Miyerkules, Mayo 28, 2008

Walang Atrasan

Walang Atrasan
ni Gregorio V. Bituin Jr.

kasama, sa malao’t madali’y
magkukulay pula ang silangan
upang wasakin ang mga talipandas
wala ditong makaiiwas

dapat kang maging handa
sa tunggalian ng uri sa lipunang
binaboy ng mga naghahari-harian

kaya ngayo’y ihanda mo na
ang lakas ng iyong bisig
ang talas ng iyong pakiramdam
ang talim ng iyong utak
ang sugat sa iyong pusong di pa
naghihilom hanggang ngayon

ang tanging hiling lamang sa iyo
sa pagsagupa mo sa unos
ay huwag kang aatras
kapag pumula na ang silangan

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo IX, Blg. 1, Taon 2004, p.8. 

Itigil ang mga Pamamaslang!

ITIGIL ANG MGA PAMAMASLANG
ni Gregorio V. Bituin Jr.
(Ayon sa ulat, umaabot na sa mahigit pitundaang progresibo’t aktibista ang napapaslang simula nang maupo si Gng. Gloria Arroyo sa poder. Ang sumusunod na tula’y may labing-isang pantig bawat taludtod.)

Bang! Iyon ang agad na naulinig
Bang! Bang! Ang sumunod nilang narinig
Bang! Bang! Bang! Yaon nga'y nakatutulig
Kagimbal-gimbal at nakayayanig!

Umano’y pitundaan na ang bilang
Ng mga progresibong napapaslang
Tinadtad ng bala ng mga halang
Na alagad nitong sistemang hunghang.

Marami na ang natigmak ng dugo
Pawang binistay, binutas ang bungo
Tayo’y masisindak ba’t madudungo
O ang hustisya’y dadalhin ng punglo?

Sa krimeng ito’y dapat may managot
Maparusahan sinuman ang sangkot
Ngunit ang gawain bang ito’y dulot
Ng gobyernong kilala sa kurakot?

Mga pamamaslang na walang habas
Ay dapat nang matigil at magwakas
Halina’t magkaisa nang mag-aklas
Laban sa sistemang napakarahas!

Nalathala sa publikasyong Taliba ng Maralita, Tomo XII, Blg 2, p.8.

Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML)

Linggo, Mayo 25, 2008

Bitamina A para sa mga Buntis at Ina

BITAMINA A
para sa Buntis at Nagpapasusong Ina
tula ni Gregorio V. Bituin Jr.
(mula sa isang babasahin sa kalusugan na ginawan ng makata ng tulang may lalabing-apating pantig bawat taludtod)

Kailangan ng mga nagpapasusong ina
At ng mga nagbubuntis ang Bitamina A
Para ngipin ay tumibay, luminaw ang mata
Buto’y tumatag, katawa’t buhay ay gumanda.

Pag ang buntis at ina sa bitamina’y kulang
Paglaki ng sanggol ay baka maging mabagal
At baka manghina pa ang kanilang katawan
Pagkain ay dapat sa bitamina’y mayaman.

Dapat kainin ng nagdadalangtao’t ina
Ay mga dilaw na prutas at gulay, kagaya
Ng karot, kamote, dilaw na mais, papaya
Pati tyesa, kalabasa at hinog na mangga.

Berde’t madahong gulay tulad ng alugbati,
Malunggay, petsay, kangkong, litsugas at brokoli
Dahon ng ampalaya at talbos ng kamote
Isama pa ang mustasa at dahon ng gabi.

Karne’t isda’y mayaman din sa Bitamina A
Keso, gatas, pula ng itlog at mantekilya
Kaya’t buntis at ina’y alagaan talaga
Nang lumakas sila’t ang sanggol na dinadala.

Pahabol:
Ang Bitamina A ay di sa kanila lamang
Kundi sa atin din, sa lahat ng mamamayan
Kaya’t tayo kung nais lumakas ang katawan
Mag-Bitamina A na para sa kalusugan.

Mayo 24, 2008
Sampaloc, Maynila

Huwebes, Mayo 22, 2008

Bahong Tinatakpan, Aalingasaw Din

BAHONG TINATAKPAN, AALINGASAW DIN
ni Gregorio V. Bituin Jr.

Karaniwan na nga pag may nangyari
Mga kalokoha’t mga pang-aapi
Ay itinatago nilang magkakampi
Baho’y tinatakpan ng magkukumpare.

“Ay, wala, di kami,” madalas masabi
Kunwa’y walang alam, walang atubili
Pero tagong krimen, di mananatili
Aalingasaw din ito bandang huli.

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Oktubre-Disyembre 2001, p.8.

Pulitikong Balat-Ahas

PULITIKONG BALAT-AHAS
ni Gregorio V. Bituin Jr.

Iyo nang binigo itong maliliit
Sa mga pangakong iyong binitiwan
Pati eksploytasyon nitong mga paslit
Pinasok mong pilit, ikaw na gahaman.

Dami mong pangako sa’ting mamamayan
Pulos ka panatang di pala magawa
Sinumpa mo pala’y di katotohanan
Para lang tinahing sanga-sangang dila.

Ikaw’y pulitikong sadyang walang buhay
Pinaasa mo lang kaming mahihirap
Sa mga gawa mo’y sadya kaming nakabantay
Ang gaya mo pala’y sadyang mapagpanggap.

Sa mga tulad mo kami’y nadadala
Sa’yo pala’y wala kaming mapapala.

Pinasa sa LIRA workshop
Nobyembre 24, 2001

Silang mga Manggagawa

SILANG MGA MANGGAGAWA
ni Gregorio V. Bituin Jr.
(estilong Villanelle)

Silang mga gumagawa ng ekonomya ng bansa
Ay ang mga manggagawang makikitang taas-noo
Lipuna’y pinanday nila, ng kamay na mapagpala.

