Sabado, Pebrero 7, 2015

Ganito ko nais malagutan ng buhay

GANITO KO NAIS MALAGUTAN NG BUHAY
ni Gregorio V. Bituin Jr.
13 pantig bawat taludtod

ganito ko nais malagutan ng buhay
buong pagkatao'y ginagalang na tunay
makatang marangal at sa dangal namatay
puso't diwa'y payapa sa aking paghimlay

kung sakaling hininga ko'y agad malagot
sa harap ng digma't kayraming mga gusot
ay propagandista pa ring kayang masagot
ang anumang suliraning prinsipyo'y sangkot

patuloy pa rin sa kabila ng libingan
sa pagpopropagandang mataman sa bayan
maraming maghahangad sa akdang naiwan
upang kumilos ding baguhin ang lipunan