Lunes, Mayo 30, 2011

Para sa Aking Fides

PARA SA AKING FIDES
ni Gregorio V. Bituin Jr.
(Fides - ang diyosa ng pagtitiwala sa mitolohiyang Romano)
14 pantig bawat taludtod

marami nang Fides ang aking naging diyosa
mula pagkabata'y minahal ko na't sinamba
maraming beses, naging inspirasyon ko sila
ngunit di naman sabay-sabay, kundi iisa
sa bawat panahong sila'y aking sinisinta

marapat lang sa buhay kong ito'y isang Fides
kung saan tunay na pagsinta'y nagkakahugis
ang mang-aapi sa kanya'y tabak ni Palaris
ang isasalubong ko upang dito'y mang-inis
pagkat pag-ibig ko kay Fides ay labis-labis

ang mga nakaraan kong Fides ay inibig
inasam-asam ko pa ngang siya'y makaniig
iisa lang ang aking samo't binigyang tinig
na ang mga panaghoy ko'y kanyang naririnig
upang di pawang luha ang sa puso'y dumilig