Una, mailalarawan sa ilang mga kataga
Mga katatagan nila, hirap, mga sakripisyo
Silang mga gumagawa ng ekonomya ng bansa.

Ikalawa, sama-sama tungo sa pagpapalaya
Nang manggagawa’y makamit ang tunay na pagbabago
Lipuna’y pinanday nila, ng kamay na mapagpala.

Ikatlo, tutuparin na ang binitiwang salita
Kikilos ng tuluy-tuloy makikibakang totoo
Silang mga gumagawa ng ekonomya ng bansa.

Ikaapat, sa pagsuri’y di kami namamangha
Ang kanilang mga gawa’y inaayos nilang husto
Lipuna’y pinanday nila, ng kamay na mapagpala.

Progreso nitong lipunan sa kanila’y nakatakda
Sambayana’y di uunlad kung sila ay wala rito
Silang mga gumagawa ng ekonomya ng bansa
Lipuna’y pinanday nila, ng kamay na mapagpala.

Pinasa sa LIRA workshop
Nobyembre 24, 2001

Lunes, Mayo 19, 2008

Dignidad

DIGNIDAD
ni Gregorio V. Bituin Jr.
19 pantig bawat taludtod

Naninirahan ako ng mapayapa sa aba kong tahanan
Marangal na nagpapatulo ng pawis kahit nahihirapan
Huwag lamang iniingatan kong dignidad ay iyong yurakan
Sapagkat mamatay man ako, buhay ito sa aking libingan

Kapag sinaling mo ang aking dignidad, tiyak ako'y lalaban
Dudurugin kita kahit maghalo ang balat sa tinalupan
Lapastangan kang aking ibibitin sa karit ni Kamatayan
Maipagtanggol lamang ang dignidad na yaman ko sa lipunan.

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 2, Taon 2003, p.3.

Hindi Nililimot ang mga Nabulid sa Dilim ng Gabi

HINDI NILILIMOT
ANG MGA NABULID
SA DILIM NG GABI
ni Gregorio V. Bituin Jr.
(nalathala sa librong “Ningas-Bao” ni GBJ, p.64, at inilimbag ng Aklatang Obrero Publishing Collective)

(animan ang pantig
sa bawat taludtod)

kaming aktibista’y
di nakalilimot
sa mga nabulid
sa dilim ng gabi

ah, tama si Elias
sa kanyang habilin
huwag lilimutin
ang mga napaslang

at nagsakripisyo
upang kapakanan
ng nakararami
ay maipaglaban

sina Bonifacio
Rizal, Asedillo,
Edjop, Ninoy, Lean,
Ka Lando, Ka Popoy

ay iilan lamang
sa nagsakripisyo
para sa paglaya
nitong sambayanan

marami pang martir
ang walang pangalan
bayaning nagsilbing
aming inspirasyon

upang magpatuloy
sa pakikibaka
at ipagpatuloy
ang naiwang laban

ang inalay nila’y
sakripisyong tunay
at maraming aral
tayong mapupulot

sa mga prinsipyong
pinaglaban nila
at pinanghawakan
hanggang kamatayan

sana habang tayo’y
di nakalilimot
sa mga nabulid
sa dilim ng gabi

ay ating magisnan
ang bukang-liwayway
sa kanyang pagdatal
tungo sa paglaya

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa 
ng Maralitang Lungsod (KPML), Tomo VIII, Blg. 1, Taon 2003, p.8.

Liham kay Inay

LIHAM KAY INAY
ni Gregorio V. Bituin Jr.
(nalathala sa librong “Ningas-Bao” ni GBJ, p.65-67, at inilimbag ng Aklatang Obrero Publishing Collective)

minamahal kong inay,
alam kong ang mga pangarap
ninyo ni itay para sa akin
ay hindi natupad pagkat
iba ang landas kong tinahak
kaysa inyong kagustuhan

di ko kayo nais pasakitan, inay
ngunit anong magagawa ko
kung aking nakikitang
marami ang naghihirap
at maraming pinahihirapan,
mababa ang sweldo,
walang tiyak na trabaho,
lakas-paggawa’y binabarat,
patuloy ang demolisyon,
maraming walang tahanan,
di pantay na karapatan,
maraming walang trabaho,
napakarami ng nagugutom,
at masagana lang ay iilan,
ang masa’y pinagsasamantalahan,
gobyerno’y bulag, bingi’t manhid,
mga pinuno’y hanggang salita lamang

inay, nais kong maging bahagi
ng pagbabago at ayokong mabuhay
para lang sa pansariling
kaligtasan at kaligayahan
kaya, inay, manalo man o matalo
mabuhay man o mamatay
isinugal ko na ng buong buo
ang buhay ko’t kinabukasan
alang-alang sa rebolusyon upang
mabago itong bulok na sistema

ang mga sakripisyo ninyo’y
ramdam ko’t sakripisyo ko rin
ngunit alam ko, inay,
na ako’y inyong ikagagalak
pagkat nalalaman ninyong
ang inyong anak ay naging
bahagi ng pagbabago ng lipunan

kaya huwag kayong mag-alala, inay
pagkat hindi ko sinasayang
ang aking mga isinugal

maraming salamat, inay
sa inyong pagmamahal
at malalim na pang-unawa,
sana’y makapiling ko pa kayo
pag nanalo na ang rebolusyon
at nagtagumpay ang mga sosyalista

ngunit, inay, kung sakali mang
ako sa mundo ay mawala,
ang hiling ko lamang
ay huwag kayong luluha

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Oktubre-Disyembre 2002, p.8.

Panata sa Paglaya ng Uring Manggagawa

PANATA SA PAGLAYA NG URING MANGGAGAWA
ni Gregorio V. Bituin Jr.

(nalathala sa librong “Ningas-Bao” ni GBJ, p.67, at inilimbag ng Aklatang Obrero Publishing Collective)

mga manggagawa itong gumagawa
ng ekonomya ng bansa
alisin mo sila’t kapag nawala
itong mundo’y tiyak na titigil na

marami nang martir na manggagawa
ang nagsakripisyo, naghirap at nagdusa
napatotohanan namin ang mga aral nila
na ang paghihimagsik ay isang hustisya

makatarungang maghimagsik sa sistema
ng mga mapang-api at mapagsamantala
talastas naming may bagong mundo pa
na maitatayo itong uring manggagawa

kaya kaming mga sosyalista
ay nanumpang ioorganisa
at itutuloy ang mga pagbaka
ng mga martir na manggagawa

ipaglalaban namin ang mga obrero
pati kapakanan ng mga bagong tao
lalabanan namin ang kapitalismo
na siyang dahilan ng kasamaan sa mundo

bubuuin natin ang masayang mundo
mundong walang hayok sa tubo
kundi may sistemang sadyang matino
at mundong may bukas para kay bunso

nakatitik na sa aming sariwang dugo
ang mga aral ng marxismo at leninismo
kaya’t sosyalista kaming hindi susuko
hanggang sa lumaya ang mga obrero

mula sa kaibuturan ng aming puso’t isipan
sosyalismo’y aming ipaglalaban
panata itong aming panghahawakan
habang nabubuhay, maging sa kamatayan

Salamat sa Akdang "Liwanag at Dilim" ni Jacinto

SALAMAT SA AKDANG “LIWANAG AT DILIM” NI EMILIO JACINTO
ni Gregorio V. Bituin Jr.
12 pantig bawat taludtod

Maraming salamat, Emilio Jacinto
Sa maraming aral na binahagi mo
Ito’y tunay naming ikapapanuto
Sa lipunang itong dapat na mabago.

Ang ibinilin mong pagpapakatao
Ay dapat umiral ngayon sa’ting mundo
Tigilan ang away at mga perwisyo
Kundi magkaisa, maglingkod sa tao.

Liwanag at Dilim, malikot ang diwa
Sadyang nanggigising ang maraming paksa
Matalim, malalim ang iyong adhika
Na s’yang kailangan nitong ating bansa.

Maganda ang aral sa nakakabasa
Na nanaisin ngang maglingkod sa masa
Mga akda itong sa ami’y pamana
Isang pasalubong sa bagong umaga.

Mga sulatin mo ay napakahusay
Sa balat at diwa nami’y lumalatay
Mga aral itong dapat isabuhay
Tungo sa sistemang may pagkakapantay.

Maraming salamat sa iyong pamana
May liwanag ngayon kaming nakikita
Upang ating bayan ay mapagkaisa
At mabago itong bulok na sistema.

Salamat, salamat sa iyo, Jacinto
Pawang karangalan itong pamana mo
Pag-ibig, paglaya, pagpapakatao
Paggawa, katwiran, lahing Pilipino.

Nobyembre 7, 2007, Sampaloc, Maynila

(ang tulang ito'y nalathala sa librong “Liwanag at Dilim ni Emilio Jacinto” ni GBJ, p.45, at inilimbag ng Aklatang Obrero Publishing Collective)

Salamat, Doktor Che

SALAMAT, DOKTOR CHE
ni Gregorio V. Bituin Jr.
(nalathala sa librong “Medisina at si Dr. Che Guevara” ni GBJ, p.29, at inilimbag ng Aklatang Obrero Publishing Collective)

(lalabindalawahing pantig bawat taludtod)

Salamat, Doktor Che, sa iyong pamana
Ang sistema ngayon na tinatamasa
Ay pinag-ukulan ng pansin ng Cuba
Salamat, salamat, sa iyong ginawa.

Isang karapatan itong kalusugan
Na sa bansang Cuba’y sadyang tinutukan
Di tulad sa aming bansang Pilipinas
Magagamot ka lang kapag may pambayad.

Ipinakita mo at ipinadama
Na ang kalusugan ay matatamasa
Kung may pagbabago sa mga sistema
Pawang kagalingan ng tao ang una.

Pamana sa Cuba ay di lilimutin
Na makahulugang inspirasyon namin
Upang ang lipunan ay aming baguhin
Gagampanang husay ang aming tungkulin

Na una ang tao at hindi kalakal
Kalusugang libre ang ipaiiral
Sa bagong lipunang aming iluluwal
Upang bawat isa’y aming maitanghal.

Sabado, Mayo 17, 2008

Ang Lipunan

ANG LIPUNAN
tula ni Greg Bituin Jr.
8 pantig bawat taludtod

Lipuna’y di mamamatay
Kung kapitalista’y wala;
Lipuna’y di mabubuhay
Kapag walang manggagawa.

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Hulyo-Setyembre 2001, p.8.

Anim na Dalit sa Katotohanan

ANIM NA DALIT SA KATOTOHANAN
ni Greg Bituin Jr.

1
Pangulo ma’y sinungaling
Pulitiko ma’y balimbing
Gabinete’y pulos hangin
Baya’y di dapat humimbing.

2
Nais ko’y katiwasayan
Dito sa mahal kong bayan
Kaya’t ating ipaglaban
Ay pawang katotohanan.

3
Lozada’y muntik mamatay
Ngunit nagpasyang mabuhay
Upang kanyang masalaysay
Yaong pangyayaring tunay.

4
Mga Kasinungalingan
Ay dapat nating labanan
At itong katotohanan
Ay ilantad ng tuluyan.

5
Bungo ang pamahalaan
Buto’t kalansay ang bayan
Dahil maraming gahaman
Kawawa ang mamamayan.

6
O kilos na sambayanan
Baguhin itong lipunan
Dalhin ang mga gahaman
Patungong huling hantungan.

Lovetexts

Lovetext 1:
Ikaw ang liwanag sa buhay na mapanglaw
Sa tulad kong lagalag sa mundong ibabaw
Ikaw ay matatag na sa aki’y tumanglaw
Sa maghapo’t magdamag, nais ko’y ikaw.

Lovetext 2:
Ikaw lang ang tanging sa puso ko’y nakalaan
Payapa man ang mundo o may digmaan
Panata ko’y di ka iiwan
Makaharap ko ma’y si Kamatayan.

Lovetext 3:
Kung ikaw ay bulaklak, isa kang rosas
Kung ikaw ay ibon, isa kang kalapati
Kung ikaw ay alak, isa kang basi
Kung ikaw ay damdamin, ikaw ay pag-ibig

Kami ang mga Tupang Pula

KAMI ANG MGA TUPANG PULA
ni Gregorio V. Bituin Jr.
8 pantig bawat taludtod

kami’y mga tupang pula
mga pulang tupa kami
kaming mga aktibista

hindi kami tupang itim
na perwisyo sa magulang
at hindi rin tupang puti
na sunud-sunuran na lang
sa anumang kagustuhan
ng aming mga magulang

kami’y mga tupang pula
na palaging nakahanda
upang ipaglaban itong
kapakanan ng dalita

di kami nananahimik
sa bawat isyung dumatal
lalo na’t ito’y problemang
sambayanan ang kawawa

patuloy kaming kikilos
buhay man nami’y ialay
hanggang tuluyang mawasak
itong bulok na sistema

kami’y mga tupang pula
mga pulang tupa kami
kaming mga aktibista

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 3, Taon 2003, p.8.

Kung Paano Gumawa ng Tula

KUNG PAANO GUMAWA NG TULA
ni Greg Bituin Jr.

Sa tuwina’y pinipiga ko ang aking utak
Upang makagawa ng mga bersong
Magpapaalimpuyo sa mga tulog
Na damdamin ng uring api.
Tula

Habang binabati ko ang aking utak
Ay nilalabasan ito ng mga lansa’t katas
Ng diwang di mapakali sa nangyayari
Sa kasalukuyang lipunan.
Paglaya

At sa rurok ng pinigang utak
Ay pumupulandit ang himagsik
Laban sa mga mapanupil
Na alagad ng tubo’t kapital.
Katarungan

Ngunit masarap salsalin ang utak
Upang sa pagbubuntis ng diwa
Ay manganak ito sa sangmaliwanag
Ng adhikaing pagbabago.
Rebolusyon.

Nalathala sa publikasyong Taliba ng Maralita, Tomo IX, Blg. 3, Taon 2004, p.8. Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML).

Enero 21, 1924 - sa biglang pagpanaw ni V.I.Lenin

ENERO 21, 1924
(sa biglang pagpanaw ni V. I. Lenin)
tula ni Greg Bituin Jr.

Siya ang rebolusyon
kaya kinainggitan ng Hudyong
ngala’y Dora Kaplan na nagbaon
sa kanyang leeg ng isang punglong
pamatay, makalipas ang isang taon
ng tagumpay ng pag-aaklas
mabuti’t siya’y nakaligtas

Nunit siya, na nagsilbing
ningas sa mga Bolsheviks
upang mag-aklas sa Pulang Oktubre
at maitayo ang Unyon ng Sobyet
ay di nakaligtas sa ikatlong atake
ng sakit sa puso doon sa Gorki
na isang bayan sa labas ng Moscow

Panahon iyon ng panibagong Commune
na agad na sinaklot ng dilim
sa kanyang dagliang pagkawala
ngunit siya, ang rebolusyon,
ay mananatiling buhay
sa pamamagitan ng apatnapu’t
limang tomo ng kanyang mga akda.

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 1, Taon 2003, p.8.

Pebrero 6, 2001 - sa pagpaslang kay Ka Popoy


PEBRERO 6, 2001
(sa pagpaslang kay Ka Popoy Lagman)
ni Greg Bituin Jr.

nagbabaga ang takipsilim
ng Pebrero sais na yaon
nagdugo ang araw sa kanluran
tumatangis, nagngangalit
iyon ang Pebrero sais
ng lahat ng Pebrero sais


ang mga manggagawa’t
maralita’y nagdalamhati,
ang mga kababaihan
at kabataa’y nagluksa
kahit mga ibon sa papawirin
ay humuni ng pagluha
habang humahalakhak
ang mga buwitre
at siyang-siya

nagmarka ang pangyayaring yaon
at sumugat sa pakikibaka
ng mga obrero at ang pilat
na nilikha niyon ay humihiyaw
ng pagbangon at pagpapatuloy
ng nasimulang laban

at tulad ng binhing natuyo,
nalibing sa lupa, at tumubo
bilang isang matatag na punong
di basta-basta mabubuwal,
ang pagkatanim ng kanyang
kalansay sa lupa’y
nagpapahayag
ng muling pagsilang,
paglago, at muling paglawak
ng kilusang manggagawa upang
tuluyang burahin ang mga buktot
na mamumuhunan at mga burgis
at naghahari-harian sa lipunan

iyon ang Pebrero sais
ng lahat ng Pebrero sais
pagkat sa araw na iyon
pinaslang
          ang dakilang proletaryo

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 1, Taon 2003, p.8.

Marso 14, 1883 - sa huling sandali ni Karl Marx

MARSO 14, 1883
(sa huling sandali ni Karl Marx)
ni Greg Bituin Jr.

