Martes, Agosto 18, 2015

Nahan ang paglaya't liwanag

NAHAN ANG PAGLAYA'T LIWANAG
ni Gregorio V. Bituin Jr.
9 pantig bawat taludtod

dama ko sa paglalagalag
tila buhay sa mundo'y hungkag
hinahanap ko ang liwanag
subalit di ko maaninag

paglaya'y di ko maapuhap
saan ito mahahagilap
tila ba nasa alapaap
at lihis ang lumalaganap

nasa labas nga'y nakapiit
pagkat puso'y puno ng galit
sa sistemang mapagmaliit
at walang pagmamalasakit

lipunang tila isinumpa
ay bayan ang kinakawawa
tao ba'y paano lalaya
sa lumukob na dusa't luha