Linggo, Mayo 30, 2010

Durugin ang mga Panginoon

DURUGIN ANG MGA PANGINOON!
ni Gregorio V. Bituin Jr.
14 pantig bawat taludtod

bakit ba kailangan ng mga panginoon
hindi ba pwedeng wala na tayong mga amo
na lagi na lang sinusunod mula pagbangon
hanggang pagtulog, gayong tayo rin nama'y tao

bawat tao'y isinilang ng may karapatan
na magtamasa ng edukasyon at pag-ibig
masiglang kalusugan, maayos na tahanan
kaya sa bawat isa'y di dapat magpadaig

pantay tayo kaya't wala dapat panginoon
at wala dapat itinuturing na alipin
kaya baguhin ang lipunan, magrebolusyon
ang mga panginoon ay dapat nang durugin

dapat pawiin ang mga panginoon dito
upang maging makatarungan ang mundong ito