Nakatulog ng mahimbing ang maestro
sa paborito niyang upuan

Siya ang maestro na nagpakilala sa atin
ng makauring tunggalian
upang ang kapanglawang dulot ng kapital
ay mapawi ng liwanag
tungo sa paglaya ng uring manggagawa

Siya, na ipinagmalaki
ang tagumpay ng Komyun ng Paris
at umakda ng Das Kapital,
ay pumanaw na mahirap ngunit mayaman
sa pamanang kaisipan
para sa manggagawa ng buong daigdig

Ang panawagan niyang
“Manggagawa sa lahat ng bansa, magkaisa
pagkat walang mawawala
kundi ang tanikala ng inyong pagkaalipin”
ay buhay na buhay
sa kasalukuyang panahot ng salot
na globalisasyon

Nakatulog na ng mahimbing ang maestro
doon sa paborito niyang upuan
upang di na gumising magpakailanman

At sa himlayang Highgate sa Londres
kapiling ng namayapang maybahay,
ang katawang pagal ng dakilang maestro’y
tuluyan nang namahinga

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 1, Taon 2003, p.8.

Ilang Tula ng Pag-ibig

ILANG TULA NG PAG-IBIG

ni Greg Bituin Jr.



O, AKING SINTA

(8 pantig)



Puso ko ay matiwasay

Pagkat minahal mong tunay

Ikaw ay walang kapantay

Pag-ibig nati’y makulay.



Pagmamahal ko’y dalisay

Lagi pang buhay na buhay

Pag ganda mo’y sumisilay

Ako nga’y patay na patay.



Pag ikaw sa’ki’y nawalay

Tiyak ako’y mananamlay

Dahil wala na ang gabay

Sa nag-iisa kong buhay.



MANDIRIGMA

(12 pantig)



Mandirigma akong handa sa labanan

Di umuurong sa anumang larangan

Sa rebolusyon maging sa pag-ibig man

Hanggang sa dulo kita’y ipaglalaban

Pagkat dyosa ka ng puso ko’t isipan.



ONE-WOMAN MAN

(12 pantig)



Sa puso ko’y isa lang ang paraluman

Na aking mamahali’t aalagaan

Pag nalasap ko’y matinding kabiguan

Mabuti pang pasagpang kay Kamatayan.



PANGARAP KITA

(8 pantig)



Ako’y di lang mandirigma

Isa rin akong makata.

Bakit ako mangangamba

Na sabihing mahal kita

Ikaw ang tangi kong musa

Pangarap ko’y ikaw, sinta.



AKO’Y NALULUMBAY
(6 pantig)

Ako’y nalulumbay
Pag di ka nakita
Laging nananamlay
At natutulala
Tila ako patay
Nasaan ka, sinta
Ako’y mabubuhay
Pag nasilayan ka
Para sa masa at sinisinta.

Miyerkules, Mayo 14, 2008

Kapag Nabuntis ang Tula

KAPAG NABUNTIS ANG TULA
ni Gregorio V. Bituin Jr.
(10 pantig bawat taludtod)

O, nabubuntis din itong tula
Kapag nagtalik ang pluma't diwa
Kaya magsisilang ang makata
Ng obra-maestra niyang likha
Para sa sinisinta't sa madla

Miyerkules, Mayo 7, 2008

Bulaklak ng Mayo

BULAKLAK NG MAYO
ni Greg Bituin Jr.
(siyam na pantig bawat taludtod)

pag may bulaklak na nasamyo
agad tayong napapalinga
dagling hanap ang pinagmulan
ng samyong humahalimuyak
hanap ng dalaga’y pag-ibig
hanap ko nama’y kabaong

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo IX, Blg. 1, Taon 2004, p.8.

Soneto sa Isang Sapilitang Nawala

SONETO SA ISANG SAPILITANG NAWALA
ni Gregorio V. Bituin Jr.

Di tayo magkakilala at marahil

Ay di na magiging magkakilala pa

Ngunit sa balita’y nakilala kita

Nang ikaw’y dinukot ng mga de-baril.


Tinangay kang pilit ng mga marahas

Kung anong dahilan ay di namin alam

Ang tingin ko sila’y walang pakiramdam

At de-susing robot, mga talipandas.


Bakit kailangang meron pang mawala?

Bakit tulad mo’y sapilitang kinuha?

Iyan ba’ng esensya nitong demokrasya?

Bakit kailangang maraming lumuha?


Makamtan mo nawa yaong katarungan

Nang sakit sa dibdib ni ina’y maibsan.

Bakit May Iskwater?

BAKIT MAY ISKWATER?

ni Gregorio V. Bituin Jr.


Bakit ka iskwater sa sariling bayan

Gayong ikaw nama’y dito isinilang?

Bakit ba wala kang sariling tahanan

At sa barung-barong nakatira lamang?


Bakit ba iskwater ay dinedemolis

Ng mga demonyong nagngingising-aso?

Bakit sila’y pilit na pinapaalis

Kahit na ng mga nasasa gobyerno?


Bakit dayo itong may sariling lupa

Dahil ba sila’y may pambiling salapi?

Bakit sila’ng hari sa bayang kawawa

Dahil may pribado silang pag-aari?


Sadya bang mahirap ang maging iskwater?

Pagkat di tantanan ng mga Lucifer?


Sampaloc, Maynila

Mayo 7, 2008

Soneto sa Iskwater

SONETO SA ISKWATER
ni Gregorio V. Bituin Jr.

Bakit daw may iskwater sa sariling lupain?
Itong tanong sa akin ng kaibigang turing.
Akin itong sinagot ng may mga pasaring:
Bakit mga banyaga’y naghahari sa atin?

May iskwater sa bayan dahil sa kahirapan
Umalis sila doon sa lupang sinilangan
Upang dito sa lunsod makipagsapalaran
Nagbabakasakaling gutom nila’y maibsan.

Sa lunsod na makinang, marami ang napadpad
Dahil ito’y lupa raw ng tunay na pag-unlad
Sila’y nabigo pagkat bawat kilos, may bayad
Kaya dahil sa hirap, di pa rin makausad.

Dapat nating baguhin ang kalagayang ito
Pagbabago’y pamana sa bayan nati’t apo.

Sampaloc, Maynila
Mayo 7, 2008

Dugo sa Kanilang Kamay

DUGO SA KANILANG KAMAY
ni Gregorio V. Bituin Jr.

