SALAWIKAING TAHIMIK
ni Greg Bituin Jr.
8 pantig
may bagay bang walang laman
o ito’y talinghaga lang?
o baka di lang malirip
ang ilan nating naisip
ano ba ang katuturan
o kaya ay kabuluhan
kung ating pag-iisipan
salawikaing may laman
ako naman ay nagtipon
nang may mabahagi ngayon
ang naritong halimbawa
ay pampatalim ng diwa
halina’t ating tunghayan
ang nasaliksik kong ilan:
napakaingay ng lata
kapag wala itong karga;
pag ang ilog ay magaslaw
tarukin mo at mababaw;
pag ang tubig ay tahimik
lipdin mo ma’y di malirip;
yaon daw taong maabla
karaniwa’y walang obra;
taong matipid mangusap
ay hindi nakakasugat;
kaygandang salawikain
na makakatulong na rin
sa ating kinabukasan
at sa kapwa kababayan
sadyang malasang namnamin
at kaysarap ding papakin
busog ang isipan natin
sa mga salawikain.
Walang komento:
Mag-post ng isang Komento