

sa iyo'y namali

tuwirin ang daan

huwag biglang liko

bakit ba si lola

may tangan nang tungkod

tuwirin ang daan

huwag baku-babako

hinay-hinay, itay

sa pagtakbu-takbo

tuwirin ang daan

baka ka mahapo

kumusta na, anak

ang pag-aaral mo

tuwirin ang daan

di pwede ang dungo

basag na ang budhi

laklak pa ng laklak

tuwirin ang daan

nariyan ang lango

nakipagkarera

ang nagmamaneho

tuwirin ang daan

nang walang mabunggo

Sa Kaarawan ng Mahal Kong Ina

SA KAARAWAN NG MAHAL KONG INA

(sa kanyang ika-65 kaarawan at pagretiro 
sa trabaho, Setyembre 6, 2011)

ni Gregorio V. Bituin Jr.

14 pantig bawat taludtod

isang maalab na pagbati, mahal kong ina

na sa kaarawan mo, ikaw'y retirado na

haharapin mo na ngayon ay buhay na iba

pagkat tapos na ang iyong buhay-opisina

kilala ka namin, inay, napakatatag mo

anuman ang problema'y hinaharap ng todo

malalim magsuri at matalas magkomento

na sa palagay ko'y namana namin sa iyo

tulad ng graduation, iba na ang haharapin

pagkat panibagong buhay na ang tatahakin

di iyan simpleng pagtigil sa dating gawain

kundi bagong plano na ang pakaiisipin

pagbati, inay, ng maligayang kaarawan

ako man po'y tupang pulang nag-iba ng daan

ngunit tinahak ko'y para sa pagbuti naman

ng higit na nakararaming kapatid at bayan

maraming salamat, inay, sa inyong pang-unawa

alam nyong ang tinahak ko'y landas na dakila

payo nyo nga noon, basta gawin ko ang tama

kahit maghirap, basta't mabubuti ang gawa

nagpupugay kami sa aming dakilang ina

kaming anak ng Batanggenyo't Kinaray-a

di ka nagpabaya lalo't kami'y may problema

kahit matigas ang ulo ko'y naririyan ka

handang magpayo sa anak, handang umunawa

kahit madalas masakit, ikaw'y lumuluha

ngunit pinakita mong matatag ka't di nagigiba

sa pagpayo mo sa amin, di ka nagsasawa

kaming anak ninyo'y naririto't nagninilay

sana kaligayahan ang sa inyo'y dumantay

nagpapasalamat sa walang-sawa nyong gabay

maligayang kaaarawan at salamat, inay

Ang Mabuhay Di Lang sa Tinapay

ANG MABUHAY DI LANG SA TINAPAY

ni Gregorio V. Bituin Jr.

14 pantig bawat taludtod

di lang daw sa tinapay nabubuhay ang tao

siya'y nabubuhay din kasama ang gobyerno

dahil sa magsasakang kaysipag mag-araro

at produktong ginawa ng bisig ng obrero

nabubuhay ang tao di lamang sa tinapay

kundi dahil sa lupang pinagtamnan ng palay

dahil sa pamayanang bawat isa'y may ugnay

dahil sa manggagawang talagang nagsisikhay

tuyong hawot, kamatis, sinangag ay laganap

na agahan ng Pinoy pagkain ng mahirap

dusa, luha't linggatong ang madalas malasap

ng mga nagugutom na hustisya ang hanap

tinapay sa umaga pandesal kadalasan

palaman ay sardinas at bahaw ang agahan

ang handa naman kapag tanghalia't hapunan

ay ang pamatid-gutom na pwede na sa tiyan

pag binato ng bato, batuhin ng tinapay

upang ulo'y lumamig, mabawasan ang lumbay

dapat wala nang gutom sa lipunang mahusay

dahil ang karapatan sa pagkain ay tunay

Kailan Ba Makikita Silang Nangawala?

KAILAN BA MAKIKITA SILANG NANGAWALA?

(Alay para sa International Day of the Disappeared, 

Agosto 30, 2011)

ni Gregorio V. Bituin Jr.
15 pantig bawat taludtod

kailan ba makikita ang mga nangawala

mawawala na bang tuluyan ang kanilang mukha

di ba't aktibista silang ang ginawa'y dakila

para sa masa, para sa obrero't mga dukha

dahil ba nagrebolusyon, sila na'y isinumpa

sila'y nangawala na ng matagal na panahon

sinong magsasabi kung saan sila ibinaon

kailan nga ba makikita silang nangawala

malalaki na ang iniwan nilang mga bata

paghahanap nila'y kailan matatapos kaya

sa buhay na ito'y iyan ang kanilang inaadhika

saan ba makikita ang bangkay na nangawala

sila'y nangawala na ng matagal na panahon

sinong magsasabi kung saan sila ibinaon

nagkakaisa ng pangarap ang mga naiwan

mga nangawala'y tuluyan nilang matagpuan

kahit pawang kalansay na lamang upang mabigyan

ng disenteng libing at kanilang maparangalan

nang kahit paano, sakit sa damdami'y maibsan

sinong magsasabi kung saan sila ibinaon

sino kaya ang nag-utos upang sila'y ibaon

Sa mga nanalbahe

SA MGA NANALBAHE

(Alay para sa International Day of the Disappeared, 

Agosto 30, 2011)

ni Gregorio V. Bituin Jr.

15 pantig bawat taludtod

matagal na kaming desaparesido, noon pa
kami'y sinalbahe panahon pa ng diktadura
habang ang iba'y nangawala matapos ang Edsa
kami'y nakalibing sa kung saan, di pa makita
kaytagal na hinanap ng aming abang pamilya

humihibik sa karimlan, kaulayaw ang dilim
magbukangliwayway man ay lagi ring takipsilim
di namin madalumat yaong naranasang lagim
sa pagbabagong hangad, ginanti nila'y rimarim!
halimuyak ng hustisya'y amin bang masisimsim?

kayong may alam, aming labi'y saan nakabaon?
makonsensya't ituro na saan kami naroon!
kaming pinaslang nyo dahil pagbabago ang layon
kaming ang pinangarap, bansang ito'y makaahon
walang mayaman, walang mahirap, lahat mayroon

katotohanan tungkol sa amin ay inyong taglay
sabihin nyo na saan nalibing ang aming bangkay
upang puso ng naiwang pamilya'y tumiwasay
kahit man lang pahiwatig sa pamilya'y ibigay
nang kaming desaparesido'y matagpuang tunay!

Ano ang Rebolusyon?

ANO ANG REBOLUSYON?

ni Greg Bituin Jr.

Ang rebolusyon ay pagbato ng tae sa mukha ng mga imperyalista.

Ang rebolusyon ay pagpana sa puwet ng mapagsamantala.

Ang rebolusyon ay ang pagpukol ng bulok na kamatis at bagoong sa mga bulok na pulitikong pahirap sa bayan.

Ang rebolusyon ay ang mga lider na di nahihiyang maghawak ng plakard at bandila sa rali.

Ang rebolusyon ay ang pag-apak sa makasaysayang Mendiola, ang pangunahing lunsaran ng protesta.

Ang rebolusyon ay ang pagtulong sa dinedemolis na maralitang walang sariling bahay.

Ang rebolusyon ay ang pag-oorganisa sa mga manggagawang regular upang magtayo ng unyon.

Ang rebolusyon ay ang pag-oorganisa sa mga manggagawang kontraktwal na walang katiyakan sa trabaho.

Ang rebolusyon ay ang magkasintahang aktibista.

Ang rebolusyon ay ang mag-asawang nakikibaka at ang anak na sumusunod sa yapak ng ama't inang aktibista. 

Ang rebolusyon ay pagpawi sa pribadong pag-aari ng mga kasangkapan sa produksyon.

Ang rebolusyon ay sina kasamang Karl at Friedrich na nag-akda ng isang manipesto noong 1848 para sa uring manggagawa.

