Matang Apoy

Inday Wil Olweys Lab Yu

2012-02-12T11:43:00.000-08:00

INDAY WIL OLWEYS LAB YU

(alay kay Whitney Houston - Agosto 9, 1963 - Pebrero 11, 2012)

ni Gregorio V. Bituin Jr.

mahal ni Inday Whitney ang kanyang tagahanga

na mga kinakanta nya'y awiting dakila

inaaliw ang mayayaman at mararangya

inaaliw din kahit na dukha't hampaslupa

may pinagmanahan ang kanyang mga pagbirit

anak siya ng inang premyadong mang-aawit

pinsan ni Dionne Warwick, kaya di sumasabit

ang tinig nyang tila awit ng anghel sa langit

awit nya sa Bodyguard, "Inday Wil Olweys Lab Yu"

tagos nga sa puso habang nanonood ako

habang ang tinig nya'y nanunuot hanggang buto

sa kanyang "Greatest Love of All" nga ako'y saludo

kaya maraming tagasubaybay ang nabigla

dahil sa pagpanaw nya, biglaang pagkawala

gayunman mahal siya ng mga tagahanga

kaya di mamamatay ang awit nya't gunita

Tuloy ang Laban ni Ka Popoy

2012-02-06T01:03:00.000-08:00

TULOY ANG LABAN NI KA POPOY
ni Gregorio V. Bituin Jr.

14 pantig bawat taludtod

labing-isang taong singkad na yaong dumaan

ng mapaslang ng kung sino si Ka Popoy Lagman

ngunit hanggang ngayon wala pa ring katarungan

di pa rin nahuhuli yaong may kagagawan

gayunman, tuloy pa rin ang ipinaglalaban

at simulain niyang baguhin ang lipunan

sosyalismo ang landas sa bawat nating hakbang

sosyalismong pangarap para sa sambayanan

sa ilan sa kanyang mga iniwang sulatin

ay ating matutunghayan yaong kanyang bilin

kamalayang makauri'y dapat patagusin

sa sinumang manggagawang ating aabutin

halina't pagkaisahin ang mga obrero

huwag magwatak-watak, maging organisado

ang misyon ni Ka Popoy ay misyon mo't misyon ko

tuloy ang laban ni Ka Popoy hanggang sa dulo

BMP office

Pebrero 6, 2012

Hibik ng Dilag: Huwag Manggahasa

2012-02-04T19:27:00.000-08:00

HIBIK NG DILAG: HUWAG MANGGAHASA

ni Gregorio V. Bituin Jr.

12 pantig bawat taludtod

"Don't tell me how to dress. Tell them not to rape." - mula sa plakard na dala ng isang seksing babae

seksi ang babae, maiksi ang palda

litaw na balikat, kaygandang kurbada

bakit iba'y tila agad nagnanasa

parang bagang sila'y hindi makahinga

nakita lang yaong mapuputing hita

nalilibugan na ang mga binata?

tinitigasan na ang mga timawa?

nagnanasa na ang mga hampaslupa?

dahil daw maigsi'y tabingan ng kumot

sabi ng dalagang sa puso'y kumurot

"huwag makialam sa'ming isusuot

ay, magtiis kayo diyang mamaluktot"

dagdag pa, "anuman ang isuot namin

basta't kumportable'y huwag babastusin

matakam man kayo sa ginanda namin

ay huwag nyo lamang kaming gagalawin"

ang mga babae'y ating irespeto

silang larawan ng ina't asawa mo

huwag manggahasa, magtinong totoo

dahil kung di'y tiyak ikaw'y kalaboso

purihin mo na lang ang kanilang ganda

ngunit huwag mo nang pagnasaan sila

sarilinin mo lang ang iyong pantasya

maging positibo't sining ang nakita

Panata sa Uring Manggagawa

2012-01-22T18:53:00.001-08:00

PANATA SA URING MANGGAGAWA

ni Gregorio V. Bituin Jr.

13 pantig bawat manggagawa

(batay sa hiling ng isang kasama na gawan ko ng tula)

Batid ko ang hirap ng bawat manggagawa

Nilikha nila ang ekonomya ng bansa

Pagkain at produkto, silaang maylikha

Di mabubuhay ang mundo kung sila'y wala

Manggagawa, buod ka ng aking panata

Pagkakaisahin ko ang mga obrero

Habang tangan itong sosyalistang prinsipyo

Gagampanan ang pagiging selupturero

Ng mapang-aping sistemang kapitalismo

Ito nga, mga kapatid, ang panata ko

Di nararapat mabuhay sa dusa't luha

Ang manggagawang sinakbibi ng dalita

Silang tanging pag-aari'y lakas-paggawa

Na dapat magsamang putlin ang tanikala

Nang madurog ang kapitalismong kuhila

Sa lahat ng pinuno't kasaping obrero

Ng Bukluran ng Manggagawang Pilipino

Durugin man ng kaaway ang aking buto

Pitpitin ang katawan, basagin ang ulo

Sosyalismo'y ipaglalaban hanggang dulo.

Korte ni Noynoy at Gloria, Walang Pinag-iba

2012-01-16T16:47:00.000-08:00

KORTE NI NOYNOY AT GLORIA, WALANG PINAG-IBA

ni Gregorio V. Bituin Jr.

13 pantig bawat taludtod

ang pagtatalaga ng punong mahistrado

ay tanggalin dapat sa kamay ng pangulo

upang ang bayan ay di magkagulo-gulo

ang pagtatalagang ito'y dapat mabago

kay Noynoy man o Gloria ang Korte Suprema

tiyak namang dito'y wala silang pinag-iba

bangayan lamang ng kampong Noynoy at Gloria

bayan pa rin ay patuloy na nagdurusa

pare-pareho silang iisa ang uri

pag ang suspek ay mayaman, minamadali

pag dukha ang suspek, pakialamang dili

kinikililingan ang kalansing ng salapi

kaya sa Korte, palakad ay baguhin na

dukha man o mayaman, dapat ang pasiya

di batay sa inog ng sistema ng pera

di batay sa uri kundi sa ebidensya

kaya ang nagaganap na impeachment ngayon

ay isang telenobela lang sa maghapon

bangayan ng isang uri ang tagpo doon

di makabusog sa dukhang konti ang lamon

kaya lahat ng natalagang mahistrado

ay dapat nang umalis sa kanilang pwesto

upang bigyang daan ang repormang totoo

na magtatalaga'y tao, di ang pangulo

Laya ng Kalapati

2012-01-14T17:51:00.000-08:00

LAYA NG KALAPATI
ni Gregorio V. Bituin Jr.
13 pantig bawat taludtod

mga kalapati ba'y piniit sa hawla
o malaya rin sila sa tahanan nila

kalapati'y simbolo ng kapayapaan
kaya kayhirap kung sila'y nakakulong lang

pag may kasalan lang sila nakalalaya
o may panawagang mundo'y gawing payapa

ngunit ang simbolo'y di makapagprotesta
kahit paulit-ulit ipiit sa hawla

Oda kay Aesop

2012-01-14T05:45:00.001-08:00

ODA KAY AESOP

ni Gregorio V. Bituin Jr.

13 pantig bawat taludtod

habang binabasa ko ang mga pabula

sa maraming aral ako nga'y napapatda

pagkat si Aesop ay sadyang kahanga-hanga

sinaunang manunulat, paham ang akda

sinilang na may kapansanan sa pandinig

kuba, alipin, ngunit malamyos ang tinig

dahil kung hindi'y sino na ang makikinig

sa mga aral niyang alay sa daigdig

sa kanyang sipag ay pinalaya ng amo

hanggang maglakbay siyang paroo't parito

nakipagtalastasan sa maraming tao

dito lumabas ang pambihirang talino

palibhasa'y dating alipin nang isilang

kaya dama niya yaring pulso ng bayan

lalo't mga dukhang puspos karalitaan

kaya't inaapi nitong mga gahaman

nilikha ang pabula't sa tao'y kinwento

upang maling ugali'y mapuna't mawasto

ginamit ang hayop, pinagkunwaring tao

matabil, mabangis, nag-iisip, at tuso

mga hayop na bida'y sadyang kayrurunong

nariyan ang kwento ng langgam at tipaklong

pabula ng lobo't leyon, matsing at pagong
meron kayang kwento ng balyena't galunggong

nariyan ang pabula ng ubas at lobo
paligsahan nina kalabaw at kabayo
at sa ilog nalaglag ng aso ang buto
paano nakainom sa pitsel ang loro

tinipon mula sa panahong sinauna

nagpasalin-salin at sa mundo'y pamana
hanggang sa kasalukuyan ay mabisa pa
gintong aral sa mundo, sa kapwa't sa masa

mga pabula'y hibo ng katotohanan
kung anong nangyayari sa ating lipunan
mga pabula'y mahirap pabulaanan
pagkat salamin nitong ating kabihasnan

ang pabula ni Aesop ay libo nang taon
ngunit kailangan pa ito hanggang ngayon
ang mga walang buti'y baka magkaroon
at ang lipunang ito'y umigi paglaon

Huwag Mong Tuyain ang Tula sa Dukha

2012-01-13T23:17:00.000-08:00

HUWAG MONG TUYAIN ANG TULA SA DUKHA

ni Gregorio V. Bituin Jr.
13 pantig bawat taludtod

may kakilalang akong panay ang dura
matapos niyang mabasa ang isang tula
kanyang binabasa raw ay di maunawa
pagkat masyado raw itong matalinghaga

"kung di mo maunawa'y bakit ka dumura?"
sa kanya'y tanong ko't tila ikinabigla
"buhay ng karaniwang tao iyang tula
at sa masa mula ang pananalinghaga"

"dumura ka dahil iyo ngang naunawa
ngunit di ka sang-ayon sa nariyang katha
tila turing mo sa masa'y sadyang kaybaba
at ang mga dukha'y iyo ngang tinutuya"

"huwag mong tuyain iyang tula sa dukha
na naglalarawan ng buhay-hampaslupa
tuyain mo'y iyang pulitikong kuhila
na siyang dahilan ng sistemang kaylala"

Organisahin ang mga Manggagawang Kontraktwal

2012-01-12T00:51:00.000-08:00

ORGANISAHIN ANG MGA
MANGGAGAWANG KONTRAKTWAL

ni Gregorio V. Bituin Jr.

14 pantig bawat taludtod

yaong ihip ng hangin ay tuluyang nagbago

kaya ngingisi-ngisi na ang mangangalakal

hinabagat nang tuluyan ng kapitalismo

ang obrerong regular na ngayon na'y kontraktwal

ang regular na manggagawa'y naging kay-ilap

napatahimik ba ang dagat ng pag-uunyon?

pulos kontraktwal na ang sa pabrika'y laganap

sanlaksa sila ngayong patuloy sa pag-alon

kaylawak ng dagat ng manggagawang kontraktwal

habang sapa na lang ang manggagawang regular

nagtagumpay ang iskema ng mangangapital

regular na obrero'y nawalan na ng lugar

nanalo man ngayon ang mga kapitalista

ito sa obrero'y pansamantala lang naman

pagkat maaari rin nating maorganisa

ang manggagawang kontraktwal sa ating lipunan

humihila na tayo ng bayawak sa lungga

sa layon nati't tungkuling pag-oorganisa

kaunti na lang ang regular na manggagawa

dahil kontraktwal na ang mayorya sa kanila

limang buwang singkad, patuloy sa pagpapagal

ang manggagawang iniiwas sa pag-uunyon

aba'y mulatin na sa uri silang kontraktwal

silang mga api'y dapat ding magrebolusyon

Dakilang Oktubre - salin ng tula ni Bertolt Brecht

2012-01-01T03:07:00.000-08:00

Great October

Dakilang Oktubre

A poem by Bertolt Brecht
Tula ni Bertolt Brecht
Salin ni Greg Bituin Jr.

For the Twentieth Anniversary of the October Revolution
Para sa Ikadalawampung Anibersaryo ng Rebolusyong Oktubre

O the great October of the working class!
At last stand upright those
So long bent down. O soldiers, who at last
Point their rifles in the right direction!
Those who tilled the land in spring
Did it not for themselves. In summer
They bent down lower still. Still the harvest
Went to the barns of the masters. But October
Saw the bread, at last, in the right hands!

O, ang dakilang Oktubre ng uring manggagawa!
Sa huling kapita-pitagang tindig ng mga
Matatagal nang nakayuko. O, mga kawal, na sa huling
Asinta ng kanilang mga riple sa tamang direksyon!
Yaong mga nagsaka ng lupa noong tagsibol
Ay ginawa iyon hindi para sa sarili. Noong tag-araw
Mas lalo silang yumuko. Gayunpaman ang mga inani'y
Napunta pa rin sa mga kamalig ng mga panginoon. Ngunit nakita
Ng Oktubre ang mga pagkain, sa wakas, sa tamang mga kamay!

Since then
The world has hope.
The Welsh miner and the Manchurian coolie
And the Pennsylvanian worker, leading a life worse than a dog
And the German, my brother, who
Envies them all
Know, there is
An October.

Mula noon
Nagkapag-asa ang daigdig
Ang minerong taga-Wales at obrero mula Manchuria
At ang manggagawa sa Penmsylvannia, na namumuhay ng masahol pa sa aso
At ang Aleman, aking kapatid, na
Kinaiinggitan nitong lahat
Ay nalalamang, mayroon ngang
Oktubre.

Even the aeroplanes of the Fascists, which
Fly up attacking him, are seen
By the soldier of the Spanish militia therefore
With less anxiety.

Kahit na ang mga eroplano ng mga Pasista, na
Lumipad upang siya'y salakayin, ay nakita
Ng mga kawal ng milisyang Kastila gayunman
Ng di gaanong nababahala.

But in Moscow, the famous capital
Of all the workers
Moves over the Red Square yearly
The unending march of the victors.
They carry with them the emblems of their factories
Pictures of tractors and bales of wool of textile works.
Also the ears of corn of the grain factories.
Above them their fighter planes
Darken the sky and in front of them
Their regiments and tank squadrons.
On broad, cloth banners
They carry their slogans and
The portraits of their great teacher. The cloth
Is transparent, so that
All this can be seen on both sides.
Narrow, on thick sticks
Flutter the high flags. In the far off streets
When the march comes to a halt
There are lively dances and competitions. Full of joy
Progresses the march, many besides each other, full of joy
But to all oppressors
A Threat.

Ngunit sa Moscow, ang tanyag na kabisera
Ng lahat ng mga manggagawa
Ay taun-taong tumutungo sa Pulang Parisukat
Ang walang katapusang martsa ng mga nagwagi.
Tangan nila ang sagisag ng kanilang pabrika
Mga larawan ng traktora at bigkis ng mga hinabing lana.
Pati na puso ng mais sa mga pabrika ng butil.
Sa ibabaw nila'y ang kanilang eroplanong pandigma
Na nagpadilim sa kalangitan at sa harapan nila'y
Ang kanilang mga talupad at tangke armada.
Nakalantad ang kanilang mga bandilang tela
Habang tangan ang kani-kanilang panawagan at
Ang larawan ng kanilang dakilang guro. Ang tela'y
Malinaw, upang
Lahat ng ito'y kita sa lahat ng panig.
Makitid, sa makapal na patpat
Nagwawagayway ang matataas na bandila. Sa malayo
Habang tumigil sumandali ang martsa
May masisiglang sayawan at paligsahan. Puno ng kagalakan
Ngunit sa lahat ng mapagsamantala
Ito'y banta.

O the great October of the working class!

O, ang dakilang Oktubre ng uring manggagawa!

Lubog sa Putik

2011-12-19T09:18:00.000-08:00

LUBOG SA PUTIK

ni Gregorio V. Bituin Jr.

15 pantig bawat taludtod

ilang bahay pa ba ang dapat mabaon sa putik

upang matanto nating dapat kumilos ang masa?

ilang buhay pa ba ang maibabaon sa putik

kung wala tayong magawa sa nagbabagong klima?

lubog sa putik ang mga bayan dahil sa unos

na biglaang dumatal at sa buhay ay tumapos

ilang taon pa ba bago mapaghilom ang mundo

mula sa sakit nitong sa t'wina'y nararanasan?

ilang tao pa ba ang kailangan natin dito

upang mawatasang kapitalismo ang dahilan?

na sa bawat pagbuga ng usok sa himpapawid

butas ang ozone layer na sa mundo'y nagpainit

paano nga ba natin hahanapin sa putikan

ang mga inilubog ng mga bagyong dumatal?

paano ba natin hahalukayin sa isipan

ang matatamis na araw na kapiling ang mahal?

Rosing, Milenyo, Ondoy, Pepeng, Pedring, Quiel, Sendong

ilang pangalan itong sa atin nga'y dumaluyong

kailan magiging seryoso ang pamahalaan

upang paghandaan ang mga unos pang darating?

kailan magiging totoong seryoso ang bayan

upang harapin ang hamon ng daratal pang lagim?

ikaw, 'igan, wala ka bang paki't pahilik-hilik?

paano kung bahay mo na ang lumubog sa putik?

Ang Laptop ay Tulad Din ng Armalayt

2011-12-02T18:16:00.000-08:00

ANG LAPTOP AY TULAD DIN NG ARMALAYT

ni Greg Bituin Jr.

11 pantig bawat taludtod

ang laptop ay tulad din ng armalayt

palaging gamit ng may dala nito

kaulayaw lagi sa gabi't araw

na di dapat mapawalay sa kanya

sa mandirigmang Moro o sundalo

armalite ay para nilang asawa

di inihihiwalay sa katawan

at laging dala saanman magpunta

ganyan din sa mga propagandista

ang laptop ay para nilang asawa

di dapat nawawalay sa katawan

at laging dala saanman magpunta

upang isulat ang dapat isulat

tulad ng mensahe nila sa media

tulad nitong polyetong mapagmulat

na ang babasa'y maoorganisa

armalayt dapat laging may magasin

para sa opensiba nya't depensa

gawa ng propagandista'y magasin

araw-gabi'y katha nang katha siya

di nga dapat sa kanila'y mawalay

ang gamit nilang laging kaulayaw

ang laptop ay tulad din ng armalayt

kasa-kasama hanggang sa pumanaw

kaya dapat nyo silang maunawa

armalayt ay gamit ng mandirigma

at laptop naman sa propagandista

araw-gabi'y lagi nilang kasama

tanggalin mo ang laptop at armalayt

isang araw man o isang oras lang

ramdam mong sila'y di na mapakali

ramdam nila'y wala na silang silbi

laptop at armalayt ay mahalaga

huwag tanggalin sa propagandista

huwag ding alisin sa mandirigma

kung ayaw mong tawagin kang kuhila

ang laptop ay tulad din ng armalayt

parang asawa kung ituring nila

di iniiwan kahit magkagyera

mawawalay lang pag patay na sila

Puso Ko'y Muling Aalon

2011-11-09T00:48:00.000-08:00

PUSO KO'Y MULING AALON

ni greg bituin jr.

14 pantig bawat taludtod

lagi kang dumadalaw sa aking panaginip

parang katabi lang kita, laging nasa isip

hintay ko ang pagbalik mong walang pagkainip

pagkat diwata kitang sa puso'y halukipkip

malayo ka man, ikaw pa rin ang iniibig

iwi kitang rosas na lagi kong dinidilig

na nasa balintataw ko sa gabing malamig

at mga halakhak mo tuwina'y naririnig

kung isa kang karagatan, lalanguyin kita

at yayakapin ko ang alon mo sa tuwina

kung isa kang alapaap, liliparin kita

upang magniig ang ating mga kaluluwa

sa bawat paglalakbay, alaala mo'y baon

ng puso't diwa kong ang adhika'y rebolusyon

sa bawat pakikibaka, ikaw'y inspirasyon

makita lang kitang muli, puso ko'y aalon

Hustisya'y Pangmayaman?

2011-10-23T11:23:00.000-07:00

HUSTISYA'Y PANGMAYAMAN?

ni Gregorio V. Bituin Jr.
18 pantig bawat taludtod

napakaraming katanungan ang umuukilkil sa isipan
kapag may naaagrabyado sa sistema ng katarungan

bakit si Erap na guilty sa plunder ay nakalaya agad
ngunit yaong political prisoners sa piitan pa'y babad

bakit si Gloria'y pwede agad magpagamot sa ibang bansa
ngunit namamatay na di magamot ang mga maralita

bakit sinabi ni Noynoy na ang taumbayan ang kanyang Boss
ngunit kampi kay Lucio Tan, di sa manggagawang inuubos

bakit sa kaso ng taga-FASAP na nanalo na sa Korte
ay nabaligtad pa kahit ito'y "final and executory"

sa simpleng liham lang ng abogadong Estelito Mendoza
ay biglang umikot ang tumbong ng Korte't dagliang nagpasya

bakit kaybilis ng hustisya sa mga tulad ni Lucio Tan
ngunit kaybagal pag mahirap ang naghanap ng katarungan

bakit si Jalosjos na guilty sa rape ay agad nakalaya
ngunit si Echegaray ay agad nabitay sa Muntinlupa

bakit nauso ang salot na iskemang kontraktwalisasyon
na pumatay sa karapatan ng mga obrerong mag-unyon

bakit pati ang mga vendors na nagtitinda ng marangal
ay hinuhuli't sinusunog ang kanilang mga kalakal

ngunit ang pribadong sektor na sa masa'y kaytaas maningil
pinayagan kahit buhay nati'y unti-unting kinikitil

bakit ang nahuhuling mag-jumper ay agad ipinipiit
ngunit malaya ang sumisingil ng kuryenteng di ginamit

bakit bahay ng maralita'y winawasak at tinitiris
kaya nambabato ang mga maralitang dinedemolis

a, sadyang napakarami pang bakit ang ating masasabi
lalo't sa sistema ng hustisya sa bansa'y di mapakali

di ang mayayaman lang ang dapat makadama ng hustisya
kundi dapat lahat, may hustisya dapat lalo na ang masa

"at ang hustisya ay para lang sa mayaman", ayon sa awit
na Tatsulok na ang mensahe'y sadya ngang nakapagngangalit

masasagot ang mga tanong kung ating pakasusuriin
bakit ganito ang sistema't kalagayan ng bayan natin

mula doon ay magkaisa tayo tungo sa pagbabago
ng sistema't itayo na ang isang lipunang makatao

huwag nating payagang magisnan pa ng ating mga anak
ang sistemang tila balaraw sa ating likod nakatarak

tayo nang magsama-sama't palitan na ang sistemang bulok
at ang uring manggagawa't aping masa'y iluklok sa tuktok

Kung Namumuno'y Kuhila

2011-10-22T07:39:00.001-07:00

KUNG NAMUMUNO'Y KUHILA

ni Greg Bituin Jr.

8 pantig bawat taludtod

nakikilala sa gawa

ang totohanang dakila

kaya kung namamahala

sa gobyerno at sa madla

ay pawang mga kuhila

mamamayan ay kawawa

Kung Paano Paslangin ang Kapitalista

2011-10-19T19:26:00.000-07:00

KUNG PAANO PASLANGIN ANG KAPITALISTA
ni Greg Bituin Jr.

ang pagpaslang sa kapitalista'y di sa pamamagitan ng:
- pagpugto ng kanyang hininga
- pagbasag ng kanyang bungo
- pagputi ng kanyang buhay
dahil masama daw pumatay
sabi ng mga nagbabanal-banalan

tulad ng kung gaano kasama ang
- di pagbabayad ng tamang halaga ng lakas-paggawa ng mga manggagawa
- salot na iskemang kontraktwalisasyon na yumuyurak sa karapatan
- baliw na sistemang demolisyon
- kasakiman sa tubo, tubo at tubo

mapapaslang lamang ng tuluyan
ang mga hayop na kapitalista
kung bubunutin ang pinag-ugatan
ng kanilang pananamantala

di madaling paslangin ang kapitalista
- dahil hawak nila ang estado poder
- dahil kampi nila ang ehekutibo, lehislatibo at hudikatura
- dahil may pribado silang hukbo ng depensa
- ngunit mapapaslang din sila

mapapaslang ang kapitalista kung:
- magkakaisa ang uring manggagawa
- magrerebolusyon ang mamamayan
- mapapawi ang dahilan ng kanilang eksistensya
- mapapawi ang pribadong pagmamay-ari ng mga kagamitan sa produksyon, pagkat ito ang ugat ng kahirapan
- maitatayo ang bagong sistemang siyang papalit sa kapitalismo

Ang Nagwawalanghiya pa ang Pinagpapala

2011-10-18T15:49:00.000-07:00

ANG NAGWAWALANGHIYA PA
ANG PINAGPAPALA
ni Greg Bituin Jr.
13 pantig bawat taludtod

sinipsip nila ang ating lakas-paggawa
na madalas ay di binabayarang tama
ibinabaon tayo sa pagiging dukha
kahirapan pa natin ay pinalalala

pag nalugi naman ang kanilang kumpanya
manggagawa'y sisisihin dahil nagwelga
pinagpapala pa'y mga kapitalista
ng gobyernong kauri nila sa burgesya

pag ang bansa'y nagkaproblema sa panggugol
obrero'y tanggal, buhay ng dukha'y sasahol
pag may krisis, bangko pa ang pinagtatanggol
sa kapitalista'y di sila makatutol

bakit ba yaong mga nagwawalanghiya
ang siyang sa mundong ito'y pinagpapala
kapitalista'y sinambang tila Bathala
habang itsapwera ang manggagawa't dukha

globalisasyon ang lumikha nitong krisis
obrero'y unti-unti nilang tinitiris
karapatan ng masa itong pinapalis
turing ng kapitalismo sa masa'y ipis

habang mga bangkong tuloy sa pagkalugi
tutulungan ng gobyernong mapagkandili
di sa kanyang mamamayan, kundi sa imbi
tila sumumpang bangko'y tutulungan lagi

kapitalismo nga'y walanghiya't kaysakim
sa puso'y dumuduro't nagdulot ng lagim
sa bituka nati'y gumuguhit, matalim
hanggang magsuka tayo ng dugong nangitim

palitan na natin itong sistemang bulok
sa pagbabago lahat tayo'y magsilahok
mga sektor, dukha, babae, tagabundok
uring manggagawa'y ilagay na sa tuktok

Pasindi, Sabi ng Adik sa Yosi

2011-10-16T12:00:00.000-07:00

PASINDI, SABI NG ADIK SA YOSI
ni Greg Bituin Jr.
12 pantig bawat taludtod

nakakabili ng isang kahang yosi
di makabili ng sariling panindi
naghihiram ng lighter imbes bumili
kapwa'y inaabala't kinukunsumi

trenta pesos ang kaha ng sigarilyo
dalawang piso lang naman ang posporo
pero di makabili ang mga ito
di masustentuhan ang sariling bisyo

ugali nilang araw-araw manghiram
ng panindi't sa iba'y nakikialam
kakilala'y lihim namang nang-uuyam
na sila yata'y wala nang pakiramdam

ang kanilang kapwa'y di na lang iimik
sa pang-aabala nilang mga adik
pag di nasindihan ang yosing katalik
baka mata nila'y agad magsitirik

Kung Paano Ako Dapat Mamatay

2011-10-14T01:15:00.001-07:00

KUNG PAANO AKO DAPAT MAMATAY

ni Gregorio V. Bituin Jr.

11 pantig bawat taludtod

walang sinumang makapagsasabi

kung paano ba tayo mamamatay

kung mamamatay ba akong may silbi

o bubulagta lang ng walang malay

tutumba ba ako sa isang punglo

o tatadtarin ang aking katawan

tutumba ba dahil pinagkanulo

ng sinumang tarantado't gahaman

mamamatay ba akong busog, bundat

o mamamatay na mata ko'y dilat

mamamatay ba ako habang bata

o mamamatay na lang sa pagtanda

kung paghiling ay maaari lamang

kung paano ako dapat mamatay

huwag pahirapan, isang bala lang

itong tatapos sa iwi kong buhay

tandang pinagsilbihan ang obrero

kahit buhay ko sa dalita'y sidhi

ginampanang husay ang aktibismo

nang lumang sistema'y di manatili

Ang Masa'y Putik sa Panahon ng Kapitalismo

2011-10-02T12:40:00.000-07:00

ANG MASA’Y PUTIK SA PANAHON NG KAPITALISMO

ni Gregorio V. Bituin Jr.

15 pantig bawat taludtod

ang masa'y putik sa panahon ng kapitalismo
ang burgesya'y bulag mamatay man ang mga ito
ang elitista'y bingi pag masa'y nagsusumamo
kapitalista'y pipi't tila walang pagkatao
sa ganito ngang sistema'y lagi na lang ganito

putik ang tingin sa masa ng mga hinayupak
kaya pag dukha'y nakakatuwaang hinahamak
putik ang masa kaya pinagagapang sa lusak
ng dusa't hirap sa daigdig na ito'y palasak
at sa mga sugat ng sakripisyo'y nag-aantak

sa kapitalismo'y kapit sa patalim ang masa
laging inaaglahi, lagi silang itsapuwera
may demolisyon, lakas-paggawa'y binabarat pa
sa sitwasyong bang ito tayo'y magpipikitmata
o makikibaka na't babaguhin ang sistema

ang mga dukha'y parating inaapak-apakan
ng mga mapagsamantalang uri sa lipunan
karangalan ng masa'y kanilang pinuputikan
kaya ang masa't manggagawa'y dapat nang lumaban
upang itayo ang kanilang sariling lipunan

dapat nang wakasan ang sa masa'y pang-aaglahi
putik na ikinulapol sa masa'y mapapawi
kung dudurugin na ang mapagsamantalang uri
ang kapitalistang sistema'y dapat nang mapawi
uring manggagawa't dukha'y panahon nang maghari

Si Lucio ba ang Boss ni P-Noy?

2011-10-01T09:36:00.000-07:00

SI LUCIO BA ANG BOSS NI P-NOY?

ni Gregorio V. Bituin Jr.

13 pantig bawat taludtod

(2,600 manggagawa ang apektado ng planong outsourcing sa PAL)

ang sabi noon ni P-Noy, "kayo ang Boss ko!"

ngunit sino nga ba ang Boss niyang totoo?

ang kapitalista ba o ang simpleng tao?

sa kaso ng PAL, obrero ba o si Lucio?

sino ba talaga ang Boss ng pangulo nyo?

nais pa niyang kasuhan ang manggagawa

economic sabotage ang aming balita

anong nangyari, Pangulo na'y walang awa

ang kapitalista na ang dinadakila

at mga manggagawa'y binabalewala

si Lucio ba ang Boss ni P-Noy? tanong ko lang

si Lucio na ba ang sa puso niya'y lamang?

ang sagot dito'y alam ng bayan malamang

kita namang kapitalista'y nanlalamang

kahit karapatan ng obrero'y maharang

di na naisip, Boss niya ang manggagawa

ang Pangulo ba'y wala nang isang salita

mga manggagawa na'y winawalanghiya

pagkat iyang pangulo nyo'y nagpapabaya

di pala niya Boss ang manggagawa't dukha

labanan ang promotor ng pribatisasyon

at nangwawasak ng karapatang mag-unyon

labanan ang salot na kontraktwalisasyon

mga karapatan ang tanging tayo'y meron

kaya tama lang ipaglaban ito ngayon

ang sabi noon ni P-Noy, "kayo ang Boss ko!"

nagsisinungaling na yata siyang todo

aba'y kung sunud-sunuran siya kay Lucio

dapat magpasiya na ang uring obrero

ang pangulo nyo'y patalsikin na sa pwesto!

Uso na naman ang noodles at sardinas

2011-09-28T17:38:00.000-07:00

USO NA NAMAN ANG NOODLES AT SARDINAS

ni Gregorio V. Bituin Jr.

15 pantig bawat taludtod

ang biglaang pagragasa ni Pedring ay marahas

binaha ang lansangan, blakawt, bahay ay binutas

kayraming gamit ang binaha't di na nailigtas

marami'y sa evacuation center na nagpalipas

ng magdamag upang sariwain ang nakalipas

na maghapong dinalirot ng unos na kayrahas

uso na naman ang sanlaksang noodles at sardinas

handa ng gobyernong di handa sa bagyong kaylakas

sari-saring mga delata't ilang kilong bigas

ganito lagi ang sitwasyong ating mamamalas

habang ang iba naman, tubig-baha'y nililimas

pilit binabalik sa dati ang nasirang landas

isang katotohanan itong sa diwa'y nagbukas

pag may kalamidad, tambak ang noodles at sardinas

Si Ondoy at si Pedring

2011-09-27T10:36:00.000-07:00

SI ONDOY AT SI PEDRING
ni Gregorio V. Bituin Jr.
15 pantig bawat taludtod

tila magkapatid na halimaw na rumagasa
at sinagilahan ng pangamba ang ating diwa
isang araw lang nanalasa ang mga kuhila
ang lupit nila sa maraming tahanan gumiba
sa sementadong daan, ngitngit nila'y nagpabaha
iniwan nilang bakas ang mga putikang lupa
punong bumagsak, nasirang bahay, luhaang madla
kahirapan at dusa'y kanila pang pinalala
ang kapangyarihan nila'y sadyang dama ng madla
sa pagdatal ng bagong araw muling nanariwa:
ang pamahalaan nga ba'y handa sa mga sigwa?
sa unos, ang mamamayan ba'y paano naghanda?

(Ondoy - Setyembre 26, 2009; Pedring - Setyembre 27, 2011)

May Tunggalian ng Uri Kahit sa Balita

2011-09-26T07:17:00.000-07:00

MAY TUNGGALIAN NG URI KAHIT SA BALITA

ni Gregorio V. Bituin Jr.

13 pantig bawat taludtod

bakit kaya pag pagkilos ng manggagawa

at pakikibaka ng mga maralita

ay bihira o hindi agad mabalita

kahit na ang mga nangyayari'y malala

ngunit pag press release na ng kapitalista

aba'y sadyang ito'y agad nababandera

talagang pinagkakaguluhan ng media

basta't balitang burges, nag-uunahan na

teka, magkano nga ba ang bawat balita

mga nasa media'y sadyang nagkandarapa

sa kapitalista'y di magkandaugaga

habang dehado lagi itong manggagawa

sa balita man, may tunggalian ng uri

basta mahirap, nadedehado ang puri

ngunit basta mayaman, laging pinupuri
ganitong estilo'y di dapat manatili

Sa Kongreso ng ZOTO

2011-09-24T15:07:00.000-07:00

SA KONGRESO NG ZOTO

ni greg bituin jr.

11 pantig bawat taludtod

sa Hito covered Court nag-uumapaw

sa dami itong mga maralita

silang pawang sa hustisya nga'y uhaw

magko-Kongreso na ang mga dukha

pag-uusapan ang kinabukasan

ng kanilang bunying organisasyon

tatalakayin pati karapatan

sa paninirahan at demolisyon

mga kasama'y kay-agang dumating

mula sa labimpitong tsapter nila

dadalo sa makabuluhang piging

na simbolo ng pag-asa't hustisya

nirepaso nila ang Konstitusyon

may debate't may pinagkaisahan

tinalakay ang mga resolusyon

pinalakpakan ang sinang-ayunan

bagong pamunuan nila'y binoto

na siyang uukit ng bagong bukas

tiyak na tatatag muli ang ZOTO

dahil matwid ang tatahaking landas

Tuwirin ang Daan

2011-09-12T15:47:00.001-07:00

TUWIRIN ANG DAAN

ni Gregorio V. Bituin Jr.

6 pantig bawat taludtod

bakit ang dalaga

sa iyo'y namali

tuwirin ang daan

huwag biglang liko

bakit ba si lola

may tangan nang tungkod

tuwirin ang daan

huwag baku-babako

hinay-hinay, itay

sa pagtakbu-takbo

tuwirin ang daan

baka ka mahapo

kumusta na, anak

ang pag-aaral mo

tuwirin ang daan

di pwede ang dungo

basag na ang budhi

laklak pa ng laklak

tuwirin ang daan

nariyan ang lango

nakipagkarera

ang nagmamaneho

tuwirin ang daan

nang walang mabunggo

Batu-Bato sa Lupa

2011-09-10T11:17:00.000-07:00

BATU-BATO SA LUPA

ni Gregorio V. Bituin Jr.

7 pantig bawat taludtod

batu-bato sa lupa

pilit na tumatama

sa mga hampaslupa

kaya sila'y kawawa

batu-bato sa lupa

dapat nating ihanda

ang kapwa manggagawa

sa sosyalistang diwa

batu-bato sa lupa

bayaran nilang tama

itong lakas-paggawa

ng mga manggagawa

batu-bato sa lupa

obrero ang lumikha

ng ekonomya't bansa

bakit sila'y dalita

batu-bato sa lupa

bakit nagpapasasa

sa yaman nilang likha

yaong di gumagawa

batu-bato sa lupa

problema ba'y huhupa

bakit ba laging dukha

ang mga maralita

batu-bato sa lupa

huwag mangalumbaba

at mag-isip ng wala

baka araw masira

batu-bato sa lupa

ang tamaan kawawa

pag ginawa'y di tama

tatamaan ngang sadya

Sa Kaarawan ng Mahal Kong Ina

2011-09-06T01:27:00.000-07:00

SA KAARAWAN NG MAHAL KONG INA

(sa kanyang ika-65 kaarawan at pagretiro
sa trabaho, Setyembre 6, 2011)

ni Gregorio V. Bituin Jr.

14 pantig bawat taludtod

isang maalab na pagbati, mahal kong ina

na sa kaarawan mo, ikaw'y retirado na

haharapin mo na ngayon ay buhay na iba

pagkat tapos na ang iyong buhay-opisina

kilala ka namin, inay, napakatatag mo

anuman ang problema'y hinaharap ng todo

malalim magsuri at matalas magkomento

na sa palagay ko'y namana namin sa iyo

tulad ng graduation, iba na ang haharapin

pagkat panibagong buhay na ang tatahakin

di iyan simpleng pagtigil sa dating gawain

kundi bagong plano na ang pakaiisipin

pagbati, inay, ng maligayang kaarawan

ako man po'y tupang pulang nag-iba ng daan

ngunit tinahak ko'y para sa pagbuti naman

ng higit na nakararaming kapatid at bayan

maraming salamat, inay, sa inyong pang-unawa

alam nyong ang tinahak ko'y landas na dakila

payo nyo nga noon, basta gawin ko ang tama

kahit maghirap, basta't mabubuti ang gawa

nagpupugay kami sa aming dakilang ina

kaming anak ng Batanggenyo't Kinaray-a

di ka nagpabaya lalo't kami'y may problema

kahit matigas ang ulo ko'y naririyan ka

handang magpayo sa anak, handang umunawa

kahit madalas masakit, ikaw'y lumuluha

ngunit pinakita mong matatag ka't di nagigiba

sa pagpayo mo sa amin, di ka nagsasawa

kaming anak ninyo'y naririto't nagninilay

sana kaligayahan ang sa inyo'y dumantay

nagpapasalamat sa walang-sawa nyong gabay

maligayang kaaarawan at salamat, inay

Kailan Ba Makikita Silang Nangawala?

2011-08-30T16:00:00.000-07:00

KAILAN BA MAKIKITA SILANG NANGAWALA?

(Alay para sa International Day of the Disappeared,

Agosto 30, 2011)

ni Gregorio V. Bituin Jr.
15 pantig bawat taludtod

kailan ba makikita ang mga nangawala

mawawala na bang tuluyan ang kanilang mukha

di ba't aktibista silang ang ginawa'y dakila

para sa masa, para sa obrero't mga dukha

dahil ba nagrebolusyon, sila na'y isinumpa

sila'y nangawala na ng matagal na panahon

sinong magsasabi kung saan sila ibinaon

kailan nga ba makikita silang nangawala

malalaki na ang iniwan nilang mga bata

paghahanap nila'y kailan matatapos kaya

sa buhay na ito'y iyan ang kanilang inaadhika

saan ba makikita ang bangkay na nangawala

sila'y nangawala na ng matagal na panahon

sinong magsasabi kung saan sila ibinaon

nagkakaisa ng pangarap ang mga naiwan

mga nangawala'y tuluyan nilang matagpuan

kahit pawang kalansay na lamang upang mabigyan

ng disenteng libing at kanilang maparangalan

nang kahit paano, sakit sa damdami'y maibsan

sinong magsasabi kung saan sila ibinaon

sino kaya ang nag-utos upang sila'y ibaon

Ano ang Rebolusyon?

2011-08-24T21:03:00.000-07:00

ANO ANG REBOLUSYON?

ni Greg Bituin Jr.

Ang rebolusyon ay pagbato ng tae sa mukha ng mga imperyalista.

Ang rebolusyon ay pagpana sa puwet ng mapagsamantala.

Ang rebolusyon ay ang pagpukol ng bulok na kamatis at bagoong sa mga bulok na pulitikong pahirap sa bayan.

Ang rebolusyon ay ang mga lider na di nahihiyang maghawak ng plakard at bandila sa rali.

Ang rebolusyon ay ang pag-apak sa makasaysayang Mendiola, ang pangunahing lunsaran ng protesta.

Ang rebolusyon ay ang pagtulong sa dinedemolis na maralitang walang sariling bahay.

Ang rebolusyon ay ang pag-oorganisa sa mga manggagawang regular upang magtayo ng unyon.

Ang rebolusyon ay ang pag-oorganisa sa mga manggagawang kontraktwal na walang katiyakan sa trabaho.

Ang rebolusyon ay ang magkasintahang aktibista.

Ang rebolusyon ay ang mag-asawang nakikibaka at ang anak na sumusunod sa yapak ng ama't inang aktibista.

Ang rebolusyon ay pagpawi sa pribadong pag-aari ng mga kasangkapan sa produksyon.

Ang rebolusyon ay sina kasamang Karl at Friedrich na nag-akda ng isang manipesto noong 1848 para sa uring manggagawa.

Ang rebolusyon ay si kasamang Vladimir at ang kanyang 45 tomo ng tinipong mga akda.

Ang rebolusyon ay sina kasamang Fidel at Che na nagbago sa landas ng pulitika sa kanilang bansa.

Ang rebolusyon ay si kasamang Popoy at ang diwang kanyang ipinamana sa manggagawang Pilipino.

Ang rebolusyon ay uring manggagawang nagkakaisa upang baguhin ang bulok na sistema.

Ang rebolusyon ay ang pananaig ng hinahon sa harap ng paninibasib ng kapitalismo sa mundo.

Ang rebolusyon ay pagmumulat sa manggagawa't maralita tungo sa adhikaing sosyalistang lipunan.

Ang rebolusyon ay ang kongkretong pagsusuri sa kongkretong kalagayan ng lipunan, kapaligiran at kapwa tao.

Ang rebolusyon ay siyang dapat pangarapin ng mayoryang naghihirap sa mundo laban sa iilang nagpapasasa sa yaman ng daigdig.

Kaming Aktibista'y Nabubuhay ng Marangal

2011-08-23T16:30:00.000-07:00

KAMING AKTIBISTA'Y NABUBUHAY NG MARANGAL

ni Gregorio V. Bituin Jr.

14 pantig bawat taludtod

kaming aktibista'y nabubuhay ng marangal

nakikibaka man kami laban sa kapital

ngunit nakikibakang marangal, di kriminal

kami'y tumatalima sa disiplinang bakal

di nambabastos, di nanghihipo, at di imbi

di nagnanakaw, di nang-aapi ng babae

matanda, bata, tungkulin namin ang magsilbi

sa masa at nilalabanan ang mang-aapi

binabayarang tama ang anumang nasira

laging may paggalang sa bawat pananalita

isinasauli bawat hiniram sa madla

kapwa ma'y kagalit, di namin isinusumpa

di nangunguha kahit piraso ng sinulid

sa lipunan, mata't tainga namin ay di pinid

anuman ang isyu't pangyayari'y binabatid

pagkat buhay na marangal itong aming hatid

Hanggang Islogan Ka Lang (?!)

2011-08-20T09:39:00.000-07:00

HANGGANG ISLOGAN KA LANG (?!)

ni Gregorio V. Bituin Jr.

15 pantig bawat taludtod

anang pangulo, "Kung Walang Corrupt, Walang Mahirap"

paano naman kung ang kanyang mga patakaran

ay kontra-masa, kontra-obrero't kontra-mahirap

di ba't ito'y tulad din ng pagiging utak-wangwang?

kaya di sapat ang "walang corrupt, walang mahirap"

na kanyang islogan mula halalan hanggang ngayon

dahil ito'y magmumukha lang isang pagpapanggap

kung ramdam pa rin ng nakararaming masa'y gutom

sabi pa niya sa telebisyon, "Kayo ang Boss ko!"

ngunit tila di siya sa sambayanan nagsabi

kundi sa mga kinatawan ng kapitalismo

na nangaroon at walang sawang ngingisi-ngisi

patunay ang mga patakarang pribatisasyon

na polisiya ng kanyang public-private partnership

kung masa'y Boss, bakit masa'y busabos pa rin ngayon

tila pangako nya'y patay na diwa't panaginip

pangako nya'y "Tutungo Tayo sa Tuwid na Daan"

ngunit tuwid bang manggagawa'y iniitsapwera?

tuwid bang dukha'y lubog pa rin sa karalitaan?

tuwid bang sa impyerno pala tayo dinadala?

kung ganyan pala, hanggang islogan ka lang, pangulo!

baka ang labi mo'y gasgas na sa kapapangako

kung di mo kaya, umalis ka na sa iyong pwesto

kaysa naman ang bayan pa'y iyong ipagkanulo

Sa Bahay na Bato, Kahit Ito'y Munti

2011-08-18T18:52:00.000-07:00

SA BAHAY NA KAHOY, KAHIT ITO'Y MUNTI

ni Gregorio V. Bituin Jr.

12 pantig bawat taludtod

Sa bahay na kahoy, kahit ito'y munti

pinagmulan nami'y pawang sari-sari

may burgis, may peti-b, manggagawa't hindi

kami'y nagkasama, prinsipyo ang sanhi

inoorganisa'y mga aping uri

Sa bahay na kahoy, kahit ito'y munti

minsan, may pagkain doong sari-sari

minsan kami'y busog, kadalasang hindi

pagkat pultaym kami't salat sa salapi

na nakikibaka hangga't maaari

Sa bahay na kahoy, kahit ito'y munti

iniisip doon ang dangal at puri

ng obrero, kapwa't inaaping uri

at laging kongkreto kaming nagsusuri

dahil nais naming sa laban magwagi

Sa bahay na kahoy, kahit ito'y munti

pinaplano doon paano magwagi

sa pakikibakang di minamadali

tatanggalin ang pribadong pag-aari

nang kapitalismo'y tuluyang mapawi

Panata sa Sinta

2011-08-17T06:14:00.000-07:00

PANATA SA SINTA
ni Gregorio V. Bituin Jr.
10 pantig bawat taludtod

habambuhay akong magsisisi
o sisisihin ko ang sarili

kung ang babaeng iniibig ko'y
di ko lubusang maipagtanggol

kung di ko siya matutulungan
sa lahat ng problemang dumatal

kung ako'y di magsasakripisyo
para sa kapakanan ng mahal

kung buhay ko'y di maihahandog
para sa kaligtasan ng sinta

kung siya'y di agad kakampihan
pag siya'y pinagkakaisahan

dahil tiyak kung magkakagayon
habambuhay akong magsisisi

mas maigi pang magpatiwakal
kung iyan ay di ko magagawa

marahil ako sa kanya'y hangal
ngunit siya'y pinakamamahal

poprotektahan ng buong puso
ang sinisinta ko't sinusuyo

di ko siya iiwan sa laban
makaharap man si Kamatayan

buhay ko ma'y aking ipapalit
buhay ko man ang maging kapalit

kaya pinagsisikapan ko nang
gawin ang lahat ng nararapat

nang di ko sisihin ang sarili
nang di ako magsisi sa huli

Di Lahat ng Tahimik, Nasa Loob ang Kulo

2011-08-16T07:48:00.000-07:00

DI LAHAT NG TAHIMIK, NASA LOOB ANG KULO

ni Gregorio V. Bituin Jr.

15 pantig bawat taludtod

di lahat ng tahimik ay nasa loob ang kulo

pagkat sila'y nag-iisip muna bago kumibo

nagsusuring lagi upang di sila matuliro

sa maraming bagay, isyu't pangyayari sa mundo

marahil sila rin ang may pangarap na gumuho

kaya di malasap sa buhay ang anumang luho

marahil sila'y mahihirap na salat at tuyo

na ramdam sa lipunan ay pagkaapi't siphayo

marahil sila rin yaong taong may tinatago

na kung mabubuking, sila'y agad nang maglalaho

marahil sila rin ang tahimik na nadudungo

sa dalagang pinakaiibig nang buong puso

may tahimik na di na alam kung saan patutungo

dahil pag-asang pagbabago'y di na mapagtanto

may tahimik namang ang pluma'y armas, nanggugupo

at sa aping masa'y rebolusyon ang tinuturo

di lahat ng tahimik ay nasa loob ang kulo

dahil may masasaya sa sarili nilang mundo

tulad sila ng ahedres na tahimik na laro

matalas, may inisyatiba, may sariling palo

kung uunawain lang sila, tayo'y may mabubuo

na ugnayang tapat, sila ma'y ating makabunggo

di agad mag-iinit ang ating kamao't dugo

pang-unawa'y una upang maling haka'y maglaho

Ang Obrero at ang Organisador

2011-08-15T07:14:00.000-07:00

ANG OBRERO AT ANG ORGANISADOR

ni Gregorio V. Bituin Jr.

13 pantig bawat taludtod

minsan ay napaisip ang isang obrero:

"ako'y manggagawa, trabaho nang trabaho

araw-araw na lang, ako'y kayod kabayo

ngunit bakit naghihirap pa rin sa mundo

habang ngingisi-ngisi lang ang aking amo"

himutok pa niya, "ito ba'y kapalaran?

nagsisipag ako sa araw-araw na lang

ngunit nabubuhay pa rin sa karukhaan

paano ang pamilya ko't kinabukasan

kung among kapitalista lang ang yayaman"

nagpayo ang organisador, "magsuri ka

kalagayan mo'y dapat mong maanalisa

ano ang kasaysayan mo't nagkaganyan ka

suriin ang kalagayan mo sa pabrika

kung may tanong ka, paliliwanagan kita"

"pagsusuri'y dapat nating maunawaan

kung bakit ito'y ating kinakailangan

dahil ang bawat bagay dapat may batayan

bawat pangyayari sa mundo'y may dahilan

suriin ang paligid, sistema't lipunan"

"simulan mo nang magtanong ng bakit, bakit

suriin kung bakit ka naghihinanakit

bakit kalagayan sa pabrika'y kaylupit?

bakit ba karapatan mo'y pinagkakait?

bakit ikaw na lumilikha'y nanliliit?"

"unawain mo bakit sistema'y baluktot

pagpaplano sa pabrika'y di ka kasangkot

sa kabila ng sipag mo, sahod mo'y bansot

bakit sa tubo ang amo mo'y mapag-imbot

sa pagsusuri'y makikita mo ang sagot"

organisador at obrero'y nagkasundo

nagtalakayan kung paano maigupo

ang sistemang sa dugo nila'y nagpakulo

pinag-usapan saan nanggaling ang tubo

bakit pagtaas ng sweldo'y tila malabo

sinuri pati ang kanilang kalagayan

kapitalista't obrero'y anong ugnayan

bakit manggagawa'y napagsamantalahan

hanggang nagkasundong baguhin ang lipunan

uring obrero'y pagkaisahing tuluyan

Diyalektika, Hindi Pantasya

2011-08-14T05:35:00.000-07:00

DIYALEKTIKA, HINDI PANTASYA

ni Gregorio V. Bituin Jr.

13 pantig bawat taludtod

di tayo dapat mabuhay pa sa pantasya

na dulot ng kaisipang metapisika

sa kalagayan, pagsusuri'y mahalaga

pag-aralang mahigpit ang diyalektika

pagkat ito'y pundasyon ng materyalista

ang ideyalismo't metapisika'y kapos

wala tayong maaasahang manunubos

kundi kaligtasan nati'y nasa pagkilos

kung nais mong mapawi ang pagkabusabos

lipunan ay pag-aralan, magsuring lubos

kontradiksyon ay likas sa isang proseso

may kantidad at kalidad na pagbabago

kung talagang maunawaan natin ito

sa teorya't praktika'y patutunayan nito

sa totoong pagbabago'y dadako tayo

kongkretong kalagayan ay ating suriin

pagkakaisa't tunggalian ay alamin

ang nagpawi sa nagpawi'y isipin

diyalektikong materyalismo'y aralin

ito ang sa pakikibaka'y armas natin

Magsuri Upang Di Mangapa sa Dilim

2011-08-12T16:37:00.000-07:00

MAGSURI UPANG DI MANGAPA SA DILIM

ni Gregorio V. Bituin Jr.

13 pantig bawat taludtod

suriin ang lahat ng bagay sa lipunan

pati relasyon ng tao sa pamayanan

suriin bakit may pinagsamantalahan

bakit may dukha't laganap ang kahirapan

bakit ganito ang mundong ginagalawan

aralin ang kasaysayan ng mga lipi

alipin, nobilidad, magsasaka't hari

aralin bakit may pribadong pag-aari

at sa manggagawa'y rebolusyon ang binhi

upang maunawaan ang mundo'y magsuri

alamin natin bakit dapat may batayan

ang anumang bagay dito sa daigdigan

di pwedeng paliwanag ay kathang isip lang

na nangyayari sa mundo'y alamat lamang

pagkat lahat ay may basehan, pinagmulan

anuma'y suriing mataman at matalim

pagsusuri'y dapat malaman at malalim

magsuri ka kahit tiyan mo'y nangangasim

magsuri kang lagi nang di ka naninimdim

magsuri upang di ka mangapa sa dilim

Tubig at Asin (Awit ng Dukha)

2011-08-11T01:41:00.000-07:00

TUBIG AT ASIN

(AWIT NG DUKHA)

ni Gregorio V. Bituin Jr.

tubig at asin

iyan ang karaniwang tanghalian namin

di sapat ang pera kahit may gustong bilhin

kami'y dukha kaya nagdidildil ng asin

asin at tubig

sa gutom kami'y lagi na lang nanginginig

kalam ng sikmura ang laging naririnig

sa amin na yata'y luha ang dinidilig

tubig at asin

ito ang simbolo ng kahirapan namin

di na malasap ang masarap na pagkain

mga himutok kaya namin ay diringgin

asin at tubig

simbolo ito ng kawalan ng pag-ibig

sino pa ba ang sa dukha'y nais tumindig

kami ba'y nakikita nyo pa't naririnig

o kami sa inyo'y matagal nang nalibing

Pagpag Kapalit ng Basura

2011-08-10T16:12:00.000-07:00

PAGPAG KAPALIT NG BASURA

ni Gregorio V. Bituin Jr.

10 pantig bawat taludtod

totoo ito, di haka-haka

pagpag ang kapalit ng basura

na ipapakain sa pamilya

ganyan kahirap ang buhay nila

sa gutom sila na'y naduduling

hirap, dusa'y ramdam kahit himbing

tao ba ang sa kanila'y turing

gobyerno pa kaya'y magigising

sa fast food chain may kausap sila

ibibigay ang pagkaing tira

dahil ito na'y mga basura

ngunit lulutuing muli nila

tira-tira, lulutuing muli?

kahit ganito'y di nandidiri

sa gabi't araw, ito na'y gawi

kaysa sa gutom sila'y masawi

Isang Litrong Sabaw sa Isang Paketeng Lucky Me

2011-08-09T15:57:00.000-07:00

ISANG LITRONG SABAW SA ISANG PAKETENG LUCKY ME

ni Gregorio V. Bituin Jr.

18 pantig bawat taludtod

nalulunod sa gutom at uhaw ang isang dukhang pamilya

dinaan na lang sa litrong sabaw ang pakete ng Lucky Me

nagbakasakaling makatighaw ng uhaw at gutom nila

walang kanin at ulam kundi sabaw at nudels ng Lucky Me

paanong pamilya nila'y lulusog kung laging walang pera

tila kinabukasan nila'y nalunod na rin sa kawalan

di na pansin ng salbaheng gobyernong utak-kapitalista

na wala nang pakialam sa nagdaralitang sambayanan

ang buhay nga ba ng tulad nilang dukha'y sadyang swerte-swerte?

nagsisikap sila upang makakain ang buong pamilya

nagsisipag araw-gabi langit man ang kanilang kisame

ngunit litrong sabaw tinitiis para Lucky Me'y magkasya

bakit ganyan, ang kanilang buhay ba'y hanggang Lucky Me na lang?

di naman sila naging lucky't batbat pa rin ng dusa't hirap

kaya pa kaya nilang mangarap ng isang bagong lipunan?

o ang pangangarap kahit libre'y di na nila maapuhap?

Kalabit ng Kapos

2011-08-07T17:36:00.000-07:00

KALABIT NG KAPOS

ni Gregorio V. Bituin Jr.

11 pantig bawat taludtod

kalabit-penge silang mga kapos

nakasahod ang kamay na busabos

pag nagbigay ka, ituturing kang Boss

pag nang-isnab ka, sila na'y iingos

ingat lang baka kutsilyo'y tumagos

barya na imbes buhay ang matapos

lipunan kasi'y pabaya sa kapos

gobyerno'y walang paki sa busabos

palibhasa kapitalista ang Boss

ng gobyernong laging iingos-ingos

lipunang bago'y dapat mapatagos

sa diwa nang kahirapa'y matapos

Pagtunganga'y Di Pakikibaka

2011-08-05T18:22:00.000-07:00

PAGTUNGANGA'Y DI PAKIKIBAKA

ni Gregorio V. Bituin Jr.

10 pantig bawat taludtod

pagtunganga'y di pakikibaka

dapat kumilos para sa masa

babaguhi'y bulok na sistema

sa pagtunganga'y di makukuha

pagtunganga'y tulo-laway ka lang

ingat baka tuluyang mabuwang

pagtunganga'y gawain ng hunghang

na ang mundo'y pulos paglilibang

ang pagtunganga'y di pangangarap

pawang dusa dito'y malalasap

kung nais mong mawala ang hirap

halina't makibaka nang ganap

pagtunganga'y walang matatapos

tulo-laway lang iyan at kapos

kaya dapat lang ninyong matalos

ang pagbabago'y nasa pagkilos

Nang Manghipo ang Lasing

2011-08-03T06:37:00.000-07:00

NANG MANGHIPO ANG LASING

ni Gregorio V. Bituin Jr.

13 pantig bawat taludtod

LASING:

"pasensya na po kayo, ako kasi'y lasing

kaya nahipuan ko yaong dalaginding

pag lango kasi ako'y nais kong maglambing

sa ganda niya'y sino bang di maduduling"

TAGAUSIG:

"di ba't ilang beses mo nang ginawa iyan

di ka na nadala't wala kang kasawaan

di tumatalab munti mang kaparusahan

baka ang nais mo'y makulong kang tuluyan?"

LASING:

"di ko naman sinasadya ang panghihipo

nagagawa ko lang ito pag ako'y lango

ngunit pag normal naman ako't di tuliro

ako po'y mahiyaing tulad ng hunyango"

TAGAUSIG:

"nagkukunwari ka lang yatang ikaw'y lasing

nanghiram ng tapang sa alak at nanyansing

sayang ka pagkat tao ka namang magaling

ngunit pag nalango, manyak na't napapraning"

LASING:

"patawarin nyo ako't di na mauulit

pag nalasing akong muli'y di na didikit

sa dalaginding na iyang sadyang kayrikit

kaya sa iba na lang ako mangungulit"

TAGAUSIG:

"mukhang may bago ka namang pinupuntirya

maghunosdili ka't baka makulong ka na

dapat kang magpatingin pagkat may sakit ka

manyakis ka't ang utak mo'y may diperensya"

TAUMBAYAN:

"babae'y kawawa sa ganyang klaseng tao

kultura na rin kasi ang nagdulot nito

tingin sa babae'y segundang uri rito

ganitong pagkilala'y dapat nang mabago"

"bakit ba kayong babae'y ginaganito

binibiktima ng mga lasenggong gago

sa ganyan ng ganyan, papayag lang ba kayo

o babaguhin ninyo ang sitwasyong ito?"

KABABAIHAN:

"ang mga nanghihipo'y mapagsamantala

mga tao silang wala yatang konsensya

dapat sa kanila'y ipalapa sa bwaya

pagkat ugali nila'y bwitre ang kapara"

"di na dapat maapi ang kababaihan

kaya karapatan natin ay ipaglaban

baguhin natin ang kultura't kaisipan

lalo ang lipunang batbat ng kabulukan"

Paglayang Nasayang

2011-08-01T19:14:00.000-07:00

PAGLAYANG NASAYANG

ni Gregorio V. Bituin Jr.

11 pantig bawat taludtod

(Hulyo 15, 2011 namatay ang bilanggong pulitikal na si Mariano Umbrero, patay na siya nang siya'y biyayaan ng executive clemency ni Pangulong Noynoy Aquino noong Hulyo 19, 2011)

huli na ang lahat, Noynoy Aquino

huli na pagkat ang pinalaya mo

sa una mong presidential clemency

ay ilang araw nang naililibing

di ko alam, 'yan ba ang utak-wangwang

na laging huli't palpak ang dulugan

noon pa dinulog ang kasong iyan

ngunit di naman agad inaksyunan

level 4 na ang kanser ni Umbrero

tanging hiling niya, Noynoy Aquino

ay makasama ang kanyang pamilya

sa nalalabi pang araw sa mundo

ngunit bigo siya, binigo siya

ng pangulong ayaw ng utak-wangwang

ilan pa, Noynoy, ang bibiguin mo

ilan pa ang mabibigo sa iyo

namatay siyang bigong makasama

sa huling araw ang kanyang pamilya

presidential clemency mo'y wala na

sayang pagkat iyon ang iyong una

tularan mo ang ina mong butihin

bilanggong pulitikal, palayain

paulit-ulit itong aming hiling:

BILANGGONG PULITIKAL, PALAYAIN!

Panaghoy ng Punungkahoy

2011-07-30T04:11:00.001-07:00

PANAGHOY NG PUNUNGKAHOY

ni Gregorio V. Bituin Jr.

11 pantig bawat taludtod

minsang kaylakas ng ihip ng hangin

habang mag-isa akong naninimdim

ang langit ay sinapol ko ng tingin

ang tanghaling tapat biglang nagdilim

hanggang marinig ko'y isang panaghoy

na tulad ng isang batang palaboy

pinakinggan ko yaong nginunguyngoy

nanaghoy pala'y isang punungkahoy

di na sumisilong ang mga ibon

pagkat lagas ang kanyang mga dahon

pinagpuputol pa ng mga maton

ang kanyang sanga't ginawang panggatong

panaghoy niya'y aking pinakinggan:

"mga bunga ko kahit bubot pa lang

pinipitas na't pinagtutubuan

imbes ito'y pahinuging tuluyan"

"kapatid na puno'y pinagsisibak

kita mong balat nila'y nagnanaknak

kalbo ng kagubatan ay kaylawak

sadya bang tao'y ganito ang balak"

"kaming puno'y marunong ding manimdim

galit namin sa tao'y kinikimkim

ni hindi man lamang sila magtanim

ng bagong punong ang handog ay lilim"

"kami'y inyong proteksyon sa pagbaha

na sumisipsip ng tubig sa lupa

kakampi nyo sa tag-araw at sigwa

kaya simulan nyo na ang magpunla"

"paghandaan ang anumang delubyo

mga puno'y agad itanim ninyo

nang may pananggalang kayo sa bagyo

sana, pakinggan nyo ang aking samo"

Matira ang Matibay

2011-07-26T23:29:00.001-07:00

MATIRA ANG MATIBAY

ni Gregorio V. Bituin Jr.

11 pantig bawat taludtod

tuloy ang laban hanggang sa tagumpay

halina't makibaka tayong tunay

walang atrasan, matira'y matibay

di pa panahong tayo'y magsihimlay

iyang paglalaylo'y di nga masama

ngunit bakit ba init mo'y humupa

ayaw nang kumilos para sa dukha

mas nais nang sa isyu'y tumunganga

bakit tumigil sa pakikibaka

para atupagin na'y ang pamilya

di ba't babaguhin nati'y sistema

nang mawala ang pagsasamantala

nawala ka, narito pa rin kami

nag-oorganisa't nagpaparami

di maglalaylo't dito na pipirmi

nagbago ka man, narito pa kami

matira matibay, walang iwanan

kung bala'y katumbas ng katapatan

prinsipyo'y tangan hanggang kamatayan

bangkay ko ma'y itapon sa kangkungan

dahil naniniwala akong tama

ang prinsipyong yakap ko't inadhika

pinatibay nito ang aking diwa

tangan ito kahit ako'y mawala

Sa Pagkatha Ko ng Tula

2011-07-25T21:03:00.000-07:00

SA PAGKATHA KO NG TULA

ni Gregorio V. Bituin Jr.

10 pantig bawat taludtod

sari-sari na'y aking tinula

prinsipyo, diwa, buhay ng dukha

paglarawan ng buhay ng madla

paglaban ng uring manggagawa

may maningning, may malagim

may masaya'y nakaririmarim

tula ko'y tanglaw sa iyong dilim

sa init mo'y nagbibigay lilim

may tulang minsan iniiyakan

may tulang natatawa ka na lang

may tulang dama'y kaibuturan

may tulang wala ring katuturan

may tulang sadyang pinantututok

nanunuligsa ng nasa tuktok

nang-uupak ng sa tubo'y hayok

nambabanat sa sistemang bulok

ah, sadyang mahirap ding kumatha

minsan ang tinta'y pinababaha

sa papel ito'y pinaluluha

hanggang agos ng diwa'y humupa

tula'y pinagagapang sa lusak

haraya'y gulok na nakatarak

bawat taludtod ay nagnanaknak

hanggang diwa'y tuluyang manganak

Tumula Ako ng Sari-Sari

2011-07-24T16:44:00.000-07:00

TUMULA AKO NG SARI-SARI

ni Gregorio V. Bituin Jr.

10 pantig bawat taludtod

may tula akong isyu'y pambata

may tula rin akong pangmatanda

may tulang pandukha't manggagawa

may tulang ang adhika'y paglaya

may tulang sa ulap naglimayon

may tulang sa tubo'y nagugumon

may tulang larawan ng pagbangon

may tulang sigaw ay rebolusyon

may tulang humihibik ng luha

may tulang sangkahig at santuka

may tulang pagbabago'y adhika

may tulang sosyalismo ang diwa

tumula ako ng sari-sari

para pagkaisahin ang uri

para di mayurakan ang puri

para durugin ang naghahari

KPML, Sosyalista

2011-07-16T00:08:00.000-07:00

KPML, SOSYALISTA

(Para sa Ika-4 na Pambansang Kongreso ng KPML, Hulyo 16, 2011)

ni Gregorio V. Bituin Jr.

16 pantig bawat taludtod

Kongreso ng Pagkakaisa ng Maralitang Lungsod

Sosyalismo'y patuloy n'yong ipaglaban, itaguyod

Maralita'y kayrami kaya magpatuloy maglingkod

Sa sistemang bulok di tayo dapat magpatianod

Magpatuloy sa pakikibaka hanggang magtagumpay

Ipaglaban ang karapatan sa pagkain, pabahay,

Panlipunang serbisyo't ibagsak ang sistemang sinsay

Habang tangan ang diwang bawat isa'y magkaagapay

Di tayo titigil hangga't sistema'y di nagbabago

Di tayo titiklop sinuman ang makabangga dito

Wala sa bukabularyo natin ang salitang "lie-low"

Pgkat inukit na sa bungo natin ang "sosyalismo"

Paglingkuran ang Uri

2011-07-12T16:33:00.000-07:00

PAGLINGKURAN ANG URI

ni Gregorio V. Bituin Jr.

13 pantig bawat taludtod

mapapaglingkuran natin ang ating uri

kung mawawasak ang pribadong pag-aari

nitong gamit sa produksyong mapang-aglahi

sa kapwa, manggagawa, maralita't lipi

pribadong pag-aari'y dahilan ng hirap

ng sambayanang ginhawa ang hinahanap

na di masumpungan kahit man sa hinagap

aring pribadong kinamkam ng mga "corrupt"

kaya halina't wasakin nating tuluyan

ang dahilan ng ating mga kahirapan

paraiso'y itayo sa sandaigdigan

kung saan walang pag-aari ang gahaman

mga obrero't dukha'y iisa ang uri

magkaisang labanan ang mapang-aglahi

nang sa gayon, maitaas natin ang puri

dangal at pagkatao niring kapwa't lipi

Ang Madasaling Bise

2011-07-11T17:44:00.000-07:00

ANG MADASALING BISE

ni Gregorio V. Bituin Jr.

11 pantig bawat taludtod

nagdarasal nga bang lagi ang bise

na pangulo niya'y maaksidente?

na sana ito'y tuluyang madale

nang mapalitan na ang presidente?

ano nga ba yaong papel ng bise?

maghintay mamatay ng presidente?

wala na ba siyang ibang diskarte?

kaysa hintaying pangulo'y madale?

dapat palawakin pa ang tungkulin

ng bise nang di maging madalasin

na pagkawala ng puno'y asamin

na siya ang tiyak na bubungahin

tungkulin ng biseng siya'y papalit

pag pangulo niya'y nawalang pilit

ngunit kung dasal niya'y hanggang langit

ang asal na ito'y sadyang kaypangit

kung bise'y nagbi-busy-busy-han lang

at wala namang pinamumunuan

walang kwenta ang kanyang katungkulang

tagahintay na pangulo'y palitan

ang tungkulin ng bise'y palaparin

mga gawain niya'y palawakin

sa masa siya muna'y paglingkurin

kung pamumuno'y kanyang kakayanin

Sa Tanggapan nina Ka Enteng

2011-07-09T05:29:00.000-07:00

SA TANGGAPAN NINA KA ENTENG

(sa pagdalaw sa Brgy. Hall ng Bagong Silang sa Caloocan, 070911)

ni Gregorio V. Bituin Jr.

15 pantig bawat taludtod

minsan ako'y naligaw sa tanggapan ni Ka Enteng

kasama niya si Cynthia sa tanggapang kaylamig

napakasisipag nilang gampanan ang tungkulin

kaya masa'y natuwa't sila'y naging kapanalig

ang karaingan ng masa'y pinakikinggan nila

kahit sila'y naroon sa kanilang opisina

buhay na buhay ang diwang paglingkuran ang masa

sila'y totoong prinsipyado dahil aktibista

pakamot-kamot, pasulat-sulat, papirma-pirma

sadyang mahirap din yaong buhay sa opisina

tali sa walong oras, Sabado man may pasok pa

nasa opisina man, nakakapag-organisa

dalawang kasama namin ay ganyan kagigiting

ito lang ang sa kanila'y paalala ko't bilin

panghawakan nang mahigpit ang prinsipyo't tungkulin

upang di kainin ng sistema sina Ka Enteng

Mabuhay ka, Ka Romy!

2011-07-07T18:02:00.000-07:00

MABUHAY KA, KA ROMY!

(sa paglaya ni Ka Romy Castillo, bise-presidente

ng Partido Lakas ng Masa, sa kulungan ng Malaysia)

15 pantig bawat taludtod

sa iyong paglaya mula sa piitang dayuhan

taas-noo kaming bumabati ng kalayaan

ang karanasan mo doon ay di matatawaran

sa harap ng suliranin, ikaw ay nanindigan

mabuting halimbawa ang iyong ipinakita

ang tatag mo'y inspirasyon sa mga aktibista

ehemplo ka mula sa Partido Lakas ng Masa

pagkat pinakita mo'y matatag ang sosyalista

sa loob ng piitan, prinsipyo'y di tinalikdan

sa harap ng problema, pinakita'y katatagan

di nagpasindak, sangkaterba man ang katanungan

di sinagilahan ng takot sa harap ninuman

kahit may panganib, prinsipyo'y di isinantabi

pinakitang sosyalista'y totoong nagsisilbi

mga tulad mong prinsipyado'y dapat pang dumami

kaya mabuhay ka! ituloy ang laban, Ka Romy!

ANG CSC (Criticism and Self-Criticism)

2011-07-06T09:53:00.000-07:00

ANG CSC (Criticism and Self-Criticism)

ni Gregorio V. Bituin Jr.

15 pantig bawat taludtod

minsan ay nagkausap ang mga magkakasama

hinggil sa mga tungkuling naatang sa kanila

sa isang pulong ang paksa'y puna sa bawat isa

nagawa ba ang plano't masa ba'y naorganisa?

ang mga tungkuling yaon ba'y kanilang nagawa?

ang mga tungkulin ba nila'y kanilang ginawa?

mga nagawa ba nila'y tagumpay o masama?

problema ba'y natasa, o bakit kaya lumala?

sa pagpuna sa kasama't sa kanilang sarili

sa asal ng bawat isa, sila'y nakaintindi

may seryoso, merong sa trabaho'y paisi-isi

at sa diwang kolektibismo sila'y nabighani

silang mga magkakasama'y nagkaunawaan

kaya panata ng kolektibo'y walang iwanan

Simbigat ng Bundok, Singgaan ng Balahibo

2011-07-05T16:20:00.000-07:00

SIMBIGAT NG BUNDOK

SINGGAAN NG BALAHIBO

ni Gregorio V. Bituin Jr.

14 pantig bawat taludtod

buhay ng isang aktibista'y may kabuluhan

kaysa isang pulos tubo ang nasa isipan

mabuting totoong maglingkod sa sambayanan

kaysa burgis, pasista't elitistang gahaman

ang maglingkod sa bayan ay simbigat ng bundok

pagkat ang binabago'y isang lipunang bulok

ibagsak ang mga nagpapasasa sa tuktok

at tanggalin ang mga nasa gobyerno'y bulok

yaong naglilingkod para sa kapitalismo

naglilingkod sa mapang-api't mga dorobo

kabuluhan nila'y singgaan ng balahibo

pagkat sa puso'y tubo, di pagkamakatao

pag-aralan natin at suriin ang lipunan

kongkretong suriin ang kongretong kalagayan

alamin kung bakit masa'y dapat paglingkuran

at dalhin sa katubusan nila't kalayaan

kaya pag ating kasama'y biglaang mamatay

sa laban o sakit, parangal yaong ibigay

pagkat sa pakikibaka'y kanya nang inalay

ang buong panahon, pawis, dugo niya't buhay

simbigat ng bundok, singgaan ng balahibo

magkaibang kamatayan ng dukha't dorobo

saludo tayo sa nagsakripisyong obrero

ngunit kapitalista'y dinuduraang todo

Ang Mapagtanim

2011-07-04T04:34:00.000-07:00

ANG MAPAGTANIM

ni Gregorio V. Bituin Jr.

11 pantig bawat taludtod

ang pagtatanim ay sadyang di biro

ngunit mapagtanim ay iba na po

pagkat pagkatao mo'y lumalabo

lalo ang kabutihang nakatago

ang mapagtanim ng sama ng loob

at sa kapwa niya'y laging may kutob

problema'y tila sa tiyan nakulob

pagkat ibang diwa ang nakalukob

kaya huwag kang basta magtatanim

sa loob mo ng nakaririmarim

pag-isipan mo't magsuring malalim

ang tamang gawin upang di manimdim

samang tinanim ay nakabubutas

ng sikmura't butong kakalas-kalas

paglago nito sa sikmura'y dahas

kaya sama ng loob mo'y ilabas

Iwasan ang Atakeng Personal

2011-07-03T18:13:00.000-07:00

IWASAN ANG ATAKENG PERSONAL

ni Gregorio V. Bituin Jr.

11 pantig bawat taludtod

ang atakeng personal sa kasama

ay pagsira sa pagkatao nila

"ang pangit mo" ay mababaw na puna,

ang malalim naman: "utak ipis ka!"

bakit kailangan kang mamersonal

umaatake kang tulad ng hangal

inis kang ang sinasabi'y garapal

kami sa iyo'y di na makatagal

anumang problema'y pag-usapan n'yo

magkakasama kayo sa trabaho

iisa lang ang inyong kolektibo

magtapatan nang maayos ang gulo

problema'y ayusin n'yo ng harapan

nang atakeng personal, maiwasan

at nang trabaho'y umayos din naman

nang sumigla muli yaong samahan

Isang Kahig, Isang Tula

2011-06-29T18:30:00.000-07:00

ISANG KAHIG, ISANG TULA

(Ganyan Kaming Makatang Dukha)

ni Gregorio V. Bituin Jr.

10 pantig bawat taludtod

yaong makata'y nagdaralita

siya'y isang kahig, isang tula

ang pakiramdam nya'y isinumpa

kaya nanatili siyang dukha

pag naging bisyo mo ang pagtula

dapat lang na ikaw'y maging handa

alam mong walang pera sa tula

ngunit patuloy ka sa pagkatha

pagkat isang sining ang pagtula

na alay sa masa't manggagawa

kahit bawat kahig, isang tula

ang makatang sangkahig, santuka

patuloy ang buhay ng makata

sa maramdamin niyang pagkatha

sa matindi niyang pagtuligsa

sa pagsangkot sa isyu ng madla

tuloy ang paglikha ng makata

ng tulang larawan ng adhika

kahit bahagya nang makatuka

siya'y patuloy pa ring kakatha

Pinabili Lang ng Suka'y Nagmakata

2011-06-28T17:58:00.001-07:00

PINABILI LANG NG SUKA'Y NAGMAKATA

ni Gregorio V. Bituin Jr.

8 pantig bawat taludtod

pinabili lang ng suka

ngayon na ay manunula

sari-saring mga paksa

ang nilapatan ng tula

nakita niya'y tindera

na pagkagandang dalaga

ngiti pa lang, pamatay na

kaya napatula siya

sa dalaga'y natulala

kaya biglang nagmakata

tinulaan na ang mutya

nakalimutan ang suka

hinanap ng kanyang ina

suka daw ay nasaan na

bakit daw tula ang dala

sa adobo'y isasama

pinabili lang ng suka

ngunit biglang nagmakata

nakatas na'y talinghaga

nang makita'y sintang mutya

ito ang kanyang istorya

inutusan lang ng ina

imbis na suka'y tula na

ang pinaggagawa niya

Sa Pagdatal ni Falcon

2011-06-24T08:16:00.001-07:00

SA PAGDATAL NI FALCON

ni Gregorio V. Bituin Jr.

12 pantig bawat taludtod

lumuha ang langit doon sa España

dinalaw ni Falcon, Pasig, Marikina

pasahero'y walang masakyan sa Edsa

tila buong Metro Manila'y lubog na

sobrang naglalawa ang mga kalsada

sana'y hindi ito matulad kay Ondoy

na maraming tao'y agad naitaboy

mula sa tahanang mistulang binaboy

na tila kinain ng laksang kumunoy

ang mga binaha'y nagsisipaglangoy

kaya sa pagdatal ng bagyong si Falcon

huwag magpatulog-tulog, magsibangon

bago pa ang baha sa atin lumamon

sa kailaliman tayo'y maibaon

halina't maghanda tayong lahat ngayon

sa muling pagluha nitong kalangitan

basura'y lumutang, baha ang lansangan

baradong imburnal ay dapat matingnan

bagyong Falcon, kami na'y iyong tigilan

bago may buhay pang mawalang tuluyan

Sa Mga Magiging Abogadilyo

2011-06-23T08:22:00.000-07:00

SA MGA MAGIGING ABOGADILYO

ni Gregorio V. Bituin Jr.

13 pantig bawat taludtod

(para sa mga kaklase ko sa Paralegal Training on Labor Relations, Book V of the Labor Code, na ginanap sa Pansol, Calamba City, Laguna, mula Hunyo 1-3 at Hunyo 21-23, 2011)

maraming mga batas ang dapat alamin

maraming mga butas ang dapat silipin

maraming mga kaso ang dapat suriin

kaya Labor Code ay ating kabisaduhin

ano ang employer-employee relationship

bakit management lagi tayong sinisilip

ano ba ang lagi nilang nasasaisip

at ang manggagawa'y kanilang bina-badtrip

ano nga ba itong collective bargaining

bakit management madalas na napapraning

bakit sahod ayaw itaas kahit kusing

obrero'y saan ba nila inihahambing

maraming mga tanong ang dapat masagot

kaya pag-aralang mabuti ang Labor Code

alamin ang batas, mga pasikut-sikot

nang sa obrero'y totoong makapaglingkod

kaya sa mga magiging abogadilyo

hahawakan na natin ang maraming kaso

ngunit tungkulin ay di natatapos dito

pag-aralan din natin ang kapitalismo

pag-aralan ang mga batas sa pabrika

pati lipunang ginagalawan ng masa

bakit ba ang sistema'y mapagsamantala

manggagawa'y sikapin ding maorganisa

ang manggagawa'y di makina, kundi tao

kaya patakaran ay dapat makatao

ngunit kung ang manggagawa'y inaabuso

dapat siyang tulungan ng unyon ng todo

sa nangyayari'y di tayo dapat pumikit

kung maaari lang, manggagawa'y magpiket

ipakitang sila ri'y marunong magalit

pag ginagawa ng management ay masakit

at kung kinakailangang sila'y magwelga

dapat magkaisa ang mga unyonista

di dapat na estilo nati'y bara-bara

dapat lahat ng rekisitos, magawa pa

hangga't may mga inaaping manggagawa

at sa loob ng pabrika'y kinakawawa

tungkulin nating laban nila'y mapasigla

nang magapi ang kapitalistang kuhila

Salus Populi Est Suprema Lex

2011-06-23T07:20:00.000-07:00

SALUS POPULI EST SUPREMA LEX

tula ni greg bituin jr.

10 pantig bawat taludtod

(nilikha sa Paralegal Training on Labor Relations, Book V of the Labor Code, na ginanap sa Pansol, Calamba City, Laguna, mula Hunyo 1-3 at Hunyo 21-23, 2011)

ang kapakanan ng sambayanan

ang pinakamataas na batas

dapat itong tandaan ninuman

nang di sila maapi't madahas

salus populi est suprema lex

kapakanan ng tao ang salik

kung karahasan ang hinasik

inapi'y dapat lang maghimagsik

at kung ang batas ay butas-butas

dapat itong ayusing tuluyan

upang mga problema'y malutas

ng mabilis at makatarungan

mga inaapi'y nasasabik

na karapatan nila'y mabalik

upang sila'y di na maghimagsik

salus populi est suprema lex

Sa Puso Ko Kita Ibinaon

2011-06-22T05:05:00.000-07:00

SA PUSO KO KITA IBINAON

ni greg bituin jr.

13 pantig bawat taludtod

ikaw ang dati at bago kong inspirasyon

na sa pangarap ko'y laging naglilimayon

pagtingin ko sa iyo'y saan paroroon

di pa kita maarok, sinlalim ng balon

pag naiisip ka, ang wala ko'y mayroon

pagkat ang iisa'y nagdodoble na ngayon

sa panaginip, kasama kitang bumangon

tila ako adik na sa iyo'y nagumon

naging inspirasyon na kita mula noon

kaya pagsinta sa iyo'y malaking hamon

kung ang iyong ganda'y makamandag na lason

titikman ko iyan kahit di na magbangon

ikaw ang dati at bago kong inspirasyon

kaya sa puso ko ikaw na'y ibinaon

Ako'y Iyong Gamugamo, Apoy Kita

2011-06-22T04:36:00.000-07:00

AKO'Y IYONG GAMUGAMO, APOY KITA

ni greg bituin jr.

9 pantig bawat taludtod

ikaw yaong apoy sa lampara

na sa akin ay nakahalina

gamugamo akong sumisinta

sa iyong pinangarap ko,sinta

nais ko pang sa iyo'y madarang

kaysa ikaw ay aking layuan

di baleng dalhin sa kamatayan

basta't ikaw ang napupusuan

ang puso ko'y matagal nang patay

ngunit muli mong binigyang buhay

kahit na ang pakpak ko'y maluray

ay pilit kitang hahagkang tunay

ako'y iyong gamugamo, sinta

at apoy kang aking nadarama

Dapat Magkausap Tayo ng Sarilinan

2011-06-21T07:28:00.000-07:00

DAPAT MAGKAUSAP TAYO NG SARILINAN

ni greg bituin jr.

13 pantig bawat taludtod

dapat magkausap tayo ng sarilinan

nang sa gayo'y di ko madama ang kawalan

hinihiling ko sa mundo'y ikaw lang naman

bakit naman hindi mo pa ako pagbigyan

di bale nang ang matamo ko'y kabiguan

kaysa pag-uusap ay di natin subukan

hinihintay ko lang, mahal, ay kung kailan

turan mo at darating ako sa tipanan

kailangan nating mag-usap ng harapan

nilalaman ng ating puso'y magsabihan

sana man lang, di ako umuwing luhaan

na ang puso'y pira-piraso na't duguan

iniluluhog ko'y pusong may katapatan

nangangakong pag tayo na'y di ka iiwan

Ang Larawan Mo

2011-06-21T07:02:00.000-07:00

ANG LARAWAN MO

ni greg bituin jr.

13 pantig bawat taludtod

ang larawan mo'y isisilid ko sa bulsa

o kaya'y ikakabit ko sa iyong blusa

dahilan ka kung bakit nais kong mag-alsa

laban sa sistemang mapang-api sa masa

sa larawan mo'y tila aking nababasa

na ayaw mo nang ikaw'y laging nag-iisa

bigyan ako ng pagkakataon, pag-asa

at tiyak kong sasarap ang iyong panlasa

lalo't natanto mong magandang kumbinasyon

kitang dalawa kung maging magkarelasyon

ngunit pansinin mo sana ako paglaon

upang di lang kita pangarap hanggang ngayon

di ka dapat hanggang larawan lang, mahal ko

sana'y magniig na ang ating pagkatao

Nakita Uli Kita sa Panaginip

2011-06-20T07:53:00.000-07:00

NAKITA ULI KITA SA PANAGINIP

tula ni greg bituin jr.

14 pantig bawat taludtod

nakita uli kita sa aking panaginip

habang aking iwing puso'y iyong halukipkip

ako nga ba'y mahal mo na kaya sinasagip

mula sa mga panganib na nasasaisip

bakit kaya, sinta, ayaw mo akong tigilan

panay ang dalaw mo sa aking puso't isipan

pahiwatig ba itong dapat kitang ligawan

na kahit sa panaginip ako'y sinusundan

marahil lihim mo akong inukit sa puso

inukit sa puso mong ako ang sinusuyo

sinuyo mo akong pag-ibig mo'y nangangako

nangangakong ang pag-ibig mo'y di maglalaho

pag muli mo akong dinalaw sa panaginip

tila di mo ako matiis na di masilip

laman na yata ako ng iyong puso't isip

tatanggapin na kita sa muli kong pag-idlip

Muli, Para Kay F

2011-06-20T04:55:00.000-07:00

MULI, PARA KAY F

ni greg bituin jr.

15 pantig bawat taludtod

iniisip kong bawat katha ko'y binabasa mo

ikaw na aking inspirasyon sa buhay na ito

kaya, sinta, sa pagkakatha'y nagsisipag ako

habang akda'y inaalay sa masa at sa iyo

mula sa pagkalugmok, nabuhay ang aking pinsel

pagkat ikaw'y naririyang mistulang isang anghel

ang bawat kinatha'y inukit, kinatam, sininsil

inspirasyon kitang sa diwa ko'y nakaukilkil

pag nalanta ang mga taludtod ay dinidilig

upang lumago ang mga saknong ng pagniniig

nasa isip kong kinulong kita sa aking bisig

ligaya'y dama habang sa akin ka nakahilig

sana'y di ko lang naiisip na binabasa mo

ang bawat kathang pinaglalamayan ko ng todo

kundi inaabangan at kinasasabikan mo

ang mga akdang sadyang nilikha para sa iyo

Si Tatay at si Rizal

2011-06-19T06:35:00.000-07:00

SI TATAY AT SI RIZAL

ni Gregorio V. Bituin Jr.

13 pantig bawat taludtod

(Hunyo 19, 2011 - Father's Day

at 150th birthday ni Gat Jose Rizal)

ngayong araw na ito'y aking napagnilay

bakit ipinagdiriwang ngayon ng sabay

ang kaarawan ni Rizal at mga tatay?

dahil ba sila'y parehong bayaning tunay?

isa'y pinatay, namatay para sa bayan

isa'y nabuhay bilang ama ng tahanan

tulad ni Ama'y aking sinasaluduhan

ang bayaning sa Bagumbayan ay pinaslang

pinalaki kami ni Tatay sa maayos

upang magandang bukas ay makamtang lubos

nilabanan ni Rizal ang pambubusabos

hanggang kanyang buhay sa Luneta tinapos

papuri sa gabay ng aming pagkatao

sa amang gumiya sa mga anak nito

papuri rin sa nagmulat sa bansang ito

na siyang awtor ng El Filibusterismo

at ng obra-maestrang Noli Me Tangere

Rizal at tatay, kayong dalawa'y bayani

sa mga problema'y di kayo naging bingi

at ninais nyong bansa't pamilya'y umigi

si Rizal ang bayani ng lahing magiting

at ang ama'y bayani sa pamilya natin

pareho natin silang bayani ang turing

kaya si Tatay at Rizal ay mahal natin

Kabuluhan

2011-06-18T10:00:00.000-07:00

KABULUHAN

ni greg bituin jr

15 pantig bawat taludtod

biglang nagkaroon ng kabuluhan ang buhay ko

nang muli kong masilayan ang magandang ngiti mo

ang diwa't pananaw ko sa mundo'y biglang nagbago

pagkat sa tagal ng panahon ay nagkita tayo

noong wala ka pa'y tila wala nang kabuluhan

ang aking kinabukasan dahil sa kabulukan

ng sistemang ang alam lang ay pawang kabuhungan

ng mga nakaraang gobyerno ng kabugukan

ngunit nang makita kita't masilayan kong muli

ang maamo mong mukha at kaaya-ayang ngiti

aba'y inspirasyon kitang nais kong manatili

sa aking tabi't hahagkan ang iyong mga labi

nagkaroong muli ng kabuluhan ang buhay ko

sana nama'y di mo ipagkait ang pag-ibig mo

Habang Papalubog ang Araw

2011-06-18T04:25:00.000-07:00

HABANG PAPALUBOG ANG ARAW

ni Gregorio V. Bituin Jr.

15 pantig bawat taludtod

mag-isa kong tinutungga ang beer sa isang kubo

ang nasa gunita'y ang magandang ngiti't mukha mo

habang ang paglubog ng araw kanina'y tanaw ko

at minamasdan ang pangarap sa kanyang pagyao

bakit, sinta ko, sa akin ay parang umiiwas

kahit sa facebook, ako'y unti-unti mong kinaltas

sa puso ko'y lumalatay ang iyong mga hampas

dahil ba iba ka't iba ang aking nilalandas

alam mong nais kitang isama sa pagbabago

upang itayo ang isang lipunang makatao

na ang bawat karapatan ay totoong serbisyo

ngunit kung nais mong ako na'y magbago'y turan mo

pagkat lahat naman ng ito'y mapapag-usapan

upang sa pangarap ko'y makasama kang tuluyan

o sa pangarap mo'y makasama ako't kagampan

habang binubuo'y isang bagong kinabukasan

bakit imbis bukangliwayway, paglubog ng araw

ang aking matatamasa't lagi nang matatanaw?

pwede ka bang makasama pagkat buhay ko'y ikaw?

o iwi kong puso'y nais mong dumugo't malusaw?

nasa alaala kita habang kinakatha ko

ang taludturang hinabi ng hangarin sa iyo

masid sa pangarap ang magandang mukha't ngiti mo

habang mag-isa kong tinutungga ang beer sa kubo

Kay F

2011-06-17T23:10:00.000-07:00

KAY F

ni greg

13 pantig bawat taludtod

laging nag-iisa, iniisip ka, sinta

at sa panaginip, ako'y dinalaw mo na

reyunyong magkaklase sa elementarya

nang makitang ikaw pa ri'y napakaganda

ngunit hanggang ngayon ikaw pa ri'y dalaga

sino kaya ang hinihintay mo, ako ba?

guniguni ko lang ba ito't sapantaha?

ako nga ba sa iyo'y dapat bang umasa?

pwede ko bang pasukin ang iyong daigdig

upang iluhog yaring kimkim kong pag-ibig

nang ikaw na mahal ko'y aking makaniig

tulad ng rosas sa lupa'y aking madilig

makasaysayang pagkikita ang nilandas

halos tatlumpung taon na yaong lumipas

ngunit ngayon tila ba ikaw'y umiiwas

kaya dugo sa puso ko'y panay ang tagas

alam mong crush na kita sa elementarya,

dalagita ka noon, ngayon na'y diyosa

sa high school at kolehiyo'y di na nagkita

pagkat eskwelahan na nati'y nagkaiba

iniingatan sa puso'y muling nabuhay

sa unos, ikaw ang aking bukangliwayway

inisip kong tumigil na sa paglalakbay

kung ikaw na'y makakasama habambuhay

ngunit tila ba ako'y nabuhay sa hapis

kahit na hangarin ko sa iyo'y kaylinis

para bang ang lahat ng swerte ko'y umalis

ngunit di ko magawang sa iyo'y mainis

pagkat ang pagmamahal ay di sapilitan

kung sakaling pulutin ako sa kangkungan

sana naman, mahal, iyong pakatandaan

na ikaw nga'y inibig ko na noon pa man

Di Natatapos sa Tula ang Pakikibaka

2011-06-16T19:40:00.000-07:00

DI NATATAPOS SA TULA ANG PAKIKIBAKA

ni Gregorio V. Bituin Jr.

14 pantig bawat taludtod

di natatapos sa tula ang pakikibaka

kundi patuloy ang proseso nito sa masa

kaya magpakasipag sa pag-oorganisa

ang masa'y imulat bakit bulok ang sistema

at bakit kailangang ito'y baguhin nila

magpatuloy man tayong humabi ng taludtod

dapat alam din natin kung papaano sumugod

umatras, umabante, makibaka, kumayod

pagkat di lang sa tula tayo dapat malugod

kundi aktwal na pagkilos ang totoong buod

bawat punglo'y talinghaga't talinghaga'y punglo

na tagos sa balat, katawan, sikmura, puso

taludtod at saknong tila'y busog at palaso

mga makata'y berdugo ng sakim sa tubo

habang ang bulok na sistema'y iginugupo

di natatapos sa tula ang pakikibaka

di matatapos ang tula ng pakikibaka

hangga't ang masa'y patuloy sa hirap at dusa

ngunit kung manggagawa't dukha'y magkakaisa

sila ang tatapos sa tula't pakikibaka

Walang Kasingtamis ang Paglaya

2011-06-12T04:53:00.000-07:00

WALANG KASINGTAMIS ANG PAGLAYA

ni Gregorio V. Bituin Jr.

10 pantig bawat taludtod

ang kalayaang di ipinaglaban

ay di matamis na kalayaan

bakahin na ang mga kalaban

nang masagip sa mga gahaman

ang manggagawa't ang ating bayan

magkaisa ang lahat sa bansa

makibaka tungo sa paglaya

manggagawa'y dapat magkaisa

upang palayain itong masa

sa kuko ng bulok na sistema

sa pangil ng mapagsamantala

sa sungay nitong kapitalista

obrero ang pangunahing pwersa

na siyang babago sa sistema

kahit isakripisyo'y buhay man

makaharap man ang kamatayan

upang mabago itong lipunan

sadyang matamis ang kalayaan

kung ito'y ating ipinaglaban

kung nanalo'y uring manggagawa

walang kasingtamis ang paglaya

Kapirasong Lupa

2011-06-11T08:40:00.000-07:00

KAPIRASONG LUPA

ni Gregorio V. Bituin Jr.

10 pantig bawat taludtod

pilit kinubkob ng maralita

yaong nakatiwangwang na lupa

itinayo nila'y simpleng dampa

nang may masilungan silang dukha

kapirasong lupa'y pinangarap

kahit ang bukas nila'y maulap

demolisyon man ang makaharap

ay lalaban silang mahihirap

tinahana'y kapirasong lupa

ng dukhang tila ba sinumpa

araw-gabi na lang lumuluha

bakit ba tadhana'y nagpabaya

lupang ito'y pag ipinagkait

ay sadyang lalaban silang pilit

karapatan nila'y igigiit

laban sa mga nagmamalupit

Kung Magdamdam ang Kalikasan

2011-06-10T03:45:00.000-07:00

KUNG MAGDAMDAM ANG KALIKASAN

ni Gregorio V. Bituin Jr.

14 pantig bawat taludtod

ramdam mo bang nagdaramdam ang kalikasan

dahil siya'y patuloy nating sinusugatan

paanong di lumubha pa't ating malunasan

yaong kanyang mga sugat sa kaibuturan

ang pagkasira nito'y sadyang nakalulungkot

kaya mga tanong na ito'y dapat masagot

upang may magawa pa bago mundo'y bumansot

di dapat pulos pagdadahilan at palusot

panaghoy nitong kalikasan ay ating dinggin

at nangyayari sa kanya'y ating unawain

agos ng sugat niya't paano aampatin

ang pagdaramdam ba niya'y ating titiisin

pagdaramdam ng kalikasan kung patuloy pa

mga pagkasugat niya'y maghihilom pa ba

May Taya Ka Ba sa Kalikasan?

2011-06-09T19:20:00.000-07:00

MAY TAYA KA BA SA KALIKASAN?

ni Gregorio V. Bituin Jr.

10 pantig bawat taludtod

may taya ka ba sa kalikasan

para sa bukas ng kabataan

para sa bukas ng sambayanan

para sa bukas ng daigdigan

ang kalikasan na'y lumuluha

ang kalupaan na'y binabaha

ang karagatan na'y nasisira

paano nga ba tayo tataya

paano ba natin iaambag

ang ating lakas, talino't sipag

sa iba'y paano ilalatag

ang taya nating di pampalubag

mapipigil ba ang pagkasira

ng kalikasang dapat aruga

kung ito'y di natin maunawa

paano nga ba tayo tataya

Araw ng Pagtitiis, Araw ng Pagtutuos

2011-06-07T04:37:00.000-07:00

ARAW NG PAGTITIIS, ARAW NG PAGTUTUOS

ni Gregorio V. Bituin Jr.

14 pantig bawat taludtod

di lahat ng araw ay araw ng pagtitiis

pagkat darating din ang araw ng pagtutuos

ngunit sitwasyong ito bago natin matiris

kabulukan nitong sistema'y ating bang talos?

pag-aralan ang sistemang nagdulot ng amis

kaya buhay nati'y lunod sa kaytinding unos

naghahari sa sistema'y dapat nang magahis

ng sambayanang kaytagal nang binubusabos

tinutubo sa lakas-paggawa'y labis-labis

ngunit buhay ng manggagawa'y kalunos-lunos

gayong kitang-kita ang kaunlarang kaybilis

ngunit naghihirap ang marami't kinakapos

kaunlaran sa daigdig ay walang kaparis

kaya nang pakainin ngayon ang lahat halos

sa karukhaang danas, ikaw na'y maiinis

ginigisa ka sa mantika't balat mo'y lapnos

imbes lumusog, mamamayan ay umiimpis

habang iilan, kapitalismo'y yapos-yapos

nais nilang karapatan natin ay manipis

na pinananatili nitong burgesyang bastos

manggagawa't sosyalista'y dapat nang magbigkis

dahil ang pagbabago'y nasa ating pagkilos

tapusin na natin ang araw ng pagtitiis

at paghandaan na ang araw ng pagtutuos

Sa Araw ng Kapaligiran

2011-06-05T06:08:00.000-07:00

SA ARAW NG KAPALIGIRAN

ni Gregorio V. Bituin Jr.

10 pantig bawat taludtod

(Idineklara ng United Nations na World Environment Day ang Hunyo 5 ng bawat taon. Ang tema ngayong 2011 ay "Forests: Nature at your service".)

busog sa usok ang mamamayan

lalo na doon sa kalunsuran

sira na ba ang kapaligiran?

ito ba'y masasagip ng bayan

upang di masirang tuluyan?

naglipana ang maraming plastik

na sa basurahan nakasiksik

at sa karagatan inihasik

kaya dapat lang tayong umimik

at sa sulok ay di manahimik

maging seryoso tayo, kapatid

nangyayari'y dapat nating batid

makaharap ma'y mga balakid

ay maisaayos ang paligid

upang sa sakuna'y di mabulid

ii.

anong gagawin sa kagubatan

upang ito'y mapangalagaan

ibon pa ba'y may masisilungan?

masasagip ba nating tuluyan

sa pagkasira ang kakahuyan?

maraming puno'y ating itanim

huwag hayaang ito'y makimkim

ng mga may budhing maiitim

na tubo ang nasa pusong sakim

nang gubat ay di maging malagim

kaya nga dapat nating matalos

na gubat ay di dapat maubos

halina't tayo nang magsikilos

bago pa nila tayo maulos

at gubat ay kanilang makalos

Isa Lang Akong Makata

2011-06-04T17:40:00.000-07:00

ISA LANG AKONG MAKATA

ni Gregorio V. Bituin Jr.

salitan ang 8 at 10 pantig sa taludturan

isa lang akong makata

sa maraming makata sa daigdig

na pagsinta'y tinutula

sa napupusuan at iniibig

isang magandang dalaga

yaong sa puso ko'y nagpakaligkig

ngayon aking nadarama

pagsinta niya'y humahalumigmig

isa lang akong makata

sa maraming makata sa mundo

kahit laging nangangapa

nakakamta'y pagsintang tuliro

kaysarap niyang mahalin

tila puso ko'y di mahahapo

at kung ako'y papalarin

mamahalin siyang buong-puso

habang tangan ko ang tula

na sa kanya'y aking bibigkasin

upang puso niya't diwa

sana'y tuluyan ko nang maangkin

ah, huwag sanang masawi

itong makata sa nililiyag

dahil pag sinta'y humindi

buhay kong ito'y isa nang hungkag

Himutok sa Piitan

2011-06-02T08:01:00.000-07:00

HIMUTOK SA PIITAN

ni Gregorio V. Bituin Jr.

15 pantig bawat taludtod

minsan isang hapon, ako'y dumalaw sa kulungan

dinig ko ang himutok ng isang nasa piitan:

"di lahat ng nahahatulan ay may kasalanan

di lahat ng may kasalanan ay nahahatulan"

marahil ang sinabi niya'y may katotohanan

dahil kitang-kita niya ang mga katunayan

para sa pamilyang sinakbibi ng kagutuman

nagnakaw ng kilong bigas kaya nasa piitan

yaong milyones ang ninakaw sa kaban ng bayan

ay nakangising kapit-tuko pa sa katungkulan

ikinulong pati ang nagtatanggol sa tahanan

pagkat teroristang demolisyon ay nilabanan

bilanggong mayaman ay labas-masok sa kulungan

ngunit di ang mahihirap kahit may karamdaman

kahit sa usapin ng hustisya'y may tunggalian

dukha'y nabubulok, nakalalaya ang mayaman

pag-uwi ko'y nakatatak pa sa aking isipan

yaong ibinubulong ng isang nasa piitan:

"di lahat ng nahahatulan ay may kasalanan

di lahat ng may kasalanan ay nahahatulan"

2 Draft ng KPML Theme Song

2011-05-31T01:19:00.000-07:00

2 DRAFT ng KPML Theme Song

ni Greg Bituin Jr.

Sa plano ng KPML NEC nitong nakaraan, nahilingan ang inyong lingkod na mag-draft ng KPML Theme Song na pagpipilian at gagamitin para sa ika-4 na Pambansang Kongreso ng KPML sa Hulyo 16, 2011. Narito ang dalawang draft, for editing pa ito, pipiliin ang isa, at dapat maaprubahan bago kantahin sa mismong Kongreso. Maraming salamat.

(KPML - Kongreso ng Pagkakaisa ng Maralitang Lungsod, itinatag noong Disyembre 18, 1986)

SOSYALISTANG SENTRO NG MARALITA

11 pantig bawat taludtod

Kayhirap ng buhay ng maralita

Demolisyon lagi ang napapala

Buti't may samahang umuunawa

Sa hirap na kalagayan ng madla

KPML ang sandigan ng dukha

Bakit kahirapan ang nakagisnan

Ito ba'y sadyang ating kapalaran

Halina't lipunan ay pag-aralan

Bakit may naghihirap, may mayaman

Paano na ang ating karapatan

III

Hanggang sa atin ngayong napagtanto

Dahilan ng dusa'y kapitalismo

At sagot natin dito'y sosyalismo

Buti't KPML ay naririto

Upang dukha'y magkaisang totoo

Koro:

KPML, KPML

Sosyalistang sentro ng maralita

Panlipunang pagbabago'y adhika

Halina't makibaka tayong dukha

Patungo sa sosyalismo't paglaya

KAMING MARALITA NG LUNGSOD

9 pantig bawat taludtod

KORO:

Kongreso ng Pagkakaisa

ng mga Maralitang Lungsod

Isang sosyalistang sistema

ang aming itinataguyod

Ang aming puso'y nagdurugo

pag naganap ang demolisyon

Aming dama'y pagkasiphayo

kahit doon sa relokasyon

Dahil ba kami'y maralita

kaya wala nang karapatan

Turing sa ami'y hampaslupa

nitong elitista't mayaman

III

Lipunan ay aming sinuri

natanto bakit nagkagayon

Dahil meron pang mga uri

kaya halina't magsibangon

Ibagsak ang kapitalismo

ito'y ilibing na sa lupa

At isulong ang sosyalismo

upang gahaman na'y mawala

Ulitin ang Koro ng 2 beses

Himutok ng Dalawang Inang Nawalan ng Anak

2011-05-30T04:35:00.000-07:00

HIMUTOK NG DALAWANG INANG NAWALAN NG ANAK

ni Gregorio V. Bituin Jr.

12 pantig bawat taludtod

(Alay sa International Week of the Disappeared mula Mayo 29 hanggang Hunyo 4, 2011. Pinangunahan ng Families of Victims of Involuntary Disappearance (FIND) at ng Asian Federation Against Involuntary Disappearances (AFAD) ang paggunita sa isang aktibidad sa PeaceBell, QC Memorial Circle, Mayo 29, 2011.)

minsan nagkausap ang dalawang nanay

hinggil sa kanilang malungkot na buhay

sabi ng isa, "ang anak ko'y pinatay

ng mga salarin sa harap ng bahay"

"tinadtad ng bala ang kanyang katawan

tulala akong gagawi'y di malaman

hanggang sila'y tumakas ng tuluyan

habang anak ko'y walang buhay, duguan"

"takot, pangamba, paghihiganti, galit

katawan ko'y nanginig, ngipi'y nagngalit

karanasan naming mag-ina'y kaypait

bakit ba ang buhay sa mundo'y kaylupit?"

"maswerte po kayo," ang sagot ng isa

natigagal siya kaya't natanong nya

"namatayan ako'y bakit maswerte pa?

gayong anak ko'y tuluyang nawala na?"

at napaisip siya sa katugunan:

"nakita mo ang anak mo ng pinaslang

maayos na libing, siya pa'y nabigyan

at puntod niya'y alam mo kung nasaan"

"ngunit kami, kami'y di kasimpalad mo

kaytagal nang nawawala ng anak ko

di na makita kahit kanyang anino

anak ko'y isa nang desaparesido"

"anak ko'y nawawala pa hanggang ngayon

pinaslang ba siya, saan itinapon

inilibing ba siyang walang kabaong?

sadyang kailangan po namin ng tulong"

"di namin alam kung siya ba'y nasaan

sa pagkawala'y sinong may kagagawan

nasaan na kaya ang kanyang katawan

paghahanap ba'y wala nang katapusan?"

sadyang kaysakit para sa mga ina

na mawalang tuluyan ang anak nila

ang isa'y pinaslang, bangkay ay nakita

hinahanap pa kung nasaan ang isa

dalawang inang sadyang kahabag-habag

karapatan ng anak nila'y nilabag

sa dalawang krimen, sinong magbubunyag?

hustisya ba'y kailan mababanaag?

Kay Fides

2011-05-29T08:46:00.000-07:00

KAY FIDES

(si Fides ay kaklase ko ng elementarya

na nag-birthday nitong Mayo 29)

9 pantig bawat taludtod

isang maalab na pagbati

ng maligayang kaarawan

isang matamis lang na ngiti

sa ami'y isalubong lamang

tiyak pagod na'y mapapawi

pakiramdam nami'y aalwan

classmate kong Fides, ingat lagi

lalo ang iyong kalusugan

huwag ipagdamot ang ngiti

na maganda mong katangian

(ang tulang ito'y pinadala sa pamamagitan ng facebook)

Sakbibi ng Hirap

2011-05-28T01:28:00.000-07:00

SAKBIBI NG HIRAP

ni Gregorio V. Bituin Jr.

11 pantig bawat taludtod

apat na taong gulang pa lang siya

ang bunsong kapatid na'y karga-karga

iniwan ng ina sa may bangketa

upang mamalimos na sa kalsada

buntis na ina'y saan ihahatid

ng mga yapak, saan mabubulid?

ang kaginhawaha'y isang balakid

sa kanilang pitong magkakapatid

ang ama nama'y katiting ang sahod

minsan sa amo'y halos maglumuhod

para makabale't may ipamudmod

sa pamilyang lagi nang nakatanghod

paggawa ng bata'y basta na lang ba

paano ang kalusugan ng ina

araw at gabi'y sakbibi ng dusa

ano na ang bukas nilang pamilya?

paghahatian ang isang mansanas

pinagkakasya'y isang kilong bigas

ulam nila'y isang latang sardinas

ito ba ang tinatawag na bukas?

kung manganganak na naman ang ina

madaragdagan pa ang magdurusa

sa nangyayari'y mapapailing ka

sa gobyerno ba'y balewala sila?

Madilim Pa Ang Bukas

2011-05-27T04:39:00.000-07:00

MADILIM PA ANG BUKAS

ni Gregorio V. Bituin Jr.

13 pantig bawat taludtod

Nahan kaya ang dalaga kong nililiyag?

Narito pa rin sa puso kong pumipitlag

Nasa malayo siyang aking namamatyag

Habang narito akong di matinag-tinag.

Sadya bang madilim ang kahapon ko't bukas

Habang kapitalismo'y tila naaagnas

Habang sosyalismo sa Rusya'y tumatagas

Habang ang puso ko'y tila wala nang lunas

Bakas pa sa kamao ko ang pagdurugo

Galing sa kapitalistang basag ang nguso

Galing sa nagdedemolis na uto-uto

Habang elitista'y nagdiriwang ang puso

Ang TV'y hinarap, pinatay ang kompyuter

Pinanood ang balitang tungkol sa poder

Palabas sa TV'y Maguindanao masaker

Habang sa History Channel ay "Life of Hitler"

Kapitalismong ito'y nakaririmarim

Mga obrero'y nabubuhay pa sa dilim

Nakakahinga pa rin kahit takipsilim

Ang pagbabago ba'y kailan masisimsim?

Kahapo'y kaydilim, pati pa ba ang bukas?

Paano ba masa'y maliligtas sa hudas?

Kailan ba ang lipunan magiging patas?

Matamo ko kaya ang pag-ibig nyang wagas?

Kung Mamamatay Ako sa Pagkaidlip

2011-05-26T19:33:00.000-07:00

KUNG MAMAMATAY AKO SA PAGKAIDLIP

ni Gregorio V. Bituin Jr.

13 pantig bawat taludtod

kung mamamatay man ako sa pagkaidlip

marahil malalim ang aking iniisip

kasama ang sinisinta sa panaginip

minamahal kong diwatang di ko malirip

ang laman ng pusong di ko ikinainip

kung sa pag-idlip mamatay, wala nang sakit

pagkat di na ramdam, tortyurin man ng pilit

mamamatay sa mundong ang tanong ay bakit

di na natanaw ang inaasam na langit

ng pagbabago ng sistema't mga alit

ngunit may kadakilaan ba pag namatay

habang natutulog ay napugto ang buhay

bakit sa pag-idlip ako mahahandusay

gayong ang isang paa ko na'y nasa hukay

mamamatamisin ko pang sa bala mamatay

aktibista akong di marapat malugmok

sa pagtulog habang kinakagat ng lamok

gayong habang gising pa ay nakikihamok

laban sa kapitalistang sa tubo'y hayok

nakikibaka laban sa sistemang bulok

ngunit hiling ko lamang sa aking pag-idlip

ay makasama ang sinta sa panaginip

sa ganito man lang, may tuwang halukipkip

malulugmok akong siya ang nasa isip

siglo ma'y lumipas, di ako maiinip

Kung Matitigok Ako Bago Magising

2011-05-25T03:45:00.000-07:00

KUNG MATITIGOK AKO BAGO MAGISING

ni Gregorio V. Bituin Jr.

12 pantig bawat taludtod

kung matitigok ako bago magising

sino kayang sa akin ay maglilibing

marahil sa pag-idlip may naglalambing

si Kamatayan na pala ang parating

ngunit kung sakaling ako nga'y matigok

sa pagkakatulog tuluyang malugmok

sana naman naabot ko na ang rurok

ng tagumpay sa mga pakikihamok

kung matitigok ako bago magising

ang bilin ko lang ay isang simpleng libing

tula ng mga aktibistang magiting

yaong sa katahimika'y tataginting

wala nang bulaklak, kundi mga tao

walang korona't tanging mga amigo

sa puntod, maso't di kurus ang nais ko

na tandang ako'y naglingkod sa obrero

Ang Dapat Matunton

2011-05-24T07:40:00.000-07:00

ANG DAPAT MATUNTON

ni Gregorio V. Bituin Jr.

15 pantig bawat taludtod

mahirap mang mabuhay sa anino ng kahapon

dapat lang mabuhay sa kung ano bang meron ngayon

bakit balikong landas pa itong tinatalunton

aba'y suriin ito't baka iba ang matunton

pag-aralan nga natin ang lipunang masagana

kaginhawaan sa daigdig ay makakamit ba

paano ang gagawin kung bulok pa ang sistema

na dahilan nitong dusa't kahirapan ng masa

kahapon pa nahihirapan itong sambayanan

tatamasahin pa ba natin ngayo'y karukhaan

halina't ating pag-aklasan ang mga gahaman

at ukitin na natin ang bagong kinabukasan

Maglinis ng Paligid

2011-05-23T05:20:00.000-07:00

MAGLINIS NG PALIGID

ni Gregorio V. Bituin Jr.

13 pantig bawat taludtod

papayag ba tayong mawasak ng tuluyan

ang daigdig na ating pinaninirahan

dahil sa ginagawa ng mga gahaman

na naghahari sa bulok nating lipunan

basura nila'y basta na lang itatapon

kung saan-saang panig ng lungsod at nayon

anila, bahala ang ibang tao doon

may maglilinis naman daw ng mga iyon

winawasak nila ang mga kagubatan

dinudumihan nila pati karagatan

walang pakialam sa kapwa't sambayanan

tanging sarili lang ang pinakikialaman

mga dumi sa paligid, tayo ang sanhi

kung ganito palagi ang ating ugali

susunod na henerasyon ay mamumuhi

kung kalagayang ito'y pinananatili

Magreretiro na si Inay

2011-05-22T04:39:00.001-07:00

MAGRERETIRO NA SI INAY

ni Gregorio V. Bituin Jr.

15 pantig bawat taludtod

ilang buwan na lang, magreretiro na si Ina

magtatapos na rin ang kanyang buhay-opisina

sa Setyembre'y bagong buhay ang haharap sa kanya

pagkat pareho na silang retirado ni Ama

maraming salamat, Ina, sa iyong mga payo

sa pagmamahal mo't sa mga anak ay pagsuyo

sa mga dinaanang pagsubok, di ka sumuko

pinakita mong matatag ka't laging nakatayo

bata pa kami'y kayo na ang nagbigay sa amin

ng mga pangangailangan namin at gastusin

at kami mang anak nyo'y may sariling buhay na rin

kami'y naririto't kayo'y aalagaan namin

ginabayan nyo kami noong aming kabataan

inaruga kami, pinag-aral, sinubaybayan

tinuruang tumayo sa sarili't manindigan

kaya inabot ngayon ang aming kinalalagyan

ilang beses mang ang puso nyo'y aming pinadugo

naging matatag kayo, tumindig, di nasiphayo

lahat ng anak binigyan ng magagandang payo

pagmamahal nyo sa mga anak ay di naglaho

kaming magkakapatid ay nagsasabing salamat

sa mga sakripisyo nyo, payo, sa lahat-lahat

di kayo pababayaan, panahon ma'y magluwat

maraming salamat, Ina, marami pong salamat

Mga Kalabit-Penge

2011-05-21T04:01:00.000-07:00

MGA KALABIT-PENGE

ni Gregorio V. Bituin Jr.

11 pantig bawat taludtod

napakarami nang kalabit-penge

na kaunting barya mo'y hinihingi

palad ay nakalahad, nakangiti

tandang sila'y nagbabaka-sakali

kung sino-sino ang kinakalabit

kahit kamay na'y sa rusing kaylagkit

ang kaunting barya mo'y hinihirit

maibsan lang ang gutom na kaylupit

di lang naman mga batang lansangan

itong kalabit-penge sa lipunan

minsan kahit na mga kaibigan

pati mga tibak na kasamahan

umabot na sa krisis ang sistema

gayong mga produkto'y sobra-sobra

kayang pakainin ang buong masa

di makakain dahil walang pera

sadyang nakakawala ng dignidad

bilang tao pag kamay nakalahad

lipunan ay patuloy sa pag-unlad

ngunit ang lahat sa mundo'y may bayad

tapusin na ang pagkalabit-penge

ninakaw nito'y pagkatao't puri

ganito'y di na dapat manatili

wakasan na itong lipunang imbi

BILIBID OR NOT

2011-05-20T08:23:00.000-07:00

BILIBID OR NOT

(Hinggil sa paglabas-masok sa kulungan ng nasentensyahang

si dating Batangas Gov. Tony Leviste)

ni Gregorio V. Bituin Jr.

14 pantig bawat taludtod

ala eh, di ko mawari, bakingga ganire

labas-masok pala sa kulungan si Leviste

ang dating gobernador ng probinsyang ala-eh

na napiit nang paslangin ang kanyang kumpare

believe it or not, ganito nga ang nangyayari

ang treatment sa kanya'y VIP (vi-ay-pi) dahil mayaman

kaya ang kulungan, ginagawa lang pasyalan

ang kanyang sentensya'y tila pinaglalaruan

nasaan dito ang sinasabing katarungan

lalo't pinatay niya'y ang kanyang kaibigan

ang nangyaring ito'y isa ngang BILIBID OR NOT

isang insidenteng dapat nating mahalungkat

gayunman may katotohanang isiniwalat

na kahit sa kulungan man, may gutom at bundat

iba ang kalagayan ng mayaman at salat

sinong nagpalabas sa dapat ay nakakulong

kanino kayang ulo yaong dito'y gugulong

BILIBID OR NOT, nakakalabas ang may datong

sistema ng hustisya'y saan kaya hahantong

kung pinaglalaruan lang ng mga ulupong

Nagmamaramot ang Gabi

2011-05-18T05:49:00.000-07:00

NAGMAMARAMOT ANG GABI

ni Gregorio V. Bituin Jr.

8 pantig bawat taludtod

nakatitig sa kawalan

ang mga batang lansangan

habang nagkakarerahan

ang iba't ibang sasakyan

batang hamog kung tawagin

ang gutom ayaw nang damhin

kahit ano'y aagawin

upang sila'y makakain

sino kayang manlilimos

sa kanilang mga kapos

bakit ba sila busabos

ang nasa isip ng musmos

sa araw ay maghahanap

ng pagkaing masasarap

sa gabi'y pinapangarap

maibsan na itong hirap

gabi nila'y pumapanglaw

pangarap ba'y matatanaw

mayroon bang bagong araw

na sa kanila'y susungaw

nagmamaramot ang gabi

sa pangarap nila'y bingi

gobyerno'y walang masabi

sa hinaing ng marami

Ang Welga'y Isang Paaralan

2011-05-17T06:12:00.000-07:00

ANG WELGA'Y ISANG PAARALAN

ni Gregorio V. Bituin Jr.

14 pantig bawat taludtod

mahalagahin ang welga pagkat paaralan

hinggil sa tunggalian ng uri sa lipunan

welga'y kongkretong pagmumulat sa katangian

ng lipunan at estadong kinasasadlakan

ang welga'y paaralan upang magrebolusyon

nang makamtan ng obrero ang emansipasyon

at maresolba ang pangunahing kontradiksyon

sa pabrika, lipunan, at gamit sa produksyon

sa welga, ang mga manggagawa'y napapanday

sa pakikibaka pagkat tunggaliang tunay

kitang-kita kung bakit kapitalismo'y sablay

natututong dumiskarte hanggang magtagumpay

rebolusyon ay di lang sahod at benepisyo

at lalong higit pa sa isyu ng unyunismo

ito'y di lang katiyakan sa pagtatrabaho

kundi layon nito'y panlipunang pagbabago

Kamalayang Unyunista'y Sadyang Di Sapat

2011-05-16T05:41:00.000-07:00

KAMALAYANG UNYUNISTA'Y SADYANG DI SAPAT

ni Gregorio V. Bituin Jr.

13 pantig bawat taludtod

kamalayang unyunista'y mananatili

kung limitado lang yaong kanilang gawi

kung munting ginhawa lang ang kanilang hingi

nagkakasyang dagdag-sweldo'y maipagwagi

hangga't sa lipunang bulok, di mamumuhi

hangga't di tukoy na pribadong pag-aari

ng kagamitan sa produksyon ay mapawi

hangga't obrero'y di maging mulat-sa-uri

kamalayang unyunista'y sadyang di sapat

dapat ang mismong lipunan na'y inuungkat

tanungin bakit may kapitalistang bundat

at kayraming obrerong sa buhay ay salat

diwang unyunismo'y huwag panatilihin

mga unyunista'y dapat organisahin

sosyalistang layunin sa kanila'y dalhin

nang diwang makauri'y kanilang yakapin

Simula Man Ang Unyonismo

2011-05-15T04:28:00.000-07:00

SIMULA MAN ANG UNYONISMO

ni Gregorio V. Bituin Jr.

13 pantig bawat taludtod

ang unyonismo'y simula ng pagkamulat

pagkat nagkakaisa ang obrerong salat

ang karapatan nila'y naisisiwalat

laban sa kapitalistang sa tubo'y bundat

simula ng pagkamulat ang unyonismo

ngunit di sapat na ilaban lang ang sweldo

at batayang karapatan nitong obrero

dapat na ang diwang makauri'y matamo

dapat mapasabak ang unyon sa labanan

maaari mang ito'y welga o aklasan

nang manggagawa'y mamulat sa tunggalian

ng uri sa pabrika, pati sa lipunan

ang pagsapi sa unyon ay simula pa lang

dahil kapwa manggagawa'y nagsasamahan

ngunit kung walang makauring kamalayan

baka sila'y madurog sa simpleng labanan

simula man ng pagkamulat itong unyon

panahon nila'y di dapat maubos doon

dapat matutunan nilang magrebolusyon

yakaping mahigpit ang sosyalistang layon

Hindi Unyonismo ang Landas ng Paglaya

2011-05-14T03:54:00.000-07:00

HINDI UNYONISMO ANG LANDAS NG PAGLAYA

ni Gregorio V. Bituin Jr.

13 pantig bawat taludtod

ang landas ng paglaya'y hindi unyonismo

pagkat di lang sa pabrika ang labang ito

pakikibakang ito'y tagos sa gobyerno

kaya di dapat mag-unyon lang ang obrero

pakikibaka nila'y di hanggang pabrika

kaya dapat mangarap ng bagong sistema

kung saan malaya sa pagsasamantala

ng hinayupak na mga kapitalista

dapat nang ipaalam sa mga obrero

na magwawakas ang lumang sistemang ito

kung tuluyang bumagsak ang kapitalismo

at manggagawa na'y namuno sa gobyerno

panahon nang tapusin ang dusa at luha

unyonismo'y lagpasan na ng manggagawa

nasa sosyalismo ang landas ng paglaya

pagkat bubunutin na'y gintong tanikala

Kung Nabuhay Kami Para Magutom

2011-05-13T01:12:00.000-07:00

KUNG NABUHAY KAMI PARA MAGUTOM

ni Gregorio V. Bituin Jr.

10 pantig bawat taludtod

kung ako ang batang nabuhay lamang

para magutom at mahirapan

bakit pa ako pa'y isinilang

sa mundong walang kinabukasan

matatanggap ko lamang ay mumo

habang sumisikip ang tiyan ko

sa gutom dahil di aasenso

sa ganitong sistema't gobyerno

mabuti pang ako na'y namatay

pagkasilang sa bukang-liwayway

kaysa magigisnan ko ang buhay

na bawat araw, isang tinapay

isinilang kaming walang plano

magkakapatid na labingtatlo

si itay ay kaybaba ng sweldo

labandera naman ang nanay ko

magulang ba namin ang may sala

kaya kami'y ganitong kawawa

anak kaming binabalewala

sa buhay, kami na ang bahala

tao nga kami, bakit ganito

laging gutom, utak ay tuliro

sa amin magpasensya na kayo

tinitiis kami ng gobyerno

latak na ng lipunan ang tingin

ng marami sa kagaya namin

kayhirap namang gutom tiisin

kaya nang-aagaw ng pagkain

sabi, humayo't magpakarami

kaya pagpasensyahan nyo kami

kung dumami kaming mamemeste

kami lang nama'y dumidiskarte

tao kami, ngunit nasa hukay

ang gutom maibsan lang ng tunay

kami nama'y sadyang maglulubay

buti't di namin kayo pinatay