Isang Kahig, Isang Tula

ISANG KAHIG, ISANG TULA

(Ganyan Kaming Makatang Dukha)

ni Gregorio V. Bituin Jr.

10 pantig bawat taludtod

yaong makata'y nagdaralita

siya'y isang kahig, isang tula

ang pakiramdam nya'y isinumpa

kaya nanatili siyang dukha

pag naging bisyo mo ang pagtula

dapat lang na ikaw'y maging handa

alam mong walang pera sa tula

ngunit patuloy ka sa pagkatha

pagkat isang sining ang pagtula

na alay sa masa't manggagawa

kahit bawat kahig, isang tula

ang makatang sangkahig, santuka

patuloy ang buhay ng makata

sa maramdamin niyang pagkatha

sa matindi niyang pagtuligsa

sa pagsangkot sa isyu ng madla

tuloy ang paglikha ng makata

ng tulang larawan ng adhika

kahit bahagya nang makatuka

siya'y patuloy pa ring kakatha

Pinabili Lang ng Suka'y Nagmakata

PINABILI LANG NG SUKA'Y NAGMAKATA

ni Gregorio V. Bituin Jr.

8 pantig bawat taludtod

pinabili lang ng suka

ngayon na ay manunula

sari-saring mga paksa

ang nilapatan ng tula

nakita niya'y tindera

na pagkagandang dalaga

ngiti pa lang, pamatay na

kaya napatula siya

sa dalaga'y natulala

kaya biglang nagmakata

tinulaan na ang mutya

nakalimutan ang suka

hinanap ng kanyang ina

suka daw ay nasaan na

bakit daw tula ang dala

sa adobo'y isasama

pinabili lang ng suka

ngunit biglang nagmakata

nakatas na'y talinghaga

nang makita'y sintang mutya

ito ang kanyang istorya

inutusan lang ng ina

imbis na suka'y tula na

ang pinaggagawa niya

Sa Pagdatal ni Falcon

SA PAGDATAL NI FALCON

ni Gregorio V. Bituin Jr.

12 pantig bawat taludtod

lumuha ang langit doon sa España

dinalaw ni Falcon, Pasig, Marikina

pasahero'y walang masakyan sa Edsa

tila buong Metro Manila'y lubog na

sobrang naglalawa ang mga kalsada

sana'y hindi ito matulad kay Ondoy

na maraming tao'y agad naitaboy

mula sa tahanang mistulang binaboy

na tila kinain ng laksang kumunoy

ang mga binaha'y nagsisipaglangoy

kaya sa pagdatal ng bagyong si Falcon

huwag magpatulog-tulog, magsibangon

bago pa ang baha sa atin lumamon

sa kailaliman tayo'y maibaon

halina't maghanda tayong lahat ngayon

sa muling pagluha nitong kalangitan

basura'y lumutang, baha ang lansangan

baradong imburnal ay dapat matingnan

bagyong Falcon, kami na'y iyong tigilan

bago may buhay pang mawalang tuluyan

Sa Mga Magiging Abogadilyo

SA MGA MAGIGING ABOGADILYO

ni Gregorio V. Bituin Jr.

13 pantig bawat taludtod

(para sa mga kaklase ko sa Paralegal Training on Labor Relations, Book V of the Labor Code, na ginanap sa Pansol, Calamba City, Laguna, mula Hunyo 1-3 at Hunyo 21-23, 2011)

maraming mga batas ang dapat alamin

maraming mga butas ang dapat silipin

maraming mga kaso ang dapat suriin

kaya Labor Code ay ating kabisaduhin

ano ang employer-employee relationship

bakit management lagi tayong sinisilip

ano ba ang lagi nilang nasasaisip

at ang manggagawa'y kanilang bina-badtrip

ano nga ba itong collective bargaining

bakit management madalas na napapraning

bakit sahod ayaw itaas kahit kusing

obrero'y saan ba nila inihahambing

maraming mga tanong ang dapat masagot

kaya pag-aralang mabuti ang Labor Code

alamin ang batas, mga pasikut-sikot

nang sa obrero'y totoong makapaglingkod

kaya sa mga magiging abogadilyo

hahawakan na natin ang maraming kaso

ngunit tungkulin ay di natatapos dito

pag-aralan din natin ang kapitalismo

pag-aralan ang mga batas sa pabrika

pati lipunang ginagalawan ng masa

bakit ba ang sistema'y mapagsamantala

manggagawa'y sikapin ding maorganisa

ang manggagawa'y di makina, kundi tao

kaya patakaran ay dapat makatao

ngunit kung ang manggagawa'y inaabuso

dapat siyang tulungan ng unyon ng todo

sa nangyayari'y di tayo dapat pumikit

kung maaari lang, manggagawa'y magpiket

ipakitang sila ri'y marunong magalit

pag ginagawa ng management ay masakit

at kung kinakailangang sila'y magwelga

dapat magkaisa ang mga unyonista

di dapat na estilo nati'y bara-bara

dapat lahat ng rekisitos, magawa pa

hangga't may mga inaaping manggagawa

at sa loob ng pabrika'y kinakawawa

tungkulin nating laban nila'y mapasigla

nang magapi ang kapitalistang kuhila

Salus Populi Est Suprema Lex

SALUS POPULI EST SUPREMA LEX

tula ni greg bituin jr.

10 pantig bawat taludtod

(nilikha sa Paralegal Training on Labor Relations, Book V of the Labor Code, na ginanap sa Pansol, Calamba City, Laguna, mula Hunyo 1-3 at Hunyo 21-23, 2011)

ang kapakanan ng sambayanan

ang pinakamataas na batas

dapat itong tandaan ninuman

nang di sila maapi't madahas

salus populi est suprema lex

kapakanan ng tao ang salik

kung karahasan ang hinasik

inapi'y dapat lang maghimagsik

at kung ang batas ay butas-butas

dapat itong ayusing tuluyan

upang mga problema'y malutas

ng mabilis at makatarungan

mga inaapi'y nasasabik

na karapatan nila'y mabalik

upang sila'y di na maghimagsik

salus populi est suprema lex

Sa Puso Ko Kita Ibinaon

SA PUSO KO KITA IBINAON

ni greg bituin jr.

13 pantig bawat taludtod

ikaw ang dati at bago kong inspirasyon

na sa pangarap ko'y laging naglilimayon

pagtingin ko sa iyo'y saan paroroon

di pa kita maarok, sinlalim ng balon

pag naiisip ka, ang wala ko'y mayroon

pagkat ang iisa'y nagdodoble na ngayon

sa panaginip, kasama kitang bumangon

tila ako adik na sa iyo'y nagumon

naging inspirasyon na kita mula noon

kaya pagsinta sa iyo'y malaking hamon

kung ang iyong ganda'y makamandag na lason

titikman ko iyan kahit di na magbangon

ikaw ang dati at bago kong inspirasyon

kaya sa puso ko ikaw na'y ibinaon

Ako'y Iyong Gamugamo, Apoy Kita

AKO'Y IYONG GAMUGAMO, APOY KITA

ni greg bituin jr.

9 pantig bawat taludtod

ikaw yaong apoy sa lampara

na sa akin ay nakahalina

gamugamo akong sumisinta

sa iyong pinangarap ko,sinta

nais ko pang sa iyo'y madarang

kaysa ikaw ay aking layuan

di baleng dalhin sa kamatayan

basta't ikaw ang napupusuan

ang puso ko'y matagal nang patay

ngunit muli mong binigyang buhay

kahit na ang pakpak ko'y maluray

ay pilit kitang hahagkang tunay

ako'y iyong gamugamo, sinta

at apoy kang aking nadarama

Dapat Magkausap Tayo ng Sarilinan

DAPAT MAGKAUSAP TAYO NG SARILINAN

ni greg bituin jr.

13 pantig bawat taludtod

dapat magkausap tayo ng sarilinan

nang sa gayo'y di ko madama ang kawalan

hinihiling ko sa mundo'y ikaw lang naman

bakit naman hindi mo pa ako pagbigyan

di bale nang ang matamo ko'y kabiguan

kaysa pag-uusap ay di natin subukan

hinihintay ko lang, mahal, ay kung kailan

turan mo at darating ako sa tipanan

kailangan nating mag-usap ng harapan

nilalaman ng ating puso'y magsabihan

sana man lang, di ako umuwing luhaan

na ang puso'y pira-piraso na't duguan

iniluluhog ko'y pusong may katapatan

nangangakong pag tayo na'y di ka iiwan

Ang Larawan Mo

ANG LARAWAN MO

ni greg bituin jr.

13 pantig bawat taludtod

ang larawan mo'y isisilid ko sa bulsa

o kaya'y ikakabit ko sa iyong blusa

dahilan ka kung bakit nais kong mag-alsa

laban sa sistemang mapang-api sa masa

sa larawan mo'y tila aking nababasa

na ayaw mo nang ikaw'y laging nag-iisa

bigyan ako ng pagkakataon, pag-asa

at tiyak kong sasarap ang iyong panlasa

lalo't natanto mong magandang kumbinasyon

kitang dalawa kung maging magkarelasyon

ngunit pansinin mo sana ako paglaon

upang di lang kita pangarap hanggang ngayon

di ka dapat hanggang larawan lang, mahal ko

sana'y magniig na ang ating pagkatao

Nakita Uli Kita sa Panaginip

NAKITA ULI KITA SA PANAGINIP

tula ni greg bituin jr.

14 pantig bawat taludtod

nakita uli kita sa aking panaginip

habang aking iwing puso'y iyong halukipkip

ako nga ba'y mahal mo na kaya sinasagip

mula sa mga panganib na nasasaisip

bakit kaya, sinta, ayaw mo akong tigilan

panay ang dalaw mo sa aking puso't isipan

pahiwatig ba itong dapat kitang ligawan

na kahit sa panaginip ako'y sinusundan

marahil lihim mo akong inukit sa puso

inukit sa puso mong ako ang sinusuyo

sinuyo mo akong pag-ibig mo'y nangangako

nangangakong ang pag-ibig mo'y di maglalaho

pag muli mo akong dinalaw sa panaginip

tila di mo ako matiis na di masilip

laman na yata ako ng iyong puso't isip

tatanggapin na kita sa muli kong pag-idlip

Muli, Para Kay F

MULI, PARA KAY F

ni greg bituin jr.

15 pantig bawat taludtod

iniisip kong bawat katha ko'y binabasa mo

ikaw na aking inspirasyon sa buhay na ito

kaya, sinta, sa pagkakatha'y nagsisipag ako

habang akda'y inaalay sa masa at sa iyo

mula sa pagkalugmok, nabuhay ang aking pinsel

pagkat ikaw'y naririyang mistulang isang anghel

ang bawat kinatha'y inukit, kinatam, sininsil

inspirasyon kitang sa diwa ko'y nakaukilkil

pag nalanta ang mga taludtod ay dinidilig

upang lumago ang mga saknong ng pagniniig

nasa isip kong kinulong kita sa aking bisig

ligaya'y dama habang sa akin ka nakahilig

sana'y di ko lang naiisip na binabasa mo

ang bawat kathang pinaglalamayan ko ng todo

kundi inaabangan at kinasasabikan mo

ang mga akdang sadyang nilikha para sa iyo

Si Tatay at si Rizal

SI TATAY AT SI RIZAL

ni Gregorio V. Bituin Jr.

13 pantig bawat taludtod

(Hunyo 19, 2011 - Father's Day

at 150th birthday ni Gat Jose Rizal)

ngayong araw na ito'y aking napagnilay

bakit ipinagdiriwang ngayon ng sabay

ang kaarawan ni Rizal at mga tatay?

dahil ba sila'y parehong bayaning tunay?

isa'y pinatay, namatay para sa bayan

isa'y nabuhay bilang ama ng tahanan

tulad ni Ama'y aking sinasaluduhan

ang bayaning sa Bagumbayan ay pinaslang

pinalaki kami ni Tatay sa maayos

upang magandang bukas ay makamtang lubos

nilabanan ni Rizal ang pambubusabos

hanggang kanyang buhay sa Luneta tinapos

papuri sa gabay ng aming pagkatao

sa amang gumiya sa mga anak nito

papuri rin sa nagmulat sa bansang ito

na siyang awtor ng El Filibusterismo

at ng obra-maestrang Noli Me Tangere

Rizal at tatay, kayong dalawa'y bayani

sa mga problema'y di kayo naging bingi

at ninais nyong bansa't pamilya'y umigi

si Rizal ang bayani ng lahing magiting

at ang ama'y bayani sa pamilya natin

pareho natin silang bayani ang turing

kaya si Tatay at Rizal ay mahal natin

Kabuluhan

KABULUHAN

ni greg bituin jr

15 pantig bawat taludtod

biglang nagkaroon ng kabuluhan ang buhay ko

nang muli kong masilayan ang magandang ngiti mo

ang diwa't pananaw ko sa mundo'y biglang nagbago

pagkat sa tagal ng panahon ay nagkita tayo

noong wala ka pa'y tila wala nang kabuluhan

ang aking kinabukasan dahil sa kabulukan

ng sistemang ang alam lang ay pawang kabuhungan

ng mga nakaraang gobyerno ng kabugukan

ngunit nang makita kita't masilayan kong muli

ang maamo mong mukha at kaaya-ayang ngiti

aba'y inspirasyon kitang nais kong manatili

sa aking tabi't hahagkan ang iyong mga labi

nagkaroong muli ng kabuluhan ang buhay ko

sana nama'y di mo ipagkait ang pag-ibig mo

Habang Papalubog ang Araw

HABANG PAPALUBOG ANG ARAW

ni Gregorio V. Bituin Jr.

15 pantig bawat taludtod

mag-isa kong tinutungga ang beer sa isang kubo

ang nasa gunita'y ang magandang ngiti't mukha mo

habang ang paglubog ng araw kanina'y tanaw ko

at minamasdan ang pangarap sa kanyang pagyao

bakit, sinta ko, sa akin ay parang umiiwas

kahit sa facebook, ako'y unti-unti mong kinaltas

sa puso ko'y lumalatay ang iyong mga hampas

dahil ba iba ka't iba ang aking nilalandas

alam mong nais kitang isama sa pagbabago

upang itayo ang isang lipunang makatao

na ang bawat karapatan ay totoong serbisyo

ngunit kung nais mong ako na'y magbago'y turan mo

pagkat lahat naman ng ito'y mapapag-usapan

upang sa pangarap ko'y makasama kang tuluyan

o sa pangarap mo'y makasama ako't kagampan

habang binubuo'y isang bagong kinabukasan

bakit imbis bukangliwayway, paglubog ng araw

ang aking matatamasa't lagi nang matatanaw?

pwede ka bang makasama pagkat buhay ko'y ikaw?

o iwi kong puso'y nais mong dumugo't malusaw?

nasa alaala kita habang kinakatha ko

ang taludturang hinabi ng hangarin sa iyo

masid sa pangarap ang magandang mukha't ngiti mo

habang mag-isa kong tinutungga ang beer sa kubo

Kay F

KAY F

ni greg

13 pantig bawat taludtod

laging nag-iisa, iniisip ka, sinta

at sa panaginip, ako'y dinalaw mo na

reyunyong magkaklase sa elementarya

nang makitang ikaw pa ri'y napakaganda

ngunit hanggang ngayon ikaw pa ri'y dalaga

sino kaya ang hinihintay mo, ako ba?

guniguni ko lang ba ito't sapantaha?

ako nga ba sa iyo'y dapat bang umasa?

pwede ko bang pasukin ang iyong daigdig

upang iluhog yaring kimkim kong pag-ibig

nang ikaw na mahal ko'y aking makaniig

tulad ng rosas sa lupa'y aking madilig

makasaysayang pagkikita ang nilandas

halos tatlumpung taon na yaong lumipas

ngunit ngayon tila ba ikaw'y umiiwas

kaya dugo sa puso ko'y panay ang tagas

alam mong crush na kita sa elementarya,

dalagita ka noon, ngayon na'y diyosa

sa high school at kolehiyo'y di na nagkita

pagkat eskwelahan na nati'y nagkaiba

iniingatan sa puso'y muling nabuhay

sa unos, ikaw ang aking bukangliwayway

inisip kong tumigil na sa paglalakbay

kung ikaw na'y makakasama habambuhay

ngunit tila ba ako'y nabuhay sa hapis

kahit na hangarin ko sa iyo'y kaylinis

para bang ang lahat ng swerte ko'y umalis

ngunit di ko magawang sa iyo'y mainis

pagkat ang pagmamahal ay di sapilitan

kung sakaling pulutin ako sa kangkungan

sana naman, mahal, iyong pakatandaan

na ikaw nga'y inibig ko na noon pa man

Di Natatapos sa Tula ang Pakikibaka

DI NATATAPOS SA TULA ANG PAKIKIBAKA

ni Gregorio V. Bituin Jr.

14 pantig bawat taludtod

di natatapos sa tula ang pakikibaka

kundi patuloy ang proseso nito sa masa

kaya magpakasipag sa pag-oorganisa

ang masa'y imulat bakit bulok ang sistema

at bakit kailangang ito'y baguhin nila

magpatuloy man tayong humabi ng taludtod

dapat alam din natin kung papaano sumugod

umatras, umabante, makibaka, kumayod

pagkat di lang sa tula tayo dapat malugod

kundi aktwal na pagkilos ang totoong buod

bawat punglo'y talinghaga't talinghaga'y punglo

na tagos sa balat, katawan, sikmura, puso

taludtod at saknong tila'y busog at palaso

mga makata'y berdugo ng sakim sa tubo

habang ang bulok na sistema'y iginugupo

di natatapos sa tula ang pakikibaka

di matatapos ang tula ng pakikibaka

hangga't ang masa'y patuloy sa hirap at dusa

ngunit kung manggagawa't dukha'y magkakaisa

sila ang tatapos sa tula't pakikibaka

Metapisika o Diyalektika?

METAPISIKA O DIYALEKTIKA?
ni Gregorio V. Bituin Jr.
15 pantig bawat taludtod

inilugmok tayo ng dilim ng metapisika
na instrumentong ginagamit ng kapitalista
na manatili ang pinaghahariang sistema
at upang di mangahas ng pagbabago ang masa

hindi ganyan ang diyalektikang prinsipyo natin
magbabago ang lipunan kung ating nanaisin
dapat ang lipunan ay suriin at unawain
ang diyalektika'y liwanag na tanglaw sa atin

sino ang may nais manatili ang karukhaan?
sinong may gustong may mahihirap at mayayaman?
sino ang aayaw sa pagbabago ng lipunan?
di ba'y iyon lamang mga naghaharing iilan?

