Gina Jaculo, Batang Imbentor

GINA JACULO, BATANG IMBENTOR
ni Gregorio V. Bituin Jr.
15 pantig bawat taludtod

labindalawang taong gulang pa lamang si Gina
ngunit Gawad Imbentor ng Taon ay natamo na
sa isang Kumbensyon sa Kanakanak, Alaska
dahil sa "Sig-ang" na mahalagang imbensyon niya

ang Sig-ang ay Hiligaynon sa Tagalog na kalan
sa Ingles ay tripod, na disenyo'y pang-cellphone laan
imbensyon nga'y sadyang para sa pangangailangan
at pag-aangkop na rin sa makabagong lipunan

nang tinanong sa imbensyon agad niyang sinabi
na iyon ay para maiwasan ang aksidente
sa kabataan o sinumang mahilig mag-selfie
taga-Negros, siya'y batang dapat ipagmalaki

pag ang isip, sa pagtulong sa kapwa nakatutok
ay nagtatagumpay sa dumaratal na pagsubok
maagang narating ni Gina Jaculo ang tuktok
na nanguna sa dalawampu't anim pang kalahok

sa kabutihan ng puso mo nagmula ang lahat
pagkat pinagpaguran mo'y tanda ng pag-iingat
natamo mong tagumpay ay tunay ngang di masukat
sa iyo, ang aming mensahe’y Maraming Salamat!

10/20/2014, Kanakanak, Alaska | Twelve year old Gina Jaculo of Bago Riverbank, Bago City, Negros Occidental bested 26 other finalists from 24 countries and territories in the recently held Inventor of the Year Award. The 2014 Inventions of the Year Convention held in Kanakanak, Alaska on October 18, 2014, was attended by 216 young inventors from 127 countries and territories, and considered to be the most competitive contest and the biggest inventions showcase in the convention’s 86- year history. Gina Jaculo, a shy and frail Grade 7 girl from Visayas Science High School advanced to final selection after her “Sig-ang” invention captured the attention of most judges during her project presentation together with her Science adviser Professor George Mahalay. The invention is an electronic tripod specially designed for all cell phones (with or without camera). ~ http://www.thephilippinepride.com/

Ang magkayapos na prutas

ang litrato'y mula sa facebook

ANG MAGKAYAPOS NA PRUTAS
ni Greg Bituin Jr.

tila naglalaro
ang dalawang puso
sana'y di maglaho
ang kanilang anyo

Ang kasamang aklat

ANG KASAMANG AKLAT
ni Gregorio V. Bituin Jr.
15 pantig bawat taludtod

di ako nalulungkot, may kasama akong aklat
na sa mga suliranin ko'y aking kabalikat
ang pakikisama nga nito'y ano't di masukat
may nauunawa mo, may di mo nadadalumat

pagkat mga aklat ay kaibigang piping saksi
tagapayo, masasandalan, kasamang kaybuti
dama mo ang katapatan sa kanyang pagsisilbi
ang aklat ma'y pipi ngunit kayraming sinasabi

Sariling aklat

SARILING AKLAT
ni Gregorio V. Bituin Jr.
13 pantig bawat taludtod

"If there's a book you really want to read, but it hasn't been written yet, then you must write it." ~Toni Morrison

kung may nais kang mabasang magandang aklat
subalit di pa pala ito nasusulat
aba'y simulan nang kathain ito't sukat
mapalathala't nang amin ding mabulatlat

nais naming mabasa ang bago mong katha
lalo't laman ay galing sa puso mo't diwa
halukipkip man niyan ay hirap at tuwa
o kaya'y mapangiti kami't mapaluha

kaysarap damhing may aklat ka nang sarili
katha mo'y kayraming tagahangang bumili
lalo na't akda'y para sa ikabubuti
ng kapwa, ng bayan, sa bayan ay may silbi

sige't akdain mo na ang aklat mong asam
ilabas mong lahat ang mga agam-agam
bakasakaling may sagot ang mga paham
nang unti-unti, suliranin ay maparam

Sa pagkikita ng Climate Walkers at KM71

SA PAGKIKITA NG CLIMATE WALKERS AT KM71
ni Gregorio V. Bituin Jr.
13 pantig bawat taludtod

Mabuhay ang Climate Walkers at magniniyog
Paa man nila'y nagkapaltos, nagkalintog
Kahit sa init ng araw, sila'y nasunog
Nagkasamang naglakad, pati sa pagtulog
Hustisya'y marubdob nilang iniluluhog
Nagkakaisang diwa sa bayan ay handog.

- sa pagkikita ng mga Climate Walkers at 71 nagmartsang kasapi ng Kilus Magniniyog (KM71) sa Ateneo de Manila University sa Katipunan, Lungsod Quezon, Nobyembre 20, 2014

Paglisan

PAGLISAN
ni Gregorio V. Bituin Jr.
13 pantig bawat taludtod

nais na naming umuwi, nais na namin
pagkat Tacloban ay amin na ring narating
nais nang makauwi't pamilya'y yakapin
pagkat di nakita nang higit sambuwan din

ngunit tila namimitig ang mga paa
napako sa pagkatayo kahit ipwersa
tila ayaw pang iwan ang mga kasama
at kaisa sa nasang hustisyang pangklima

ngunit kailangang umuwi, kailangan
at magtagpo marahil sa facebook na lamang
ngunit mahalaga'y ang mga nasimulan
ay maipagpatuloy saanmang larangan

kami man sa Climate Walk ay magkahiwalay
danas at aral sa amin ay nagpatibay
lalo sa adhikang magpatuloy sa lakbay
at hustisyang pangklima'y makamit ding tunay

- sa Mactan Domestic Airport, Cebu
Nobyembre 11, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda.

Sa mga bagong kaibigan

SA MGA BAGONG KAIBIGAN
ni Gregorio V. Bituin Jr.
15 pantig bawat taludtod

ang Climate Walk ay di lamang pagtungo sa Tacloban
pagkakaroon din ito ng bagong kaibigan
mula sa ibang lugar, samahan, at kaisipan
bagong kasama sa misyon para sa daigdigan

sa Climate Walk ay magkasama sa bawat sandali
tumugon sa panahong problema'y sadyang masidhi
lalo na sa mga layuning hindi ka hihindi
kaya di natatapos sa Tacloban ang aming mithi

mga bagong kaibigang kasama sa paglaban
upang katarungan ay sama-samang ipanawagan
upang baguhin ang lumalala nang kalagayan
upang ipadala sa masa ang pagdadamayan

sa mga bagong kaibigan, salamat sa inyo
para sa hustisyang pangklima, magkaisa tayo
panahon nang umakma sa daratal na delubyo
bawat isa'y maging handa sa daratal na bagyo

tayo'y magkakaiba man, tayo'y nagkakaisa
sa panawagang "Climate Justice Now!" ay sama-sama
magpatuloy dahil daigdig natin ay iisa
paapuyin nating lalo ang adhika, kasama

- Brgy. Esperanza,San Francisco, Camotes Island, Cebu, Nobyembre 10, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Pasasalamat sa lahat ng sumama sa Climate Walk

PASASALAMAT SA LAHAT NG SUMAMA SA CLIMATE WALK

ni Gregorio V. Bituin Jr.

13 pantig bawat taludtod

taos-pusong pasasalamat sa lahat

na sa Climate Walk ay sumama't kabalikat

sa hirap at pagod, sa tuwang di masukat

magpatuloy, halina't ating ipagkalat

kahit munti man, nagtagumpay isiwalat

sa buong bayan ang adhikang Climate Justice

ang mga nasalanta'y di dapat magtiis

pamahalaan ay dapat gumampang mabiis

sa kanilang tungkulin, tiwali'y maalis

mga maling polisiya'y dapat mapalis

salamat sa mga sumama sa Climate Walk

di pa ito tapos, kayrami pa ang lugmok

sa Climate Justice dapat pa tayong tumutok

at ang mga grupo't bansa'y ating mahimok

sa panawagang Climate Justice na'y lumahok

prinsipyong tangan ng Climate walk ay yakapin

Climate Justice Now, patuloy nawang dinggin

nag-iisa lang naman ang daigdig natin

pag di kumilos, tao'y saan pupulutin

ipagpatuloy sa gawa ang adhikain

- sa barkong Little Ferry 2, 9:30 pm, habang nakaupo sa Sit # 191, at tumatahak mula Ormoc papuntang Cebu, Nobyembre 9, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Gunita

GUNITA
ni Gregorio V. Bituin Jr.
13 pantig bawat taludtod

lumuluha ang awit, tila nabibikig
lumulutang sa hangin yaong angking himig
di masawata ang papalakas na tinig
na kanyang dama sa gabing iyong kaylamig

napaisip, sino ang sa bayan lulupig
sinong sa mga maysala'y dapat umusig
sa mga kaganapan, puso'y naaantig
ang mga namumuno ba'y handang makinig

kayraming buhay nang nangawala sa unos
ang ibang nakaligtas, ngayon na'y busabos
nawala lahat-lahat, naghirap ng lubos
pasakit na ito'y kailan matatapos

naganap bang iyon ay isang panaginip
hindi ba't siya'y isa sa mga nasagip
naligtasan niya ang disgrasyang gahanip
ngunit sa puso'y may sakit pang halukipkip

- madaling araw, sa UP Tacloban, Nobyembre 9, 2014, habang inaalala ang naganap na unos sa Tacloban, isang taon na ang nakararaan

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Panimdim

PANIMDIM
ni Gregorio V. Bituin Jr.
7 pantig bawat taludtod

parating ang dagundong
naririnig ang ugong
saan tayo hahantong
tuloy ba sa kabaong

hinaharap ang lagim
sa bukas na kaydilim
iyo bang naaatim
kainin ng rimarim

pag ragasa’y tumahak
tahana’y nawawasak
gumagapang sa lusak
nabubuhay sa sindak

kailangang lumaban
mamatay sa paglaban
pakikibaka'y sundan
ito'y pagtagumpayan

ang paggamit ng lupa
dapat gawin ng tama
gawa man ng Bathala
dapat tayong maghanda

unos, nambubusabos
sistema'y nalalaos
solusyong kinakapos
ay dapat tinutuos

- sa UP Tacloban, Nobyembre 9, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Pahimakas sa nangawala

PAHIMAKAS SA NANGAWALA
ni Gregorio V. Bituin Jr.
15 pantig bawat taludtod

pagkawala ninyo'y di dapat mapunta sa wala
may dapat magawa kaming narito pa sa lupa
di sapat magpatuloy lang ang pagtulo ng luha
dapat singilin, pagbayarin ang mga maysala

nagbabago na ang klima, debate ng debate
kayraming namatay, sa debate'y anong nangyari
nangwasak si Yolanda, bakit timpi pa ng timpi
iyang katanghalian ba'y mananatiling gabi

tinatamaan ng delubyo'y bansang nagsasalat
mga maralita't manggagawa ang inaalat
may ginagawa man tayo ngunit ito'y di sapat
dapat ang magtulungan ay lahat ng bansa, lahat

sa inyong nangawala, di kami nakalilimot
pagkat sisingilin namin ang maysala sa gusot
pagbabayarin namin ang maygawa ng hilakbot
hustisya'y dapat kamtin, singilin ang mapag-imbot

nangyari sa inyo'y patuloy na didibdibin
nakasalalay din ang kinabukasan namin
kung tutunganga lang kami't sila'y di sisingilin
pag nagkita tayo sa langit, kami'y sisisihin

sigaw namin, Climate justice, Now! hustisyang pangklima!
mamamayan, kumilos, Climate Justice Now! tayo na!
ipagpatuloy ang nasimulang pakikibaka
sa mga biglang namapayapa, Hustisya! Hustisya!

- sa Tacloban, matapos ang konsyerto sa City Hall, isa sa kumanta si Kitchie Nadal, Nobyembre 8, 2014, unang anibersaryo ng Yolanda

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Libingang Masa sa Tacloban

LIBINGANG MASA SA TACLOBAN

ni Gregorio V. Bituin Jr.

13 pantig bawat taludtod

kahindik-hindik, nakawawarat ng puso

ang dama kapag libingang masa'y tinungo

animo'y ramdam ang hikbi nila't hingalo

sa ragasang dumatal at biglang lumayo

katulad ba nila'y Gomorang isinumpa

o sa lugar nila'y nakaamba nang sadya

yaong pagdatal ng rimarim, nagbabanta

o klima'y nagbago't tayo'y walang kawala

sinong maysala sa buhay na napabaón

iyang climate change ba'y nauuso lang ngayon

may dapat bang managot sa nangyaring iyon

paano ba di na mauulit ang gayon

libingang masa'y paano ilalarawan

nang hindi manginginig ang iyong kalamnan

sadyang kaysakit ng biglaang kamatayan

ng mahal sa buhay, sa puso at isipan

- sa Libingang Masa (mass grave) ng mga namatay sa bagyong Yolanda, Holy Cross Memorial Garden, Lungsod ng Tacloban, Nobyembre 8, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda.

