PAGBAYARAN ANG SINIRA SA KALIKASAN
ni Gregorio V. Bituin Jr.
10 pantig bawat taludtod
ang sinira mo sa kalikasan
ay dapat mo lamang pagbayaran
kayrami nang namatay sa unos
kayrami nang buhay ang naubos
dahil ang mundo'y binalewala
hanggang tayo'y daanan ng sigwa
dapat magmulta rito ang tao
lalo na't malalaking gobyerno
sinira nila'y bayarang todo
magmulta sa ayaw o sa gusto
ano ang nais: multa o multo
kayraming nangawala sa bagyo
huwag lang tayong basta tatanghod
kundi dapat nating itaguyod
ang pangangalaga ng tuluyan
sa binalewalang kalikasan
upang susunod na salinlahi
ay makitang mundo'y di duhagi
dapat nang magkatulungan tayo
nang ipamana'y magandang mundo
Walang komento:
Mag-post ng isang Komento