Biyernes, Enero 19, 2018

Diktadura sa Bagong Konstitusyon

Tingni. Pag naisabatas na ang Federal na Konstitusyon, tanggal na ang Senado at ang Mababang Kapulungan, at si Digong na ang gagawa ng mga batas. (Article 18, Transitory Provision, Section 6 ng proposed Constitution ng Federal Republic of the Philippines, Resolution of Both Houses No. 08.)

All Power to Digong na ito! Sagad-sagaring diktadura na ito, tulad ng kay Macoy noon.

DIKTADURA SA BAGONG KONSTITUSYON

totoo nga, change is coming, bagong sistema
pagpaslang sa dukhang kawawa, pagmumura
at ngayon, Konstitusyon ang dinidistrungka
nanganganib nga bang muli ang demokrasya?

lulusawin na ang Senado at Batasan
gagawa ng batas ay pangulo na lamang
"petmalu" talaga ang "lodi" nitong bayan
lalo na't "werpa" ay pinakatatanganan

perpektong lipunan daw ang kanilang nais
kaya ang masa sa pagbabago'y magtiis
uunlad naman daw tayong walang kaparis
habang pagbutas sa batas ay kinikinis

mananatili ka na lang bang isang miron
o sasakay ka na lang sa layag ng alon
magsuri't magmasid sa nangyayari ngayon
at agad ding kumilos kung di ka sang-ayon

- gregbituinjr./011918


Miyerkules, Enero 17, 2018

Ayaw sa salitang makatarungan, makatao?

Tingnan nyo po ang mungkahi ng mga mambabatas na pagbabago sa Konstitusyong 1987. Sa Preambulo pa lang ay pinalitan na ang "to build a JUST AND HUMANE society and establish a Government" ng "to build a MORE PERFECT SOCIETY and establish a FEDERAL FORM OF GOVERNMENT". Nandidiri ba sila sa salitang "JUST AND HUMANE", lalo na ngayong ang pangulo ay may bukambibig na "Kill, kill, kill, papatayin ko kayo" at kayrami nang napapaslang?

AYAW SA SALITANG MAKATARUNGAN, MAKATAO?

ah, ano nang nangyayari sa bansa nating ito
ang Saligang Batas na'y binubutas bang totoo?
tingni yaong binabago doon sa Preambulo
ayaw sa salitang makatarungan, makatao?

"to build a just ang humane society" ang nakasulat
doon sa Preambulo, subalit mungkahing sukat:
"to build a more perfect society" na umano dapat
at federalismong gobyerno na para sa lahat

ano nga ba ang sinasabing perpektong lipunan?
yaon bang wala nang mahihirap at mayayaman?
yaon bang walang pribadong pag-aari sa bayan?
wala na bang pagsasamantala sa mamamayan?

bakit wawalain ang makatao at hustisya?
ito ba'y kamatayan na nga ba ng demokrasya?
pag ipinilit, ito ba'y pasismo? diktadura?
dapat suriin at pag-isipan ito ng masa

- gregbituinjr/011718

Martes, Enero 16, 2018

Mananatili akong tibak

mananatili akong tibak sa iyong paningin
ang pagsusumamo mo'y tatangayin lang ng hangin
nasa laot man ako o tumatahak sa bangin
tibak akong tapat sa nasimulang adhikain

- gregbituinjr.

Lunes, Enero 8, 2018

Banta at Pagbaka

BANTA AT PAGBAKA

ang sabi niya, anong gusto mo:
madyaryo o matakpan ng dyaryo?

tanong ko: bakit ka nagbabanta?
ginawa ko lang kung ano ang tama

aniya, pulos kayo batikos
problema'y nais naming matapos

tanong ko: pagtapos ang pagpatay?
wala na bang halaga ang buhay?

aniya, dapat lang magsitirik
iyang mata nilang mga adik

sila'y walang mga karapatan
pagkat sila'y walang pakinabang

banta sila sa buhay ng iba
kriminal na dapat unahan na

tanong ko: wala pang gawang krimen
turing na sa kanila'y salarin?

aniya, buting sila'y unahan
kaysa tayo pa ang maunahan

seguridad ng kapwa ang una
at sa kapwa'y mga banta sila

kaya kayo, huwag makialam
kung buhay mo'y di agad maparam

aniko, ang bawat karapatan
ay dapat igalang, ipaglaban

igalang nyo lagi ang proseso
ng batas, huwag maging berdugo

batas sa kamay, huwag ilagay
karapata'y respetuhing tunay

- gregbituinjr.

