Tagtuyot

TAGTUYOT
ni Gregorio V. Bituin Jr.
13 pantig bawat taludtod

mainit ang simoy ng hangin sa kanluran
kaya nayayanig ang aking katauhan
tila ba panganib yaong magdaraan
na baka magdulo din sa kapahamakan

magtatagtuyot na kaya may kakulangan
ng tubig sa mga pananim at sakahan
lalo't inuming kailangan ng katawan
baka pati ulo'y uminit ng tuluyan

habang nagbabago ang klima nitong bayan
anumang epekto'y ating mararamdaman
tiyak sa bawat araw ay maalinsangan
na maaring dulot at uhaw, kagutuman

ang hanging dumaratal ay pakiramdaman
ang sakahang natuyo'y suriin at masdan
kaya nararapat lang itong paghandaan
ng tao, ng bayan, at ng pamahalaan