Ang bisyo ko

di ako mahilig mag-inom, wala akong bisyo
hilig ko lang ay tulaan ang sinusuyong mutya
habang kinakatha ang ninanasang pagbabago
na dapat mapangunahan ng uring manggagawa

wala akong bisyo, di ako naninigarilyo
hilig ko lang na pagsinta'y bigkasin sa diwata
habang nagsisikap itayo ang bahay na bato
at inaawat ang demolisyon sa maralita

anumang bisyo'y wala, di rin ako babaero
ang tanging bisyo ko lamang ay kumatha ng tula
para sa mga babae, maralita, obrero
para sa bayan, sa masa, sa mga walang-wala

ako'y makatang dukha man ay nagpapakatao
kahit na walang kaalwanan kundi pulos luha

- gregbituinjr.

Kapirasong dangal

Kapiraso mang dangal ang mayroon ako
Ay ipaglalaban ko ito hanggang dulo
Pagkat ito ang buod niring pagkatao
Iyong yurakan at magpapatayan tayo
Rinig mo ba bawat bulong ng iyong budhi
At ramdam ba ng puso mo ang pagkasawi
Sa dangal naroon ang pagkatao't binhi
Oo, ipaglalaban anuman ang sanhi
Na kapirasong dangal man ay mahalaga
Gaano man kaliit ay makikibaka
Dapat ipagtanggol at bantayan tuwina
Ang dangal ay huwag yuyurakan ng iba
Nararapat ipaglaban kahit ng hangal
Gagawin ang dapat bilang mabuting asal
Ang dangal na sa puso't diwa'y nakakintal
Lulupigin sinumang mangyurak sa dangal

- gregbituinjr

Patay kang tambay ka

PATAY KANG TAMBAY KA

akala ko ba, ayaw mo sa naglipanang tambay
gayong dahil sa utos mo'y kayrami nang pinatay
at mga tambay ngayon ay iyo pang inaakay
upang holdapin ang mga obispo at mapatay

praning talaga ang tulad mong pangulong manyakis
epekto na ba ng fentanyl, naging utak-ipis
sa ganito bang pangulo, masa pa'y magtitiis
mahilig magbanta habang maliit tinitiris

ayaw sa tambay dahil walang mabuting magawa
ngunit ngayon inaakay ang tambay sa masama
pag ginawa'y krimen, ang umakay ba ang maysala
o ang mismong gumawa ang mabibilanggong lubha

pag pagpaslang sa kapwa tao'y iyong isinulsol
ano nang tawag sa iyo, di ba't isa kang ulol
para kang nang asong praning na iba kung kumahol
buti sana kung ikaw na nanulsol ang madedbol

- gregbituinjr.

Alab ng pagsinta ang samo ko't adhika

Pinipintuho kita, mahal kong diwata
Alab ng pagsinta ang samo ko't adhika
Gawin natin ang isang magandang simula
Ikaw lamang ang aking tinatangi't mutya

Babagtasin natin ang landas ng pag-ibig
Iisipin ka hanggang puso'y makarinig
Gagawin lahat upang kita'y makaniig
Kaharapin man ay dusa'y di palulupig.

O, sinta, pag-ibig nati'y di maglalaho
Yayakapin kita ng buo kong pagsuyo
Iwing pagsinta sa pamilya'y magbubuo
Kahit puno pa ng sakripisyo't siphayo

Ating buuin ang ating anak na bugtong
Wagas na pag-ibig nawa ang sumalubong.

Ang masarap hagkan

Mas masarap hagkan ang kanyang pawis
Kaysa sa amoy-sabon niyang kutis

- gregbituinjr.

Pagpapatiwakal ng dalawang kabataan

kahindik-hindik ang nangyaring pagpapatiwakal
pagkat di na nila  napahalagahan ang buhay
sa mga danas na problema ba'y natitigagal?
at dahil sa sama ng loob nagpapakamatay?

estudyanteng labinlimang taon ang binatilyo
at labing-anim na taon ang dalagitang yaya
ang una'y sinturon ang pinambigti diumano
sa harap ng mga bata'y nagbigti ang ikalwa

di na ba nakayanan ang kanilang suliranin
kaybabata pa'y sariling buhay na ang kinitil
anong nangyari't nagawa ito'y pakasuriin
o baka naman sa kanila'y may ibang sumiil

nahan na ang pag-ibig sa puso ng mga iyon
kung winala'y sariling buhay nang gayon na lamang
nahan ang mga magulang na dapat pumroteksyon
sa tulad nilang buhay ay di sinaalang-alang

- gregbituinjr.
- tula'y batay sa dalawang ulat sa pahayagang Bulgar, Hunyo 14, 2018, p. 2

Sa mamamaslang

SA MAMAMASLANG

anong karapatan mong manghusga
at walang awa pang pumapatay
dahil tingin mo'y ipis lang sila
at hindi taong dapat mabuhay

ngunit bakit ka paslang ng paslang
imbes na sila muna'y malitis
ang buhay ng iba'y inuutang
dahil daw bayan ay nililinis

halang ang naglilinis sa bayan?
upang bansa raw ay pumayapa?
halang, halang sa kapangyarihan
kapwa'y ibinabaon sa lupa!

utos umano ng nasa taas
kaya huwag daw silang sisihin
di bale nang butasan ang batas
basta't para sa bansa'y gagawin

ang dukha'y pinalutang sa dugo
sa harap ng pamilya'y bulagta
siya daw kasi ang itinuro
mamamaslang nga'y kasumpa-sumpa

- gregbituinjr.

Ang tanong niya sa akin

Ito'ng tanong niya sa akin: Komunista ka ba?
Sabi ko: Ang sagot ko'y depende sa nagtatanong...
Komunista ba ako pagkat naglingkod sa masa?
O dapat kong paglingkura'y kapitalistang buhong?

Kung komunista ang pagtulong sa dukha't pulubi
Komunista pala'y makatao't mapagkalinga
Kung komunista ang pagtulong sa kawawa't api
Komunista pala ako't dapat pinagpapala

Sa katagang komunista ba'y magagalit ka rin?
Gayong ginawa mo lang ang tamang kilos at asal
Komunista ba'y dapat katakutan o mahalin?
Gayong sila'y kapwa tao ring marunong magmahal

Magpakatao ka lang at makipagkapwa-tao
Ang mahalaga'y ginagawa mo sa kapwa'y wasto.

- gregbituinjr.

Aking hangarin ang kabutihan nating dalawa

Aking hangarin ang kabutihan nating dalawa
Kaya magsikap para sa bubuuing pamilya
Oo, mahal ko, gagawin lahat ng makakaya
Yamang kitang dalawa ngayon na'y magiging isa

Suntok sa buwan ang pangangarap ng barang ginto
O kaya'y nais tumama sa lottong niluluto
Sipag at tiyaga ang gawin nang hindi susuko
Yariin ang mga proyektong dapat mapalago

Ako'y magsisipag, tayo'y magkasamang gagawa
Laging nating pahalagahan yaong pang-unawa
Iwasan ang mga bisyong sa pamilya'y sisira
Sunggaban ang pagkakataong kamtin ang ginhawa

Tanging sa pagtutulungan lang natin makakamit
Ang ginhawa't kaalwanang pangarap na masapit

- gregbituinjr.

Aking paraluman

AKING PARALUMAN
(acrostic sonnet)

Ako'y bubuyog sa talulot mo'y dumapo
Kita'y kinakasi sa ubod niring puso
Isa kang bulaklak na aking nakatagpo
Nang panahong nasa dusa't nasisiphayo
Gaano kahalagang ukulan ang sinta
Pagsuyo'y ubod-tamis na ipakikita
Aking gagawin ang lahat ng makakaya
Rosas kang sa puso ko'y kahali-halina
Aariing langit ang kabiguang angkin
Lunas sa dusa'y kung ako'y iyong lingapin
Unos ma'y anong tindi ikaw'y iibigin
Matayog mang bundok ay aking lalakbayin
Ako ang bubuyog sa rosas na matinik
Na sa puso mo'y pag-ibig ang ihahasik

- gregbituinjr.

Pagkat inasawa ko rin ang bayan

ako'y tibak na di isang uhugin
katapatan ko'y sa aking tungkulin
nag-asawa ma'y tapat sa tungkulin
sa mga niyakap na simulain

pagkat inasawa ko rin ang bayan
pagkat ako'y sadyang anak ng bayan
babaguhin ang bulok na lipunan
tungkulin ito hanggang kamatayan

di magpapadagit sa tusong lawin
kahit pa unos ay sasalungain
kahit sampung bundok ay tatawirin
malalim mang ilog ay lalanguyin

pagkat inasawa ko rin ang bayan
pagkat ako'y sadyang anak ng bayan
ang tungkulin ko hanggang kamatayan
ay baguhin ang bulok na lipunan

- gregbituinjr.

Mula nang makilala kita

Mula nang makilala kita, aking amasona
Aktibista akong napaibig sa iyo, sinta
Kinakasi kita sa bawat kong pakikibaka
Ibig kong sa habambuhay kita ang magkasama

Berdugo man ako ng mga surot ng lipunan
Ang prinsipyong tangan ko'y sadyang di mapipigilan
Kita'y magbubuo ng isang bagong pamayanan
Adbokasya'y para sa hustisya at karapatan

Hindi tayo tatahimik sa panahong ligalig
Upang itama ang mga mali, di palulupig
Wastong makapiling ang proletaryong kapitbisig
At sama-samang buuin ang bukas ng daigdig

Gawin natin kung anong talagang makabubuti
Maging makatwiran sa ating mga sinasabi
Angkinin ang proletaryadong diwa, aking kasi
Tahakin ang wastong landas, panganib ma'y sakbibi

Aking sinta, kakaharapin ma'y sanlibong sigwa
Kikilos tayo, sangkaterba ma'y makasagupa
Obrero'y kasama bilang hukbong mapagpalaya
Tungo sa sistemang ang pagsasamantala'y wala.

- gregbituinjr.