* Ang mga litrato ay kuha ko sa isang art exhibit hinggil sa EJK.

Linggo, Enero 7, 2018

Madilim man ang langit

MADILIM MAN ANG LANGIT

madilim man ang langit, tuloy sa bawat pagkilos
kahit nilalamig sa pagpopropagandang lubos
pilit na nilalabanan bawat pambubusabos
ng sistemang walang puso sa masang laging kapos

madilim man ang langit sa bawat pinapangarap
dinagit ng lawin ang inakay na sumisiyap
sa maruming dagat, mga isda'y sisinghap-singhap
sa bukid ay kayod kalabaw, lasap lagi’y hirap

madilim man ang langit pagkat walang sinasahod
ayos lang basta sa pagkilos ay hindi hilahod
di natutulala sa gutom o magmukhang tuod
kaya kumain ng balot nang lumakas ang tuhod

madilim man ang langit sa paglalayag mag-ingat
di dapat sa gutom ay mawalan ka ng ulirat
magplanong maigi nang wala sa 'yong maisumbat
habang sa pakikibaka'y nananatiling tapat

- gregbituinjr.

Sabado, Enero 6, 2018

Sa kaarawan ng aking sinta

maligayang kaarawan sa iyo, aking Libay
natatangi kitang minumutya sa puso ko'y taglay

ikaw nawa'y laging nasa mabuting kalagayan
hindi nagkakasakit, maganda ang kalusugan

ititira man kita sa munti't aba kong dampa
iyon ay isang paraiso, O, aking diwata

kaysa naman itira kita sa isang palasyo
gayong di ako hari kundi karaniwang tao

di man sintamis ng asukal ang ating pag-ibig
di naman mapait bagkus kaysarap ng pagniig

di ko kayang maibigay ang bituin sa langit
apelyido kong Bituin ang iyong mabibitbit

maraming salamat sa iyong pagtanggap sa akin
nawa'y kaisa kita sa bawat kong adhikain

maligayang kaarawan sa iyo, aking sinta
patuloy tayong kumilos ng may buong pag-asa

- gregbituinjr.
01-06-2018

Biyernes, Enero 5, 2018

Ikapu versus butaw

IKAPU VERSUS BUTAW

nangongolekta ng ikapu ang mga sambahan
habang nangangalap ng butaw ang mga samahan;
parehong ambag na salapi nitong kasapian
ngunit isa'y maunlad, isa'y naghihirap naman

ikapu sa bawat kasapi'y tungkulin at atas
pagkat ayon sa bibliya't ambag itong parehas;
ang butaw, tungkulin man at nasa saligang batas
ng samahan, di lahat ay nag-aambag ng patas

kaya mga sambahan ay talagang nagniningning
kaylalaki pa nito't masisilaw ka sa tingin;
tanggapan ng ilang samahan animo'y dukhain
kaya pananatili nito'y ilang taon lang din

sa ikapu'y kaluwalhatian ng kaluluwa
ang ipinangangaral sa mga kasapi nila;
sa butaw, ipinaglalaban ang bagong sistema
at kailangan ng matinding pag-oorganisa

sambahan ay nabubuhay sa ikapung abuloy
upang pangangaral nila sa masa'y magpatuloy;
nabubuhay ang samahan pag butaw ay dumaloy
upang samaha'y di magmukhang kawawa't palaboy

sa ikapu, ang kasapi'y talagang magbibigay
sa paniniwalang kaluwalhatian ang alay;
sa butaw, paniningil ay pahirapan pang tunay
tila di dama ang prinsipyo ng samahang taglay

kapwa ambag man ng kasapi ang ikapu't butaw
sa mga aral nito'y di tayo dapat maligaw;
mga kasapi'y dapat magtulungan ng malinaw
nang magamit ng maayos ang perang ibinitaw

- gregbituinjr.

