Miyerkules, Disyembre 23, 2009

Ang Bunga ng Kalumpit



ANG BUNGA NG KALUMPIT
ni Gregorio V. Bituin Jr.
15 pantig bawat taludtod

Taal akong tagalunsod ng Maynila, kasama
Kaya kapag sa lalawigan ako’y nakapunta
Kinawiwilihan ko ang sa mga puno’y bunga
Tulad ng prutas ng kalumpit sa nayon ni ama.

Kaya noong bata pa ako’y kanyang sinasama
Sa lalawigang Batangas na sinilangan niya
Doon pa lang sa bus ay kinasasabikan ko na
Ang pagtungo sa Balayang sinilangan ni Ama.

At pagsapit sa bahay na kinalakihan niya
Mga pinsan ko’y naroroon at nangungumusta
Tanong agad sa pinsan, “Kalumpit ba’y namunga na?”
At kung may bunga, magpipinsa’y agad mangunguha.

Bunga ng kalumpit ay tila duhat ang kapara
Ngunit di itim kundi abuhin ang kulay niya
Kung duhat ay makinis, kulubot naman ang bunga
Nitong kalumpit na sa puno’y aming pinanguha.

Nasasabik din sa kalumpit ang mahal kong ina
Di ko lang alam kung sa Antiqueng minulan niya
Sa lupain ng mga kamag-anak kong Karay-a
Ay may kalumpit ding sa lupa nila’y namumunga.

Ang kalumpit pag nginata’y mas malambot ang duhat
Kaya dapat na matibay ang ngipin mong pangkagat.

Habang may pluma

HABANG MAY PLUMA
ni Gregorio V. Bituin Jr.
1O pantig bawat taludtod

habang may pluma'y patuloy ako
sa pagsusulat ng artikulo
sa paglilingkod sa kapwa tao
at sa pagmumulat ng obrero

habang may pluma ako'y patuloy
na isusulat yaong panaghoy
ng masang karamiha'y palaboy
dahil sa lipunang binababoy

patuloy ako habang may pluma
sa pagsusulat para sa masa
patuloy sa pagpo-propaganda
upang mabago na ang sistema

magpapatuloy akong kumatha
ng mga sanaysay, kwento't tula
para sa hukbong mapagpalaya
para sa kapwa ko maralita

kung sakaling mawala ang pluma
o kaya'y matuyuan ng tinta
ito'y tanda ng pakikibaka
at paglilingkod nito sa masa

kung sakaling ang pluma'y mawala
ay huwag malumbay o lumuha
nawa'y ibaon ito sa lupa
ng may respeto sa kanyang diwa