Miyerkules, Pebrero 20, 2013

Salompas sa Sugat ng Bayan

SALOMPAS SA SUGAT NG BAYAN
ni Gregorio V. Bituin Jr.
9 pantig bawat taludtod

nakitang may naknak ang laman
nagnana ang kaibuturan
ng bayang nagulumihanan
dahil sa sistemang gahaman

bakit kayraming mga tuso
sa kapitalistang gobyerno
kinakawawa ang obrero
lakas-paggawa'y pigang todo

sa ekonomya'y pulitika
ang masa'y di isinasama
ang nagpapasya'y elitista
sa kapalaran nitong masa

ang tugon ng pamahalaan
salompas sa sugat ng bayan
bahala raw ang kapalaran
sa bukas nitong sambayanan

salompas ba'y sapat sa sugat
mga mata'y ating idilat
diwa'y agad nating imulat
anong lunas ang nararapat

kailangan ng himagsikan
upang baguhin ang lipunan
pagbabago ang kalunasan
sa nagnanaknak na lipunan

pagbabagong para sa tao
di lang elitista't gobyerno
pagbabagong may pagrespeto
sa dangal ng masa't obrero

patalsikin ang mga halang
sipain yaong tampalasan
ibagsak ang mga gahaman
itayo ang bagong lipunan