Miyerkules, Agosto 16, 2017

Walang mabuting tanikala

WALANG MABUTING TANIKALA

walang mabuting tanikala
pagkat akibat nito'y sumpa
di wasto ang laging pagluha
buti pang gulok mo'y ihasa

walang mabuting tanikala
kung tulad mo'y inaalila
bawat tanikala'y masama
lalo't karapatan'y nawala

walang mabuting tanikala
kung ang turing sa dukha'y daga
dapat lumaban ang dalita
kumilos at di lang salita

ang tanikala'y tanikala
pakintabin man ng kuhila
dapat itong putuling sadya
kung ayaw mong nakakawawa

walang mabuting tanikala
maiging lumaban ka, dukha
kung nasa'y ganap na paglaya
mabuting walang tanikala

- gregbituinjr.

Martes, Agosto 15, 2017

Tula kina Heber at Florante

TULA KINA HEBER AT FLORANTE
ni Gregorio V. Bituin Jr.

i

may mga awit silang para sa sariling wika
dalawang awiting tunay na kadaki-dakila

may kantang "Ako'y Isang Pinoy" itong si Florante
at may "Tayo'y Mga Pinoy" si Heber Bartolome

pawang mga mang-aawit na sadyang magagaling
tagapagtanggol ng wika't tunay na magigiting

kalayaan sa kanilang awitin makakatas
animo sa globalisasyon ay matinding lunas

ii

sa inyong dalawa'y taas-kamaong pagpupugay
nawa'y manatiling malusog, humaba ang buhay

tulad nyo, sariling wika'y itataguyod namin
pagkat tulad ng anghel, ito'y identidad natin

salamat sa awitin ninyong walang kamatayan
na tunay ninyong pamana sa buong sambayanan

ngayong Buwan ng Wika'y dapat lang kayong itanghal
mang-aawit na dapat lang gawaran ng parangal

Sabado, Agosto 12, 2017

A ispor Atis

A ispor Atis

A ispor Atis, ituro sa mga bata
B ispor Batis, gamit ang sariling wika
Aba'y kayrami nating magandang salita
Bakit nahuhumaling sa wikang banyaga

A ispor Atis, ito ang sariling atin
B ispor Batis, sariling wika'y gamitin
Aba'y di tayo lahi ng mga alipin
Kundi lahing bayaning pawang magigiting

A ispor Apol daw, aba'y huwag magmintis
Sariling wika'y huwag payagang matiris
Ng sinumang nangangayupapa sa Ingles
Padaluyin natin ito tulad ng batis

A ispor Atis, ituro sa paaralan
At lalaki silang kaagapay ng bayan

- gregbituinjr.

Miyerkules, Agosto 9, 2017

Basted sa tsiks

BASTED SA TSIKS

"Bakin ga ika'y nakamurot?" anang aking mamay
habang sa tubuhan kasama akong nangungumpay
suliraning are'y bakit di ko matagong tunay
lihim ng puso'y nadaramang nagkagutay-gutay

nakilala ko sa tuklong ang kaygandang dalaga
tila ba kabuuan niya'y kahali-halina
ngiti pa lang, aba'y parang ako'y nasa langit na
ako'y tila inuugoy sa duyan ng pagsinta

ang inaasam kong diwata'y kaysarap kausap
lambing niya animo'y tangay ka sa alapaap
ngunit aking mutya'y ano’t may ibang hinahanap
di ako ang kabagay, iba ang kanyang kaganap

sa salitang lungsod nga'y "basted", iwing puso'y sawi
at ang mamay, habang pinatutuka ang tinali
payo'y humanap ng iba't sakit ay mapapawi
habang ang tandang sa dumalaga'y panay ang giri

- gregbituinjr.

nakamurot = nakasimangot
nangungumpay = nangunguha ng pagkain ng kalabaw
mamay = lolo
tuklong = tagalog ng kastilang "kapilya"

Martes, Agosto 1, 2017

Pagbati sa pagtatapos ng pamangkin

PAGBATI SA PAGTATAPOS NG PAMANGKIN

nailatag nang muli ang isang bagong umaga
dahil sa nakamit mong pagtatapos sa eskwela
sa iyong magulang isa kang tunay na biyaya
na dapat ipagmalaki ng bawat ama't ina

pagtatapos mo'y patunay nang tiyaga mo't sipag
upang magandang kinabukasan ay maaninag
sa haharaping buhay ay dapat magpakatatag
dahil gubat na susuungin ay napakadawag

turo ng eskwela sa pagkatao'y mababakas
maging matalino sa tatahaking bagong landas
pagkat ikaw lamang ang uugit sa iyong bukas
pagsikapan mo ang buhay na prinsipyado't patas

namumukod-tangi kang tala sa laksang bituin
maligayang pagtatapos, o, mahal kong pamangkin

- gregbituinjr.

(*Ang tulang ito'y hiniling ng isang kasama na gawan ko ng tula ang pagtatapos ng kanyang pamangkin.)

Huwebes, Hulyo 27, 2017

Mga larawan ng kamatayan

MGA LARAWAN NG KAMATAYAN

naglalabanan noon ang mga sadyang bihasa
pawang gladyador, mga napiit na mandirigma
nakikipaglaban nang manonood ay matuwa
at makamit ang kanilang minimithing paglaya

naganap ang mga iyon sa sinaunang Roma
na pininta sa kambas ng sikat na Juan Luna
yaong mga natalo't napaslang na'y hinihila
ililibing kung saan habang iba'y nagsasaya

animo'y guniguning nagbalik ang kanyang pinta
sa paglalarawan ng isang Christopher Zamora
tila ba parak ang sa mga bangkay humihila
ang isang pinaslang sa gilid ay may karatula

ikalwa'y naganap sa panahong kasalukuyan
kung saan dukha'y itinuring na parang ipis lang
walang proseso, biktima ng tokbang (tok-tok-bang-bang)
di na nililitis kung talagang may kasalanan

dalawang larawan iyong animo'y magkakambal
larawan ng mga pangyayaring karumal-dumal
tila ba iyon ay katuwaan ng mga hangal
na tila buhay ng tao'y kapara ng animal

- gregbituinjr.
Spolarium - Guhit ni Juan Luna, 1884
Guhit ni Christopher Zamora ng Manila Today, 2017

Martes, Hulyo 25, 2017

Itigil ang tokbang!

ITIGIL ANG TOKBANG!

ang tokhang ay pagkatok upang makiusap
nangyari'y di tokhang kundi tokbang nang ganap
ang buhay na'y nawawala sa isang iglap
nangyari'y tok! tok! bang! bang!, walang usap-usap

ganito ba ang mundong iyong nais, sinta?
mamulat sa karahasan ang iyong kapwa
kalaban ng krimen ay kriminal din pala
walang proseso't nakapiring ang hustisya

walang paki sa buhay, basta tinitiris
ang buhay ng dukhang itinulad sa ipis
sa nanonokbang, di na uso ang due process
sinumang pinuntirya'y di na malilitis

proseso'y igalang, litisin ang maysala
panagutin sa krimeng kanilang nagawa
huwag tularan ang mga tusong kuhila
na naglalaway na sa dugo't tuwang-tuwa

wala na bang budhi silang paslang ng paslang?
o makikinig pa ang mga pusong halang:
may karapatan sa buhay bawat nilalang
kaya itigil ang tokbang, ang tok! tok! bang! bang!

- tula't litrato ni gregbituinjr., SONA 2017

Lunes, Hulyo 24, 2017

Martsa ng mga hindi makapag-martsa

MARTSA NG MGA HINDI MAKAPAG-MARTSA

di sila makapag-martsa pagkat patay na
patay na sila kaya di makapag-martsa
ngunit guniguni't panawagang hustisya
ay naririto pa't amin silang kasama

mga sapatos lang at tsinelas na luma
doon sa lansangan inihilerang sadya
may mga magkapares, may walang kabika
simbolong sa SONA, sila'y nagugunita

ang pinairal na'y kultura ng pagpatay
sa bansang ginawang barya-barya ang buhay
tila berdugo'y uhaw sa dugo ng bangkay
tokbang, tokbang, libu-libo'y naging kalansay

nagdodroga raw kaya sila'y iniligpit
nagdodroga ba pati mga batang paslit?
na napaslang dahil namumuno’y kaylupit
bakit due process sa kanila'y pinagkait?

walang paglilitis, sila'y pinagpapaslang
silang biniktima ng tokbang (tok,tok, bang, bang)
naroon ma'y sapatos at tsinelas lamang
tandang dapat managot ang sinumang halang

- gregbituinjr.

Biyernes, Hulyo 21, 2017

Tula laban sa tokbang

kaninumang buhay na nalihis
di dapat tirising parang ipis
respetuhin ang right to due process
tiyaking may wastong paglilitis

- No to tokbang! No to EJK!
- Igalang ang karapatang pantao!

Huwebes, Hulyo 20, 2017

Nilay at danas sa kumukulong diktadura

NILAY AT DANAS SA KUMUKULONG DIKTADURA

libu-libo'y pinaslang sa unang taon pa lamang
turing sa dukha'y ipis, buhay nila'y di ginalang
maginoong sukab na'y talipandas na nahirang
masa'y di maisip sa sariling dugo lulutang

animo'y isang sumpa sa bayan ng magigiting
na pati tusong pulitiko'y nagsipagbalimbing
inidolo'y dating diktador ng pinunong praning
na sa Libingan ng mga Bayani inilibing

mga sugapa'y maysakit ang diwa't kaluluwa
walang proseso't pagpaslang ba agad ang sentensya?
utos ng hari nang di mabali, nag-martial law na
ang lupang pangako'y nilason ng sukab at bomba

ang martial law'y gagawin pa nilang pambuong bansa
baka marami na namang matortyur, mangawala
nakababahala ngang tunay ang pinaggagawa
karapatang pantao'y sadyang binabalewala

hindi tulog ang bayan, naririto't nagtitipon
nakahanda sa pagharap sa panibagong hamon
di papayag mabalik ang bangungot ng kahapon
masa'y pipiglas sa pangil ng bagong panginoon
- gregbituinjr.

(nilikha para sa National Conference Against Dictatorship o NCAD na ginanap sa Benitez Hall, College of Education, UP Diliman, Hulyo 20-21, 2017)

Linggo, Hulyo 16, 2017

Si Juan "Tamad" at ang makata

nakilala si Juan na sa bayabas nag-abang
kung kailan sa lupa'y lalagpak na manibalang
habang patuloy ang nilay ng makata sa ilang
lumilipad ang isip at naroong naglilinang

tambay si Juan, nakikipaghuntahan sa kanto
paano raw kabit niya'y bibigyan ng sustento
tambay rin ang makatang ang baon ay pulos kwento
tinitirintas sa buhangin ang mata ng bagyo

di sila mga tamad pagkat pawang malikhain
bawat bagay sa daigdig ay nais maeksamin
bagsak ng bayabas ay siyentipikong suriin
habang anumang tuklas ng makata'y kakathain

si Juan gayong nagsusuri'y tinuring na tamad
tulad ng iba pang siyentipikong kapuspalad
habang isip ng makata'y ibong lilipad-lipad
sa mga tirong at katunggali'y nakikitalad

- gregbituinjr.

Talasalitaan:
manibalang - malapit nang mahinog
huntahan - kwentuhan
tirintas - paglubid ng tatlo o higit pang hibla
tirong - taong nagkukunwaring matapang o makapangyarihan at nananakot ng kapwa
talad - manu-manong paglalaban na gamit ang espada o itak

Sabado, Hulyo 15, 2017

Ayaw namin, ayaw namin sa droga't tokbang

ayaw namin, ayaw namin sa droga't tokbang
huwag mong patayin ang sugapang tikbalang
mahalaga ang buhay ng bawat nilalang
bakit buhay ng kapwa'y basta pinapaslang

alam mo, ang droga't tokbang ay ayaw namin
karapatan sa buhay ay huwag siilin
sugapa'y maysakit kaya dapat gamutin
at hindi mga kutong basta titirisin

ayaw namin sa tokbang, ayaw din sa droga
dukha lang naman ang laging inaasinta
panginoon ng droga'y dapat mapuntirya
pagkat sila'y malaya pa't tatawa-tawa

kung sakaling mang mga aso'y umalulong
yaong mga sugapa'y tiyak nabuburyong
minumulto ng buhawi ng pagkakulong
habang doon sa sulok ay bubulong-bulong

- gregbituinjr.

Biyernes, Hulyo 14, 2017

Di bale nang umawit ka ng sintunado

di bale nang umawit ka ng sintunado
kaysa magtalumpati nang wala sa tono
masaya naming pakikinggan ang awit mo
subalit sa talumpati'y dapat seryoso

ang sintunadong awit ay mapapatawad
pagkat bayan ay patuloy pa ring uusad
sa talumpati'y mahalaga ang dignidad
pagkat prinsipyo't pagkatao'y nalalantad

tiyak namang gaganda rin ang iyong tinig
pag nasanay ka't marami nang nakikinig
sa talumpati'y mensahe ang dinirinig
di dapat sintunado't baka ka mausig

- gregbituinjr.

Huwebes, Hulyo 13, 2017

Demonyo akong kalaban na ng kapwa demonyo

(In Every Angel, A Demon Hides. In Every Demon, An Angel Strides.)

demonyo akong kalaban na ng kapwa demonyo
tunggalian itong patay kung patay hanggang dulo
demonyo akong umaayaw sa hudas at gulo
sapagkat nais ko'y pantay na lipunan sa mundo

ngunit mga kalabang demonyo'y talagang hudas
pagkat di sila marunong lumaban ng parehas
tubo't salapi'y sa puso nila nakatirintas
pati buhay at karapata'y kanilang inutas

demonyo akong sa mundo'y nais magpakabuti
sa puso'y maglingkod sa higit na nakararami
subalit kung kapwa demonyo ako na'y kinanti
baka pangil ko'y ipansakmal sa demonyong imbi

demonyo man ako'y kapayapaan ang hangarin
sa mundong dukha'y kayrami't masa'y inaalipin
demonyo akong pawang kabutihan ang mithiin
at ang kasamaan sa mundo'y laging babakahin

- gregbituinjr.

Miyerkules, Hulyo 12, 2017

Kahit ako'y lupa

kahit ako'y lupa't ikaw naman ang bagyo
gaano man kalakas ang mga patak mo
sa pagbagsak mo'y ako pa rin ang sasalo
habang may bahagharing lilitaw sa dulo

ganyan kaming lupa kapag puso'y umibig
sa gaya mong nais kong ipiit sa bisig
bahain man ang lansangan, panay ang kabig
kabuuan mo'y hahagkan ko't magniniig

bagyo kang kaylakas, sa akin din ang bagsak
tinitingala kang gagapang din sa lusak
habang pinalulusog ang mga pinitak
upang isa't isa'y ipagbunying di hamak

ating damhin sa ulan ang bawat tikatik
at sa nilalandas nating lupang maputik
pusong sumisinta'y nagnakaw man ng halik
halik kong ninakaw ay pilit ibabalik

- gregbituinjr.

Martes, Hulyo 11, 2017

Kayraming dagdag-singil, walang dagdag-sahod

kayraming dagdag-singil, walang dagdag-sahod
presyo ng tubig, kuryente'y nakalulunod
presyo ng bigas, langis nakapipilantod
anong klaseng sistema ba ang sinusunod

walang dagdag-sahod, kayraming dagdag-singil
ganyan ba'y batas ng lipunang mapaniil
sa negosyo, tubo'y laging umuukilkil
masa'y balewala sa bayang sinusupil

kayraming dagdag-singil, walang dagdag-sweldo
bakit ganito ang palakad sa gobyerno
pabor sa negosyo, obrero'y agrabyado
ganyan nga ba sa lipunang kapitalismo

bakit nagtatrabaho'y nasa karukhaan
gayong di nagtatrabaho'y nagbubundatan
laksa'y naghihirap, nagpapasasa'y ilan
aba'y ganyang lipunan na'y dapat palitan

- gregbituinjr.

Lunes, Hulyo 10, 2017

Maligayang kaarawan, Ka Lean Alejandro!

Maligayang kaarawan, Ka Lean! Nawa'y sumaiyo ang katarungan! Habang kami'y tuloy pa rin ang laban Tungo sa pagbabago ng lipunan!

Linggo, Hulyo 9, 2017

Sinong maysakit?

SINONG MAYSAKIT?

sino kang nakahawak ng kapangyarihan
na sa baril inaasa ang "katarungan"
atas mong pagpaslang ay anong kahulugan
kundi magtanggal ng buhay at karapatan

bakit nais na hustisya'y walang proseso
iyon ba ang kahulugan ng pagbabago
walang proseso'y kaparaanan ng gago
walang paggalang sa buhay ng kapwa tao

sa mga nakagawa ng sala'y may batas
at may mga proseso upang maging patas
ang hustisya't di basta na lamang uutas
hatol na batay sa ebidensyang malakas

ang nagdroga'y sa karamdaman nakapiit
at may karapatang di dapat ipagkait
sugapa'y kriminal na kung nakapanakit
kung wala pang sala'y inosente't maysakit

sugapa'y sa halusinasyon nakaratay
kaya gamutin sila't huwag gawing bangkay
bawat buhay ay igalang, at sunding tunay
ang ikalimang utos: Huwag kang papatay!

- gregbituinjr.

Sabado, Hulyo 8, 2017

Maligayang kaarawan sa iyo, Ate Jackie

Maligayang kaarawan sa iyo, Ate Jackie
Kalagayan mo nawa'y lalaging nasa mabuti
Pagkilos mo para sa karapatan ng marami
Ay dama ng masa kaya po nagpupugay kami
Sa iyo na isa sa aming magaling na Ate.

- Si Ate Jackie ay isa sa aming mga kasama sa human rights, kumikilos sa IDefend at PAHRA (Philippine Alliance of Human Rights Advocates)

Miyerkules, Hulyo 5, 2017

Kwento ng tatlong unggoy

"Putang ina!", ang agad tungayaw ng Haring Unggoy
sa harap ng Dukeng Matsing na kanyang tinutukoy
ang Ministrong Tsonggo'y nagtakip ng ilong sa amoy
ng naglipanang bangkay na nabaon sa kumunoy

sa krimen sa bayan, sila lang daw ay naniningil
ng mga utang ng inaakala nilang sutil
tila "See No Evil, Hear No Evil, Speak No Evil"
ang pakana ng tatlong pinunong kapara'y taksil

atas nila'y bawat pusakal ay dapat mapaslang
pagkat maraming salang ginawa ang mga halang
subalit tatlong pinuno'y buhay ang inuutang
walang proseso't karapatan ang bawat nilalang

ginawang bayani ang diktador na mapang-imbot
batas-militar ay tama, hukuman man ay takot
pasismo’y wasto’t taumbayan na’y nangingilabot
habang dayo'y sinakop ang mga isla sa laot

niyurakan ang karapatan, wala bang magawa
katunggali nga’y dinuduro ng mga kuhila
dapat magsuri't kumilos ang marangal na madla
upang mga pagkakamaling ito'y maitama

- gregbituinjr.

Martes, Hulyo 4, 2017

Isipin mo silang umukit ng lipunan

magsasaka'y iyo ring isipin
kapag kumakain ka ng kanin
silang mga nagsaka't nagtanim
hanggang sa ang palay ay anihin
upang ang bayan ay may makain

isipin ang humukay ng balon
kapag tubig ay iyong ininom
manggagawa'y kayganda ng layon
upang magkatubig itong nayon
at lunasan ang uhaw at gutom

isipin mo rin ang mangingisda
kapag iyong inulam ay isda
lagi sa laot, hindi sa lupa
minsan nakatira na sa bangka
kahit daanan sila ng sigwa

isipin mo rin ang magtutubó
kapag asukal ay ginamit mo
sa kape o matamis na bao
nagtanim at nag-ani ng tubó
nang malasap ang tamis na puro

isipin mo rin ang mananahi
suot natin ay sila ang sanhi
baro man ng pulubi o hari
sinulsi ma'y marami't kaunti
gawain nila'y kapuri-puri

isipin mo rin ang manininda
lalo't naglalako sa bangketa
marangal ang hanapbuhay nila
kaunti man yaong kinikita
basta't di magutom ang pamilya

- gregbituinjr.

Lunes, Hulyo 3, 2017

Ano mang lalim ng balon

ano mang lalim ng balon
tiyak ding makaaahon
pito'y hindi malululon
ng taginting ng kahapon

anong tayog ng kawayan
ay yumuyuko rin naman
tulad ng hari't sakristan
lalo't unos ang dumaan

puso ng ama'y pipintig
sa pakakaining bibig
pagkat buo ang pag-ibig
masipag, nagsisigasig

ibon ng kapayapaan
naligalig ang tahanan
umalpas sa kalawakan
lumipad na't may digmaan

bangkay sa gilid ng kanal
walang anumang balabal
iyon kaya'y ibinuwal
ng katarungang di banal

budhi rin ay nanunumbat
pag sa kapwa'y di matapat
ang gulok mang anong bigat
may kaluban ding katapat

- gregbituinjr.

Hindi sila mga ipis

hindi sila mga ipis
na basta lang tinitiris
dukha silang nagtitiis
sa dusa, hirap at amis

hindi sila mga lisa
na basta lang pinipisa
nagkataong sila'y dukha
hindi dapat pinupuksa

sila'y kapwa natin tao
na maaaring magbago
kung nagkasala ang tao
ay idaan sa proseso

sino bang dapat mausig
budhi ba'y nakaririnig
sino bang dapat malupig
puso mo ba’y naaantig

- gregbituinjr.

Linggo, Hulyo 2, 2017

Pangako ng kuhila

bakit ba karaniwang ang mga pangako
sa bungad pa lang ng sabana'y napapako?
kapara'y nasa bulwagang nakatalungko
o kaya'y doon sa kalbaryo'y nakayuko

nangako'y anong tapang na kapara'y leyon
wawakasan na raw ang kontraktwalisasyon
pagkat sa buhay ng obrero'y lumalamon
sa bituka’t balat nila’y diskriminasyon

kahit langit na'y pinangako ng kuhila
upang himagsik ng obrero'y mapahupa
napapatid ba bawat guhit ng panata?
nang kuyom nilang kamao'y mapatirapa

santaong nagdaan, pangako'y nasaan na?
sa obrero’y naglubid lang ba ng pag-asa?
pinangako ba’y sadyang nilunok na niya?
buntot nga ba’y nabahag sa kapitalista?

- gregbituinjr.

Sabado, Hulyo 1, 2017

Sino ang sukab na laging pananakot ang alam

sino ang sukab na laging pananakot ang alam
pulos banta, papatay, papaslang, o kaya'y kulam
mahilig manungayaw at sa kritiko'y mang-uyam
isyu laban sa kontraktwalisasyon nga'y naparam

namamayagpag pa rin ang oligarkiya't pulpul
habang mga dukha'y talikurang pinapalakol
karapatang pantao'y papel na kinukulapol
habang putik ang sa bunganga niya'y nakadunggol

mga monghe'y nagsipagdasal na raw ng taimtim
upang makontra ang nagdulot ng salot at lagim
habang hari'y kayraming rosas na balak masimsim
upang sa huli'y iwanan at sa iba lumimlim

dagok ng palad, hindi, baka dagok ng kapital
habang patuloy ang pag-alulong ng laksang askal

- gregbituinjr.

Biyernes, Hunyo 30, 2017

Pati pabrika'y sinalsal ng trapo

pati pabrika'y sinalsal ng trapo
pigang-piga ang lakas ng obrero
sa hangad na tubo'y nagpakatuso
nagpaalipin sa kapitalismo

pulpol na pulitiko'y mga maton
na buwis ng bayan ang nilalamon
di malutas ang kontraktwalisasyon
pagkat ayaw ng mga panginoon

bakit sa ganid sila naglilingkod
at sa dukha kunwari'y nakatanghod
mga budhi ba nila'y nauupod
kaya batas na’y nagtila pilantod

minsan dapat din tayong tumingkayad
upang matanaw ang dapat malantad
sa harap ng bayan nga'y nakatambad
ang kanilang budhing animo'y bayad

- gregbituinjr.

Huwebes, Hunyo 29, 2017

Tunggalian ng uri

di nagtatrabahong amo’y bundat sa kabusugan
bundat na bundat sa pagsagpang, di mabilaukan
obrero'y gawa ng gawa, sadyang nahihirapan
nagugutom na pamilya’y laging nasa isipan

- gregbituinjr.

Miyerkules, Hunyo 28, 2017

Kuryente'y serbisyo, di negosyo

nagsalita na ang sambayanan
sila na'y pawang nahihirapan
kuryenteng mahal ay tinutulan
pagkat dagdag pasanin sa bayan

kuryente'y serbisyo, di negosyo
sa plantang coal, bayan ay dehado
ngala-ngala'y magiging barado
sa bulsa at baga pa'y perwisyo

kalikasa'y kaytagal nagtiis
sa maruming karbong labis-labis
ang buhay ng tao'y numinipis
dahil karbon na ang tumutugis

renewable energy'y gamitin
at plantang coal ay iwaksi na rin
presyo ng kuryente'y pababain
pati buwitre sa bayan natin

budhi ng negosyo'y tila hubad
naglalaway lang sa tubong hangad
hustisya'y pagong pa ring umusad
sa bayang iniikot sa palad

- tula't litrato ni gregbituinjr.

Martes, Hunyo 27, 2017

Maligayang kaarawan sa aming guro

MALIGAYANG KAARAWAN SA AMING GURO
Para kay Mam Lorna Josue

maligayang kaarawan po sa dakilang guro
na noong bata pa kami'y matatag na nagturo
mula sa labong, nagsanga hanggang sa maging puno
sadyang sa payo ng aming guro kami'y lumago

tinuruan nyo akong maging matapang, di dungo
kayang harapin anumang pagsubok at siphayo
ang inyong lingkod po'y nasa lugar mang anong layo
ay nagsasabing maraming, maraming salamat po!

nawa lagi kayong malusog, tumatag pang lalo
pagmamahal ng estudyante nyo'y di maglalaho
taas-kamao pong pagpupugay mula sa puso
para sa isa sa mga nakilala kong guro

HAPPY BIRTHDAY PO!

- mula po sa inyong estudyante sa elementarya, Gregorio V. Bituin Jr.

Hinggil sa komentula

Poetic justice for a poet?
HINGGIL SA KOMENTULA

Ang tula ay tula bagamat nakasusugat din
Kung libelo ang komentula, hinay-hinay na rin
Baka pati ang pluma ko'y kung saan lang pupulutin
Kung ipipiit ang komentulang isa bang krimen

Ngunit kahanga-hanga ang kaibigang makata
Kahit pangunahing biktima ng alon ng sigwa
Ganyan na ba sa bayan kong sawi at napapatda
Sa samutsaring isyung sa madla animo'y sumpa

Halina't patuloy tayong magsabi ng totoo
Makata'y di tulad ng tuwid-ang-tinging kabayo
Kundi kritikal sa baya't lipunang nilulumpo
Hindi bulag sa harapang nakikitang abuso

Mga komentula natin ay dapat magpatuloy
Mensahero'y di dapat magapos sa punungkahoy
Ang mga titik at katha'y di nila maluluoy
Lalo't si Hustisya'y kakamping di dapat palaboy

- gregbituinjr.

Lunes, Hunyo 26, 2017

Tungkulin ng makata

tungkulin ng makatang ilantad ang anumang mali
lalo na ang panggugulang ng naghaharing uri
lalo na't pagpapakatao'y pinagbali-bali
kaya dapat matatag sa harap ng laksang imbi

ilantad anumang gawa ng mga salanggapang
lalo't buhay at dignidad ang kanilang inutang
makata'y mapipiit o patay sa pananambang
ngunit tula ng makata'y di nila mapapaslang

kung agad kinukumpuni ang makinang nasira
ngunit sa obrerong naputlan ng daliri'y ngawa
kapitalistang switik ay dapat lang matuligsa
pagkat makina'y una kaysa kanyang manggagawa

magsasaka'y kayod-kalabaw sa di-aring bukid
lupa'y inararo, pagkain sa hapag ang hatid
manggagawa sa pabrika'y nakatutok sa ikid
ngunit sa katusuhan ng puhunan nangabulid

nahirati sa pananambang ang mga ulupong
patuloy ang pag-asinta sa mga dukha't lulong
pag walang salapi'y ayaw gamutin ang kurikong
sa transakyon sa pamahalaan kayraming patong

hindi ba't ganyan ay marapat lamang tuligsain
upang maitama ang palakad sa bayan natin
di ba't makata'y kakampi mo sa budhi't mithiin
lalo't tangka ng sukab na karapata'y lumpuhin

- gregbituinjr.

Sabado, Hunyo 24, 2017

Pagsakol ng kanin

"mas nais kong sakulin ang kanin
kaysa naman ito'y kutsarahin"
anang isang matandang ubanin
habang sa labas nagpapahangin

dama ang dulot ng kalikasan
tingni ang tanim at kaparangan
magsasaka'y nagkakapatiran
sa paggapas ng palay, tulungan

ang pagsakol ng kanin ay damhin
at hanging amihan ay samyuin
bawat butil ay ating nguyain
at mumo'y huwag hayaan man din

damhin ang pintig ng magsasaka
at tiyak na iyong madarama
pulso ng buhay ay tangan nila
sila at ang bukid ay iisa

- gregbituinjr.

Biyernes, Hunyo 23, 2017

Ngayong Hunyo, dalawang tula sa Liwayway

Dalawang kaibigan sa pagtula
sa Liwayway ay muling nalathala.
Mabuhay kayo, mga kamakata
sa inyong marurubdob na pagkatha!

- gregbituinjr.

Huwebes, Hunyo 22, 2017

Usapan ng maya at ng agila

ang bulong ng maya sa agilang pilantod:
bakit naman kaybaba niring sinasahod
kailangan ba naming sa iyo'y lumuhod
araw-gabi nga kami'y iyong pinapagod

aba'y sigaw agad ng agilang sukaban:
kontraktwal kasi kayo't walang karapatan
iyang amo ninyo'y kontraktor na gahaman
kaya gutom ng pamilya nyo'y pagtiisan

hilakbot ang maya sa tugon ng agila:
di ka pala agila kundi buwitre ka
na kaysaya sa pinaghirapan ng iba
kayong maypagawa'y sa iba ipinasa

agila'y sinigawan ang mayang tulala:
kami ang may-ari, wala kang magagawa
ari mo lamang ay iyang lakas-paggawa
pagpaumanhi't isinilang kang kawawa

masama man ang loob, ang maya'y tumugon:
alam mo, di ka nariyan habang panahon
balang araw, kami rin ay makakaahon
lalo't nagkaisa kaming magrebolusyon

- gregbituinjr.

Martes, Hunyo 20, 2017

Siyang Tunay, Kamahalan

SIYANG TUNAY, KAMAHALAN

sadya ngang tunay ang pagmamahal
oo, tunay ngang may nagmamahal
pagmamahal sa puso'y nagwarat
nagmamahal na di madalumat

nagmahal ang presyo ng bilihin
pati pamasahe'y nagtaas din
dagdag sa baon, saan kukunin
kung sa munting sahod ay gipit din

kamahalan, anong 'yong pananaw
iyang puhunan ba'y sadyang bakaw
sa manggagawang gutom at uhaw
baka sa kamahalan, papanaw

karapatan ba'y nabubusalan
kaya di makaangal ang bayan
kaymahal ng pangangailangan
oo, siyang tunay, kamahalan

- gregbituinjr.

Sa Lungsod ng Putik

maganda pa rin ba ang lungsod na puno ng putik
na ang kalsada'y lubog agad sa ulang tikatik
lungsod ng kaunlarang sa pag-asa sana'y hitik
ngunit sagana sa dukhang sa gutom humihibik

nasaan na ang pag-asang inaasam ng dukha
mula sa gobyernong animo'y pugad ng kuhila
bakit ang pamahalaan ay nagiging pabaya
hinahayaang mamamayan niya'y hampaslupa

sa danas na kaunlaran, lungsod daw ang gulugod
upang ipakitang ang bansa'y maunlad, malugod
kaya pala maraming bahay kaytaas ng bakod
kaya pala mga obrero'y kaybaba ng sahod

gusali'y nagtatayugan, dukha'y walang matirhan
bawat isa'y nagkanya-kanya bunsod ng puhunan
mundo'y pinaiikot lang sa palad ng iilan
nasa may salapi lamang ba iyang kaunlaran?

- gregbituinjr.

Lunes, Hunyo 19, 2017

Tungkulin ng propagandista

sumisikdo ang dibdib, utak at dugo'y tumigis
puso'y nalulumpo ngunit umaarteng kaybangis
sa harap ng iba, kabiguan ay nililihis
propagandista pa rin kahit labis ang pagtangis

kahit sariling buhay ng propagandista'y lugmok
luha'y nilalagok at kasawia'y nilulunok
sa tungkuling magpropaganda pa rin nakatutok
upang moral ng masa'y iangat hanggang sa tuktok

kaytalim ng mga katagang kapara ay lintik
kalabang kaytalino'y nilalampaso sa putik
sa bawat sulok, propaganda niya'y natititik
sa diwa't kalooban ng kapwa'y isinisiksik

propagandista'y di dapat makitang isang sawi
kahit na buong buhay niya'y pawang luha't hapdi

- gregbituinjr.

Dinadaan na lang sa tula ang buhay na hungkag

dinadaan na lang sa tula ang buhay na hungkag
pumapalaot sa talampas ng isang lagalag
patuloy ang laban, ayaw maging kahabag-habag
niyayapos pa rin yaong prinsipyong di matibag

lakad ay kilo-kilometro't walang pamasahe
matikas kahit pagod sa harap ng binibini
kahit walang salapi'y ayaw magmukhang pulubi
habang mumunting mumo't latak ay isinusubi

pinanday ng karanasan ang iwing kalooban
kaya nahaharap anumang pagsubok pa iyan
nalalakad kahit na kasukalan ng kawalan
nang makitang matatag sa harap ng kabiguan

kahit na iwing puso'y patuloy na nananangis
malunod man sa luha'y matikas pa rin ang bihis

- gregbituinjr.

Linggo, Hunyo 18, 2017

Balangis

kaytinding sandata ng mandirigma ang balangis
dalawang patpat na matigas na kapara'y arnis
pag si Sanggre Danaya ang gumamit anong bilis
pananggol laban sa mga kaaway na kaybangis

sintigas yaon ng kahoy na naga o kamagong
pag tinamaan ang ulo'y puputok, balagoong
maaaring pag-isahin pag ito'y pinagdugtong
mapapabagsak sa iglap sinumang dumaluhong

balangis ay ariing asawa o kaibigan
kakampi, kasama, sa pagtulog man o digmaan
hindi ka matitinag ng kalaban mong sukaban
kapag balangis ay kinasanayan mong tanganan

balangis ay sagisag ng mandirigma ng lahi
pag-ibig, katapatan, tagapagtanggol ng puri
uuwing luhaan sinumang makakatunggali
kung sa pagtangan ng balangis nagsasanay lagi

- gregbituinjr.

Biyernes, Hunyo 16, 2017

Tula sa unli-rice

UNLI-RICE

mula nang pangalanang Philippine rise ang Benham rise
saka napabalitang bawal na raw ang unli-rice

malalim ang dagat, puno ng biyodibersidad
masama raw sa kalusugan kung sa kanin mabundat

ngunit yung maypakana ng panukalang iyon
ay may alam bakit bukid ay naging subdibisyon

wala nang mabungkal, wala nang matamnan ng palay
tapos unli-rice pa'y ipagbabawal nilang tunay

hay buhay, tinamaan ba tayo ng mga lintik
masa'y tinatamaan di pa ba tayo iimik

lupa ng magsasaka na nga'y kinuhang tuluyan
pati ba naman sa unli-rice tayo'y babawalan

- gregbituinjr.

Huwebes, Hunyo 15, 2017

Tumbang Preso

TUMBANG PRESO

tinumba na nila bago pa maging preso
tinokbang na nila kahit walang proseso
wala nang magawa, sila na'y binabraso
tila manok ang pinaslang, ito ang uso

di na lata ang kanilang inaasinta
kundi ulo na ang kanilang pinuntirya
dati't tsinelas lang, ngayon ay pulos bala
dahil talagang salot daw pag durugista

kumakalam ang tiyan, bato'y dudurugin
durog na durog hanggang ito na'y singhutin
wala nang katinuan, ang isip na'y praning
mag-ingat baka gahasain ka't patayin

noong bata pa, tumbang preso'y laro lamang
sinasapul ang lata doon sa may bambang
ngayon, bago pa maging preso'y pinapaslang
para raw maging payapa ang bayang hirang

may proseso ang batas pag nagkasala ka
dapat kang managot, dapat ay may hustisya
sa piitan dapat matantong magbago na
mabuti nang maging preso kaysa itumba

- gregbituinjr.

Lunes, Hunyo 12, 2017

Hunyo 12, 1898 - Deklarasyon lang ng kalayaan?

araw ng kalayaan daw dahil bansa'y lumaya
mula sa pagsiil ng mananakop na Kastila
ngunit napailalim sa Amerikang kuhila
naging malaya na nga ba ang tinubuang lupa?

hindi, pagkat nagpalit lang ng bagong panginoon
mula Espanya'y naging Amerika naman iyon
bansa'y binili ng dolyar na dalawampung milyon
iyan ba, iyan ba, ang paglaya nilang nilayon?

nagpalit lang ng panginoon, naging malaya na?
tuwang-tuwa sila't tinanggap nila'y "demokrasya"
kaya marami pa rin ang totoong nakibaka
pagkat bagong poon ang namahala sa kanila

nagdeklara ng paglaya'y isang pangulong sutil
may alam sa Supremo't Heneral Luna'y pagkitil
tinamong “laya” ng bayan ay patuloy na sikil
na tila minana ng mga pulitikong taksil

araw lang iyon ng deklarasyon ng kalayaan
deklarasyon lang kahit di pa lumaya ang bayan
kaydilim pa rin ng kalagayan ng sambayanan
milyon pa rin ay dukha't walang pagkain sa pinggan

- gregbituinjr.
12 Hunyo 2017

Sabado, Hunyo 10, 2017

Panahon ng ligalig noon at ngayon

 noon, panahon ni Makoy, panahon ng ligalig
yurak ang karapatan, laksa'y nawalan ng tinig
lagim ng diktadura'y kayrami nang pinag-usig
maraming nangawala, pinaslang, laya'y nilupig

ngayon, panahon ng ligalig ay muling naulit
bagong namumuno'y diktador palang anong lupit
kayraming mahihirap ang pinaslang, iniligpit
ang bagong lider animo'y nawalan na ng bait

sa pagbabalik ngayon ng panibagong ligalig
ang sambayanan ay dapat muling magkapitbisig
upang tiranya'y labanan hanggang ito'y malupig;
sa prinsipyo, dangal at paglaya tayo sasandig

huwag tayong manghina, patuloy tayong lumaban
ang bayan nating ito'y iligtas sa kasawian

- gregbituinjr.

* ang tulang ito na may 15 pantig bawat taludtod, ay nilikha at binasa sa harap ng mga dumalo sa aktibidad ng People's Campaign Against Tyranny (PCAT) sa Bantayog ng mga Bayani, Hunyo 10, 2017
* maraming salamat sa PCAT sa pagbibigay ng pagkakataon upang makapag-alay ng tula sa nasabing aktibidad

Huwebes, Hunyo 8, 2017

Buwan, buwan, huwag mo silang hulugan ng sundang

buwan, buwan, huwag mo silang hulugan ng sundang
at baka gamitin nila iyon upang manokbang
nagkalat na ang mga dugo sa sabana't ilang
kayrami nang inulila ng patakarang hibang
laksa-laksa’y tinokbang, di na mahapayang gatang

buwan, buwan, huwag mo silang hulugan ng sundang
kung buhay ng tao'y di na nila iginagalang
dapat mag-ingat baka berdugo na'y nakaabang
sa mga nakikibaka para sa karapatang
pantao na dapat lamang nating ipagsanggalang

- gregbituinjr.

Lunes, Mayo 29, 2017

Maligayang kaarawan, O, Klasmeyt Fides

nais kong humabol ng taos na pagbati
maligayang kaarawan sa iyong muli
tulang alay nawa'y salubungin ng ngiti
at anumang pagod ay agad mapapawi

may unos man at walang mga alitaptap
sa panahong munti-munti man ang paglingap
nawa'y kamtin mo ang mga pinapangarap
at kaginhawahan nawa'y iyong malasap

tahak ko ma'y maputik na pampang o libis
bakong talampas o matarik mang dalisdis
diwata kang binabati kong anong tamis
maligayang kaarawan, o, klasmeyt Fides

- gregbituinjr.

Sabado, Mayo 20, 2017

Manggagawa, sino ka?

MANGGAGAWA, SINO KA?

manggagawa, kayo ang bumubuhay sa lipunan
mula noon hanggang ngayon, magpakailanpaman
kayo ang bumubuhay sa ekonomya ng bansa
ngunit bakit kayo pa ang mahirap at kawawa
sa inyong butil ng pawis kaya mundo'y umiral
laging kayod-kalabaw sa lipunan ng kapital
suriin ang sarili, kayo'y makapangyarihan
na kayang maglugmok sa katusuhan ng puhunan
bawat kayod, lipunan at pamilya'y binubuhay
sa inyong manggagawa, taas-kamaong pagpupugay

- gregbituinjr.
(nilikha at binasa sa aktibidad ng Bantayog Initiative sa TriMoNa, Lungsod Quezon, Mayo 20, 2017, ang pamagat ay mula sa tema ng aktibidad)

Sabado, Mayo 13, 2017

Nilulumpo ng sukaban

karapatan nga'y nilulumpo ng sukaban
nais pang ulo natin ay kanyang pugutan
sukab na walang paggalang sa karapatan
buhay ng dukha'y tila ipis kung turingan
yapak ba ni Hitler ang kanyang sinusundan

nuong bata ba'y wala sa kanyang gumiliw
kaya patayan sa kanya'y isa lang aliw
mga dukha'y pinapaslang na parang sisiw
pagkamuhi sa dukha'y ano't di magmaliw
o siya'y isinilang na talagang baliw

- gregbituinjr.

Sabado, Mayo 6, 2017

X.D.I.

X.D.I.

Ang pangarap na buhay nawa'y may magandang bunga
Para sa samahang patuloy na nagkakaisa
Adhikain ay parang SELDA ngunit walang selda
Habang patuloy na nagtutulungan bawat isa

Nagkaisa mga dating bilanggong pulitikal
Na magpatuloy mabuhay, may gawaing marangal
Lipunan ma'y pinangingibabawan ng kapital
Isang lipunang makatao yaong inuusal

X.D.I. - ang mga kasama'y nagtutulong-tulong
Upang buhay na nadapa'y tuluyang makabangon
Samahang tinayo'y patuloy na pinauusbong
Upang bawat kasapi'y patuloy yaong pagsulong

Isang taas-noo't taas-kamaong pagpupugay
Sa inyo, mga kasapi ng X.D.I., mabuhay!

- gregbituinjr.
- nilikha sa pulong ng X.D.I. (Ex-Political Detainees Initiative) sa tanggapan ng Balay habang katalamitam ang mga estudyante mula sa Unibersidad ng Pilipinas College of Social Work, Mayo 6, 2017

Huwebes, Mayo 4, 2017

Kayod-kalabaw na kontraktwal

naroong namimitig ang kanyang mga kalamnan
pawisan, kayod-kalabaw, sa trabaho'y puspusan
tulad ba niya'y makinang pinakikinabangan
kaybabang sahod, laksa ang tinubo ng puhunan
bakit matapos ang limang buwan, siya'y luhaan
ineendo't sa trabaho'y may bagong kapalitan
di maregular, trabaho'y walang kasiguruhan
bangungot nga bang maging kontraktwal sa pagawaan?
- tula't litrato ni gregbituinjr.

Martes, Abril 25, 2017

Nay Lilia Nacario, Lider-Maralita

NAY LILIA NACARIO, LIDER-MARALITA
(9 Nobyembre 1946 - 19 Abril 2017)

siya'y nanay-nanayan namin sa kilusan
lider-maralita, matatag at palaban
sa pakikibaka'y maraming karanasan
sa kanya'y kayrami naming napag-aralan

ipinaglaban ang makataong pabahay
naging tagapayo, dalita'y kaagapay
karapatan ng dukha'y pinaglabang tunay
sa maraming maralita'y nagsilbing nanay

ang Samahan ng Walang Tahanan - SAWATA
ay sadyang pinamunuan ng buong sigla
mabuting pinunong aming tinitingala
ipinaglaban ang kapakanan ng dukha

mabuhay ka, Nay Lilia, di ka malilimot
pagkat nakibaka ng walang pag-iimbot
maraming salamat, di mo ipinagdamot
sa kapwa dukha ang payo mo, saya't lungkot

mabuhay ka! mabuhay! Nay Lilia Nacario
sa iyong pamumuno kami'y taas-noo
sa puso'y taglay namin ang alaala mo
kami po'y nagpupugay ng taas-kamao

- gregbituinjr.
- nilikha at tinula sa luksang parangal sa bahay ng namayapang Nay Lilia Nacario sa SAWATA sa Lungsod ng Kalookan, Abril 25, 2017

Pinoy tayo

PINOY TAYO
ni Greg Bituin Jr.
11 pantig bawat taludtod

Pinoy tayo, may sariling kultura
mula sa ninuno'y ating minana
dumanas man ng sigwa't pagdurusa
Pinoy pag sama-sama, may pag-asa

subalit dapat maging positibo
yaong kaugaliang negatibo
di ningas-kugon kundi ningas-bao
ang plano'y tinatapos ng pulido

kinaugaliang mañana habit
ang katapat nito'y handa na habit
ginagawa ang kayang gawin ngayon
di bukas kung matatapos maghapon

ant mentality, di crab mentality
sama-sama tayong nagpupursigi
huwag maghihilahan ng pababa
kundi magtulong-tulong sa adhika

Pinoy ay di laging huli sa oras
kundi maaga sa maraming antas
mahirap na magsasaka'y kaysipag
nasa bukid na bago magliwanag

mga negatibong kaugalian
ay marapat lang na ating palitan
na kung atin lamang pagsisikapan
ay malaking tulong sa sambayanan

25 Abril 2017
nilikha sa aktibidad ng Bantayog Initiative sa TriMoNa, Lungsod Quezon

Lunes, Abril 24, 2017

Kay-ilap na pagsinta

may mga gabing tigib sa pagluha
uhaw sa pagsinta ng minumutya
biglang babalikwas, matutulala
kirot na dama'y di pa nawawala

sadyang kayhirap kapiling ang lumbay
tila buong katawan ko'y nangingimay
ngunit may kung anong nais lumuray
sa aking pagkataong nananamlay

ano't sa nangyari'y di makasulong
tila mangga'y nawalan ng bagoong
ang kuwago na ba'y nagmamarunong
kaya ako'y inahas ng ulupong?

nagwala ang kay-ilap na pagsinta
habang pisngi ng mutya'y pulang-pula

- gregbituinjr.

Linggo, Abril 23, 2017

Hampas ng alon

humahampas ang alon sa dalampasigan
tila humahaplos sa buo kong katawan
humahaginit sa balat yaong amihan
sa dulot sa puso't diwa'y kapayapaan

- gregbituinjr.

Miyerkules, Abril 19, 2017

Wala nang paglilitis sa bayan kong sawi

WALA NANG PAGLILITIS SA BAYAN KONG SAWI

wala nang paglilitis sa sawi kong bayan
bumubulagta na lang sinumang haragan

sa bayan kong sawi'y wala nang paglilitis
kawawa ang taong tinuring nilang ipis

wala nang paglilitis sa sawi kong bansa
basta na lang pinapaslang ang mga dukha

papayag pa ba tayong walang paglilitis?
sa ganyang sistema ba tayo'y magtitiis?

wala nang paglilitis sa bayan kong sawi
pagkat pinauso ng mga walang budhi

- tula’t litrato ni gregbituinjr.

Martes, Abril 18, 2017

Soneto para sa ikalimang taon ng NAGKAISA


SONETO PARA SA IKALIMANG TAON NG NAGKAISA

sa paggunita sa ikalimang anibersaryo
sa NAGKAISA'y nagpupugay ng taas-kamao
habang patuloy ang pagbaka sa kapitalismo
habang inaadhika ang lipunang makatao

kinakaharap man natin ang sangkaterbang hamon
tulad ng paninibasib ng kontraktwalisasyon
sistemang bulok sa dusa tayo ibinabaon
habang panawagan natin ay regularisasyon

patuloy tayong NAGKAISA sa diwa ng uri
at nilalabanan ang elitistang paghahari
at ang pagkakaisa natin nawa'y manatili
habang binabaka'y mga kapitalistang imbi

sa mga kasama, taas-kamaong pagpupugay
patuloy tayong magkaisa hanggang sa tagumpay

- gregbituinjr.

Lunes, Abril 17, 2017

Naroong nakaukit ang panawagang hustisya

naroong nakaukit ang panawagang hustisya
yaon ang nasa dibdib ng laksa-laksang pamilya
anong lupit ng sinapit ng mga mahal nila
na tinokbang ng mga walang budhing palamara

- tula’t litrato ni gregbituinjr.

Linggo, Abril 16, 2017

Nagnanaknak ang lagim sa bayan kong sawi

NAGNANAKNAK ANG LAGIM SA BAYAN KONG SAWI

nagnanaknak ang lagim sa bayan kong sawi
bayang nababalot ng hilakbot at hikbi
walang proseso'y nauso't danas ay hapdi
kaliluha'y sa bayan pa rin naghahari

gobyerno'y kayraming sa dugo pinalutang
walang kara-karapatan, handang pumaslang
nasakbibi ng dusa ang lupang hinirang
kayrami nang nasawi pag iyong binilang

nais nilang tumahimik ang pamayanan?
oo, nakabibingi ang katahimikan
habang di naman dama ang kapayapaan
tahimik nga, ngunit di payapa ang bayan

di natin nais sa bayang ito'y ligalig
di ganitong pulos patayan, panlulupig
nais natin ng isang payapang daigdig
may pagkakapantay at puno ng pag-ibig

huwag hayaang karapatan ay yurakan
huwag hayaan ang kulturang kamatayan
singilin ang maysala, tokhang ay wakasan
ang buhay ng tao'y dapat pahalagahan

- gregbituinjr.

* nilikha at binasa sa aktibidad na tinaguriang "Biag Buhay Ikabuhi: Valuing Life, Denouncing Killing" na ginanap sa Tondo, Maynila, Abril 16, 2017, Linggo ng Pagkabuhay (Easter Sunday)

Sabado, Abril 15, 2017

Salik ng kilos-protesta



SALIK NG KILOS-PROTESTA
(20 ang nasa talaan ng inyong lingkod, maaari n’yo pong dagdagan)
ni Greg Bituin Jr.
7 pantig bawat taludtod

plakard

tangan ng raliyista
yaong plakard na pula
puti naman ang tinta
ng hinaing ng masa

polyeto

ipinaliliwanag
ang kalagayang hungkag
kayrami nang paglabag
bakit dapat pumalag

bandera

samahang kaagapay
makikilalang tunay
sa banderang tinaglay
at iwinawagayway

istrimer

tangan nila sa harap
nang maunawang ganap
ang hinaing at saklap
ng bayang naghihirap

balatengga

sa itaas isabit
ang islogang may galit
nang madama ang lupit
ng kalagayang gipit

megaphone

dinig kahit malayo
ang daing at siphayo
nabubulgar ang baho
ng gobyernong palalo

pulang baro

animo'y pulang hukbo
pag nakapulang baro
at iyong matatanto
hukbo'y di biro-biro

kamaong kuyom

ang kamaong may poot
kuyom, di madalirot
tila nais idulot
ay manapak ng salot

tiim-bagang

tibak na mapagtimpi
ay nanggagalaiti
wala mang sinasabi
loob nito'y kaytindi

islogan

prinsipyo'y hinihiyaw
sa isyung nakapataw
ang gobyerno'y kaylabnaw
pag dayo ang kaagaw

samutsaring isyu

ilang isyu sa rali
kaytaas ng kuryente
tubig at pamasahe
gobyerno ba'y may silbi

talumpati

mainit, nag-aapoy
sa isyu nilang tukoy
prinsipyo'y di maluoy
sa paglaban patuloy

kapitbisig

obrero'y kapitbisig
laban sa mapanlupig
sa nagkaisang tinig
sila'y di padadaig

kolektibo

bawat isa'y iisa
di nagkakanya-kanya
kolektibong magpasya
lalo't isyu'y sistema

protesta

nais nila'y hustisya
sa nangyari sa masa
kaya nagsama-sama
sa isyung bitbit nila

organisado

nagkaisa sa isyu
na patampuking husto
makita ng gobyerno
isa silang totoo

taumbayan

taumbayang may lakas
kikilos, paparehas
pangarap maging patas
ang lipunang marahas

manggagawa

hukbong mapagpalaya
ang uring manggagawa
tangan nila ang diwa
ng lipunang adhika

tunggalian ng uri

mayaman at mahirap
may tunggaliang ganap
maging dukha'y masaklap
ginhawa'y di malasap

prinsipyado

alam ang karapatan
na dapat ipaglaban
prinsipyo nilang tangan
baguhin ang lipunan

Polyeto

POLYETO

nakasalaysay ang lupang tigang
sa polyeto nilang tangan
sinong asendero't nananahan
ang dahilan ng alitan

kwento ng laban ng manggagawa
nais nilang maregular
sa trabaho'y wala bang mapala
kundi ang maging kontraktwal?

sa eskwela'y mahal ng bayarin
nagmahal ang matrikula
edukasyon ba'y negosyo na rin
di na serbisyo sa masa

karapatan ng kababaihan
ay dapat iginagalang
mga kalaswaan ay iwasan
upang di maakusahan

vendor ay ayaw nang pagtindahin
parang sila'y gugutumin
paano nang pamilya'y kakain
kung pambenta'y lugi na rin

sa polyeto'y pinaliliwanag
mga samutsaring isyu
paninindigan ay inilatag
sa diwa't puso'y tumimo

kaylaki ng tulong ng polyeto
upang mamulat ang masa
sa pananaw nila't mga kwento
kung bakit nakikibaka

kayraming polyetong pinagawa
na di dapat nakatengga
di iyon dapat mauwi na lang
na pambalot ng tinapa

- gregbituinjr.

Biyernes, Abril 14, 2017

Adik at Kapitalismo: Huwag Tularan

ADIK AT KAPITALISMO: HUWAG TULARAN

siyang tunay, adik ay huwag tutularan
pagkat sakit nila'y kasumpa-sumpa naman
silang naging biktima nitong kahirapan
kapit sa patalim nang gutom ay maibsan

pinaglaruan sila ng kapitalismo
kagutuman nila'y nagsilbi sa negosyo
pamilya'y kakain pag nabenta ang gramo
may panggatas si Bunso kahit delikado

kailan matitigil ang sistemang bulok
na sa tiyan at pagkatao'y umuuk-ok
negosyo'y tuwang-tuwa kahit maging hayok
ang pamayanan basta't sila'y nasa tuktok

kapitalista ng droga'y dapat puksain
salot na negosyong ito'y dapat pigilin
habang rehabilitasyo'y puspusang gawin
pagkat adiksyon ay sadyang dapat gamutin

habang may kapitalismo, maraming dukha
ang pagkakapantay-pantay ay balewala
dapat magkaisa ang uring manggagawa
at pamunuan ang lipunang itinakda

halina't tuldukan na ang kapitalismo
puksain ang kabulukang dinulot nito
upang karapatang pantao'y irespeto
at maitayo ang lipunang makatao

- gregbituinjr.

Biyernes Santo

Biyernes Santo

animo'y nakadipa sa krus sa tabi ng daan
nakagapos, nakapiring, tandang pinahirapan
nasa lungsod ngunit animo'y nasa talahiban
habang panglaw na paligid ay agad kinordonan

Biyernes Santong puno ng luha'y di matingkala
ang bayan ba'y mistula nang walang namamahala?
walang proseso'y umiral nang walang patumangga
alang-alang daw sa bansang nais maging payapa

ngunit alalaong baga sa puso'y tumitining
ang kultura ng hilakbot, bayan ba'y nahihimbing?
namumuno'y sa kawalang proseso nahumaling
namutla ang dugo ng bayang ayaw pang magising

magtitiim-bagang na lang ba sa Biyernes Santo
habang namamayagpag na ang kawalang proseso?
walang budhi ang manonokbang na asal-barbaro
at ngingisi-ngisi lang ang maiitim ang buto

- gregbituinjr.

Huwebes, Abril 13, 2017

Dear Kupido

Dear Kupido,

nahan na ang pagsintang iyong ipinagyayabang?
wala na bang pag-ibig at kayraming pinapaslang?
bakit maraming katawang sa dugo lumulutang?
pinaslang na gayong walang proseso ang paratang

ang pana mo ba'y para lang sa binata't dalaga?
di pangkalahatan kaya bayan ay di kasama?
pana mo ba'y tumatalab pa sa puso ng masa?
o nawalan na ng bisa ang panang may gayuma?

pairalin ang pag-ibig kung tunay ka, Kupido
panain ang manonokhang nang matauhan ito
na dapat ang sugapa'y dinadaan sa proseso
at kung kailangan, ipagamot silang totoo

O, Kupido, ipakitang mayroon pang pag-ibig
sa mundong itong karahasan na ang nananaig

- gregbituinjr.

#notoextrajudicialkillings
#stopthekillings

Replika

REPLIKA

makatindig balahibo, puso'y dinadalirot
sa paligid ay tila lagim yaong bumabalot
gayong replika lang ang bangkay, nakapanlalambot
palibot ay kandila sa programang anong lungkot

replika lamang iyon ng tinortyur at pinaslang
nakagapos, nakapiring, sa dugo'y lumulutang
kawalang proseso'y pinauso na ba ng hunghang?
kaluluwa't puso ba ng nasa poder ay halang?

itinuturing na maysakit ang mga sugapa
kaya may rehabilitasyong dapat isagawa
ngunit bakit maysakit ay gayon lang kung mapuksa
gayong di iyon ketong o krimeng kasumpa-sumpa

replika lamang, ngunit simbolo ng inhustisya
hindi mga bato ang naiwan nilang pamilya
lumuluha, nasasaktan, tagos sa kaluluwa
pagkat mahal nila'y pinaslang na lang basta-basta

- tula't litrato ni gregbituinjr.
(kuha sa programang "Kalbaryo ng Kawalang Katarungan" na pinangunahan ng iba't ibang human rights group, Abril 12, 2017)

Miyerkules, Abril 12, 2017

Pagtatagpo ng pamilya ng nangawala't biktima ng pamamaslang

nagtagpo yaong pamilya ng mga iwinala
at biktima ng mga walang prosesong pagpaslang
nagpalitan ng kwento sa isang munting programa
bakit batayang karapatan ay di na ginalang

sa bansang puno ng dusa sari-sari'y naganap
kapwa sariwang sugat ang sa puso'y maaapuhap
ang isa'y walang bangkay, hanggang ngayon naghahanap
ang isa'y may bangkay, hustisya ang hinahagilap

dama ng bayang nakabibingi ang katahimikan
habang di pa rin maramdaman ang kapayapaan
inaalagata ang sugat sa puso't isipan
ang kawalang katarungan ba'y mayroong hangganan

- gregbituinjr.

http://www.gmanetwork.com/news/story/606900/news/nation/kin-of-martial-law-abuse-ejk-victims-come-together-for-holy-week-remembrance

Tula sa sapilitang iwinala

sapilitang iwinala, dinukot
hustisyang asam, saan pumalaot
mababaon lang ba sila sa limot
sa nangyari'y sinong dapat managot

sinupil ang kanilang mga tinig
panahon iyon ng laksang ligalig
mga karapatan nila'y nilupig
sa nangyari'y sinong dapat mausig

karapatan nila'y winalanghiya
ilang bagyo'y nagdaan na sa bansa
ngunit kahit anino nila'y wala
ang nangyari'y sadyang kasumpa-sumpa

katarungan ba'y saan mahahango
nang di na matuliro yaring puso
nangyari'y sa puso nagpapadugo
sa paghahanap, di pa rin susuko

- gregbituinjr.
(binasa sa programang "Kalbaryo ng Kawalang Katarungan" na pinangunahan ng iba't ibang human rights group, Abril 12, 2017)

Martes, Abril 11, 2017

Sa pula pinalulutang

SA PULA PINALULUTANG

sa pula pinalulutang
ng may mga pusong halang
ang puntiryang natatambang
sila na ba'y nahihibang

para nga ba sa hustisya
o dahil lamang sa pera
buhay nga ba'y barya-barya
puso ba nila'y masaya

isipan ay nasa bangin
at lumulutang sa hangin
paraiso'y nais hingin
ngunit siya ba'y diringgin

tokbang ay tigilan na ninyo
kung wala namang proseso

- gregbituinjr.

Sa panahon ng tokbang

SA PANAHON NG TOKBANG

natakot ang mga kriminal
natuwa naman ang kapital
gayong kapwa sila pusakal
at pareho ng inaasal

sa kapwa'y walang pakialam
sa dukha'y walang pakiramdam
para sa pera'y nang-uuyam
sariling galing lang ang asam

ang nais ng negosyo'y tubo
asam ng kriminal ay luho
ugali nila'y kapwa mabaho
mga sakim na dapat maglaho

sila'y dapat lang pawiin
sa lipunang dapat baguhin

- gregbituinjr.

Walang proseso'y nauso

WALANG PROSESO'Y NAUSO

pag buhay na ang inutang
sa nangyaring panonokbang
ito ba'y marapat lamang
gantihan ang mga halang

walang katapusang gulo
bungo ang kapalit-ulo
sugapang wala nang modo
patay kahit magsumamo

sa dilim napapitlag
di na sila makapalag
may gapos, di makatinag
hayagan iyong paglabag

walang proseso'y nauso
dahil sa iyong pangulo

- gregbituinjr.

Lunes, Abril 10, 2017

FDC - Pasyon 2017

FDC - Pasyon 2017
ni Gregorio V. Bituin Jr.
8 pantig bawat taludtod

Freedom from Debt Coalition
taas-noong bumabangon
upang bayan ay iahon
sa inhustisya’t korupsyon
na sa bayan lumalamon

tumaas ang pamasahe
pati presyo ng kuryente
tubig, pagkain, tuition fee
ganid ay ngingisi-ngisi
gobyerno ba'y nagsisilbi

nagmahal na pati tubig
kaya madla'y may ligalig
gulo man ang puso’t bisig
lalaban, di palulupig
nang hinaing ay madinig

utang na ilehitimo
kanselahin nang totoo
pasaning kaybigat nito
lalo’t di ito serbisyo
para sa bayan at tao

makatarungang pagbuwis
ay dapat gawing mabilis
nang obrero’y di mahapis
masa'y di dapat magtiis
sa pamumuno ng burgis

kapitalista'y nagumon
na sa kontraktwalisasyon
di makataong kondisyon
obrero na'y nilalamon
sa kahirapan nabaon

mga obrerong kontaktwal
ay dapat maging regular
binuhay nila'y kapital
kontraktwalisasyong hangal
ay di na dapat magtagal

buhay ng dukha’y bantulot
biling kanin, isang balot
ulam lang ay tuyong hawot
kaya hilo't umiikot
ang paningin, may hilakbot

diktador na di bayani
na sa masa'y naging imbi
ay naging santong bayani
sa panahon ni Duterte
ito’y di nakabubuti

"kill! kill! kill!” anang pangulo
bukambibig: "I will kill you!"
wala nang due process of law
patay doon, patay dito
buhay na’y di nirespeto

ang pangulo'y pumapatay
wala bang paki sa buhay?
laksa-laksa na’y binistay
libu-libo na ang nahimlay
kayraming lumuhang inay

namunong trapo’y kuhila
ninenegosyo ang bansa
nagsamantala sa dukha
manggagawa'y kinawawa
pagkakapantay pa'y wala

binaboy ang karapatan
binago ang kasaysayan
ngunit di dapat payagan
na mismong dangal ng bayan
ay unti-unting yurakan

tama na ang kahirapan
sobra na ang karukhaan
na aming nararanasan
panahon nang mapalitan
ang sistema ng lipunan

lipunang hati sa uri
di na dapat mamalagi
wakasan nating masidhi
ang pribadong pag-aari’t
elitistang paghahari

kapitalismo'y sumira
sa buhay ng mga dukha
kayraming gutom, kawawa
sistema'y dapat magiba
sapagkat kasumpa-sumpa

hustisyang pang-ekonomya
ay dapat kamtin ng masa
ito'y makakamit lang ba
pag nabago ang sistema?
kung lahat, kumakain na?

wakasan ang kahirapan
wakasan ang karahasan
karapatan, ipaglaban
nawa'y makamit ng bayan
ang pangarap na lipunan

Biyernes, Abril 7, 2017

May ligalig man sa bisig

maingat ang mga pintig
may ligalig man sa bisig
lalaban, di palulupig
nang hinaing ay madinig

nagsidalaw sa palasyo
ang laksa-laksang obrero
kuyom ang mga kamao
may parating bang delubyo?


Rehimeng sa kapitalista'y kaylambot

matigas ang kamaong may apoy ng poot
namumuo ang himagsik laban sa salot
na kontraktwalisasyong di kayang masagot
ng rehimeng sa kapitalista'y kaylambot

Kontraktwalisasyon ay sugat na kaylalim

tiim-bagang laban sa paglukob ng dilim
umaalimpuyo ang galit sa rehimen
kontraktwalisasyon ay sugat na kaylalim
nangakong magtanggal nito pala'y balimbing

Martes, Abril 4, 2017

Ako'y internasyunalista, hindi makabayan

ako'y internasyunalista, hindi makabayan
pagkat wala namang pagkabansa ang kahirapan
ang usapin dito'y uri, hindi lahi ninuman
pagkat uri ang dahilan ng mga tunggalian

"ang hustisya'y para lang sa mayaman', anang awit
ang katotohanang ito'y sadyang napakalupit
karapatan ba'y sa bundat lang, di sa nagigipit
kaya patuloy ang pag-algahi sa maliliit

lahat ng api, anumang bansang pinanggalingan
ay dapat magturingang magkapatid sa lipunan
dapat silang magkapitbisig laban sa puhunan
laban sa salot na sistemang para sa iilan

maging internasyunalista'y di lamang pangarap
kundi layuning sa puso't diwa'y katanggap-tanggap
maging makatao'y gawin gaano man kahirap
lipunang makatao'y ipaglabang maging ganap

- gregbituinjr.

Linggo, Abril 2, 2017

Payapang protesta sa kalsada

nakaupo lamang ako sa gilid ng kalsada
nakatalungko habang pinagmamasdan ang masa
subalit sa puso'y paraan iyon ng protesta
lalo't marami kaming ganitong nagsama-sama

tangan ang munting plakard ay payapa ang pagkilos
pinakikitang di tayo dapat binubusabos
ng sistemang sa pagkatao'y pilit gumagapos
habang nasa isip paano makahuhulagpos

may karapatan ang bawat isa, may karapatan
lalo't buhay at dangal ay di dapat mayurakan
ito'y dama kong gumuhit sa noo't kalooban
na sa dibdib animo'y inuukit ang kawalan

palataltas at pelikula na'y nakamamanhid
nang sa kabila ng mga pagdurusa't balakid
huwag pansinin ang nangyari sa mga kapatid
at upang di mag-aklas ang obrero't magbubukid

lasing ang pangil ng mga buryong at talipandas
dapat pakaiwasan ang mga bulong ng hudas
ang inuuod na sistema'y dapat nang maagnas
upang maitayo natin ang panibagong bukas

- gregbituinjr.

Karapatan mong maghimagsik laban sa sistema

karapatan mong maghimagsik laban sa sistema
lalo't inuulaol ka na ng uring burgesya
itinuturing kang mababang uri lang ng masa
gayong tao kang kapantay ng karapatan nila

pribadong pag-aari'y kanilang kapangyarihan
pases nila upang kapwa'y mapagsamantalahan
tingin sa iba'y mga mababang uring nilalang
kaya sa dukha't manggagawa'y laging nanlalamang

wasto lang mag-alsa ang mga inaaping uri
nang lumaya sila laban sa uring naghahari
dapat paghimagsikan ang pribadong pag-aari
wasakin ito't ibagsak ang trapo, hari't pari

kabulukan ng sistema'y dapat nating maarok
dahil pagsasamantala nila'y abot sa tuktok
halina't maghimagsik laban sa sistemang bulok
na sa pagkatao't dangal ng kapwa'y umuuk-ok

- gregbituinjr.