metapisika'y makaisang-panig lang ang saklaw
diyalektika'y suri ng magkaibang pananaw
sa metapisika, ang prinsipyo mo'y maliligaw
sa diyalektika, ang pagbabago'y iyong tanaw

sa metapisika, prinsipyo lang ng isang uri
ang nangingibabaw, nais nilang manatli
sa diyalektika, tunggalian ng mga uri
dapat mayorya'y manaig, ang minorya'y magapi

sa metapisika, dapat pulis ay magprotekta
ngunit sino nga ba ang dapat protektahan nila
ang pamahalaang nagpapasahod sa kanila
kabig nitong burgis, elitista, kapitalista

o ang masang api ang una nilang ipagtanggol
di ang may pera, masalapi't mayayamang pulpol
pag mahirap ba, ang katarungan sa kanya'y gahol
dukha'y walang hustisya pagkat sistema'y masahol

sa metapisika, daloy ng lipunan ay isa
kakain sa umaga, papasok sa opisina
kakain sa tanghali, magpapahinga, meryenda
kakain sa gabi, matutulog hanggang umaga

sa diyalektika, sinusuri'y masalimuot
bakit may naghihirap, bakit sistema'y baluktot?
bakit sa pamahalaan ay kayraming kurakot?
ang bagong sistema ba'y kaya ng masang maabot?

sa metapisika, si Rizal, ehemplong bayani
gagawan ng rebulto, pupurihin ng marami
siyang lumikha ng mapagpalayang Noli't Fili
gayong ang nagpapatay sa kanya'y ang mga prayle

sa diyalektika, kinikilala'y gumagawa
magsasaka, manggagawa, babae, dukha, madla
silang sa lipunang ito'y totoong nagpapala
at dahilan ng kaunlaran ng kanilang bansa

ayaw ng naghaharing uring ating matutunan
ang diyalektika at magbabago ang lipunan
dahil kung diyalektika'y malalaman ng bayan
naghaharing uri'y ibabagsak nitong tuluyan

ayaw nila sa diyalektika pagkat babagsak
na pangunahin ay sila, ang sistemang talamak
sa katiwalian, sa masa'y sadyang nagpahamak
sistemang itong nagpagapang sa atin sa lusak

ang diyalektika'y instrumento ng pagbabago
na dapat pag-aralan at isapuso ng tao
sa mga paaralan, dapat nang ituro ito
upang sunod na salinlahi'y gamiting totoo

Ayoko nang lumabas

AYOKO NANG LUMABAS

kung ikukulong mo ako sa iyong bisig
 ayoko nang lumabas
kung ipipiit mo ako sa iyong diwa
 ayoko nang lumabas
kung ibabartolina mo ako sa puso mo
 ayoko nang lumabas
kung ako'y ikahon mo sa iyong pangarap
 ayoko nang lumabas
kung sisiilin mo ang aking mga labi
 buong puso, diwa't pagkatao'y
 iibigin kita hanggang wakas

- gregbituinjr.

Ayon kay Rocky Balboa, Boksingero

AYON KAY ROCKY BALBOA, BOKSINGERO
ni Gregorio V. Bituin Jr.
15 pantig bawat taludtod

"It's not how hard you can hit. It's about how hard you can get hit and keep moving forward." ~ Rocky Balboa

gaano man katindi ang pagbuntal sa kalaban
ay di roon makikita ang iyong kalakasan
kundi pag nabuntal ka'y naroon ang katatagan
putok man ang kilay mo at bugbog na ang katawan
ay patuloy ka pa ring nakatindig, lumalaban

tulad din ng maralitang dumaranas ng dusa
ginagawa'y paraan upang kanilang pamilya
ay di magutom at mapag-aral ang anak nila
bugbog man sa hirap ay nagpapakatatag sila
hindi sumusuko, patuloy na nakikibaka

Ga, Gara, Garapa, Garapata

GA, GARA, GARAPA, GARAPATA
ni Gregorio V. Bituin Jr.
10 pantig bawat taludtod

Ga, ang sabi sa kanyang asawa
Sambalilo mo'y sadyang kaygara
Kunin mo nga pala ang garapa
Paglalagyan ko ng garapata

Iyan ba'y pag-eeksperimento
Upang garapata'y malaman mo
Kung bakit nasasaktan ang aso
Ang garapa mo'y dadagdagan ko

Sana, Ga, iyan ay may solusyon
Suriin iyan ng mahinahon
Upang magkaroon ng panahon
Na aso ko'y makapaglimayon

Ga, silipin mo't tila kaygara
Nitong garapata sa garapa

Pagbabakasakali

PAGBABAKASAKALI
ni Greg Bituin Jr.
10 pantig bawat taludtod

kung lagi lang kitang makikita
at makakausap sa tuwina
alay ko'y rosas sa iyo, sinta
at pangakong walang pambobola

nais kong lagi kitang lambingin,
tulaan, alayan ng awitin
ako kaya'y iyong marapatin
na sa iyong puso'y papasukin

magbabakasakali na ako
puso mo ba'y bukas sa tulad ko
sadyang magsisikap akong todo
nang makamit ko ang iyong "oo"

pana ni Eros ang siyang sanhi
kung bakit nasa puso ka lagi
nawa'y wala pang nagmamay-ari
ng puso mong sana'y di humindi

biglang nagbago ang aking buhay
nang makadaop-palad kang tunay
kabuuan mo'y bukang-liwayway
sa puso ko, ganda mo'y sumilay

lumbay mo'y tiyak na madudurog
sa pag-ibig kong iniluluhog
nawa huwag sa bangin mahulog
ang pagsinta kong sa iyo'y handog

Walang Kasingtamis ang Paglaya

WALANG KASINGTAMIS ANG PAGLAYA

ni Gregorio V. Bituin Jr.

10 pantig bawat taludtod

ang kalayaang di ipinaglaban

ay di matamis na kalayaan

bakahin na ang mga kalaban

nang masagip sa mga gahaman

ang manggagawa't ang ating bayan

magkaisa ang lahat sa bansa

makibaka tungo sa paglaya

manggagawa'y dapat magkaisa

upang palayain itong masa

sa kuko ng bulok na sistema

sa pangil ng mapagsamantala

sa sungay nitong kapitalista

obrero ang pangunahing pwersa

na siyang babago sa sistema

kahit isakripisyo'y buhay man

makaharap man ang kamatayan

upang mabago itong lipunan

sadyang matamis ang kalayaan

kung ito'y ating ipinaglaban

kung nanalo'y uring manggagawa

walang kasingtamis ang paglaya

Kapirasong Lupa

KAPIRASONG LUPA

ni Gregorio V. Bituin Jr.

10 pantig bawat taludtod

pilit kinubkob ng maralita

yaong nakatiwangwang na lupa

itinayo nila'y simpleng dampa

nang may masilungan silang dukha

kapirasong lupa'y pinangarap

kahit ang bukas nila'y maulap

demolisyon man ang makaharap

ay lalaban silang mahihirap

tinahana'y kapirasong lupa

ng dukhang tila ba sinumpa

araw-gabi na lang lumuluha

bakit ba tadhana'y nagpabaya

lupang ito'y pag ipinagkait

ay sadyang lalaban silang pilit

karapatan nila'y igigiit

laban sa mga nagmamalupit

Kung Magdamdam ang Kalikasan

KUNG MAGDAMDAM ANG KALIKASAN

ni Gregorio V. Bituin Jr.

14 pantig bawat taludtod

ramdam mo bang nagdaramdam din ang kalikasan

dahil siya'y patuloy nating sinusugatan

paanong di lumubha pa't ating malunasan

yaong kanyang mga sugat sa kaibuturan

ang pagkasira nito'y sadyang nakalulungkot

kaya mga tanong na ito'y dapat masagot

upang may magawa pa bago mundo'y bumansot

di dapat pulos pagdadahilan at palusot

panaghoy nitong kalikasan ay ating dinggin

at nangyayari sa kanya'y ating unawain

agos ng sugat niya'y paano aampatin

ang pagdaramdam ba niya'y ating titiisin

pagdaramdam ng kalikasan kung patuloy pa

mga pagkasugat niya'y maghihilom pa ba

May Taya Ka Ba sa Kalikasan?

MAY TAYA KA BA SA KALIKASAN?

ni Gregorio V. Bituin Jr.

10 pantig bawat taludtod

may taya ka ba sa kalikasan

para sa bukas ng kabataan

para sa bukas ng sambayanan

para sa bukas ng daigdigan

ang kalikasan na'y lumuluha

ang kalupaan na'y binabaha

ang karagatan na'y nasisira

paano nga ba tayo tataya

paano ba natin iaambag

ang ating lakas, talino't sipag

sa iba'y paano ilalatag

ang taya nating di pampalubag

mapipigil ba ang pagkasira

ng kalikasang dapat aruga

kung ito'y di natin maunawa

paano nga ba tayo tataya

Ang kampyon, ayon kay Muhammad Ali

ANG KAMPYON, AYON KAY MUHAMMAD ALI
ni Gregorio V. Bituin Jr.
15 pantig bawat taludtod

"Champions aren't made in gyms. Champions are made from something they have deep inside them - a desire, a dream, a vision. They have to have last minute stamina, they have to be a little faster, they have to have the skill and the will. But the will must be stronger than the skill." ~ Muhammad Ali

i
"hindi nililikha sa dyimnasyum ang mga kampyon,"
ayon kay Muhammad Ali sa isang pagtitipon
pagkat kampyon ay nilalang na may lalim, may bisyon
kampyong nangangarap, naninindigan, mahinahon

dapat sila'y may lakas, nakatatagal sa laban
dapat mas mabilis pa kaysa kanilang kalaban
taglay nila ang kasanayan pati kagustuhang
maging kampyon at ialay ang panalo sa bayan

ngunit dapat mas matimbang ang loob, ang adhika
mas matindi ang pangarap na bumangon sa wala
katunggali niya'y sanay din, sino ang dadapa
puso'y pairalin hanggang matalo ang mahina

pareho man ng katawan silang magkatunggali
pawang may kasanayan at pusong nananatili
kahit malala ang tama at pumutok ang labi
ang ganitong kampyon ay ikinararangal ng lahi

ii
mga aktibista'y pawang kampyon ng kasaysayan
pagkat tinataya'y buhay sa kanilang larangan
naghahangad ng pagbabago sa ating lipunan
prinsipyo'y tangan, iniingatan ang karangalan

tumatatag dahil sa sinaloob na prinsipyo
lumalakas dahil sa pangarap na pagbabago
tumitindi sa pagtuligsa sa kapitalismo
patuloy na itinataguyod ang sosyalismo

marami na sa kanilang namatay, nangawala
at mga pamilya nila'y nalungkot, nangulila
ngunit patuloy sila sa pangarap at adhika
habang inoorganisa ang uring manggagawa

marangal nilang prinsipyo, paninindigan, puri
aktibistang pinaglalaban ay mabuting sanhi
buhay ma'y ialay, pagkakaisahin ang uri
itatayo ang lipunang sosyalismo ang binhi

Araw ng Pagtitiis, Araw ng Pagtutuos

ARAW NG PAGTITIIS, ARAW NG PAGTUTUOS

ni Gregorio V. Bituin Jr.

14 pantig bawat taludtod

di lahat ng araw ay araw ng pagtitiis

pagkat darating din ang araw ng pagtutuos

ngunit sitwasyong ito bago natin matiris

kabulukan nitong sistema'y ating bang talos?

pag-aralan ang sistemang nagdulot ng amis

kaya buhay nati'y lunod sa kaytinding unos

naghahari sa sistema'y dapat nang magahis

ng sambayanang kaytagal nang binubusabos

tinutubo sa lakas-paggawa'y labis-labis

ngunit buhay ng manggagawa'y kalunos-lunos

gayong kitang-kita ang kaunlarang kaybilis

ngunit kaunlarang kayrami pa rin ang kapos

kaunlaran sa daigdig ay walang kaparis

kaya nang pakainin ngayon ang lahat halos

sa karukhaang danas, ikaw na'y maiinis

ginigisa ka sa mantika't balat mo'y lapnos

imbes lumusog, mamamayan ay umiimpis

habang iilan, kapitalismo'y yapos-yapos

nais nilang karapatan natin ay manipis

na pinananatili nitong burgesyang bastos

manggagawa't sosyalista'y dapat nang magbigkis

dahil ang pagbabago'y nasa ating pagkilos

tapusin na natin ang araw ng pagtitiis

at paghandaan na ang araw ng pagtutuos

Mabuting pang maglakad kaysa mag-wan-tu-tri

MABUTI PANG MAGLAKAD KAYSA MAG-1-2-3
ni Gregorio V. Bituin Jr.
13 pantig bawat taludtod

mabuting pang maglakad kaysa mag-wan-tu-tri
pagkat nakakahiya pag ikaw'y nahuli
di ka nagbayad sa dyip, nais mong malibre
taumbayan tiyak kayraming sinasabi

habang ramdam mo'y bumaba ang pagkatao
di kasi nilakad ang tatlong kilometro
para kang may ketong sa ibang pasahero
parang lagi silang nakamata sa iyo

ah, mabuti pang kahit malayo'y maglakad
kaysa mag-wan-tu-tri at puri'y makaladkad
kaya kung wala kang pamasaheng pambayad
maglakad hanggang sa pupuntahan mapadpad

ang kawawang tsuper ay simpleng manggagawa
pag nag-wan-tu-tri ka, siya'y iyong dinaya
kayod ng kayod, wala palang napapala
pagkat di nagbayad ang tulad mong kuhila

mahirap magdahilang butas yaong bulsa
kaya dapat pamasahe'y magtabi ka na
mahirap kung sinta mo pa'y iyong kasama
sa ginawa mo'y baka mapahiya siya

Ang di marunong madala

ANG DI MARUNONG MADALA
ni Gregorio V. Bituin Jr.
14 pantig bawat taludtod

mabuti pa ang taong di marunong madala
kaysa ayaw sumubok dahil ayaw pumalya
yaong sumusubok, tagumpay ay humahanga
ang di sumubok, wala, bigo, kulelat, nganga

walang kadala-dala'y kayraming karanasan
kayraming aral, alam niya ang kabiguan
di na inuulit ang anumang kamalian
at sa huli, tagumpay ay tiyak makakamtan

Sa Araw ng Kapaligiran

SA ARAW NG KAPALIGIRAN

ni Gregorio V. Bituin Jr.