Mas mabuti pang matulad
sa nangyari kay Archimedes
na isang matematisyang Griyego
kaysa tulad ng nangyari kina
Julius Caesar na isang Romano
at Andres Bonifacio na isang Pilipino.

Si Archimedes ang nagdisenyo
ng mga armas-pandigmang
sa nasyon nila’y nagdepensa
ngunit sa likod siya ay sinaksak
ng isang sundalong kaaway
ng kanilang nasyon habang
siya’y abalang nag-aanalisa
at gumagawa ng pormula
sa matematika.

Sa salaysay naman ni Plutarch,
si Julius Caesar ay magiging
emperador sana ng Roma
kundi pataksil na pinaslang
ng mga kababayang pinangunahan
ng respetadong si Brutus
sa pintuan ng kanilang Senado.

Gayundin naman, si Andres Bonifacio
ay pinaslang ng mga kapanalig
sa kilusan ayon sa sentensya
ni Emilio Aguinaldo at walang awang
binaril ng kawal na kaapelyido
ng isang naging pangulo ng bansa
na si Major Lazaro Macapagal.

Si Archimedes at si Julius Caesar
ay pinaslang gamit ang espada
habang si Andres Bonifacio
kasama ang isang kapatid
ay binistay ng bala.

Kung darating sa akin ang bihirang
pagkakataong mapaslang tulad ng
mga kilalang taong ito sa kasaysayan
hinihiling kong sana’y sa kamay
ng mga kaaway ako ay mautas
tulad ng nangyari kay Archimedes
di tulad ng pagkalugmok nina
Julius Caesar at Andres Bonifacio
sa kamay ng mga Hudas.

Martes, Mayo 6, 2008

Bata, Bata, Kay Aga Mong Tumanda

BATA, BATA, KAY AGA MONG TUMANDA
ni Gregorio V. Bituin Jr.

Bata batuta, isang perang muta
Ang siyang awit ng ilang mga bata
Ngunit bakit nga ba sa murang gulang
Ay nagmistula silang mga batang gurang.

Bata, bata, bakit ba kay aga mong tumanda
Musmos pa’y agad naging manggagawa
Iginagapang mo ba sa pag-aaral si ama
At naghahanap ng gatas para kay ina?

Lakas-paggawa nila’y hindi naman sulit
Natatanggap na sweldo’y sadyang maliit
Wala pang benepisyo silang nakakamit
Ang kalagayan nila’y dapat lang ikangitngit.

Murang katawan nila’y ginagamit
Presyo ng lakas-paggawa nila’y inuumit
Masusuklam dito kahit na ang langit
Sa kalagayang ito ng mga paslit.

Anong ating gagawin, o kapwa maralita
Bakit pumapayag sa ganitong mga gawa
Mga batang ito’y kay agang napariwara
Sa murang gulang sila ay kinakawawa.

Ah, itong bulok na sistema ang siyang dahilan
Kung bakit nasadlak sila sa kahirapan
Sa eskwelahan dapat sila, hindi sa pagawaan
Mga karapatan nila’y dapat nilang malaman

Kaya tayo nang mag-organisa, o mga maralita
Organisahin ang nagtatrabahong mga bata
Dapat nang matigil iong kalagayan nilang dusta
At sa eskwelahan ay ibalik ang batang inaba.

 Nalathala sa publikasyong Taliba ng Maralita, Tomo XII, Blg 2, p.8
Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML)

SCHNEIDER, Setyembre 13, 2005

SCHNEIDER, Setyembre 13, 2005
ni Gregorio V. Bituin Jr.

(Ang manggagawang si Ka Teotimo Dante ng pabrikang Schneider sa Lungsod ng Kalookan ay napaslang umano ng mga gwardya ng kapitalista sa piketlayn.)

Piketlayn ng Schneider ay nahilahil
Binaboy nitong kapitalistang sutil
Kapatid nating manggagawa’y sinupil
Sila’y ginamitan ng dahas ng baril.

Obrero ng Schneider ay kinawawà
Natigmak ng dugo, hinagpis at luhà
Mga manggagawa’y tinadtad ng tinggâ
Walong sugatan at isa’y bumulagtâ.

Kaya sa obrero’y agad umukilkil
Gulong ng hustisya’y di dapat tumigil
At kaming naiwan dito’y di titigil
Hanggang sa managot yaong mga taksil.

Nalathala sa publikasyong Taliba ng Maralita, Tomo X, Blg 4, Taon 2005, p.8.

Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML).

Walang Amo

WALANG AMO
ni Gregorio V. Bituin Jr.
(siyamang pantig bawat taludtod)

Hindi kailangang may hari
Hindi kailangang may amo
Hindi dapat may panginoon
Dapat walang kapitalista
O panginoong maylupa man.

Dapat pantay ang kalagayan
Walang mahirap o mayaman
Dahil ito ang nakasulat
D'un sa mapagpalayang aklat
Ng katarungang panlipunan.

Lahat tayo'y ipinanganak
Kung saan lahat tayo'y hubad
At lahat tayo'y mamamatay
At parehong malilibing sa hukay

Tayo ba'y pantay-pantay lamang
Sa pagkasilang sa daigdig
At paglisan dito sa mundo
Pero sa buo nating buhay
Pagkapantay ay di natamo.

Ah, ngunit kahit sa libingan
Ay di rin naman sadyang pantay
Sa mayaman ay musoleo.
Sa mahirap, isa lamang krus.

Ang maganda lang sa paglisan
Sa mundong ibabaw ay itong
Pantay na nilang kalagayan
Pagkat wala na silang amo.

Sa Iyo, Sitio Mendez

SA IYO, Sitio Mendez

ni Gregorio V. Bituin Jr.

(Ang Sitio Mendez ay isang komunidad sa Baesa, Quezon City, kung saan nagtagumpay silang makabalik sa kanilang lugar isang buwan matapos silang idemolis noong Hulyo 1997.)



