Sino Bang May-ari ng Pilipinas?

SINO BANG MAY-ARI NG PILIPINAS?
ni Gregorio V. Bituin Jr.
12 pantig bawat taludtod

1
Sino bang may-ari ng Pilipinas?
Ang mga kapitalista bang ungas?
O mga pulitikong mapagwaldas
Na sa kabang bayan ay balasubas?
2
Lupain ng ating ninuno dito
Mas matagal pa kaysa mga tao
Ngunit nang dokumento'y maimbento
Lupa'y agad nang inangkin ng dayo
3
Ang ating mga ninuno'y lumaban
Sa mga mananakop na dayuhan
Inilunsad ang mga himagsikan
Upang dayo'y lumayas nang tuluyan
4
Nang manalo ang mga Pilipino
Sa himagsikan nina Bonifacio
Biglang umentra ang Kano dito
Umastang tagapagtanggol ng tao
5
Binili ng Kano ang Pilipinas
Sa halagang dalawampung milyong kas
Na dolyares sa Espanyang marahas
Kaya Kano na ang dito'y bumasbas
6
Marami pang dayo yaong dumating
Dinigma rin tayo't tinalo natin
Nagka-martial law sa ating lupain
Sa Edsa Uno, masa'y nanalo rin
7
Lumipas pa yaong maraming taon
Ay di lubusang lumaya ang nasyon
Pagkat tayo pa rin ay nilalamon
Ng kabulukan ng globalisasyon
8
Nais pang mag-ChaCha ng pulitiko
Nag-Con Ass sila doon sa Kongreso
Saligang Batas ay nais mabago
Lalo ang pag-ari ng lupa dito
9
Sandaang porsyento nang mag-aari
Ng lupa natin yaong dayong hari
Ito'ng nais ng mga trapong kiri
Nasa'y sirain ang sa bayang puri
10
Pag nagbago na ang Saligang Batas
At nilaspag ng mga trapong ungas
Sa bayang sarili'y mapapalayas
Tayong Pinoy na kanilang hinudas
11
Sila'y dapat lang nating patalsikin
Huwag tayong pumayag na angkinin
Ng mga dayo't taksil ang lupain
Na sinilangan ng ninuno't natin
12
Sa sariling bayan tayo sumibol
At buong buhay na'y dito ginugol
Kaya bayan ay ating ipagtanggol
Laban sa mga dayo't trapong nauulol.