Biyernes, Disyembre 31, 2010

Hangga't Buhay Ako, Ms. M.

HANGGA'T BUHAY AKO, MS. M.
ni Gregorio V. Bituin Jr.
15 pantig bawat taludtod

poproteksyunan kita, Ms. M., hangga't buhay ako
panata itong kakabit ng aking pagkatao
poproteksyunan kita ng buhay ko hanggang dulo
dahil pag-ibig kita, ikaw ang minamahal ko

isa ka sa pinakamamabait kong kasama
ikaw ang aking inspirasyon sa pakikibaka
kaya magpatuloy tayo sa pag-oorganisa
lalo sa panawagang manggagawa'y magkaisa

panata kong sa bawat laban, di kita iiwan
buhay ko man ang kapalit, ikaw'y ipaglalaban
sa bawat pagkilos, di ka mawala sa isipan
sa bawat labanan, kasama ka at kagampan

kaya poproteksyunan kita hangga't buhay ako
panata itong kakabit ng aking pagkatao
sa bawat pakikibaka, magpapatuloy tayo
dahil kasama kita, kasama't minamahal ko

Huwebes, Disyembre 30, 2010

Buti kung daliri'y may kapalit

BUTI KUNG DALIRI'Y MAY KAPALIT
ni Gregorio V. Bituin Jr.
7 pantig bawat taludtod

pak, pak, bum, bum, pak, pak, boom
sabay-sabay ang putok
para sa bagong taon
yanig ang buong nayon

pak, pak, bum, bum, pak, pak, boom
magdamag ay nilindol
iba'y sisipol-sipol
ang iba'y humagulgol

sinugod sa ospital
ang mga naputukan
sa daliri't paanan
sa braso't sa ulunan

ang lima'y naging tatlo
natanggal pati kuko
dugo'y sirit sa noo
sa tama ng piccolo

taun-taon na lamang
daming napuputulan
di naman mapalitan
ang bahaging nawalan

sino pa ang hihirit
buti kung may kapalit
ang daliring naligpit
sa tradisyong kaylupit

Habang...

HABANG...
ni Gregorio V. Bituin Jr.

Habang patuloy na tumataas
Ang presyo ng isang kilong bigas
Habang patuloy na bumababa
Ang kalidad ng buhay ng madla
Habang itong sistema'y kayrahas
Binababoy ng trapo ang batas
Habang patuloy na lumuluha
Ang mga dukhang nagdaralita
Habang patuloy na namamalas
Ang buhay nilang di naman patas
Habang patuloy na bumabaha
Ang pinagtubuan ng paggawa
Habang aba ang obrerong lakas
Dahil sa kapitalistang ungas
Habang patuloy na nililikha
Yaring danas na dusa at luha

narito tayo
nakikibaka
nagpapatuloy
sa adhikaing
para sa masa
at manggagawa

Martes, Disyembre 28, 2010

Dinudurog ng Gutom

DINUDUROG NG GUTOM
ni Gregorio V. Bituin Jr.
10 pantig bawat taludtod

ang masa'y dinudurog ng gutom
pansin ko habang naglilimayon
walang pagkain, walang mainom
tila tulad nila'y alimuom

dinudurog ng gutom ang tiyan
kaya nanghihina ang katawan
bakit ba nangyayari ang ganyan
sila'y biktima ng kahirapan

nagutom ang marami sa atin
kahit laksa-laksa ang pagkain
dahil sistema'y mapang-alipin
na dapat palitan at wasakin

Linggo, Disyembre 26, 2010

Bihirang Dalawin ni Santa Claus ang Dukha

BIHIRANG DALAWIN NI SANTA CLAUS ANG DUKHA
ni Gregorio V. Bituin Jr.
13 pantig bawat taludtod

ang bawat kapaskuhan ay isang pangarap
sa mga batang isa ang hinahagilap
si Santa Claus sana'y kanila nang mahanap
upang maibsan naman ang danas na hirap
inaabangang baka lumitaw sa ulap

ang mga batang ito'y lagi nang maputla
dahil sa hirap at gutom laging tulala
umaasahang dumalaw si Santang dakila
ngunit inaasahan nila'y laging wala
bihirang dalawin ni Santa Claus ang dukha

pagkat naroon si Santa sa mayayaman
mayayamang bata ang nireregaluhan
habang nakatanghod lang sa may tarangkahan
ang mga batang inangkin ng kahirapan
si Santa Claus pala'y para lang sa mayaman

napagtanto ng mga batang mahihirap
si Santa Claus pala'y totoong mapagpanggap
kaya sila'y nagpulong at nagpasyang ganap
sa susunod na taon di na mangangarap
na isang Santa Claus ay kanilang mahanap

Sabado, Disyembre 25, 2010

Ang rebolusyon ay di tulad ng bayabas

ANG REBOLUSYON AY DI TULAD NG BAYABAS
ni Greg Bituin Jr.
13 pantig bawat taludtod

ang rebolusyon ay di tulad ng bayabas
na babagsak ng kusa pag ito'y hinog na
dapat kang kumilos upang ito'y mapitas
huwag tumulad kay juan tamad na tanga

Miyerkules, Disyembre 22, 2010

Pagtulog sa Lansangan

PAGTULOG SA LANSANGAN
ni Gregorio V. Bituin Jr.
10 pantig bawat taludtod

karton ay aayusing maigi
upang pahingahin ang sarili
langit ang bubong nila't kisame
ilaw nila'y bituin sa gabi
gutom yaong pinipintakasi
upang bukas muli'y dumiskarte

Kung Tayo'y Malulugmok

KUNG TAYO'Y MALULUGMOK
ni Gregorio V. Bituin Jr.
13 pantig bawat taludtod

di na mahaba-haba ang pakikibaka
kakaunti na lang ang nalalabing oras
maaring takipsilim ay mabanaag na
at ilang taon na lang tayo ri'y lilipas
at sa mundong ito'y magiging alaala
ngunit adhikain nati'y di maaagnas

kaya bago pa sumapit ang takipsilim
ay ialay na natin ang ating sarili
upang bigyang liwanag ang danas na dilim
upang ang sistemang sa ati'y bumibigti
upang kapitalismong nagdulot ng lagim
sa uring manggagawa'y tuluyang iwaksi

patuloy tayong kumilos, mga kasama
laban sa epidemya ng globalisasyon
laban sa yumuyurak sa dangal ng masa
laban din sa salot na kontraktwalisasyon
at laban din sa lipunang kapitalista
di tayo titigil sa pagrerebolusyon

iwawaksi natin ang bulok na sistema
pati lahat ng tipo ng diskriminasyon
patuloy na ipaglalaban ang hustisya
pati na rin karapatang pantao ngayon
huwag nang tumigil sa pag-oorganisa
palakasin natin ang ating mga unyon

kahit paminsan-minsan, nagsasaya tayo
lalo't sumapit ang panahong kapaskuhan
nang problema sa pamilya, unyon, gobyerno
ay ating pansumandaling makalimutan
mapapasabak muli pagkatapos nito
tila parang anestisya ang kapaskuhan

sasapit at sasapit itong takipsilim
upang tayo'y maging alaala na lamang
patuloy tayong kumilos kahit palihim
para sa sosyalismong adhika sa bayan
upang kung tayo'y malulugmok na sa dilim
ay mabanaag ang bagong kinabukasan

Martes, Disyembre 21, 2010

Ugaling Kapitalista

UGALING KAPITALISTA
ni Gregorio V. Bituin Jr.
14 pantig bawat taludtod

pag nalugi, ang kapitalista'y nabubuwang
pag tumubo, sa obrero'y walang pakialam
pag nalugi, akala mo sila'y namatayan
pag tumubo, obrero'y di man lang bahaginan

pag nalugi, tanong nila'y saan nagkamali
pag tumubo, magagaling daw silang magsuri
pag nalugi, sa manggagawa pa namumuhi
pag tumubo, manggagawa nila'y di mapuri

pag nalugi, obrero'y sinisisi pa nito
pag tumubo, magaling daw ang kapitalismo
pag nalugi, nais nilang magtanggal ng tao
pag tumubo, di mai-regular ang obrero

pag nalugi, namali lang sila ng diskarte
pag tumubo, manggagawa'y kontraktwal daw kasi
pag nalugi, manggagawa pa ang walang silbi
pag tumubo, kapitalista ang tanging saksi

sadya bang ganito silang asal-tampalasan
pag nalugi, manggagawa ang may kasalanan
pag tumubo, obrero'y di man lang parangalan
pinupuri ng kapitalista’y sarili lang

Lunes, Disyembre 20, 2010

Latay ng Kabulukan

LATAY NG KABULUKAN
ni Gregorio V. Bituin Jr.
10 pantig bawat taludtod

lumalatay sa puso't isipan
ng mga dukha ang kabulukan
ng sistemang dulot ng gahaman
tumatagos sa kaibuturan

kaytindi ng bulok kung lumatay
buhay ka pa ngunit inaanay
binatak tayo nito sa hukay
upang sa putik mangalupasay

ganyan ang dulot ng kabulukan
ng sistema sa kasalukuyan
at kung di tayo ngayon lalaban
pupulutin tayo sa kangkungan

lumalatay sa bawat pamilya
ang bangis ng bulok na sistema
at kung di tayo makikibaka
dami pa nitong mabibiktima

Linggo, Disyembre 19, 2010

Ang Tatlong Kuliglig

ANG TATLONG KULIGLIG
ni Gregorio V. Bituin Jr.
13 pantig bawat taludtod

I

maingay tuwing gabi ang mga kuliglig
na kulisap na kamag-anak ng tipaklong
tila buong nayon sa ingay nila'y yanig
sa gabing payapa ang bulong nila'y ugong

II

ang kuliglig yaong sasakyang pang-araro
sadyang palasak sa kayraming lalawigan
pinaaandar ng gasolina o krudo
nang lumago ang tanim, tubuhan, palayan

III

mga kuliglig sa Maynila'y hatid-sundo
pedikab na ang gamit ay motor ng bangka
kay-ingay sa lansangan, nakakatuliro
paboritong sakyan ng pasaherong madla

IV

iba't iba man itong uri ng kuliglig
kulisap, pang-araro't hari ng lansangan
bahagi na ng buhay, laging maririnig
gaano man kaingay, kinagigiliwan

Halina't Parangalan ang mga Manggagawa

HALINA'T PARANGALAN ANG MGA MANGGAGAWA
ni Gregorio V. Bituin Jr.
14 pantig bawat taludtod

nalikha ang lipunan dahil sa manggagawa
kung wala sila, lipunan ay di malilikha
dahil sa bisig nila, mundo'y pinagpapala
dahil sa kanila, umunlad ang mga bansa

lipunan ay di nilikha ng kapitalista
ngunit naghahari-harian pa dito'y sila
utang na loob daw ng obrero sa kanila
kaya mga ito'y may trabaho sa pabrika

aba, aba, aba, sila pa ang nagmayabang
kung di raw sa kanila, obrero'y walang puwang
subukan kaya nilang walang obrero riyan
tutubo ba ng limpak silang mga gahaman

dapat matanto ng kapitalistang kuhila
ang katotohanang kung wala ang manggagawa
pabrika'y sarado, tutubuin nila'y wala
kailangang kalakal ay di na malilikha

mula pa ng panahong primitibong lipunan
mga tao'y nangangaso at nagbibigayan
mga nakukuha nila'y pinaghahatian
walang gutom, bawat isa'y lalamnan ang tiyan

ngunit nang dumatal na ang lipunang alipin
mga alipin ang tagakuha ng pagkain
para sa panginoong sa kanila'y nag-angkin
sila'y walang karapatan, madaling patayin

nang umunlad na ang kagamitan sa produksyon
tao'y inari ng mga naghahari noon
hanggang sa dumating ang maylupang panginoon
sa lipunang pyudal, magsasaka'y di malingon

hanggang ang sistemang sahuran ay maimbento
ang pangunahin sa kapitalista'y negosyo
nagtayo ng pabrika, nangalap ng obrero
tubo ang una, kahit obrero'y ginagago

ngunit lipunang ito'y di sa kapitalista
di sa sinupamang nang-aalipin sa masa
di sa sinupamang mayayamang elitista
lalo't di sa gahaman sa tutubuin nila

lipunang ito'y para sa nagpagal, nagpala
upang umunlad ang ekonomya nitong bansa
lipunang ito'y nilikha ng lakas-paggawa
halina't parangalan ang mga manggagawa

Nilay ng Dukha

NILAY NG DUKHA
ni Gregorio V. Bituin Jr.
13 pantig bawat taludtod

kumatok ang dukha sa mansyon ng mayaman
ngunit ang dukha'y agad ipinagtabuyan
bakit daw siya naroon sa tarangkahan
mabuti pang siya raw ay umuwi na lang

ngunit ang dukhang iyon kaya naroroon
ay nag-aabang ng pagkaing itatapon
ilang araw nang di kumain, nagugutom
nagbabakasakali kahit daw bagoong

at lumipat ng mansyon ang nasabing dukha
ngunit sadya ngang siya'y binabalewala
ang tingin sa kanya'y pusakal, hampaslupa
tingin niya sa sarili'y kaawa-awa

o, bakit ba sa mundo ang dukha'y kayrami
maraming nagugutom, kumain dili
ano ba ang misyon nila sa mundong bingi
bakit ba mundo sa kanila'y napipipi

kung masasagot lang ang katanungang iyon
tiyak itong mga dukha'y magsisibangon
mga mapang-api'y kanilang ibabaon
at sama-sama nilang iibsan ang gutom

Sabado, Disyembre 18, 2010

Sa First Date Natin

SA FIRST DATE NATIN
ni Gregorio V. Bituin Jr.
9 pantig bawat taludtod

nagkakasama lagi tayo
sa mga pagkilos ng masa
sa panawagang pagbabago
sa bawat pag-oorganisa
sa welga ng mga obrero
sa mga rali sa kalsada
at mahal kita, kasama ko
ngunit first date nati'y wala pa

lagi mo akong dinadalaw
sa aking mga panaginip
ang puso ko'y iyong pinukaw
kaya lagi kang nasa isip
hanggang lagi kang natatanaw
hanggang diwa't puso'y malirip
na ang iniibig ko'y ikaw
puso ko'y iyong halukipkip

patuloy tayong makibaka
lumang sistema'y bubuwagin
di na ako mawawalay pa
sa pagbabagong adhikain
nais kong mapangiti kita
nang wala kang alalahanin
nais kitang mapaligaya
pag natupad ang first date natin

first date ng mapupulang rosas
kahit nagrerebolusyon tayo
first date ng pag-ibig na wagas
ang buhay ko'y ikaw, sinta ko
first date na di malilimutan
inspirasyon kitang totoo
sa buhay kong ito'y minsan lang
dumating ang mga tulad mo

habang kasaliw ang musika
damhin mo ang aking pag-ibig
pangarap kong mahagkan kita
habang kulong kita sa bisig
puso ko'y pakinggan mo, sinta
at kaydami mong maririnig
rebolusyon, pakikibaka
tayo'y pinag-isang pag-ibig

prinsesa kang napakaganda
at ako'y kabalyerong lintik
ipagtatanggol lagi kita
sa anumang gulong humibik
sa first date natin, aking sinta
puso ko't diwa'y nasasabik
ikaw na lagi kong kasama
ay gagawaran ko ng halik

Biyernes, Disyembre 17, 2010

Binhi ng Rebo

BINHI NG REBO
ni Gregorio V. Bituin Jr.
11 pantig bawat taludtod

bulok na sistema'y nakamumuhi
na nagdulot ng hirap na masidhi
pribadong pag-aari itong sanhi
kaya palayain natin ang lahi
laban sa elitistang asal-panghi
halina't ating itanim ang binhi
ng rebolusyong kaytagal nang mithi

ihasik natin sa matabang lupa
ang hangarin ng uring manggagawa
rebolusyong nasa ng mga dukha
ang sosyalismong kanilang adhika
kapitalista'y itulad sa daga
itaboy sila sa labas ng lungga
o sa noo nila'y lagyan ng tingga

Huwebes, Disyembre 16, 2010

Asin at Pangarap

ASIN AT PANGARAP
ni Gregorio V. Bituin Jr.
12 pantig bawat taludtod

minsan isang ginang ang kinapanayam
sa kanyang tahanan, anong inuulam
lalo't magpapasko, masarap ba naman
sa kanyang asawa'y ano ang pulutan

ngunit itong ginang na isang mahirap
ay agad tumugon, walang pagpapanggap
di kaya ng bulsa yaong masasarap
na mga pagkaing kanilang pangarap

ilang pasko na raw, noche buena'y tuyo
ang puto bumbong daw ay isa nang luho
tinda nilang isaw, paa, pakpak, dugo
ang kanilang ulam, kahit hinahapo

di raw masustansya, anang nagpanayam
yaong kinakain ng nasabing ginang
wala raw ba siyang pangarap man lamang
na kumain kahit sa mga restawran

tumugon ang ginang kahit nahihirin,
"di sapat ang kita sa luhong pagkain
ayokong dagdagan ang alalahanin
masaya na akong magdildil ng asin"

nagpanayam naman ay agad tumugon
"nawalan na kayo ng imahinasyon
ayaw nyong tumikim kahit man lang litson
parang kayo'y ayaw mangarap na ngayon?"

ang tugon ng ginang, "may bukas pa nga ba
sa lipunang itong pawang luha't dusa
tingnan mo ang aking anak at asawa
pawa nang maysakit, may bukas ba sila?"

"may pag-asa pa po," payo ng kausap
"ngayon po'y simulang muli ang mangarap
huwag makuntentong asin ang malasap
isang bagong bukas ang likhaing ganap"

Miyerkules, Disyembre 15, 2010

Milyun-milyong Kontraktwal

MILYUN-MILYONG KONTRAKTWAL
ni Gregorio V. Bituin Jr.
13 pantig bawat taludtod

kailangan ng trabaho, nagpaalipin
kahit maging kontraktwal, basta may makain

kaysa raw magutom ang kanilang pamilya
kaysa raw mamatay silang dilat ang mata

basta may makain, kahit maging kontraktwal
nagpapaalipin kahit di maregular

sa lipunang itong walang kinabukasan
ang kinabukasan ay alipin ng gahaman

kinabukasang inukit na ng kapital
upang pagtubuan iyang mga kontraktwal

kontraktwalisasyong walang benepisyo
di tao kung ituring ang mga obrero

kundi makina, makinang walang pamilya
obrerong pinagsasamantalahan nila

ilan ba, ilan pa silang dapat maapi
sa buhay na itong hirap ay tumitindi

nasa milyon na ang tulad nilang kontraktwal
panay ang trabaho, nananatiling kaswal

milyun-milyong kontraktwal, magkaisa kayo
ang bulok na sistema'y baguhin na ninyo

katiyakan sa trabaho'y dapat tiyakin
pagiging regular ay dapat nyong maangkin

lakas-paggawa'y dapat mabayarang tama
benepisyo'y dapat kamtin ng manggagawa

kaya obrero, wakasan  ang kabulukan
ugitin nyo na ang bagong kinabukasan

manggagawa, dapat na kayong magkaisa
kontraktwalisasyong salot, tapusin nyo na

Lunes, Disyembre 13, 2010

Aktibista'y Propesyunal

AKTIBISTA'Y PROPESYUNAL
ni Gregorio V. Bituin Jr.
12 pantig bawat taludtod

kaming aktibista'y pawang propesyunal
sa mga trabaho'y di basta aangal
upang pagbabagong nais ay dumatal
at bagong sistema ang siyang umiral

maagang dumating sa takdang tipanan
tungkulin namin ay nauunawaan
di tinetengga ang gawaing nariyan
propesyunal kami sa aming paggampan

aktibista'y pawa ngang disiplinado
dahil adhikain nami'y pagbabago
dahil nais namin ay bagong gobyerno
dahil nasa diwa nami'y sosyalismo

ang tungkuling atang, pinaghuhusayan
disiplinado sa aming kaasalan
at propesyunal sa aming katungkulan
kaming mga tibak ay maaasahan

Linggo, Disyembre 12, 2010

Awit ng Tibak

AWIT NG TIBAK
ni Gregorio V. Bituin Jr.
13 pantig bawat taludtod

maraming nagugutom, wala nang makain
maraming dinemolis, wala nang tahanan
maraming mahirap, walang kasaganaan
maraming pulitiko, walang kabusugan

maraming nagtrabaho, mababa ang sweldo
maraming nagsasaka, kalawang ang araro
maraming pabrika, tumutubo ang aso
maraming lupa, kinamkam ng pulitiko

kaya anong dapat nating gawin, bayan ko
upang lipunang ito'y maging makatao
bakit ba sa mundo'y kayraming dusa't gulo
kulang ba sa suri sa lagay na kongkreto

pagbabago'y hangaring inaasam-asam
nang mapawi ang sistema ng kabulukan
kongkretong suri sa kongkretong kalagayan
sa mga aktibista, ito'y panuntunan

Sabado, Disyembre 11, 2010

Manggagawa'y Kapanalig

MANGGAGAWA'Y KAPANALIG
ni Gregorio V. Bituin Jr.
10 pantig bawat taludtod

masang manggagawa'y gawing kabig
at dalhin sila sa ating panig
upang kapitalismo'y malupig
at mga kaaway ay madaig

organisahin ang ating tinig
na pagbabago ang ating himig
at sosyalismo ang maririnig
pagkat dito tayo nakasandig

tayo dito'y di dapat manlamig
rebolusyon ang ating inibig
dito ang puso'y nangangaligkig
dito'y tumitipuno ang bisig

manggagawa'y ating kapanalig
halina't tayo'y magkapitbisig

Karapatan ng Dukha

KARAPATAN NG DUKHA
ni Gregorio V. Bituin Jr.
13 pantig bawat taludtod

sino ang maysabing ang may karapatan lang
sa mundong ito'y pawang mayayaman lamang
tila ba wala sa sariling katinuan
ang nagsabing itong palagay ko'y mayaman

mayaman ang pwede sa mamahaling resto
ang mahihirap nama'y hanggang turo-turo
mayama'y pasakay-sakay ng eroplano
ang mahihirap nama'y tiis sa estribo

mayaman, tatlong beses kumain maghapon
mahirap, swerte na kung sila'y may malamon
mayayaman, natutulog sa Hotel Hilton
mahihirap, natutulog kahit kariton

mayama'y kayang tumakbong pagkapangulo
mahirap ay nuisance pag kumandidato
mayama'y kayang magbayad ng abogado
mahirap nama'y kulong agad pag may kaso

batang mayaman, nakatira na sa mansyon
batang mahirap, kaharap ay demolisyon
mayayama'y walang problemang maglimayon
mahihirap, swerte na kung may relokasyon

kaya may karapatan nga ba itong dukha
marahil kung ang bulok na sistema'y wala
may karapatan din ang mga maralita
sa bagong sistemang sosyalista ang diwa

Biyernes, Disyembre 10, 2010

Mga Taong Pagong


MGA TAONG PAGONG
ni Gregorio V. Bituin Jr.
15 pantig bawat taludtod

dahil sa karalitaan, kawalan ng tahanan
naglipana ang mga taong pagong sa lansangan
usong-usong yaong karitong nagsilbing tirahan
bawat kariton, isang pamilya ang nananahan

usong-usong ang bahay saan man sila magpunta
modernong pagong nitong lungsod kung tawagin sila
saang panig man ng kalunsuran ay makikita
sa gobyerno't mayayaman, sila'y puwing sa mata

bakit sa kabila ng laksang kaunlaran ngayon
marami pa ring naghihirap, naging taong pagong
sila ba'y dinemolis kaya bahay nila'y usong?
laging tinataboy dahil bahay nila'y kariton

dukha ka man, karapatan natin ang magkabahay
di tulad ng usong na karitong gigiray-giray
nais nati'y bahay na mapapaghingahang tunay
di tulad ng karitong di naman totoong bahay


Huwebes, Disyembre 9, 2010

Mga Taong Paniki (Bat People)

MGA TAONG PANIKI (BAT PEOPLE)
ni Gregorio V. Bituin Jr.
13 pantig bawat taludtod

kung saan-saan natutulog silang dukha
umulan ma't umaraw, napapariwara

lagi pang giniginaw sa lamig ng gabi
lagi pang nanginginig sa lagim ng gabi

walang katiyakan ang iwi nilang buhay
hanggang gawing bubong ang ilalim ng tulay

ilalim ng tulay ang ginawang tahanan
akala mo'y paniking doo'y nananahan

ilalim ng tulay na ang dala'y panganib
ang kaylalim na tubig ang naninibasib

minsan may mga bata ngang muntik malunod
minsan may anak silang muntik nang malunod

mabuti't maagap yaong naninirahan
mabuti't ganap nila itong namalayan

tulay na daraanan ng malalaking trak
tulay na tahanan ng mga hinahamak

di nila ginustong maging taong paniki
ngunit doon pinadpad ng lipunang imbi

sa ilalim ng tulay pa ri'y nangangarap
na magbabago ang buhay sa hinaharap

kikilos sila kasama ang ibang dukha
upang baguhin itong lipunang kaysama

dapat taong paniki'y mawalang tuluyan
dahil totoong bahay na ang tinitirhan

Miyerkules, Disyembre 8, 2010

Mga Taong Grasa

MGA TAONG GRASA
ni Gregorio V. Bituin Jr.
13 pantig bawat taludtod

lagi silang palabuy-laboy sa lansangan
walang tahanan, marumi ang kasuotan

madalas pang nakapaa, walang tsinelas
kayhaba ng buhok na alambre sa tigas

maraming sabit na basura sa katawan
kadalasang di tiyak ang patutunguhan

subukan mong kausapin, tawa ng tawa
baka sabihan kang ikaw ang may problema

ilang poste na kaya ang kanyang nabilang?
ilang lugar na ba ang kanyang napuntahan?

wala silang kamag-anak na kumukupkop
o marahil walang kapamilyang kukupkop

dahil ba salot sa pinagmulang pamilya?
dahil isip ba'y apektado ng problema?

dapat bang ituring silang salot sa bayan?
o sila'y biktima ng bulok na lipunan?

may kinabukasan pa ba ang tulad nila?
saan na patutungo silang taong grasa?