Oh, Sitio Mendez, ikaw ay kanilang nilait

Buhay mo’y sinira nila, sila na kaylupit

Para lang makuha, tahanan mong kayliit

Bahay mo’y winasak, kanila itong inilit.


Sinadya ka nilang isadlak sa hirap at pasakit

Hiniya ka nila kahit sa mata ng mga paslit

Ah, ito’y isang karanasang sadyang napakapait

Nilabanan mo sila’t di nagpadaig sa hagupit.


Di ba’t tama lamang naman ang iyong iginiit

Ngunit ikaw ay sadya nga nilang ginigipit

Doon sa lusak ay pinagapang ka nilang pilit

Kaya galit mo’y parang apoy na nagdirikit.


Tama lamang na karapatan mo’y iyong iginiit

Dinurog mo sila hanggang sila’y di na makahirit

Kaya nga’t mga tumbong nila’y parang pinilipit

Ang tagumpay mo, Sitio Mendez, ay iyong nakamit.


O, Sitio Mendez, nagbalik ka sa pinagmulan

Nagtagumpay ka mula sa matagal na labanan

Dahil sa pagkakaisa at tatag ng paninindigan

Nagbunga ng sigla ang matibay na kalooban.


Kalaban mo’y nagsiurong dahil sa pagkakaisa

Ng buong pamunuan at lahat ng mga kasama

Kaya’t ikaw ang totoong bayani, hindi ang iba

Hindi ang mga pulitikong nakikiagaw ng eksena.


Ang tagumpay mo’y di namin malilimutan

Halimbawa mo’y uukilkil lagi sa aming isipan

O, Sitio Mendez, inspirasyon ka na ng sambayanan

Kaya’t isinulat ka namin sa aklat ng kasaysayan.


Tagumpay mo’y tagumpay ng uring anakpawis

Ikaw ay huwarang bayani, O, Sitio Mendez

Huwag ng magpalamang sa sinumang Herodes

Dahil sa mata ng madla, ikaw pa rin ang Da Best.

Linggo, Mayo 4, 2008

Hibik ng isang ulila

HIBIK NG ISANG ULILA
ni Greg Bituin Jr.
waluhang pantig

itay, nahan ka na, itay
bakit mo kami iniwan
at pinili ang digmaan?

sabi sa akin ni inay
tungkulin mo raw depensahan
ang kalayaan ng bayan

ngunit ang digmaang iya'y
isang digmaang agresyon
at di ito pagtatanggol

inuto ka lamang nila
pagkat imbes ipagtanggol
at depensahan ang masa

ang ugat ng gerang iya'y
upang makuha ng Kano
ang langis ng bansang Iraq

langis na magreresolba
sa hingalong ekonomya
ng malaking bansa nila

ngunit ang pinakaugat
sa pakiwari ko, itay
ay ang kasibaan nila

sa tubo't kapangyarihan
at sinisisi ko sila
oo, sila, itay, sila

dahil sa iyong maagang
pagkawala, pagkawala
sa piling namin ni inay

ah, malupit ang digmaan
na maraming inulilang
pamilya at kabataan

ah, kailan ba darating
itong inaasam nating
tunay na kapayapaan?

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralit ng Lungsod (KPML), Hulyo-Setyembre 2002, p.8.

Laban

LABAN
ni Greg Bituin Jr.
isang tanaga

Hindi sa panaginip
O patunga-tunganga
Tayo magtatagumpay.
Gumising at lumaban.


- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Hulyo-Setyembre 2002, p.8.

Epidemya ng kahirapan

EPIDEMYA NG KAHIRAPAN
ni Greg Bituin Jr.
tigpipitong pantig

ngayo'y nagagamot na
nitong modernong syensya
sakit na malulubha
na dinanas ng madla
ngunit ang karaniwang
sakit nitong lipunan
- ito ngang kahirapan -

ay di pa malunasan
makapaglakbay na nga
itong tao sa buwan
naabot na ng tao
sapat na karunungan
at pati kaunlaran
nitong buong lipunan

upang mapaginhawa
itong sangkatauhan
maunlad na ang syensya
pati teknolohiya
pero hikahos pa rin
ang mayorya sa mundo
tila di umuusad

kahit isang pulgada
ang kalidad ng buhay
di ba'y walang kaparis
ang itinaas nitong
produksyon sa pagkain
pero milyun-milyon pa'y
namamatay sa gutom

maraming nagkasakit
dahil sa malnutrisyon
naglalakihan itong
mga gusali't mansyon
pero walang matirhan
ang daan-daang milyong
tao dito sa mundo

sobra-sobra ang yaman
na galing sa Paggawa
pati sa kalikasan
subalit ang problema
ang mga yamang ito'y
inaari lang nitong
minorya sa lipunan

kanilang inalipin
itong nakararaming
walang ari-arian
tunay na ang mikrobyo
ng ating kahirapan
ay itong sinasabing
pribadong pag-aari

ng mga kagamitan
sa produksyon na tulad
ng makina't lupain
pribadong pag-aari'y
siyang pinakaugat
ng mga paghihirap
ng tao sa daigdig

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Oktubre-Disyembre 2002, p.8.