Biyernes, Marso 31, 2017

Tula: Break Free from Fossil Fuel

nalulunod na sa plastik ang karagatan
nangingitim na sa usok ang kalangitan
tinadtad na ng kemikal ang kailugan
daigdig natin ay nagtila basurahan

mga lungsod ay punumpuno ng polusyon
mga plantang coal ay nagsusunog ng karbon
dapat sama-sama nating tapusin ngayon
ang pagsira sa kalikasan at sa nasyon

ating labanan ang sinumang mga sutil
na matakaw sa paggamit ng fossil fuel
huwag maging demonyo kundi maging anghel
kaya ating sigaw: Break Free from Fossil Fuel!

nais natin: R.E., renewable energy
let's make this beautiful country fossil fuel free!

- gregbituinjr.

* kumatawan sa Philippine Movement for Climate Justice (PMCJ) at nagbasa ng tula sa Break Free 2017, Renewable Energy Fair and Concert sa Liwasang Aurora, Quezon Memorial Circle, Marso 31, 2017, araw ng Biyernes

Martes, Marso 21, 2017

Itinuring man akong baliw na makata

itinuring man akong baliw na makata
tirahin man ako ng matabil mong dila
harangan man ako ng rumagasang baha
ang pluma’t diwa ko'y di mo mapahuhupa

di man ako nabubuhay sa toreng garing
dukha man ang kausap at laging kapiling
naririto't patuloy sa piniling sining
kahit na wala man lang akong maisaing

baliw mang makata'y patuloy na titindig
di ako susuko sa mga manlulupig
taludtod at saknong ang sandata ko't kabig
nasa lungga ma'y patuloy na umiibig

kaliwa'y taas-kamao, sa kanan, pluma
tutula't tutula alang-alang sa masa

- gregbituinjr.

21 Marso 2017 (World Poetry Day)

* pasneya - sa salita ng mga sanggre ay hayop

Pagpupugay sa mga makata

HAPPY WORLD POETRY DAY 2017

PAGPUPUGAY SA MGA MAKATA
ni Gregorio V. Bituin Jr.
15 pantig bawa taludtod

habang kaysaya ng mga ibong nagliliparan
at nanginginain ang kalabaw sa araruhan
taos kong pagbati sa mga makata ng bayan
sa ngayong Pandaigdigang Araw ng Panulaan

isang tagay sa lahat ng makata sa daigdig
mga tula nyo'y di ko man nabasa o narinig
marahil taludtod nyo'y punumpuno ng pag-ibig
o mga saknong sa laman ko'y makapanginginig

di lahat ng tula'y hulog mula sa toreng garing
pagkat may mga tulang mula sa masa nanggaling
inilalarawan ang kulay ng trapo't balimbing
o sa manggagawa'y nananawagang magsigising

ngayong World Poetry Day, taos-pusong pagpupugay
habang sa aking lungga'y patuloy na nagninilay

21 Marso 2017

Lunes, Marso 20, 2017

Ang DOLEng sukaban

Ang DOLEng sukaban

sagad na sa buto't gulugod nitong manggagawa
ang laging panggagago sa kanila ng kuhila
nilegalisa na ng DOLEng taksil sa paggawa
ang kontraktwalisasyong tunay na kasumpa-sumpa

sadyang sukaban ang DOLEng makakapitalista
nakatanghod na'y nakaluhod pa sa tubo nila
di ba sila naduduling sa pagkapalamara
at sa obrerong kontraktwal ay ngingisi-ngisi pa

ang department order ay naging demolition order
ang karapatang maging regular ay minamarder
sa kapitalista, DOLE'y tutang sumusurender
at uring manggagawa'y patuloy na inaander

manggagawa, papayag pa ba kayong magpaloko
sa mga nagsasamantala sa  uring obrero
halina't sama-sama nating tanganan ang maso
at ihataw sa ulo ng mga ganid at gago!

- tula't litrato ni gregbituinjr.


Biyernes, Marso 17, 2017

Ilang Haiku sa Marso 17

Ilang Haiku sa Marso 17
(International Haiku Day)
ni Gregorio V. Bituin Jr.

I
Tayo'y bumangon
Pandaigdigang Araw
ng Haiku ngayon

2
Tayo'y mag-haiku
sa ikalabimpitong
araw ng Marso

3
Haynaku Haiku
habang tinatagay ay
katas ng buko

4
Haynaku bukol
sinong dapat humatol
sa mga ulol

5
Animo'y sigwa
ang uring manggagawa
pag sumagupa

6
Makatang taring
di man siya nanggaling
sa toreng garing

7
Tuloy ang tula
huwag lang matulala
sa minumutya

Huwebes, Marso 16, 2017

Pag tulog na silang lahat

PAG TULOG NA SILANG LAHAT

pag tulog na silang lahat saka ko titipain
ang marubdob kong kinatha't maanghang na sulatin
ang makinilyang gamit nila'y aking gagamitin
habang mga akda'y doon ko na dadalisayin

dahil ang mga kinatha sa kapirasong papel
ay dugo't pawis ng mandirigmang di papipigil
may tulang alay sa isang napakagandang anghel
habang sa langit nakatunganga't napapatigil

may mamumuhunang nagkakamot lamang ng tiyan
ngunit patuloy na tumutubo't nagsisiyaman
may masisipag na manggagawang tadtad ng utang
kayliit ng sahod, ngunit sa trabaho'y pawisan

maya-maya'y titipain na ang mga sinulat
pagkat madaling araw na't tulog na silang lahat
habang talukap ng mata'y di na makamulagat
habang ugat sa daliri animo'y nawawarat

- gregbituinjr.

Miyerkules, Marso 15, 2017

Nakikipagtitigan ako

NAKIKIPAGTITIGAN AKO

nakikipagtitigan ako sa mata ng bagyo
baka lumitaw doon ang diwatang inirog ko
bahaghari'y may ginto raw na lilitaw sa dulo
at ang ilang dukha'y nagsisikap makuha ito

nakikipagtitigan ako sa mata ng apoy
nang matisod ako't biglang lumubog sa kumunoy
wala nang paruparo't bubuyog, ako'y nanaghoy
pagkat rosas sa hardin ay unti-unting naluoy

nakikipagtitigan ako sa mata ng leyon
nang tinig ni Floranteng nakagapos ay matunton
ng Persyanong Aladin, inaalala'y kahapon
at ang magandang mutyang si Laura'y dumatal doon

nakikipagtitigan ako ng mata sa mata
sa magandang mutyang panagimpan ko't sinisinta
nais kong siilin ng halik ang sintang dalaga
nang sa kalauna'y iharap siya sa dambana

- gregbituinjr.

Martes, Marso 14, 2017

Nakikibaka rin ang mga langgam

NAKIKIBAKA RIN ANG MGA LANGGAM

tulad ng isang uri'y magkakasama ang langgam
tuloy ang trabaho sa dinapuan nilang parang
kolektibong nakatuon sa isang layon lamang
magtulong na pagkain ay dalhin sa kamaligan

sa ginagawa'y huwag mo silang aabalahin
dahil kapag naghiganti'y tiyak kang kakagatin
sa pakikibaka'y kolektibong kumikilos din
ngunit ang katakutan mo, kung ikaw na'y langgamin

nakikibaka ang langgam tulad ng manggagawa
ngunit obrero'y di pa nagkakaisa sa diwa
hiwa-hiwalay kahit uri nila'y iisa nga
kung kolektibong kikilos, kapara nila'y sigwa

milyun-milyong kolektibong manggagawa'y babago
sa mundong pinagpasasaan ng kapitalismo
ngunit sila pa'y dapat pagkaisahing totoo
upang sistemang bulok ay ibagsak nilang todo

- gregbituinjr.

Lunes, Marso 13, 2017

Ang magtanim daw ng hangin

ANG MAGTANIM DAW NG HANGIN

paalala ko, amang, huwag magtanim ng hangin
ayon nga sa matatanda'y bagyo ang aanihin
kung pawang yabang ang sa ulo mo'y payayabungin
wala kang madadagit na matinong adhikain

magpakumbaba ka tulad ng alon sa aplaya
sa payapang laot naroon ang mga balyena
pag buwan ay nawala, kinain ng bakunawa
at ang buntot ng pagi'y huwag mong mahila-hila

anong sarap din ng lasa ng bunga ng kalumpit
kaytamis ng hinog bagamat may ilang kaypait
laging makipagkapwa-tao't huwag magmalupit
kung yumaman ka, sa dalita'y huwag manlalait

matamang suriin bakit nagbabago ang klima
at anong kaugnayan ng naglalakihang planta
bansa'y dinanas na ang poot ng isang Yolanda
magtanim ng hangin ay walang salang di na kaya

- gregbituinjr.

Linggo, Marso 12, 2017

Kumukulo ang kulog sa pusod ng bahaghari

kumukulo ang kulog sa pusod ng bahaghari
hirap at dusa'y nakabalatay sa masang sawi
sawimpalad na di matuloy ng mga daliri
di batid kung kanino ang nakagapos na labi
pinuti'y laksa-laksang buhay sa atas ng hari

sino nang mananagot sa mga batang nadamay
wala pang nakulong sa di-sinasadyang pagpatay
pagkat collateral damage lang daw kahit nabistay
tuwang-tuwa raw ang masa't nawala silang tunay
tulad ng hari nilang sa pagpaslang naglalaway

walang paggalang sa buhay, binaboy ang hustisya
kagagawan nila'y higit pa sa mata sa mata
dahil mga utak nang lugmok ang pinupuntirya
imbes na pagamutan ay dala sa punerarya
tila tumitigpas lang ng manok na pantinola

sa mga tulad ba nila'y bugok ang katarungan
pagpapakatao'y wala't asal na'y nahuhubdan
umaalingasaw ang baha sa kaibuturan
kaya tigang na lupa'y ginawa nilang duguan
ang nabubo na'y mapupulang sabaw sa lansangan

- gregbituinjr.