Martes, Disyembre 7, 2010

Dukhang Basahan


DUKHANG BASAHAN
ni Gregorio V. Bituin Jr.
8 pantig, soneto

Hamak man yaong basahan
May panahong kailangan.
Tulad na lang sa halalan
Dukha'y agad lalapitan
Ng mga trapong mayaman
Na nangakong tutulungan
Sa kanilang kalagayan
Nang hirap daw ay maibsan
Basta't ipanalo lamang
Pulitikong trapong iyan.
Ngunit pag nanalo naman
Dukha'y kinakalimutan
Sila muli ay basahan
Sa mga trapong sukaban.

mga tula sa liham-pagbati ng PLM-NCRR

mga tula sa liham-pagbati ng PLM-NCRR ngayong kapaskuhan
ni Greg Bituin Jr.
(nahilingan ang makata na magsulat ng tula para sa ipamamahaging liham-pagbati mula sa mga kasama sa organisasyong Partido Lakas ng Masa-National Capital Region-Rizal o PLM-NCRR)

SA PANAHON NG KAPASKUHAN
13 pantig bawat taludtod

maligayang pasko'y aming bati sa masa
manigong bagong taon sa lumang sistema
mula sa puso, Partido Lakas ng Masa
kapaskuhan man, tuloy ang pakikibaka
tungo sa hangad na sistemang sosyalista

taun-taon, ipinagdiriwang ang pasko
taun-taon din namang lumilipas ito
ano bang dala nito sa dukha't obrero
dala ba nito'y pag-asa ng pagbabago
o pasko'y pampamanhid sa buhay ng tao

tangan ba ng pasko ang sosyalistang diwa
na lahat pantay-pantay ang lagay ng madla
na lahat sa pagsasamantala'y malaya
wala nang pang-aapi ng kapwa sa kapwa
wala nang pribadong pag-aaring kuhila

walang bago sa pasko ng kapitalismo
nananalasa lang itong komersyalismo
pinahahalagahan lang ay tubo't negosyo
walang pagpapahalaga sa kapwa-tao
kaya dapat lang kumilos sa pagbabago


HILING NG PAGSUPORTA

sa bawat larangan, kailangan ng pondo
nang ating pakikibaka'y maipanalo
kaya kami rito'y dumudulog sa inyo
mag-ambag sa rebolusyon kahit magkano
lalo't bukal sa puso ang ambag na ito
ngayon pa lang, maraming salamat sa inyo

Lunes, Disyembre 6, 2010

Ang Rosas sa Panagimpan

ANG ROSAS SA PANAGIMPAN
ni Gregorio V. Bituin Jr.

ikaw ang dilag sa panagimpan
kaysarap ng iyong halaklak
sumusuot sa aking kaibuturan

kaysarap mong pagmasdan
di kasasawaang titigan
dinadalirot ang aking puso

ngunit rosas kang di mapitas
pa sa ngayon, dahil kita'y
iniingatan, minamahal

patuloy na dinidiligan
patuloy na tinititigan
patuloy na pinapangarap maangkin

darating ang araw
rosas kang aking pipitasin
upang tuluyan kang maging akin

Linggo, Disyembre 5, 2010

Ang Bangag

ANG BANGAG
ni Greg Bituin Jr.


lumuluha sa kawalan
ang bangag


wala pa sa katinuan


ngunit pagkatapos humitit


tatawa-tawa naman
ang bangag


wala pa rin sa katinuan


ngunit kung minsan
tumitino rin siya


kung minsan lamang


lalo't siya'y di na
bangag

Pag-aagaw-dilim

PAG-AAGAW-DILIM
ni Greg Bituin Jr.


pinilit kainin ng dragon
ang araw doon sa kanluran
kaya nagdilim ang langit


ang mga tao'y gininaw
sa lamig ng gabi
ang mga tao'y natakot
sa lagim ng gabi


pinilit kainin ng dragon
ang araw doon sa kanluran
upang muling iluwa
kinabukasan


ganito araw-gabi
ang pawang nangyayari

Biyernes, Disyembre 3, 2010

Lunggati

LUNGGATI
ni Gregorio V. Bituin Jr.

sa madilim na sulok
maagiw na kisame
hinahabi ang pangarap
na saklaw ng isip
marubdob na hangaring
umalpas sa poot
sa bulok na kalakaran

habang umiiyak ang nakaraang
nais lumunod sa kasalukuyan
upang pumailanlang sa hinaharap
ng mga lunggating nakalatay
sa puso'y diwa ng aktibista
hanggang magtagumpay
sa nasang pagbabago

nakalulunod sa di marunong
sumisid sa adhikain
ng nakikibakang poot
laban sa mga waldas
na umano'y lingkod
na dapat ipinapako
sa kurus ng kasiphayuan

sa madilim na sulok
maagiw na kisame
patuloy ang paghabi sa pangarap
na di masaklaw ng mapang-api
marubdob na hangaring
paalpasin ang poot
laban sa bulok na sistema

Huwebes, Disyembre 2, 2010

Pangakong Pako

PANGAKONG PAKO
ni Gregorio V. Bituin Jr.

nakapako ang pangako ng trapo
lagi na lang ganito

marahil mas mainam

ang trapong pulos pangako
tuluyang ipinapako

Ako'y Saksi

AKO'Y SAKSI
ni Gregorio V. Bituin Jr.

ako'y saksi sa paghihirap ng sambayanan
ako'y saksi sa maraming dinemolis na kabahayan ng maralita
alam kong kaytindi ng welga ng mga manggagawa ng Goldilocks, Victoria, Imarflex, at iba pa
at sila'y nanalo sa kanilang laban sa kapitalista, kahit man lang pansamantala

ako'y saksi sa ilang kaganapan sa kasaysayan
bata pa ako'y naisama ako ng aking ama sa Edsa Uno
labinglimang taon makalipas ay naroon ako ng Edsa Dos
at habang nangangampanya sa eleksyon ay naganap ang Edsa Tres

ako'y saksi sa napakaraming raling aking dinaluhan mula nang maging aktibista
patunay ang mga pasang aking natanggap ng ilang beses dahil sa bugbog at hampas ng mga tuta ng estado
ilang beses ko na bang nasaksihan ang pagyurak sa dignidad at kinabukasan ng maraming maralita't manggagawa
ah, di ko na mabilang

at bilang saksi'y ako ba'y dapat nakatunganga lang
habang ang iba'y pinahihirapan
habang ang iba'y inuuto ng bulok na sistema
habang ang iba'y .... ah

saksi akong dapat kumilos
saksi akong dapat sumama sa pagkilos
saksi akong nais makamit ang pagbabagong inaasam
at magiging saksi ako sa pagbabago ng sistema

Lunes, Nobyembre 29, 2010

Dugo ng mga Hangal

DUGO NG MGA HANGAL
ni Gregorio V. Bituin Jr.

paano ba natin paaapawin ang dugo ng mga hangal
na kapitalistang madalas yumurak sa ating dangal
paano ba natin pipigain ang kanilang dugo sa imburnal
upang mawala na sa mundo ang tulad nilang mga kriminal

paano ba natin dudurugin ang kapitalistang walang pagkatao
silang walang puso sa kapwa gayong sila nama'y mukhang tao
paano ba natin babalatan ng buhay ang mapang-api sa obrero
sa pagsasamantala nila sa masa'y basta lang ba papayag tayo

halina't kumilos tayo't paapawin ang dugo ng mga hangal
na kapitalistang madalas yumurak sa pagkatao nati't dangal
halina't unti-unti nating pigain ang dugo nila sa imburnal
upang mawala na sa mundo ang tulad nilang mga kriminal

Pagbabago, Sosyalismo

PAGBABAGO, SOSYALISMO
ni Gregorio V. Bituin Jr.
13 pantig bawat taludtod

(nilikha sa pagdalo sa 2 araw na "Socialist Conference", Nobyembre 27-28, 2010)

sa kumperensyang iyon umaalingawngaw
"Pagbabago, Sosyalismo!" ang sinisigaw
sadyang may pag-asa na kaming natatanaw
tila gutom sa hustisya'y biglang natighaw

iyo ngang dinggin, "Pagbabago, Sosyalismo!"
ito nga ang lunas sa hirap ng obrero
ito nga ang dapat matutunan ng tao
dapat makasama sila sa pagbabago

sosyalismo nga ang lunas sa ating hirap
sosyalismong titiyak na tayo'y malilingap
sosyalismong kaytagal na nating pangarap
halina't kumilos nang ito'y maging ganap

isigaw natin, "Pagbabago, Sosyalismo"
sosyalismo ang lunas na hanap ng tao
mag-organisa tayo tungong sosyalismo
mag-organisa tayo hanggang sosyalismo

Sabado, Nobyembre 27, 2010

Ang Mga "Honorable" Kuno

ANG MGA "HONORABLE" KUNO
ni Gregorio V. Bituin Jr.
13 pantig bawat taludtod

"honorable" kung tawagin ang mga trapo
kagalang-galang nga ba silang pulitiko
o baka kagulang-gulang ang mga ito
di mapagkatiwalaan ng mga tao

marangal sila, sabi ng kapitalista
dahil tumutulong sila sa ekonomya
dahil sa batas na pinaggagawa nila
para sa pakinabang ng amo, di ng masa

sa kampanyahan, trapo'y panay yaong kahol
pangako dito, pangako doon ang ulol
dahil mayaman, nanalo ang "honorable"
ngunit mamamayan, laging humahagulgol

lalong yumabang nang sa pwesto na'y maupo
mga "honorable" kuno't sadyang maluho
ngunit pagka-"honorable" na'y naglalaho
at naging "horrorable" ang mga damuho

sila ba yaong sa atin ay maglilingkod
trapong walang dangal, malambot pa ang tuhod
silang sa pork barrel ay laging nakatanghod
habang obrero'y kaybaba pa rin ng sahod

"honorable" ngunit iyon pala'y kawatan
sila na'y "horrorable" na di maasahan
disenteng mandarambong silang "lingkod-bayan"
dapat lang silang patalsikin sa upuan

Huwebes, Nobyembre 25, 2010

Pag-aalab ng Masa

PAG-AALAB NG MASA
ni Gregorio V. Bituin Jr.
8 pantig bawat taludtod

dibdib ng masa'y lumiyab
at ang kamao'y nag-alab

tulad ng diwang maapoy
na marami nang natukoy

na isyu ng sambayanan
kaya api'y lumalaban

dapat mapagsamantala
ay tuluyang ibagsak na

rebolusyon, rebolusyon
ang nasa isip nila ngayon

Miyerkules, Nobyembre 24, 2010

Dagok sa Pusod ng Bayan

DAGOK SA PUSOD NG BAYAN
ni Gregorio V. Bituin Jr.
13 pantig bawat taludtod

(sa unang anibersaryo ng Maguindanao massacre)

naglagay na ng marker sa lupaing yaon
na pinagbaunan ng maraming katawan
bilang paggunita sa nangasawi roon
sa isang taon ng kanilang kamatayan

sila'y tatlumpu't dalawang mamamahayag
habang ang karamihan ay mga sibilyan
nang kapayapaan sa lugar ay binasag
ng rumaragasang bala ng kamatayan

limampu't pito lahat silang nangasawi
sa di pa napapanahon nilang paglisan
isang taon nang mahal nila'y humihikbi
hanggang ngayo'y hinahanap ang katarungan

sa pusod ng bayan, malaki itong dagok
hustisya nawa'y makamit ng nangalugmok

Lunes, Nobyembre 22, 2010

Ganda Mo'y Di Ko Malimutan

GANDA MO'Y DI KO MALIMUTAN
ni Gregorio V. Bituin Jr.
9 pantig bawat taludtod

habang kita'y tinitigan
para bang ako'y nasa langit
kaysarap nitong pakiramdam
ang puso ko'y lumalangitngit

ganda mo'y di ko malimutan
kahit ako'y nasa malayo
ganda mo'y nasasa isipan
kahit pa ako'y masiphayo

kaya minahal kita, sinta
inibig ang kabuuan mo
kaytagal ko nang nagdurusa
sana'y ibigin mo rin ako

kung sakaling mawawala ka
mabuting ako'y mamatay na

Sa Pagbabalik ng Musa

SA PAGBABALIK NG MUSA
ni Gregorio V. Bituin Jr.
11 pantig bawat taludtod

mula sa pagkalugmok ko'y nagbalik
ang pisikal na presensya ng musa
sa mga ngiti niya'y nasasabik
kaygandang mukha'y muling nakita
namatay na puso'y biglang pumintig
muling tumibok sa pagbalik niya
biglang umalpas ang mga ligalig
kay-aliwalas ng bagong umaga

Linggo, Nobyembre 21, 2010

Kung Mawala Ka, Sinta

KUNG MAWALA KA, SINTA
ni Gregorio V. Bituin Jr.
12 pantig bawat taludtod

kung sakaling mawala ka nang tuluyan
hiling ko na'y maaga kong kamatayan
pagkat anong saysay, anong katuturan
ng buhay kong ito kung wala ka naman

Huwebes, Nobyembre 18, 2010

Bula Pa ang Tuwid na Landas

BULA PA ANG TUWID NA LANDAS
ni Gregorio V. Bituin Jr.
11 pantig bawat taludtod

(alay para sa ika-25 founding anniversary ng FIND o Families of Victims of Involuntary Disappearance sa Nobyembre 23)

Iyang matuwid na landas ay bula
Kung tao'y patuloy na winawala
Tayo'y di dapat magwalang-bahala
Kung sa gobyerno'y walang napapala

Tuwid na landas ang nais tunguhin
Nitong aktibistang may simulain
Na ang bulok na sistema'y baguhin
At ang buhay ng masa'y paunlarin

Ngunit sa mundo nga'y kayraming ganid
Dinukot ang aktibistang kapatid
Ang hustisya hanggang ngayon ay pinid
Pagkat hantungan nila'y di pa batid

Sana'y wala nang desaparesidos
Sa bansang itong ang tao'y hikahos
Sa lupaing itong binubusabos
Sa mundong itong pagkaapi'y lubos

Kung ang tao lang ay pumaparehas
Di dapat bula ang tuwid na landas
Kung iyang batas ay laging patas
Hustisya ang tangi nitong katumbas

Sana'y matagpuan ang nangawala
Nang matigil na ang aming pagluha
Sana tuwid na landas na'y di bula
Nang taumbayan nama'y may mapala

Aktibista at Ilog

AKTIBISTA AT ILOG
ni Gregorio V. Bituin Jr.
13 pantig bawat taludtod

"The activist is not the man who says the river is dirty.
The activist is the man who cleans up the river."

puna ng puna, wala namang ginagawa
upang problema'y malutas at maapula
puna ng puna, mahilig lamang ngumawa
wala namang alternatibang hinahanda

pinupuna ang pamahalaang inutil
dahil dahilan daw nitong mga hilahil
marami nang buhay ang nawala't kinitil
paano bang sistemang ganito'y mapigil

halina't pagmasdan, marumi na ang ilog
kapara'y basura, ang tubig nito'y lamog
sa nangyari'y kailan tayo mauuntog
nang maunawaang ilog na'y nadudurog

napagmasdan ito ng mga aktibista
hinanap yaong puno't dulo ng problema
linisin natin ang ilog para sa masa
upang ang duming ito'y di na lumala pa

sino ba ang nagdurumi, ralihan natin
mga pabrikang nagdurumi'y patigilin
mga nagtatapon sa ilog ay awatin
pagsabihang ito'y huwag nang uulitin

ilog na ito'y mananatiling basura
kung walang ginagawa tayong aktibista
halina't kumilos na tayo't magkaisa
upang maruming ilog ay malinisan pa

Martes, Nobyembre 16, 2010

Ang Puso

ANG PUSO
ni greg

lumilipad ang puso
kung saan-saang dako
lalo na't ang pagsuyo
ay hindi naglalaho

kapag matibay ang puso
di kailanman susuko
daanan man ng siphayo
di luluhod ni tutungo

Sa pansamantalang paglisan mo

SA PANSAMANTALANG PAGLISAN MO
ni Gregorio V. Bituin Jr.
12 pantig bawat taludtod

malayo ka man para ka ring malapit
pagkat sa puso ikaw na'y nakaukit
pangalan mo lagi itong sinasambit
marahil puso natin nga'y magkadikit

hihintayin ko ang pagbalik mo, sinta
mula sa paglisan mong pansamantala
upang gampanan ang gawain sa masa
malao't madali'y tayo'y magkikita

ingat lagi saan ka man naroroon
nananatili kang aking inspirasyon
tuloy pa tayo sa pagrerebolusyon
hanggang tagumpay ay makamit paglaon

parang namatay akong pansamantala
muling mabubuhay pag nagbalik ka na

para kay Ms. M.

Lunes, Nobyembre 15, 2010

Kaybait ng Pangarap Kong Musa

KAYBAIT NG PANGARAP KONG MUSA
ni Gregorio V. Bituin Jr.
10 pantig bawat taludtod

kaybait ng pangarap kong musa
walang poot akong nadarama
kundi sa puso'y pawang ligaya
gayong sa buhay ay nagdurusa

ang pangarap kong musa'y kaybait
laging nakangiti, di magalit
gayong palagi kong kinukulit
kahinahunan niya'y kaylupit

kaya ko siya iniingatan
siya ang musa sa panagimpan
anumang mangyari'y di iiwan
makaharap man ay kamatayan

dahil bihira ang tulad niya
ngiti'y kaytamis, mukha'y kayganda
mahinahon at mapagpasensya
kalooban ko nga'y sumasaya

Sabado, Nobyembre 13, 2010

Bulong ng Buryong

BULONG NG BURYONG
ni Gregorio V. Bituin Jr.

bumubulong-bulong ang buryong
habang tumitilamsik ang poot

di na maaninaw ang ninanasa
nagdurugo ang puso sa di makita

Pagdurusa ng Makabagong Sisa

PAGDURUSA NG MAKABAGONG SISA
ni Gregorio V. Bituin Jr.

nawawala ang anak
napabayaan
dahil sa kawalang katiyakan
dahil sa kagutuman
dahil sa kalupitan
lansangan ang laruan
lansangan ang tahanan
lansangan ang kainan
lansangan ang tulugan
hanggang mapabayaan
at mawala ang mahal na anak

Huwebes, Nobyembre 11, 2010

Pagbati sa Kapaskuhan

PAGBATI SA KAPASKUHAN
ni matang apoy

Buong taon man tayong nakikibaka
Dahil sa kabulukan ng sistemang nakagisnan dito
May isang araw naman ng pagsasaya
Maligayang Pasko at Manigong Bagong taon sa inyo!
Isang araw na may pagpapala't grasya
Tuloy pa rin ang laban at ang adhikaing pagbabago

Nang Mawala ang Tinig

NANG MAWALA ANG TINIG
ni greg bituin jr.
9 pantig bawat taludtod

nagluluksa ang buong kabig
nang mawala ang kanyang tinig
pagkat hindi na maririnig
ang kayganda niyang paghimig

Martes, Nobyembre 9, 2010

Sa Pagkawala ng Mutya

SA PAGKAWALA NG MUTYA
ni greg bituin jr.
tulang tanaga

nagluluksa ang madla
nang mawala ang mutya
puso nila'y lumuha
diwa nila'y tulala

Lunes, Nobyembre 8, 2010

Kalayaan sa Takot

KALAYAAN SA TAKOT
ni Gregorio V. Bituin Jr.
11 pantig bawat taludtod

"The only real prison is fear, and the only real freedom is freedom from fear." ~ Aung San Suu Kyi

hangga't takot tayo't di pumapalag
tatanggapin natin lagi'y paghamak
pang-aapi'y dapat nating ilantad
at bulok na sistema'y maibagsak

kung nabibilanggo tayo sa takot
lagi na lang tayong manghihilakbot
kung lagi lang tayong lalambot-lambot
aapihin lang ng mga kilabot

ang dulot ng takot ay laging luha
para bang sa buhay ay isinumpa
at ang hinahanap ngayon ng madla
sa takot ay ganap tayong lumaya

lalaya lang kung mauunawaan
kung bakit dapat walang katakutan
kung bakit dapat nating malabanan
kung bakit bulok itong lipunan

ang takot ay huwag nating isipin
pagkat takot nama'y mawawala rin
mga mang-aapi'y ating durugin
pagsasamantala'y ating gapiin

mabubuhay tayong may katarungan
sa mundong itong kayraming gahaman
kumilos tayo't takot ay iwasan
nang matamo'y ganap na kalayaan

Nasa ng Magkatalingpuso

NASA NG MAGKATALINGPUSO
ni Gregorio V. Bituin Jr.
8 pantig bawat taludtod

(mula sa isang blog - 3 things that you want in a relationship: "Eyes that won't cry, Lips that won't lie, and Love that won't die!")

mayroon daw tatlong bagay
na dapat tandaang tunay
nang relasyon ay tumibay:
pagsintang di mamamatay
dapat mata'y di luluha
labi'y di magkakaila
itong tatlo kaipala
ang niig ng puso't diwa

Sabado, Nobyembre 6, 2010

Mga Madasalin Daw

MGA MADASALIN DAW
ni Gregorio V. Bituin Jr.
13 pantig bawat taludtod

yung mga paring nangangaral sa simbahan
pati mga madasaling manong at manang
pulubi sa paligid ay pinabayaan
mura ng mura pagkagaling sa simbahan
kitang-kita sa Quiapo ang katotohanan
pagkat mapapalad iyang nahihirapan
basura ang turing sa nasa karukhaan
di kasi nagugutom silang mayaman
kaya nga sila'y mga walang pakialam
pakitang tao na't nagbabait-baitan
at madasalin daw silang mga gahaman
tingin pwesto sa langit ay mababayaran
pulos balatkayo silang nasa simbahan
binobola tayo ng mga gagong iyan

Bakahin ang mga kuhila

BAKAHIN ANG MGA KUHILA
ni Gregorio V. Bituin Jr.
13 pantig bawat taludtod

dapat nating bakahin ang mga kuhila
pagkat pulos kasakiman ang nasa diwa
may puso'y walang puso na nagdaralita
may utak nga ngunit sila'y utak talangka

nariyan ang pulitikong pawang pangako
na malimit namang kanilang pinapako
sa utak nila lagi'y interes at tubo
taumbayan pa'y madalas ipagkanulo

nariyan ang naturingang lingkod ng bayan
may maselang posisyon sa pamahalaan
ngunit hindi mahingan ng tulong ng bayan
pagkat amo pala niya'y mga dayuhan

sa samahan, mayroong ding mga kuhila
nagtataksil sa kapwa nila manggagawa
lilo rin sa kapwa maralita't sa madla
mga ganito'y kuhilang dapat mawala

katumbas ng pagkatao'y tatlumpung pilak
ganyan ang kuhilang sa atin nanghahamak
kunwari'y kabig, iyon pala'y pusong uwak
hudas silang ilulublob ka lang sa lusak

ang mga kuhila'y dapat nating bakahin
lugmok na yaong pagkatao nilang angkin
mga lilo't sukab ay dapat lang tanggalin
gawin na bago pa nila tayo patayin

Paskong Tuyo ng Mahirap

PASKONG TUYO NG MAHIRAP
ni greg bituin jr.
11 pantig bawat taludtod

paskong tuyo man ang kinakaharap
tuloy pa rin ang laban ng mahirap
isulong ang sosyalismong pangarap
hanggang sa magtagumpay tayong ganap

Huwebes, Nobyembre 4, 2010

Paano nga ba ginagawa ang tula?

PAANO NGA BA GINAGAWA ANG TULA?
ni Gregorio V. Bituin Jr.
13 pantig bawat taludtod

paano ba ginagawa ang mga tula
kung yaong tumutula'y walang ginagawa?
paano hinahabi ang mga salita
kung ang sinasalita'y pulos dusa't luha?
paano naglulupa ang nagmamakata
kung yaong turing sa makata'y hampaslupa?
bakit sa tula'y hibik yaong bumabaha?
dahil nga ba kahirapan na'y lumalala?
kailan hahabi ng tula ng paglaya
ang makatang paglaya yaong nasa diwa?
sa tula sinusulsi yaong winiwika
habang pinapangarap nito ang paglaya
hinuhukay sa lupa ang mga kataga
at inaararo sa bukid ng salita
upang yaong mga hinasik ng makata
ay lumago bilang punong tinitingala

