Sabado, Pebrero 21, 2015

Ang Dilag

ANG DILAG
ni Gregorio V. Bituin Jr.
10 pantig bawat taludtod

lagi ko na siyang nakikita
ngunit di kami magkakilala
labis ang paghanga ko sa kanya
sa puso'y itinitibok siya

rosas siyang kaysarap diligin
bango niya'y kaysarap simsimin
paano ko kaya maaangkin
ang dilag na kaysarap mahalin

siya'y hanap ko't pinapangarap
kaya ako'y laging nagsisikap
ngunit bakit pagsinta'y kay-ilap
pagdiga sa kanya'y anong hirap

dahil ba siya'y isa nang ginang
na di na iibig kaninuman
maliban sa bana niyang hirang?
oo, akong ito'y naunahan