PAGPUGAYAN ANG MGA MARTIR
ni Gregorio V. Bituin Jr.
13 pantig bawat taludtod
iginuhit sa dugo yaring kasaysayan
bawat sakripisyo'y dapat pahalagahan
alalahanin ang ginawa nila't ngalan
mga nakibakang puspos ng kagitingan
ating gunitain di lang ang mga lider
kundi bawat lumaban, mga naging martir
karaniwang tao mang binangga ang pader
at nag-adhikang ibagsak ang nasa poder
kayrami nilang namatay nang di pa oras
silang matatag sa prinsipyong nilalandas
upang likhain ang pinangarap na bukas
ngunit marami'y pinaslang ng mararahas
nag-alay ng buhay para sa simulain
nag-alay ng talino't panahon sa atin
pinagtanggol ang prinsipyo't kilusan natin
silang mga martir ay dapat kilalanin
Walang komento:
Mag-post ng isang Komento