Miyerkules, Nobyembre 3, 2010

Hustisya'y Hagilapin

HUSTISYA'Y HAGILAPIN
ni Gregorio V. Bituin Jr.
9 pantig bawat taludtod

"The dead cannot cry out for justice; it is a duty of the living to do so for them." ~ Lois McMaster Bujold, Diplomatic Immunity, 2002

marami na silang pinaslang
humihingi ng katarungan

ngunit wala silang magawa
pagkat nalibing na sa lupa

kaya sino ang maghahanap
sa hustisyang di mahagilap

kundi tayong naritong buhay
na tulad nila'y nalulumbay

hustisya'y ating hagilapin
ito'y isa nating tungkulin

sila'y wala nang magagawa
upang ang hustisya'y mapala

tayong buhay ang maghahanap
sa hustisyang pinapangarap

Inhustisya sa Lumang Sistema

INHUSTISYA SA LUMANG SISTEMA
ni Gregorio V. Bituin Jr.
11 pantig bawat taludtod

If it were not for injustice, men would not know justice. ~ Heraclitus (540 BC - 480 BC)

nalalaman ng tao ang hustisya
pagkat may naganap na inhustisya
lalo na't nasaktan ang puso nila
di maatim ang pagsasamantala

manggagawa'y di mabayarang tama
ng halaga nitong lakas-paggawa
kapitalista'y laging nanunuba
kapital ay tila kasumpa-sumpa

maralita'y laging dinedemolis
ng mga elitistang kaybabangis
ang tingin sa kanila'y parang ipis
na sa kalunsuran dapat matiris

pati reproduktibong karapatan
na dapat sa mga kababaihan
ay tinututulan nitong simbahan
tila babae'y walang karapatan

magsasaka'y araro ng araro
wala pa ring sariling lupa ito
habang busog ang mga asendero
sa mga pesanteng nagtatrabaho

sa gobyerno'y laganap ang tiwali
pnahihintulutan kahit mali
mga trapo'y di dapat manatili
sa gobyernong ginawa nang pusali

pinaslang na aktibista'y kayrami
pamahalaa'y tila walang silbi
nasa posisyon ay kayraming imbi
sa inhustisya'y kayrami ng saksi

nasaan ang hustisya, nasaan na
para sa mga obrero't masa
mahahanap ba sa lumang sistema
ang hinahagilap nating hustisya

Oda sa Batang Kinagat ng Dilim

ODA SA BATANG KINAGAT NG DILIM
ni Gregorio V. Bituin Jr.
6 pantig bawat taludtod

bagang niya'y tiim
at mukha'y umasim
nang ang isang bata'y
kinagat ng dilim
may pangil ang lagim
nakaririmarim
at siya'y nanindim

Martes, Nobyembre 2, 2010

Muling Panata

MULING PANATA
ni Gregorio V. Bituin Jr.
10 pantig bawat taludtod

(sa puntod ng bayaning manggagawa)

kaysarap na muling makasama
ang tinitibok ng pusong ito
sa kay-aliwalas na umaga
nang kami'y pumuntang sementeryo

kaya namanata akong muli
sa puntod ng lider-manggagawa
ako'y tapat na mananatili
na magpopropaganda sa madla

ng sosyalista naming tungkulin
upang mapalitan ang sistema
at manggagawa'y pagkaisahin
sa adhikaing bagong sistema

kasama ang kanyang naiwanan
na sa puso'y nais mapalapit
biyuda niya'y di ko iiwan
kahit buhay ko'y maging kapalit

panata itong nananatili
sa puso ko hanggang kamatayan
sosyalismo'y dapat ipagwagi
biyuda'y di ko pababayaan

salamat sa muli kong panata
na tumatak na sa diwa't puso
para sa uring mapagpalaya
pumatak man dito'y aking dugo

Linggo, Oktubre 31, 2010

Pabrika't Asyenda'y Kunin na ng Masa

PABRIKA'T ASYENDA'Y KUNIN NA NG MASA
ni Gregorio V. Bituin Jr.
12 pantig bawat taludtod

ang lahat ng masa'y dapat magkaisa
para maagaw ang asyenda't pabrika
pribadong pag-aari yaong dahilan
ng dusa't hirap ng mga mamamayan
hangga't inaari yaong kagamitan
sa produksyon maraming mahihirapan
pagkat magpapasasa lang ay iilan
sa lakas-paggawa nitong sambayanan
kaya masa'y nararapat magkaisa
upang agawin ang asyenda't pabrika
mula sa kamay ng mga elitista
lalo na't asendero'y kapitalista
pag ang pribadong pag-aari'y nawala
mga mahihirap ay di na luluha

Sabado, Oktubre 30, 2010

Ang Paglaya ng Iba'y Paglaya Mo

ANG PAGLAYA NG IBA'Y PAGLAYA MO
ni Gregorio V. Bituin Jr.
11 pantig bawat taludtod

You can only protect your liberties in this world by protecting the other man's freedom. You can only be free if I am free. ~ Clarence Darrow

paanong sarili'y poprotektahan
kung ang kapwa mo'y walang kalayaan
magiging ganap na malaya ka lang
kung iba'y may ganap na kalayaan

kaya halina't tayo'y makibaka
durugin yaong mapagsamantala
pawiin yaong bulok na sistema
kalayaa'y dapat kamtin ng masa

ang paglaya ng iba'y paglaya mo
paglayang dapat nating matrabaho
sa mundong itong sadyang gulong-gulo
sa karapatang di nirerespeto

nasa kamay natin ang kalayaan
kaya halina't tayo'y magtulungan

Biyernes, Oktubre 29, 2010

Ako man ay nasa malayo

AKO MAN AY NASA MALAYO
ni Gregorio V. Bituin Jr.

ako man ay nasa malayo,
malapit din naman ang puso,
kahit sa malayo'y nasisiphayo
kahit puso ma'y nagdurugo,
kahit dugo ko ma'y mabubo,
magapi man ako't matuliro,
di pa rin ako sumusuko,
kahit tanghalin pa akong bungo.

Diwata kang sa buhay ko'y tunay na inspirasyon

Diwata kang sa buhay ko'y tunay na inspirasyon
Iniibig kita saksi ang kahapon at ngayon
Tigib sa pagkilos upang kamtin ang aspirasyon
At gagawin ang lahat nang di mabigo sa layon
Sinasamba kita't sa larawan mo'y nakatitig
Rinig mo ba ang pagsamo ng pusong umiibig?
Espesyal ka sa akin at lagi kang bukambibig
Pupupugin ka ng halik, ikukulong sa bisig
Upang kitang dalawa'y tuluyan nang maging isa
Yamang ikaw ang nasa ng puso kong nagdurusa
Ako't ikaw sana'y habambuhay na magkasama
Nang ating mabuo ang isang malaking pamilya
- gregbituinjr.

Huwebes, Oktubre 28, 2010

Pinupog kita ng halik sa aking panaginip

Pinupog kita ng halik sa aking panaginip
Isa kang diwatang sa dibdib ko'y humalukipkip
At mutyang sa anumang panganib ay sinasagip
Mistulang ang iwi mong ganda'y laging nasa isip
Oo, sinta, sa kabila ng aking kakulangan
Nagagawa ko pa rin ang ibigin kang tuluyan
Tunay kitang kasama sa lahat ng aking hakbang
At lagi kang kaniig sa bawat kong panagimpan
Laging sa sarili, iwing puso ko'y nangangako
Buong pagsintang alay ko'y huwag sanang mabigo
Ang samo ko lang, tanggapin mo ang aking pagsuyo
Nang madama ng puso ko'y ligaya, di siphayo
- gregbituinjr.

Pinagpipitagan ang tulad mong isang diyosa

Pinagpipitagan ang tulad mong isang diyosa
Iniibig kita, O, minumutya kong dalaga
Ako'y narito, tanggapin mo ang aking pagsinta
Maging sino ka man, O dilag, sinasamba kita
Oo, isa lamang akong lupa, ikaw ay langit
Ngayon nga, larawan mo sa puso ko'y nakaukit
Tatanggapin ko ang pasiya mo kahit masakit
Ang pag-ayaw mo man sa aki'y malaking hagupit
Labis kitang iniibig, oo, kita'y inibig
Bawat kong pagdulog sa iyo'y di sana malupig
Ang pinapangarap ko'y kulungin kita sa bisig
Nang mahagkan ka't aking mayapos ng buong igting.
- gregbituinjr.

