ni Gregorio V. Bituin Jr.
10 pantig bawat taludtod
kanina, huli ko nang ginamit
ang dalang kalawanging pang-ahit
iyon kasi ang aking nabitbit
ang pagbili ng bago'y nawaglit
sa palagay ko'y isang taon din
na ito'y nanilbihan sa akin
subalit ito na'y kalawangin
at sa basurahan na ilibing
inahit ko ang bigote't balbas
hindi upang magmukhang matikas
kundi ang mukha'y umaliwalas
maging kaaya-aya ang bukas
marahan, at baka masugatan
tetano na ang katapat niyan
unang gagawin kinabukasan
bibili ng bago sa tindahan
Walang komento:
Mag-post ng isang Komento