Huwebes, Marso 2, 2017

Pinagsasawaan kong hagkan ang kabuuan mo

pinagsasawaan kong hagkan ang kabuuan mo
kahima’t tulad ko’y kulangpalad, nagdidiliryo
ako baga ang ulupong na lilingkis sa iyo
aasawahin kita't pakakainin ng bato

lolobo ang tiyan mo ngunit ako'y magsisikap
bubuhayin kita, buhay ko ma'y aandap-andap
gagawin ang kaya, aabutin yaring pangarap
ililipad kita't maglalaro sa alapaap

patuloy man ang labanan, di kita palulupig
dalawa nating bubuuin ang ating daigdig
di man kita maikulong sa dalawa kong bisig
sa iwing prinsipyo't pagmamahal tayo sasandig

ayon sa matatanda, "kung di ukol, di bubukol"
kaya aking diwata, huwag ka sanang magmaktol

- gregbituinjr.

Walang komento: