PUSONG BALDADOni Gregorio V. Bituin Jr.
10 pantig bawat taludtod
nababalda na rin ba ang puso
naghihirap na't natutuliro
sa sakit, tumatagas ang dugo
bakit ba kami'y di magkasundo
kayhirap kung ang puso'y baldado
isa lang ang nagsasakripisyo
habang ang isa'y iba ang mundo
at doon nakatuon ng todo
muling nakatitig sa kisame
hinaka'y pag-ibig ba'y salbahe
ang puso'y laging di mapakali
nasaan ang pinipintakasi
mahirap kung puso ang mabalda
hihilutin ba ito ng masa
o nitong panahong nag-iisa
baldadong puso ba'y paano na?
Walang komento:
Mag-post ng isang Komento