Ang Gintong Likido

ANG GINTONG LIKIDO
ni Gregorio V. Bituin Jr.
12 pantig bawat taludtod

gintong likido ang madalas tagayin
ng makatang itong kayhilig tumungga
isip lumilipad at tangay ng hangin
kaya ang makata'y madalas tulala

hik! tagay pa tayo, aking mga kabig
ito lamang nama'y munting pagsasaya
ang gintong likido'y dadamhin ng bibig
kaysarap nga nitong tungga kong serbesa

pag nasasayaran ang lalamunan ko
pawang kasiyahan ang inihahandog
kaysarap tunggain ng gintong likido
serbesang kaysarap kaysa puting bilog

ang gintong likido'y tinatagay natin
ngunit nilalabas gintong likido rin