Miyerkules, Hulyo 1, 2015

Aksaya sa pagkain ang mumo

AKSAYA SA PAGKAIN ANG MUMO
ni Gregorio V. Bituin Jr.
13 pantig bawat taludtod

pulutin mo ang mumong nangalaglag riyan
sayang ang mga ito't laman din ng tiyan
magsasaka'y magagalit kapag nalaman
kapag ang kanin ay inaaksayang tuluyan
pagkat mula sa palay na pinaghirapan

bawat butil ay mahalaga, at ang mumo
ay kaning hinayaang umilalim sa plato
o malaglag sa lamesang kinainan mo
gayong mula sa binhi'y lumagong totoo
naging palay, inani, naging bigas ito

hanggang ito'y inyong lutuin, naging kanin
isusubo sa bibig, pag-ingatan mo rin
baka malaglag sa lupa, huwag sayangin
ang maaaksayang mumo'y sino ang kakain
bahala na ang langgam,iyong sasabihin

tandaan mong bawat butil ay mahalaga
kahit isa'y di dapat iitsa-puwera
alalahanin ang pagod ng magsasaka
pagbubungkal, nag-araro'y ginawa niya
palay, bigas, kanin, pahalagahan sila