Ang rebolusyon ay si kasamang Vladimir at ang kanyang 45 tomo ng tinipong mga akda.

Ang rebolusyon ay sina kasamang Fidel at Che na nagbago sa landas ng pulitika sa kanilang bansa.

Ang rebolusyon ay si kasamang Popoy at ang diwang kanyang ipinamana sa manggagawang Pilipino.

Ang rebolusyon ay uring manggagawang nagkakaisa upang baguhin ang bulok na sistema.

Ang rebolusyon ay ang pananaig ng hinahon sa harap ng paninibasib ng kapitalismo sa mundo.

Ang rebolusyon ay pagmumulat sa manggagawa't maralita tungo sa adhikaing sosyalistang lipunan.

Ang rebolusyon ay ang kongkretong pagsusuri sa kongkretong kalagayan ng lipunan, kapaligiran at kapwa tao.

Ang rebolusyon ay siyang dapat pangarapin ng mayoryang naghihirap sa mundo laban sa iilang nagpapasasa sa yaman ng daigdig.

Sa Lambong ng Ulap

SA LAMBONG NG ULAP

ni Gregorio V. Bituin Jr.

13 pantig bawat taludtod

ayoko ng ganyang dilim ng kalangitan

pagkat tulad ito ng ako'y iyong iwan

tandang may unos at baha sa kalunsuran

tulad ng iwan mong ang puso ko'y sugatan

nais ko'y isang bagong araw ang sisikat

na siyang hihilom sa nilikha mong sugat

nais ko'y bughaw yaong langit sa pagdilat

na tandang may buhay sa kabila ng pilat

kung sakali mang lumambong muli ang ulap

sa kalangitang bughaw ng mga pangarap

may bago kayang pag-ibig na malalasap

tadhana ba'y muli tayong mapapagtiyap

umulan ma’t umaraw, tuloy ang pag-ibig

na sa bawat puso'y pagmamahal ang dilig

walang makapipigil kahit nanginginig

bumaha man ng luha't tuwa'y nakikinig

Kaming Aktibista'y Nabubuhay ng Marangal

KAMING AKTIBISTA'Y NABUBUHAY NG MARANGAL

ni Gregorio V. Bituin Jr.

14 pantig bawat taludtod

kaming aktibista'y nabubuhay ng marangal

nakikibaka man kami laban sa kapital

ngunit nakikibakang marangal, di kriminal

kami'y tumatalima sa disiplinang bakal

di nambabastos, di nanghihipo, at di imbi

di nagnanakaw, di nang-aapi ng babae

matanda, bata, tungkulin namin ang magsilbi

sa masa at nilalabanan ang mang-aapi

binabayarang tama ang anumang nasira

laging may paggalang sa bawat pananalita

isinasauli bawat hiniram sa madla

kapwa ma'y kagalit, di namin isinusumpa

di nangunguha kahit piraso ng sinulid

sa lipunan, mata't tainga namin ay di pinid

anuman ang isyu't pangyayari'y binabatid

pagkat buhay na marangal itong aming hatid

Hanggang Islogan Ka Lang (?!)

HANGGANG ISLOGAN KA LANG (?!)

ni Gregorio V. Bituin Jr.

15 pantig bawat taludtod

anang pangulo, "Kung Walang Corrupt, Walang Mahirap"

paano naman kung ang kanyang mga patakaran

ay kontra-masa, kontra-obrero't kontra-mahirap

di ba't ito'y tulad din ng pagiging utak-wangwang?

kaya di sapat ang "walang corrupt, walang mahirap"

na kanyang islogan mula halalan hanggang ngayon

dahil ito'y magmumukha lang isang pagpapanggap

kung ramdam pa rin ng nakararaming masa'y gutom

sabi pa niya sa telebisyon, "Kayo ang Boss ko!"