Biyernes, Mayo 2, 2008

Edsa Tres

EDSA TRES
ni Gregorio V. Bituin Jr.
10 pantig bawat taludtod

ang dibdib ng dukha'y nagngangalit
nagsisulak ang kanilang dibdib
nang "kanilang" pangulo'y mapiit
kaya silang dukha'y naghimagsik

nilusob nila ang Malakanyang
pinagtaob ang mga sasakyan
maralita'y nakipagbatuhan
kayraming nangasaktang sibilyan

kasalanan ba nilang mangarap
na makaahon sa paghihirap
na siyang ipinangakong ganap
ng pangulong "para sa mahirap"

mapagpanggap man yaong pangulo
napaniwala man sila nito
ganap silang nag-ilusyon dito
na aahon sa hirap ang tao

sadyang epektibo ang islogang
"para sa mahirap" sa halalan
kahit pawang kabalintunaan
ang ginawa ng pangulong iyan

pangulong "mahirap", pangmayaman
nais pang tulungan si Lucio Tan
kaysa obrero sa paliparan
kaysa dukhang nawalang tahanan

pangulo'y bumagsak sa Edsa Dos
dahil sa hweteng, agad nalaos
pasensya ng bayan ay naubos
nang sobre'y pinagdamot ng lubos

ngunit nag-Edsa Tres nga ang dukha
ang Malakanyang nga'y nabulaga
hibik ng dukha'y dapat lumaya
ang pangulong sa bayan nandaya

ipinakita nila ang lakas
na kung mga dukha'y mag-aaklas
sa pwersa ng gobyerno'y tutumbas
ngunit di pa rin nakaparehas

dahil di sila organisado
tangay ng galit, di ng prinsipyo
ngunit kung muling gagawin ito
dapat paghandaan itong todo

Paunang Salita sa MASO 2

Paunang Salita sa MASO 2
ni Gregorio V. Bituin Jr.
14 pantig bawat taludtod, soneto

(Inilathala ang MASO: Panitikan ng Uring Manggagawa, Ikalawang Aklat noong Disyembre 2007)

O, mga kaibigan, kasamang manggagawa,
Ang ikalawang aklat ng MASO’y narito na.
Katipunan ito ng mapagpalayang katha
Na pawang likha ng manggagawa’t aktibista
Na aming tinipon at dito’y inilathala.
Ito’y mga sulating pinagsikapan nila
Pinaghusay upang ihandog sa manggagawa.

Masasalamin sa mga akda ang adhika
Na tuluyang baguhin ang bulok na sistema
Upang itong bayan ay tuluyang mapalaya
Sa kuko ng mga buhong na kapitalista
At maitayo ang gobyerno ng manggagawa.
Sa MASO’y maraming aral tayong makukuha
Halina’t basahin ang kanilang mga akda.

Sampaloc, Maynila
Nobyembre 7, 2007

Huwebes, Mayo 1, 2008

Mayo 1, 1886, Haymarket Square, Chicago, Illinois

MAYO 1, 1886
Haymarket Square, Chicago, Illinois
ni Gregorio V. Bituin Jr.
12 pantig

(nalathala sa pahayagang Obrero, Blg. 4, Taon 2003)

Kinikilala na ng maraming tao
Sa maraming panig ng sandaigdigan
Araw ng Paggawa itong Mayo Uno
Ngunit alam mo ba ang pinagsimulan
Ng dakilang araw ng mga obrero?

Mahigit nang ilampung dekada ngayon
Itong nakalilipas nang itinakda
Ng American Federation of Labor
Na ang Mayo Uno ng taon ding yaon
Ay maging pambansang araw ng pagkilos

Ng mga obrero, pati mga unyon
Mula iba’t ibang mga pagawaan
Upang ang kanilang mga kahilingan
Patungkol sa walong oras na paggawa
Ay maganap at maisakatuparan.

Pagkat nang panahong iyo’y umaabot
Nang sampu hanggang labing-anim na oras
Ang ginugugol nilang lakas-paggawa
Nang kapitalista’y tumubo’t bumundat
Habang ang lakas-paggawa’y binabarat.

At ang sentro ng pagkilos nilang yao’y
Sa Haymarket Square, Chicago, Illinois
Upang itong walong oras na paggawa’y
Kanilang maipaglaban at makamtan
Ngunit ang estado’y biglaang nandahas.

Doo’y isang manggagawa ang nasawi
At mahigit pitumpu ang nasugatan
Limang lider nito’y kanilang hinuli’t
Kinasuhan ng iba’t ibang paratang
At hatol ay ‘execution by musketry’.

Ginawaran ng kamatayan ang apat
At ang isa’y naunang nagpatiwakal
Pati na ang tanggapan ng mga unyon
Ay nilusob at giniba ng pulisya
Pansamantalang natigil ang aklasan.

Ang pandarahas na iyon ng estado’y
Nakilalang ‘Haymarket Square massacre’
Pangyayaring yao’y hindi na nawaglit
Bagkus nagsilbing ningas na nagliliyab
Sa puso’t isip ng mga manggagawa.

Manggagawa’y hindi naging piping saksi
Pagkat tatlong taon pagkalipas niyon
Isang pandaigdigang pulong sa Paris
Ang idinaos ng iba’t ibang unyon
Pati na mga samahang manggagawa.

Dito’y kanilang ganap na kinilala
Manggagawang martir, dito’y dinakila
Pati isyung kinalagot ng hininga
- Ang hiling na walong oras na paggawa -
Sa pandaigdigang saklaw ay dinala.

At doo’y kanila ring idineklara
Ang susunod na Mayo Uno ng taon
At lahat pa ng Mayo Unong daratal
Bilang isang araw ng pandaigdigang
Opensiba nitong uring manggagawa.

At bago sumapit ang sunod na siglo
Hiling nilang walong oras na paggawa
At iba pang karapatan ng obrero
Ay napagtagumpayan ng manggagawa
Mula sa iba’t ibang panig ng mundo.

Mabuhay ka, manggagawa, mabuhay ka
Ikaw na sa kasaysayan ay lumikha
Na tanging pag-aari’y lakas-paggawa’t
Bumubuhay ng ekonomya ng bansa
Ah, hindi pa tapos ang pakikibaka

Pagkat hanggang ngayo’y nagpapatuloy pa
Tunggalian ng kapital at paggawa
Kaya sa bawat Mayo Unong daratal
Isigaw natin ng buong puso’t sigla:
“Ating tahakin ang landas ng paglaya!”