Ang barko sa Anibong

ANG BARKO SA ANIBONG

ni Gregorio V. Bituin Jr.

13 pantig bawat taludtod

may mga barkong sumadsad sa kalupaan 

noong kasagsagan ng kaytinding Yolanda

isa na roon yaong barko sa Anibong 

MV Eva Jocelyn na nasa Tacloban

doon sa lungsod, sa kabahayan ng masa

patunay kung gaano katindi ang unos 

na sa buong kalunsuran ay sumalubong

na sa buong lalawigan ay nanalasa

na sumalanta sa laksa-laksang palayan

na sumira sa kayraming mga tahanan

na dahilan ng pagkamatay ng marami

na ito'y patunay ng nagbabagong klima

na tayo'y may dapat gawin, nang di maulit

ang nangyari nang si Yolanda'y nanalasa

na tayo'y dapat kumilos, at maging handa

na dapat nating paghandaan ang anumang

unos, delubyo, iba't ibang kalamidad

na may dapat singilin, dapat pagbayarin

na Climate Justice nga'y talagang kailangan

na ang Climate Walk ay panimula pa lamang

- sa pagtahak sa Brgy. Anibong sa Lungsod ng Tacloban, Nobyembre 8, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Paglalakad ng nakayapak sa kahabaan ng San Juanico Bridge

PAGLALAKAD NG NAKAYAPAK SA KAHABAAN NG SAN JUANICO BRIDGE
ni Gregorio V. Bituin Jr.
15 pantig bawat taludtod

usapan iyon, nakayapak naming tatahakin
ang mahabang San Juanico Bridge, aming dadamhin
ang bawat pintig ng mga danas at daranasin
ng iba pang yapak na may akibat na mithiin
para sa kapwa, pamilya, bayan, daigdig natin

masayang nilakad ang tulay ng San Juanico
higit iyong dalawa't kalahating kilometro
habang inaawit ang Climate Song na 'Tayo Tayo'
sa ilalim, ang tubig ay animo'y ipuipo
higop ay kaylakas, tila ba kaytinding delubyo

masakit sa talampakan ang magaspang na lupa
natutusok ang kalamnan, animo'y hinihiwa
iyon ang tulay na nagdugtong-tulong noong sigwa
kinaya naming tahakin, animo'y balewala
lalo't sa puso'y akibat ang mabunying adhika

nilakad naming nakayapak ang tulay na iyon
sama-samang ipinadama ang partisipasyon
bilang handog sa bayang nasa rehabilitasyon
bilang alay sa puso't diwang nangawala roon
bilang pahayag na tayo'y may dapat gawin ngayon
bilang pahayag na tayo'y dapat kumilos ngayon

- Tacloban, Nobyembre 8, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda.

Sa Basey, Lakad sa Madaling Araw

SA BASEY, LAKAD SA MADALING ARAW
ni Gregorio V. Bituin Jr.
15 pantig bawat taludtod

ikalawa ng madaling araw, gising na lahat
handang maglakad kahit araw ay di pa sumikat
tila araw iyong ang damdami'y di madalumat
tila huling araw ng sakripisyong di masukat

sa relo'y ikalawa't kalahati, handang handa
ang lahat, na kaysasaya't tunay ngang kaysisigla
huling araw ng Climate Walk, papatak ba ang luha
ang tiyak, ang Climate Justice ay dadalhing panata

inayos na ang bulto, core Climate Walkers sa una
ang mga banner ng Climate Walk ay tangan na nila
bandila, sunod ang banner na dilaw, asul, pula
sa mahabang streamer ang marami'y nakatoka

madilim, ngunit naglakad na ng madaling araw
sementeryo'y dinaanan nang may tanglaw na ilaw
kilabot sa dilim ang animo'y nangingibabaw
kilabot ang lamig na sa balat nga'y sumisingaw

higit tatlong oras naglakad, hanggang matanaw rin
ang tulay, isa't isa'y sabik, kayhirap pigilin
narito na tayo sa tulay, atin nang lakarin
hanggang araw ay sumikat, araw ng adhikain

- Basey, Samar, Nobyembre 8, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Pagpipinta ng mahabang streamer na "Climate Justice Now!"

PAGPIPINTA NG MAHABANG STREAMER NA "CLIMATE JUSTICE NOW!"
ni Gregorio V. Bituin Jr.
15 pantig bawat taludtod

wala yaong nagpinta sa pader ng Allen, kaya
ginawan ng paraan, tulung-tulong na nilikha
mahabang tela'y hinugisan upang maging giya
ng bawat isa, at bawat isa'y nagpintang kusa

limang talampakan ang lapad, dalawampung yarda
at malaking "Climate Justice Now!" ang ipininta
may iba't ibang hugis sa gilid ng mga letra
diskarte, iba't ibang kulay, tulong-tulong sila

at may nagpinta rin naman sa panali sa ulo
ganuon din, "Climate Justice Now" yaong nakasentro
banner ay nilagyan ng kahoy, hahawakan ito
naghahanda na sa tatawiring San Juanico

yaon ang bisperas ng lakad patungong Tacloban
lahat naghahanda, marami pang nagdaratingan
bakas ang tuwa, seryoso, nakikipaghuntahan
halos di makatulog, kahit nakapikit naman

magdamag pinatuyo ang streamer na bumakat
sa sementong sahig, tila pinintahan ding sukat
iyon ay alaala't paalaala sa lahat
di pa tapos ang laban, magkaisa tayong lahat

- Basey Town Gymnasium, Basey, Samar, Nobyembre 7, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Pagtitig sa dalampasigan

PAGTITIG SA DALAMPASIGAN

ni Gregorio V. Bituin Jr 

15 pantig bawat taludtod 

binubura ng dalampasigan ang alaala

pansamantala, at binibigti ang pagnanasa 

sa tagay, libog, halakhak, luho't luha ng sinta 

upang unahin ang mga layuning mahalaga

dapat nakasasabay tayo sa bawat sandali 

inaalala'y winaglit na ng dalampasigan 

at nilulon nito ang pagkatao't kabuuan 

ito muna ang unahin, suliranin ay iwan

may misyon ka para sa bayan at sandaigdigan 

maging maagap at ihasik ang mabuting binhi

ibinabalik ng dalampasigan ang gunita

upang makibahagi sa dinaanan ng sigwa

di dapat maulit na may buhay na nangawala 

di na dapat maulit na may buhay pang mawala 

magtulungan sa pagdatal ng panahon ng hikbi

- Basey Town Gymnasium, Basey, Samar, Nobyembre 7, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda.

We are part of the Climate Walk

WE ARE PART OF THE CLIMATE WALK
by Gregorio V. Bituin Jr.
8 syllables per line

We are part of the Climate Walk
Climate Justice is what we look
Journey poems is for the book
Walk many miles is what we took

The Earth is our only lair
The only Earth that we must care
Today that climate change is here
Climate Justice call should be clear
To everybody far and near
And protect this Earth that is dear.


KAMI'Y BAHAGI NG CLIMATE WALK!
ni Gregorio V. Bituin Jr.
13 pantig bawat taludtod

Dito sa Climate Walk kami'y naging bahagi
Katarungang Pangklima itong aming mithi
Mga tulang isasaaklat ay lunggati
Kaylayo man ng datal nitong mga binti

Daigdig na ito'y tangi nating tahanan
Natatanging tahanang dapat alagaan
Nagbabagong klima'y narito nang tuluyan
Katarungang Pangklima itong panawagan
Na dapat matanto ng buong sambayanan
At ipagtanggol ang mahal na Daigdigan

Saya sa pagtangan ng bandila sa Climate Walk

SAYA SA PAGTANGAN NG BANDILA SA CLIMATE WALK
ni Gregorio V. Bituin Jr.
15 pantig bawat taludtod

bandila ng Pilipinas, akin ding natanganan
tatlong araw bago kami dumatal sa Tacloban
dama ko ang saya, tila ba ako'y kinatawan
ng bansa sa Olympics, sa harap ng daigdigan

iyon ang una at huli kong pagtangan sa bandila
mula nang maglakad hanggang marating ang adhika
diwa ng mga bayani'y sa diwa nanariwa
bandila iyong simbolo ng pagkatao't bansa

ang watawat ng bansa'y kaysarap hawakang tunay
kahit pagod na'y taas-noo mong iwawagayway
di man Olympics, kundi sa mahabang paglalakbay
sa Climate walk ay isa na iyong magandang alay

- gabi, sa Basey, Samar
Nobyembre 6, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda.

Lumbay

LUMBAY
ni Gregorio V. Bituin Jr.
11 pantig bawat taludtod

di madalumat ang inaasahan
habang paparating na sa Tacloban
naroroon na ilang araw na lang
tatahakin pa'y isang libong hakbang

ang mata'y pikit, ang isip ay gising
sari-saring gunita'y naglalambing
at mga bagay ay pinaghahambing
lagay ba nila ngayo'y mas magaling

kaysa dati, isang taon pa lamang
di sapat upang yao'y maigpawan
kayhirap damhin ng angking kawalan
tila sugat ay di malulunasan

panahon lang ang makapagsasabi
o baka kahit panahon na'y bingi
pagkawala nila'y nakabibigti
sa damdaming di magkasya sa gabi

- sa People's Park ng Calbiga, Samar, Nobyembre 5, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Sa bahay ni kasamang Joemar

SA BAHAY NI KASAMANG JOEMAR
ni Gregorio V. Bituin Jr.
6 pantig bawat taludtod

payapa ang lugar
ni kasamang Joemar
sa tahanan nila
kami'y namahinga
payak lamang iyon
tatak ng hinahon
at maaliwalas
saya'y mababakas
may espiritu ba?
galang kaluluwa?

kami'y pumanaog
tungong tabing-ilog
paa'y tinampisaw
tubig ay kaylinaw
tinahak ang daan
kahit maputikan
lakad papalayo
tila sumusuyo
ng isang diwata
diwata ng diwa

may unos ang dibdib
wala mang panganib
nilandas ang liblib
kayraming talahib

- sa Hinabangan, Samar, katanghaliang-tapat, Nobyembre 5, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Tiim-bagang sa salimuot

TIIM-BAGANG SA SALIMUOT 

ni Gregorio V. Bituin Jr 

15 pantig bawat taludtod 

masalimuot din ang climate change, masalimuot

di malirip bakit isyu itong nakakatakot 

di matingkala ang panganib na idinudulot

sa suliraning ito'y paano makalulusot 

halina't magsuri at hanapin kung anong sagot

industriyalisadong bansa ba ang nambalakyot 

pagsunog ng fossil fuels ang pangunahing sanhi

nariyan ang coal-fired power plants na nakadidiri 

mga bansa'y yumaman dito't naging masalapi

habang dapog sa atmospera'y naipon, nagbinhi

kaya karaniwang klima'y nagbagong di mawari

dito'y sinong naging mapalad, sinong nangalugi 

mga industriyalisadong bansa'y nakinabang

nagsunog ng maruming enerhiya'y nagsiyaman 

tama bang umunlad, masira man ang kalikasan

tama bang dukhang bansa'y maapektuhang tuluyan 

aling bansa ang apektado't alin ang nanlamang 

masdan mo ang nangyayari't mapapatiim-bagang

paano tayo aakma sa klimang nagbabago 

paano aagapay sa nararanasang bagyo 

paano ang gagawin sa tumitinding delubyo 

di sapat ang mapatiim-bagang, kumilos tayo

singilin, pagbayarin mga bansang sanhi nito

sa sama-samang pagkilos, magtatagumpay tayo

- sa bayan ng Motiong, Samar, Nobyembre 4, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda.

Panunumpa para sa Kalikasan

PANUNUMPA PARA SA KALIKASAN 

ni Gregorio V. Bituin Jr.

15 pantig bawat taludtod

kaharap ang mga estudyante ng Catbalogan
si Meyor Steph, Dingdong, Climate Walkers, lingkodbayan
pati na mga kabataang may bagong samahan
kanang kamay ay itinaas, tanda’y katapatan
at sabay kaming nanumpa para sa kalikasan

si Naderev "Comm. Yeb" Saño ng Climate Change Commission
ang nangunang nagsalita sa panunumpang iyon
ang bawat salita niya sa bawat isa'y hamon
ang bawat kataga sa mga isyu'y tumutugon
bawat lumabas sa bibig ay isang inspirasyon
bawat pangungusap ay tila isang paglalagom

animo'y saulado niya ang kanyang winika
tandang isang pantas sa pangkapaligirang gawa
hinggil sa kalikasan yaong kanyang sinalita
para sa mamamayan upang mundo'y maunawa
hinggil sa Climate Justice upang mundo'y makalinga
para sa lahat upang magsikilos tayong kusa

salamat, Comm. Yeb, sa panunumpang makahulugan
sa pagtupad sa pinanumpaan, kami'y asahan

