Martes, Hulyo 19, 2016

Uso na naman ang 'salvage'

USO NA NAMAN ANG 'SALVAGE'
ni Gregorio V. Bituin Jr.
15 pantig bawat taludtod

salitang 'salvage' ay di Ingles sa 'save' o pagsagip
ito'y Kastilang 'salbaje' at salbahe ang hagip
uso na naman ang pag-salvage sa sinumang suspek
makikita na lang, bulagta't buhay na'y tiwarik

uso pa kasi ang bato, bato-bato sa langit
"Ding, ang bato", sabi lagi ni Darnang anong rikit
kaya ang mga nagbabato ngayon nga'y tagilid
mapapaagang sa kabaong sila'y maisilid

gayunman, isaalang-alang ang due process of law
pagkat bawat isa raw, may karapatang pantao
kahit negosyanteng drug lord na siyang puno't dulo
kung bakit nagkalat ang drogang kanilang negosyo

naglipana ang 'na-salvage', kayraming sinalbahe
ngunit maliliit, pawang dukha ang nadadale
di natin batid kung may sinalbaheng inosente
nahan ang mga drug lord, ang mga may sinasabi

nawa'y masugpo ang mga droga, shabu't ecstasy
at dapat mapigil nang di kumalat sa marami
pag nakadale ka ng drug lord, isa kang bayani
kaya bunutin ang ugat, kalusin nang matindi

Walang komento: