Lunes, Hulyo 2, 2012

Imbes na Charity, Baguhin ang Lipunan

IMBES NA CHARITY, BAGUHIN ANG LIPUNAN
ni Gregorio V. Bituin Jr.
11 pantig bawat taludtod

kahulugan ng charity ay limos
bigyan kahit ano ang mga kapos
ngunit mumo lang ang pinantutustos
ng mga taong yama'y lubos-lubos

ngunit bakit hanggang charity lamang?
bakit di tumbukin yaong dahilan?
kung bakit may mahirap at mayaman?
di ba't dapat baguhin ang lipunan?

nais lang nilang malaman kung sino
yaong kapos upang limusan ito
ayaw nilang ipaalam sa tao
kung bakit ang mga dukha'y ganito

pinapanatili ang karukhaan
at binubusabos ang karamihan
yaong pantay-pantay na kalagayan
ay kailan kaya masusumpungan

ang pagtsa-charity'y ginawang pilit
ng sinumang nag-aastang mabait
nag-iipon na ng pwesto sa langit
gayong sistema'y sadyang mapagkait

charity'y di talaga kailangan
kung masa'y tamasa ang karapatan
may pagkain bawat hapag-kainan
walang nabubuhay sa karukhaan

kapitalismo ang dumadaluhong
sa buhay ng dukha'y sadyang linggatong
kung nais talaga nilang tumulong
palitan nila ang sistemang buhong

dapat walang mahirap at mayaman
pagkat pantay-pantay ang kalagayan
ibahagi ang yaman ng lipunan
sa lahat ng tao, sa buong bayan