ngunit tila di siya sa sambayanan nagsabi

kundi sa mga kinatawan ng kapitalismo

na nangaroon at walang sawang ngingisi-ngisi

patunay ang mga patakarang pribatisasyon

na polisiya ng kanyang public-private partnership

kung masa'y Boss, bakit masa'y busabos pa rin ngayon

tila pangako nya'y patay na diwa't panaginip

pangako nya'y "Tutungo Tayo sa Tuwid na Daan"

ngunit tuwid bang manggagawa'y iniitsapwera?

tuwid bang dukha'y lubog pa rin sa karalitaan?

tuwid bang sa impyerno pala tayo dinadala?

kung ganyan pala, hanggang islogan ka lang, pangulo!

baka ang labi mo'y gasgas na sa kapapangako

kung di mo kaya, umalis ka na sa iyong pwesto

kaysa naman ang bayan pa'y iyong ipagkanulo

Sa Bahay na Bato, Kahit Ito'y Munti

SA BAHAY NA KAHOY, KAHIT ITO'Y MUNTI

ni Gregorio V. Bituin Jr.

12 pantig bawat taludtod

Sa bahay na kahoy, kahit ito'y munti

pinagmulan nami'y pawang sari-sari

may burgis, may peti-b, manggagawa't hindi

kami'y nagkasama, prinsipyo ang sanhi

inoorganisa'y mga aping uri

Sa bahay na kahoy, kahit ito'y munti

minsan, may pagkain doong sari-sari

minsan kami'y busog, kadalasang hindi

pagkat pultaym kami't salat sa salapi

na nakikibaka hangga't maaari

Sa bahay na kahoy, kahit ito'y munti

iniisip doon ang dangal at puri

ng obrero, kapwa't inaaping uri

at laging kongkreto kaming nagsusuri

dahil nais naming sa laban magwagi

Sa bahay na kahoy, kahit ito'y munti

pinaplano doon paano magwagi

sa pakikibakang di minamadali

tatanggalin ang pribadong pag-aari

nang kapitalismo'y tuluyang mapawi

Sa sinisinta kong kamag-aral

SA SINISINTA KONG KAMAG-ARAL
ni Gregorio V. Bituin Jr.
15 pantig bawat taludtod

Fides, maganda kong kaklase ng elementarya
Isang Miss Universe na sinuyo ng pusong sinta
Diwatang katamis-tamisang kaysarap kasama
Espesyal sa aking puso ang mutyang ninanasa
Sana'y mapangasawa kita, sinisintang dilag
Dahil iniibig kita, o mutyang anong rilag
Estilo ma'y magkaiba, pag-ibig ay banaag
Lagi kang paglilingkuran ng pusong lumiliyag
O, Fides ng buhay ko, mamahalin kitang tunay
Sa aking puso't isipan, ikaw ang laging taglay
Sa problema't kalutasan nawa'y magkaagapay
At kita'y laging magsasama sa ligaya't lumbay
Nais kitang maging asawa, aking klasmeyt Fides
Tunay ang pagsinta kong tila asukal sa tamis
O, aking Fides, ako'y ibigin nang di mahapis
Sapagkat pag nabigo, pagluha ko'y isang batis

Panata sa Sinta

PANATA SA SINTA

ni Gregorio V. Bituin Jr.

10 pantig bawat taludtod

habambuhay akong magsisisi

o sisisihin ko ang sarili

kung ang babaeng iniibig ko'y

di ko lubusang maipagtanggol

kung di ko siya matutulungan

sa lahat ng problemang dumatal

kung ako'y di magsasakripisyo

para sa kapakanan ng mahal

kung buhay ko'y di maihahandog

para sa kaligtasan ng sinta

kung siya'y di agad kakampihan

pag siya'y pinagkakaisahan

dahil tiyak kung magkakagayon

habambuhay akong magsisisi

mas maigi pang magpatiwakal

kung iyan ay di ko magagawa

marahil ako sa kanya'y hangal

ngunit siya'y pinakamamahal

poprotektahan ng buong puso

ang sinisinta ko't sinusuyo

di ko siya iiwan sa laban

makaharap man si Kamatayan

buhay ko ma'y aking ipapalit

buhay ko man ang maging kapalit

kaya pinagsisikapan ko nang

gawin ang lahat ng nararapat

nang di ko sisihin ang sarili

nang di ako magsisi sa huli

Di Lahat ng Tahimik, Nasa Loob ang Kulo

DI LAHAT NG TAHIMIK, NASA LOOB ANG KULO

ni Gregorio V. Bituin Jr.

