BUNKHOUSES SA YOLANDA
ni Gregorio V. Bituin Jr.
15 pantig bawat taludtod
umano'y mahuhunâ ang bunkhouses na ginawâ
napakatipid umano't nakasayad sa lupa
di raw nararapat tirahan ng mga binahâ
bubong pa'y manipis, karupukan nito'y halatâ
paano kaya't dumating ang panibagong sigwa
sabistandard ang materyales, wala kang kawalâ
mga bunkhouses ay pawang batbat ng kontrobersya
na sa paggawa nito'y may katiwalian nga ba?
mabuting ibigay na lang sa mga nasalanta
yaong mga materyales para sa bahay nila
sa gayon, di tumagal ang kanilang pagdurusa
upang mga na-Yolanda'y di na sa tent tumira
Walang komento:
Mag-post ng isang Komento