Martes, Setyembre 2, 2014

Sa ika-25 anibersaryo ng IID

SA IKA-25 ANIBERSARYO NG I.I.D.
ni Gregorio V. Bituin Jr.
11 pantig bawat taludtod

sa inyo po'y maalab kong pagbati
hanga ako sa mabuti nyong mithi
na magkasundo ang maraming lahi
upang sila'y magbigayan ng ngiti

noon, ako'y sinama nyo sa Baguio
sa karabana hanggang Cotabato
Duyog Mindanao ang gawaing ito
adhika'y kapayapaang totoo

kasama sa Free Burma Coalition
malayang bansa ang magandang layon
walang diktadura ang ating hamon
ito'y nagkakaisa nating tugon

ako'y inyong pinadala sa Mae Sot
mga nakita'y sa puso kumurot
kayraming tanong na dapat masagot
kayraming aral na doon napulot

makikita sa IID ang diwa
at adhikaing tunay na dakila
pag-uusap sa harap man ng digma
upang daigdig ay maging payapa

tunay ngang di natutulog ang gabi
pagkat patuloy kayong nagsisilbi
marami pong salamat, O, IID
sa adhika nyong tunay na mabuti

* IID = Initiatives for International Dialogue

** Binasa ang tulang ito sa pagtitipon ng IID sa Adarna Restaurant sa Kalayaan Ave. Lungsod Quezon, Setyembre 2, 2014, 6:30 n.g.. hanggang 9 n.g. Isa sa mga naging bisita doon si Daw Seng Raw Lahpai, ang 2013 Ramon Magsaysay Awardee mula sa bansang Burma (Myanmar)

Mas nais ko pang magsulat kaysa...

MAS NAIS KO PANG MAGSULAT KAYSA...
ni Gregorio V. Bituin Jr.

mas nais ko pang magsulat
kaysa damhin ang sakit ng ngipin
kaysa damhin ang kalam ng tiyan
kaysa damhin ang ginaw ng gabi
kaysa damhin ang init ng araw

mas nais ko pang magsulat
kaysa dinggin ang pagyayang kumain
kaysa lumabas upang magpahangin
kaysa kausapin ang dalaginding
kaysa labanan ang mga pasaring

mas nais ko pang magsulat
kaysa umawit ng magagandang himig
kaysa sayawin ang magagandang tugtog
kaysa panoorin ang paboritong "Bubble Gang"
kaysa titigan ang magandang litrato ni Ara Mina

mas nais ko pang magsulat
dahil dama ko'y gahol na sa panahon
upang iba't ibang obra ay makatha
batay sa plano kong apatnapung aklat
ng sanaysay, kwento't limanglibong tula