15 pantig bawat taludtod

di lahat ng tahimik ay nasa loob ang kulo

pagkat sila'y nag-iisip muna bago kumibo

nagsusuring lagi upang di sila matuliro

sa maraming bagay, isyu't pangyayari sa mundo

marahil sila rin ay may pangarap na gumuho

kaya di malasap sa buhay ang anumang luho

marahil sila'y mahihirap na salat at tuyo

na ramdam sa lipunan ay pagkaapi't siphayo

marahil sila rin yaong taong may tinatago

na kung mabubuking, sila'y agad nang maglalaho

marahil sila rin ang tahimik na nadudungo

sa dalagang pinakaiibig nang buong puso

may tahimik na di na alam kung saan patutungo

dahil pag-asang pagbabago'y di na mapagtanto

may tahimik namang ang pluma'y armas, nanggugupo

at sa aping masa'y rebolusyon ang tinuturo

di lahat ng tahimik ay nasa loob ang kulo

dahil may masasaya sa sarili nilang mundo

tulad sila ng ahedres na tahimik na laro

matalas, may inisyatiba, may sariling palo

kung uunawain lang sila, tayo'y may mabubuo

na ugnayang tapat, sila ma'y ating makabunggo

di agad mag-iinit ang ating kamao't dugo

pang-unawa'y una upang maling haka'y maglaho

Ang Obrero at ang Organisador

ANG OBRERO AT ANG ORGANISADOR

ni Gregorio V. Bituin Jr.

13 pantig bawat taludtod

minsan ay napaisip ang isang obrero:

"ako'y manggagawa, trabaho nang trabaho

araw-araw na lang, ako'y kayod kabayo

ngunit bakit naghihirap pa rin sa mundo

habang ngingisi-ngisi lang ang aking amo"

himutok pa niya, "ito ba'y kapalaran?

nagsisipag ako sa araw-araw na lang

ngunit nabubuhay pa rin sa karukhaan

paano ang pamilya ko't kinabukasan

kung among kapitalista lang ang yayaman"

nagpayo ang organisador, "magsuri ka

kalagayan mo'y dapat mong maanalisa

ano ang kasaysayan mo't nagkaganyan ka

suriin ang kalagayan mo sa pabrika

kung may tanong ka, paliliwanagan kita"

"pagsusuri'y dapat nating maunawaan

kung bakit ito'y ating kinakailangan

dahil ang bawat bagay dapat may batayan

bawat pangyayari sa mundo'y may dahilan

suriin ang paligid, sistema't lipunan"

"simulan mo nang magtanong ng bakit, bakit

suriin kung bakit ka naghihinanakit

bakit kalagayan sa pabrika'y kaylupit?

bakit ba karapatan mo'y pinagkakait?

bakit ikaw na lumilikha'y nanliliit?"

"unawain mo bakit sistema'y baluktot

pagpaplano sa pabrika'y di ka kasangkot

sa kabila ng sipag mo, sahod mo'y bansot

bakit sa tubo ang amo mo'y mapag-imbot

sa pagsusuri'y makikita mo ang sagot"

organisador at obrero'y nagkasundo

nagtalakayan kung paano maigupo

ang sistemang sa dugo nila'y nagpakulo

pinag-usapan saan nanggaling ang tubo

bakit pagtaas ng sweldo'y tila malabo

sinuri pati ang kanilang kalagayan

kapitalista't obrero'y anong ugnayan

bakit manggagawa'y napagsamantalahan

hanggang nagkasundong baguhin ang lipunan

uring obrero'y pagkaisahing tuluyan