Miyerkules, Oktubre 27, 2010

Ang Pasko'y Isang Anestisya

ANG PASKO'Y ISANG ANESTISYA
ni Gregorio V. Bituin Jr.
9 pantig bawat taludtod

1
isang araw ng kapaskuhan
buong taon ng kahirapan
mapait na katotohanan
pampamanhid sa mamamayan
2
kaya anong silbi ng pasko
ito lang ba'y pakitang tao
nasaan na ang pagbabago
na pangarap ng masa dito
3
nasaan na ang karapatan
sa sapat na paninirahan
iskwater na ba'y may tahanan
pag sumapit ang kapaskuhan
4
titigil ba ang demolisyon
pati na kontraktwalisasyon
ngunit sa susunod na taon
magpapatuloy pa rin yaon
5
masasabatas bang tuluyan
ang dapat sa kababaihan
reproduktibong karapatan
ba'y tuluyan nang igagalang
6
serbisyo ba'y di na negosyo
ang dala ng Pasko sa tao
magmamahalan bang totoo
ang tao, trapo at gobyerno
7
isang araw ng kapaskuhan
buong taon ng kahirapan
mapait na katotohanan
pampamanhid sa mamamayan
8
di ba't sa susunod na taon
ganito pa rin naman iyon
tulad ng nakaraang taon
Pasko'y pampamanhid din ngayon
9
itong Pasko pag nakalipas
hirap muli ang madaranas
ang trapo'y muling balasubas
gobyerno muli'y mandarahas
10
ang Pasko'y isang anestisya
ang tao'y nagkakaamnesya
ang Pasko'y pampamanhid pala
sa hapding dulot ng sistema

Lunes, Oktubre 25, 2010

Saanman

SAANMAN
ni Greg Bituin Jr.

saanmang gubat, may ahas
saanmang lungga, may daga
saanmang bahay, may bantay
saanmang baryo, may dayo
saanmang bansa, may bata

saanmang gusali, may tiwali
saanmang pusali, may tabingi
saanmang kubeta, may bara
saanmang gobyerno, may trapo
saanmang impyerno, may gago

Linggo, Oktubre 24, 2010

Isa Kang Bugtong

ISA KANG BUGTONG
ni Gregorio V. Bituin Jr.
10 pantig bawat taludtod

isa kang bugtong, magandang dilag
na sa puso ko'y nagpapapitlag
naglalaho ang bawat bagabag
pag-ibig nga ba'y totoong bulag

dilag, isa ka bang talinghaga
sa aking puso'y nagtanikala
pinipitas mo'y puso ko't diwa
ikaw sa aki'y nagbigay tuwa

ano ang tugon sa iyong bugtong
ating bituka ba'y magdudugtong
sama ka kaya kapag lumusong
baha'y abot na sa aming silong

di mo na ako masisisi pa
sa katunayang iniibig ka
huwag mo sanang biguin, sinta
ang iwing pusong nag-aalala

Sabado, Oktubre 23, 2010

Wala sa anumang bagay ang kasiyahan

WALA SA ANUMANG BAGAY ANG KASIYAHAN
ni Gregorio V. Bituin Jr.
13 pantig bawat taludtod

Joy is not in things; it is in us. ~ Richard Wagner

wala sa anumang bagay ang kasiyahan
kundi nasa puso iyang kaligayahan
aanhin mo pa ang maraming kayamanan
kung wala kang pagmamahal at kaibigan

ang kasiyahan ay nagmumula sa puso
kung may pag-ibig tayo'y di matutuliro
kasakiman mo'y palitan ng pagsuyo
anumang kagaspangan ay dapat maglaho

Paghikayat at Pagkilos

PAGHIKAYAT AT PAGKILOS
ni Gregorio V. Bituin Jr.
13 pantig bawat taludtod

In the end, we will remember not the words of our enemies, but the silence of our friends. ~ Martin Luther King Jr.

hinihikayat natin ang masang kumilos
upang mabago ang buhay nilang hikahos
pagtatrabaho para sa pamilya'y kapos
sadyang dapat pigilin ang pambubusabos

ng sistemang kasalukuyang umiiral
na sa manggagawa'y sadyang nakasasakal
"magsikilos tayo" ang lagi nating usal
"durugin natin ang sibasib ng kapital"

anang kapitalista, tayong mga obrero raw
ay walang magagawa pag sila'y humataw
"kami'y makapangyarihan" ang laging hiyaw
ang tinatanggap pa ng obrero'y tungayaw

ngunit basta tanggap lang ng tanggap ang iba
kahit alam nang sila'y nasasamantala
nanahimik habang tayo'y nakikibaka
kahit inaapi na ng kapitalista

malilimutan natin ang kapitalista
anuman ang pang-aapi't pasaring nila
ngunit yaong nang-iwan sa mga kasama
ay di malilimot ng mga nakibaka

kikilos ba tayo pag tapos na ang laban
habang may labanan ay pinababayaan
yaong kapamilya, kasama't kaibigan
mahirap ngang makasama ang nang-iiwan

Huwebes, Oktubre 21, 2010

Pribadong Pag-aari'y Dapat Nang Maglaho

PRIBADONG PAG-AARI'Y DAPAT NANG MAGLAHO
ni Gregorio V. Bituin Jr.
13 pantig bawat taludtod

pribadong pag-aari'y dapat nang maglaho
ito ang sanhi kung bakit dugo'y nabubo
kung bakit maraming naging sakim sa tubo
kung bakit may ilang nabubuhay sa luho

pribadong pag-aari'y dapat nang mapalis
kung bakit bahay ng dukha'y dinedemolis
kung bakit api ang nagpatulo ng pawis
kung bakit masa'y pinipisang parang ipis

pribadong pag-aari ang siyang dahilan
kung bakit maraming ganid sa mamamayan
kung bakit sinakop ng dayuhan ang bayan
kung bakit laganap pa rin ang kahirapan

pag inari ang kagamitan sa produksyon
kontrolado nila ang kahit anong nasyon
lalo ngayong laganap ang globalisasyon
liberalisasyon at kontraktwalisasyon

dapat durugin ang pribadong pag-aari
at ang bulok na sistema'y dapat mapawi
kasamang durugin ang mga hari't pari
sa mundo sila'y di na dapat manatili

Miyerkules, Oktubre 20, 2010

P300, 3 Taong Walang Serbisyo

TATLONG DAANG PISO,
TATLONG TAONG WALANG SERBISYO

ni Gregorio V. Bituin Jr.
15 pantig bawat taludtod

tatlong daang piso ang bayad sa bawat boboto
ng mga mayayaman at gahamang pulitiko
tatlong daang pisong kapalit ng pagkapanalo
ng trapong wala namang serbisyo sa mga tao

napipilitan itong tanggapin ng mga dukha
nang may maipanlaman sa tiyan nilang kawawa
baryang kapalit ng buhay na pulos dusa't luha
ibinentang karampot ang puri ng maralita

di namalayang kapalit ng tatlong daang piso
ay pagsang-ayon sa tatlong taong walang serbisyo
dahil babawiin ito ng mga pulitiko
sa pangungurakot sa kanilang pagugubyerno

kawawa tayo sa mga pulitikong kuhila
sa ganitong sistema ba'y wala tayong magawa?

Linggo, Oktubre 17, 2010

Pagdaluyong ng Inhustisya

PAGDALUYONG NG INHUSTISYA
ni Gregorio V. Bituin Jr.
13 pantig bawat taludtod

"When injustice becomes law, resistance becomes duty." - islogan ng grupong Resistance

kung sakaling di maapuhap ang hustisya
na pinapangarap ng inaaping masa
magiging tungkulin na nating magkaisa
upang labanan ang anumang inhustisya

pag kawalang katarungan ang naging batas
sa sistemang pinamumugaran ng ahas
tungkulin nating labanan ang mga pangahas
at tuluyang durugin silang talipandas

dumadaluyong ang anumang inhustisya
dahil may mga taong nais makaisa
inhustisyang dulot ng bulok na sistema
ang pagragasa ng kagahamanan nila

magkaisa laban sa mga mararahas
hustisya ang dapat upang tayo'y maligtas

Sabado, Oktubre 16, 2010

Ang Pagpawi

ANG PAGPAWI
ni Gregorio V. Bituin Jr.
11 pantig bawat taludtod

"Darkness cannot drive out darkness; only light can do that.
Hate cannot drive out hate; only love can do that."
~ Dr. Martin Luther King Jr.


di mapapawi ng dilim ang dilim
pagkat dalawang ito'y pareho lang
ang tanging makapapawi sa dilim
ay ang tinatawag nating liwanag

di mapapawi ng galit ang galit
pagkat dalawang ito'y pareho din
ang tanging makapapawi sa galit
ay ang tinatawag nating pag-ibig

unawain nating mabuti ito
na kung nais natin ng pagbabago
ay mabuting magsuri muna tayo
upang tayo'y di naman magkagulo

Subok sa Serbisyo o Subok sa Serbesa?

SUBOK SA SERBISYO
o SUBOK SA SERBESA?

Gregorio V. Bituin Jr.
13 pantig bawat taludtod

sa Barangay Tagay, maraming kandidato
nag-iikot, kumakaway sa mga tao
sila'y umaasang sila'y maiboboto
nais maglingkod, kahit daw sila'y lasenggo

kabarangay nila'y duda pa sa kanila
pag nanalo'y tiyak masusubukan sila
subok sa serbisyo o subok sa serbesa
ito'y katanungan ng kapitbahay nila

kung sa Barangay Tagay sila'y mananalo
ano kayang magagawa nila sa pwesto
mga permit, tataasan nila ng presyo
para may pantagay, kotong doon at dito

bilang lingkod-bayan, sila nga ba'y handa na
na totoong maglingkod sa Barangay nila
di pa maalis-alis ang duda ng masa
kung katapata'y sa serbisyo o serbesa