- sa Samar State University, habang isinasawa ang Climate Change Congress at launching ng National Youth Commission (NYC) Policy Advisory Campaign on Climate Change and DRR Youth Participation, Lungsod ng Catbalogan, Nobyembre 3, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Pagsama ng mga batang scout sa Climate Walk

PAGSAMA NG MGA BATANG SCOUT SA CLIMATE WALK 

ni Gregorio V. Bituin Jr.

I

Mga scout ay laging handa 

Sa pagtulong, tapat ang diwa

Sa bayan, tapat ang adhika 

Sa kapwa'y tagapamayapa

II

Masayang sinalubong ang Climate Walk 

Ng mga scout, kaysayang lumahok 

Sumama pa sa mahabang lakaran 

Kaybabata pa ng kanilang gulang

Ulang malakas ay biglang bumuhos

Sila'y nangabasa, tuloy ang kilos

Subalit sila'y baka magkasakit

Sa isang lugar, tumigil nang pilit

Gayunman, Scouts, maraming salamat 

Inyong pakikiisa'y di masukat

Mula sa Climate Walk, MABUHAY KAYO! 

Balang araw, magkikita pa tayo

* Ang buong Oktubre 2014 ay pagdiriwang ng sentenaryo ng Scouting sa Pilipinas.

* Ang mga Boy Scouts at Girls Scouts, kasama ang kanilang mga guro, ay mula sa San Vicente Elementary School, Brgy. San Vicente, Lungsod ng Catbalogan, Samar, Nobyembre 2, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Ligalig at Tigatig

LIGALIG AT TIGATIG

ni Gregorio V. Bituin Jr

13 pantig bawat taludtod

"Di nga masama ang pag-unlad kung hindi nakakasira ng kalikasan." - mula sa grupong ASIN

paano kung biglang maulit ang ligalig

ang mata ng unos sa atin nakatitig

paano kung tumama'y dambuhalang tubig 

sa paghingi ng saklolo'y sinong dirinig

nangyaring Yolanda'y sadyang nakatutulig

nang malaman ang naganap, natitigatig

nangyari sa nasalanta'y nakaaantig

may masisisi ba, sinong dapat mausig

pag nangyari muli'y kanino na sasandig

kung mga pinuno ng bansa sa daigdig

ay kanya-kanya at di nagkakapitbisig

upang lutasin ang suliraning di ibig

labis-labis na ang nagtatambakang banig

habang kulang na ang isusubo sa bibig

- habang umuulan, Baby Jhun Eatery, Brgy. Balugo, Tarangnan, Samar, Nobyembre 2, 2014, malapit sa marker ng Km 779

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda

Pag-aayuno sa Undas

PAG-AAYUNO SA UNDAS

ni Gregorio V. Bituin Jr.

15 pantig bawat taludtod

bilang pakikiisa sa kayraming nangawala 

animo'y desaparesidong tinangay ng baha

ilan sa Climate Walker ay nag-ayuno ng kusa 

noong Undas upang linisin din ang puso't diwa

animo'y hunger strike ng tulad kong aktibista

wala kaming kain, tanging tubig lang bawat isa

nag-aayuno'y naglalakad, at inaalala 

ang panahong nagdaan na't ang kakaharapin pa

magdamag, maghapon, ayunong bente-kwatro oras

para sa hustisyang pangklima nang madla'y mawatas

na ito'y sama-samang ipaglaban hanggang wakas 

upang wala nang sa bagyo'y mayroon pang mautas

maraming salamat sa nakiisa't nag-ayuno 

para sa Climate Justice, ito'y munting sakripisyo

nawa hustisyang ito'y magisnan nating totoo 

para sa kinabukasan ng nagbabagong mundo

- sa munisipyo ng Gandara, Samar, Nobyembre 1, 2014

* Ang tulang ito ay isa sa serye ng mga tulang sinulat ng makata sa Climate Walk mula Luneta hanggang Tacloban na nagsimula ng Oktubre 2, 2014 at magtatapos sa Nobyembre 8, 2014, ang unang anibersaryo ng napakatinding bagyong Yolanda.