10 pantig bawat taludtod

(Idineklara ng United Nations na World Environment Day ang Hunyo 5 ng bawat taon. Ang tema ngayong 2011 ay "Forests: Nature at your service".)

i.

busog sa usok ang mamamayan

lalo na doon sa kalunsuran

sira na ba ang kapaligiran?

ito ba'y masasagip ng bayan

upang di masira ng tuluyan?

naglipana ang maraming plastik

na sa basurahan nakasiksik

at sa karagatan inihasik

kaya dapat lang tayong umimik

at sa sulok ay di manahimik

maging seryoso tayo, kapatid

nangyayari'y dapat nating batid

makaharap ma'y mga balakid

ay maisaayos ang paligid

upang sa sakuna'y di mabulid

ii.

anong gagawin sa kagubatan

upang ito'y mapangalagaan

ibon pa ba'y may masisilungan?

masasagip ba nating tuluyan

sa pagkasira ang kakahuyan?

maraming puno'y ating itanim

huwag hayaang ito'y makimkim

ng mga may budhing maiitim

na tubo ang nasa pusong sakim

nang gubat ay di maging malagim

kaya nga dapat nating matalos

na gubat ay di dapat maubos

halina't tayo nang magsikilos

bago pa nila tayo maulos

at gubat ay kanilang makalos

Isa Lang Akong Makata

ISA LANG AKONG MAKATA

ni Gregorio V. Bituin Jr.

salitan ang 8 at 10 pantig sa taludturan

isa lang akong makata

sa maraming makata sa daigdig

na pagsinta'y tinutula

sa napupusuan at iniibig

isang magandang dalaga

yaong sa puso ko'y nagpakaligkig

ngayon aking nadarama

pagsinta niya'y humahalumigmig

isa lang akong makata

sa maraming makata sa mundo

kahit laging nangangapa

nakakamta'y pagsintang tuliro

kaysarap niyang mahalin

tila puso ko'y di mahahapo

at kung ako'y papalarin

mamahalin siyang buong-puso

habang tangan ko ang tula

na sa kanya'y aking bibigkasin

upang puso niya't diwa

sana'y tuluyan ko nang maangkin

ah, huwag sanang masawi

itong makata sa nililiyag

dahil pag sinta'y humindi

buhay kong ito'y isa nang hungkag

Ang diwatang si Fides

ANG DIWATANG SI FIDES
ni Gregorio V. Bituin Jr.
13 pantig bawat taludtod

kaysarap sadyang pakinggan ng kanyang tinig
sa boses pa lang niya, ako'y kinikilig
tulad pa rin noon, siya'y napakalambing
di man umaawit, tila anghel ang himig

hinaplos ko ang puso, siya'y hinahanap
ang tulad niya'y diyosa sa alapaap
ang makasama nga lang siya'y anong sarap
babatahin mo anumang daanang hirap

simpleng ganda, ngunit boses lang, pamatay na
tila nayayanig ang aking kaluluwa
sa tuwa, tila ba nasa langit ng ligaya
aba'y lalo na pag siya'y nakasama

tila ako'y lupang inaabot ang langit
at naroon si Fides, laging umaawit
nanunuot sa kalamnan, humahagupit
O, Fides, sintang handog ko'y odang marikit

Kung ikaw ang aking magiging kabiyak

KUNG IKAW ANG AKING MAGIGING KABIYAK
ni Gregorio V. Bituin Jr.
12 pantig bawat taludtod

alay kay klasmeyt Fides

kung ikaw ang aking / magiging kabiyak
ay bibigyan kita / ng maraming anak
pagsinta ko ikaw / ay makatitiyak
pagkat sa puso ko'y / tangi kitang galak

kung ikaw ang aking / magiging asawa
iyong madarama / tunay kong pagsinta
sa araw at gabi'y magkasama kita
hanggang kamatayan / ay kaulayaw ka

ibigin mo ako / O, sinta kong Fides
pagkat hangarin ko / sa iyo'y malinis
sa dusa't ginhawa / tayo'y magbibigkis
sa ligaya't hirap / kahit na magtiis

gagawaran kita / ng sanlibong halik
pagkat pag-ibig mo / sa puso ko'y siksik

Himutok sa Piitan

HIMUTOK SA PIITAN

ni Gregorio V. Bituin Jr.

15 pantig bawat taludtod

minsan isang hapon, ako'y dumalaw sa kulungan

dinig ko ang himutok ng isang nasa piitan:

"di lahat ng nahahatulan ay may kasalanan

di lahat ng may kasalanan ay nahahatulan"

marahil ang sinabi niya'y may katotohanan

dahil kitang-kita niya ang mga katunayan

para sa pamilyang sinakbibi ng kagutuman

nagnakaw ng kilong bigas kaya nasa piitan

yaong milyones ang ninakaw sa kaban ng bayan

ay nakangising kapit-tuko pa sa katungkulan

ikinulong pati ang nagtatanggol sa tahanan

pagkat teroristang demolisyon ay nilabanan

bilanggong mayaman ay labas-masok sa kulungan

ngunit di ang mahihirap kahit may karamdaman

kahit sa usapin ng hustisya'y may tunggalian

dukha'y nabubulok, nakalalaya ang mayaman

pag-uwi ko'y nakatatak pa sa aking isipan

yaong ibinubulong ng isang nasa piitan:

"di lahat ng nahahatulan ay may kasalanan

di lahat ng may kasalanan ay nahahatulan"