HUKBO NG MGA KUMAIN-DILI
ni Gregorio V. Bituin Jr.
13 pantig bawat taludtod
hukbo ng kumain-dili'y napakalaki
sa mundo'y milyon-milyon, talagang kayrami
habang pagkai'y puno sa mall at grocery
dahil walang pera'y di sila makabili
habang napapailing ka ay nagsusuri
bakit sistemang ganito'y nananatili
dahil pagkai'y ginawa, tubo ang mithi
di upang pakainin ang gutom na lipi
mga kumain-dili'y laksa sa Aprika
kilala sa mga bansang ito'y Somalia
Burundi, Rwanda, Zimbabwe, Congo't Angola
meron ding ganito sa Latin Amerika
payat yaong mga bata't kulang sa lakas
marami sa kanila'y sa gutom nautas
sa Asya’y mayroon ding sa gutom di ligtas
sa North Korea, Bangladesh, at Pilipinas
anong tulong natin, paano mababago
ang sistemang itong ginugutom ang tao
sobra-sobra ang pagkain ngunit may presyo
lipunan ba'y hahayaan na lang ganito
may nagugutom sa gitna ng kaunlaran
pagkai'y karapatan, huwag pagtubuan
gawin ang pagkain para sa mamamayan
upang magawa ito, sistema’y palitan
Walang komento:
Mag-post ng isang Komento