Huwebes, Enero 4, 2018

Rapas man ang guhit ng palad

RAPAS MAN ANG GUHIT NG PALAD

matindi ka raw manapok, tila napakarahas
pag nabasa sa guhit ng iyong palad ay rapas
maiging huwag dinggin ang anumang aliwaswas
at huwag dumaiti sa tinik ng isdang kapas

may taong kakaiba ang paniwala o kaot
ngunit mahinahon sa harap ng ligaya't poot
sa kabila ng rapas at paglalakbay sa laot
magiging maalwan ang paglutang ng mga sagot

mahalaga ang kahinahunan sa bawat lagay
upang maiwasan yaong dahas, galit at lumbay
palad mo ma'y rapas, di mo palad manirang tunay
dapat talos mo paano pagbutihin ang buhay

ang pagpapakatao'y isapuso't isadiwa
dulot ng pakikipagkapwa'y ligaya at tuwa
kaasalan mo sa kapwa'y masusukat sa gawa
iyang rapas at rahas ay di dapat laging tugma

- gregbituinjr.

Miyerkules, Enero 3, 2018

Sa mga naglalaway sa dugo ng kapwa

SA MGA NAGLALAWAY SA DUGO NG KAPWA

akala nila, makatarungan ang pamamaslang
magiging kriminal naman daw ang sugapang halang
at makakatulog ng mahimbing ang mamamayan
pag wala nang sugapang banta sa kinabukasan

akala nila, bayani sila pag pumapatay
tamang proseso ng batas ay balewalang tunay
"bayani" silang sa dugo ng kapwa'y naglalaway
kapayapaan daw ng bayan ang kanilang alay

akala nila, krimen ay agad nilang napigil
kahit wala pang nagagawa ang sugapang sutil
wala pang krimen, dukha'y tututukan na ng baril
sira na raw ang utak kaya agad kinikitil

akala nila, dapat walang kara-karapatan
dahil daw ang karapatan ay sagabal sa bayan
akala nila, pagpaslang ay tungong kaunlaran
payapa ang negosyo, buhay man ay paglaruan

sino silang basta kukuha ng buhay ng tao?
sino silang naglalaway sa dugo ng kapwa mo?
budhi ba nila'y payapa't bayani ngang totoo?
para sa bayan nga ba ang pagpaslang ng berdugo?

ang ginagawa nila'y karumal-dumal ding krimen
bayani sa sarili, ngunit sa madla'y salarin
mananagot sila, budhi nila'y mang-uusig din
kriminal din pala sila'y di nila akalain

- gregbituinjr.

#NoToSalvagings #StopTheKillings 
#EJKnotOK #RespectTheRightToLife

Martes, Enero 2, 2018

Sa Ngalan ng Pag-ibig

SA NGALAN NG PAG-IBIG

tunay ngang kaysarap damhin ang unang halik
habang ligalig ka sa kaylakas kong hilik
gumuguhit yaong lambanog kong binarik
pasensya kung minsan di ako umiimik
pagsinta ko naman sa puso'y natititik

patuloy nating isabuhay ang Kartilya
at sabay din nating paglingkuran ang masa
di tayo papayag maging ibon sa hawla
walang laya kahit nagniniig tuwina
ako'y Andres, ikaw si Oryang, aking sinta

di ako dinadaya ng aking paningin
ikaw nga ang mutyang sagot sa panalangin
ako'y iyo, at ikaw naman ay sa akin
habang pinagmamasdan ko sa papawirin
ang ikukuwintas ko sa iyong bituin

huwag nating hayaang dustain ninuman
ang Kartilyang alaala ng Katipunan
ituro ang kamalayan sa kasaysayan
upang ang bata sa bawat sinapupunan
ay mabigyan ng magandang kinabukasan

- gregbituinjr.

Sa isang magandang dilag

SA ISANG MAGANDANG DILAG

sa edad mong iyan, di ka na matandang dalaga
kaya't akong ito'y di na rin matandang binata

tinatanggap natin ang pag-ibig ng isa't isa
nawa'y manahan sa puso ang pagsintang dakila

sa harap man ng suliranin, lungkot o ligaya
ang kaharapin man natin ay pawang dusa't luha

pagsikapan pa rin nating mabuo ang pamilya
at malulutas din anumang dumatal na sigwa

pag nagsilang ka na'y iigting ang pagkakaisa
at isang magandang bukas ang ating ihahanda

- gregbituinjr.

Lunes, Enero 1, 2018

Pag-igting ng kawalang hustisya

PAG-IGTING NG KAWALANG HUSTISYA

Patuloy pang ramdam ang banta kahit di nagbanta
Animo'y uod na ngumangasab ng maralita
Di na nila pinadidipa ang mga sugapa
Binubulid na lang kung saan ng mga kuhila

Laksa-laksa ang pangitain ng mga panimdim
Ang gabing malamig ba'y magiging gabing malagim?
Ang pasismo'y landasing sadyang nakaririmarim
Sa kapangyarihan, lumalaki ang ulong sakim

Ang budhi ba nila'y malay sa pagpapakatao
Kahit mali'y pikitmatang susundin ang idolo
Kamay na pulos lipak ay kaytindi ng pagbayo
Paruparong bukid, bakit duguan ang pakpak mo?

Salbahe'y nagkalat sa talampas at kaparangan
Sa kuwago'y di lingid ang kanilang kagagawan
Marami pa ring ahas sa kanilang daraanan
Mag-ingat at baka abutin ng dilim sa daan

#EJKnotOK #NoToSalvagings #StopTheKillings #RespectTheRightToLife

- gregbituinjr.

Linggo, Disyembre 31, 2017

Nawa sa pagsalubong sa Bagong Taon 2018



NAWA SA PAGSALUBONG SA BAGONG TAON 2018

sadyang napakamadugo nitong nagdaang taon
kayrami ng patayan, umaga, tanghali, hapon
gabi, animo'y karaniwan lang ang mga iyon
na nangyayari, mga dukha'y sinagpang ng leyon

hilakbot ang itinititik niyon sa kasaysayan
nagpasimuno'y kasalukuyang pamahalaan
na dapat ay nagtatanggol sa ating karapatan
tulad na lamang ng nangyari sa batang si Kian

libo'y pinaslang, di dumaan sa tamang proseso
ng hustisya, na sadya namang nakapanlulumo
pinaslang na lamang ng naglalaway na berdugo
walang kara-karapatan sa mga tsonggong ito

sa maraming komunidad, pamilya'y lumuluha
pagkat ang buhay ng minamahal nila'y nawala
sa pagtambang at pagpaslang, kayraming napinsala
buhay at puso, mga kapamilya'y natulala

ngayong Bagong Taon, nawa'y mayroong pagbabago
kung may kasalanan, idaan sa tamang proseso
kung kinakailangan, maysala'y makalaboso
huwag paslangin kundi panagutan ang asunto

ngayong Bagong Taon, tamang proseso'y bigyang puwang
karapatan sa buhay ng kapwa tao'y igalang
kung nararapat, ibagsak na ang gobyernong hibang
at huwag nang hayaang ang bayan ay nililinlang

- gregbituinjr.

#NoToSalvagings #StopTheKillings #EJKnotOK #RespectTheRightToLife

Sabado, Disyembre 30, 2017

Sa mga manggagawa ng minahan

SA MGA MANGGAGAWA NG MINAHAN

marami na kayong nagtatrabahong manggagawa
minimina ang bundok, ginagalugad ang lupa
upang matagpuan ang mineral na pinagpala
kahit ang kalupaa'y patuloy na lumuluha

pikitmata sa nangyayari dahil sa trabaho
walang pakialam sa kinabukasan ng tao
gumuho man ang bundok, para sa kapitalismo
mabutas man ang lupa, para sa tubo at sweldo

bakit kayo'y manggagawang tila walang magawa
upang kalikasan ay di na tuluyang masira
kasi pag walang trabaho, pamilya nyo'y kawawa
mina ng mina, kalikasan ma'y mapariwara

mga manggagawa kayong dapat organisahin
alang-alang sa pamilya at kalikasan natin
at para sa kinabukasan ng lahing magiting
makiisa na kayo sa pakikibaka namin

lupa't tao'y wasak dahil sa asam nilang tubo
kalikasa'y labis-labis na ang damang siphayo
huwag nang sirain ang bundok at lupang ninuno
pagmina'y itigil sa panig na ito ng mundo

magkaisa lahat ng manggagawa sa minahan
pamilya't kalikasa'y sabay nating alagaan
halina't itindig ang makakalikasang bayan
at sabay na itayo ang makataong lipunan

- gregbituinjr.

Miyerkules, Disyembre 27, 2017

Pangarap kong maglayag ng isang taon sa laot

PANGARAP KONG MAGLAYAG NG ISANG TAON SA LAOT
ni Gregorio V. Bituin Jr.
15 pantig bawat taludtod

Pangarap kong maglayag ng isang taon sa laot
Doon lilikhain ang paraisong walang takot
Marahil doon makikita ang hanap na sagot
Habang nagmumuni ng walang balakid, bantulot.

Sa pagitan ni Taning at bughaw na karagatan
Pinagninilayan ang suliranin ng lipunan
Subalit di ko pa maarok ang kailaliman
Kaya aking tinutuos ng agham at sipnayan.

Hanap ng aking mata’y samutsaring konstelasyon
Ang sinturon ni Hudas ba'y nasaan naroroon
Gabay ang mga tala umaraw man o umambon
Habang kinakatha ang ibig sa paglilimayon.

Maglalayag akong sinisinta ang nasa diwa
Sisisirin ang inaasam na perlas na mutya
Handog sa magandang dilag na may lakip na tula
Habang sa kawalan, abang lingkod ninyo'y tulala.

Martes, Disyembre 26, 2017

Tumigil na akong magsulat ng tula subalit


tumigil na akong magsulat ng tula subalit
nabuhay akong mag-uli, inspirasyon kang pilit
na pinapapasok sa aking puso't inuukit
pagkat ikaw ang diwata kong sadyang anong rikit

nang maupos na ang kandila ng pagsusumamo
upang musa nitong panitik ay dalawin ako
lumayo ako't tumungo sa ilang, walang tao
puso'y nahimbing, namuhay tulad ng ermitanyo

mutya kang dumating, binalik ako sa pagtula
ang lumang papel at pluma'y hinarap kong tulala
tila ako'y nakatitig sa damong makahiya
lilikhain ang pag-ibig sa bundok ng hiwaga

mga naipon kong taludtod ay aking hinango
sa baul ng kawalan, sa palumpong ng siphayo
salamat, mutyang mahal, diwata ka niring puso
nawa'y lalagi ka sa piling ko't di na maglaho

- gregbituinjr.

Linggo, Disyembre 24, 2017

Bati ko'y Maligayang Pasko

Bati ko'y Maligayang Pasko
Wala man akong Aguinaldo.
Kung regalo mo'y Bonifacio
Malugod na tatanggapin ko!
- gregbituinjr.

Sabado, Disyembre 23, 2017

Ang pagpepedikab man ay marangal na hanapbuhay

ANG PAGPEPEDIKAB MAN AY
MARANGAL NA HANAPBUHAY

mumo lang kung tutuusin ang kinikita nila
sa paghatid ng pasahero, tanggap nila'y barya
sariling kayod upang makakain ang pamilya
ngayon, kabuhayan nila'y napagdiskitahan pa

ang pagpepedikab ay marangal na hanapbuhay
sa tatlong gulong man, may ngiti silang nasisilay
araw-gabi'y nagsisikap na magtrabahong tunay
ngayon, bakit kabuhayan nila ang niluluray

kung yaong bakal na ibon ay malaking negosyo
natatanggap lang ng mga pipit ay pawang mumo
di naman sila mayang paaapi sa kung sino
o baka maging langay-langayan ang mga ito

may karapatang mabuhay ang mga maralita
hayaan silang marangal na magtrabahong kusa
kahit tatlong gulong ay may hatid na ngiti't tuwa
pagkat marangal ang ginagawa nila sa madla

- gregbituinjr.

Miyerkules, Disyembre 20, 2017

Kumunoy na lupa

KUMUNOY NA LUPA
ni Gregorio V. Bituin Jr.
16 na pantig bawat taludtod

nakapaglalakad pa noon sa lupang kinagisnan
ngunit ngayon, isa na iyong malagim na putikan
winasak, binaboy ng mga suwitik na minahan
ang kabukiran ay nagmistula nang isang libingan

nawasak ang lupa, dahil sa lintik na pagmimina
nawasak ang bukas, dahil sa lintik na pagmimina
nasira na ang kalikasan, dahil sa pagmimina
nasira na ang kabukiran, dahil sa pagmimina

kumunoy na ang lupang dating masayang tinatahak
kumunoy na ang lupa't nagmistula na itong lusak
sa kalansing ng ginto, minahan ay nagsihalakhak
walang pakialam kung buhay at lupa na'y mawasak

bago mahuli ang lahat, lumubog ang buong bayan
tutulan na at labanan ang ganitong kahayukan
ibaon na ang mga kapitalista ng minahan
doon sa kumunoy na lupang kanilang kagagawan

Martes, Disyembre 19, 2017

Naroroon ang alaala ng pakikibaka

naroroon ang alaala ng pakikibaka
patuloy pang kumikilos ang mga aktibista
isinasabuhay bawat prinsipyong tangan nila
upang maipagwagi ang lipunang sosyalista

maraming aktibistang nangalagas sa panahon
ng kahayupan, diktadura't pagsakmal ng leyon
maraming aktibistang sa ilang ay ibinaon
tanging nagugunita'y alaala ng kahapon

magbalikwas kita, ipakitang tuloy ang laban
bagong diktadura'y sa kumunoy tangay ang bayan
ibinabaon tayo sa kawalang katarungan
ibinubulid tayo sa balon ng kamatayan

panahon nila ngayon, subalit atin ang bukas
para sa katarungan, halina't magsibalikwas

- gregbituinjr.

Sabado, Disyembre 16, 2017

Ang mga Kaaway - salin ng tula ni Pablo Neruda

Ang mga kaaway
ni Pablo Neruda
Isinalin ni Greg Bituin Jr.

Dito, dinala nila ang kanilang mga baril na puno
ng pulbura at iniatas ang matinding paglipol,
Dito, natagpuan nila ang sambayanang umaawit, sambayanang muling pinagkaisa
Ng pangangailangan at pag-ibig,

At ang payat na batang babaeng may tangan ng watawat ay nahulog,
At ang isang minsang-nakangiting batang lalaki’y gumulong at nasugatan sa tagiliran
At minasdan ng natatarantang bayan ang patay na nalugmok
Sa galit at sakit.

Pagkatapos, doon
Kung saan ang patay ay nahulog, pinaslang,
Ibinaba nila ang kanilang mga watawat at ibinabad sa dugo
Upang itaas muli at ipamukha sa mga pumaslang sa kanila.

Para sa aming mga patay, hinihiling ko’y kaparusahan.
Para sa mga nagkalat ng dugo sa aming bansa, hinihiling ko’y kaparusahan.
Para sa pumaslang na nagdala sa amin ng pagpatay,
hinihiling ko’y kaparusahan.
Para sa mga taong umunlad mula sa pagkitil sa amin,
hinihiling ko’y kaparusahan.
Para sa nagbigay ng atas na naging sanhi ng aming pagdurusa,
hinihiling ko’y kaparusahan.
Para sa mga nagtatanggol sa pagkakasalang ito,
hinihiling ko’y kaparusahan.

Ayokong alukin nila kami
Ng kanilang kamay - na nabubo ng
Dugo: nais ko silang parusahan.
Hindi ko sila nais na maging kinatawan,
O kaya'y manirahan sila ng maalwan sa kanilang mga tahanan:

Nais ko silang makitang nililitis
sa liwasang ito, dito sa lugar na ito.

Hinihiling ko’y kaparusahan.


The Enemies
by Pablo Neruda

Here, they brought their guns filled
With powder and ordered callous extermination,
Here, they found a people singing, a people reunited
By necessity and love,

And the skinny girl fell with her flag,
And the once-smiling boy rolled wounded to his side
And the dazed town watched the dead fall
In fury and pain.

Then, there
Where the dead fell, murdered,
They lowered their flags and soaked them in blood
To raise them again in the face of their murderers.

For these our dead, I ask for punishment.
For those who spilled blood in our country,
I ask for punishment.
For the executioner who sent us murder,
I ask for punishment.
For those who prospered from our slaughter,
I ask for punishment.
For he who gave the order that caused our agony,
I ask for punishment.
For those that defended this crime,
I ask for punishment.

I don't want them to offer us
Their hands - soaked in our own
Blood: I want them punished.
I don't want them as ambassadors,
Or living comfortably in their homes:

I want to see them tried
here in this plaza, here in this place.

I demand punishment.

Biyernes, Disyembre 8, 2017

Di ka na mawawala sa aking gunita

di ka na mawawala sa aking gunita
lagi ka nang nasa diwa tulad ng tala
kahit pa baunan mo pa ako ng luha
ikaw ang mutya'y di na maikakaila

sa balisbis man ng talampas, nariyan ka
sa daloy ng ilog, nagtatampisaw kita
kasabay kitang naglalakad sa aplaya
naroroon ka sa bawat pakikibaka

kahit sinusumpong ako't lulugo-lugo
buryong man itong buong araw ko't tuliro
kahit na sa akin lagi kang nagtatampo
nakaukit ka na sa diwa't pusong ito

katinuan ko'y sa iyo lamang nabaliw
tila tibok ng puso'y sa batis aliw-iw
damhin mo iring taospuso kong paggiliw
pagkat pagsinta sa iyo'y di magmamaliw

- gregbituinjr.

Martes, Nobyembre 21, 2017

Kaibhan

KAIBHAN

alam mo bang kaibhan ng bibe, itik at pato
ay tulad ng kaibhan ng unggoy, matsing at tsonggo

ang kaibhan ng tinali, tandang at talisain
ay tulad ng kaibhan ng banoy, agila't lawin

magkakaiba ang bisiro, buriko at guya
pawang anak ng hayop sa bukid na pinagpala

kaibhan ng trabahador, obrero, manggagawa
ay tulad din ng kaswal, kontraktwal, arawang gawa

kaibhan ng pesante, magsasaka't magbubukid
ay tulad ng sastre, mananahi't magsisinulid

magkapareho man sa tingin ay magkaiba rin
ngunit dapat matalos natin ito't unawain

may pagkakahawig man ang magkapatid na kambal
kita ang kaibhan nila sa pagkatao't asal

- gregbituinjr.

Martes, Nobyembre 14, 2017

Nahihimbing na karapatan (2)

NAHIHIMBING NA KARAPATAN
ni Gregorio V. Bituin Jr.
13 pantig bawat taludto

dapat gisingin mo ang mga diwa nila
na may karapatan kang dapat makilala
baka yaong diwa nila’y nahihimbing pa
habang sila nama’y winawalanghiya ka
karapatan ay huwag hayaang mahimbing
kaya dapat ang puso’t diwa’y laging gising

tandaang mong may karapatan bawat isa
na dapat maramdaman nila’t makilala
tandaang may karapatan ang bawat masa
na kaakibat na ng pagkatao nila
karapatan ay huwag hayaang mahimbing
kaya dapat ang puso’t diwa’y laging gising

huwag nyong hayaang kayo’y maagrabyado
ng mga mapagsamantalang pulitiko
at mga gahamang kapitalistang tuso
na ang laging adhika’y pagtubuan tayo
karapatan ay huwag hayaang mahimbing
kaya dapat ang puso’t diwa’y laging gising

karapatan natin ay dapat irespeto
dapat kilalanin ng sinumang gobyerno
at upang tunay nga nating manamnam ito
sistemang bulok ay ibasurang totoo
palitan na ang sistemang kapitalismo
itayo ang isang lipunang makatao

* ang tulang ito'y orihinal na naisulat noong Agosto 10, 2010, at idinagdag ang tatlong huling taludtod na binasa sa aktibidad na Sining Tagpuan na ginanap sa Komisyon sa Karapatang Pantao, Nobyembre 13, 2017, kasabay ng aktibidad ng CSOs ng ASEAN dito sa Pilpinas

Martes, Nobyembre 7, 2017

Damhin ang mga aral ng Rebolusyong Oktubre 1917

DAMHIN ANG MGA ARAL NG REBOLUSYONG OKTUBRE 1917

damhin natin bawat kasaysayan
lalo na ng uring manggagawa
sapagkat sila ang salalayan
upang lipunan ay mapalaya

tara't sama-samang ipagdiwang
ang sentenaryo ng Rebolusyong
Oktubre na ipinagsanggalang
ang manggagawa't pesante noon

tinaboy ang burgesyang malupit
na sa kanila'y nagsamantala
tinatag nila ang Unyong Sobyet
binago ang bulok na sistema

pinatunayan ng manggagawa
pag kumilos sila bilang uri
marami silang mapapalaya
mula sa kuko ng naghahari

sa sama-sama nilang pagkilos
ay kayang pataubin sinuman
isang aral na dapat matalos
at bahagi na ng kasaysayan

- gregbituinjr.

Mabuhay ang Rebolusyong Oktubre 1917

MABUHAY ANG REBOLUSYONG OKTUBRE 2017

ipinaaabot kong may ngiti
isang taas-kamaong pagbati
sa sentenaryo ng Rebolusyong
Oktubre na mahalaga noon
pagkat manggagawa'y naghimagsik
ang mga pabrika'y nagsitirik

tinayo mga konsehong Sobyet
at itinaboy ang mga elit
tinatag ang sariling gobyerno
ng mga pesante at obrero
kapitalista'y nagsitakasan
mga elitista'y nagtakbuhan

unyong Sobyet sa diwa'y tumatak
bagong lipunan yaong tinahak
sa bagong landas sila'y nagpasya
natayo'y sistemang sosyalista
sa kanila'y aking inaalay
ang taos-puso kong pagpupugay

- gregbituinjr.

Lunes, Oktubre 30, 2017

Pagtula para sa katarungan

di ko malaman kung paano itutula
ang tumagas na dugo't balde-baldeng luha
paano itula ang buhay na nawala
habang puso't pluma ko rin ay nagluluksa

buhay ba ng tao'y katulad lang ng ipis
na basta-basta na lang nila tinitiris
kayraming nagmamahal ang nagsisitangis
sa ganitong nangyayari ba'y magtitiis

dapat na maging makatao ang lipunan
dapat matigil na iyang mga patayan
at dapat ding magkaroon ng katarungan
para sa mga nabiktima't namatayan

sa ganitong sistema'y huwag matuliro
dapat itong pigilan, magsikilos tayo
ipalaganap ang karapatang pantao
itayo ang isang lipunang makatao

- gregbituinjr.
- nilikha at binasa sa isang anti-EJK activity sa Most Holy Trinity Parish, Balic-Balic, Sampaloc, Manila, Oktubre 30, 2017

Lunes, Oktubre 16, 2017

tutula, tutuli, tutulo

tutula, tutuli, tutulo
tulala, tatala, tuliro
talaga, talaba, talungko
taliba, talata, tula ko
- gregbituinjr.

Huwebes, Oktubre 12, 2017

Nais kong maging tapat sa aking napiling sining

nais kong maging tapat sa aking napiling sining
kahit minumutya'y sa pangarap ko lang kapiling
bulsa ko man ay walang pilak na tumataginting
maliit man ako'y bakasakaling makapuwing

nais kong maging tapat, oo, tapat sa pagkatha
aakdain ang saya, indayog, linamnam, luha
patuloy na kakatha di man basahin ng madla
anumang daluyong ang dumatal ay may paghupa

nais kong maging tapat sa minumutya kong dilag
siyang musa ng pagkatha, pag-ibig nga ba'y bulag
bakit iwing puso ko'y napili niyang mabihag
sa kanya, puso kong bato'y tila ba mababasag

sa pagluluto ko ng katha'y nais kong maging tapat
sinampalukang sanaysay at may tulang pinangat
ang sinigang kong taludtod, malalasahang sukat
inadobo kong saknong, asahan mo't di maalat

- gregbituinjr.

Miyerkules, Oktubre 11, 2017

Paano aayusin ang buhay na tila pulubi

ayusin mo ang buhay mo? ang narinig kong sabi
paano ba aayusin ang buhay na sakbibi
ng lumbay kaya tambay na lang maghapon at gabi

paano aayusin ang buhay na tila pulubi
upang sa kapwa'y magkaroon din siya ng silbi
at di naman magaya sa danas ng tatlong bibi

mahirap namang maghilata lang lagi sa tabi
at pangangarap ng gising ang laging hinahabi
gayong walang naiipon, walang naisusubi

- gregbituinjr.