Biyernes, Pebrero 2, 2018

Lalaki man ay tinig din ng kababaihan

lalaki man kami'y tinig din ng kababaihan
kung ako'y haligi, asawa'y ilaw ng tahanan
dapat lamang ipagtanggol ang bawat kasarian
aba'y tingni ang nasa Kartilya ng Katipunan

kaya pagbibirong apatnapu't dalawang birhen
ang sa banyaga'y pasalubong at dapat maangkin
ay di katanggap-tanggap, kahit pagbibiro man din
ang mga kababaihan ay di dapat bastusin

dapat maging tinig din ng babae ang lalaki
pagkat noong nanliligaw pa lang sa binibini
ay binigkas na ng puso ang pagsintang kaylaki
kaya puri ng babae'y ipagtatanggol dini

baliw man ang hari ay hari pa ring naghahari
may tatalima pa rin sa utos na di mabali
ngunit ang hari'y di bathalang di maduduhagi
babagsak din siya sa gawaing kamuhi-muhi

- gregbituinjr.

Walang komento: