PAGSUYO HANGGANG LANGIT
ni Gregorio V. Bituin Jr.
13 pantig bawat taludtod
sinuyo ng araw ang bituing kayrikit
O, kaysaya ng paghaharana sa langit
namamaga ang mata'y di pa pumipikit
dinarama pa rin ang suyuang malagkit
kaytamis ng mga binitiwang kataga
nais pagkaisahin ang dalawang laya
nasa kaibuturan ang isinusumpa
pati bagting ng gitara'y dinig sa tuwa
lalamon ng gabok ang sinumang karibal
sa pagsusuyuang sintamis ng asukal
sinusuyo'y iniaangat sa pedestal
ng kaliwanagang sa karimlan dumatal
O, kaysarap pag dalawang puso'y nagniig
kumbaga sa gantimpala'y siksik at liglig
di man madalumat ng diwang natutulig
tanging nakaunawa'y pusong umiibig
Walang komento:
Mag-post ng isang Komento