Huwebes, Setyembre 10, 2009

Asal at Pagkatao

ASAL AT PAGKATAO
ni Gregorio V. Bituin Jr.
8 pantig bawat taludtod (dalit)

Mahilig sa kasabihan
Itong ating kababayan
May aral na kainaman
Para sa kinabukasan.

Mga kasabihang ito
Ay gabay ng bawat tao
Sa buhay at bukas dito
Sa ginagalawang mundo.

Ang taong lagi nang gipit
Di maapuhap ang langit
Pag nawalan na ng bait
Sa patalim kumakapit

Ang taong wala raw pilak
Parang ibong walang pakpak
Buhay niya'y di matiyak
Tingin sa sarili'y hamak.

Ang tao kapag mayaman
Marami pang kaibigan
Ngunit pag naghirap naman
Siya na'y nilalayuan.

Ang taong laging inggitin
Sumaya man ay sawi rin
At kung di siya palarin
Ang sa iba'y aagawin.

Ang taong wala raw kibo
Nasa loob yaong kulo
Kaya minsan siya'y dungo
At ang puso'y nagdurugo

Malalaman sa gawa mo
Ang tunay mong pagkatao
Kaya puri't dangal ito
Na pag-ingatang totoo.