3 maikling tula
ni Gregorio V. Bituin Jr.
DI UMUURONG
Mandirigma akong handa sa labanan
Di umuurong sa anumang larangan
Sa rebolusyon maging sa pag-ibig man
Hanggang sa dulo kita’y ipaglalaban
Pagkat dyosa ka ng puso ko’t isipan.
NAG-IISA LANG
Sa puso ko’y isa lang ang paraluman
Na aking mamahali’t aalagaan
Pag nalasap ko’y matinding kabiguan
Mabuti pang pasagpang kay Kamatayan.
DI LANG MAKATA
Bakit ako mangangamba
Na sabihing mahal kita
Ako’y di lang mandirigma
Ako’y isa ring makata.
O, pangarap kita, sinta
Ikaw ang tangi kong musa.
Walang komento:
Mag-post ng isang Komento